IMJ 71.072.0249 (RINAP 3/1 Sennacherib 23, ex. 01) [Sennacherib]

^mdEN.ZU-ŠEŠ.MEŠ-eri-ba LUGAL GAL ⸢LUGAL⸣ [dan-nu]

LUGAL kiš-šá-ti LUGAL ⸢KUR⸣ aš-šur.KI LUGAL kib-rat LÍMMU-[tim]

RE.É.UM it-pe-šú mi-gir DINGIR.MEŠ GAL.[MEŠ]

⸢na⸣-[ṣir kit-ti] ⸢ra-ʾi⸣-[im] ⸢mi-šá⸣-[ri]

[e-piš ú-sa]-a-ti a-lik tap-pu-ut a-[ki-i]

⸢sa⸣-[ḫi-ru] dam-qa-a-ti eṭ-lum gít-ma-⸢lum⸣

zi-ka-ru qar-du a-šá-red kal ma-al-ki

rap-pu la-ʾi-iṭ la ma-gi-ri

mu-šab-ri-qu za-ma-a-ni ^daš-šur KUR-ú GAL-ú

LUGAL-ut la šá-na-an ú-šat-li-ma-an-ni-ma

UGU gi-mir a-šib pa-rak-ki ú-šar-ba-a GIŠ.TUKUL.MEŠ-ia

ul-tu A.AB.BA e-le-ni-ti ša šá-lam ^dUTU-ši

a-di tam-tim šap-li-ti ša ṣi-it ^dUTU-ši

gim-ri ṣal-mat SAG.DU ú-šak-niš še-pu-ú-a

ù ma-al-ki šep-ṣu-ti e-du-ru ta-ḫa-zi

da-ád-me-šú-un iz-zi-bu-ma ki-ma su-tin-ni.MUŠEN

ni-gi-iṣ-ṣi e-diš ip-par-šú a-šar la ʾa-a-ri

i-na maḫ-re-e ger-ri-ia ša ^mdAMAR.UTU-⸢IBILA-SUM⸣.NA

LUGAL KUR.kár-^ddun-ía-àš a-di ERIM.ḪI.A ELAM.MA.KI [re]-ṣi-šú

i-na ta-mir-ti kiš.KI áš-ta-kan ⸢BAD₅⸣.BAD₅-šú

i-[na] ⸢MURUB₄ tam-ḫa⸣-[ri] šu-a-tu e-zib

⸢KARAŠ⸣-su e-⸢diš⸣ [ip]-⸢par-šid⸣-ma ⸢na⸣-piš-tuš e-ṭí-ir GIŠ.[GIGIR.MEŠ] ANŠE.KUR.RA.MEŠ

