1 R pls. 43-44 (RINAP 3/1 Sennacherib 34) [Sennacherib][via rinap/sources]
| Obverse | |
| 11 | É.GAL mdEN.ZU-ŠEŠ.MEŠ-eri-ba LUGAL GAL ⸢LUGAL dan-nu LUGAL ŠÚ LUGAL KUR aš-šur.KI LUGAL kib-rat LÍMMU-tim⸣ |
| 22 | mi-gir DINGIR.MEŠ GAL.MEŠ lu-li-mu er-šu ma-⸢al-ku pit-qu-du RE.É.UM ba-ḫu-la-a-ti⸣ |
| 33 | mut-tar-ru-ú UN.MEŠ rap-šá-a-ti a-na-ku d⸢aš-šur AD DINGIR.MEŠ i-na kul-lat ma-li-ki⸣ |
| 44 | ke-niš IGI.BAR-ni-ma UGU gi-mir a-šib pa-rak-ki ú-⸢šar-ba-a GIŠ.TUKUL.MEŠ-ia id-di-nam⸣ |
| 55 | GIŠ.GIDRU i-šar-tu mu-rap-pi-šat mi-iṣ-ri ši-bir-ru la ⸢pa-du-ú a-na šum-qut za-ʾi-ri⸣ |
| 66 | ú-šat-me-eḫ rit-tu-ú-a i-na ta-ḫa-az EDIN mdAMAR.UTU-⸢IBILA-SUM.NA LUGAL KUR.kár-ddun-ía-àš⸣ |
| 77 | LÚ.kal-du ù LÚ.a-ra-me a-di ERIM.ḪI.A ELAM.MA.KI re-ṣi-šú a-bu-biš as-pu-un šu-ú |
| 88 | a-na KUR tam-tim e-diš ip-par-šid-ma DINGIR.MEŠ ma-rak KUR-šú it-ti GÌR.PAD.DU.MEŠ AD.MEŠ-šú |
| 99 | maḫ-ru-ti ul-tu qé-reb KI.MAḪ iḫ-pi-ir-ma UN.MEŠ-⸢šú a-na⸣ qé-reb GIŠ.MÁ.MEŠ |
| 1010 | ú-še-li-ma a-na URU.na-gi-ti ša e-ber-tan ⸢ÍD.mar-rat e-bir-ma i-na áš-ri⸣ |
| 1111 | šu-a-tu i-mid šad-da-šú gi-mir KUR-šú ak-šudud-ma šal-la-⸢tiš am-nu⸣ URU.MEŠ-šú ap-pul aq-qur |
| 1212 | i-na dGIŠ.BAR aq-mu ak-šudud URU.ḫi-rim-mu ù KUR ia-su-bi-gal-la-a-a KUR.el-li-pi |
| 1313 | ú-šal-pit-ma ú-ab-bit da-ád-me-šá ša mlu-li-i LUGAL URU.ṣi-du-un-ni e-kim LUGAL-su |
| 1414 | mtu-ba-aʾ-lu i-na GIŠ.GU.ZA-šú ú-še-šib-ma man-da-at-tu EN-ti-ia ú-kin ṣe-ru-uš-šú |
| 1515 | ú-šal-pit rap-šú na-gu-ú KUR.ia-ú-di mḫa-za-qi-a-ú LUGAL-šu e-mid ab-šá-a-ni |
| 1616 | LÚ.MEŠ URU.tu-mur-ra-a-a a-ši-bu-ut KUR-i mar-ṣi i-na GIŠ.TUKUL ú-šam-qit URU.uk-ku |
| 1717 | a-di nap-ḫar da-ád-me-šú ki-ma DU₆ a-bu-bi ú-ab-bit UN.MEŠ KUR.ḫi-lak-ki a-ši-bu-ut |
| 1818 | ḫur-šá-a-ni a-nar i-na GIŠ.TUKUL URU.MEŠ-šú-nu ap-pul aq-qur i-na dGIŠ.BAR aq-mu |
