BM 118815a-b (+) BM 118817 (+) BM 118819 (+) BM 118821 (RINAP 3/2 Sennacherib 46) [Sennacherib][via rinap/sources]
| Obverse | |
| 11 | É.GAL mdEN.ZU-ŠEŠ.MEŠ-eri-ba LUGAL GAL LUGAL dan-nu LUGAL ŠÚ LUGAL KUR aš-šur ⸢LUGAL kib⸣-rat ⸢LÍMMU⸣-tim mi-gir ⸢DINGIR.MEŠ GAL⸣.MEŠ er-šu ⸢it-pe⸣-šú zi-ka-ru qar-⸢du⸣ [a]-šá-red ⸢kal mal-ki⸣ |
| 22 | ⸢rap⸣-pu la-ʾi-iṭ la ma-gi-ri mu-šab-ri-qu za-ma-a-ni daš-šur ⸢KUR GAL⸣ LUGAL-ut la šá-na-an ú-šat-li-ma-an-ni-ma ⸢UGU gi⸣-mir a-šib pa-rak-⸢ki⸣ ú-šar-ba-a ⸢GIŠ⸣.[TUKUL].⸢MEŠ⸣-ia |
| 33 | ul-tu A.AB.BA ⸢e⸣-le-ni-ti ša šul-mu dUTU-ši a-di tam-tim [šap]-li-ti ša ṣi-it dUTU-ši gim-ri ma-al-ki ša kib-ra-a-ti ú-⸢šak⸣-niš še-pu-u-a i-⸢na maḫ-ri⸣-i |
| 44 | ger-ri-ia ša mdAMAR.UTU-⸢IBILA⸣-SUM.NA LUGAL KUR.kár-ddun-ía-àš a-di ⸢ERIM.ḪI.A⸣ ELAM.MA.KI re-ṣi-šu i-na ta-⸢mir⸣-ti kiš.KI áš-ta-⸢kan⸣ BAD₅.BAD₅-šú šu-ú a-na šu-zu-ub na-piš-ti-⸢šú⸣ e-diš |
| 55 | ip-par-šid-ma GIŠ.GIGIR.MEŠ GIŠ.ṣu-um-bi ANŠE.KUR.RA.MEŠ ANŠE.KUNGA.MEŠ ⸢ša⸣ ú-maš-ši-ru ik-šu-da ŠU.II-a-a a-na É.GAL-šú ⸢ša⸣ qé-reb KÁ.⸢DINGIR.RA⸣.KI e-ru-um-ma ap-te-e-ma |
| 66 | É ni-ṣir-ti-šú KÙ.GI KÙ.BABBAR ú-nu-ut KÙ.GI KÙ.BABBAR ⸢NA₄⸣ a-⸢qar-tú NÍG.ŠU NÍG⸣.GA É.GAL-šú áš-lu-la URU.MEŠ-šú dan-nu-ti É BÀD.MEŠ ša KUR.kal-di a-⸢di URU⸣.MEŠ TUR.MEŠ ša li-mi-ti-šú-nu |
| 77 | KUR-ud-ma áš-lu-la šal-la-su-un i-na ta-a-a-ar-ti-ia ⸢LÚ⸣.a-⸢ra-me⸣ ša šid-di ÍD.IDIGNA ÍD.BURANUN.KI ak-šudud-⸢ma⸣ áš-lu-la šal-la-su-un i-na mé-ti-iq ger-ri-ia |
| 88 | ša LÚ.qí-pi URU.ḫa-ra-ra-ti man-da-ta-šú ka-bit-tu am-ḫur ⸢ba-ḫu-la⸣-a-ti URU.ḫi-rim-me LÚ.KÚR ak-ṣi i-na GIŠ.TUKUL.MEŠ ⸢ú⸣-šam-qit-ma e-⸢du⸣ ul e-zib URU šu-a-tu a-na eš-šu-ti |
| 99 | aṣ-bat 1-en GU₄ 10 UDU.MEŠ 10 ⸢ANŠE GEŠTIN⸣.MEŠ 20 ⸢ANŠE⸣ ZÚ.LUM.MA re-še-ti-⸢šú a⸣-na DINGIR.MEŠ KUR aš-šur.KI ú-kin i-na 2-e ger-ri-ia a-na KUR LÚ.kaš-ši-⸢i ù⸣ KUR LÚ.ia-su-⸢bi-gal⸣-la-a-a lu al-lik qé-reb ⸢ḫur-šá⸣-a-ni |
| 1010 | A.ŠÀ nam-ra-ṣi i-na ANŠE.KUR.RA ⸢ar-kab áš⸣-ru šup-šu-qu i-na GÌR.II-ia ri-ma-niš at-tag-giš URU.É-mki-lam-za-aḫ URU.⸢ḫar-diš⸣-pi URU.É-mku-bat-ti URU.MEŠ-šú-nu É ⸢BÀD⸣.MEŠ-ni dan-nu-ti |
| 1111 | KUR-ud-ma áš-lu-la šal-la-su-<nu> ù URU.MEŠ-šú-nu ⸢TUR.MEŠ⸣ ša ni-ba la i-šu-ú ap-pul aq-qur É EDIN ⸢kul-ta⸣-ri-šú-nu i-na dGIŠ.BAR aq-mu ú-ter-ma URU.É-mki-lam-za-aḫ šu-a-tu |
| 1212 | a-na bir-tu-ti aṣ-bat UN.MEŠ KUR.KUR ki-šit-⸢ti ŠU.II⸣-ia i-na lìb-bi ú-še-šib i-na ŠU.II LÚ.EN.NAM URU.LÍMMU-ḫa am-nu-šú-nu-ti pa-an ⸢ni⸣-ri-ia ú-ter-ma a-na KUR.el-li-pi |
| 1313 | aṣ-ṣa-bat ḫar-ra-nu el-la-mu-a mis-pa-⸢ba-a-ra⸣ LUGAL-šú-un URU.MEŠ-šú dan-nu-ti ú-⸢maš-šir-ma⸣ a-na ru-qé-e-ti in-na-bit URU.mar-ú-biš-ti URU.ak-ku-ud-du URU.MEŠ É LUGAL-ti-šú |
| 1414 | a-di URU.MEŠ ša li-mi-ti-šú-nu KUR-ud-⸢ma⸣ áš-lu-la šal-la-su-un ap-pul aq-qur i-na dGIŠ.BAR aq-mu URU.ṣi-ṣi-ir-tú URU.ku-um-ma-aḫ-lu URU.MEŠ dan-nu-⸢ti⸣ a-di URU.MEŠ ⸢TUR⸣.MEŠ |
