King, Bavian copies Central Panel (RINAP 3/2 Sennacherib 223 ex. 01d) [Sennacherib]

^daš-šur ^da-nu-um ^dEN.LÍL ^dé-a ^d30 ^dUTU ^dIŠKUR [(...)] ^dAMAR.UTU ^d⸢AG ^d⸣[x].⸢GUR⸣ ^d⸢iš-tar⸣

^d7^*.BI DINGIR.MEŠ GAL.MEŠ ša ina gi-mir ad-na-a-ti a-na ⸢i⸣-tar-re-e ṣal-⸢mat⸣ [x].⸢DU e⸣-[x]

i-na-áš-šu-ú i-nam-bu-u mal-ku ^md30-PAP.MEŠ-SU LUGAL GAL [x] dan^*-⸢nu LUGAL⸣ [...]

NUN za-nin-šú-un i-na an-ni-ku-nu ke-nim ul-tu tam-tim e-ÁB [...]

mal-ki ša kib-rat še-pu-u-a ú-šak-niš-ma i-šu-ṭu ab-šá-ni i-na [...]

uš-rab-bi BÀD-šú ù šal-ḫu-šú ša ina maḫ-re-e la ep-šú eš-šiš [...]

ta-me-ra-tu-šú ša i-na la ma-mi na-mu-ta [...]

ù UN.MEŠ-šú A.MEŠ ši-qi la i-da-a-ma a-na zu-un-ni [...]

ul-tu ŠÀ URU.ma-si-ti URU.ban-ba-kab-na URU.šá-ap-pa-ri-šú ⸢URU⸣.[...]

URU.ḫa-ta-a URU.da-la-a-in URU.re-eš-e-ni URU.su-lu URU.⸢BÀD⸣-[...]

URU.gi-in-gi-li-niš URU.nam-pa-ga-a-te URU.DU₆ URU.a-lum-[x x] A.MEŠ [...]

a-na ŠÀ ÍD.ḫu-su-ur ú-še-⸢šir⸣ ma-lak-šin ul-tu [...]

ú-šaḫ-ra-a A.MEŠ šu-nu-ti ú-šar-da-<a> qé-reb-šá [...]

A.MEŠ šá-tu-nu ul-tu ŠÀ KUR.⸢ta-as⸣ [...]

i-nam-bu-u MU-NE e-⸢nen⸣-[...] x x [...]

ša i-ta-tu-uš-šú [...]

uš-rad-di i-na ⸢ŠÀ⸣ [...]

⸢UGU⸣ [...]

[...].⸢MEŠ-ia⸣

šu-bat-su la ú-⸢šar⸣-[...] x x [...] x [...].⸢MEŠ⸣-SU

LUGAL KUR aš-šur.KI a-šá-red [x x]-ki ša ⸢ul-tu⸣ ṣi-it ^dUTU-ši [x x] e-[...] ⸢pat⸣-ta-a-ti

ša ú-šaḫ-ru-ú NINA.⸢KI⸣ a-na li-me-ti-šú GIŠ.KIRI₆.MEŠ [...] ú-[...] x ŠAB^? x x

⸢šu⸣-be-lat ḫur-šá-a-ni ka-li-šú-un ⸢GURUN⸣ ad-na-a-ti ka-la-[...] ù [...]-qup ⸢a-di⸣

A.MEŠ la i-kaš-šá-du a-na ṣu-ma-me-ti ú-maš-⸢šir⸣-ma am-[...] x [...]-x gi-mir

ṣip-pa-a-ti ina e-re-bi e-re-ṣe-ti e-le-en URU ù ⸢KI⸣.[...] URU-šá-LÚ.ŠÀ-URU-a-a

a-na mé-reš ŠE.AM ù ŠE.GIŠ.Ì ú-šam-ka-ra šat-ti-⸢šam⸣ [x x]-⸢ku-ú⸣ [...].⸢MEŠ⸣-ni DUMU.MEŠ-ia

ša it-ti lìb-bi uš-tam-mu-ma a-na qa-a-pi la tur-ru [...] a-⸢ki⸣-i ⸢i⸣-[x x] LÚ.ERIM.MEŠ an-nu-ti e-ṣu-ti

ÍD šu-a-tu ú-šaḫ-ri ni-iš ^daš-šur DINGIR-ia GAL [...] šum-ma ina ŠÀ LÚ.[x].⸢MEŠ⸣ an-nu-ti ÍD šu-a-tu la aḫ-ru-u

