IMJ 71.072.0249 (RINAP 3/1 Sennacherib 23, ex. 01) [Sennacherib][via rinap/sources]
| Obverse | |
| Column i | |
| i 1i 1 | mdEN.ZU-ŠEŠ.MEŠ-eri-ba LUGAL GAL ⸢LUGAL⸣ [dan-nu] |
| i 22 | LUGAL kiš-šá-ti LUGAL ⸢KUR⸣ aš-šur.KI LUGAL kib-rat LÍMMU-[tim] |
| i 33 | RE.É.UM it-pe-šú mi-gir DINGIR.MEŠ GAL.[MEŠ] |
| i 44 | ⸢na⸣-[ṣir kit-ti] ⸢ra-ʾi⸣-[im] ⸢mi-šá⸣-[ri] |
| i 55 | [e-piš ú-sa]-a-ti a-lik tap-pu-ut a-[ki-i] |
| i 66 | ⸢sa⸣-[ḫi-ru] dam-qa-a-ti eṭ-lum gít-ma-⸢lum⸣ |
| i 77 | zi-ka-ru qar-du a-šá-red kal ma-al-ki |
| i 88 | rap-pu la-ʾi-iṭ la ma-gi-ri |
| i 99 | mu-šab-ri-qu za-ma-a-ni daš-šur KUR-ú GAL-ú |
| i 1010 | LUGAL-ut la šá-na-an ú-šat-li-ma-an-ni-ma |
| i 1111 | UGU gi-mir a-šib pa-rak-ki ú-šar-ba-a GIŠ.TUKUL.MEŠ-ia |
| i 1212 | ul-tu A.AB.BA e-le-ni-ti ša šá-lam dUTU-ši |
| i 1313 | a-di tam-tim šap-li-ti ša ṣi-it dUTU-ši |
| i 1414 | gim-ri ṣal-mat SAG.DU ú-šak-niš še-pu-ú-a |
| i 1515 | ù ma-al-ki šep-ṣu-ti e-du-ru ta-ḫa-zi |
| i 1616 | da-ád-me-šú-un iz-zi-bu-ma ki-ma su-tin-ni.MUŠEN |
| i 1717 | ni-gi-iṣ-ṣi e-diš ip-par-šú a-šar la ʾa-a-ri |
| i 1818 | i-na maḫ-re-e ger-ri-ia ša mdAMAR.UTU-⸢IBILA-SUM⸣.NA |
| i 1919 | LUGAL KUR.kár-ddun-ía-àš a-di ERIM.ḪI.A ELAM.MA.KI [re]-ṣi-šú |
| i 2020 | i-na ta-mir-ti kiš.KI áš-ta-kan ⸢BAD₅⸣.BAD₅-šú |
| i 2121 | i-[na] ⸢MURUB₄ tam-ḫa⸣-[ri] šu-a-tu e-zib |
| i 2222 | ⸢KARAŠ⸣-su e-⸢diš⸣ [ip]-⸢par-šid⸣-ma ⸢na⸣-piš-tuš e-ṭí-ir GIŠ.[GIGIR.MEŠ] ANŠE.KUR.RA.MEŠ |
| i 2323 | GIŠ.ṣu-um-bi ANŠE.KUNGA.MEŠ ša i-na qit-ru-ub |
| i 2424 | ta-ḫa-zi ú-maš-ši-ru ik-šu-da ŠU.II-a-a |
| i 2525 | a-na É.GAL-šú ša qé-reb KÁ.DINGIR.RA.KI ḫa-diš e-ru-um-ma |
| i 2626 | ap-te-ma É ni-ṣir-ti-šú KÙ.GI KÙ.BABBAR ú-⸢nu-ut KÙ⸣.GI KÙ.BABBAR |
| i 2727 | NA₄ a-qar-tu mim-ma šum-šú NÍG.ŠU NÍG.GA [la] ni-bi |
| i 2828 | ka-bit-tu GUN MUNUS.ŠÀ.É.GAL.MEŠ-šú LÚ.TIRUM.MEŠ |
| i 2929 | LÚ.man-za-az pa-ni LÚ.NAR.MEŠ MUNUS.NAR.MEŠ [si-ḫir]-ti |
| i 3030 | um-ma-a-ni ma-la ba-šu-ú mut-tab-bi-lu-[tú] É.GAL-uš |
| i 3131 | ú-še-ṣa-am-ma šal-la-tiš am-nu i-na e-muq daš-[šur] EN-ia |
| i 3232 | 75 URU.MEŠ-šú dan-nu-ti É BÀD.MEŠ-ni ša [KUR].kal-di |
| i 3333 | ù 4 ME 20 URU.MEŠ-ni TUR.MEŠ ša li-me-ti-šú-nu |
| i 3434 | al-me ak-šudud áš-lu-la šal-la-su-un |
| i 3535 | LÚ.úr-bi LÚ.a-ra-mu LÚ.kal-du ša qé-reb [UNUG].KI |
| i 3636 | NIBRU.KI kiš.KI URU.ḫur-sag-kalam-ma GÚ.DU₈.A.KI ⸢ZIMBIR⸣.KI |
| i 3737 | a-di DUMU.MEŠ URU EN ḫi-iṭ-ṭi ú-še-ṣa-am-ma šal-la-[tiš am]-nu |
| i 3838 | i-na ta-a-a-ar-ti-ia LÚ.tu-uʾ-mu-na LÚ.[ri-ḫi]-ḫu |
| i 3939 | LÚ.ia-daq-qu LÚ.ú-bu-du LÚ.gib-[re-e] |
| i 4040 | LÚ.ma-la-ḫu LÚ.gu-ru-mu LÚ.[ú-bu-lum] |
| i 4141 | LÚ.da-mu-nu LÚ.gam-bu-lum [LÚ.ḫi]-in-[da-ru] |
| i 4242 | LÚ.ru-ʾu-ú-a LÚ.pu-qu-du LÚ.ḫa-am-ra-nu |
| i 4343 | LÚ.ḫa-ga-ra-nu LÚ.na-ba-tu LÚ.li-iʾ-ta-ú |
| i 4444 | LÚ.a-ra-mu la kan-šu-ti [mit-ḫa]-riš ak-šudud |
| i 4545 | 2 ME 8 LIM UN.MEŠ TUR GAL [NITA] ù MUNUS ANŠE.KUR.RA.MEŠ |
| i 4646 | ANŠE.KUNGA.MEŠ ANŠE.MEŠ ANŠE.GAM.MAL.MEŠ GU₄.MEŠ ù ṣe-e-ni |
| i 4747 | ša la ni-bi šal-la-⸢tu ka⸣-bit-tú áš-lu-la a-na qé-reb KUR aš-šur.KI |
| i 4848 | i-na me-ti-iq ger-ri-ia ša mdMUATI-EN-MU.MEŠ |
| i 4949 | LÚ.qí-[pi URU].ḫa-ra-ra-ti KÙ.GI KÙ.BABBAR |
| i 5050 | GIŠ.mu-[suk-kan-ni] GAL.MEŠ ANŠE.MEŠ ANŠE.GAM.MAL.MEŠ GU₄.MEŠ |
| i 5151 | ù ṣe-e-ni ta-mar-ta-šú ka-bit-tu am-ḫur |
| i 5252 | [ba-ḫu]-⸢la⸣-ti URU.ḫi-rim-me LÚ.KÚR ak-ṣi |
| i 5353 | [i-na GIŠ.TUKUL].MEŠ ú-šam-[qit-ma] e-du ul e-zib |
| i 5454 | [pag]-⸢ri⸣-šu-un i-na ga-ši-ši a-lul-ma |
| i 5555 | [si]-ḫir-ti URU ú-šal-me na-gu-ú šu-a-tu |
| i 5656 | a-na eš-šu-ti aṣ-bat [1]-en GU₄ 10 UDU.NÍTA.MEŠ |
| i 5757 | 10 ANŠE GIŠ.GEŠTIN 20 ANŠE [ZÚ.LUM].MA re-še-te-⸢šú⸣ |
| i 5858 | a-na DINGIR.MEŠ-ni KUR aš-šur.KI EN.MEŠ-ia ú-kin dà-ri-šam |
| i 5959 | i-na 2-e ger-ri-ia daš-[šur be]-lí ú-tak-kil-an-ni-ma |
| i 6060 | a-na KUR LÚ.kaš-ši-i ù KUR LÚ.ia-su-bi-gal-la-a-a |
| i 6161 | ša ul-tu ul-la a-na [LUGAL].MEŠ-ni AD.MEŠ-ia |
| i 6262 | la kit-nu-šú lu al-lik qé-[reb ḫur-šá-a]-ni zaq-ru-ti |
| i 6363 | A.ŠÀ nam-ra-ṣi i-na [ANŠE.KUR.RA] ar-kab-ma |
| i 6464 | GIŠ.GIGIR GÌR.II-ia i-na ti-ik-ka-⸢a-ti⸣ ú-šá-áš-ši |
| i 6565 | áš-ru šup-šu-qu i-na GÌR.II-ia ri-ma-niš at-tag-giš |
| i 6666 | URU.É-mki-lam-za-aḫ URU.ḫa-ar-[diš]-pi URU.É-mku-bat-ti |
| i 6767 | [URU].MEŠ-ni-šú-nu É BÀD.MEŠ dan-nu-ti al-me KUR-ud |
| i 6868 | UN.MEŠ ANŠE.KUR.RA.MEŠ ANŠE.KUNGA.[MEŠ] ANŠE.MEŠ GU₄.MEŠ |
| i 6969 | [ù] ṣe-e-ni ul-tu qer-bi-[šú]-un ú-še-ṣa-am-ma |
| i 7070 | [šal]-⸢la⸣-tiš am-nu ù URU.MEŠ-ni-[šú-nu] ⸢TUR⸣.MEŠ ša ni-ba |
| i 7171 | [la] i-šu-ú ap-pu-ul aq-[qur ú]-še-me kar-meš |
| i 7272 | É EDIN kul-ta-ri mu-[šá-bi]-šú-nu |
| i 7373 | i-na dGIŠ.BAR aq-mu-ma di-[tal-liš] ú-še-me |
| i 7474 | ú-ter-ma URU.É-mki-lam-za-[aḫ] šu-a-tu |
| i 7575 | a-na URU.bir-tu-ti aṣ-bat UGU [ša u₄]-um pa-ni |
| i 7676 | [BÀD].MEŠ-šú ú-dan-nin-ma UN.MEŠ KUR.[KUR] ki-šit-ti ŠU.II-ia |
| i 7777 | i-na lìb-bi ú-še-šib UN.MEŠ KUR LÚ.kaš-ši-i |
| Column ii | |
| ii 1ii 1 | ù KUR LÚ.ia-su-bi-gal-la-[a-a] |
| ii 22 | ša la-pa-an GIŠ.TUKUL.MEŠ-ia ip-par-[šid-du] |
| ii 33 | ul-tu qé-reb KUR-i ú-še-ri-[dam-ma] |
| ii 44 | [i-na] ⸢URU⸣.ḫar-diš-pi URU.É-mku-bat-ti ú-šar-me |
| ii 55 | [i]-na ŠU.II LÚ.šu-ut SAG-ia LÚ.EN.NAM URU.ar-rap-ḫa |
| ii 66 | am-nu-šu-nu-ú-ti NA₄.NA.RÚ.A ú-še-piš-ma |
| ii 77 | li-i-tum ki-šit-ti ŠU.II ša UGU-šú-un áš-tak-ka-nu |
| ii 88 | ṣe-ru-uš-šú ú-šá-áš-ṭir-ma i-na qer-bi URU ul-ziz |
| ii 99 | pa-an ni-ri-ia ú-ter-ma a-na KUR.el-li-pi |
| ii 1010 | aṣ-ṣa-bat ḫar-ra-nu el-la-mu-ú-a mis-pa-ba-a-ra |
| ii 1111 | [LUGAL]-šú-un URU.MEŠ-šú dan-nu-ti É ni-ṣir-ti-šú |
| ii 1212 | [ú]-maš-šir-ma a-na ru-qé-e-ti in-na-bit |
| ii 1313 | ⸢gim-ri⸣ KUR-šú DAGAL-tim GIM MURU₉ as-ḫu-up |
| ii 1414 | URU.[mar]-ú-biš-ti URU.ak-ku-ud-du URU.MEŠ-ni |
| ii 1515 | É ⸢LUGAL-ti⸣-šú a-di 34 URU.MEŠ-ni TUR.MEŠ |
| ii 1616 | ša li-[me]-ti-šú-nu al-me KUR-ud ap-pul aq-qur |
| ii 1717 | i-na dGIŠ.[BAR] aq-mu UN.MEŠ TUR GAL NITA ù MUNUS |
| ii 1818 | ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ |
| ii 1919 | GU₄.MEŠ ù [ṣe]-e-ni a-na la mi-nam áš-lu-⸢lam-ma⸣ |
| ii 2020 | a-di la ba-ši-i ú-šá-lik-šu-ma ú-ṣa-aḫ-ḫir ⸢KUR⸣-su |
| ii 2121 | URU.ṣi-ṣi-ir-⸢tu URU⸣.[ku-um-ma]-⸢aḫ⸣-[lum] URU.MEŠ dan-nu-ti |
| ii 2222 | a-di URU.MEŠ-ni ⸢TUR⸣.[MEŠ] ⸢ša⸣ li-me-ti-šú-nu |
| ii 2323 | KUR.É-mba-ar-ru-[ú na-gu]-ú a-na [gi-mir]-ti-šú |
| ii 2424 | ul-tu qé-reb KUR-šú ab-⸢tuq-ma UGU mi⸣-[ṣir KUR aš]-⸢šur⸣.KI |
| ii 2525 | ú-rad-di URU.el-en-za-áš a-⸢na URU⸣ [LUGAL-ú]-⸢ti⸣ |
| ii 2626 | ù dan-na-at na-ge-e šu-a-tu [aṣ-bat-ma] |
| ii 2727 | MU-šú maḫ-ra-a ú-na-kir-ma URU.kar-mdEN.ZU-⸢ŠEŠ.MEŠ⸣-SU |
| ii 2828 | at-ta-bi ni-bit-su UN.MEŠ KUR.KUR ki-šit-ti ŠU.II-[ia] |
| ii 2929 | i-na lìb-bi ú-še-šib i-na ŠU.II LÚ.šu-ut SAG-ia |
| ii 3030 | LÚ.EN.NAM URU.ḫar-ḫar [am]-nu-ma ú-rap-piš ma-a-ti |
| ii 3131 | i-na ta-a-a-ar-ti-ia [ša] KUR.ma-da-a-a ru-qu-ti |
| ii 3232 | ša i-na LUGAL.MEŠ-ni AD.⸢MEŠ-ia⸣ ma-am-man la iš-mu-ú |
| ii 3333 | zi-kir KUR-šú-un man-da-ta-šú-nu ka-bit-tu am-ḫur |
| ii 3434 | a-na ni-ri be-lu-ti-ia ú-šak-ni-su-nu-ti |
| ii 3535 | i-na [šal-ši] ⸢ger⸣-ri-ia [a]-⸢na⸣ KUR.ḫa-at-ti lu al-lik |
| ii 3636 | mlu-li-i LUGAL URU.ṣi-[du]-un-ni pul-ḫi me-lam-me |
| ii 3737 | be-lu-ti-ia is-ḫu-pu-šú-[ma] a-⸢na ru-uq-qí⸣ MURUB₄ tam-⸢tim⸣ |
| ii 3838 | in-na-bit-ma KUR-šú e-mid URU.ṣi-du-⸢un⸣-[nu GAL-ú] |
| ii 3939 | URU.ṣi-du-un-nu ṣe-eḫ-ru URU.É-[zi]-⸢it⸣-ti |
| ii 4040 | URU.ṣa-ri-ip-tu URU.ma-ḫal-li-ba URU.ú-šu-ú |