| 1515 | ša li-mi-ti-šú-nu ⸢KUR⸣-ud KUR.É-mba-ar-ru-ú na-gu-ú a-na gi-mir-ti-⸢šú ul-tu qé-reb KUR-šú ab-tuq⸣-ma UGU mi-ṣir KUR aš-šur.⸢KI ú⸣-rad-di URU.el-en-za-áš a-na dan-na-at na-ge-e |
| 1616 | šu-a-tu aṣ-bat MU-šú ú-nak-kir-ma URU.kar-mdEN.ZU-ŠEŠ.MEŠ-eri-ba at-⸢ta-bi ni-bit-su⸣ UN.MEŠ KUR.KUR ki-šit-ti ⸢ŠU⸣.II-ia i-na lìb-bi ú-še-šib i-na ŠU.II LÚ.EN.NAM URU.ḫar-ḫar |
| 1717 | am-nu i-na ta-a-a-ar-ti-ia ša KUR.ma-da-a-a ru-qu-ú-ti ša LUGAL.MEŠ ⸢AD.MEŠ-ia la iš-mu-ú zi-kir⸣ KUR-šú-un man-da-ta-šú-nu am-ḫur a-na ni-ri-ia ú-šak-ni-⸢su⸣-nu-ti |
| 1818 | i-na šal-ši ger-ri-ia a-na KUR.ḫa-at-ti lu al-lik mlu-li-i LUGAL URU.ṣi-du-un-ni ⸢pu-luḫ-ti me-lam-me-ia is-ḫup⸣-šu-ma ul-tu qé-reb URU.ṣur-ri a-na KUR.ia-ad-na-na |
| 1919 | ša MURUB₄ tam-tim in-na-bit-⸢ma⸣ KUR-šú e-mid mtu-ba-aʾ-lu i-na GIŠ.GU.ZA LUGAL-ti-šú ú-še-šib-ma ⸢man-da-at-tu be-lu-ti-ia ú-kin⸣ ṣe-ru-uš-šú LUGAL.MEŠ KUR MAR.TU.KI ⸢bi-lat-su-un ka⸣-bit-tú |
| 2020 | i-na ta-mir-ti URU.ú-šu-ú a-di maḫ-ri-ia ú-bi-lu-ni ù mṣi-id-qa-a LUGAL ⸢URU.is-qa-al-lu-na ša la ik-nu-šú a-na ni⸣-ri-ia DINGIR.MEŠ É AD-šú šá-a-šu a-di ki-im-ti-[šu] |
| 2121 | ⸢as-su-ḫa⸣-am-ma a-⸢na⸣ KUR aš-šur.KI ú-⸢raš⸣-šu mLUGAL-lu-dà-a-⸢ri⸣ DUMU mru-kib-ti LUGAL-šú-nu [maḫ-ru-ú UGU UN].⸢MEŠ URU.is-qa-al-lu-na áš⸣-kun-ma man-⸢da-at-tu be-lu-ti-ia⸣ ú-kin ṣe-[ru]-uš-šu |
| 2222 | ⸢i-na mé-ti-iq ger⸣-ri-ia URU.MEŠ-šú ša a-na GÌR.II-ia la ik-nu-šu-⸢ma? áš-lu-la šal-la-su-un GÌR.NÍTA.MEŠ ù⸣ UN.MEŠ ⸢URU.am-qar-ru⸣-na ša mpa-di-i ⸢LUGAL⸣-šu-nu |
| 2323 | ⸢EN a-de-e ša KUR⸣ aš-šur.KI bi-re-tu AN.BAR id-du-ma a-⸢na⸣ mḫa-za-qi-a-ú KUR.ia-ú-⸢da-a-a id-di-nu-šú a⸣-na an-zil-[li] e-pu-šú ⸢ip-làḫ <ŠÀ>-šú-nu⸣ LUGAL.MEŠ KUR.mu-ṣu-ri ERIM.MEŠ GIŠ.PAN |
| 2424 | ⸢GIŠ.GIGIR.MEŠ ANŠE.KUR.RA.MEŠ⸣ ša LUGAL KUR.me-luḫ-ḫa e-mu-qí la ni-bi ik-te-ru-ni i-na ⸢ta⸣-mir-ti URU.al-ta-qu-ú it-ti-šú-un am-da-ḫi-iṣ-ma áš-ta-kan BAD₅.BAD₅-šú-un LÚ.[EN] GIŠ.GIGIR.MEŠ |
| 2525 | ⸢ù DUMU.MEŠ LUGAL KUR.mu-ṣu⸣-ra-a-a a-di ⸢LÚ.EN⸣ GIŠ.GIGIR.MEŠ ša LUGAL KUR.me-luḫ-ḫa ⸢bal-ṭu-su-un i-na qa-ti aṣ-bat a-na URU.am-qar-ru-na⸣ [aq-rib-ma] ⸢GÌR.NÍTA.MEŠ ša ḫi-iṭ-ṭu⸣ |
| 2626 | ú-šab-šu-ú i-na GIŠ.TUKUL.MEŠ a-duk DUMU.MEŠ URU e-piš an-ni a-na šal-la-ti am-nu si-it-⸢tu-te-šú-nu ša gul-lul⸣-ta-⸢šú-un la ib-šu-ú⸣ [uš-šur-šu-un aq-bi] mpa-di-i LUGAL-šú-nu |
| 2727 | ⸢ul⸣-tu qé-reb URU.ur-sa-li-im-ma ú-še-ṣa-am-ma i-na GIŠ.GU.ZA ⸢UGU⸣-šú-un ú-še-šib-ma man-da-at-tú ⸢be-lu⸣-ti-ia ú-kin ṣe-⸢ru-uš-šú ša mḫa-za-qi-a-ú⸣ [KUR].⸢ia⸣-ú-da-a-a <ša> la ik-nu-šú |
| 2828 | ⸢a-na ni⸣-ri-ia 46 URU.MEŠ-šú É BÀD.MEŠ dan-nu-ti ù URU.MEŠ ša li-me-ti-šú-nu ⸢ša ni⸣-ba la i-šu-ú al-me KUR-⸢ud áš-lu-la šal-la-tiš am-nu šá-šu⸣ [GIM MUŠEN qu-up-pi] qé-reb |
