VA 05061 + VA 05632a + VA 05632b + VA 07512 (+)? Ist A 00061 (RINAP 3/2 Sennacherib 165) [Sennacherib]

⸢GIŠ.GIGIR.MEŠ ANŠE.KUR.RA.MEŠ⸣ GIŠ.ṣu-um-bi

ANŠE.[KUNGA.MEŠ] ša i-na qit-ru-⸢ub⸣ ta-ḫa-zi

ú-maš-ši-ru ik-⸢šu-da ŠU⸣.II-a-a

⸢a-na⸣ É.GAL-šú ša qé-reb ⸢KÁ.DINGIR.RA.KI⸣

ḫa-diš e-ru-um-⸢ma⸣ ap-te-e-ma

É ni-ṣir-ti-šú KÙ.GI ⸢KÙ⸣.BABBAR

ú-nu-ut KÙ.GI ⸢KÙ⸣.BABBAR NA₄ a-qar-tu

⸢mim⸣-ma šum-šú NÍG.ŠU ⸢NÍG.GA⸣ la ni-bi

⸢ka⸣-bit-tu GUN MUNUS.UN.MEŠ É.GAL-šú

LÚ.TIRUM.MEŠ ⸢LÚ⸣.man-za-az pa-ni

LÚ.NAR.MEŠ ⸢MUNUS⸣.NAR.MEŠ

⸢si-ḫir⸣-ti um-ma-a-ni [ma]-⸢la⸣ ba-šu-ú

⸢mut⸣-tab-bi-lu-tú É.GAL-⸢uš⸣

⸢ú⸣-še-ṣa-am-ma ⸢šal-la-tiš⸣ am-nu

⸢i⸣-na e-muq ^daš-šur EN-ia 75

URU.MEŠ-šú ⸢dan⸣-nu-ti ⸢É⸣ BÀD.MEŠ

ša ⸢KUR.kal⸣-di ù 4 ME 20 ⸢URU⸣.MEŠ TUR.MEŠ

⸢ša li-me-ti-šú-nu al⸣-me KUR-ud

áš-lu-⸢la šal-la⸣-su-un

LÚ.úr-bi LÚ.a-ra-⸢mu LÚ⸣.kal-du

ša ⸢qé⸣-reb UNUG.KI NIBRU.⸢KI⸣ kiš.KI

URU.ḫur-sag-kalam-ma GÚ.DU₈.A.⸢KI⸣ ZIMBIR.KI

a-di DUMU.MEŠ ⸢URU EN⸣ [ḫi]-iṭ-⸢ṭi⸣

⸢ú⸣-še-ṣa-am-⸢ma⸣ [šal-la]-tiš am-nu

i-na ta-a-a-ar-[ti-ia]

⸢LÚ⸣.tu-ʾu-mu-na [LÚ.ri-ḫi-ḫu]

⸢LÚ.ia-daq-qu⸣ [LÚ.ú-bu-du]

⸢LÚ⸣.gib-re-e [LÚ.ma-la-ḫu]

⸢LÚ.gu⸣-ru-mu [LÚ.ú-bu-lu]

⸢LÚ⸣.da-mu-nu [LÚ.gam-bu-lu]

⸢LÚ⸣.ḫi-in-da-ru [LÚ.ru-ʾu-ú-a]

⸢LÚ.pu-qu-du⸣ [LÚ.ḫa-am-ra-a-nu]

⸢LÚ.ḫa-ga-ra-nu⸣ [LÚ.na-ba-tu]

⸢LÚ.li-iʾ-ta⸣-[a-ú LÚ.a-ra-mu]

⸢la kan-šu-ti⸣ [mit-ḫa-riš ak-šud^ud]

[x] x x [...]

[AD.MEŠ]-⸢ia la kit-nu-šu lu al⸣-[lik]

