Ist EŞEM 06703 (RINAP 4 Esarhaddon 093) [Esarhaddon]

^mdaš-šur-ŠEŠ-SUM.NA LUGAL GAL LUGAL dan-nu LUGAL kiš-šá-ti LUGAL KUR aš-šur.⸢KI⸣ GÌR.NÍTA KÁ.DINGIR.RA.KI LUGAL KUR šu-me-ri ù URI.KI

SIPA ki-i-nu ša UN.MEŠ dal-ḫa-ti ú-taq-qí-nu-ma ú-⸢še⸣-[ṣi-ši]-⸢na⸣-a-ti nu-ú-ru ša DINGIR.MEŠ <GAL.MEŠ> ba-nu-u e-pe-šu ud-du-šu iš-ru-ku ši-rik-tuš

ba-nu-ú É AN.ŠÁR e-piš é-sag-íl ù KÁ.DINGIR.⸢RA⸣.[KI mu]-⸢šak⸣-lil ma-ḫa-zi ka-li-šú-nu mu-ud-diš ṣa-lam DINGIR.MEŠ GAL.MEŠ

ša DINGIR.MEŠ KUR.KUR šal-lu-ti ul-tu qé-reb KUR aš-šur.KI a-na áš-ri-⸢šú⸣-[nu ú-ter-ru] ⸢é⸣-gašan-kalam-ma É ^diš-tar ša URU.LÍMMU-DINGIR be-el-ti-šú za-ḫa-la-a ú-šal-biš-ma ú-nam-me-ru ki-ma u₄-me

UR.MAḪ.MEŠ an-ze-e na-ʾi-i-ri ^dlàḫ-me ^dku-ri-⸢bi⸣ [šá KÙ.BABBAR u URUDU ú-še-piš]-ma né-reb KÁ.MEŠ-šá ul-ziz LUGAL ša ina tu-kul-ti aš-šur ^d30 ^dUTU ^dAG ^dAMAR.UTU ^d15 ša NINA.KI ^d15 ša URU.LÍMMU-DINGIR

ul-tu tam-tim e-li-ti a-di tam-tim šap-li-ti i-šá-[riš it-tal-lak-ú-ma kul-lat] ⸢na⸣-kìr-ri-šu ù ma-al-ki la kan-šu-ti-šu ú-šak-ni-šu še-pu-uš-šu

ka-šid URU.ṣi-du-nu ša ina MURUB₄ tam-tim na-du-⸢ú⸣ [sa-pi-in gi-mir da-ád-me]-⸢šú šá-lil URU.ar-za-a šá⸣ i-te-e na-ḫal KUR.mu-uṣ-ri šá ^ma-⸢su-ḫi-li LUGAL⸣-šu

a-di ma-li-ki-šu bi-re-ti id-du-ú [a-na KUR aš-šur.KI ú-ra-a ù ^m]⸢te-uš-pa-a gi-mir-a-a ina KI-tim KUR.ḫu-bu-uš⸣-[na]

a-di gi-mir um-ma-ni-šu ú-ra-⸢as⸣-[si-bu i-na GIŠ.TUKUL ka-bi]-is UN.MEŠ KUR.ḫi-lak-ki la kan-šu-[ti]

ṭa-rid ^mdAG-NUMUN-kit-li-šer [DUMU ^mdAMAR.UTU-A-SUM.NA na-bi-iʾ É]-dak-kur-ri šá qé-reb kal-di a-a-ab KÁ.DINGIR.RA.⸢KI⸣

⸢ka⸣-mu-ú ^mdšá-maš-[ib-ni LUGAL-šu] is-ḫap-pu ḫa-bi-lum

[URU].ḫa-an-da-su [URU.ma-ga-la-nu URU.al-pi-ia-na URU.di]-⸢iḫ⸣-ra-nu URU.qa-ta-bu-uʾ URU.pa-de-e URU.ú-de-ru URU.MEŠ dan-nu-ti

[ša] ⸢na⸣-ge-⸢e⸣ [KUR.ba-az-zi a-di URU.MEŠ ṣe-eḫ-ru-ti ša li-me-ti]-šú-nu al-me ak-šu-ud áš-lu-la šal-lat-su-un ap-pu-ul aq-qur ina ^dGIŠ.BAR aq-mu

[da-aʾ-iš KUR.par-na-ki LÚ.KÚR ak-ṣu a-ši-bu-ti KUR.DU₆-a]-šur-ri ša ina pi-i UN.MEŠ KUR.mi-iḫ-ra-nu KUR.pi-ta-a-nu i-nam-bu-u zi-kir-šu

[mu-sap]-⸢pi-iḫ UN.MEŠ⸣ [KUR.man-na-a-a gu-tu-ú la sa]-⸢an⸣-qu KUR.pa-tu-uš-ar-ri na-gu-ú ša i-te-e É.MUN