| 2929 | ⸢URU.ur-sa-li⸣-im-ma URU LUGAL-ti-šú e-sír-šu URU.ḪAL.ṢU.MEŠ UGU-šu ú-rak-kis URU.MEŠ-šú ša ⸢áš⸣-lu-la ul-tu qé-reb KUR-šú ab-tuq-⸢ma a-na LUGAL⸣.[MEŠ URU.as-du]-⸢di URU.is-qa-al-lu-na⸣ |
| 3030 | ⸢URU.am-qar-ru⸣-na URU.ḫa-zi-ti ad-din-ma ú-ṣa-aḫ-<ḫi>-⸢ir⸣ KUR-su e-li GUN maḫ-ri-ti na-dan šat-ti-šú-un man-da-at-tú ú-rad-⸢di⸣-ma ú-kin ⸢ṣe-ru-uš-šu-un šu-ú mḫa-za-qi-a-ú pul-ḫi me-lam-me⸣ |
| 3131 | ⸢be-lu-ti⸣-ia is-ḫu-pu-šu-ma LÚ.úr-bi ù LÚ.ERIM.MEŠ-šú SIG₅.MEŠ ša a-na qé-reb URU.ur-sa-li-im-ma URU LUGAL-ti-šú ú-še-ri-bu-ma it-[ti 30] ⸢GUN⸣ KÙ.GI 8 ME ⸢GUN KÙ.BABBAR⸣ |
| 3232 | ⸢mim-ma šum⸣-šu ni-ṣir-ti ⸢É⸣.GAL-šú ù DUMU.MUNUS.MEŠ-šú ⸢MUNUS⸣.UN.MEŠ É.GAL-šú LÚ.NAR.MEŠ MUNUS.⸢NAR⸣.MEŠ ⸢a-na⸣ qé-reb NINA.KI ú-še-bi-lam-ma a-na ⸢na-dan⸣ man-⸢da-at-ti iš-pu-ra rak⸣-bu-šú |
| 3333 | ⸢i-na 4⸣-e ger-ri-ia a-na KUR.É-mia-kin₇ lu al-li-ik i-na mé-ti-iq ger-ri-ia ⸢ša mšu-zu-bi LÚ.kal-da⸣-a-a a-šib qé-reb ÍD.a-⸢gam-me i-na⸣ URU.bi-⸢it-tu-ti áš⸣-ta-kan |
| 3434 | ⸢BAD₅.BAD₅-šú⸣ šu-ú GIŠ.TUKUL.MEŠ-ia e-dúr-ma e-diš ip-par-šid-ma ul in-na-mir a-šar-šú ⸢pa-an ni-ri-ia ú⸣-ter a-na KUR.⸢É-mia-kin₇⸣ aṣ-ṣa-bat ḫar-ra-⸢nu šu⸣-ú |
| 3535 | ⸢md⸣AMAR.UTU-IBILA-SUM.NA ša i-na a-lak ger-ri-ia ⸢maḫ⸣-re-e áš-ku-nu BAD₅.BAD₅-šú ri-gim GIŠ.TUKUL.MEŠ-ia dan-nu-ti e-dúr-ma a-⸢na URU.na-gi-i⸣-ti ša MURUB₄ tam-tim in-na-bit |
| 3636 | ⸢ŠEŠ⸣.MEŠ-šú NUMUN É AD-šú ša ú-maš-ši-⸢ru⸣ a-ḫi tam-tim si-it-ti UN.MEŠ KUR-šú ul-tu KUR.É-ia-kin₇ qé-reb ÍD.⸢a-gam-me u ap-pa-ra⸣-a-ti ⸢áš-lu-la⸣ ú-ter-ma URU.MEŠ-šú |
| 3737 | ap-pul i-na dGIŠ.BAR aq-mu i-na ta-a-a-ar-ti-ia maš-šur-na-din-MU DUMU-⸢ú⸣-a i-na GIŠ.GU.ZA be-lu-ti-šú ú-⸢še-šib⸣-ma ⸢ú⸣-šad-gi-la pa-nu-uš-šú i-na 5 ⸢ger⸣-ri-ia |
| 3838 | LÚ.MEŠ URU.tu-mur-ra-a-a šá GIM qin-ni ⸢TI₈.MUŠEN⸣ ṣe-er zuq-ti KUR.ni-pur KUR-i mar-ṣi šu-bat-su-un šit-ku-na-at-ma la ⸢kit-nu-šu⸣ a-⸢na ni⸣-ri-ia i-na GÌR.II KUR.ni-pur ka-ra-ši |
| 3939 | ú-šá-áš-kin-ma it-ti LÚ.ERIM.MEŠ MÈ-ia la ga-me-lu-ti a-na-ku GIM GU₄.AM ek-di pa-nu-uš-šú-un aṣ-bat ḫur-ri ⸢me⸣-le-e KUR.MEŠ mar-ṣu-ti i-na GIŠ.⸢GU.ZA áš-ta-am⸣-di-iḫ |
| 4040 | a-šar a-na GIŠ.⸢GU.ZA šup⸣-šu-qu i-na GÌR.II-ia áš-taḫ-ḫi-iṭ GIM ar-me a-šar bir-ka-a-a ir-ma-a i-šá-a ma-na-⸢aḫ-tú ṣe⸣-er NA₄ KUR-i ú-šib-ma A.MEŠ ⸢KUŠ⸣.ÙMMU |
| 4141 | ka-ṣu-ti a-na ṣu-me-ia lu áš-ti i-na ŠU.SI.MEŠ ḫur-šá-a-ni ar-de-šú-nu-ti-ma áš-ta-kan taḫ-ta-šú-un URU.MEŠ-šú-nu KUR-ud-ma áš-lu-la šal-⸢la-su⸣-un |
| 4242 | ap-pul aq-⸢qur⸣ i-na dGIŠ.BAR aq-mu pa-an ni-ri-ia ú-ter-ma ṣe-er mma-ni-ia-e LUGAL URU.uk-ki la kan-še aṣ-ṣa-bat ḫar-ra-nu ur-ḫi pa-áš-qu-ti ša la-⸢pa-an⸣ KUR.MEŠ |
| 4343 | mar-ṣu-ti qé-reb-šú-un ma-nam-ma la il-li-ku LUGAL pa-ni maḫ-ri-ia i-na GÌR.II KUR.a-na-ra ù KUR.up-pa KUR.MEŠ dan-nu-ti ka-ra-ši ú-šá-áš-kin-ma |