| 1919 | URU.DU₆-ga-rim-mu ša pa-aṭ KUR.ta-ba-li KUR-ud-ma ú-ter a-na kar-me URU.na-gi-tu |
| 2020 | URU.na-gi-tu-di-iʾ-bi-na KUR.ḫi-il-mu KUR.pil-la-tu KUR.ḫu-pa-pa-a-nu na-ge-e |
| 2121 | ša LUGAL KUR.ELAM.MA.KI ša i-na e-ber-tan A.AB.BA šit-ku-na-at šu-bat-sún ša UN.MEŠ |
| 2222 | KUR.É-mia-kin₇ la-pa-an GIŠ.TUKUL.MEŠ-ia dan-nu-ti DINGIR.MEŠ KUR-šú-un i-na TUŠ.TUŠ-šú-nu |
| 2323 | id-ku-ú tam-tim e-bi-ru-ma ú-ši-bu qé-reb-šú-un i-na GIŠ.MÁ.MEŠ KUR.ḫat-ti |
| 2424 | ša i-na NINA.KI ù URU.DU₆-bar-si-ip e-pu-šú tam-tim lu e-bir URU.MEŠ ša qé-reb |
| 2525 | na-ge-e šá-tu-nu KUR-ud-ma i-na GIŠ.BAR aq-mu UN.MEŠ KUR.É-mia-kin₇ ù DINGIR.MEŠ-šú-nu |
| 2626 | a-di ba-ḫu-la-a-te LUGAL KUR.ELAM.MA.KI áš-lu-lam-ma a-na KUR aš-šur.KI ú-ra-a |
| 2727 | ar-ka KÁ.DINGIR.RA.KI.MEŠ šá it-ti mdAMAR.UTU-IBILA-SUM.NA ú-ṣu-ú in-nab-tu e-lam-taš |
| 2828 | LUGAL KUR.ELAM.MA.KI a-na KÁ.DINGIR.RA.KI il-du-du-nim-ma mšu-zu-bu DUMU mga-ḫúl i-na GIŠ.GU.ZA LUGAL-ti |
| 2929 | UGU-šú-nu ú-še-šib-ma ERIM.MEŠ GIŠ.PAN* GIŠ.GIGIR.MEŠ ANŠE.KUR.RA.MEŠ ki-ṣir LUGAL-ti-ia a-na mé-eḫ-ret |
| 3030 | LUGAL KUR.ELAM.MA.KI ú-ma-ʾe-er ERIM.ḪI.A ma-aʾ-du it-ti DUMU-šú i-du-ku-ma i-tur ar-ka-niš |
| 3131 | šu-nu a-di UNUG.KI iš-tam-di-ḫu dUTU ša ARARMA.KI dGAŠAN-ša-re?-e-ši dGAŠAN-ša-UNUG.KI dna-na-a |
| 3232 | dú-ṣur-a-mat-sa dbe-let-TI.LA dkurun-nam dkaš-ši-tu dIGI.DU DINGIR.MEŠ a-ši-bu-ut |
| 3333 | UNUG.KI a-di NÍG.ŠU-šu-nu NÍG.GA-šú-nu ša la ni-bi iš-lu-lu-ni i-na ta-a-a-ar-ti-šú-nu |
| 3434 | mšu-zu-bu LUGAL KÁ.DINGIR.RA.KI i-na MÈ EDIN bal-ṭu-su ik-šu-da ŠU.II-šú-un e-ri-in-nu |
| 3535 | bi-re-tu id-du-šu-ma a-di maḫ-ri-ia ub-lu-niš-šu i-na KÁ.GAL MURUB₄ URU ša NINA.KI |
| 3636 | ar-ku-su da-bu-ú-ìš LUGAL KUR.ELAM.MA.KI ša re-ṣu-ut KÁ.DINGIR.RA.KI.MEŠ il-li-ku |
