BM 022502 (RINAP 3/1 Sennacherib 03, ex. 01) [Sennacherib][via rinap/sources]
| Obverse | |
| 11 | mdEN.ZU-ŠEŠ.MEŠ-eri-ba LUGAL GAL LUGAL dan-nu LUGAL KUR aš-šur.KI LUGAL la šá-na-an RE.É.UM mut-nen-nu-ú pa-liḫ DINGIR.MEŠ GAL.MEŠ |
| 22 | na-ṣir kit-ti ra-ʾi-im mi-šá-ri e-piš ú-sa-a-ti a-lik tap-pu-ut a-ki-i sa-ḫi-ru dam-qa-a-ti |
| 33 | eṭ-lu gít-ma-lum zi-ka-ru qar-du a-šá-red kal ma-al-ki rap-pu la-ʾi-iṭ la ma-gi-ri mu-šab-ri-qu za-ma-a-ni |
| 44 | daš-šur KUR-ú GAL-ú LUGAL-ut la šá-na-an ú-šat-li-ma-an-ni-ma UGU gi-mir a-šib pa-rak-ki ú-šar-ba-a GIŠ.TUKUL.MEŠ-ia |
| 55 | i-na SAG LUGAL-ti-ia ša mdAMAR.UTU-IBILA-SUM.NA LUGAL KUR.kár-dun-ía-áš a-di ERIM.ḪI.A ELAM.MA.KI i-na ta-mir-ti kiš.KI áš-ta-kan BAD₅.BAD₅-šú |
| 66 | i-na MURUB₄ tam-ḫa-ri šu-a-tu e-zib KARAŠ-su e-diš ip-par-šid-ma a-na KUR.gu-zu-um-ma-ni in-na-bit qé-reb ÍD.a-gam-me ù ap-pa-ra-a-te e-ru-um-ma na-piš-tuš e-ṭí-ir |
| 77 | GIŠ.GIGIR.MEŠ GIŠ.ṣu-um-bi ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ ù ANŠE.ud-ri ša i-na qit-ru-ub ta-ḫa-zi ú-maš-ši-ru ik-šu-da ŠU.II-a-a |
| 88 | a-na É.GAL-šú ša qé-reb KÁ.DINGIR.RA.KI ḫa-diš e-ru-um-ma ap-te-e-ma É ni-ṣir-ti-šú KÙ.GI KÙ.BABBAR ú-nu-ut KÙ.GI KÙ.BABBAR NA₄ a-qar-tu mim-ma šum-šu NÍG.ŠU NÍG.GA ni-ṣir-tu ka-bit-tu |
| 99 | DAM-su MUNUS.UN.MEŠ É.GAL-šú LÚ.TIRUM.MEŠ LÚ.man-za-az pa-ni si-ḫir-ti um-ma-a-ni ma-la ba-šu-ú mut-tab-bi-lu-tu É.GAL ú-še-ṣa-am-ma šal-la-tiš am-nu |
| 1010 | aṣ-bat-ma EGIR-šú a-na KUR.gu-zu-um-ma-ni LÚ.mun-daḫ-ṣi-ia a-na qé-reb ÍD.a-gam-me ù ap-pa-ra-a-te ú-ma-ʾe-er-ma 5 u₄-me i-pa-ru-nim-ma ul in-na-mir a-šar-šu |
| 1111 | i-na e-muq daš-šur EN-ia 89 URU.MEŠ-ni dan-nu-ti É BÀD.MEŠ-ni ša KUR.kal-di ù 8 ME 20 URU.MEŠ TUR.MEŠ ša li-<me-ti>-šú-nu al-me ak-šudud áš-lu-la šal-la-su-un |
| 1212 | LÚ.úr-bi LÚ.a-ra-mu ù LÚ.kal-du ša qé-reb UNUG.KI NIBRU.KI kiš.KI ḫur-sag-kalam-ma.KI GÚ.DU₈.A.KI a-di DUMU.MEŠ URU EN ḫi-iṭ-ṭi ú-še-ṣa-am-ma šal-la-tiš am-nu |
| 1313 | mEN-DÙ DUMU LÚ.GAL-DÙ pe-er-ʾi šu-an-na.KI ša GIM mi-ra-a-ni ṣa-aḫ-ri qé-reb É.GAL-ia ir-bu-ú a-na LUGAL-ut KUR EME.GI₇ ù URI.KI áš-ta-kan UGU-šú-un |