GIŠ.ṣu-um-bi ANŠE.KUNGA.MEŠ ša i-na qit-ru-ub

ta-ḫa-zi ú-maš-ši-ru ik-šu-da ŠU.II-a-a

a-na É.GAL-šú ša qé-reb KÁ.DINGIR.RA.KI ḫa-diš e-ru-um-ma

ap-te-ma É ni-ṣir-ti-šú KÙ.GI KÙ.BABBAR ú-⸢nu-ut KÙ⸣.GI KÙ.BABBAR

NA₄ a-qar-tu mim-ma šum-šú NÍG.ŠU NÍG.GA [la] ni-bi

ka-bit-tu GUN MUNUS.ŠÀ.É.GAL.MEŠ-šú LÚ.TIRUM.MEŠ

LÚ.man-za-az pa-ni LÚ.NAR.MEŠ MUNUS.NAR.MEŠ [si-ḫir]-ti

um-ma-a-ni ma-la ba-šu-ú mut-tab-bi-lu-[tú] É.GAL-uš

ú-še-ṣa-am-ma šal-la-tiš am-nu i-na e-muq ^daš-[šur] EN-ia

75 URU.MEŠ-šú dan-nu-ti É BÀD.MEŠ-ni ša [KUR].kal-di

ù 4 ME 20 URU.MEŠ-ni TUR.MEŠ ša li-me-ti-šú-nu

al-me ak-šud^ud áš-lu-la šal-la-su-un

LÚ.úr-bi LÚ.a-ra-mu LÚ.kal-du ša qé-reb [UNUG].KI

NIBRU.KI kiš.KI URU.ḫur-sag-kalam-ma GÚ.DU₈.A.KI ⸢ZIMBIR⸣.KI

a-di DUMU.MEŠ URU EN ḫi-iṭ-ṭi ú-še-ṣa-am-ma šal-la-[tiš am]-nu

i-na ta-a-a-ar-ti-ia LÚ.tu-uʾ-mu-na LÚ.[ri-ḫi]-ḫu

LÚ.ia-daq-qu LÚ.ú-bu-du LÚ.gib-[re-e]

LÚ.ma-la-ḫu LÚ.gu-ru-mu LÚ.[ú-bu-lum]

LÚ.da-mu-nu LÚ.gam-bu-lum [LÚ.ḫi]-in-[da-ru]