[qé-reb ḫur]-šá-a-ni zaq-ru-te A.ŠÀ nam-ra-⸢ṣi⸣

[i-na ANŠE].KUR.RA ar-⸢kab-ma GIŠ.GIGIR GÌR.II-ia⸣

⸢i⸣-[na ti]-⸢ik-ka-te ú-šá-áš-ši⸣

⸢áš-ru⸣ [šup-šu-qu] i-na GÌR.II-ia ⸢ri⸣-ma-niš at-⸢tag-giš⸣

URU.É-^m[ki]-⸢lam-za-aḫ URU.ḫa-ar⸣-diš-pi

URU.É-^m⸢ku⸣-bat-ti URU.MEŠ-⸢šú-nu⸣ É BÀD.MEŠ

dan-nu-ti ⸢al⸣-me KUR-ud UN.⸢MEŠ ANŠE⸣.KUR.RA.MEŠ

ANŠE.KUNGA.MEŠ ⸢ANŠE.MEŠ GU₄.MEŠ ù⸣ US₅.UDU.ḪI.A

ul-tu qer-bi-⸢šú⸣-un ⸢ú-še⸣-ṣa-am-ma

šal-la-tiš am-nu ⸢ù URU.MEŠ-šú⸣-nu TUR.⸢MEŠ⸣

⸢ša ni⸣-ba la i-⸢šu⸣-[ú] ⸢ap-pul⸣ aq-qur

⸢ú-še⸣-me kar-⸢meš⸣ [É] ⸢EDIN⸣ kul-ta-ri

[mu]-šá-bi-šú-nu i-⸢na⸣ ^dGIŠ.BAR aq-mu-ma

⸢di-tal-liš ú-še⸣-me ú-ter-ma

⸢URU.É-^mki⸣-lam-za-⸢aḫ⸣ šu-a-⸢tu⸣

⸢a-na URU⸣.bir-tu-ti ⸢aṣ⸣-bat UGU ša u₄-me pa-⸢ni⸣

⸢BÀD⸣.MEŠ-šú ⸢ú-dan-nin⸣-ma UN.MEŠ KUR.KUR

⸢ki-šit⸣-ti ŠU.II-ia [ina] ⸢lìb-bi⸣ ú-še-šib

⸢UN.MEŠ KUR LÚ⸣.kaš-ši-i

⸢ù KUR LÚ⸣.ia-su-⸢bi-gal⸣-la-a-a

⸢ša la-pa-an GIŠ.TUKUL⸣.[MEŠ]-⸢ia⸣ ip-par-šid-⸢du⸣

⸢ul-tu qé-reb KUR-i ú⸣-še-ri-dam-ma

⸢i-na URU.ḫar-diš-pi URU.É-^mku⸣-bat-ti ú-⸢šar-me⸣

⸢i-na ŠU.II LÚ.šu-ut SAG-ia LÚ.EN.NAM⸣

⸢URU.ar-rap-ḫa am-nu-šú-nu-ti⸣

⸢NA₄.NA.RÚ.A ú-še-piš-ma⸣ li-i-tum

⸢ki-šit-ti ŠU.II ša UGU-šu-un⸣

⸢áš-tak-ka-nu ṣe-ru-uš-šú ú-šá-áš-ṭir-ma⸣

⸢i-na qer-bi URU ul-ziz pa-an ni-ri-ia⸣

⸢ú-ter-ma a-na KUR.el-li-pi⸣

⸢aṣ-ṣa-bat ḫar-ra-nu el-la-mu-ú-a⸣

⸢^mis-pa-ba-a-ra LUGAL-šu-un URU.MEŠ-šu⸣

⸢dan-nu-ti É ni-ṣir-ti-šú ú-maš-šir-ma⸣

⸢a-na ru-qé-e-ti in-na-bit⸣

⸢gim-ri KUR-šú DAGAL-tim GIM MURU₉⸣

⸢as-ḫu-up URU.mar-ú-biš-ti⸣

⸢URU.ak-ku-ud-du URU.MEŠ-ni É LUGAL-ti-šú⸣

⸢a-di 34 URU.MEŠ-ni TUR.MEŠ ša li-me-ti-šú-nu⸣

⸢al-me KUR-ud ap-pul aq-qur i-na ^dGIŠ.BAR aq-mu⸣

⸢UN.MEŠ TUR GAL NITA u MUNUS ANŠE.KUR.RA.MEŠ⸣

⸢ANŠE.KUNGA.MEŠ ANŠE.MEŠ ANŠE.GAM.MAL.MEŠ⸣

⸢GU₄.MEŠ ù US₅.UDU.ḪI.A a-na la mi-nam⸣

áš-lu-lam-ma ⸢a-di la ba-ši-i⸣

⸢ú⸣-šá-lik-šu-ma ú-ṣa-⸢aḫ-ḫi-ir KUR-su⸣

⸢URU⸣.ṣi-ṣi-ir-tu [URU].⸢ku-um-ma-aḫ-lum⸣

⸢URU.MEŠ dan-nu-ti a-di URU.MEŠ TUR.MEŠ⸣

⸢ša li-me-ti-šú-nu KUR.É⸣-[^m]⸢ba-ar-ru-ú⸣

[na-gu]-⸢ú a-na gi-mir-ti⸣-šú [ul-tu qé-reb KUR-šú]

[ab-tuq-ma UGU mi]-ṣir KUR aš-šur.KI ⸢ú-rad-di⸣

[URU.el]-⸢en-za-áš a-na URU⸣ [LUGAL-ú-ti]

[ù] ⸢dan-na-at na-ge⸣-[e šu-a-tu]

[aṣ-bat-ma MU]-⸢šú maḫ-ra-a⸣ [ú-nak-kir-ma]

(traces) [...]

