DT 003 (RINAP 1 Tiglath-pileser III 51) [Tiglath-pileser III]

[É.GAL ^mtukul-ti-A]-⸢é⸣-šár-ra LUGAL GAL-u LUGAL dan-nu LUGAL KIŠ LUGAL KUR aš-šur LUGAL KÁ.DINGIR.KI LUGAL KUR šu-me-ri u URI.KI LUGAL kib-rat LÍMMU-ti

[GURUŠ qar-du ša ina tu-kul]-⸢ti⸣ aš-šur EN-šú kul-lat la ma-gi-ri-šu GIM ḫaṣ-bat-ti ú-daq-qi-qu a-bu-biš is-pu-nu-ma zi-qi-qiš im-nu-u

[LUGAL šá ina zi-kir aš-šur ^d]⸢šá⸣-maš u ^dAMAR.UTU DINGIR.MEŠ GAL.MEŠ DU.MEŠ-ma ul-tu ÍD.mar-ra-ti ša É-^mia-ki-ni a-di KUR.bi-ik-ni ša KUR ^dšam-ši

[ù tam-tim ša šul-mi] ⸢^d⸣šam-ši a-di KUR.mu-uṣ-ri ul-tu AN.ÚR a-di AN.PA KUR.KUR.MEŠ i-pe-lu-ma e-pu-šu šar-ru-us-si-in

[ul-tu] ⸢SAG⸣ LUGAL-ti-ia a-di 17 BALA.MEŠ-ia KUR.i-tu-ʾu KUR.ru-bu-ʾu LