BM 118936 (RINAP 1 Tiglath-pileser III 39) [Tiglath-pileser III]

É.GAL ^mTUKUL-A-é-šár-ra LUGAL GAL-ú LUGAL dan-nu LUGAL ⸢ŠÚ⸣ LUGAL KUR aš-šur LUGAL KUR šu-me-ri <ù> URI.KI LUGAL kib-rat LÍMMU-[ti]

am-ru ni-iš IGI.II ^d⸢BAD⸣ LUGAL šá ul-tu ṣi-it ^dšam-ši a-di e-reb ^d⸢šam-ši⸣ na-gab za-ma-⸢ni-šu⸣ za-qí-<qí>-iš im-nu-ma

i-be-⸢lu⸣ kiš-šú-tu muš-pél UN.MEŠ KUR AN.TA KI.TA mu-na-ki-ir mal-ki-šú-nu ⸢mu⸣-ki-nu LÚ.GÌR.NÍTA.MEŠ-šú

ul-tu SAG^* LUGAL-ti-ia <a-di 10+x BALA.MEŠ-ia> ul-tu URU.BÀD-ku-ri-gal-zi URU.sip-par šá ^dUTU URU.pa-ṣi-tú šá LÚ.du-na-[ni]

a-di NIBRU.KI LÚ.i-tu-ʾu LÚ.ru-bu-ʾu KUR.a-ru-mu DÙ-šú-nu šá šid-di ÍD.IDIGNA ÍD.su-ra-pi

a-di ÍD.uq-né-e šá a-aḫ tam-tim KI.TA a-⸢bél⸣ i-na UGU DU₆ kam-ri šá URU.ḫu-mut DU₁₁.GA-šú-ni

URU DÙ-uš URU.kar-aš-šur MU-šú ab-bi UN.MEŠ KUR.KUR ki-šit-ti ŠU.<II>-ia₅ ina lìb-bi ú-⸢še⸣-šib LÚ.šu-ut SAG-ia ina muḫ-ḫi áš-⸢kun⸣

KUR.É-^mši-la-a-ni a-na si-ḫir-ti-šú ki-ma ḫaṣ-⸢bat⸣-ti ú-daq-⸢qi⸣-iq URU.sa-ar-ra-ba-a-nu

URU LUGAL-ti-šú-nu GAL-a GIM DU₆ a-bu-bi ú-ab-bit-ma [šal]-la-su áš-lu-la ^mdMUATI-ú-šab-ši LUGAL-šú-nu

mé-eḫ-ret KÁ.GAL URU-šú a-na GIŠ.za-qi-pi ú-še-li-⸢ma⸣ <ú-šad-gi-la> KUR-su DAM-su DUMU.MEŠ-šú DUMU.MUNUS.MEŠ-šú NÍG.GA-⸢šu⸣

ni-ṣir-ti-<<šú>> É.GAL-šú áš-lu-la KUR.É-a-muk-a-ni GIM da-a-a-áš-ti a-di-ìš pu-ḫur UN.MEŠ-šú NÍG.ŠU-šú

a-na KUR aš-šur ú-ra-a ša LÚ.pu-qu-du LÚ.ru-ʾu-ú-a LÚ.li-iʾ-ta-ú BAD₅.BAD₅-šú-nu SÌG-ma

ul-tu áš-ri-šú-nu as-su-ḫa-šú-nu-ti LÚ.a-ru-mu ma-la ba-šu-ú a-na GÌR.II.MEŠ-ia ú-šék-niš-ma

LÚ.⸢ERIM⸣.MEŠ LUGAL-šú-nu aṣ-bat KUR.kar-dun-ia-áš a-bél UGU LÚ.ra-aʾ-sa-a-ni ša KUR.kal-di

⸢GUN⸣ ma-da-tu ú^*-kín a-na aš-šur ^dše-ru-u₈-a EN ^dNUMUN.DÙ-ti ^dAG ^dtaš-me-tum ^dna-na-a

be-let KÁ.DINGIR.RA.KI ^dU.GUR ^dla-aṣ UDU.SISKUR.MEŠ KÙ.MEŠ i-na ḫur-sag-kalam-ma.KI aq-qí

KUR.É-ḫa-am-ban KUR.su-mur-zu KUR.É-ba-ar-ru-a KUR.É-zu-al-za-áš KUR.É-ma-at-ti URU.ni-qu šá KUR.tup-li-áš