| ii 4141 | URU.ak-zi-bi URU.ak-ku-ú URU.MEŠ-šú dan-nu-ti |
| ii 4242 | [É] ⸢BÀD⸣.MEŠ a-šar ri-i-ti ù [maš-qí]-⸢ti⸣ É tuk-la-ti-šú |
| ii 4343 | ra-⸢šub-bat⸣ GIŠ.TUKUL daš-šur EN-⸢ia⸣ [is-ḫu-pu]-⸢šú-nu-ti⸣-ma |
| ii 4444 | ik-nu-⸢šú še⸣-pu-ú-a mtu-⸢ba⸣-[aʾ-lum i-na GIŠ.GU.ZA LUGAL-ú-ti] |
| ii 4545 | UGU-šú-[un] ú-še-šib-ma ⸢GUN⸣ [man-da-tu be-lu-ti-ia] |
| ii 4646 | šat-ti-[šam la] ba-aṭ-lu ú-[kin ṣe-ru-uš-šú] |
| ii 4747 | ša m[mi]-⸢in-ḫi⸣-[im]-mu URU.sam-⸢si⸣-[mu-ru-na-a-a] |
| ii 4848 | mtu-ba-aʾ-lu URU.ṣi-du-⸢un-na⸣-[a-a] |
| ii 4949 | mab-⸢di⸣-li-iʾ-[ti] URU.a-ru-da-[a-a] |
| ii 5050 | m[ú-ru]-mil-[ki] URU.gu-ub-la-a-a |
| ii 5151 | m[mi]-⸢ti⸣-in-ti URU.as-du-da-a-a |
| ii 5252 | mbu-du-DINGIR KUR.É-mam-ma-na-a-a |
| ii 5353 | mkam-mu-su-na-[ad]-bi KUR.ma-ʾa-ba-a-a |
| ii 5454 | mda-a-ram-mu [KUR].ú-du-um-ma-a-a |
| ii 5555 | ⸢LUGAL⸣.MEŠ-ni KUR MAR.TU.KI ka-⸢li⸣-[šú-un] ⸢IGI⸣.SÁ-e šad-lu-ti |
| ii 5656 | [ta-mar]-ta-šú-nu ka-bit-tu a-di 4-[šú a-na] ⸢maḫ⸣-ri-ia |
| ii 5757 | [iš]-šu-nim-ma iš-ši-qu GÌR.II-ia [ù mṣi]-⸢id⸣-qa-a |
| ii 5858 | LUGAL URU.is-qa-al-lu-na ša la ik-nu-⸢šú⸣ [a-na ni-ri-ia] |
| ii 5959 | DINGIR.MEŠ É AD-šú šá-a-šú DAM-su DUMU.MEŠ-⸢šú⸣ [DUMU.MUNUS.MEŠ-šú] |
| ii 6060 | ŠEŠ.MEŠ-šú NUMUN É AD-šú as-su-ḫa-am-ma a-na KUR aš-[šur.KI] |
| ii 6161 | ú-ra-áš-šú mLUGAL-lu-dà-ri DUMU mru-kib-ti |
| ii 6262 | LUGAL-šú-nu maḫ-ru-ú UGU UN.MEŠ URU.is-qa-al-lu-na |
| ii 6363 | áš-kun-ma na-dan GUN kàd-re-e be-lu-ti-ia |
| ii 6464 | e-mid-su-ú-ma i-šá-a-aṭ ab-šá-a-ni |
| ii 6565 | i-na me-ti-iq ger-ri-ia URU.É-da-gan-na |
| ii 6666 | URU.ia-ap-pu-ú URU.ba-na-a-a-bar-qa URU.a-zu-ru |
| ii 6767 | URU.MEŠ-ni ša mṣi-id-qa-a ša a-na GÌR.II-ia ár-ḫiš |
| ii 6868 | la ik-nu-šú al-me KUR-ud áš-lu-la šal-la-su-un |
| ii 6969 | LÚ.GÌR.NÍTA.MEŠ LÚ.NUN.MEŠ ù UN.MEŠ URU.am-qar-ru-na |
| ii 7070 | ša mpa-di-i LUGAL-šú-nu EN a-de-e ù ma-mit ša KUR aš-šur.KI |
| ii 7171 | bi-re-tu AN.BAR id-du-ma a-na mḫa-za-qi-a-ú |
| ii 7272 | KUR.ia-ú-da-a-a id-di-nu-šú nak-[riš] |
| ii 7373 | a-na an-zil-li i-pu-šú ip-làḫ lib-ba-⸢šú⸣-[un] |
| ii 7474 | LUGAL.MEŠ KUR.mu-ṣu-ri LÚ.ERIM.MEŠ GIŠ.PAN GIŠ.[GIGIR.MEŠ] |
| ii 7575 | ANŠE.KUR.RA.MEŠ ša LUGAL KUR.me-luḫ-ḫa e-mu-qí [la ni-bi] |
| ii 7676 | ik-te-ru-nim-ma il-li-ku re-⸢ṣu⸣-su-un |
| ii 7777 | i-na ta-mir-ti URU.al-ta-qu-ú [el-la]-mu-ú-a |
| ii 7878 | si-id-ru šit-ku-nu ú-šá-ʾa-[lu GIŠ].⸢TUKUL⸣.MEŠ-šú-un |
| Column iii | |
| iii 1iii 1 | [i]-⸢na⸣ tukul-ti daš-šur ⸢EN⸣-[ia it-ti-šú-un] |
| iii 22 | [am]-da-ḫi-iṣ-ma áš-⸢ta⸣-[kan BAD₅.BAD₅-šú-un] |
| iii 33 | [LÚ].⸢EN⸣ GIŠ.GIGIR.⸢MEŠ⸣ ù DUMU.MEŠ [LUGAL KUR.mu-ṣu-ra-a-a] |
| iii 44 | [a]-di ⸢LÚ⸣.[EN GIŠ.GIGIR.MEŠ] ⸢ša⸣ LUGAL [KUR.me-luḫ-ḫi] ⸢bal⸣-ṭu-su-un |
| iii 55 | i-na MURUB₄ tam-⸢ḫa-ri⸣ ik-šu-da ŠU.II-a-a URU.al-ta-qu-ú |
| iii 66 | URU.ta-am-na-a al-me KUR-ud áš-lu-la šal-la-su-un |
| iii 77 | a-na URU.am-qar-ru-na aq-rib-ma LÚ.GÌR.NÍTA.MEŠ LÚ.NUN.MEŠ |
| iii 88 | ša ḫi-iṭ-ṭu ú-šab-šu-ú a-duk-ma i-na di-ma-a-ti |
| iii 99 | si-ḫir-ti URU a-lul pag-ri-šú-un DUMU.MEŠ URU e-piš an-ni |
| iii 1010 | ù gíl-la-ti a-na šal-la-ti am-nu si-it-tu-te-[šú-nu] |
| iii 1111 | la ba-bil ḫi-ṭi-ti ù gul-lul-ti ša a-ra-⸢an⸣-[šú]-⸢nu⸣ |
| iii 1212 | la ib-šu-ú uš-šur-šú-un aq-[bi] mpa-di-i LUGAL-[šú-nu] |
| iii 1313 | ul-tu qé-reb URU.ur-sa-li-im-mu ú-še-ṣa-[am-ma] |
| iii 1414 | i-na GIŠ.GU.ZA be-lu-ti UGU-šú-un ú-še-[šib-ma] |
| iii 1515 | man-da-at-tu be-lu-ti-ia ú-kin ṣe-⸢ru⸣-[uš]-šú |
| iii 1616 | ù mḫa-za-qi-a-ú KUR.ia-ú-da-a-a ša ⸢la⸣ [ik]-nu-šú |
| iii 1717 | a-na ni-ri-ia 46 URU.MEŠ-šú dan-nu-ti É BÀD.MEŠ-ni |
| iii 1818 | ù URU.MEŠ TUR.MEŠ ša li-me-ti-šú-nu ša ni-[ba] ⸢la⸣ i-šu-ú |
| iii 1919 | i-na šuk-bu-us a-ram-me ù qit-ru-[ub] šu-pi-i |