LÚ.ru-ʾu-ú-a LÚ.pu-qu-du LÚ.ḫa-am-ra-nu

LÚ.ḫa-ga-ra-nu LÚ.na-ba-tu LÚ.li-iʾ-ta-ú

LÚ.a-ra-mu la kan-šu-ti [mit-ḫa]-riš ak-šud^ud

2 ME 8 LIM UN.MEŠ TUR GAL [NITA] ù MUNUS ANŠE.KUR.RA.MEŠ

ANŠE.KUNGA.MEŠ ANŠE.MEŠ ANŠE.GAM.MAL.MEŠ GU₄.MEŠ ù ṣe-e-ni

ša la ni-bi šal-la-⸢tu ka⸣-bit-tú áš-lu-la a-na qé-reb KUR aš-šur.KI

i-na me-ti-iq ger-ri-ia ša ^mdMUATI-EN-MU.MEŠ

LÚ.qí-[pi URU].ḫa-ra-ra-ti KÙ.GI KÙ.BABBAR

GIŠ.mu-[suk-kan-ni] GAL.MEŠ ANŠE.MEŠ ANŠE.GAM.MAL.MEŠ GU₄.MEŠ

ù ṣe-e-ni ta-mar-ta-šú ka-bit-tu am-ḫur

[ba-ḫu]-⸢la⸣-ti URU.ḫi-rim-me LÚ.KÚR ak-ṣi

[i-na GIŠ.TUKUL].MEŠ ú-šam-[qit-ma] e-du ul e-zib

[pag]-⸢ri⸣-šu-un i-na ga-ši-ši a-lul-ma

[si]-ḫir-ti URU ú-šal-me na-gu-ú šu-a-tu

a-na eš-šu-ti aṣ-bat [1]-en GU₄ 10 UDU.NÍTA.MEŠ

10 ANŠE GIŠ.GEŠTIN 20 ANŠE [ZÚ.LUM].MA re-še-te-⸢šú⸣

a-na DINGIR.MEŠ-ni KUR aš-šur.KI EN.MEŠ-ia ú-kin dà-ri-šam

i-na 2-e ger-ri-ia ^daš-[šur be]-lí ú-tak-kil-an-ni-ma

a-na KUR LÚ.kaš-ši-i ù KUR LÚ.ia-su-bi-gal-la-a-a

ša ul-tu ul-la a-na [LUGAL].MEŠ-ni AD.MEŠ-ia

la kit-nu-šú lu al-lik qé-[reb ḫur-šá-a]-ni zaq-ru-ti

A.ŠÀ nam-ra-ṣi i-na [ANŠE.KUR.RA] ar-kab-ma

GIŠ.GIGIR GÌR.II-ia i-na ti-ik-ka-⸢a-ti⸣ ú-šá-áš-ši

áš-ru šup-šu-qu i-na GÌR.II-ia ri-ma-niš at-tag-giš

URU.É-^mki-lam-za-aḫ URU.ḫa-ar-[diš]-pi URU.É-^mku-bat-ti

[URU].MEŠ-ni-šú-nu É BÀD.MEŠ dan-nu-ti al-me KUR-ud

UN.MEŠ ANŠE.KUR.RA.MEŠ ANŠE.KUNGA.[MEŠ] ANŠE.MEŠ GU₄.MEŠ

[ù] ṣe-e-ni ul-tu qer-bi-[šú]-un ú-še-ṣa-am-ma

[šal]-⸢la⸣-tiš am-nu ù URU.MEŠ-ni-[šú-nu] ⸢TUR⸣.MEŠ ša ni-ba

[la] i-šu-ú ap-pu-ul aq-[qur ú]-še-me kar-meš

É EDIN kul-ta-ri mu-[šá-bi]-šú-nu

i-na ^dGIŠ.BAR aq-mu-ma di-[tal-liš] ú-še-me

ú-ter-ma URU.É-^mki-lam-za-[aḫ] šu-a-tu

a-na URU.bir-tu-ti aṣ-bat UGU [ša u₄]-um pa-ni

[BÀD].MEŠ-šú ú-dan-nin-ma UN.MEŠ KUR.[KUR] ki-šit-ti ŠU.II-ia

i-na lìb-bi ú-še-šib UN.MEŠ KUR LÚ.kaš-ši-i

ù KUR LÚ.ia-su-bi-gal-la-[a-a]

ša la-pa-an GIŠ.TUKUL.MEŠ-ia ip-par-[šid-du]

ul-tu qé-reb KUR-i ú-še-ri-[dam-ma]

[i-na] ⸢URU⸣.ḫar-diš-pi URU.É-^mku-bat-ti ú-šar-me

[i]-na ŠU.II LÚ.šu-ut SAG-ia LÚ.EN.NAM URU.ar-rap-ḫa

am-nu-šu-nu-ú-ti NA₄.NA.RÚ.A ú-še-piš-ma

li-i-tum ki-šit-ti ŠU.II ša UGU-šú-un áš-tak-ka-nu

ṣe-ru-uš-šú ú-šá-áš-ṭir-ma i-na qer-bi URU ul-ziz

pa-an ni-ri-ia ú-ter-ma a-na KUR.el-li-pi

aṣ-ṣa-bat ḫar-ra-nu el-la-mu-ú-a ^mis-pa-ba-a-ra

[LUGAL]-šú-un URU.MEŠ-šú dan-nu-ti É ni-ṣir-ti-šú

[ú]-maš-šir-ma a-na ru-qé-e-ti in-na-bit

⸢gim-ri⸣ KUR-šú DAGAL-tim GIM MURU₉ as-ḫu-up

URU.[mar]-ú-biš-ti URU.ak-ku-ud-du URU.MEŠ-ni

É ⸢LUGAL-ti⸣-šú a-di 34 URU.MEŠ-ni TUR.MEŠ

ša li-[me]-ti-šú-nu al-me KUR-ud ap-pul aq-qur

i-na ^dGIŠ.[BAR] aq-mu UN.MEŠ TUR GAL NITA ù MUNUS

ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ

GU₄.MEŠ ù [ṣe]-e-ni a-na la mi-nam áš-lu-⸢lam-ma⸣

a-di la ba-ši-i ú-šá-lik-šu-ma ú-ṣa-aḫ-ḫir ⸢KUR⸣-su

URU.ṣi-ṣi-ir-⸢tu URU⸣.[ku-um-ma]-⸢aḫ⸣-[lum] URU.MEŠ dan-nu-ti

a-di URU.MEŠ-ni ⸢TUR⸣.[MEŠ] ⸢ša⸣ li-me-ti-šú-nu

KUR.É-^mba-ar-ru-[ú na-gu]-ú a-na [gi-mir]-ti-šú

ul-tu qé-reb KUR-šú ab-⸢tuq-ma UGU mi⸣-[ṣir KUR aš]-⸢šur⸣.KI

ú-rad-di URU.el-en-za-áš a-⸢na URU⸣ [LUGAL-ú]-⸢ti⸣

ù dan-na-at na-ge-e šu-a-tu [aṣ-bat-ma]

