Layard, MS D pp. 24-28 (RINAP 3/2 Sennacherib 39 ex. 01) [Sennacherib]

É.GAL

^md30-PAP.MEŠ-SU

LUGAL ⸢GAL⸣ LUGAL dan-nu

LUGAL ⸢ŠÚ⸣ LUGAL KUR aš-šur.KI

LUGAL ⸢kib⸣-rat LÍMMU-tim

mi-gir DINGIR.MEŠ GAL.MEŠ

^daš-šur ⸢AD⸣ DINGIR.MEŠ ina kul-lat

ma-li-ki ke-niš IGI.BAR-ni-ma

UGU ⸢gi⸣-mir a-šib pa-rak-ki

ú-⸢šar⸣-ba-a GIŠ.TUKUL.MEŠ-⸢ia⸣

⸢i⸣-na [u₄-me]-šu-ma É.GAL MURUB₄ ⸢URU⸣

ša URU.ni-na-a ša LUGAL.MEŠ-ni

AD.MEŠ-ia ú-še-pi-šu-ma

⸢ṣu-uḫ⸣-ḫu-rat šu-bat-sa ÍD.te-bil-ti

i-ta-a-šá i-ba-ʾu-ú-ma ina ILLU-šá

gap-ši ú-ri-⸢ib⸣-bu tem-me-en-šá

É.GAL šá-a-tu a-na si-ḫir-ti-šá

⸢aq⸣-qur ⸢ša ÍD⸣.te-bil-ti ma-lak-šá

[uš-ṭib-ma ú]-še-šir mu-ṣu-šá

⸢qé⸣-reb a-sur-rak-[ki-šá] šap-la-a-nu

GI.MEŠ e-la-niš ESIR.[UD].A ⸢it-ti⸣

NA₄.pi-i-li ⸢GAL⸣.MEŠ [dun-nu-niš]

ak-si 3 ME 40 ina 1.KÙŠ GÍD.[DA]

2 ME 89 ina 1.KÙŠ DAGAL

qaq-qa-ru ul-tu qé-reb ma-a-<me> ú-še-lam-ma

a-na tar-pa-ši-i ú-ter ṣe-er me-ši-iḫ-ti

tam-li-i maḫ-ri-i lu ú-rad-di-ma a-⸢na⸣ 7 ME ina AS₄.LUM

⸢GAL⸣-ti UŠ ù 4 ME 40 ina AS₄.LUM GAL-ti SAG.KI si-ḫir-ti tam-le-e

ú-ter-ma i-na 1 ME 90 ti-ib-ki ul-la-a re-ši-⸢šú⸣ É.GAL

NA₄.DÚR.MI.NA.BÀN.DA NA₄.GIŠ.NU₁₁.GAL ZÚ AM.SI GIŠ.ESI GIŠ.TÚG GIŠ.MES.MÁ.KAN.NA

GIŠ.ere-ni GIŠ.ŠUR.MÌN ŠIM.LI GIŠ.e-lam-ma-⸢ku⸣ a-⸢na⸣ mu-šab LUGAL-ti-ia

⸢ab⸣-ta-ni qé-reb-šú É ap-pa-a-ti tam-šil É.⸢GAL⸣ KUR.ḫa-at-ti mé-⸢eḫ⸣-ret

ba^*-ba-a-ti ú-še-piš GIŠ.ÙR.MEŠ GIŠ.ere-ni GIŠ.ŠUR.MÌN ú-šat-ri-ṣa e-⸢li⸣-šin

[GIŠ].⸢IG⸣.MEŠ GIŠ.li-ia-ri ⸢GIŠ⸣.ŠUR.MÌN me-ser KÙ.BABBAR ù URUDU ú-rak-kis-ma

ú-rat-ta-a ba-bi-šin i-na ba-rak-ka-ni ap-ti bi-ir-ri ú-pat-ta-a

^dLAMMA.MEŠ NA₄.GIŠ.NU₁₁.GAL ZÚ AM.SI ina^* ba-bi-šin ⸢ul⸣-ziz sik-kàt kar-ri kas-pi

ù URUDU qé-reb-šin ⸢ú⸣-šal-me i-na a-gur-ri NA₄.ZÚ NA₄.ZA.GÌN us-si-ma

[se]-el-lum né-bé-ḫi ù gi-mir ⸢pa-as⸣-qí-šin áš-šú šip-ri É.GAL-ia šu-te-šú-⸢ri⸣

⸢i-na⸣ u₄-me-šú-ma ^daš-šur ù ^diš-tar ra-ʾi-mu ⸢LÚ⸣.SANGA-ti-ia giš-maḫ-ḫi

⸢GIŠ⸣.ere-ni ša ul-tu UD.MEŠ SÙ.MEŠ ⸢ik⸣-bi-ru qé-reb KUR.si-ra-<ra> KUR-i

[na]-an-zu-<zu> ú-šak-li-mu-in-ni ṣi-<i>-⸢su⸣-un ša NA₄.GIŠ.NU₁₁.GAL ša ina tar-⸢ṣi⸣