| iii 2020 | mit-ḫu-uṣ zu-uk GÌR.II pil-ši nik-si [ù kal]-⸢ban⸣-na-ti |
| iii 2121 | al-me KUR-ud 2 ME LIM 1 ME 50 UN.MEŠ TUR ⸢GAL⸣ [NITA] ù MUNUS |
| iii 2222 | ANŠE.KUR.RA.MEŠ ANŠE.KUNGA.MEŠ ANŠE.MEŠ ⸢ANŠE⸣.[GAM.MAL].⸢MEŠ⸣ GU₄.MEŠ |
| iii 2323 | ù ṣe-e-ni ša la ni-bi ul-⸢tu⸣ [qer]-⸢bi⸣-šú-un |
| iii 2424 | ú-še-ṣa-am-ma šal-la-tiš am-nu šá-a-šú [GIM MUŠEN] ⸢qu⸣-up-pi |
| iii 2525 | qé-reb URU.ur-sa-li-im-mu URU ⸢LUGAL-ti⸣-šú e-sír-šú |
| iii 2626 | URU.ḪAL.ṢU.MEŠ UGU-šú ú-rak-kis-[ma] a-ṣe-e KÁ.GAL URU-šú |
| iii 2727 | [ú]-⸢ter⸣-ra ik-ki-bu-uš URU.MEŠ-šú ša áš-lu-la |
| iii 2828 | [ul-tu qé-reb] ⸢KUR⸣-šú ab-tuq-[ma] a-na mmi-ti-in-ti |
| iii 2929 | [LUGAL URU.as-du-di mpa]-⸢di⸣-i LUGAL URU.am-qar-ru-na |
| iii 3030 | ù mGISSU-[EN LUGAL URU.ḫa]-⸢zi⸣-ti ad-din-ma ú-ṣa-aḫ-ḫir KUR-su |
| iii 3131 | e-li GUN ⸢maḫ⸣-[ri-ti na]-⸢dan⸣ šat-ti-šú-un man-da-at-tu |
| iii 3232 | kàd-re-e be-lu-[ti-ia ú]-rad-di-ma ú-kin ṣe-ru-uš-šú-un |
| iii 3333 | šu-ú mḫa-za-qi-[a-ú pul]-⸢ḫi⸣ me-lam-me be-lu-ti-ia |
| iii 3434 | is-ḫu-pu-šú-ma ⸢LÚ⸣.[úr-bi] ù LÚ.ERIM.MEŠ-šú SIG₅.MEŠ |
| iii 3535 | ša a-na dun-nu-[un URU.ur]-sa-li-im-mu URU LUGAL-ti-šú |
| iii 3636 | ú-še-ri-bu-ma ir-[šu-ú til]-la-a-ti it-ti 30 GUN KÙ.GI |
| iii 3737 | 8 ME GUN KÙ.BABBAR ni-[siq-ti gu]-⸢uḫ⸣-li ták-kàs-si NA₄.AN.ZA.GUL.ME GAL.MEŠ |
| iii 3838 | GIŠ.NÁ.MEŠ ZÚ GIŠ.⸢GU⸣.[ZA.MEŠ né]-⸢me⸣-di ZÚ KUŠ AM.SI ZÚ AM.SI |
| iii 3939 | GIŠ.ESI GIŠ.TÚG mim-ma šum-[šú ni]-⸢ṣir⸣-tu ka-bit-tú ù DUMU.MUNUS.MEŠ-šú |
| iii 4040 | MUNUS.UN.MEŠ É.GAL-šú LÚ.⸢NAR⸣.[MEŠ] MUNUS.NAR.MEŠ a-na qé-reb NINA.KI |
| iii 4141 | URU be-lu-ti-ia ⸢EGIR⸣-[ia ú-še]-⸢bi⸣-lam-ma a-na na-dan |
| iii 4242 | man-da-at-ti ù e-⸢peš⸣ [ARAD-ú]-ti iš-pu-ra rak-bu-šú |
| iii 4343 | i-na 4-e ger-ri-ia [daš-šur] be-lí ú-tak-kil-an-ni-ma |
| iii 4444 | um-ma-na-te-ia gap-šá-a-⸢te⸣ [ad]-⸢ke⸣-ma a-na KUR.É-mia-kin₇ |
| iii 4545 | a-la-ku aq-bi i-na me-[ti-iq] ger-ri-ia ša mšu-zu-bi |
| iii 4646 | LÚ.kal-dà-a-a a-[šib qé-reb ÍD.a]-⸢gam⸣-me i-na URU.bi-it-tu-tu |
| iii 4747 | áš-ta-kan ⸢BAD₅⸣.[BAD₅-šú šu-ú ḫur-ba]-šú ta-ḫa-zi-ia UGU-šú |
| iii 4848 | im-⸢qut⸣-[ma it-ru-ku lib]-⸢bu⸣-šú ki-ma |
| iii 4949 | az-za-ri e-diš ip-[par-šid-ma ul] ⸢in⸣-na-mir a-šar-šú |
| iii 5050 | pa-an ni-ri-ia ú-[ter]-ma a-na KUR.É-mia-kin₇ |
| iii 5151 | aṣ-ṣa-bat ḫar-ra-nu šu-ú mdAMAR.UTU-IBILA-SUM.NA |
| iii 5252 | ša i-na a-lak ger-ri-ia maḫ-re-e BAD₅.BAD₅-šú áš-ku-nu-ma |
| iii 5353 | ú-par-ri-ru el-lat-[su] ⸢ri⸣-gim GIŠ.TUKUL.MEŠ-ia dan-nu-ti |
| iii 5454 | ù ti-ib ta-ḫa-zi-⸢ia ez⸣-zi e-dur-ma DINGIR.MEŠ ma-rak KUR-šú |
| iii 5555 | i-na KI.⸢TUŠ⸣-šú-nu ⸢id⸣-[ke-ma qé-reb] GIŠ.MÁ.MEŠ ú-šar-kib-ma |
| iii 5656 | [a-na URU.na-gi-te-raq-qí ša qa-bal] ⸢tam⸣-tim iṣ-ṣu-riš |
| iii 5757 | [ip-pa-riš ŠEŠ.MEŠ-šú NUMUN É AD-šú ša ú-maš-ši-ru a]-ḫi tam-tim |
| iii 5858 | [a-di si-it-ti UN.MEŠ KUR-šú ul-tu KUR.É-mia-kin₇] |
| iii 5959 | [qé-reb] ÍD.a-[gam-me u ap-pa-ra-a-te ú-še]-ṣa-am-ma |
| iii 6060 | [šal]-la-tiš am-nu ú-[ter-ma URU.MEŠ-šú] ⸢ap⸣-pul aq-qur |
| iii 6161 | ú-še-me kar-meš UGU EN sa-li-me-šú LUGAL KUR.ELAM.MA.KI |
| iii 6262 | na-mur-ra-tum at-[bu-uk i-na] ⸢ta⸣-a-a-ar-ti-ia |
| iii 6363 | mdaš-šur-na-din-MU DUMU [reš-tu-ú] tar-bit bir-ki-ia |
| iii 6464 | i-na GIŠ.GU.ZA be-[lu-ti-šú] ú-še-šib-ma |
| iii 6565 | DAGAL-tum KUR ⸢EME⸣.[GI₇ u URI].KI ú-šad-gil pa-nu-uš-šú |
| iii 6666 | i-na 5 ger-ri-⸢ia ba⸣-ḫu-la-ti URU.tu-mur-ri |
| iii 6767 | URU.šá-ru-um URU.[e-za]-ma URU.kip-šú URU.ḫal-bu-da URU.qu-ú-a |
| iii 6868 | URU.qa-na ša ⸢GIM⸣ [qin]-ni TI₈.MUŠEN a-šá-red MUŠEN.ḪI.A |
| iii 6969 | [ṣe-er] zuq-ti KUR.[ni]-pur KUR-i mar-ṣi šu-bat-su-un |
| iii 7070 | [šit-ku]-na-[at-ma] la kit-nu-šú a-na ni-i-ri |