MU-šú maḫ-ra-a ú-na-kir-ma URU.kar-^mdEN.ZU-⸢ŠEŠ.MEŠ⸣-SU

at-ta-bi ni-bit-su UN.MEŠ KUR.KUR ki-šit-ti ŠU.II-[ia]

i-na lìb-bi ú-še-šib i-na ŠU.II LÚ.šu-ut SAG-ia

LÚ.EN.NAM URU.ḫar-ḫar [am]-nu-ma ú-rap-piš ma-a-ti

i-na ta-a-a-ar-ti-ia [ša] KUR.ma-da-a-a ru-qu-ti

ša i-na LUGAL.MEŠ-ni AD.⸢MEŠ-ia⸣ ma-am-man la iš-mu-ú

zi-kir KUR-šú-un man-da-ta-šú-nu ka-bit-tu am-ḫur

a-na ni-ri be-lu-ti-ia ú-šak-ni-su-nu-ti

i-na [šal-ši] ⸢ger⸣-ri-ia [a]-⸢na⸣ KUR.ḫa-at-ti lu al-lik

^mlu-li-i LUGAL URU.ṣi-[du]-un-ni pul-ḫi me-lam-me

be-lu-ti-ia is-ḫu-pu-šú-[ma] a-⸢na ru-uq-qí⸣ MURUB₄ tam-⸢tim⸣

in-na-bit-ma KUR-šú e-mid URU.ṣi-du-⸢un⸣-[nu GAL-ú]

URU.ṣi-du-un-nu ṣe-eḫ-ru URU.É-[zi]-⸢it⸣-ti

URU.ṣa-ri-ip-tu URU.ma-ḫal-li-ba URU.ú-šu-ú

URU.ak-zi-bi URU.ak-ku-ú URU.MEŠ-šú dan-nu-ti

[É] ⸢BÀD⸣.MEŠ a-šar ri-i-ti ù [maš-qí]-⸢ti⸣ É tuk-la-ti-šú

ra-⸢šub-bat⸣ GIŠ.TUKUL ^daš-šur EN-⸢ia⸣ [is-ḫu-pu]-⸢šú-nu-ti⸣-ma

ik-nu-⸢šú še⸣-pu-ú-a ^mtu-⸢ba⸣-[aʾ-lum i-na GIŠ.GU.ZA LUGAL-ú-ti]

UGU-šú-[un] ú-še-šib-ma ⸢GUN⸣ [man-da-tu be-lu-ti-ia]

šat-ti-[šam la] ba-aṭ-lu ú-[kin ṣe-ru-uš-šú]

ša ^m[mi]-⸢in-ḫi⸣-[im]-mu URU.sam-⸢si⸣-[mu-ru-na-a-a]

^mtu-ba-aʾ-lu URU.ṣi-du-⸢un-na⸣-[a-a]

^mab-⸢di⸣-li-iʾ-[ti] URU.a-ru-da-[a-a]

^m[ú-ru]-mil-[ki] URU.gu-ub-la-a-a

^m[mi]-⸢ti⸣-in-ti URU.as-du-da-a-a

^mbu-du-DINGIR KUR.É-^mam-ma-na-a-a

^mkam-mu-su-na-[ad]-bi KUR.ma-ʾa-ba-a-a

^mda-a-ram-mu [KUR].ú-du-um-ma-a-a

⸢LUGAL⸣.MEŠ-ni KUR MAR.TU.KI ka-⸢li⸣-[šú-un] ⸢IGI⸣.SÁ-e šad-lu-ti

[ta-mar]-ta-šú-nu ka-bit-tu a-di 4-[šú a-na] ⸢maḫ⸣-ri-ia

[iš]-šu-nim-ma iš-ši-qu GÌR.II-ia [ù ^mṣi]-⸢id⸣-qa-a

LUGAL URU.is-qa-al-lu-na ša la ik-nu-⸢šú⸣ [a-na ni-ri-ia]

DINGIR.MEŠ É AD-šú šá-a-šú DAM-su DUMU.MEŠ-⸢šú⸣ [DUMU.MUNUS.MEŠ-šú]

ŠEŠ.MEŠ-šú NUMUN É AD-šú as-su-ḫa-am-ma a-na KUR aš-[šur.KI]