KUR.É-tar-an-za-a-a KUR.par-su-a KUR.É-kap-si a-di URU.zak-ru-ti šá KUR.ma-da-a-a KAL.MEŠ-te a-bél

⸢2^?⸣ LÚ.šu-ut SAG.MEŠ-ia LÚ.EN.NAM.MEŠ UGU-šú-⸢nu áš-kun⸣ ma-da-tu ša LÚ.EN.URU.MEŠ ša KUR.ma-da-a-a

a-di KUR.bi-ik-ni ⸢am-ḫur⸣ ^msa-ar-da-ur-⸢ri⸣ KUR.ur-ar-ṭa-a-a it-ti-ia BAL-ma it-ti ^mma-ti-ʾi-ìl

iš-ku-na pi-i-šú i-na ⸢KUR⸣.kiš-⸢ta⸣-an ù KUR.ḫal-pi ⸢na⸣-ge-e šá URU.ku-mu-ḫi BAD₅.BAD₅-šú SÌG-aṣ-ma

nap-ḫar KARAŠ-šú KAR-šú na-mur-⸢rat GIŠ⸣.TUKUL.MEŠ-ia ip-làḫ-ma a-⸢na⸣ šu-zu-ub ZI.MEŠ-šú e-de-nu-uš-šú iḫ-liq

i-na URU.ṭu-ru-uš-pa-⸢a⸣ URU-šú ⸢e⸣-sir-šú-ma di-ik-ta-šú ⸢ma⸣-ʾa-at-tu i-na IGI KÁ.GAL.MEŠ-šú a-duk

ṣa-lam LUGAL-ti-ia i-⸢na⸣ tar-ṣi URU.⸢ṭu⸣-ru-uš-pa-a ul-ziz ⸢70 KASKAL.GÍD⸣ qaq-qa-ru ina KUR.ur-ar-ṭi rap-ši

ul-tu e-liš a-di šap-liš e-tel-liš DU.DU-ak-ma ma-ḫi-ra ul i-ši KUR.ul-lu-ba a-na gi-mir-ti-šu

URU.bi-tir-⸢ru⸣ URU.pa-ri-su URU.ta-šu-ḫa URU.ma-an-ṭu-⸢un⸣ URU.sa-ar-da-ur-ri-a-na

URU.di-⸢ul⸣-la-a-na-na-al URU.si-kib-⸢sa⸣ URU.a-šur-da-a-a ⸢URU⸣.ba-bu-ut-ta URU.lu-si-a URU.tap^*-si-a

⸢bi⸣-ra-a-te šá KUR.ur-ar-ṭi šá ku-tal KUR.⸢na⸣-al a-na mi-ṣir KUR aš-šur ú-ter-ra ina qé-reb KUR.ul-lu-ba

URU DÙ-uš URU.aš-šur-BA-šá MU-šú ab-bi LÚ.⸢šu⸣-ut SAG.MEŠ-ia LÚ.EN.NAM i-na muḫ-ḫi áš-kun

URU.e-nu URU.sa-as-su URU.lu-up-⸢sa⸣ URU.lu-qi-a URU.ši-mir-ra URU.ú-šur-nu URU.ú-zu-ur-ra

URU.a-ú-i-bi URU.ú-bu-la a-di ⸢KUR⸣.bi-ir-da-šu KUR-i ina UGU NAM LÚ.GAL.BI.LUL ú-rad-⸢di⸣

URU.qu-ta URU.ur-ra URU.a-ra-na URU.ta-⸢su⸣ URU.ú-al-li-a a-di UGU ÍD.BURANUN.KI

mi-ṣir URU.ku-um-mu-ḫi URU.qi-li-⸢is⸣-sa URU.e-ze-e-da URU.di-ú-a-ap-li

URU.ab-bi-is-sa URU.ḫa-ar-bi-si-in-na ⸢URU⸣.ta-sa KUR.en-zi URU.an-ga-nu URU.bé-en-zu

bi-ra-a-te šá KUR.ur-ar-ṭi ÍD.kal-la-x ÍD-šu KUR-⸢ud⸣ a-na mi-ṣir KUR aš-šur ú-ter-ra

i-na UGU NAM É LÚ.tur-ta-ni ù ⸢NAM⸣ KUR.na-ʾi-⸢i⸣-ri ú-ra-ad-di