| iii 7171 | [i-na GÌR.II KUR.ni-pur] ⸢ka⸣-ra-ši ú-šá-áš-kin-ma |
| iii 7272 | [it-ti LÚ.qur]-⸢bu⸣-ti GÌR.II-ia na-as-qu-ú-ti |
| iii 7373 | [ù LÚ.ERIM.MEŠ] ta-ḫa-zi-ia la ga-me-lu-ti |
| iii 7474 | [a-na-ku GIM AM] ek-di pa-nu-uš-šú-un aṣ-bat |
| iii 7575 | ḫur-ri ⸢na⸣-[ḫal-li] ⸢na⸣-at-bak šad-di-i me-le-e |
| iii 7676 | mar-ṣu-ti i-⸢na GIŠ⸣.GU.ZA áš-ta-am-di-iḫ |
| Column iv | |
| iv 1iv 1 | [a-šar a-na GIŠ.GU.ZA šup-šu-qu i-na GÌR.II-ia áš-taḫ-ḫi]-⸢iṭ⸣ |
| iv 22 | [GIM ar-me a-na zuq-ti šá-qu-ti ṣe-ru-uš-šú]-⸢un⸣ |
| iv 33 | [e-li a-šar bir-ka-a-a ma-na-aḫ-tu i-šá-a ṣe-er NA₄ KUR-i ú-šib]-⸢ma⸣ |
| iv 44 | A.MEŠ KUŠ.na-a-di [ka-ṣu-te a-na ṣu-um-me-ia lu áš-ti] |
| iv 55 | i-na ŠU.SI.MEŠ ḫur-šá-a-ni ⸢ar⸣-[de]-⸢šú⸣-nu-ti-ma áš-⸢ta⸣-[kan] |
| iv 66 | taḫ-ta-⸢šú-un⸣ URU.MEŠ-šú-nu KUR-[ud]-ma áš-lu-la šal-la-sún |
| iv 77 | ap-pul [aq-qur] i-na dGIŠ.BAR aq-mu pa-an ni-ri-ia |
| iv 88 | ú-ter-[ma] ṣe-er mma-ni-ia-e LUGAL URU.uk-ki |
| iv 99 | šad-da-a-a-e la kan-še aṣ-ṣa-bat ḫar-ra-nu |
| iv 1010 | ur-ḫi la pe-tu-ti ṭu-ú-di pa-áš-qu-ú-ti |
| iv 1111 | ša la-pa-an KUR.MEŠ mar-ṣu-ti ul-la-nu-ú-a |
| iv 1212 | qé-reb-šú-[un] ⸢ma⸣-am-man la il-li-ku LUGAL.MEŠ pa-ni maḫ-ru-ti |
| iv 1313 | i-na GÌR.II KUR.a-na-ra ù KUR.up-pa KUR.MEŠ-e dan-nu-ti |
| iv 1414 | KARAŠ ú-šá-áš-kin-ma a-⸢na⸣-ku i-na GIŠ.GU.ZA ⸢né⸣-[me-di] |
| iv 1515 | it-ti ⸢LÚ.ERIM⸣.MEŠ ta-ḫa-[zi]-⸢ia⸣ [gít]-⸢ma⸣-lu-ú-ti |
| iv 1616 | i-na ne-re-bi-šú-un pi-⸢qu-ti⸣ šu-nu-ḫi-iš e-ru-um-ma |
| iv 1717 | mar-ṣi-iš e-te-el-la-a [ŠU].SI.MEŠ KUR-i pa-áš-qa-a-ti |
| iv 1818 | šu-ú mma-[ni]-⸢ia⸣-e tur-bu-[uʾ] GÌR.II ERIM.ḪI.A-ia e-mur-ma |
| iv 1919 | URU.uk-ku [URU LUGAL]-⸢ti⸣-šú e-zib-ma a-na ru-qé-ti in-na-bit |
| iv 2020 | URU.uk-ku [al-me KUR]-⸢ud⸣ áš-lu-la šal-la-su |
| iv 2121 | mim-ma šum-šu [NÍG.ŠU NÍG.GA ni]-⸢ṣir⸣-ti É.GAL-šú |
| iv 2222 | ul-tu ⸢qer⸣-[bé-e-šu ú-še-ṣa]-⸢am⸣-ma šal-la-ti-iš am-nu |
| iv 2323 | ù 33 URU.[MEŠ-ni ša pa-a]-⸢ṭi⸣ na-gi-šú ak-šudud-ma |
| iv 2424 | UN.MEŠ ANŠE.⸢MEŠ⸣ [GU₄.MEŠ ù] ṣe-e-ni ul-tu qer-bi-šú-un |
| iv 2525 | áš-lu-la ap-⸢pu⸣-[ul] aq-qur i-na dGIŠ.BAR aq-mu |
| iv 2626 | i-na 6 ger-⸢ri⸣-[ia] ⸢si⸣-it-ti UN.MEŠ KUR.É-mia-kin₇ |
| iv 2727 | ša la-pa-an GIŠ.⸢TUKUL⸣.[MEŠ]-⸢ia⸣ dan-nu-ti GIM sér-re-me ig-ru-ru |
| iv 2828 | DINGIR.MEŠ ma-rak KUR-šú-un i-na šub-ti-šú-nu id-ku-ma |
| iv 2929 | tam-tim GAL-tum [ša] ⸢ṣi⸣-it dUTU-ši e-bi-ru-ma |
| iv 3030 | i-na URU.na-gi-ti ša KUR.ELAM.MA.KI id-du-ú šu-bat-sún |
| iv 3131 | i-na GIŠ.MÁ.MEŠ KUR.ḫat-[ti] tam-tim lu e-bir URU.na-gi-tu |
| iv 3232 | URU.na-gi-tu-di-[iʾ-bi]-na a-di KUR.ḫi-il-mu KUR.pil-la-tú |
| iv 3333 | ù KUR.ḫu-pa-pa-nu ⸢na-ge⸣-e ša KUR.ELAM.MA.KI KUR-ud |
| iv 3434 | UN.MEŠ KUR.É-mia-kin₇ [a-di] DINGIR.MEŠ-šú-nu ù UN.MEŠ |
| iv 3535 | ša LUGAL KUR.ELAM.MA.KI áš-[lu]-⸢lam⸣-ma la e-zi-ba mul-taḫ-ṭu |
| iv 3636 | qé-reb GIŠ.MÁ.MEŠ ú-⸢šar-kib⸣-ma a-na a-ḫa-an-na-a |
| iv 3737 | ú-še-bi-ram-ma ú-šá-[aṣ]-bi-ta ḫar-ra-an KUR aš-šur.KI |
| iv 3838 | URU.MEŠ-ni ša qé-reb na-[ge]-e šá-tu-nu ap-pul aq-qur |
| iv 3939 | i-na dGIŠ.BAR aq-mu a-na DU₆ ù kar-me ú-ter |
| iv 4040 | i-na ⸢ta⸣-[a-a]-⸢ar⸣-ti-ia mšu-zu-bu DUMU KÁ.DINGIR.RA.KI |
| iv 4141 | ša i-na e-[ši-ti] KUR be-[lu]-ut KUR EME.GI₇ ù URI.KI |
| iv 4242 | ra-ma-nu-uš ú-ter-ru i-[na] ⸢ta⸣-ḫa-az EDIN BAD₅.BAD₅-šú áš-kun |
| iv 4343 | bal-ṭu-su i-na ŠU.II aṣ-bat-[su] ⸢šum⸣-man-nu ù bi-re-tú AN.BAR |
| iv 4444 | ad-di-šu-ma a-na KUR aš-šur.KI [ú-ra]-áš-šú LUGAL KUR.ELAM.MA.KI |
| iv 4545 | ša Á.II-šú is-ḫu-ru-ma il-⸢li⸣-[ku] re-ṣu-su BAD₅.BAD₅-šú áš-kun |
| iv 4646 | ILLAT.MEŠ-šú ú-sap-pi-iḫ-[ma] ú-par-ri-ir pu-ḫur-šú |
| iv 4747 | i-na 7-e ger-ri-ia daš-[šur be]-lí ú-tak-kil-an-ni-ma |
| iv 4848 | a-na KUR.e-lam-ti lu al-lik URU.[É-m]ḫa-ʾi-i-ri URU.ra-ṣa-a |