| 3737 | a-na KUR-šú lu al-lik URU.MEŠ dan-nu-ti É ni-ṣir-ti-šú ù URU.MEŠ TUR.MEŠ ša li-me-ti-šú-nu |
| 3838 | a-di ne-re-bi ša KUR.É-mbu-na-ak-ki al-me ak-šudud áš-lu-la šal-la-su-un ap-pul |
| 3939 | aq-qur i-na dGIŠ.BAR aq-mu LUGAL ELAM.MA.KI ka-šad URU.MEŠ-šú iš-me-ma im-qu-su ḫat-tum |
| 4040 | si-it-ti UN.MEŠ KUR-šú a-na dan-na-a-ti ú-še-li šu-ú URU.ma-dak-tu URU LUGAL-ti-šú |
| 4141 | e-zib-ma a-na URU.ḫa-i-da-la ša qé-reb šad-di-i iš-ta-kan pa-ni-šu |
| 4242 | a-na URU.ma-dak-te URU LUGAL-ti-šú a-la-ku aq-bi ITI.AB ku-uṣ-ṣu dan-nu ik-šu-dam-ma |
| 4343 | šá-mu-tum la-zi-iz-tum il-lik-ma šal-gu na-ḫal-lum na-at-bak KUR-i a-du-ra ú-ter-ma |
| 4444 | a-na KUR aš-šur.KI aṣ-ba-ta ḫar-ra-na ar-ka LUGAL KUR.e-lam-ti KUR.par-su-áš KUR.an-za-an |
| 4545 | KUR.pa-ši-ru KUR.el-li-pi nap-ḫar KUR.kal-di LÚ.a-ra-me ka-li-šú-un kit-ru GAL-ú |
| 4646 | ik-te-ra it-ti-šú a-di LUGAL KÁ.DINGIR.RA.KI a-na a-ḫa-meš iq-ri-bu-ma a-na e-peš |
| 4747 | MÈ i-na GABA-ia DU-ku-ni i-na e-muq daš-šur EN-ia i-na ta-mir-ti URU.ḫa-lu-le-e* |
| 4848 | it-ti-šú-nu am-da-ḫi-iṣ BAD₅.BAD₅-šú-nu áš-kun 1 ME 50 LIM ERIM.MEŠ MÈ-šú-nu i-na GIŠ.TUKUL |
| 4949 | ú-šam-qit GIŠ.GIGIR.MEŠ GIŠ.ṣu-um-ba-a-ti GIŠ.za-ra-ti LUGAL-ti-šú-nu e-kim-šú-nu-ti |
| 5050 | LÚ.GAL.MEŠ-šú-nu a-di mdAG-MU-GAR-un DUMU mdAMAR.UTU-IBILA-SUM.NA ša i-na GIŠ.GIGIR.MEŠ KÙ.BABBAR |
| 5151 | ⸢ú-šu-uz⸣-zu as-ma-a-ti KÙ.GI tul₅-lu-ú GÍR.MEŠ KÙ.GI šit-ku-nu ù i-na |
| 5252 | ⸢ḪAR⸣.MEŠ KÙ.GI ru-uk-ku-sa rit-ti-šú-un bal-ṭu-su-un qé-reb tam-ḫa-ri ik-šu-da |
| 5353 | ⸢ŠU⸣.II-a-a LUGAL KÁ.DINGIR.RA.KI ù LUGAL KUR.ELAM.MA.KI ḫur-ba-šú MÈ-ia is-ḫup-šú-nu-ti qé-reb |
| 5454 | GIŠ.GIGIR.MEŠ-šú-nu ú-maš-še-ru-ni zu-ú-šú-un e-diš ip-par-šid-du-ma ma-tu-uš-šú-un |
| 5555 | in-nab-tu i-nu-šú É.GAL ku-tal-li ša qé-reb NINA.KI ša a-na šu-te-šur ka-ra-ši |