| 4444 | a-na-ku i-na GIŠ.GU.ZA né-me-di it-ti LÚ.ERIM.MEŠ MÈ-ia mar-ṣi-iš i-te-el-la-a ŠU.SI.MEŠ KUR.MEŠ pa-áš-qa-a-ti |
| 4545 | šu-ú mma-ni-ia-e a-lak ge-er-ri-ia ⸢iš⸣-me-ma URU.uk-ku URU LUGAL-ti-šú e-zib-ma ⸢a-na ru⸣-qé-ti in-na-bit e-ru-um-ma |
| 4646 | a-na qé-reb É.GAL-šú mim-ma šum-šú NÍG.ŠU NÍG.GA la ⸢ni⸣-bi áš-lu-la ni-ṣir-ta-šú ka-bit-tú URU.MEŠ-šú ap-pul aq-qur i-na ⸢dGIŠ.BAR⸣ aq-mu-ma |
| 4747 | ⸢ki⸣-ma DU₆ a-bu-bi ú-še-⸢me⸣ |
| 4848 | i-na 6 ger-ri-ia ⸢a-na⸣ |
| 4949 | URU.na-gi-ti URU.na-gi-⸢ti⸣-di-iʾ-bi-na |
| 5050 | URU.MEŠ ⸢ša⸣ LUGAL KUR.⸢e-lam⸣-ti ša i-na |
| 5151 | ⸢e-ber-tan⸣ ÍD.mar-ra-ti šit-⸢ku-na⸣-at |
| 5252 | ⸢šu-bat⸣-[su-un UN].MEŠ KUR.É-mia-kin₇ la-⸢pa-an⸣ |
| 5353 | GIŠ.TUKUL d⸢aš-šur⸣ [dan]-nu-ti iš-ḫu-[tu]-ma ez-ze-bu |
| 5454 | da-ád-me-⸢šu-nu ÍD.mar-ra-tù⸣ i-[bi]-ru-ú-ma |
| 5555 | ki-šá-da a-ḫe-en-na-[a x x x]-ú x x ni-iḫ-ti |
| 5656 | daš-šur ⸢be-lí⸣ ú-⸢tak-kil-an⸣-ni-⸢ma⸣ ṣe-⸢ru⸣-uš-šú-un a-na |
| 5757 | KUR.na-gi-ti a-⸢la⸣-[ku] ⸢aq-bi LÚ.ERIM.MEŠ⸣ KUR.[ḫa]-⸢at⸣-ti ⸢ḫu-bu-ut⸣ |
| 5858 | [GIŠ.PAN.MEŠ]-ia i-na ⸢NINA.KI ú-še-šib⸣-ma GIŠ.⸢MÁ.MEŠ⸣ ṣi-⸢ra-a⸣-ti |
| 5959 | ⸢e-piš-ti KUR-šu-un ib-nu-ú nak-liš⸣ LÚ.MÁ.⸢LAḪ₅.MEŠ⸣ URU.⸢ṣur-ra-a-a⸣ |
| 6060 | ⸢URU.ṣi⸣-du-⸢un-na-a-a KUR.ia⸣-[am?]-⸢na⸣-a-a ki-šit-ti ⸢ŠU.II⸣-ia ú-⸢šá-ḫi-su-nu⸣-ti |
| 6161 | ⸢ur-tum qé-reb ÍD.IDIGNA it-ti ši⸣-na-ti a-na qid-⸢da⸣-ti a-di URU.ú-pi-a |
| 6262 | ú-še-qel-pu-⸢ú ù TA URU.ú-pi-a na-ba-liš ú-še-lu-ši⸣-na-ti-ma |
| 6363 | ⸢ṣe⸣-er GIŠ.⸢gúr-gu-ge? a⸣-[na? ZIMBIR.KI?] ⸢il-du-du-ši-na⸣-[ti-ma] ⸢qé⸣-reb ÍD.a-raḫ-ti |
| 6464 | id-⸢du-ši-na-ti a-na ḫar-ri⸣ É-⸢dak-ku⸣-ri ⸢ša KUR⸣.kal-di ú-še-qel-pu-ú |
| 6565 | šu-x i-na [x] ⸢an⸣ al-⸢lik⸣ x [x] ma ⸢qu⸣ x (x) ⸢MEŠ⸣-ia šam-⸢ru-ti⸣ |
| 6666 | šá la ⸢i⸣-[du-ú] ⸢a-da?-ru LÚ⸣.qur-bu-ti ⸢GÌR.II-ia gít-ma-lu-ti ù⸣ LÚ.ERIM.MEŠ ta-⸢ḫa-zi-ia⸣ |
| 6767 | qar-du-ti ⸢ša la (traces) i-na qé⸣-reb GIŠ.MÁ.⸢MEŠ⸣ ú-šar-kib-šu-nu-ti-ma |
| 6868 | ṣi-di-tu ad-din-[šu-nu]-ti ⸢ŠE.IM ù ŠE.IN.NU.ḪI.A a-na⸣ mu-ur-⸢ni-is-qí⸣ ú-še-la-⸢a⸣ |
| 6969 | it-⸢ti-šú-un qu-ra-du-ú⸣-a i-na GIŠ.⸢MÁ.MEŠ i-qel-pu⸣-ú ⸢ÍD⸣.pu-rat-tu ⸢a-na-ku⸣ |
| 7070 | ⸢a-na i-ti-šú-un na-ba-lu ṣab⸣-ta-ku-ma a-na URU.KÁ-sa-⸢li-me-ti ú-šar-da-a ur-ḫi⸣ |
| 7171 | ⸢i-na ul-lu-ú re-ši⸣-[ia] ⸢ul⸣-tu a-ḫi ÍD.pu-rat-ti a-di kib-⸢ri⸣ [tam-tim] ⸢ma-lak 2 KASKAL.GÍD qaq-qa-ru⸣ |
| 7272 | ⸢ka-li ka-lu⸣-[...] šá i-na a-a-ri-⸢du⸣-ú-a (traces) |
| 7373 | (traces) a-mat (traces) [a]-⸢na⸣ [lìb-bi-ia ul] ⸢áš⸣-du-ud |
| 7474 | ⸢i-na áš-ri šu-a-tù at-ta-di ka⸣-ra-ši e-du-ú ta-ma-ti ⸢gap-šiš iš-šá-am-ma qé-reb⸣ |
| 7575 | GIŠ.za-ra-ti-ia e-ru-um-ma ⸢ni-ti⸣-iš il-ma-a gim-⸢ri⸣ ka-ra-ši-ia ⸢i-na⸣ [A].⸢MEŠ dan-nu⸣-ti |