| iv 4949 | URU.MEŠ-ni ša mi-ṣir KUR aš-šur.KI [ša i]-na tar-ṣi AD-ia |
| iv 5050 | e-la-mu-ú e-ki-mu da-na-⸢niš i-na⸣ me-ti-iq ger-ri-ia |
| iv 5151 | ak-šudud-ma áš-lu-la šal-la-⸢sún LÚ⸣.ERIM.MEŠ šu-lu-ti-ia |
| iv 5252 | ú-še-rib qé-reb-šú-un a-na mi-ṣir ⸢KUR⸣ aš-šur.KI ú-ter-ram-ma |
| iv 5353 | ŠU.II LÚ.GAL URU.ḪAL.ṢU BÀD.AN.KI [am]-⸢nu⸣ URU.bu-bé-e |
| iv 5454 | URU.dun-ni-dUTU URU.É-ri-si-⸢ia URU⸣.É-aḫ-la-me-e |
| iv 5555 | URU.du-ru URU.dan-nat-msu-⸢la⸣-[a-a URU].ši-li-ib-tu |
| iv 5656 | [URU].É-a-ṣu-si URU.kar-NUMUN-BA-[šá URU].É-gi-iṣ-ṣi |
| iv 5757 | URU.É-m[kàt-pa]-⸢la-ni URU.É-im-bi⸣-ia ⸢URU.ḫa-ma⸣-[a-nu] |
| iv 5858 | URU.É-⸢ar⸣-ra-bi URU.bu-ru-tu URU.di-in-tu-ša-msu-[la-a-a] |
| iv 5959 | URU.[di]-⸢in⸣-tu-šá-mdDUMU-É-KAR-ir URU.ḫar-ri-áš-la-ke-[e] |
| iv 6060 | URU.rab-ba-a-a URU.ra-a-su URU.ak-ka-ba-ri-na |
| iv 6161 | URU.DU₆-ú-ḫu-ri URU.ḫa-am-ra-nu URU.na-ṭi-i-⸢tu⸣ |
| iv 6262 | a-di URU.MEŠ-ni ša né-re-bi ša URU.É-bu-na-[ki] |
| iv 6363 | URU.DU₆-ḫu-um-bi URU.di-in-tu-ša-mdu-⸢me⸣-[DINGIR] |
| iv 6464 | URU.É-ú-bi-ia URU.bal-ti-li-šir URU.ta-qab-li-šir |
| iv 6565 | URU-ša-na-qi-da-a-ti URU.ma-su-tú-šap-⸢li⸣-[ti] |
| iv 6666 | URU.sa-ar-ḫu-de-e-ri URU.a-lum-ša-m⸢GAŠAN⸣-[É] |
| iv 6767 | URU.É-mPAP.MEŠ-SUM.NA URU.il-te-ú-[ba] |
| iv 6868 | 34 URU.MEŠ dan-nu-ti a-di URU.MEŠ TUR.MEŠ ša li-[me-ti-šú]-⸢nu⸣ |
| iv 6969 | ša ni-ba la i-šu-ú al-me KUR-ud áš-lu-la [šal]-la-[sún] |
| iv 7070 | ap-pul aq-qur i-na dGIŠ.BAR aq-mu qu-tur na-[aq]-mu-⸢ti⸣-[šú-nu] |
| iv 7171 | GIM MURU₉ kab-ti pa-an AN-e rap-šu-ti [ú]-⸢šak⸣-ti-⸢im⸣ |
| iv 7272 | iš-me-ma ki-šit-ti URU.MEŠ-šú mku-dur-[dna]-⸢ḫu⸣-un-du |
| iv 7373 | e-la-mu-ú im-qut-su ḫat-tum si-⸢it⸣-[ti] URU.MEŠ-šú |
| iv 7474 | a-na dan-na-ti ú-še-rib šu-ú URU.[ma]-dak-ti |
| iv 7575 | URU LUGAL-ti-šú e-zib-ma a-na URU.ḫa-[i]-da-la |
| iv 7676 | ša qé-reb šad-di-i SÙ.MEŠ iṣ-ṣa-⸢bat ḫar⸣-ra-nu |
| iv 7777 | a-na URU.ma-dak-ti URU LUGAL-ti-šú a-[la]-ku aq-bi |
| iv 7878 | ITI.tam-ḫi-ri EN.TE.NA dan-nu [e]-⸢ru⸣-ba-am-ma |
| Column v | |
| v 1v 1 | šá-mu-tum ma-at-tum ú-šá-az-ni-na ŠÈG.MEŠ-šá |
| v 22 | ŠÈG.MEŠ ù šal-gu ⸢na⸣-aḫ-lu na-at-bak KUR-[i a]-⸢du-ra⸣ |
| v 33 | pa-an ni-ri-ia ú-ter-ma a-na NINA.KI ⸢aṣ⸣-[ṣa-bat ḫar-ra]-⸢nu⸣ |
| v 44 | i-na u₄-me-šu-ma i-na [qí]-bit daš-šur EN-ia mNÍG.DU-dna-ḫu-un-⸢du⸣ |
| v 55 | LUGAL KUR.ELAM.MA.KI 3 ⸢ITI.MEŠ ul⸣ ú-ma-al-li-ma |
| v 66 | i-na u₄-um la NAM-šú ur-ru-ḫi-iš im-tu-ut |
| v 77 | EGIR-šú mum-ma-an-me-na-nu la ra-áš ṭè-me ù mil-ki |
| v 88 | ŠEŠ-šú dup-pu-us-su-ú i-na GIŠ.GU.ZA-šú ú-šib-ma |
| v 99 | i-na 8-e ger-ri-ia EGIR mšu-zu-bi is-se-ḫu-ma |
| v 1010 | DUMU.MEŠ KÁ.DINGIR.RA.KI GAL₅.LÁ.MEŠ lem-nu-ti KÁ.GAL.MEŠ URU |
| v 1111 | ú-di-lu ik-pu-ud lib-ba-[šú]-nu a-na e-peš GIŠ.LÁ |
| v 1212 | mšu-zu-bu LÚ.kal-dà-a-a [eṭ]-lum dun-na-mu-ú |
| v 1313 | ša la i-šu-ú bir-ki ARAD da-[gíl] ⸢pa⸣-an LÚ.EN.NAM URU.la-ḫi-ri |
| v 1414 | LÚ.a-ra-me ḫal-qu mun-nab-tu [a]-⸢mir⸣ da-me ḫab-bi-lu |
| v 1515 | ṣe-ru-uš-šú ip-ḫu-ru-ma qé-reb ÍD.a-gam-me ú-ri-du-ma |
| v 1616 | ú-šab-šu-ú si-ḫu a-⸢na⸣-[ku] ⸢ni⸣-tum al-me-šu-ma |
| v 1717 | nap-šá-tuš ú-si-qa la-pa-an ⸢ḫat-ti⸣ ù né-eb-re-ti |
| v 1818 | a-na KUR.ELAM.MA.KI in-na-bit ki-i ri-kil-⸢ti⸣ [ù gíl-la]-⸢ti⸣ |
| v 1919 | ṣe-ru-uš-šú ba-ši-i ul-tu KUR.ELAM.MA.KI [i-ḫi-šam-ma] |
| v 2020 | qé-reb šu-an-na.KI e-ru-ub LÚ.KÁ.DINGIR.RA.KI.MEŠ |
| v 2121 | a-na la si-ma-ti-šú i-na GIŠ.GU.ZA ú-še-ši-bu-šu |
| v 2222 | be-lu-ut KUR EME.GI₇ ù URI.KI ú-šad-gi-lu pa-ni-šú |
| v 2323 | É NÍG.GA ša é-sag-íl ip-tu-ma KÙ.GI KÙ.BABBAR |
| v 2424 | ša dEN dzar-pa-ni-tum NÍG.ŠU É DINGIR.MEŠ-šú-nu ú-še-ṣu-ni |
| v 2525 | a-na mum-ma-an-me-na-nu LUGAL KUR.ELAM.MA.KI ša la i-šu-ú |
| v 2626 | ṭè-e-mu ù mil-ku ú-še-bi-lu-uš ṭa-aʾ-tu |
| v 2727 | pu-uḫ-ḫi-ir um-man-ka di-ka-a KARAŠ-ka a-na KÁ.DINGIR.RA.KI |
| v 2828 | ḫi-šam-ma i-da-a-ni i-zi-iz-ma tu-kul-ta-ni lu at-ta |
| v 2929 | šu-ú LÚ.ELAM.MA.KI-ú ša i-na a-lak ger-ri-ia |
| v 3030 | maḫ-ri-ti ša KUR.ELAM.MA.KI URU.MEŠ-šú ak-šud-du-ma |
| v 3131 | ú-ter-ru a-na kar-me lib-bu-uš ul iḫ-su-us |
| v 3232 | ṭa-aʾ-tú im-ḫur-šú-nu-ti-ma ERIM.ḪI.A-šú KARAŠ-su |
| v 3333 | ú-pa-ḫir-ma GIŠ.GIGIR.MEŠ GIŠ.ṣu-um-bi e-šu-ra |
| v 3434 | ANŠE.KUR.RA.MEŠ ANŠE.KUNGA.MEŠ is-ni-qa ṣi-in-di-šú |
| v 3535 | KUR.par-su-áš KUR.an-za-an KUR.pa-ši-ru KUR.el-li-pi |
| v 3636 | LÚ.ia-as-ìl LÚ.la-kab-ra LÚ.ḫa-ar-zu-nu |
| v 3737 | URU.du-um-mu-qu URU.su-la-a URU.sa-am-ú-na |
| v 3838 | DUMU mdAMAR.UTU-IBILA-SUM.NA KUR.É-ma-di-ni KUR.É-ma-muk-ka-na |
| v 3939 | KUR.É-mšil-la-na KUR.É-msa-a-la UD.UD.AG.KI URU.la-ḫi-ru |
| v 4040 | LÚ.pu-qu-du LÚ.gam-bu-lum LÚ.ḫa-la-tu LÚ.ru-ʾu-ú-a |
| v 4141 | LÚ.ú-bu-lu LÚ.ma-la-ḫu LÚ.ra-pi-qu LÚ.ḫi-in-da-ru |
| v 4242 | LÚ.da-mu-nu kit-ru GAL-ú ik-te-ra it-ti-šú |
| v 4343 | gi-ip-šu-us-su-un ú-ru-uḫ KUR URI.KI |
| v 4444 | iṣ-ba-tu-nim-ma a-na KÁ.DINGIR.RA.KI te-bu-ú-ni |
| v 4545 | a-di mšu-zu-bi LÚ.kal-dà-a-a LUGAL KÁ.DINGIR.RA.KI |
| v 4646 | a-na a-ḫa-meš iq-ru-bu-ma pu-ḫur-šú-nu in-nen-du |
| v 4747 | ki-ma ti-bu-ut a-ri-bi ma-aʾ-di ša pa-an šat-ti |
| v 4848 | mit-ḫa-riš a-na e-peš tuq-ma-ti te-bu-ni ṣe-ru-ú-a |
| v 4949 | SAḪAR.ḪI.A GÌR.II-šú-nu GIM MURU₉ kab-ti ša dun-ni e-ri-ia-ti |
| v 5050 | pa-an AN-e rap-šu-ti ka-ti-im el-la-mu-ú-a |
| v 5151 | i-na URU.ḫa-lu-le-e i-na ki-šad ÍD.IDIGNA šit-ku-nu si-dir-ta |
| v 5252 | pa-an maš-qí-ia ṣab-tu-ma ú-šá-ʾa-lu GIŠ.TUKUL.MEŠ-šú-un |
| v 5353 | a-na-ku a-na daš-šur d30 dUTU dEN dMUATI dU.GUR |
| v 5454 | dINANNA ša NINA.KI dINANNA ša URU.LÍMMU-DINGIR DINGIR.MEŠ ti-ik-li-ia |
| v 5555 | a-na ka-šá-di LÚ.KÚR dan-ni am-ḫur-šú-nu-ti-ma |
| v 5656 | su-⸢pe-e⸣-a ur-ru-ḫi-iš iš-mu-ú il-li-ku re-ṣu-ti |
| v 5757 | la-ab-biš ⸢an-na⸣-dir-ma at-tal-bi-šá si-ri-ia-am |
| v 5858 | ḫu-li-ia-am si-mat ṣi-il-ti a-pi-ra ra-šu-ú-a |
| v 5959 | i-na GIŠ.GIGIR ta-ḫa-zi-ia ⸢ṣir⸣-[ti] sa-pi-na-at za-ʾi-i-ri |
| v 6060 | i-na ug-gat lib-bi-ia ar-⸢ta-kab⸣ ḫa-an-ṭiš |
| v 6161 | GIŠ.PAN dan-na-tum ša daš-šur ú-šat-li-ma i-na ŠU.II-ia aṣ-bat |
| v 6262 | GIŠ.šil-ta-ḫu pa-ri-iʾ nap-šá-ti at-muḫ rit-tu-ú-a |
| v 6363 | ṣe-er gi-mir um-ma-na-ti na-ki-ri lem-nu-ti |
| v 6464 | u₄-mì-iš ṣar-piš al-sa-a GIM dIŠKUR áš-gu-um |
| v 6565 | i-na qí-bit daš-šur EN GAL EN-ia a-na šid-di ù pu-ti |
| v 6666 | ki-ma ti-ib me-ḫe-e šam-ri a-na LÚ.KÚR a-zi-iq |
| v 6767 | ⸢i-na⸣ GIŠ.TUKUL.MEŠ d⸢aš-šur⸣ EN-ia ù ti-ib ta-ḫa-zi-ia ez-zi |
| v 6868 | [i-rat-su-un] a-né-eʾ-ma suḫ-ḫur-ta-šú-nu áš-kun |
| v 6969 | [ERIM.ḪI.A] ⸢na⸣-ki-ri i-na uṣ-ṣi mul-mul-li ú-šá-qir-ma |
| v 7070 | gi-mir ADDA.MEŠ-šú-nu ú-pal-li-šá UD-zi-zi-iš |
| v 7171 | mdḫu-um-ba-an-un-da-šá LÚ.tur-ta-nu-šú eṭ-lu pit-qu-du |
| v 7272 | mu-ma-ʾe-er um-ma-ni-šú tu-kul-ta-šú GAL-ú |
| v 7373 | a-di LÚ.GAL.MEŠ-šú ša GÍR šib-bi KÙ.GI šit-ku-nu |
| v 7474 | ù i-na ḪAR.MEŠ as-pi KÙ.GI ru-uš-ši-i |
| v 7575 | ruk-ku-sa rit-ti-šú-un ki-ma šu-ú-ri ma-ru-ti |
| v 7676 | ša na-du-ú šum-man-nu ur-ru-ḫi-iš ú-pal-liq-šú-nu-ti-ma |
| v 7777 | áš-ku-na taḫ-ta-šú-un ki-šá-⸢da-te⸣-šú-nu ú-na-kis as-li-iš |
| v 7878 | aq-ra-ti nap-šá-te-šú-nu ú-par-ri-iʾ qù-ùʾ-iš |
| Column vi | |
| vi 1vi 1 | GIM ILLU gap-ši [ša] šá-mu-tum si-ma-ni ù-mun-ni-šú-nu |
| vi 22 | ú-šar-da-a [ṣe-er] er-ṣe-ti šá-di-il-ti |
| vi 33 | la-as-mu-ti [mur-ni-is]-qi ṣi-mit-ti ru-ku-bi-ia |
| vi 44 | [i-na da-me-šú-nu gap-šu]-⸢ti⸣ i-šal-lu-ú dÍD-iš |
| vi 55 | ša GIŠ.GIGIR ta-ḫa-zi-ia [sa-pi]-⸢na⸣-at rag-gi ù ṣe-ni |
| vi 66 | da-mu ù par-šú ri-it-mu-ku ma-gar-ru-uš |