ú-ra-áš-šú ^mLUGAL-lu-dà-ri DUMU ^mru-kib-ti

LUGAL-šú-nu maḫ-ru-ú UGU UN.MEŠ URU.is-qa-al-lu-na

áš-kun-ma na-dan GUN kàd-re-e be-lu-ti-ia

e-mid-su-ú-ma i-šá-a-aṭ ab-šá-a-ni

i-na me-ti-iq ger-ri-ia URU.É-da-gan-na

URU.ia-ap-pu-ú URU.ba-na-a-a-bar-qa URU.a-zu-ru

URU.MEŠ-ni ša ^mṣi-id-qa-a ša a-na GÌR.II-ia ár-ḫiš

la ik-nu-šú al-me KUR-ud áš-lu-la šal-la-su-un

LÚ.GÌR.NÍTA.MEŠ LÚ.NUN.MEŠ ù UN.MEŠ URU.am-qar-ru-na

ša ^mpa-di-i LUGAL-šú-nu EN a-de-e ù ma-mit ša KUR aš-šur.KI

bi-re-tu AN.BAR id-du-ma a-na ^mḫa-za-qi-a-ú

KUR.ia-ú-da-a-a id-di-nu-šú nak-[riš]

a-na an-zil-li i-pu-šú ip-làḫ lib-ba-⸢šú⸣-[un]

LUGAL.MEŠ KUR.mu-ṣu-ri LÚ.ERIM.MEŠ GIŠ.PAN GIŠ.[GIGIR.MEŠ]

ANŠE.KUR.RA.MEŠ ša LUGAL KUR.me-luḫ-ḫa e-mu-qí [la ni-bi]

ik-te-ru-nim-ma il-li-ku re-⸢ṣu⸣-su-un

i-na ta-mir-ti URU.al-ta-qu-ú [el-la]-mu-ú-a

si-id-ru šit-ku-nu ú-šá-ʾa-[lu GIŠ].⸢TUKUL⸣.MEŠ-šú-un

[i]-⸢na⸣ tukul-ti ^daš-šur ⸢EN⸣-[ia it-ti-šú-un]

[am]-da-ḫi-iṣ-ma áš-⸢ta⸣-[kan BAD₅.BAD₅-šú-un]

[LÚ].⸢EN⸣ GIŠ.GIGIR.⸢MEŠ⸣ ù DUMU.MEŠ [LUGAL KUR.mu-ṣu-ra-a-a]

[a]-di ⸢LÚ⸣.[EN GIŠ.GIGIR.MEŠ] ⸢ša⸣ LUGAL [KUR.me-luḫ-ḫi] ⸢bal⸣-ṭu-su-un

i-na MURUB₄ tam-⸢ḫa-ri⸣ ik-šu-da ŠU.II-a-a URU.al-ta-qu-ú

URU.ta-am-na-a al-me KUR-ud áš-lu-la šal-la-su-un

a-na URU.am-qar-ru-na aq-rib-ma LÚ.GÌR.NÍTA.MEŠ LÚ.NUN.MEŠ

ša ḫi-iṭ-ṭu ú-šab-šu-ú a-duk-ma i-na di-ma-a-ti

si-ḫir-ti URU a-lul pag-ri-šú-un DUMU.MEŠ URU e-piš an-ni

ù gíl-la-ti a-na šal-la-ti am-nu si-it-tu-te-[šú-nu]

la ba-bil ḫi-ṭi-ti ù gul-lul-ti ša a-ra-⸢an⸣-[šú]-⸢nu⸣

la ib-šu-ú uš-šur-šú-un aq-[bi] ^mpa-di-i LUGAL-[šú-nu]

ul-tu qé-reb URU.ur-sa-li-im-mu ú-še-ṣa-[am-ma]

i-na GIŠ.GU.ZA be-lu-ti UGU-šú-un ú-še-[šib-ma]