ù i-na MU.AN.NA 3 ITI la ú-qat-tu-ú ši-pir-šá ⸢la⸣ [...] ig-gam-ru-ú ú-qat-tu-ú ḫi-ru-sa a-na pa-te-e

ÍD šu-a-tu LÚ.MAŠ.MAŠ LÚ.GALA ú-ma-ʾe-er-ma ú-šat-[...] NA₄.GUG NA₄.ZA.GÌN NA₄.MUŠ.GÍR NA₄.NÍR NA₄.BABBAR.DILI.MEŠ

NA₄.MEŠ ni-siq-ti BAL.GI.KU₆ NÍG.BÚN.NA.KU₆ tam-šil pí-[x x] KÙ.GI ŠIM.ḪI.A Ì.GIŠ DÙG.GA AN.NA ^dé-a EN nag-bi kup-pi

ù ta-[x]-⸢mi^?⸣-ti ^den-bi-lu-lu GÚ.GAL ÍD.MEŠ ^den-e-em-du [...] ú-qa-a-a-iš qí-šá-a-ti a-na DINGIR.MEŠ GAL.MEŠ

ut-nin-ma su-up-pi-ia iš-mu-ma ú-še-ši-ru li-pit ŠU.II-ia KÁ ÍD [...].⸢MAR⸣ ù GIŠ.MAR.ŠE.RA.AḪ a-na ra-ma-ni-šu ip-pe-te₉-ma

ú-šar-da-a A.MEŠ ḪÉ.NUN i-na ši-pir ŠU.II LÚ-tim KÁ-šú la ip-[...] DINGIR.MEŠ ú-šaḫ-bab^* ma-a-me iš-tu ÍD ap-pal-su-ma

uš-te-eš-še-ra ši-pir-šá a-na DINGIR.MEŠ GAL.MEŠ a-lik i-di-ia [...] NIGA.MEŠ UDU.MEŠ du-uš-šú-ti UDU.SISKUR.MEŠ eb-bé-ti lu aq-qí

LÚ.ERIM.MEŠ šu-nu-ti ša ÍD šu-a-tu iḫ-ru-ú TÚG.GADA TÚG.MEŠ [...] ḪAR.MEŠ KÙ.GI GABA.MEŠ KÙ.GI ⸢áš⸣-kun-šú-nu-ti ina MU.AN.NA Ú-ma

it-ti ar ÍD šu-a-tu ša aḫ-ru-ú it-ti ^mum-ma-an-[...] ù LUGAL KÁ.DINGIR.RA.KI a-di ⸢LUGAL⸣.MEŠ-ni ma-aʾ-du-ti

ša KUR-i ù KUR tam-tim ša re-ṣu-ti-šú-nu i-na ta-mir-ti [...] áš-ta-kan si-dir-ta ina qí-⸢bit⸣ ^daš-šur EN GAL-e EN-ia

ki-i GIŠ.šil-ta-ḫi šam-ri i-na lìb-bi-šú-nu al-lik-ma si-kip-ti [...] áš-kun pu-ḫur-šú-nu ú-sap-pi-iḫ-ma ú-par-ri-ir

el-lat-su-un LÚ.GAL.MEŠ LUGAL KUR.ELAM.MA.KI a-di ^mdAG-MU-GAR-un [...] LUGAL KUR.kár-^ddun-ía-àš bal-ṭu-su-un qé-reb tam-ḫa-ri

ik-šu-da ŠU.II-a-a LUGAL KUR.ELAM.MA.KI ù LUGAL KÁ.DINGIR.RA.KI ḫur-⸢ba⸣-[...] is-ḫup-šú-nu-ti-ma qé-reb GIŠ.GIGIR.MEŠ-šú-nu ú-maš-še-ru-ú-⸢ni⸣

⸢zu-ú-šú⸣-un a-na šu-zu-ub nap-šá-te-šú-nu ma-tu-uš-šú-un ⸢in⸣-[...] la i-tu-ru-ni ar-kiš mìn-de-ma ^md30-ŠEŠ.MEŠ-SU

LUGAL KUR aš-šur.KI ag-giš i-ziz-ma a-na KUR.ELAM.MA.KI i-šak-ka-nu ta-a-[...] ḫat-tu pu^*-luḫ-tu UGU KUR.ELAM.MA.KI ka-li-šú-un it-ta-bi-ik-ma