⸢^mkam⸣-mu-su-⸢na-ad-bi KUR⸣.[ma-ʾa-ba-a-a]

^mda-a-ram-mu [KUR.ú-du-um-ma-a-a]

LUGAL.⸢MEŠ-ni KUR⸣ MAR.TU.⸢KI⸣ [ka-li-šú-un]

IGI.SÁ-e ⸢šad-lu⸣-[ti ta-mar-ta-šú-nu ka-bit-tu]

a-di 4-šú ⸢a-na maḫ⸣-ri-⸢ia⸣ [iš-šu-nim-ma]

iš-ši-qu ⸢GÌR⸣.II-ia ⸢ù⸣ [^mṣi-id-qa-a]

LUGAL URU.is-qa-al-lu-na [ša la ik-nu-šú]

a-na ni-ri-ia DINGIR.MEŠ [É AD-šú šá-a-šu]

DAM-su DUMU.MEŠ-šú DUMU.[MUNUS.MEŠ-šú ŠEŠ.MEŠ-šú]

⸢NUMUN⸣ É AD-⸢šú⸣ [as-su-ḫa-am-ma]

a-na KUR aš-šur.KI [ú-raš-šu]

^mLUGAL-lu-dà-ri [DUMU ^mru-kib-ti]

⸢LUGAL-šú⸣-nu ⸢maḫ⸣-[ru-ú]

⸢UGU⸣ UN.MEŠ URU.is-qa-⸢al⸣-[lu-na áš-kun-ma]

⸢na-dan GUN kàd-re⸣-[e be-lu-ti-ia]

⸢e-mid-su-ma i-šá⸣-[a-ṭa ab-šá-a-ni]

⸢i-na me-ti-iq ger⸣-[ri-ia URU.É-da-gan-na]

⸢URU.ia-ap-pu-ú URU⸣.[ba-na-a-a-bar-qa]

⸢URU.a-zu-ru URU.MEŠ-ni⸣ [ša ^mṣi-id-qa-a ša]

⸢a-na GÌR.II-ia ár-ḫiš⸣ [la ik-nu-šu]

⸢al-me KUR-ud áš-lu-la⸣ [šal-la-su-un]

⸢LÚ.GÌR.NÍTA.MEŠ LÚ.NUN.MEŠ ù⸣ [UN.MEŠ URU.am-qar-ru-na]

⸢ša ^mpa-de-e LUGAL⸣-šú-nu [EN a-de-e]

⸢ù ma-mit ša KUR aš-šur.KI⸣ [bi-re-tu AN.BAR id-du-ma]

⸢a-na ^mḫa-za-qi-a-ú⸣ [KUR.ia-ú-da-a-a]

⸢id-di-nu-šú nak-riš a⸣-[na an-zil-li i-pu-šú]

⸢ip-làḫ ŠÀ-šú-un LUGAL.MEŠ-ni⸣ [KUR.mu-uṣ-ri]

⸢LÚ.ERIM.MEŠ GIŠ.PAN⸣ [GIŠ.GIGIR.MEŠ ANŠE.KUR.RA.MEŠ]

⸢ša LUGAL KUR.me-luḫ-ḫa e-mu-qí la⸣ [ni-bi ik-te-ru-nim-ma]

⸢il-li-ku re-ṣu⸣-[us-su-un]

⸢i-na ta-mir-ti URU.al⸣-[ta-qu-ú]

⸢el-la-mu-ú-a si-id⸣-[ru šit-ku-nu]

⸢ú-šá-ʾa-lu GIŠ.TUKUL.MEŠ-šú⸣-[un i-na tukul-ti ^daš-šur EN-ia]

⸢it-ti-šú-un am-da-ḫi⸣-[iṣ-ma ...]

(traces) [...]

(traces) [...]

(traces) [...]

⸢ik-šu-da ŠU.II-a-a URU.al-ta⸣-[qu-ú URU.ta-am-na-a]

⸢al-me KUR-ud áš-lu-la⸣ [šal-la-su-un]

⸢a-na URU.am-qar-ru-na⸣ [aq-rib-ma]

⸢LÚ.GÌR.NÍTA.MEŠ LÚ.NUN.MEŠ⸣ [ša ḫi-iṭ-ṭu ú-šab-šu-ú]

⸢a-duk-ma i⸣-[na di-ma-a-te ...]

(traces) [...]

(traces) [...]

[...] x [...]