BM 131129 (RINAP 4 Esarhaddon 077, ex. 01) [Esarhaddon]

^maš-šur-ŠEŠ-SUM.NA LUGAL GAL-ú LUGAL dan-nu LUGAL kiš-šá-ti LUGAL KUR aš-šur.KI

GÌR.NÍTA KÁ.DINGIR.RA.KI LUGAL KUR šu-me-ri ù URI.KI

RE.É.UM ki-i-nu ša UN.MEŠ dal-ḫa-a-ti ú-taq-qi-nu ú-še-ṣi-ši-na-ti nu-ú-ru

ša DINGIR.MEŠ GAL.MEŠ ba-nu-ú e-pe-šú ud-du-šu iš-ru-ku ši-rik-tuš

ba-nu-ú É AN.ŠÁR e-piš é-sag-íl ù KÁ.DINGIR.RA.KI

mu-šak-lil ma-ḫa-zi ka-li-šú-nu mu-ud-diš ṣa-lam DINGIR.MEŠ GAL.MEŠ

šá DINGIR.MEŠ KUR.KUR šal-lu-tu ul-tu qé-reb KUR aš-šur.KI a-na áš-ri-šú-nu ú-ter-ru

é-gašan-kalam-ma É ^diš-tar URU.LÍMMU-DINGIR be-el-ti-šú

za-ḫa-la-a ú-šal-biš-ma ú-nam-⸢me⸣-ru ki-ma u₄-me

UR.MAḪ.MEŠ an-ze-e na-ʾi-i-ri ^dlàḫ-me ^dku-ri-bi

ša KÙ.BABBAR u URUDU ú-še-piš-ma né-reb KÁ.MEŠ-šá ul-ziz

LUGAL šá ina tu-kul-ti AN.ŠÁR ^d30 ^dUTU ^dAG ^dAMAR.UTU ^d15 ša NINA.KI ^d15 ša URU.LÍMMU-DINGIR