man-da-at-tu be-lu-ti-ia ú-kin ṣe-⸢ru⸣-[uš]-šú

ù ^mḫa-za-qi-a-ú KUR.ia-ú-da-a-a ša ⸢la⸣ [ik]-nu-šú

a-na ni-ri-ia 46 URU.MEŠ-šú dan-nu-ti É BÀD.MEŠ-ni

ù URU.MEŠ TUR.MEŠ ša li-me-ti-šú-nu ša ni-[ba] ⸢la⸣ i-šu-ú

i-na šuk-bu-us a-ram-me ù qit-ru-[ub] šu-pi-i

mit-ḫu-uṣ zu-uk GÌR.II pil-ši nik-si [ù kal]-⸢ban⸣-na-ti

al-me KUR-ud 2 ME LIM 1 ME 50 UN.MEŠ TUR ⸢GAL⸣ [NITA] ù MUNUS

ANŠE.KUR.RA.MEŠ ANŠE.KUNGA.MEŠ ANŠE.MEŠ ⸢ANŠE⸣.[GAM.MAL].⸢MEŠ⸣ GU₄.MEŠ

ù ṣe-e-ni ša la ni-bi ul-⸢tu⸣ [qer]-⸢bi⸣-šú-un

ú-še-ṣa-am-ma šal-la-tiš am-nu šá-a-šú [GIM MUŠEN] ⸢qu⸣-up-pi

qé-reb URU.ur-sa-li-im-mu URU ⸢LUGAL-ti⸣-šú e-sír-šú

URU.ḪAL.ṢU.MEŠ UGU-šú ú-rak-kis-[ma] a-ṣe-e KÁ.GAL URU-šú

[ú]-⸢ter⸣-ra ik-ki-bu-uš URU.MEŠ-šú ša áš-lu-la

[ul-tu qé-reb] ⸢KUR⸣-šú ab-tuq-[ma] a-na ^mmi-ti-in-ti

[LUGAL URU.as-du-di ^mpa]-⸢di⸣-i LUGAL URU.am-qar-ru-na

ù ^mGISSU-[EN LUGAL URU.ḫa]-⸢zi⸣-ti ad-din-ma ú-ṣa-aḫ-ḫir KUR-su

e-li GUN ⸢maḫ⸣-[ri-ti na]-⸢dan⸣ šat-ti-šú-un man-da-at-tu

kàd-re-e be-lu-[ti-ia ú]-rad-di-ma ú-kin ṣe-ru-uš-šú-un

šu-ú ^mḫa-za-qi-[a-ú pul]-⸢ḫi⸣ me-lam-me be-lu-ti-ia

is-ḫu-pu-šú-ma ⸢LÚ⸣.[úr-bi] ù LÚ.ERIM.MEŠ-šú SIG₅.MEŠ

ša a-na dun-nu-[un URU.ur]-sa-li-im-mu URU LUGAL-ti-šú

ú-še-ri-bu-ma ir-[šu-ú til]-la-a-ti it-ti 30 GUN KÙ.GI

8 ME GUN KÙ.BABBAR ni-[siq-ti gu]-⸢uḫ⸣-li ták-kàs-si NA₄.AN.ZA.GUL.ME GAL.MEŠ

GIŠ.NÁ.MEŠ ZÚ GIŠ.⸢GU⸣.[ZA.MEŠ né]-⸢me⸣-di ZÚ KUŠ AM.SI ZÚ AM.SI

GIŠ.ESI GIŠ.TÚG mim-ma šum-[šú ni]-⸢ṣir⸣-tu ka-bit-tú ù DUMU.MUNUS.MEŠ-šú

MUNUS.UN.MEŠ É.GAL-šú LÚ.⸢NAR⸣.[MEŠ] MUNUS.NAR.MEŠ a-na qé-reb NINA.KI

URU be-lu-ti-ia ⸢EGIR⸣-[ia ú-še]-⸢bi⸣-lam-ma a-na na-dan

man-da-at-ti ù e-⸢peš⸣ [ARAD-ú]-ti iš-pu-ra rak-bu-šú

i-na 4-e ger-ri-ia [^daš-šur] be-lí ú-tak-kil-an-ni-ma

um-ma-na-te-ia gap-šá-a-⸢te⸣ [ad]-⸢ke⸣-ma a-na KUR.É-^mia-kin₇

a-la-ku aq-bi i-na me-[ti-iq] ger-ri-ia ša ^mšu-zu-bi

LÚ.kal-dà-a-a a-[šib qé-reb ÍD.a]-⸢gam⸣-me i-na URU.bi-it-tu-tu

