Layard, MS C fols. 55v-56v (RINAP 3/2 Sennacherib 40) [Sennacherib]

[ul]-la-a re-ši-šu [a-na 7 ME i-na AS₄.LUM GAL-ti UŠ ù 4 ME 40 i-na AS₄.LUM GAL-ti SAG.KI]

ši-kit-ti É.GAL ⸢ú⸣-[ter-ma šu-bat-sa uš-rab-bi É.GAL NA₄.DÚR.MI.NA.BÀN.DA NA₄.GIŠ.NU₁₁.GAL]

ZÚ AM.SI ⸢GIŠ.ESI⸣ GIŠ.TÚG GIŠ.[MES.MÁ.KAN.NA GIŠ.EREN GIŠ.ŠUR.MÌN ŠIM.LI GIŠ.e-lam-ma-ku a-na mu-šab be]-lu-ti-[ia]

ab-ta-ni qé-reb-[šú] É ap-[pa-a-ti tam-šil É.GAL KUR.ḫa-at-ti mé-eḫ-ret ba-ba-a-ti] ú-še-⸢piš⸣

⸢GIŠ⸣.ÙR.MEŠ GIŠ.ere-[IGI^?] GIŠ.ŠUR.MÌN ú-[šat-ri-ṣa e-li-šin GIŠ.IG.MEŠ GIŠ.li-ia-ri] GIŠ.ŠUR.MÌN

[me]-ser KÙ.BABBAR ù URUDU ú-rak-kis-[ma ú-rat-ta-a ba-bi-šin i-na ba-rak]-ka-ni-šin

ap-ti bi-ir-ri ú-pat-ta-a [^dLAMMA.MEŠ NA₄.GIŠ.NU₁₁.GAL ZÚ AM.SI]

ša kit-mu-sa rit-ta-šin bal-tu [ku-uz-bu ḫi-it-lu-pa lu-le]-e

ma-la-a i-na KÁ.MEŠ-ši-in ul-ziz-ma [a-na tab-ra-a]-⸢ti⸣

ú-šá-lik sik-kàt kar-ri kas-pi ù URUDU qé-reb-⸢šin ú⸣-[šal-me ...]

[áš-šú šip-ri É].GAL-ia

[šu-te-šú]-⸢ri⸣ ù li-pit

[ŠU.II-ia] ⸢šul⸣-lu-me i-na u₄-me-šú-ma^*

^daš-šur ù ^diš-tar ra-ʾi-mu

LÚ.SANGA-ti-ia na-bu-ú MU-ia giš-maḫ-ḫi

GIŠ.ere-IGI ša ul-tu UD.MEŠ ru-qu-ú-ti

i-ši-ḫu-ma ik-bi-ru ma-gal <i-na> qé-reb KUR.si-ra-ra

šad-di-i i-na pu-uz-ri na-an-zu-zu

ú-šak-li-mu-in-ni ṣi-⸢i⸣-su-un

ša NA₄.GIŠ.NU₁₁.GAL ša i-na tar-ṣi LUGAL.MEŠ

AD.MEŠ-ia a-na kar-ri nam-ṣa-ri šu-qu-ru

<ina> sa-pan KUR.am-ma-na-na ú-šap-tú-ni pa-⸢ni⸣-[šu]

ù NA₄.[DÚR.MI].NA.BÀN.DA

ma-la DUG.bur-⸢zi⸣-gal-li

ša la in-nam-ru ma-ti-ma

i-na URU.kap-ri-da-ar-gi-la-a

ú-kal-li-im ra-ma-nu-uš

i-te-e URU.ni-na-a

i-na er-ṣe-et URU.ba-la-ṭa-a-a

ki-i ṭè-em DINGIR-ma NA₄.pi-i-lu

pe-ṣu-ú a-na mu-ʾu-de-e

in-na-mir-ma ^dALAD.^dLAMMA.MEŠ

MUNUS.ÁB.ZA.ZA-a-ti NA₄.GIŠ.NU₁₁.GAL

ù KUN₄.MEŠ NA₄.GIŠ.NU₁₁.GAL a-di KUN₄.MEŠ

NA₄.DÚR.MI.NA.BÀN.DA ṣi-ra-a-ti

ab-ni ki-lal-la-an i-na šad-di-šu-un

ab-tuq-ma a-na šip-ri É.GAL-ia

ú-šal-di-da qé-reb URU.ni-na-a

NA₄.pi-i-lu pe-ṣu-ú ša i-na

er-ṣe-et URU.ba-la-ṭa-a-a in-nam-ru a-na ^dALAD.^d[LAMMA.MEŠ] ù MUNUS.[ÁB.ZA.ZA-a-te]