| 1414 | i-na ta-a-a-ar-ti-ia LÚ.tu-uʾ-mu-na LÚ.ri-ḫi-ḫu LÚ.ia-daq-qu LÚ.ú-bu-du LÚ.gib-re-e LÚ.ma-li-ḫu LÚ.gu-ru-mu LÚ.ú-bu-lum LÚ.da-mu-nu |
| 1515 | LÚ.gam-bu-lu LÚ.ḫi-in-da-ru LÚ.ru-ʾu-u-a LÚ.pu-qu-du LÚ.ḫa-am-ra-a-nu LÚ.ḫa-ga-ra-nu LÚ.na-ba-tu LÚ.li-iʾ-ta-a-ú LÚ.a-ra-mu la kan-šú mit-ḫa-riš ak-šudud |
| 1616 | 2 ME 8 LIM UN.MEŠ zik-ru u MUNUS 7 LIM 2 ME ANŠE.KUR.RA.MEŠ ANŠE.KUNGA.MEŠ 11 LIM 73 ANŠE.MEŠ 5 LIM 2 ME 30 ANŠE.GAM.MAL.MEŠ 80 LIM 1 ME ⸢GU₄⸣.MEŠ 8 ME LIM 6 ME US₅.UDU.ḪI.A šal-la-tu ka-bit-tu áš-lu-la a-na qé-reb KUR aš-šur.KI |
| 1717 | i-na me-ti-iq ger-ri-ia ša mdAG-EN-MU.MEŠ LÚ.qí-pi URU.ḫa-ra-ra-ti KÙ.GI KÙ.BABBAR GIŠ.mu-suk-kan-ni GAL.MEŠ ANŠE.MEŠ ANŠE.GAM.MAL.MEŠ GU₄.MEŠ ù US₅.UDU.ḪI.A ta-mar-ta-šú ka-bit-tu am-ḫur |
| 1818 | ba-ḫu-la-ti URU.ḫi-rim-me LÚ.KÚR ak-ṣu ša ul-tu ul-la a-na ni-ri-ia la kit-nu-šu i-na GIŠ.⸢TUKUL⸣ ú-šam-qit-ma na-piš-tu ul e-zib |
| 1919 | na-gu-ú šu-a-tu a-na eš-šu-ti aṣ-bat 1-en GU₄ 10 UDU.MEŠ 10 ANŠE GEŠTIN.MEŠ 20 ANŠE ZÚ.⸢LUM⸣.MA re-še-te-šú a-na DINGIR.MEŠ-ni KUR aš-šur.KI EN.MEŠ-ia ú-kin dà-ri-šam |
| 2020 | i-na 2-e ger-ri-ia daš-šur be-lí ú-tak-kil-an-ni-ma a-na KUR LÚ.kaš-ši-i ù KUR ia-su-bi-gal-la-a-a LÚ.KÚR ak-ṣi ša ul-tu ul-la a-na LUGAL.MEŠ-ni AD.MEŠ-ia la kit-nu-šu lu al-lik |
| 2121 | qé-reb ḫur-šá-a-ni zaq-ru-te A.ŠÀ nam-ra-ṣi i-na ANŠE.KUR.RA ar-kab-ma GIŠ.GIGIR GÌR.II-ia i-na ti-ik-ka-a-te ú-šá-áš-ši áš-ru šup-šu-qu i-na GÌR.II-ia ri-ma-niš at-tag-giš |
| 2222 | URU.É-mki-lam-za-aḫ URU dan-nu-ti-šú-nu al-me ak-šudud UN.MEŠ TUR GAL ANŠE.KUR.RA.MEŠ ANŠE.KUNGA.MEŠ ANŠE.MEŠ GU₄.MEŠ ù US₅.UDU.ḪI.A ul-tu qer-bi-šu ú-še-ṣa-am-ma šal-la-tiš am-nu |
| 2323 | URU.MEŠ-šú-nu TUR.MEŠ ⸢ša⸣ ni-ba la i-šu-ú ap-pul aq-qur ú-še-me kar-meš É EDIN kul-ta-ri tu-kul-ti-šú-nu i-na dGIŠ.BAR aq-mu-ma (erasure) di-tal-liš ú-še-mi |
| 2424 | ú-ter-ma URU.É-mki-lam-za-aḫ šu-a-tu a-na bir-tu-ti aṣ-bat UGU ša u₄-me pa-ni ú-dan-nin a-muḫ-ḫuš UN.MEŠ KUR.KUR ki-šit-ti ŠU.II-ia ina lìb-bi ú-še-šib |