áš-ta-kan ⸢BAD₅⸣.[BAD₅-šú šu-ú ḫur-ba]-šú ta-ḫa-zi-ia UGU-šú

im-⸢qut⸣-[ma it-ru-ku lib]-⸢bu⸣-šú ki-ma

az-za-ri e-diš ip-[par-šid-ma ul] ⸢in⸣-na-mir a-šar-šú

pa-an ni-ri-ia ú-[ter]-ma a-na KUR.É-^mia-kin₇

aṣ-ṣa-bat ḫar-ra-nu šu-ú ^mdAMAR.UTU-IBILA-SUM.NA

ša i-na a-lak ger-ri-ia maḫ-re-e BAD₅.BAD₅-šú áš-ku-nu-ma

ú-par-ri-ru el-lat-[su] ⸢ri⸣-gim GIŠ.TUKUL.MEŠ-ia dan-nu-ti

ù ti-ib ta-ḫa-zi-⸢ia ez⸣-zi e-dur-ma DINGIR.MEŠ ma-rak KUR-šú

i-na KI.⸢TUŠ⸣-šú-nu ⸢id⸣-[ke-ma qé-reb] GIŠ.MÁ.MEŠ ú-šar-kib-ma

[a-na URU.na-gi-te-raq-qí ša qa-bal] ⸢tam⸣-tim iṣ-ṣu-riš

[ip-pa-riš ŠEŠ.MEŠ-šú NUMUN É AD-šú ša ú-maš-ši-ru a]-ḫi tam-tim

[a-di si-it-ti UN.MEŠ KUR-šú ul-tu KUR.É-^mia-kin₇]

[qé-reb] ÍD.a-[gam-me u ap-pa-ra-a-te ú-še]-ṣa-am-ma

[šal]-la-tiš am-nu ú-[ter-ma URU.MEŠ-šú] ⸢ap⸣-pul aq-qur

ú-še-me kar-meš UGU EN sa-li-me-šú LUGAL KUR.ELAM.MA.KI

na-mur-ra-tum at-[bu-uk i-na] ⸢ta⸣-a-a-ar-ti-ia

^mdaš-šur-na-din-MU DUMU [reš-tu-ú] tar-bit bir-ki-ia

i-na GIŠ.GU.ZA be-[lu-ti-šú] ú-še-šib-ma

DAGAL-tum KUR ⸢EME⸣.[GI₇ u URI].KI ú-šad-gil pa-nu-uš-šú

i-na 5 ger-ri-⸢ia ba⸣-ḫu-la-ti URU.tu-mur-ri

URU.šá-ru-um URU.[e-za]-ma URU.kip-šú URU.ḫal-bu-da URU.qu-ú-a

URU.qa-na ša ⸢GIM⸣ [qin]-ni TI₈.MUŠEN a-šá-red MUŠEN.ḪI.A

[ṣe-er] zuq-ti KUR.[ni]-pur KUR-i mar-ṣi šu-bat-su-un

[šit-ku]-na-[at-ma] la kit-nu-šú a-na ni-i-ri

[i-na GÌR.II KUR.ni-pur] ⸢ka⸣-ra-ši ú-šá-áš-kin-ma

[it-ti LÚ.qur]-⸢bu⸣-ti GÌR.II-ia na-as-qu-ú-ti

[ù LÚ.ERIM.MEŠ] ta-ḫa-zi-ia la ga-me-lu-ti

[a-na-ku GIM AM] ek-di pa-nu-uš-šú-un aṣ-bat

ḫur-ri ⸢na⸣-[ḫal-li] ⸢na⸣-at-bak šad-di-i me-le-e

mar-ṣu-ti i-⸢na GIŠ⸣.GU.ZA áš-ta-am-di-iḫ

[a-šar a-na GIŠ.GU.ZA šup-šu-qu i-na GÌR.II-ia áš-taḫ-ḫi]-⸢iṭ⸣

[GIM ar-me a-na zuq-ti šá-qu-ti ṣe-ru-uš-šú]-⸢un⸣

[e-li a-šar bir-ka-a-a ma-na-aḫ-tu i-šá-a ṣe-er NA₄ KUR-i ú-šib]-⸢ma⸣

A.MEŠ KUŠ.na-a-di [ka-ṣu-te a-na ṣu-um-me-ia lu áš-ti]

