IM — (Frahm, ISIMU 6 pp. 161-163 pls. 1-3) (RINAP 3/2 Sennacherib 213 ex. 01) [Sennacherib][via rinap/sources]
| Obverse | |
| 11 | mdEN.ZU-ŠEŠ.MEŠ-eri-ba LUGAL GAL LUGAL dan-nu LUGAL KUR aš-šur.KI LUGAL la šá-na-an RE.É.UM ke-e-nu mi-gir DINGIR.MEŠ GAL.MEŠ |
| 22 | na-ṣir kit-ti ra-ʾi-im mi-šá-ri e-piš ú-sa-a-ti a-lik tap-pu-ut a-ki-i sa-ḫi-ru dam-qa-a-ti |
| 33 | eṭ-lum gít-ma-lum zi-ka-ru qar-du a-šá-red kal ma-al-ki rap-pu la-ʾi-iṭ la ma-gi-ri mu-šab-ri-qu za-ma-a-ni |
| 44 | daš-šur KUR-ú GAL-ú LUGAL-ut la šá-na-an ú-šat-lim-ma-an-ni-ma UGU gi-mir a-šib pa-rak-ki ú-šar-ba-a GIŠ.TUKUL.MEŠ-ia |
| 55 | i-na SAG LUGAL-ti-ia ša i-na GIŠ.GU.ZA be-lu-ti ú-ši-bu-ma UN.MEŠ KUR aš-šur.KI áš-ta*-nap-pa-ru i-na taš-me-e ù sa-li-me |
| 66 | mdAMAR.UTU-IBILA-SUM.NA LUGAL KUR.kár-dun-ia-áš a-a-bu lem-nu ba-ra-nu-ú ka-raš sur-ra-a-ti e-piš le-mut-ti ša an-zil-la-šu ⸢kit⸣-tu |
| 77 | mšu-túr-dna-ḫu-du LÚ.e-la-mu-ú a-na ib-ru-ti-šú is-ḫur-ma KÙ.GI KÙ.BABBAR ni-siq-ti NA₄.MEŠ ú-šat-lim-šu-ma e-ter-ri-su kit-ru |
| 88 | mim-ba-ap-pa LÚ.tur-ta-nu-šú it-ti gi-piš um-ma-na-ti-šú mta-an-na-a-nu LÚ.3.U₅ 10 LÚ.GAL KI.ṢIR.MEŠ a-di mdU.GUR-na-ṣir LÚ.su-tu-u a-lik maḫ-ri-šú-un |
| 99 | 80 LIM LÚ.ERIM.MEŠ GIŠ.PAN GIŠ.az-ma-re-e 8 ME 50 GIŠ.ṣu-um-bi 12 LIM 2 ME ANŠE.KUR.RA.MEŠ it-ti šu-nu-ti-ma a-na KUR EME.GI₇ ù URI.KI iš-pu-ra re-ṣu-us-su |
| 1010 | ù šu-ú LÚ.kal-du lem-nu e-piš ḪUL-tim NUMUN né-er-ti UNUG.KI ARARMA.KI ÚRI.KI eridu.KI kul-aba₄.KI ki-is-sik.KI URU.né-med-dla-gu-da |
| 1111 | KUR.É-mia-ki-ni KUR.É-ma-muk-ka-a-ni KUR.É-ma-šil-a-ni KUR.É-msa-ʾa-al KUR.É-mdak-ku-ri si-ḫir-ti LÚ.kal-di ma-la ba-šu-ú |
| 1212 | ša GÚ ÍD.IDIGNA LÚ.tu-uʾ-mu-na LÚ.ri-ḫi-ḫu LÚ.ia-daq-qu LÚ.gib-re-e LÚ.ma-li-ḫu |
| 1313 | ša GÚ ÍD.su-rap-pi LÚ.gu-ru-mu LÚ.ú-bu-lum LÚ.da-mu-nu LÚ.gam-bu-lu LÚ.ḫi-in-da-ru LÚ.ru-ʾu-u-a LÚ.pu-qu-du |