| 7676 | 5 u₄-me ⸢ù GE₆ ki-ma qú⸣-up-⸢pe⸣-e šur-bu-ṣa gi-mir ba-⸢ḫu-la⸣-a-ti-ia ⸢GIŠ.MÁ.MEŠ qu-ra-di⸣-ia |
| 7777 | a-na raq-[qa]-at pi-i ⸢ÍD ik-šu-da⸣ a-šar ÍD.pu-rat-tu A.MEŠ-šá ⸢ú-šeš-še-ru⸣ |
| 7878 | qer-bu-[uš tam]-tim ga-⸢lit-ti a⸣-na-⸢ku a⸣-na mé-ḫe-er-ti-šú-un i-na GÚ ÍD.⸢mar-ra⸣-ti |
| 7979 | az-ziz-ma a-⸢na⸣ dé-a LUGAL? ZU.AB ú-še-pi-šá UDU.SISKUR.MEŠ KÙ.MEŠ ⸢it-ti⸣ GIŠ.MÁ KÙ.GI KU₆ KÙ.GI |
| 8080 | al-lut-tú KÙ.GI a-na qé-reb tam-tim [ad-di-ma] GIŠ.MÁ.MEŠ-ia ⸢a-na⸣ UGU KUR URU.na-gi-i-ti |
| 8181 | ur-ru-ḫi-iš ú-še-bir i-na kib-ri tam-tim gal-la-ti ⸢ša⸣ a-na ši-ik-nu a-na e-le-e |
| 8282 | ⸢ANŠE⸣.KUR.RA.MEŠ ⸢ù⸣ šit-kun GÌR.II LÚ la ⸢na⸣-ṭu ma-gal ⸢šum-ru-uṣ⸣-ma ba-ḫu-la-ti KUR.kal-di |
| 8383 | [a]-⸢šib⸣ URU.na-gi-⸢ti⸣ URU.na-gi-ti-⸢di-iʾ-bi⸣-na UN.MEŠ KUR.ḫi-il-mu KUR.pil-la-tú |
| 8484 | ù KUR.ḫu-pa-pa-nu ⸢GIŠ⸣.MÁ.MEŠ qu-ra-di-⸢ia⸣ i-mu-ru-ma ERIM.MEŠ GIŠ.PAN GIŠ.ṣu-um-⸢bi⸣ |
| 8585 | ANŠE.KUR.RA.MEŠ ANŠE.KUNGA.MEŠ e-muq [la] ni-bi ú-kap-pi-tú ⸢mit⸣-ḫa-riš |
| 8686 | el-la-me-šú-un i-na |
| 8787 | ÍD.ú-la-a na-a-ru ša kib-ru-šá |
| 8888 | DÙG.GA si-id-ru šit-ku-nu |
| 8989 | me-le-e ERIM.ḪI.A-ia ṣab-tu-ma |
| 9090 | ú-šá-ʾa-lu GIŠ.TUKUL.MEŠ-šú-un |
| 9191 | qu-ra-du-ú-a a-na ka-a-ri |
| 9292 | ma-kal-le-e ik-šu-du ṣe-ru-uš-šú-un |
| 9393 | ul-tu qé-reb GIŠ.MÁ.MEŠ a-na kib-ri ⸢a-ri⸣-biš |
| 9494 | ip-par-šu-ma iš-ku-nu taḫ-ta-šú-un URU.na-gi-tu |
| 9595 | URU.na-gi-tu-di-iʾ-bi-na KUR.ḫi-il-mu KUR.pil-la-tu |
| 9696 | ⸢ù⸣ KUR.ḫu-pa-pa-nu URU.MEŠ ša LUGAL KUR.e-lam-ti ik-⸢šu⸣-du |
| 9797 | ⸢dan-nu-su⸣-un te-ne-šet LÚ.kal-di DINGIR.MEŠ gim-ri KUR.⸢É-mia-kin₇⸣ |
| 9898 | [a-di] ⸢NÍG.GA-šú-nu ù UN⸣.MEŠ e-la-mì-i GIŠ.ṣu-um-bi [ANŠE.KUR.RA.MEŠ] |
| 9999 | ⸢ANŠE⸣.KUNGA.MEŠ ANŠE.NÍTA.MEŠ iš-lu-lu-ni qé-reb GIŠ.MÁ.[MEŠ-šú-nu] |
| 100100 | ⸢ú⸣-še-lu-ma a-ḫa-an-na-a a-na URU.KÁ-sa-li-me-ti ⸢a⸣-[di maḫ-ri-ia] |
| 101101 | ú-še-bi-ru-ni URU.MEŠ šá-tu-nu ip-pu-lu iq-qu-ru i-na dGIŠ.BAR aq-mu |
| 102102 | UGU KUR.ELAM.MA.KI DAGAL-tim it-bu-ku šá-aḫ-ra-⸢ar⸣-tú i-na šal-lat KUR.MEŠ |
| 103103 | 30 LIM 5 ME GIŠ.⸢PAN⸣ 20 LIM ⸢2?⸣ ME GIŠ.a-ri-tú i-na lìb-bi-šú-nu ⸢ak-ṣur⸣-ma UGU [ki-ṣir] |
| 104104 | LUGAL-ti-ia ú-rad-⸢di si-it⸣-ti šal-lat ⸢na-ki-ri ka⸣-bit-ti a-na ⸢gi⸣-[mir] |
| 105105 | KARAŠ-ia LÚ.⸢EN.NAM.MEŠ⸣-ia ù UN.MEŠ ⸢ma-ḫa-za-ni-ia GIM?⸣ ṣe-⸢e⸣-[ni] |
| 106106 | lu ú-za-ʾi-iz i-na u₄-me-šú-ma É.GAL ⸢MURUB₄ URU ša NINA.KI⸣ ša 3 ME 60 ina 1.KÙŠ [UŠ] |
| 107107 | 95 ina 1.KÙŠ SAG.KI ma-ra-ku šit-ku-na-[at]-ma ṣu-uḫ-ḫu-rat šu-bat-sa ša LUGAL.[MEŠ] |
| 108108 | a-li-kut maḫ-ri AD.MEŠ-ia a-na ri-mit be-lu-ti-šú-un ú-še-pi-šú-ma la ú-nak-[ki-lu] |
| 109109 | ši-pir-šá dALAD.dLAMMA.MEŠ ša NA₄.pi-i-li pe-ṣe-e i-na URU.ta-as-ti-a-te ib-[tu-qu] |
