BM 091027 (RINAP 4 Esarhaddon 114; 115 ex. 01) [Esarhaddon]

⸢AN⸣.ŠÁR-ŠEŠ-SUM.NA ⸢LUGAL⸣

kiš-šá-ti LUGAL KUR aš-šur.⸢KI⸣

GÌR.NÍTA KÁ.DINGIR.RA.⸢KI⸣

LUGAL KUR EME.GI₇ ù URI.KI

NUN na-a-du pa-lìḫ

^dAG ù ^dAMAR.UTU

ul-la-nu-ú-a ina BALA

LUGAL maḫ-re-e ina KUR EME.GI₇

ù URI.KI it-tab-šá-a

Á.MEŠ ḪUL.MEŠ UN.MEŠ

a-šib lìb-bi-šu an-na

ul-⸢la a-ḫa-meš⸣ e-tap-pa-lu

i-dab-⸢bu-ba sur-ra⸣-a-⸢ti⸣

a-⸢na NÍG.GA é-sag-íl⸣

É.GAL DINGIR.⸢MEŠ⸣ ŠU-⸢su⸣-[nu]

ú-bi-lu-ma KÙ.GI KÙ.[BABBAR]

ni-siq-ti NA₄.MEŠ a-na

KUR.ELAM.MA.KI ip-šu-ru ma-ḫi-riš

i-gu-ug-ma ^dEN.LÍL

DINGIR.MEŠ ⸢^dAMAR⸣.UTU a-na sa-pan

KUR ḫul-lu-qu UN.MEŠ-[šá]

ik-ta-pu-ud MUNUS.⸢ḪUL⸣

ÍD.a-ra-⸢aḫ⸣-[ti]

[ÍD ḪÉ].GÁL ILLU ⸢gap⸣-[šu]

⸢tam-šil⸣ a-bu-⸢bi⸣ [ib-bab-lam-ma]

⸢a⸣-lum šu-bat-su [(...)]

⸢eš-re⸣-e-ti-šu [A.MEŠ]

⸢uš⸣-bi-iʾ-ma ú-še-⸢me⸣

⸢kar⸣-meš DINGIR.MEŠ ^d15.MEŠ

a-šib lìb-bi-šu e-lu-ú

šá-ma-meš UN.MEŠ a-šib

qer-bi-šu a-na ṣi-in-di

⸢ù⸣ bir-te zu-uʾ-ú-zu

⸢il⸣-li-ku re-e-šu-tú

⸢70⸣ MU.AN.NA.MEŠ mi-nu-ut

ni-du-ti-šu iš-ṭur-ma

re-mé-nu-ú ^dAMAR.UTU

sur-riš lìb-ba-šu i-nu-uḫ-ma

e-liš a-na šap-liš

uš-bal-kit-ma a-na 11

MU.AN.NA.MEŠ a-šab-šu iq-bi

ia-a-ti AN.ŠÁR-ŠEŠ-MU

áš-šu ep-še-e-te ši-na-ti

a-na áš-ri-ši-na tur-ri

ina UKKIN ŠEŠ.MEŠ-ia GAL.MEŠ

⸢ke-niš⸣ tu-ut-tan-ni-ma

[AN].⸢DÙL⸣-ka DÙG.⸢GA taš-ku-nu-ma⸣

[UGU]-ia kul-lat za-ʾi-ri-ia

[a-bu]-biš tas-pu-nu-ma gi-mir

[za-ma]-⸢ni⸣-ia ta-na-ru-ma

⸢tu-šak⸣-ši-du ni-iz-ma-ti

a-⸢na⸣ nu-uḫ-ḫi lìb-bi DINGIR-ti-ka

GAL-ti šup-šu-uḫ ka-bat-ti-ka

SIPA-ut KUR aš-šur.KI tu-mal-lu-ú

ina SAG LUGAL-ti-ia ina maḫ-re-e

BALA-ia ša ina GIŠ.GU.ZA

LUGAL-ti ra-biš ú-ši-bu

⸢iš-šak⸣-na-nim-ma Á.MEŠ

⸢SIG₅⸣.[MEŠ] ina šá-ma-me qaq-qa-ri

[iš-tap-pa]-ra gis-kim-mu-uš

[a-na] ⸢e⸣-peš šip-ri šu-a-tú

[áš-ḫu]-⸢ut⸣ ak-kud ša ^dUTU

[^dIŠKUR] ^dAMAR.UTU DI.KU₅.GAL

DINGIR.[MEŠ] EN.MEŠ-ia ak-ta-mis

⸢ma⸣-ḫar-šu-un ina ma-kal-ti

LÚ.ḪAL-ú-ti UZU.MEŠ

tu-kul-ti iš-šak-nu-nim-ma

ša e-peš KÁ.DINGIR.RA.KI

ud-du-uš é-sag-íl

ú-šá-áš-ṭi-ra a-mu-tú

at-kal-ma ad-ke-e-⸢ma⸣

at-kal-ma ad-ke-e-⸢ma⸣

gi-mir ERIM.ḪI.A u UN.MEŠ

KUR.kár-^ddun-ía-àš

si-ḫir-ti-šá GIŠ.al-lu

ú-šat-rik-ma e-mid-da

tup-šik-ki ina Ì.GIŠ DÙG.GA diš-pu

Ì.NUN.NA KURUN.NAM ši-kar

KUR-i KÙ ab-lu-la ta-ra-ḫuš

ku-dúr-ru ina SAG.DU-ia áš-ši-ma

ú-šá-az-bil ra-ma-ni

ina GIŠ.Ù.ŠUB.MEŠ ZÚ AM.SI

GIŠ.ESI GIŠ.TÚG GIŠ.MES.MÁ.KAN.NA

AD.ME.KÁR a-na né-ri-šá

ú-šal-bi-na SIG₄

é-sag-íl É.GAL DINGIR.MEŠ

ù eš-re-e-ti-šu

KÁ.DINGIR.RA.KI URU ki-din-ni

im-gur-^dEN.LÍL BÀD-šu

né-met-^dEN.LÍL šal-ḫu-šu

ul-tu uš-še-šu-un a-di

na-bur-ri-šu-un eš-šiš

ú-še-piš ú-šar-bi

ú-šaq-qí ú-šar-ri-iḫ

ṣa-lam DINGIR.MEŠ GAL.MEŠ ud-diš

ina BÁRA.MEŠ-šu-nu ú-šar-ma-a

šu-bat da-ra-a-ti SÁ.DUG₄-šú-nu

ba-aṭ-lu-ti ú-ki-in

DUMU.MEŠ KÁ.DINGIR.RA.KI ša

a-na re-e-šu-ti šu-lu-ku

a-na ṣin-di ù bir-te

zu-uʾ-ú-zu ú-pa-ḫi-ir-ma

a-na LÚ.KÁ.DINGIR.RA.KI.MEŠ

am-nu ki-din-nu-sún eš-šiš

áš-kun

(Horned headdress on podium bearing a relief of a stylized tree)

(Assyrian king as worshipper/priest)

(Stylized tree)

(Bull)

(Mountain)

(Plough)

(Palm tree)

(Four-sided figure)