| 1414 | ša GÚ ÍD.BURANUN.KI LÚ.ḫa-am-ra-a-nu LÚ.ḫa-ga-ra-a-nu LÚ.na-ba-tu LÚ.li-iʾ-ta-a-a LÚ.a-ra-mu šá la i-du-ú mi-tu-tum |
| 1515 | NIBRU.KI dil-bat.KI MARAD.DA.KI kiš.KI URU.ḫur-sag-kalam-ma KÁ.DINGIR.RA.KI bár-sipa.KI GÚ.DU₈.A.KI gi-mir KUR.kár-dun-ia-áš iš-te-niš ú-pa-ḫir-ma ú-šak-ṣir ta-ḫa-zu |
| 1616 | ia-a-ti mdEN.ZU-ŠEŠ.⸢MEŠ⸣-eri-ba zi-kar ⸢EDIN⸣ na-aʾ-du ep-še-ti-šú lem-né-e-ti ú-šá-an-nu-nim-ma la-ab-biš an-na-dir-ma ⸢qé-reb⸣ [KÁ.DINGIR].RA.KI a-na maḫ-ri-šu aq-ta-bi a-la-ku |
| 1717 | šu-ú ḫi-ri-iṣ gal-le-e lem-ni a-lak ger-ri-ia iš-me-ma ANŠE.KUR.RA.MEŠ ERIM.MEŠ GIŠ.PAN LÚ.e-la-mu-ú* LÚ.a-ra-mu LÚ.kal-<du> it-ti mdU.GUR*-na-ṣir ù 10 LÚ.GAL KI.ṢIR.MEŠ LUGAL KUR.ELAM.MA.KI ša la i-du-ú mi-tu-tú |
| 1818 | e-mu-qí la ni-bi it-ti šú-nu-ti-ma ú-dan-ni-in ki-iṣ-ri-šu-un qé-reb GÚ.DU₈.A.KI mit-ḫa-riš ú-še-rib-ma a-na mé-te-eq ger-ri-ia ú-šá-an-ṣir ka-a-⸢di⸣ |
| 1919 | ṣi-in-di-ia uš-te-še-ra UD 20.KÁM ša ITI.ZÍZ TA bal-til.KI GIM GU₄.AM gap-ši meḫ-ret ERIM.ḪI.A-ia aṣ-bat-ma pa-an gi-ip-ši-ia ul ú-šad-gil ar-ka-a ul ú-qí |
| 2020 | LÚ.GAL SAG LÚ.EN.NAM.MEŠ-ia a-na kiš.KI ú-ma-ʾe-er maḫ-ru-u-a ṭè-⸢em?⸣ mdAMAR.UTU-IBILA-SUM.NA li-in-da-ma e te-ga-a dun-ni-na ma-ṣar-tuš |
| 2121 | šu-ú LÚ.EN.NAM.MEŠ-ia e-mur-ma a-di gi-mir um-ma-na-ti-šú KÁ.GAL* dza-ba₄-ba₄ uṣ-ṣa-am-ma i-na ta-mir-ti kiš.KI it-ti LÚ.GAL.MEŠ-ia e-pu-uš ta-ḫa-zu |
| 2222 | LÚ.GAL.MEŠ-ia qit-ru-bu ta-ḫa-zi LÚ.KÚR* UGU-šú-un id-nin-ma ip-la-ḫu qa?-bal? x-šu LÚ.A šip-ri-šú-un ša ḫa-mat i-na qé-reb ta-mir-ti GÚ.DU₈.A.KI ṣe-ru-u-a iš*-pu*-ru-u-ni |
| 2323 | i-na ug-gat lìb-bi-ia UGU GÚ.DU₈.A.KI ti-bu šam-ru áš-kun-ma LÚ.mun-daḫ-ṣi sa-ḫi-ir BÀD-šú as-li-iš ú-ṭa-ab-bi-iḫ-ma aṣ-ṣa-bat URU |
| 2424 | ANŠE.KUR.RA.MEŠ ERIM.MEŠ GIŠ.PAN LÚ.e-la-me-e LÚ.a-ra-mu LÚ.kal-du LÚ.GAL KI.ṢIR.MEŠ LÚ.KUR.ELAM.MA.KI ù mdU.GUR-na-ṣir a-di DUMU.MEŠ URU EN ḫi-iṭ-ṭi ú-še-ṣa-am-ma šal-la-ti-iš am-nu |