| 110110 | a-na mu-kil KÁ.MEŠ-šin a-na šu-pu-uš GIŠ.MÁ.MEŠ ⸢qé-reb⸣ GIŠ.TIR.MEŠ GIŠ.[MEŠ] GAL.MEŠ ú-⸢qé⸣-[ru] |
| 111111 | i-na nap-ḫar KUR.ME-šú-un i-na ITI.GU₄ u₄-mu a-⸢dan-ni⸣ e-de-e [pa-an šat]-ti i-na GIŠ.MÁ.[MEŠ] |
| 112112 | ṣi-ra-a-ti a-na a-ḫa-an-⸢na⸣-a ú-šeb-bi-ru-⸢ni⸣ mar-ṣi-iš ⸢i-na né⸣-ber ⸢ka⸣-a-ri |
| 113113 | ⸢GIŠ⸣.MÁ.[GU].⸢LA⸣.MEŠ ú-ṭe-eb-bu-ú ba-ḫu-la-ti-šú-un ú-šá-ni-ḫu [ú-lam-me]-nu |
| 114114 | [ka-ras]-sin i-na da-na-ni ù šup-šu-qí mar-ṣi-⸢iš ú-bi⸣-lu-nim-ma ú-[šá-aṣ-bi-tu] |
| 115115 | [KÁ.MEŠ]-ši-in ÍD.te-bil-ti a-gu-ú šit-mu-ru ša [ul-tu UD].MEŠ ⸢SÙ⸣.[MEŠ ṭe-eḫ] |
| 116116 | [É.GAL] i-ba-ʾu-ú-ma i-na ILLU-šá gap-ši ú-rib-bu [tem-me]-en-[šá É.GAL.TUR.RA] |
| 117117 | [šá-a-tu] ⸢a-na⸣ si-ḫi-ir-ti-šá aq-qur ša ÍD.te-bil-ti ma-⸢lak-šá ul-tu⸣ [qa-bal-ti URU] |
| 118118 | [ap-ru-us-ma i-na ta-mir-ti ku-tal URU] ú-še-šir mu-ṣu-šá [i-na 1/2 IKU ma-lak A.MEŠ] |
| 119119 | [4 NA₄.pi-i-li GAL.MEŠ it-ti ESIR.UD.A ak]-⸢si⸣-ma GI.MEŠ a-⸢pe⸣ [ù ku-pe-e ú-šat-ri-ṣa UGU-šú-un] |
| 120120 | [5 ME 54 ina 1.KÙŠ UŠ 2 ME 89 ina 1].⸢KÙŠ SAG⸣.[KI qaq-qa-ru ul-tu qé-reb ÍD.ḫu-su-ur ù] |
| 121121 | [ta-mir-ti URU ki-ma a-tar-tim]-ma [lu aṣ-ba-ta ṣe-er me-ši-iḫ-ti tam-li-i maḫ-re-e lu ú-rad-di-ma] |
| 122122 | a-na si-ḫi-ir-ti-šu i-na 1 ME 90 ti-ib-ki ul-la-a re-ši-šu a-na ⸢9 ME⸣ [14 i-na] ⸢AS₄.LUM⸣ GAL-tim UŠ ù 4 ME 40 ina AS₄.LUM |
| 123123 | GAL-tim SAG.KI ši-kit-ti É.GAL ú-ter-ma šu-bat-sa uš-rab-bi É.GAL.MEŠ KÙ.GI KÙ.BABBAR ZABAR NA₄.AN.ZA.GUL.ME NA₄.DÚR.MI.NA.BÀN.DA |
| 124124 | NA₄.GIŠ.NU₁₁.GAL ZÚ AM.SI GIŠ.ESI GIŠ.TÚG GIŠ.MES.MÁ.KAN.NA GIŠ.ere-ni GIŠ.ŠUR.MÌN ŠIM.LI GIŠ.e-lam-ma-ku GIŠ.si-in-da-a a-na mu-šab be-lu-ti-ia |
| 125125 | ab-ni-ma É mu-ter-re-te tam-šil É.GAL KUR.ḫa-at-ti mé-eḫ-ret ba-ba-a-ti ú-še-piš GIŠ.ÙR.MEŠ GIŠ.ere-ni GIŠ.ŠUR.MÌN ša e-ri-su-un |
| 126126 | [ṭa-a-bu] bi-nu-ut KUR.ḫa-ma-nim KUR.si-ra-ra KUR.MEŠ KÙ.MEŠ ú-šat-ri-ṣa e-li-šin GIŠ.IG.MEŠ GIŠ.ere-ni GIŠ.ŠUR.MÌN ŠIM.LI [me]-ser KI.SAG ù URUDU |
| 127127 | ú-⸢rak⸣-kis-ma ú-rat-ta-a ⸢ba-bi-šin i⸣-na ba-rak-ki ša qé-reb É.PA.PAḪ.MEŠ-ni ap-ti bi-ir-ri ú-pat-ta-a MUNUS.dLAMMA.MEŠ NA₄.GIŠ.NU₁₁.GAL |
| 128128 | ZÚ AM.SI ša il-lu-ru na-šá-[a] ⸢kit⸣-mu-sa [rit]-ta-šin bal-tu ku-uz-bu ḫi-it-lu-pa lu-⸢le⸣-e ma-la-a i-na KÁ.MEŠ-ši-in ul-zi-iz-ma |
| 129129 | a-na ⸢tab⸣-ra-a-ti ú-šá-lik [ṣu-lul ta]-⸢ra⸣-[a]-ni ša qé-reb ba-rak-ka-ni e-ṭu-su-un ú-šaḫ-la-a u₄-mì-iš uš-nam-mir sik-kàt kar-ri |
| 130130 | kas-pi ù URUDU qé-reb-šin ⸢ú-šal⸣-[me i]-na [SIG₄].AL.ÙR.RA NA₄.ZÚ NA₄.ZA.GÌN us-si-ma se-el-lum né-bé-ḫi ù gi-mir pa-as-qí-šu áš-šú šip-ri É.GAL-ia |
| 131131 | šu-te-šu-ri ù li-pit ŠU.II-ia šul-[lu-me] i-[na] u₄-me-šu-ma daš-šur ù diš-tar ra-ʾi-mu LÚ.SANGA-ti-ia na-bu MU-ia giš-maḫ-ḫi GIŠ.ere-ni |