ul-tu tam-tim e-li-ti a-di tam-tim šap-li-ti i-šá-riš it-tal-lak-ú-ma

kul-lat na-ki-re-e-šú [x x]-al-ki la kan-šu-ti-šú ú-šak-ni-šá še-pu-uš-šu

ka-šid URU.ṣi-du-nu šá ina [x] tam-tim na-du-ú sa-pi-in gi-mir da-ád-me-šu

šá-lil URU.ar-za-a ša i-te-e na-ḫal KUR.mu-uṣ-ri ša ^ma-su-ḫi-li LUGAL-šu

a-di ma-li-ke-e-šú bi-re-e-ti id-du-u a-na KUR aš-šur.KI ú-ra-a

ù ^mte-uš-pa-a KUR.gi-mir-a-a ina KI-tim KUR.ḫu-bu-uš-nu

a-di gi-mir um-ma-ni-šú ú-ra-as-si-bu i-na GIŠ.TUKUL

ka-bi-is UN.MEŠ KUR.ḫi-lak-ki la kan-šu-ti

ṭa-rid ^mdAG-NUMUN-ZI-SI.SÁ DUMU ^mdAMAR.UTU-A-SUM.NA

[x x]-iʾ KUR.É-da-ku-ri ša qé-reb KUR.kal-di a-a-bi KÁ.DINGIR.RA.KI

[x x]-ú ^mdšá-maš-ib-ni LUGAL-šu is-ḫap-pu ḫab-bi-lu

[x x]-an-da-su URU.ma-ga-la-nu URU.al-pi-ia-na URU.di-iḫ-ra-nu

URU.qa-ta-bu-uʾ URU.pa-de-e URU.ú-de-ri URU.MEŠ dan-nu-ti

ša na-ge-e KUR.ba-az-zi a-di URU.MEŠ ṣe-ḫe-ru-ti ša li-me-ti-šú

al-me ak-šu-ud áš-lu-la šal-lat-su-un ap-pul aq-qur ina GIŠ.BAR aq-mu

da-aʾ-iš KUR.par-na-ki LÚ.KÚR ak-ṣu a-ši-bu-ti KUR.DU₆-a-šur-ri

ša ina pi-i UN.MEŠ KUR.mi-ḫi-ir-a-nu KUR.pi-it-ta-nu i-nam-bu-u zi-kir-šú

mu-sap-pi-iḫ UN.MEŠ KUR.man-na-a-a gu-tu-ú la sa-an-qu

KUR.pa-tu-uš-ar-ra na-gu-ú ša i-te-e É.MUN

ša qé-reb KUR.ma-da-a-a ru-qu-ti ša pa-a-ṭi KUR.bi-ik-ni

ša i-na LUGAL.MEŠ AD.MEŠ-ia mám-ma la ik-bu-su KI-tim ma-a-ti-šú-un

^mši-dir-pa-ar-ni ^me-pa-ar-ni LÚ.EN.URU.MEŠ dan-nu-ti

ša la kit-nu-uš a-na ni-ri šá-a-šú-nu a-di UN.MEŠ-šú-nu

šal-lat-su-nu ka-bit-tu áš-lu-la a-na qé-reb KUR aš-šur.KI

DUMU ^mdEN.ZU-ŠEŠ.MEŠ-eri-ba LUGAL ŠÚ LUGAL KUR aš-šur.KI

DUMU ^mLUGAL-GI.NA LUGAL ŠÚ LUGAL KUR aš-šur.KI

GÌR.NÍTA KÁ.DINGIR.RA.KI LUGAL KUR šu-me-ri u URI.KI

ina u₄-me-šu-ma ina UN.MEŠ ki-šit-ti KUR.KUR

ša ina tu-kul-ti AN.ŠÁR EN-ia ik-šu-da qa-ta-a-a

É.GAL ma-šar-ti šá qé-reb URU.kal-ḫa ša ^mdsál-ma-nu-MAŠ MAN KUR aš-šur

DUMU ^maš-šur-PAP-ir-A NUN a-lik pa-ni-ia e-pu-šú

tam-lu-šá ul ib-ši-ma ṣu-uḫ-ḫu-rat šu-bat-sa

ia-a-ti ^maš-šur-ŠEŠ-SUM.NA MAN KUR aš-šur.KI NUN na-aʾ-du

šin-na-at ABGAL a-da-pà šá iš-ru-ku ru-bu-u ^dnin-ši-kù

ša tam-le-e šu-a-tu ina uz-ni-ia ib-ši-ma uš-ta-bi-la ka-bat-su

qaq-qa-ru ki-šub-ba-a ki-ma a-tar-tim-ma lu aṣ-ba-ta

i-na eš-qí NA₄ KUR-e tam-la-a uš-mal-li

i-na 1 ME 20 ti-ib-ki ul-la-a re-eš-e-šu

É.GAL.MEŠ a-na mu-šab LUGAL-u-ti-ia ab-ta-ni qé-reb-šu

ul-tu uš-ši-šu a-di gaba-dib-e-šu ar-ṣip ú-šak-lil

GIŠ.ÙR.MEŠ GIŠ.EREN MAḪ.MEŠ tar-bit KUR.ḫa-ma-ni ú-šat-ri-ṣa e-li-šin

GIŠ.IG.MEŠ GIŠ.ŠUR.MÌN ša i-ri-si-in DÙG.GA ú-rat-ta-a KÁ.MEŠ-šin

a-na tab-rat kiš-šat UN.MEŠ lu-le-e uš-mal-li

MU.SAR.MEŠ e-pu-uš-ma da-na-an AN.ŠÁR EN-ia

ep-še-et e-tep-pu-šu ṣe-ru-uš-šu ú-šá-áš-ṭir-ma ina qé-reb-šú-un áš-kun

i-na ár-kàt u₄-me i-na u₄-me ṣa-a-ti

NUN EGIR-ú ina LUGAL.MEŠ DUMU.MEŠ-ia an-ḫu-su lu-ud-diš

MU.SAR ši-ṭir šu-mì-ia li-mur-ma UDU.SISKUR BAL-qí Ì.MEŠ ŠÉŠ

šu-mì it-ti šu-me-šu liš-ṭur a-na áš-ri-šu lu-ter

^dnin-urta IBILA ^dEN.LÍL ik-ri-bi-šú i-šem-me

ITI.NE.NE.GAR UD.5.KAM li-mu ^mdAG-be-lí-ú-ṣur LÚ.GAR.KUR URU.BÀD-LUGAL-uk-ka