| 2525 | la-ab-biš an-na-dir-ma al-la-bi-ib a-bu-biš it-ti LÚ.qu-ra-di-ia* la ga-me-lu-ti UGU mdAMAR.UTU-IBILA-SUM.NA a-na kiš.KI áš-ta-kan pa-ni-ia |
| 2626 | ù šu-ú e-piš lem-né-e-ti ḫi-il-lu a-na ru-qé-e-ti e-mur-ma pu-luḫ-du im-qu-su gi-mir um*-ma-na-ti-šú ú-maš-šir-ma a-na KUR.gu-zu-um-ma-ni in-na-bit |
| 2727 | mta-an-na-a-nu a-di ERIM.ḪI.A ELAM.MA.KI LÚ.kal-du ù LÚ.a-ra-mu ša i-da-šú iz-zi-zu-ma il-li-ku re-ṣu-us-su BAD₅.BAD₅-šú-un áš-kun-ma ú-par-ri-ir el-lat-su |
| 2828 | ma-di-nu DUMU NIN mdAMAR.UTU*-IBILA-SUM.NA a-di mba-as-qa-a-nu ŠEŠ fia-ti-iʾ-e šar-rat KUR.a-ri-bi it-ti um-ma-na-ti-šú-nu bal-ṭu-su-un ina qa-ti aṣ-bat |
| 2929 | GIŠ.GIGIR.MEŠ GIŠ.ṣu-um-bi ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ ANŠE.ud-ri ša qé-reb tam-ḫa-ri muš-šu-ru ik-šu-da ŠU.II-a-a |
| 3030 | i-na ḫu-ud lìb-bi ⸢ù⸣ nu-⸢um-mur⸣ pa-ni a-na KÁ.DINGIR.RA.KI a-ḫi-iš-ma a-na É.GAL mdAMAR.UTU*-IBILA-SUM.NA áš-šu šá-lal NÍG*.ŠU ù NÍG.GA e-te-ru-ub qé-reb-šá |
| 3131 | ap-te-e-ma É ni-ṣir-te-šú KÙ.GI KÙ.BABBAR ú-nu-ut KÙ.GI KÙ.BABBAR NA₄.MEŠ a-qar-tu GIŠ.NÁ.MEŠ GIŠ.GU.ZA.MEŠ né-me-de-e GIŠ.šá šá-da-di GIŠ.ga-ši-ru-ut LUGAL-ti-šú ša iḫ-zu-šú-nu KÙ.GI KÙ.BABBAR |
| 3232 | mim-ma šum-šu NÍG.ŠU NÍG.GA ni-ṣir-tum* ka-bit-tum DAM-su MUNUS.ERIM.MEŠ É.GAL-šú MUNUS.AGRIG.MEŠ LÚ.šu-ut SAG.MEŠ LÚ.TIRUM.MEŠ LÚ.man-za-az pa-ni LÚ.NAR.MEŠ MUNUS.NAR.MEŠ |
| 3333 | LÚ.ARAD É.GAL mu-nam-mi-ru ṭè*-mu ru-bu-ti-šú si*-ḫi-ir-ti LÚ.um-ma-a-ni ma-la ba-šu-ú mut-tab-bi-lu-tú É.GAL-šú ú-še-ṣa-am-ma šal-la-ti-iš am-nu |
| 3434 | aṣ-bat-ma ar-ki-šú a-na KUR.gu-zu-um-ma-ni LÚ.mun-daḫ-ṣi a-na qé-reb ÍD.a-gam-me ù ap-pa-ra-a-te áš-pur-ma 5 u₄-me ú-ba-ʾu-ú-šu-ma ul in*-na-mir a-šar-šu |
| 3535 | si-te-et ANŠE.KUR.RA.MEŠ ù ERIM.ḪI.A-šú ša ia-ʾa-šu ma-na-aḫ-tum na-a-liš ip-par-ši-du-šu-ma la il-li-ku i-da-a-šu iš-tu qé-reb EDIN ù ba-ma-a-ti mit-ḫa-⸢riš⸣ ú-paḫ-ḫir |