ú-še-piš-ma nab-ni-ta-šu-un ú-šar-ri-iḫ ki-i ṭè-[em] ⸢DINGIR⸣-ma ša ⸢giš⸣-[maḫ-ḫi]

ù a-la-mit-ta 12 UR.MAḪ.MEŠ né-ʾi-ru-ti a-di 12 ^dALAD.^dLAMMA.MEŠ [MAḪ.MEŠ]

22 MUNUS.ÁB.ZA.ZA-a-ti ša šuk-lu-lu gat-ta-šu-un ⸢i⸣-na [me]-reš ka-[bat-ti-ia]

zi-iʾ-pi ṭi-iṭ-ṭi ab-ni-ma e-ra-a qé-reb-šu áš-tap-⸢pa⸣-ka ú-⸢šak⸣-[li-la]

nab-ni-su-un ^dALAD.^dLAMMA.MEŠ NA₄.GIŠ.NU₁₁.GAL ù URUDU ša 2 i-na lìb-bi [za]-ḫa-lu-ú [lit-bu-šú]

^dALAD.^dLAMMA.MEŠ MUNUS.ÁB.ZA.ZA-a-ti NA₄.pi-i-li pe-ṣe-e ša É.GAL.MEŠ be-lu-ti-⸢ia⸣

ú-šá-aṣ-bi-ta SI.GAR-ši-in MUNUS.ÁB.ZA.ZA-a-ti NA₄.GIŠ.NU₁₁.GAL ù pi-ti-iq ú-ru-de-e

iḫ-ze-et kas-pi eb-bi MUNUS.ÁB.ZA.ZA-a-ti pi-ti-iq GU.AN.NA a-di 12 UR.MAḪ.MEŠ ZABAR

né-ʾi-ru-ti ša ra-mu-ú nam-ri-ir-ri tim-me URUDU MAḪ.MEŠ tim-me GIŠ.ere-IGI GAL.MEŠ a-di

tim-me GIŠ.ESI GIŠ.ŠUR.MÌN GIŠ.dup-ra-ni GIŠ.ta-ti-du iḫ-ze-et pa-šal-li kas-pi ù URUDU ṣe-ru-uš-šú-un

ul-ziz-ma dáp-pi ku-lul KÁ.MEŠ-šin e-mid KUN₄.MEŠ NA₄.DÚR.MI.NA.BÀN.DA NA₄.GIŠ.NU₁₁.GAL ù KUN₄.MEŠ

NA₄.pi-i-li GAL.MEŠ ú-šá-as-ḫi-ra a-sur-ru-šin áš-šu u₄-mi-šam-ma A.MEŠ di-lu-ú-ti da-lum

eb-li gu-ḫaṣ-ṣa-a-ti ZABAR ù ḫar-ḫa-ri ZABAR ú-še-piš-ma ki-mu-ú ma-ka-a-ti giš-maḫ-ḫi ù

a-la-mit-ta ṣe-er PÚ.MEŠ uš-ziz ù a-na ^fdtaš-me-tum-šar-⸢rat⸣ MUNUS.É.GAL ḫi-ir-tu na-ram-ti-ia

ša ^dbe-let-DINGIR.MEŠ UGU gi-mir MUNUS.MEŠ ú-šak-li-la nab-ni-sa É.GAL ru-ʾa-a-me ḫi-da-a-ti

ù ri-šá-a-ti ú-še-piš-ma MUNUS.ÁB.ZA.ZA-a-ti NA₄.pi-i-li pe-ṣi-i ina KÁ.MEŠ-šá ul-ziz

i-na qí-bit ^daš-šur AD DINGIR.MEŠ ù ^diš-tar šar-ra-ti i-na ṭu-ub UZU ù ḫu-ud lìb-bi

qé-reb É.GAL.MEŠ ši-na-a-ti ki-lal-la-an UD.MEŠ nu-šá-ri-ka ni-iš-ba-a

bu-ʾa-a-ri ^dALAD dum-qí ^dLAMMA dum-qí i-da-at É.GAL.MEŠ šá-ti-na

da-a-riš lit-tas-ḫa-ru a-a ip-par-ku-ú i-da-a-ši-in