VA 08254 (RINAP 3/2 Sennacherib 166 ex. 01) [Sennacherib]

^md30-PAP.MEŠ-SU MAN GAL MAN dan-nu MAN ŠÚ MAN KUR aš-šur.KI MAN kib-rat LÍMMU-tim mut-⸢tar⸣-[x x]

UN.MEŠ DAGAL.MEŠ e-piš ṣa-lam AN.ŠÁR ^da-nim ^d30 ^dUTU ^d[x]

^dU.GUR ^d15 šá É-kid-mu-ri DINGIR.MAḪ ù DINGIR.MEŠ GAL.⸢MEŠ⸣

mu-šak-lil pa-ra-as é-šár-ra u é-mes-mes šá pa-làḫ DINGIR.MEŠ šá AN-e u DINGIR.MEŠ

KUR aš-šur.KI ra-biš mu-du-u e-piš KUR aš-šur.KI mu-šak-lil ma-ḫa-zi-šú na-si-⸢iḫ⸣

na-ki-ri mu-ab-bit da-ád-me-šú-un mal-ku pit-qu-du šá UGU LUGAL.MEŠ a-šib BÁRA

nu-ʾu-ú-da-at be-lut-su tukul-ti KUR-šú na-aʾ-id MURUB₄ ù MÈ ṣu-lu-lu

ERIM.ḪI.A-šú a-na-ku i-nu-šú é-ḫur-sag-gal-kur-kur-ra šá qé-reb (erasure) é-šár-ra pa-rak AN.ŠÁR

EN GAL-i EN-ia šá ul-tu UD.MEŠ SÙ.MEŠ si-ma-tu-šú im-qu-ta-a-ma KÁ-šú

⸢pe⸣-tu-u a-na IM.U₁₈.LU ina IGI.II ra-pa-áš-ti šá ^dé-a iš-ru-⸢ka⸣

⸢ina igi⸣-gál-lu-ú-ti šá AN.ŠÁR ú-šat-li-man-ni ia-a-ši ina ṭè-em ram-ni-ia

am-tal-lik-ma KÁ é-ḫur-sag-gal-kur-kur-ra a-na na-pa-aḫ ^dUTU-ši mé-eḫ-ret IM.KUR.RA

pe-ta-a-šú lìb-bi ub-la-an-ni ṭè-em ^dUTU ^dIŠKUR al-mad-ma an-na ki-i-nu

i-pu-lu-in-ni-ma šá KÁ šu-a-[x] a-na na-pa-aḫ ^dUTU-ši mé-eḫ-ret IM.KUR.RA

^dUTU u ^dIŠKUR iq-bu-u pe-⸢ta-a⸣-šú ina u₄-me-šú-ma É.GAR₈ an-da-ak-kis-ma

a-na GABA AN.ŠÁR EN-ia mé-eḫ-ret IM.KUR.RA KÁ eš-⸢šiš⸣ ap-te-e-ma KÁ LUGAL-⸢ti⸣

MU-šú am-bi É šá-ḫu-ru eš-šiš e-pu-uš-ma KÁ-šú ⸢ú⸣-rap-piš ina KÁ É šá-ḫu-⸢ru⸣

šu-a-tu 4 GU₄ DUMU ^dUTU ZABAR ḪUŠ.A e-liš ŠU.II-šú-nu ^dUTU-ši na-šu-ú

ú-kal-lu ṣu-lu-lu šap-liš GÌR-šú-nu i-na UGU 2 BÁRA ZABAR

šá KU₆.LÚ.U₁₈.LU ZABAR šá SUḪUR.MÁŠ.KU₆ ZABAR šur-šu-du gis-gal-la

ZAG u GÙB šá KÁ UR.IDIM ù GÍR.TAB.LÚ.U₁₈.LU kul-lu ši-ga-ri KÁ šu-nu-⸢tu⸣

KÁ KASKAL šu-ut ^dEN.LÍL az-za-kar MU-šú KISAL-šú eš-šiš ab-ni-ma KISAL si-dir man-za-az

^dí-gì-gì MU-šú am-bi KÁ-šú šá a-na ṣi-it ^dUTU-ši a-na UGU ÍD KÁ bu-ru-mu

az-za-kar ni-bit-su KÁ né-re-bi-šú a-na KISAL né-reb ^dí-gì-gì MU-šú az-kur

KÁ šá a-na IM.U₁₈.LU KÁ kan-su ^dí-gì-gì MU-šú am-bi KÁ né-re-bi-šú a-na ⸢KISAL⸣

KÁ ḫi-[x] KUR MU-šú az-kur KÁ-šú šá a-na IM.SI.SÁ KÁ MUL.MAR.GÍD.DA MU-šú am-bi

KÁ né-re-bi-šú a-na KISAL KÁ BÁRA NAM.MEŠ MU-šú az-kur KÁ pa-pa-ḫi É šá-ḫu-ru

É.GAR₈.MEŠ-šú a-di ⸢KISAL⸣-šú É.MEŠ KÁ.MEŠ ul-tu UŠ₈-šú a-di gaba-dib-bi-šú ina ši-pir ^dkulla

ú-⸢šak⸣-lil-šu-ma ⸢ki-ma⸣ KUR-i re-ši-šú ul-li ina nik-lat lìb-bi-ia šá KÁ.MEŠ

ù ⸢KISAL⸣-[x]-na MU-šú-nu am-bi-ma ni-bit-si-na az-kur te-em-me-en-na at-ta šá ^md30-PAP.MEŠ-[x]

⸢MAN⸣ KUR aš-šur ra-ʾi-im ki-na-a-ti e-piš ṣa-lam DINGIR-šú ba-an É da-me-eq-ta-šú a-na AN.ŠÁR qí-⸢bi⸣

⸢it⸣-ti bal-til.KI u é-šár-ra liš-te-li-pu NUNUZ.MEŠ-šú DUMU.MEŠ-šú DUMU.MEŠ DUMU.MEŠ-šú it-ti ṣal-mat SAG.DU

li-ku-nu a-na du-ur da-a-ri a-a-um-ma NUN EGIR-ú šá AN.ŠÁR a-na SIPA-ut KUR u UN.MEŠ i-nam-bu-u

MU-šú šá ina BALA-šú É šú-a-tú in-na-ḫu an-ḫu-su lid-diš MU.SAR-a-a li-mur-ma Ì.GIŠ lip-šu-uš

SÍSKUR liq-qí ina áš-ri-šú liš-kun AN.ŠÁR ik-ri-bi-šú i-šem-me mu-nak-kìr MU.SAR-a-a

da-a-a-i-ṣi a-ma-ti-ia AN.ŠÁR MAN DINGIR.MEŠ ù DINGIR.MEŠ GAL.MEŠ

šá AN-e ù KI-tim ar-rat ma-ru-uš-tu li-ru-ru-šu-ma

LUGAL-us-su lis-ki-pu TI.LA-šú li-ki-mu-šú MU-šú NUMUN-šú

NUNUZ-šú ù na-an-nab-šú i-na KA UN.MEŠ li-ḫal-li-⸢qu⸣