| 3636 | i-na me-ti-iq ger-ri-ia URU.a-ma-at-tu URU.ḫa-ú-a-e URU.su-pa-pu URU.É-msa-an-na-bi URU.qu-ṭa-a-a-in URU.qid-ri-na URU.BÀD-mla-di-ni URU.bi-ta-a-te |
| 3737 | URU.ba-ni-tu URU.gu-zu-um-ma-nu URU.BÀD-mia-an-ṣu-ri URU.BÀD-ma-bi-ia-ta-aʾ URU.BÀD-mru-du-um-me URU.É-mra-ḫe-e URU.ḫa-pi-šá URU.sa-di-AN URU.ḫu-ru-du URU.ṣa-aḫ-ri-na |
| 3838 | URU.il-tu-uk URU.al-la-al-lu URU.sa-ab-ḫa-nu URU.kar-dIGI.DU URU.a-pa-ak URU.É-mdan-na-a-a URU.É-ab-da-a-a URU.ba-ḫi-i-ir URU.ma-ri-ra-a MARAD.DA.KI URU.ia-qi-mu-na URU.ku-up-ru-na URU.É-mku-dúr-ri URU.SILA-qa-mma-ru-si |
| 3939 | nap-ḫar 34 URU.MEŠ dan-nu-ti É BÀD.MEŠ-ni ša KUR.É-mdak-ku-ri a-di 2 ME 50 URU.MEŠ TUR.MEŠ ša li-me-ti-šú-nu |
| 4040 | URU.BÀD-map-pe-e URU.BÀD-mta-né-e URU.BÀD-msa-ma-aʾ URU.sa-ar-ra-ba-tu URU.ṣa-la-ḫa-tu URU.BÀD-mab-da-a-a URU.sa-ap-pi-ḫi-ma-ri URU.ṣib-tú-ša-mma-ak-ka-me-e |
| 4141 | nap-ḫar 8 URU.MEŠ dan-nu-ti É BÀD.MEŠ-ni ša KUR É-msa-ʾa-al-li a-di 1 ME 20 URU.MEŠ TUR.MEŠ ša li-me-ti-šú-nu |
| 4242 | URU.sa-pi-a URU.sa-ar-ra-ba-nu UD.UD.AG.KI BÁRA-mar-ri.KI URU.É-mDINGIR-ba-ni URU.a-ḫu-du URU-ša-iṣ-ṣur-dIŠKUR URU-šá-ḫar-ra-tú URU.ma-na-aḫ-ḫu URU-ša-a-me-le-e URU.BÀD-maq-qí-ia |
| 4343 | URU.na-gi-tu URU.nu-ur-a-bi-nu URU.ḫa-ar-ṣu-ar-ra <URU>.BÀD-mru-uk-bi URU.da-an-da-ḫul-la URU.BÀD-mbir-da-da URU.É-re-ʾe-e URU.BÀD-mú-gur-ri URU.gi-in-da-i-na |
| 4444 | URU.BÀD-mú-a-a-it URU.É-mta-ú-ra-a URU.sa-ap-ḫu-na URU.bu-ḫa-ar-ru URU.ḫar-bat-mSUM.NA URU.ḫar-bat-mkal-bi URU.šá-par-re-e URU.É-mba-ni-DINGIR-ú-a URU.su-la-a-du |
| 4545 | URU.É-mil-ta-ma-sa-ma-aʾ URU.É-mdi-ni-DINGIR URU.da-qa-lu? URU.ḫa-mì-ṣa URU.be-la-a URU.⸢ta⸣-i-⸢ru⸣ URU.kip-ra-a-nu URU.il-ta-ra-tu URU.aq-qar*-šá-ki-na URU.sa-ga-ba-tu-ša-mmar-duk-ia |
| 4646 | nap-ḫar 39 URU.MEŠ dan-na-ti É BÀD.MEŠ-ni ša KUR É-ma-muk-ka-a-ni a-di 3 ME 50 URU.MEŠ TUR.MEŠ ša li-me-ti-šú-nu |