| 2525 | UN.MEŠ KUR LÚ.kaš-ši-i ù KUR ia-su-bi-gal-la-a-a ša la-pa-an GIŠ.TUKUL.MEŠ-ia ip-par-ši-du ul-tu qé-reb KUR-i ú-še-ri-dam-ma i-na URU.ḫar-diš-pi URU.É-mku-bat-ti ú-šar-me |
| 2626 | i-na ŠU.II LÚ.šu-ut SAG-ia LÚ.EN.NAM URU.ar-rap-ḫa am-nu-šú-nu-ti NA₄.NA.RÚ.A ú-še-piš-ma li-i-tum ki-šit-ti ŠU.II ša UGU-šú-un áš-tak-ka-nu ṣe-ru-uš-šú ú-šá-áš-ṭir-ma ina qer-bi URU ul-ziz |
| 2727 | pa-an ni-ri-ia ú-ter-ma a-na KUR.el-li-pi aṣ-ṣa-bat ḫar-ra-nu el-la-mu-u-a mis-pa-ba-a-ra LUGAL-šú-un URU.MEŠ-šú dan-nu-ti É ni-ṣir-ti-šú ú-maš-šir-ma a-na ru-qé-e-ti in-na-bit |
| 2828 | gim-ri KUR-šu DAGAL-ti ki-ma MURU₉ as-ḫu-up URU.mar-ú-biš-ti URU.ak-ku-ud-du URU.MEŠ É LUGAL-ti-šú a-di 34 URU.MEŠ dan-nu-ti ù URU.MEŠ TUR.MEŠ ša li-me-ti-šú-nu ša ni-ba la i-šu-ú |
| 2929 | ap-pu-ul aq-qur i-na dGIŠ.BAR aq-mu-ma KIRI₆.MEŠ-šú-nu ak-šiṭ UGU A.GÀR.MEŠ-šú-un ḫab-ṣu-ti šá-ḫur-ra-tum at-bu-uk KUR.el-li-pi a-na paṭ gim-ri-šá ar-bu-ta ú-šá-lik |
| 3030 | UN.MEŠ TUR GAL NITA u MUNUS ANŠE.KUR.RA.MEŠ ANŠE.KUNGA.MEŠ ANŠE.MEŠ GU₄.MEŠ ù US₅.UDU.ḪI.A la mi-nam áš-lu-lam-ma a-di la ba-še₂₀-e ú-šá-lik-šú-nu-ti |
| 3131 | URU.ṣi-⸢ṣi⸣-ir-tu URU.ku-um-⸢ma⸣-aḫ-lum URU.MEŠ dan-nu-ti a-di URU.MEŠ TUR.MEŠ ša li-me-ti-šú-nu KUR.É-bar-ru-ú na-gu-u a-na gi-mir-ti-šú ul-tu qé-reb KUR-šú ab-tuq-ma UGU mi-ṣir KUR aš-šur.KI ú-rad-di |
| 3232 | URU.el-en-za-áš a-na URU LUGAL-ti ù dan-na-at na-ge-e šu-a-tu aṣ-bat-ma MU-šú maḫ-ra-a ú-nak-kir-ma URU.kar-mdEN.ZU-ŠEŠ.MEŠ-eri-ba at-ta-bi ni-bit-su |
| 3333 | i-na ta-a-a-ar-ti-ia ša KUR.ma-da-a-a ru-qu-ti ša i-na LUGAL.MEŠ-ni AD.MEŠ-ia ma-am-man la iš-mu-u zi-kir KUR.MEŠ-šú-un man-da-ta-šú-nu ka-bit-tú am-ḫur a-na ni-ri be-lu-ti-ia ú-šak-ni-su-nu-ti |
| 3434 | i-na u₄-mi-šu-ma NINA.KI ma-ḫa-zu ṣi-i-ru URU na-ram diš-tar ša nap-ḫar ki-du-de-e DINGIR.MEŠ ù dIŠ.TAR.MEŠ ba-šu-ú qé-reb-šu |
| 3535 | tem-me-en-nu da-ru-ú du-ru-uš ṣa-a-ti ša ul-tu ul-la it-ti ši-ṭir bu-ru-um-me eṣ-rat-su eṣ-ret-ma šu-pu-ú ṣi-in-du-šu |
| 3636 | áš-ru nak-lu ⸢šu⸣-bat pi-riš-ti ša mim-ma šum-šu ši-pir ni-kil-ti gi-mir pel-lu-de-e ni-ṣir-ti làl-gar šu-ta-bu-lu qé-reb-šu |