i-na ŠU.SI.MEŠ ḫur-šá-a-ni ⸢ar⸣-[de]-⸢šú⸣-nu-ti-ma áš-⸢ta⸣-[kan]

taḫ-ta-⸢šú-un⸣ URU.MEŠ-šú-nu KUR-[ud]-ma áš-lu-la šal-la-sún

ap-pul [aq-qur] i-na ^dGIŠ.BAR aq-mu pa-an ni-ri-ia

ú-ter-[ma] ṣe-er ^mma-ni-ia-e LUGAL URU.uk-ki

šad-da-a-a-e la kan-še aṣ-ṣa-bat ḫar-ra-nu

ur-ḫi la pe-tu-ti ṭu-ú-di pa-áš-qu-ú-ti

ša la-pa-an KUR.MEŠ mar-ṣu-ti ul-la-nu-ú-a

qé-reb-šú-[un] ⸢ma⸣-am-man la il-li-ku LUGAL.MEŠ pa-ni maḫ-ru-ti

i-na GÌR.II KUR.a-na-ra ù KUR.up-pa KUR.MEŠ-e dan-nu-ti

KARAŠ ú-šá-áš-kin-ma a-⸢na⸣-ku i-na GIŠ.GU.ZA ⸢né⸣-[me-di]

it-ti ⸢LÚ.ERIM⸣.MEŠ ta-ḫa-[zi]-⸢ia⸣ [gít]-⸢ma⸣-lu-ú-ti

i-na ne-re-bi-šú-un pi-⸢qu-ti⸣ šu-nu-ḫi-iš e-ru-um-ma

mar-ṣi-iš e-te-el-la-a [ŠU].SI.MEŠ KUR-i pa-áš-qa-a-ti

šu-ú ^mma-[ni]-⸢ia⸣-e tur-bu-[uʾ] GÌR.II ERIM.ḪI.A-ia e-mur-ma

URU.uk-ku [URU LUGAL]-⸢ti⸣-šú e-zib-ma a-na ru-qé-ti in-na-bit

URU.uk-ku [al-me KUR]-⸢ud⸣ áš-lu-la šal-la-su

mim-ma šum-šu [NÍG.ŠU NÍG.GA ni]-⸢ṣir⸣-ti É.GAL-šú

ul-tu ⸢qer⸣-[bé-e-šu ú-še-ṣa]-⸢am⸣-ma šal-la-ti-iš am-nu

ù 33 URU.[MEŠ-ni ša pa-a]-⸢ṭi⸣ na-gi-šú ak-šud^ud-ma

UN.MEŠ ANŠE.⸢MEŠ⸣ [GU₄.MEŠ ù] ṣe-e-ni ul-tu qer-bi-šú-un

áš-lu-la ap-⸢pu⸣-[ul] aq-qur i-na ^dGIŠ.BAR aq-mu

i-na 6 ger-⸢ri⸣-[ia] ⸢si⸣-it-ti UN.MEŠ KUR.É-^mia-kin₇

ša la-pa-an GIŠ.⸢TUKUL⸣.[MEŠ]-⸢ia⸣ dan-nu-ti GIM sér-re-me ig-ru-ru

DINGIR.MEŠ ma-rak KUR-šú-un i-na šub-ti-šú-nu id-ku-ma

tam-tim GAL-tum [ša] ⸢ṣi⸣-it ^dUTU-ši e-bi-ru-ma

i-na URU.na-gi-ti ša KUR.ELAM.MA.KI id-du-ú šu-bat-sún