| 4747 | URU.É-mza-bi-di-ia ARARMA.KI kul-aba₄*.KI eridu.KI ki-is-sik.KI URU.né-med-dla-gu-da URU.BÀD-mia-ki-ni a-di URU.kar-dAG ša ki-šad ÍD.mar-ra-ti |
| 4848 | nap-ḫar 8 URU.MEŠ dan-nu-ti É BÀD.MEŠ-ni ša KUR.É-mia-ki-ni a-di 1 ME URU.MEŠ TUR.MEŠ ša li-me-ti-šú-nu |
| 4949 | nap-ḫar 88 URU.ME-ni dan-nu-ti É BÀD.MEŠ-ni ša KUR.kal-di a-di 8 ME 20 URU.MEŠ TUR.MEŠ ša li-me-ti-šú-nu al-me ak-šu-ud áš-lu-la šal-la-su-un |
| 5050 | ŠE.IM ZÚ.LUM.MA ša qé-reb ki-ra-te-šú-nu BURU₁₄-šú-nu ša EDIN ERIM.ḪI.A ú-šá-kil ap-pul aq-qur i-na dGIŠ.BAR aq-mu a-na DU₆.MEŠ ma-šu-ú-ti ú-ter |
| 5151 | LÚ.úr-bi LÚ.a-ra-mu LÚ.kal-du ša qé-reb UNUG.KI NIBRU.KI kiš.KI ḫur-sag-kalam-ma.KI a-di DUMU.MEŠ URU EN ḫi-iṭ-ṭi ú-še-ṣa-am-ma šal-la-ti-iš am-nu |
| 5252 | ŠE.IM ZÚ.LUM.MA ša qé-reb ki-ra-te-šú-nu me-reš ma-na-ḫi-šú-nu BURU₁₄ EDIN ba-laṭ na-piš-ti-šú-nu ERIM.ḪI.A-ni ú-šá-kil |
| 5353 | mEN-DÙ DUMU LÚ.GAL-DÙ pe-re-ʾi šu-an-na.KI šá ki-ma mi-ra-ni ṣa-aḫ-ri qé-reb É.GAL-ia ir-bu-ú a-na LUGAL-ti KUR EME.GI₇ ù URI.KI al-ta-kan UGU-šú-un |
| 5454 | i-na ta-a-a-ar-ti-ia LÚ.tu-ʾu-mu-na LÚ.ri-ḫi-ḫu LÚ.ú-bu-du LÚ.gib-re-e LÚ.ma-li-ḫu LÚ.gu-ru-mu LÚ.ú-bu-lum LÚ.da-mu-nu LÚ.gam-bu-lu LÚ.ḫi-in-da-ru |
| 5555 | LÚ.ru-ʾu-u-a LÚ.pu-qu-du LÚ.ḫa-<am>-ra-a-nu LÚ.ḫa-ga-ra-a-nu LÚ.na-ba-tu LÚ.li-iʾ-ta-a-a LÚ.a-ra-mu la ⸢kan⸣-šú mit-ḫa-riš ak-šudud-ma áš-lu-la šal-la-su-un |
| 5656 | i-na me-ti-iq ger-ri-ia ša mdAG-EN-MU.MEŠ LÚ.qí-pi URU.ḫa-ra-ra-ti KÙ.GI KÙ.BABBAR GIŠ.mu-suk-kan-ni GAL.MEŠ ANŠE.MEŠ ANŠE.GAM.MAL.MEŠ GU₄.MEŠ ù US₅.UDU.ḪI.A man-da-ta-šú ka-bit-tum am-ḫur |
| 5757 | ba-ḫu-la-ti URU.ḫi-rim-me LÚ.KÚR* ak-ṣu ša <ul-tu> ul-la a-na LUGAL.MEŠ-ni AD.MEŠ-ia la ik-nu-šu i-na GIŠ.TUKUL ú-<šam-qit-ma> na-piš-tu ul e-zib |
| 5858 | na-gu-ú šu-a-tu a-na eš-šu-ti aṣ-bat 1-en GU₄.NÍTA 10 UDU.MEŠ 10 ANŠE GEŠTIN.MEŠ 20 ANŠE ZÚ.LUM.MA re-še-te-šú a-na gi-né-e DINGIR.MEŠ KUR aš-šur.KI EN.MEŠ-ia ú-kin dà-ri-šam |