[ša qé]-reb KUR.ma-da-a-a ⸢ru-qu-ti⸣ [ša pa]-⸢a⸣-ṭi KUR.bi-ik-ni

[ša ina] LUGAL AD.MEŠ-ia mám-⸢ma⸣ [la ik]-⸢bu⸣-su KI-tim ma-ti-šú-un

[^mši]-⸢dir⸣-pa-ar-na ^me-pa-ar-[na] ⸢LÚ⸣.EN.URU.MEŠ dan-nu-ti

[ša la] kit-nu-šu a-na ni-ri šá-a-šú-nu a-di ⸢UN⸣.[MEŠ-šú-nu] šal-lat-su-un ka-bit-tú áš-lu-la a-na qé-reb KUR aš-šur.KI

[DUMU ^md]⸢EN⸣.ZU-ŠEŠ-eri-ba LUGAL ŠÚ LUGAL KUR aš-šur.KI DUMU ^m⸢LUGAL⸣-GI.NA LUGAL ŠÚ LUGAL KUR aš-šur.KI

[GÌR].NÍTA KÁ.DINGIR.RA.KI LUGAL KUR šu-me-ri ù ak-ka-de-e

⸢ina u₄-me⸣-šu-ma É.GAL.TUR.RA ša qé-reb URU.tar-bi-ṣi šá ṣu-uḫ-ḫu-rat šu-bat-sa

qaq-qa-ru at-ru ki-ma a-tar-tim-ma UGU maḫ-ri-ti ⸢ú⸣-rad-di-ma tam-la-⸢a uš⸣-<<ma>>-⸢mal⸣-li

É.GAL ṣi-ir-tú šá šu-bat-sa ⸢ma⸣-gal rap-šá-tu

a-na mul-ta-ʾu-ú-ti ^maš-šur-DÙ-IBILA DUMU MAN GAL šá É ri-du-ti DUMU na-ram-ia

ša aš-šur ^d30 ^dUTU ^dEN ^dAG ^dU.GUR ^d15 ša NINA.KI ^d15 ša URU.LÍMMU-DINGIR MU-šú iz-ku-ru a-na e-peš LUGAL-ú-ti

É.GAL šu-a-tu ul-tu UŠ₈-šá a-di GABA.DIB-šá ar-ṣip ú-šak-lil

GIŠ.ÙR.MEŠ GIŠ.EREN.MEŠ MAḪ.MEŠ tar-bit KUR.ḫa-ma-nim ú-šat-ri-ṣa e-li-ši-in

GIŠ.IG.MEŠ GIŠ.ŠUR.MÌN ša e-re-si DÙG.GA ú-rat-ta-a KÁ.MEŠ-šin

a-na tab-rat kiš-šat UN.MEŠ lu-le-e uš-ma-al-li

MU.SAR ši-ṭir MU-ia ù ši-ṭir MU ^maš-šur-DÙ-IBILA DUMU MAN GAL ša É UŠ-ti DUMU na-ram-ia ú-šá-áš-ṭir-ma ina qé-reb-šá áš-kun

ul-tu šip-ri É.GAL šú-a-tú ag-mur-ú-ma ú-qa-tu-u ši-pir-šá ^dU.GUR ^dla-aṣ a-ši-bu-ti URU.tar-bi-ṣi ina qer-bi-šá aq-re-ma

UDU.SISKUR.MEŠ tak-bit-ti eb-bu-ti ma-ḫar-šu-un aq-qi-ma ú-šam-ḫi-ra kàd-ra-<<kàd>>-a-a

^dU.GUR ^dla-aṣ ik-rib UD.MEŠ SÙ.MEŠ MU.AN.NA.MEŠ ṭu-ub UZU.MEŠ ḫu-ud lìb-bi li-ši-mu-in-ni ù a-na ^maš-šur-DÙ-IBILA DUMU na-ram-ia liš-ru-ku ši-rik-tuš

NUN EGIR-ú ina LUGAL.MEŠ DUMU.MEŠ-ia ša aš-šur u ^diš-tar a-na be-lut UN.MEŠ i-nam-bu-u zi-kir-šú

e-nu-ma É.GAL šá-a-tu i-lab-bi-ru-ma in-na-ḫu an-ḫu-us-sa lu-ud-diš

MU.SAR ši-ṭir MU-ia u ši-ṭir MU aš-šur-DÙ-IBILA ⸢DUMU⸣ [MAN GAL] ša É UŠ-ti DUMU na-ram-ia li-mur-ma

⸢Ì⸣.GIŠ lip-šu-uš UDU.SISKUR BAL-⸢qí⸣ [it-ti] MU.SAR-e ši-ṭir MU-šú liš-⸢kun⸣

[^dU].⸢GUR⸣ ^dla-aṣ ik-ri-⸢bi⸣-[šu] i-šem-mu-ú

ITI.GU₄.SI.SÁ UD.18.KÁM lim-mu ^mdMUATI-EN-PAP LÚ.GAR.KUR ⸢BÀD⸣-LUGAL-uk-ka ki-i a-de-e ina UGU ^maš-šur-DÙ-IBILA DUMU MAN GAL šá É UŠ-ti šak-nu-u-ni