IM 142109 (RINAP 4 Esarhaddon 113) [Esarhaddon]

^mAN.ŠÁR-ŠEŠ-SUM.NA LUGAL GAL-ú LUGAL dan-nu LUGAL kiš-šat LUGAL KUR aš-šur.KI

GÌR.NÍTA KÁ.DINGIR.RA.KI LUGAL KUR EME.GI₇ ù URI.KI ni-bit ^dAMAR.UTU ^dNUMUN-DÙ-tu

SIPA ke-e-nu mi-gir AN.ŠÁR ù ^dNIN.LÍL

LUGAL šá ul-tu ṣe-ḫe-ri-šú a-na ^dAG ^dtaš-me-tum ù ^dna-na-a it-tak-lu-ma

e-mu-ru da-na-an-šú-un A ^md30-ŠEŠ.MEŠ-SU LUGAL GAL-ú LUGAL dan-nu

LUGAL kiš-šat LUGAL KUR aš-šur.KI A ^mMAN-GIN LUGAL GAL-ú LUGAL dan-nu LUGAL kiš-šat LUGAL KUR aš-šur.KI

GÌR.NÍTA KÁ.DINGIR.RA.KI LUGAL KUR EME.GI₇ ù URI.KI ŠÀ.BAL.BAL ^mEN-ba-ni

NUMUN da-ru-ú ša du-rug-šú bal-til.KI ul-la-nu-ú-a EN GAL-ú ^dAMAR.UTU

it-ti é-sag-gíl ù KÁ.DINGIR.RA.KI e-zi-iz ŠÀ-šú ze-nu-tu ir-ši

UN.MEŠ-šú an-na ul-la a-ḫa-meš e-tap-pa-la i-dab-bu-ba la šá-lim-tu

a-na NÍG.GA EN GAL-i ^dAMAR.UTU ŠU.II-su-nu ú-bi-lu-ma a-na KUR.ELAM.MA.KI id-di-nu ṭa-aʾ-tú

ep-še-ti-ši-na UGU ^dAMAR.UTU ^dNUMUN-DÙ-tu im-ra-ṣa-ma iq-bu-ú sa-paḫ-šin

UGU URU A.MEŠ uš-bi-iʾ-ma ú-še-me ki-šub-bi-ìš

DINGIR.MEŠ-šú ^d15.MEŠ-šú ip-ri-du-ma e-lu-ú šá-ma-meš šu-bat URU in-na-si-iḫ-ma

ul in-na-ṭal te-me-en-šú i-na re-eš LUGAL-ú-ti-ia ina maḫ-ri BALA-ia

ša i-na GIŠ.GU.ZA LUGAL-ú-ti ra-biš ú-ši-bu re-me-nu-ú ^dAMAR.UTU

ŠÀ-šú i-nu-uḫ-ma it-ti URU šá iz-nu-ú sa-li-mu ir-ši

é-sag-gíl u KÁ.DINGIR.RA.KI eš-šiš ú-še-piš ṣa-lam DINGIR.MEŠ GAL.MEŠ ud-diš ina KI.TUŠ-šú-nu

ú-šar-ma-a šu-bat da-rat É AN.ŠÁR ú-šak-lil ina kul-lat ma-ḫa-zi áš-tak-ka-nu si-ma-a-te

i-na u₄-me-šú-ma é-níg-gidru-kalam-ma-sum-ma É ^dAG šá ḫa-re-e ša a-šar-šú ik-kam-ru-ma

e-mu-ú ti-la-niš ṣe-er uš-še-šú la in-na-ṭa-lu la uṣ-ṣab-bu-ú nab-nit-su

a-na-ku ^mAN.ŠÁR-ŠEŠ-SUM.NA LUGAL KUR aš-šur.KI ša AN.ŠÁR ^d30 ^dUTU ^dEN ^dAG

a-na šuk-lu-lu ma-ḫa-zi ud-du-še eš-re-e-ti ip-tu-ú ḫa-si-su-uš

e-peš é-níg-gidru-kalam-ma-sum-ma ina lìb-bi-ia ib-ši-ma uš-ta-bil ka-bat-ti ep-ri-šú kam-ru-te

ú-pat-ti-ma ši-kit-ta-šú uṣ-ṣab-bi-ma a-ḫi-iṭ te-me-en-šú ki-i pi-i GIŠ.ḪUR-šú maḫ-ri-te

am-šu-uḫ-ma e-du SIG₄ la ú-rad-di ina muḫ-ḫi ina ITI šal-me u₄-me ŠE.GA uš-še-šú ad-di-ma

ú-kin SIG₄-su É ša-a-šú ul-tu uš-še-šú a-di gaba-dib-bi-šu ar-ṣip ú-šak-lil

ki-ma u₄-me ú-nam-mir [šip-ru šá-a-šú] ^dAG IBILA ṣi-i-ru ḫa-diš li-pal-lis

i-na kun-ni ŠÀ-šú lik-tar-[rab LUGAL-ú]-ti GIŠ.GIDRU i-šar-tu mu-rap-pi-šat KUR li-šat-me-eḫ rit-tu-u-a

a-na ^maš-šur-DÙ-A DUMU ri-du-tú KUR aš-šur.KI ù ^mdGIŠ.NU₁₁-MU-GI.NA DUMU ri-du-te KÁ.DINGIR.RA.KI

ŠEŠ.MEŠ ki-lal-la-an ṣi-it lìb-bi-ia šim-tu ṭa-ab-tu šim-tu MUNUS.SIG₅ ša ur-ruk u₄-me

BALA.MEŠ-šú-un na-ṣir GIŠ.GU.ZA šá-an-gu-ti-šú-un li-ši-mu ši-mat-su-un

LUGAL-su-un x x x x x x x ina kit-ti ù mi-šá-ri li-ir-du-ú

ma-ti ru^?-bu-ú ke-e-nu-tú ^d30 u ^dUTU an-nu ke-e-nu li-tap-pa-lu a-ḫa-meš

a-na EGIR.MEŠ u₄-me a-na u₄-me ṣa-a-ti e-nu-ma É šá-a-šú e-na-ḫu-ma la-ba-riš il-la-ku

ru-bu-ú ar-ku-ú ša an-ḫu-us-su ud-da-šú šu-mì-ía šaṭ-ru it-ti MU-šú liš-kun

^dAG IBILA ṣi-i-ru na-din GIŠ.GIDRU GIŠ.GU.ZA BALA-e ik-ri-bi-šú i-šem-me