| 5959 | 2 ME 8 LIM UN.MEŠ zik-ru ù sin-niš 7 LIM 2 ME ANŠE.KUR.RA.MEŠ ANŠE.KUNGA.MEŠ 11 LIM 73 ANŠE.MEŠ 5 LIM 2 ME 30 ANŠE.GAM.MAL.MEŠ 80 LIM 1 ME GU₄.MEŠ 8 ME LIM 1 ME US₅.UDU.ḪI.A šal-la-tú ka-bit-tú áš-lu-⸢la a⸣-na qé-reb KUR aš-šur.KI |
| 6060 | e-zib ⸢UN.MEŠ ANŠE⸣.MEŠ ANŠE.GAM.MAL.MEŠ GU₄.MEŠ ù ṣe-e-ni ša gi-mir um-ma-ni-ia e-bu-ku-nim-ma a-na ra-ma-ni-šú-nu is-ki-lu si-kil-tu |
| 6161 | ù ba-ḫu-la-a-te na-ki-ri šep-ṣu mit-ru ša ur-ru-ḫiš a-na ni-ri-ia la ik-nu-šu i-na GIŠ.TUKUL ú-ra-si-ib*-ma a-lul GIŠ.ga*-ši-šiš |
| 6262 | i-na u₄-mi-šu-ma é-gal-lam-mes É dNÈ.ERI₁₁.GAL ša qé-reb URU.tar-bi-ṣi ša mdSILIM-ma-nu-MAŠ NUN a-lik maḫ-ri-ia DUMU maš-šur-PAP-ir-A DUMU mtukul-ti-dMAŠ e-pu-šu e-na-aḫ-ma |
| 6363 | É šu-a-tum a-na si-ḫi-ir-ti-šú aq-qur dan-na-su ak-šudud 2 ME ina 1.KÙŠ šid-du 1 ME ina 1.KÙŠ SAG.KI qaq-qa-ru tam-la-a ú-mal-li-ma UGU tar-pa-áš É maḫ-re-e ú-rad-di |
| 6464 | é-gal-lam-mes e-li ša u₄-mu pa-ni ú-rab-bi-ma i-na e-piš-ti LÚ.ŠITIM.GAL-le-e en-⸢qu⸣-ti iš-tu UŠ₈*-šu a-di na-bur-ri-šú ar-ṣip ú-šak-lil |
| 6565 | ši-ip-ru na-as-qu ša UGU maḫ-re-e šu-tu-ru ù a-na ta-na-da-a-ti šu-lu-ku a-na dNÈ.ERI₁₁.GAL ša qé-reb URU.tar-bi-ṣi EN-ia e-pu-uš |
| 6666 | dNÈ.ERI₁₁.GAL EN e-mu-qan ṣi-ra-a-ti dan-dan-nu gít-ma-lum a-šá-red la maḫ-ri i-na ⸢qer⸣-bi-šú ú-še-rib-ma ṭa-biš ú-šar*-ma-a šu-bat-su ṣir-tum |
| 6767 | le-e kab-ru-ti šu-ʾe-e ma-ru-ti UDU.SISKUR.MEŠ taš-ri-iḫ-ti eb-bu-ti ma-ḫar-šu aq-qí-ma qé-reb É šu-a-tum áš-ta-kan ta-šil-tu |
| 6868 | le-e-tu ki-šit-ti qa-ti ša i-na tu-kul-ti-šú GAL-ti UGU kul-lat na-ki-ri áš-ta-ka-nu i-na MU.SAR-e ú-šá-áš-ṭir-ma a-na LUGAL.MEŠ-ni DUMU.MEŠ-ia e-zib ṣa-ti-iš |
| 6969 | a-na EGIR u₄-me NUN ar-ku-ú e-nu-ma É šu-a-tum i-lab-bi-ru-ma en-na-ḫu MU.SAR-a-a li-mur-ma Ì.GIŠ lip-šu-uš ⸢UDU⸣.[SISKUR] ⸢liq⸣-qí it-ti MU.SAR-e ši-ṭir šu-me-šú li-kin dNÈ.ERI₁₁.GAL ik-ri-bi-šú i-šem-me |
| 7070 | 1 UŠ 9.TA.ÀM MU.BI ŠID MU.SAR-e |