| 5656 | pa-qa-ad ANŠE.KUR.RA.MEŠ ù sa-na-a-qí mim-ma šum-šú ú-še-pi-šú <LUGAL.MEŠ-ni> a-li-kut maḫ-ri |
| 5757 | AD.MEŠ-e-a ša É.GAL šá-a-tu tam-lu-ú-šá ul ib-ši-ma ṣu-uḫ-ḫu-rat šu-bat-sa |
| 5858 | a-na šu-uš-mur ANŠE.KUR.RA.MEŠ ul šum-du-la KÁ-nu-ú ki-sal-lu la-ba-riš UD.MEŠ |
| 5959 | tem-me-en-šá i-niš-ma it-ru-ra re-šá-a-šá É.GAL šá-a-tu a-na si-ḫir-ti-šá aq-qur |
| 6060 | ki-ma a-tar-tim-ma ki-šub-bu-ú ma-a-du ul-tu qé-reb ú-šal-li lu aṣ-ba-ta |
| 6161 | ṣe-ru-uš-šá uš-rad-di maš-kán É.GAL maḫ-ri-ti e-zib-ma i-na qé-reb ki-šub-bé-e |
| 6262 | ša ul-tu ú-šal-li aṣ-ba-ta tam-la-a uš-mal-li 3 UŠ 20 ti-ib-ki i-na na-al-ban-ia |
| 6363 | GAL-i a-na e-la-ni ú-šaq-qí re-e-su ṣe-er tam-le-e šá-a-tu ša É.GAL.MEŠ-ia |
| 6464 | at-ta-di tem-me-en-šin É.GAL NA₄.pi-i-li GIŠ.ere-ni tam-šil É.GAL KUR.ḫa-at-ti |
| 6565 | ù É.GAL ṣi-ir-tu e-piš-ti KUR aš-šur.KI ša ma-diš šu-tu-ra GAL-a ù šar-ḫa a-na mu-šab |
| 6666 | LUGAL-ti-ia ú-še-piš áš-šu mur-ni-is-qí-ia šuk-nu-še a-na ni-i-ri ù pa-qa-du |
| 6767 | šal-la-at na-ki-ri ka-bit-tu ša ú-šat-li-ma daš-šur ki-sal-la-šá KÁ-nu-ú ma-gal |
| 6868 | uš-rab-bi i-na e-mu-qe ṣi-ra-a-ti ša DINGIR.MEŠ EN.MEŠ-ia LUGAL.MEŠ KUR MAR.TU.KI DÙ-šú-un |
| 6969 | ša a-na GÌR.II-ia ú-šá-ak-ni-šu ú-ma-er-šú-nu-ti ur-tu GIŠ.ÙR.MEŠ GIŠ.ere-ni |
| 7070 | GAL.MEŠ qé-reb KUR.ḫa-ma-nim ik-ši-ṭu a-na NINA.KI i-šu-ṭu-nim-ma ú-šat-ri-ṣa e-li-šin |
| 7171 | GIŠ.IG.MEŠ GIŠ.ŠUR.MÌN li-ia-ri me-ser URUDU ú-rak-kis-ma ú-rat-ta-a ba-bi-šin |
| 7272 | NA₄.dŠE.TIR ša GIM NUMUN qiš-še-e GAR-šú nu-su-qu ma-la NA₄ GÚ aq-ru NA₄ qa-bé-e |
| 7373 | ma-ga-ri ù ri-iḫ-ṣu šu-tu-qi mur-ṣu a-na NA NU TE-e ša ul-tu GÌR KUR.ni-pur |
| 7474 | KUR-i ib-bab-la it-ti NA₄.pi-i-li pe-ṣe-e ša i-na URU.ba-la-ṭa-a-a in-nam-ru |
| 7575 | a-na dALAD.dLAMMA.MEŠ ú-še-piš-ma ú-šá-aṣ-bi-ta SI.GAR-ši-in MUNUS.ÁB.ZA.ZA-a-ti |