KUR-su-nu ú-maš-še-ru-ma a-na šu-zu-ub nap-šá-te-šú-nu ki-i TI₈.[...]-a mar-ṣu in-nen-du-ma ki-i a-na iṣ-ṣu-ri kuš-šu-di

i-tar-ra-⸢ku lib⸣-bu-šú-un a-di u₄-mi ši-tim-ti-šú-nu ṭu-du [...]-ma la e-pu-šu ta-ḫa-zu i-na 2-i KASKAL-ia a-na KÁ.DINGIR.RA.KI

ša a-na ka-šá-di ú-ṣa-am-me-ru-šu ḫi-it-mu-ṭiš al-lik-ma ki-ma [x x] me-ḫe-e a-ziq-ma ki-ma im-ba-ri as-ḫu-up-šú

URU ni-i-ti al-me-ma i-na pil-ši ù na-bal-⸢kát⸣-ti ŠU.II-[...] UN^*.MEŠ-šú TUR ù GAL-a la e-zib-ma ADDA.MEŠ-šú-nu

re-bet URU ú-mal-li ^mšu-zu-bu LUGAL KÁ.DINGIR.RA.KI qá-du kim-ti-šú [...] bal-ṭu-su-un a-na qé-reb KUR-ia ú-bil-šu NÍG.GA

URU šu-a-tu KÙ.BABBAR KÙ.GI NA₄.MEŠ [x x]-ti NÍG.ŠU NÍG.GA a-na ŠU.II [...] a-na i-di ra-ma-ni-šú-nu ú-ter-ru DINGIR.MEŠ

a-šib lìb-bi-šú ŠU.II UN.MEŠ-ia ik-šu-⸢su⸣-nu-ti-ma ú-šab-bi-ru-ma [...] il-qu-ú ^dIŠKUR ^dša-la DINGIR.MEŠ ša URU.É.GAL.MEŠ

ša ^mdAMAR.UTU-SUM-ŠEŠ.MEŠ LUGAL KUR URI.KI a-na tar-ṣi ^mtukul-ti-A-é-šár-ra [...] a-na KÁ.DINGIR.RA.KI ú-bil-lu i-na 4 ME 18

MU.AN.NA.MEŠ ul-tu KÁ.DINGIR.RA.KI ú-še-ṣa-am-ma a-na URU.É.[...] ú-ter-šú-nu-ti URU ù É.MEŠ ul-tu UŠ₈-šú a-di gaba-dib-bi-šú

ap-pul aq-qur i-na ^dGIŠ.BAR aq-mu BÀD ù šal-ḫu-u É.MEŠ [...] ma-la ba-šu-ú as-suḫ-<ma> a-na ÍD.a-ra-aḫ-ti

ad-⸢di i-na qé-reb⸣ URU šu-a-tu ⸢ḫi-ra⸣-a-ti aḫ-re-e-ma er-[...] ši-kin uš-še-šú ú-ḫal-liq-ma UGU ša a-bu-bu

na-⸢al⸣-pan-ta-šú ú-šá-tir áš-šu aḫ-rat u₄-me qaq-qar URU šu-a-[...] i-na ma-a-mi uš-ḫar-miṭ-su-ma ag-da-mar

ú-šal-liš i-na pi-i ÍD ša ú-šaḫ-ru-ú i-na qé-reb KUR-⸢i⸣ [...] ṣa-lam DINGIR.MEŠ GAL.MEŠ EN.MEŠ-ia ab-ta-ni qé-reb-šú-un

ù ṣa-lam LUGAL-ti-ia la-bi-in ap-pi ma-ḫar-šú-un ul-ziz mim-ma lip-[...] i-tep-pu-šú ṣe-ru-uš-šú-un ú-šá-áš-ṭir-ma

a-na LUGAL.MEŠ-ni DUMU.MEŠ-ia e-⸢zib ṣa⸣-ti-iš ma-ti-ma NUN ar-ku-u [...] šá e-piš-ti e-pu-šú ú-saḫ-ḫu-ú rik-sa-te ar-ku-sa

i-⸢paṭ-ṭa⸣-ru A.MEŠ pat-⸢ta-a⸣-ti šá-ti-na ul-tu ta-mir-ti NINA.KI [...] DINGIR.MEŠ GAL.MEŠ ma-la i-na NA₄.NA.RÙ-e an-né-e

šu-mu na-bu-⸢ú i-na⸣ ṣi-it pi-i-šú-nu el-li ša la na-[...] li-ru-ru-šú-ma lis-⸢ki⸣-pu BALA-[x]