| 3737 | ša ul-tu ul-⸢la⸣ LUGAL.MEŠ-ni a-li-kut maḫ-ri AD.MEŠ-ia ul-la-nu-u-a be-lu-tu KUR aš-šur.KI e-pu-šu-ma ú-ma-ʾe-ru ba-ʾu-lat dEN.LÍL |
| 3838 | ù šat-ti-šam la na-par-ka-a e-reb la nar-ba-a-ti GUN mal-ki kib-rat ar-ba-ʾi im-da-na-aḫ-ḫa-ru qé-reb-šu |
| 3939 | a-a-um-ma i-na lib-bi-šú-nu a-na É.GAL qer-bi-šu kúm-mu ri-mit be-lu-ti ša ṣu-uḫ-ḫur šu-bat-su le-e-su ul i-da-a lib-bu-uš ul iḫ-su-us |
| 4040 | a-na šu-te-šur SILA URU ù šum-dul re-ba-a-ti ḫa-re-e ÍD za-qa-ap ṣip-pa-a-ti ú-zu-un-šu ul ib-ši-ma ul uš-ta-bil ka-ras-su |
| 4141 | ia-a-ti mdEN.ZU-ŠEŠ.MEŠ-eri-ba LUGAL KUR aš-šur.KI e-peš šip-ri šu-a-tu ki-i ṭè-em DINGIR.MEŠ i-na uz-ni-ia ib-ši-ma ka-bat-ti ub-lam-ma |
| 4242 | te-ne-šet KUR.kal-di LÚ.a-ra-mu KUR.man-na-a-a KUR.qu-e ⸢ù⸣ KUR.ḫi-lak-ku ša a-na ni-ri-ia la kit-nu-šu as-su-ḫa-am-ma tup-šik-ki ú-šá-áš-ši-šú-nu-ti-ma il-bi-nu SIG₄ |
| 4343 | a-pe ku-pe-e ša qé-reb KUR.kal-di ak-šiṭ-ma ap-pa-ri-šú-un šam-ḫu-ti ⸢i⸣-na ba-ḫu-la-ti na-ki-ri ki-šit-ti ŠU.II-ia ú-šal-di-da a-na e-peš šip-ri-šá |
| 4444 | É.GAL maḫ-ri-tu ša 3 ME 60 ina 1.KÙŠ UŠ i-na tar-ṣi za-me-e É ziq-qur-rat 80 ina 1.KÙŠ ⸢DAGAL⸣ i-na tar-ṣi É.na-ma-ri É d15 1 ME 34 ⸢ina 1⸣.KÙŠ DAGAL i-na tar-ṣi É.na-ma-ri É-kid₉* (MAŠ)-mu-ri 95 ina 1.KÙŠ DAGAL |
| 4545 | ša LUGAL.MEŠ-ni a-li-kut maḫ-ri AD.MEŠ-ia a-na ri-mì-ti be-lu-ti-šú-un ú-še-pi-šu-ma la ú-nak-ki-lu ši-pir-šá |
| 4646 | ÍD.te-bil-ti a-gu-ú šit-mu-ru ša i-na na-ši-šá ge-gu-né-e qa-bal-ti URU ú-ab-bi-tu-ma ki-maḫ-ḫi-šú-un nak-mu-ti ú-kal-li-mu dUTU-šú |
| 4747 | ù ul-tu UD.MEŠ SÙ.MEŠ ṭe-ḫi É.GAL i-ba-ʾu-ú-ma i-na ILLU-šá gap-ši i-na uš-ši-šá ab-bu ú-šab-šu-u ú-ri-ib-bu tem-me-en-šá |
| 4848 | É.GAL.TUR.RA šá-a-tu a-na si-ḫir-ti-šá aq-qur-ma ša ÍD.te-bil-ti ma-lak-šá uš-te-eš-na-a ab-bu uš-ṭib-ma ú-še-šir mu-ṣu-šá |
| 4949 | qé-reb ka-tim-ti a-sur-rak-ki-šá šap-la-nu GI.MEŠ e-la-niš NA₄.MEŠ KUR-i dan-ni it-ti ESIR.UD.A ak-si-ma A.ŠÀ ul-tu ma-a-me ú-še-lam-ma na-ba-liš ú-ter |
| 5050 | 7 ME ina AS₄.LUM GAL-ti UŠ 1 ME 62 ina AS₄.LUM GAL-ti SAG.KI AN.TA IM.SI.SÁ 2 ME 17 ina AS₄.LUM GAL-ti SAG.KI MURUB₄-tim |