| 7676 | NA₄.dŠE.TIR tim-me GIŠ.ere-ni ṣe-ru-ši-in ul-ziz-ma ša É.GAL NA₄.pi-i-li šá-a-tu |
| 7777 | e-mid GAN.DU₇.MEŠ-šá i-na uz-ni ni-kil-ti ša ú-šat-li-ma EN né-me-qí dnin-ši-kù |
| 7878 | ma-la dul-la-a-ti ZABAR ša a-na ḫi-šiḫ-ti É.GAL.MEŠ-ia ša NINA.KI ap-ti-qu |
| 7979 | ki-i ṭè-em DINGIR zi-iʾ-pi ṭi-dí ab-ni-ma URUDU qé-reb-šú áš-pu-uk-ma i-ši-ra |
| 8080 | šip-ru qa-ti-ia u MUNUS.dLAMMA.MEŠ URUDU ma-šá-a-ti as-kup-pu NA₄.dŠE.TIR |
| 8181 | ú-šá-áš-ši-ši-na-ti bi-rit MUNUS.ÁB.ZA.ZA.MEŠ ul-ziz na-bur-riš ú-še-me-ma ú-šá-lik |
| 8282 | as-mì-iš i-na ki-sa-al-li GAL-i šap-la-nu É.GAL NA₄.pi-i-li a-na ri-mit LUGAL-ti-ia |
| 8383 | ša NA₄.dŠE.TIR NA₄.DÚR.MI.NA.BÀN.DA ù NA₄.sa-a-bu ú-še-piš ki-gal-lum 4 tim-me ZABAR |
| 8484 | ša šeš-šá-šú-nu AN.NA bal-lum ṣe-ru-uš-šú ul-ziz-ma i-na da-ap-pi GIŠ.ere-ni ša KI.SAG |
| 8585 | lit-bu-šú ú-šat-ri-ṣa ṣu-lul-šú É.GAL ma-šar-ti ma-gal ú-šar-bi ú-šá-⸢ak-lil⸣-ši |
| 8686 | ú-šar-ri-iḫ-ši a-na tab-rat kiš-šat UN.MEŠ la-la-a uš-mal-liš man-da-at-tu ⸢kul?-lat⸣ KUR.MEŠ |
| 8787 | a-tar-tu ša KUR.ma-da-a-a ru-qu-ti ša i-na LUGAL.MEŠ-ni AD.MEŠ-e-a ma-am-man |
| 8888 | la im-ḫu-ru bi-lat-su-un it-ti GIŠ.ṣu-um-ba-te GIŠ.GIGIR.MEŠ ⸢ru-ku-bi? LUGAL?⸣ KUR?.e-la-mì-i |
| 8989 | LUGAL KÁ.DINGIR.RA.KI ù KUR.kal-di ša ik-šu-da ŠU.II-a-a ⸢it-ti ḫu?-lap?-ti⸣ la mì-nam |
| 9090 | šá ak-ku*-mu a-na na-kam-ti ša É.GAL šá-a-tu ⸢ú-še-bi-lam⸣-ma ú-še-rib qé-reb-šá |
| 9191 | i-na qí-bit daš-šur AD DINGIR.MEŠ ù dNIN.LÍL šar-⸢ra⸣-ti ⸢qé-reb⸣ É.GAL ⸢šá-a-tu⸣ |
| 9292 | i-na ṭu-ub UZU ⸢ḫu-ud lìb⸣-bi ù nu-um-mur pa-ni* ⸢UD.MEŠ?⸣ lu?-šá?-⸢ri?-ka? lu?-uš?-ba?-a?⸣ |
| 9393 | lit-tu-tu li-pu-ú-a du-rí da-rí a-na ⸢u₄-me ru-qu-ti li-ku-nu qé-reb-šá⸣ |
| 9494 | dALAD na-ṣir nap-šá-a-ti DINGIR mu-⸢šal-li-mu ur-ru ù mu-šú a-a ip-par-ku-ú i-da-a-šá⸣ |