| vi 77 | pag-ri qu-ra-di-šú-nu ki-ma [ur-qí-ti] ú-mal-la-a EDIN |
| vi 88 | sa-ap-sa-pa-ti ú-na-kis-⸢ma bal⸣-ta-šú-un a-bu-ut |
| vi 99 | ki-ma bi-ni qiš-še-e si-ma-ni ú-na-kis qa-ti-šú-un |
| vi 1010 | ḪAR.MEŠ as-pi KÙ.GI KI.SAG ⸢eb-bi⸣ šá rit-ti-šú-nu am-ḫur |
| vi 1111 | i-na nam-ṣa-ri zaq-tu-ti ḫu-[ṣa-an]-ni-šú-nu ú-par-ri-iʾ |
| vi 1212 | GÍR.MEŠ šib-bi KÙ.GI KÙ.BABBAR šá ⸢MURUB₄⸣.MEŠ-šú-nu e-kim |
| vi 1313 | si-it-ti LÚ.GAL.MEŠ-šú ša ⸢la-pa⸣-an ta-ḫa-zi-ia |
| vi 1414 | ip-la-ḫu id-ku-ú i-da-⸢šú⸣-un bal-ṭu-su-nu |
| vi 1515 | i-na MURUB₄ tam-ḫa-ri it-mu-⸢ḫa ŠU⸣.II-a-a GIŠ.GIGIR.MEŠ |
| vi 1616 | a-di ANŠE.KUR.RA.MEŠ-ši-na ša i-[na] ⸢qit⸣-ru-ub ta-ḫa-zi dan-ni |
| vi 1717 | ra-ki-bu-ši-in de-ku-ú-⸢ma⸣ ù ši-na muš-šu-ra-ma |
| vi 1818 | ra-ma-nu-uš-šin it-ta-na-al-[la]-⸢ka⸣ mit-ḫa-riš ú-ter-ra |
| vi 1919 | a-di 2 KASKAL.GÍD GE₆ il-li-[ku da]-⸢ak⸣-šú-nu ap-ru-us |
| vi 2020 | šu-ú mum-ma-an-[me-na-nu LUGAL KUR.ELAM.MA].⸢KI⸣ a-di LUGAL KÁ.DINGIR.RA.KI |
| vi 2121 | [LÚ].⸢na⸣-sik-ka-[ni ša KUR.kal-di a-li-kut] Á.II-šú |
| vi 2222 | ḫur-ba-šú ⸢ta-ḫa⸣-[zi-ia ki-ma-le-e zu-mur-šú-un is]-⸢ḫu⸣-up |
| vi 2323 | GIŠ.za-ra-ti-⸢šú⸣-un [ú-maš-še-ru-ma a-na šu-zu-ub ZI.MEŠ-šú]-⸢nu⸣ |
| vi 2424 | pag-ri ERIM.ḪI.A-šú-nu ú-⸢da⸣-[ʾi-i-šú e-ti-qu] |
| vi 2525 | ki-i ša at-mi TU.MUŠEN kuš-šu-⸢di⸣ [i-tar-ra-ku lib-bu-šú-un] |
| vi 2626 | ši-na-te-šú-un ú-ṣa-ar-⸢ra⸣-[pu qé-reb GIŠ.GIGIR].⸢MEŠ⸣-šú-nu |
| vi 2727 | ú-maš-še-ru-ni zu-šú-un a-[na ra-da]-⸢di⸣-šú-nu |
| vi 2828 | GIŠ.GIGIR.MEŠ ANŠE.KUR.RA.MEŠ-ia ú-[ma-ʾe-er] ar-ki-šú-un |
| vi 2929 | mun-na-rib-šú-nu ša a-na ⸢nap⸣-[šá]-a-ti ú-ṣu-ú |
| vi 3030 | a-šar i-kaš-šá-du ú-ra-[sa]-⸢bu⸣ i-na GIŠ.TUKUL |
| vi 3131 | i-na u₄-me-šu-ma É.GAL ku-tal-li ša NINA.KI |
| vi 3232 | ša a-na šu-te-šur ka-ra-ši pa-qad ANŠE.KUR.RA.MEŠ |
| vi 3333 | sa-na-qí mim-ma šum-šú ša LUGAL.MEŠ-ni a-li-kut maḫ-ri |
| vi 3434 | AD.MEŠ-ia ú-še-pi-šú-ma [tam]-lu-šá la ib-ši-ma |
| vi 3535 | ṣu-uḫ-ḫu-rat šu-bat-sa la-ba-riš UD.MEŠ tem-me-en-šá |
| vi 3636 | e-niš-ma iš-da-a-šá ir-ma-a i-qu-pa re-šá-a-šá |
| vi 3737 | É.GAL šá-a-tu a-na ⸢si⸣-ḫi-ir-ti-šá aq-qur |
| vi 3838 | ki-ma a-tar-tim-ma qaq-qa-ru ma-[aʾ]-du ul-tu qé-reb ú-šal-li |
| vi 3939 | ù ta-mir-ti URU aṣ-⸢ba⸣-ta i-na muḫ-ḫi uš-rad-di |
| vi 4040 | qaq-qar É.GAL maḫ-ri-ti e-zib-ma i-na qaq-qa-ri |
| vi 4141 | ša ul-tu qé-reb ú-šal-[li] ⸢aṣ⸣-ba-ta tam-la-a uš-mal-li |
| vi 4242 | 2 ME ti-ib-ki a-na e-la-⸢ni ú⸣-šaq-qí re-e-su |
| vi 4343 | i-na ITI še-me-e u₄-mu mit-ga-ri [ṣe-er] tam-le-e šu-a-tu |
| vi 4444 | É.GAL ra-bi-tum ša ṣe-er ⸢maḫ⸣-[ri]-ti ma-aʾ-diš šu-tu-rat |
| vi 4545 | a-na mu-šab LUGAL-ti-ia ú-[še-piš] GIŠ.ÙR.MEŠ GIŠ.ere-ni |
| vi 4646 | ṣi-ru-ti ú-šat-ri-ṣa e-⸢li⸣-šá GIŠ.IG.MEŠ GIŠ.li-ia-ri |
| vi 4747 | me-ser URUDU nam-ri ú-rak-kis-ma ⸢ú⸣-rat-ta-a KÁ.MEŠ-šá |
| vi 4848 | NA₄.pi-i-lu pe-ṣu-ú ša ⸢i-na⸣ er-ṣe-et URU.ba-la-ṭa-a-a |
| vi 4949 | in-nam-ru dALAD.dLAMMA ⸢ú⸣-še-piš-ma im-na |
| vi 5050 | ù šu-me-la ú-šá-aṣ-bi-⸢ta⸣ si-ga-ar-šá |
| vi 5151 | É.GAL šá-a-tu ul-tu ⸢uš⸣-[še]-šá a-di na-bur-ri-šá |
| vi 5252 | ar-ṣip ú-šak-lil MU.⸢SAR⸣-e ši-ṭir šu-me-ia |
| vi 5353 | i-na qer-bi-šá áš-kun a-na ⸢ár⸣-kàt UD.MEŠ i-na LUGAL.MEŠ-ni |
| vi 5454 | DUMU.MEŠ-ia ša daš-šur ù ⸢diš⸣-tar a-na RE.É.UM ⸢KUR⸣ ù |
| vi 5555 | UN.MEŠ i-nam-bu-ú [zi]-⸢kir⸣-šú e-nu-ma É.GAL šá-⸢a⸣-[tu] |
| vi 5656 | i-lab-bi-ru-ma en-na-⸢ḫu⸣ [NUN ar-ku-ú an]-ḫu-sa lu-ud-[diš] |
| vi 5757 | MU.SAR-e ši-ṭir MU-ia [li]-⸢mur⸣-ma Ì.GIŠ ⸢lip-šu⸣-[uš] |
| vi 5858 | UDU.SISKUR liq-qí a-na [áš]-ri-šú lu-[ter] |
| vi 5959 | daš-šur ù diš-[tar] ik-ri-bi-šú i-šem-[mu-u] |
| vi 6060 | [ITI.x x (x) (UD.x.KAM) li-mu m]⸢EN-IGI⸣-an-ni |
| vi 6161 | [LÚ.EN.NAM] ⸢URU⸣.gar-ga-miš |