| 132132 | ša ul-tu UD.MEŠ SÙ.MEŠ [i-ši]-⸢ḫu⸣-[ma] ik-bi-ru ma-gal i-na qé-reb KUR.si-ra-ra šad-⸢di-i⸣ i-na pu-uz-ri na-⸢an-zu⸣-zu ú-šak-li-mu-in-ni |
| 133133 | ṣi-i-su-⸢un ša⸣ NA₄.GIŠ.NU₁₁.GAL ⸢ša i-na⸣ [tar]-ṣi LUGAL.MEŠ-ni AD.MEŠ-ia a-na kar-ri nam-ṣa-ri šu-qu-ru i-na sa-pan KUR.am-ma-⸢na-na⸣ ú-⸢šap-tu-ni⸣ pa-ni-šu |
| 134134 | ù NA₄.⸢DÚR⸣.[MI].NA.BÀN.DA ma-la DUG.bur-⸢zi-gal⸣-li ša la in-nam-ru ma-ti-ma i-na URU.kap-ri-da-ar-gi-la-a šá ⸢pa-a-ṭi⸣ URU.DU₆-bar-si-ip |
| 135135 | ú-kal-lim ⸢ra⸣-ma-nu-uš i-te-e NINA.KI i-na er-ṣe-et URU.ba-la-ṭa-a-a ki-i ṭè-em DINGIR-ma NA₄.pi-i-lu pe-ṣu-ú a-na mu-ʾu-de-e |
| 136136 | in-na-mir-ma dALAD.dLAMMA.MEŠ ù ṣa-lam meš-re-ti NA₄.GIŠ.NU₁₁.GAL ša i-na 1-en NA₄ ib-ba-nu-ú ⸢mi⸣-na-a-ti šuk-lu-lu i-na ki-gal-li |
| 137137 | ram-ni-šú-⸢nu⸣ [šá]-qiš na-an-zu-zu MUNUS.ÁB.ZA.[ZA]-a-ti NA₄.GIŠ.NU₁₁.GAL ša zi-i-me nu-us-su-qa GIM u₄-me na-par-de-e nu-um-mu-ru zu-mur-šin ⸢KUN₄⸣.MEŠ NA₄.DÚR.MI.NA.BÀN.DA |
| 138138 | ṣi-ra-a-⸢ti ab⸣-ni ki-lal-la-an i-na šad-⸢di-šú-un⸣ ab-tuq-ma a-na šip-ri É.GAL-ia ú-šal-di-da qé-reb NINA.KI dALAD.d⸢LAMMA.MEŠ GAL⸣.MEŠ ù MUNUS.ÁB.ZA.ZA-a-ti NA₄.pi-i-li |
| 139139 | pe-ṣe-e ⸢i-na⸣ lip-ta-at d⸢nin⸣-kur-ra i-na er-ṣe-et URU.ba-la-ṭa-a-a ú-šá-aʾ-lid-ma ú-šak-li-la gat-ta-šú-un ⸢ša ul⸣-tu ul-la LUGAL.MEŠ AD.MEŠ-ia ṣa-lam URUDU |
| 140140 | tam-šil gat-ti-[šú]-un a-na šu-zu-zi qé-reb É.KUR.MEŠ ib-nu-ma i-na e-piš-ti-šú-nu ú-šá-ni-ḫu gi-mir DUMU.MEŠ um-ma-a-ni i-na la [bi-šit] uz-ni la ḫa-sa-as a-ma-ti a-na šip-ri |
| 141141 | ḫi-šiḫ-ti-[šú-nu Ì.GIŠ] iš-ku-ru ⸢na-al⸣-ba-áš ṣe-e-ni ú-qé-ru qé-reb KUR.MEŠ-šú-un ia-a-ti md30-PAP.MEŠ-SU a-šá-red kal mal-⸢ki⸣ [mu]-de-e šip-ri ka-la-ma tim-me URUDU GAL.MEŠ |
| 142142 | ur-maḫ-ḫi [pe-tan] bir-ki ša ma-na-ma ⸢la⸣ ip-ti-qu LUGAL pa-ni maḫ-ri-ia i-na uz-ni ni-kil-ti ša ú-šat-li-ma ru-bu-ú ⸢dnin⸣-ši-kù i-na ši-tul-ti ram-ni-ia |
| 143143 | a-na e-[peš šip]-⸢ri⸣ šu-a-tu ra-⸢biš am⸣-tal-lik-ma i-na mì-lik ṭè-⸢me⸣-ia ù me-reš ka-bat-ti-ia pi-ti-iq ⸢URUDU⸣ ú-ba-áš-šim-ma ú-nak-ki-la nik-lá-su ša giš-maḫ-ḫi |
| 144144 | ⸢ù⸣ a-la-⸢mit⸣-[ta] GIŠ meš-re-e 12 UR.MAḪ.MEŠ né-ʾi-ru-ti a-di 12 dALAD.dLAMMA.MEŠ MAḪ.MEŠ ša šuk-lu-lu nab-ni-tu 22 MUNUS.ÁB.ZA.ZA-a-ti ša ku-uz-bu ù ul-ṣu |
| 145145 | ḫi-it-lu-pa [bal]-tu la-la-a kúm-⸢mu⸣-ru ṣe-ru-uš-šin ki-i ṭè-em DINGIR-ma zi-iʾ-pi ṭi-iṭ-ṭi ab-ni-ma e-ra-a qé-reb-šú áš-tap-pa-ka ki-i pi-ti-iq 1/2 GÍN.TA.ÀM |
| 146146 | ú-šak-li-⸢la⸣ nab-ni-su-un dALAD.dLAMMA.MEŠ nab-nit URUDU ša 2 ina lìb-bi za-ḫa-lu-ú lit-bu-šú dALAD.dLAMMA.MEŠ NA₄.GIŠ.NU₁₁.GAL a-di dALAD.dLAMMA.MEŠ MUNUS.ÁB.ZA.ZA-a-ti |
| 147147 | NA₄.pi-i-li pe-ṣe-e ša É.GAL.MEŠ-ia ú-šá-aṣ-bi-ta SI.GAR-ši-in tim-me URUDU MAḪ.MEŠ a-di GIŠ.tim-me GIŠ.ere-ni GAL.MEŠ bi-ib-lat KUR.ḫa-ma-nim me-ser URUDU |