[LUGAL].MEŠ AD.MEŠ-ia a-na kar-ri nam-ṣa-ri šu-qu-ru ina sa-pan KUR.am-ma-na-⸢na⸣

⸢ú⸣-šap-tu-ni pa-ni-šu ù NA₄.DÚR.MI.NA.BÀN.DA ma-la DUG.bur-zi-gal-li

ra-ma-nu-uš ina er-ṣe-et URU.ba-la-ṭa-a-a NA₄.pi-i-lu ⸢pe⸣-ṣu-ú

a-na mu-ʾu-de-e in-na-mir-ma ^dALAD.^dLAMMA.MEŠ MUNUS.ÁB.ZA.ZA-a-ti

NA₄.GIŠ.NU₁₁.GAL ù KUN₄.MEŠ NA₄.GIŠ.NU₁₁.GAL a-di KUN₄.MEŠ NA₄.DÚR.MI.NA.BÀN.⸢DA⸣

ṣi-ra-a-ti ab-ni ki-lal-la-an ina šad-di-šú-un ab-tuq-ma a-na šip-⸢ri⸣

É.GAL-ia ú-šal-di-da qé-reb NINA.KI NA₄.pi-i-lu pe-ṣu-[ú]

⸢ša⸣ ina er-ṣe-⸢et⸣ URU.ba-la-ṭa-a-a in-nam-ru a-na ^d⸢ALAD⸣.^dLAMMA.[MEŠ]

ù MUNUS.ÁB.ZA.ZA-a-te ú-še-piš ki-i ṭè-em DINGIR-ma ša giš-maḫ-[ḫi]

ù a-la-mit-ta 12 UR.MAḪ.MEŠ né-ʾi-ru-ti a-di

[12] ^dALAD.^dLAMMA.MEŠ MAḪ.MEŠ 22 MUNUS.ÁB.ZA.ZA-<a>-te zi-iʾ-pi

[ṭi]-iṭ-ṭi ab-ni-ma e-ra-a qé-reb-šú áš-tap-pa^*-[ka]

ú-šak-li-la

nab-nit-sún ^dALAD.^dLAMMA.MEŠ

NA₄.GIŠ.NU₁₁.GAL ⸢ù⸣ URUDU

ša 2 ina lìb-bi za-⸢ḫa⸣-lu-u lit-bu-šú

⸢^d⸣ALAD.^dLAMMA.MEŠ ⸢ù⸣ MUNUS.ÁB.ZA.ZA-a-te

NA₄.pi-i-li pe-ṣe-e ša É.GAL.MEŠ-ia

ú-šá-aṣ-bi-ta ⸢SI⸣.GAR-šin MUNUS.ÁB.ZA.ZA-a-ti

[NA₄].GIŠ.NU₁₁.GAL ù pi-⸢ti⸣-iq ú-ru-de-e

iḫ-ze-et kas-pi eb-⸢bi⸣ MUNUS.ÁB.ZA.ZA-a-te pi-ti-iq

⸢GU⸣.AN.NA a-di 12 ⸢UR.MAḪ⸣.MEŠ ⸢ZABAR⸣ né-ʾi-ru-ú-ti

tim-me URUDU ṣi-ru-⸢ti⸣ GIŠ.tim-me ⸢GIŠ⸣.EREN GAL.MEŠ a-di tim-me

GIŠ.ESI GIŠ.ŠUR.MÌN GIŠ.⸢dup-ra⸣-ni GIŠ.ta-ti-di iḫ-ze-⸢et⸣ pa-šal-li

kas-pi ù URUDU ṣe-ru-uš-šú-un ul-ziz-ma dáp-pi ku-lul KÁ.MEŠ-⸢šin⸣

e-mid KUN₄.MEŠ NA₄.DÚR.MI.NA.⸢BÀN⸣.DA NA₄.GIŠ.NU₁₁.⸢GAL ù⸣ KUN₄.⸢MEŠ⸣

NA₄.pi-i-li GAL.MEŠ ú-šá-as-ḫi-ra a-sur-ru-ši-in

áš-šú u₄-me-šam-ma A.MEŠ di-lu-ti da-lum eb-li ⸢gu⸣-ḫaṣ-ṣa-te ⸢ZABAR⸣

⸢ù⸣ ḫar-⸢ḫa⸣-ri ⸢ZABAR⸣ ú-še-piš-ma ki-mu-ú ma-ka-a-ti

giš-maḫ-ḫi a-la-mit-ta ṣe-er PÚ.MEŠ ul-ziz É.GAL.MEŠ

ša-ti-na ú-šá-lik as-mì-iš si-ḫir-⸢ti⸣ É.GAL a-[x] tab-⸢rat⸣

⸢kiš⸣-šat UN.MEŠ ul-la-a re-ši-šá É.GAL ša šá-[x x]

la i-šu-ú ni-bit-sa az-kur^* i-na qí-bit ^daš-šur AD ⸢DINGIR⸣.[x]

ù ^diš-tar šar-ra-ti ^dALAD dum-qí ^dLAMMA dum-[qí]

⸢qé⸣-reb-šá ⸢liš-tab⸣-ru-ú a-a ip-par-ku-ú ⸢i-da⸣-[a-šá]