| 5151 | 3 ME 86 ina AS₄.LUM GAL-ti SAG.KI KI.TA IM.U₁₈.LU ÚS.SA.DU ÍD.IDIGNA tam-la-a ú-mal-li-ma am-šu-uḫ me-ši-iḫ-ta |
| 5252 | la-ba-riš UD.MEŠ i-na ILLU kiš-šá-ti tem-me-en-šú la e-né-še as-kup-pat NA₄.pi-i-li rab-ba-a-ti a-sur-ru-šu ú-šá-as-ḫi-ra ú-dan-⸢nin⸣ šu-pu-uk-šú |
| 5353 | MU.SAR-e ši-ṭir šu-mi-ia 1 ME 60 ti-ib-ki tam-li-i qé-reb-šú al-ṭu-ur-ma šap-la-nu i-na uš-ši-šu e-zib aḫ-ra-taš |
| 5454 | ar-ka-nu šu-uš-qu-ú tam-li-i ka-bat-ti ub-lam-ma 20 ti-ib-ki ṣe-er maḫ-ri-i uṣ-ṣip-ma 1 ME 80 ti-ib-ki ú-šaq-qí e-la-niš |
| 5555 | tar-pa-šu-ú el ša u₄-me pa-ni ú-šar-bi ṣe-er me-ši-iḫ-ti É.GAL maḫ-ri-ti ú-rad-di-ma ú-šá-an-di-la ši-kit-taš |
| 5656 | É.GAL ZÚ AM.SI GIŠ.ESI GIŠ.TÚG GIŠ.mu-suk-kan-ni GIŠ.EREN GIŠ.ŠUR.MÌN ŠIM.LI ù GIŠ.bu-uṭ-ni é-gal-zag-di-nu-tuku-a a-na mu-šab LUGAL-ti-ia ú-še-pi-šá qé-reb-šu |
| 5757 | GIŠ.KIRI₆.MAḪ-ḫu tam-šil KUR.ḫa-ma-nim ša gi-mir ŠIM.ḪI.A GURUN ṣip-pa-a-ti GIŠ.MEŠ tuk-lat KUR-i ù KUR.kal-di qé-reb-šu ḫur-ru-šu i-ta-a-šá az-qu-up |
| 5858 | áš-šú za-qa-ap ṣip-pa-a-ti A.ŠÀ ta-mir-ti e-le-en URU 2(BARIG).TA.ÀM a-na DUMU.MEŠ NINA.KI pil-ku ú-pal-lik-ma ú-šad-gi-la pa-nu-uš-šú-un |
| 5959 | a-na miṭ-ra-a-ti šum-mu-ḫi ul-tu pa-a-ṭi URU.ki-si-ri a-di ta-mir-ti NINA.KI KUR-a ⸢ù bi⸣-ru-tú i-na ak-kul-la-te ú-šat-tir-ma ú-še-šir ÍD.ḫar-ru |
| 6060 | 1 1/2 KASKAL.GÍD qaq-qa-ru ul-tu qé-reb ÍD.ḫu-su-ur ma-a-me da-ru-ú-ti a-šar-šá ú-šar-da-a qé-reb ṣip-pa-a-ti šá-ti-na ú-šaḫ-⸢bi⸣-ba pat-ti-iš |
| 6161 | ša NINA.KI URU be-lu-ti-ia šu-bat-su uš-rab-bi re-ba-ti-šú ú-šá-an-dil-ma bi-re-e-ti ù su-qa-a-ni uš-par-di ú-nam-mir GIM u₄-me |
| 6262 | a-na EGIR UD.MEŠ i-na LUGAL.MEŠ-ni DUMU.MEŠ-ia ša daš-šur a-na RE.É.UM-ut KUR ù UN.MEŠ i-nam-bu-u zi-kir-šú e-nu-ma É.GAL šá-a-tu i-lab-bi-ru-ma en-na-ḫu |
| 6363 | an-ḫu-sa lu-ud-diš MU.SAR-e ši-ṭir šu-⸢mi⸣-ia li-mur-ma Ì.GIŠ lip-šu-uš UDU.SISKUR liq-qí a-na áš-ri-šú li-ter daš-šur ik-ri-bi-šu i-šem-me |
| 6464 | 1 UŠ 3.TA.ÀM MU.DIDLI MU.SAR-e ITI.si-bu-⸢ti⸣ lim-mu mdAG-ZU LÚ.GAR.KUR URU.er-ba-ìl |