| 148148 | ú-rak-kis-ma ṣe-er pirig-gal-le-e ul-ziz-ma dáp-pi ku-lul KÁ.MEŠ-šin e-mid MUNUS.ÁB.ZA.ZA-a-ti NA₄.GIŠ.NU₁₁.GAL a-di MUNUS.ÁB.ZA.ZA-a-ti pi-ti-iq ú-ru-de-e |
| 149149 | ša za-ḫa-lu-ú lit-bu-šá ù MUNUS.ÁB.ZA.ZA-a-ti pi-ti-iq GU.AN.NA ša nu-um-mu-ru gat-ta-šin GIŠ.tim-me GIŠ.ESI GIŠ.ŠUR.MÌN GIŠ.EREN GIŠ.dup-ra-ni ŠIM.LI |
| 150150 | ù [GIŠ].⸢si⸣-in-da-a iḫ-ze-et pa-šal-li ù kas-pi ṣe-ru-uš-šin ul-ziz-ma ša kúm-me mu-šab be-lu-ti-ia e-mid GIŠ.GAN.DU₇.MEŠ-šú-un as-kup-pa-a-ti |
| 151151 | NA₄.DÚR.[MI].NA.BÀN.DA NA₄.GIŠ.NU₁₁.GAL ù KUN₄.MEŠ NA₄.pi-i-li GAL.⸢MEŠ⸣ a-sur-ru-šin ú-šá-as-ḫi-ra a-na tab-ra-a-ti ú-šá-lik áš-šu u₄-mi-šam-ma A.MEŠ di-lu-ti |
| 152152 | ⸢da-lum⸣ eb-li gu-ḫaṣ-ṣa-a-ti ZABAR ù ḫar-ḫa-ri ZABAR ú-še-piš-ma ki-mu-ú ma-ka-a-ti giš-maḫ-ḫi ù a-la-mit-ta ṣe-er PÚ.MEŠ uš-ziz É.GAL.MEŠ šá-ti-na |
| 153153 | [ú]-⸢šá-lik⸣ as-mi-iš si-ḫir-ti É.GAL a-na tab-rat kiš-šat UN.MEŠ ul-la-a re-ši-šá É.GAL ša šá-ni-na la i-šu-ú ni-bit-sa az-kur GIŠ.KIRI₆.MAḪ-ḫu |
| 154154 | [tam-šil] ⸢KUR.ḫa-ma⸣-nim ša gi-mir ŠIM.ḪI.A GURUN ṣip-pa-a-ti GIŠ.MEŠ tuk-lat šad-di-i ù KUR.kal-di qé-reb-šú ḫur-ru-šu i-ta-a-šá az-qup a-na miṭ-ra-a-ti |
| 155155 | [šum-mu]-ḫi ul-tu pa-a-ṭi URU.ki-si-ri a-di ta-mir-ti URU.ni-na-a KUR-a i-na ak-kul-la-ti AN.BAR ú-šat-tir-ma ú-še-šir ÍD.ḫar-ru |
| 156156 | [1 1/2] ⸢KASKAL.GÍD⸣ qaq-qa-ru ul-tu qé-reb ÍD.ḫu-su-ur ma-a-me da-ru-ú-ti a-šar-šá ú-šar-da-a qé-reb miṭ-ra-a-te ša-ti-na ú-šaḫ-bi-ba pat-ti-iš |
| 157157 | [a-na šup-šu]-uḫ a-lak-ti A.MEŠ ša GIŠ.KIRI₆.MEŠ ÍD.a-gam-mu ú-šab-ši-ma ṣu-ṣu-ú qé-reb-ša as-ti-il ÍGIRA.MUŠEN.MEŠ ŠAḪ.MEŠ GIŠ.GI |
| 158158 | [a]-⸢lap⸣ qí-i-ši i-na lìb-bi ú-maš-šir i-na ṭè-em DINGIR-ma qé-reb GIŠ.KIRI₆.MEŠ GIŠ.GEŠTIN gi-mir GURUN GIŠ.se-er-du ù ŠIM.ḪI.A ma-gal iš-mu-ḫu GIŠ.ŠUR.⸢MÌN⸣ |
| 159159 | [GIŠ].MES.MÁ.KAN.NA nap-ḫar GIŠ.MEŠ i-ši-ḫu-ma ú-ṣar-ri-šu ⸢pa⸣-pa-al-lum ap-pa-ra-a-te ma-gal i-ši-ra MUŠEN AN-e ÍGIRA.MUŠEN qin-na iq-nun-ma |
| 160160 | ⸢ŠAḪ GIŠ.GI a-lap qí⸣-i-ši ú-rap-pi-šu ta-lit-tu GIŠ.MES.MÁ.KAN.NA GIŠ.ŠUR.MÌN tar-bit ṣip-pa-a-ti GI AMBAR.MEŠ ša qé-reb ÍD.a-gam-me ak-šiṭ-ma |
| 161161 | [a-na šip-ri] ⸢ḫi-šiḫ⸣-ti É.GAL.MEŠ be-lu-ti-ia lu DÙ-uš ul-tu šip-ri É.GAL-ia ú-qat-tu-ú daš-šur EN GAL DINGIR.MEŠ ù dIŠ.TAR.MEŠ |
| 162162 | [a-ši-bu-ut KUR aš-šur.KI] i-na qer-bi-šá aq-re-ma UDU.SISKUR.MEŠ taš-ri-iḫ-te aq-qí-ma ú-šat-lim kàd-ra-a-a Ì.GIŠ GIŠ.sér-di ù ḫi-bi-iš-ti |
| 163163 | [ú-raq-qa-a a-na ru-uš-te] ⸢i⸣-na taš-ri-it É.GAL ša ba-ḫu-la-ti KUR-ia ú-šá-áš-qa-a muḫ-ḫa-šin GEŠTIN.MEŠ du-uš-šu-pu ṣur-ra-šin am-kir i-na qí-bit |
| 164164 | [aš-šur a-bu DINGIR.MEŠ ù diš-tar] ⸢šar-ra-ti⸣ dALAD dum-qí d[LAMMA dum-qí] ⸢qé⸣-reb É.GAL šá-a-tu da-a-riš liš-tab-ru-ú a-a ip-par-ku-ú i-da-a-šá |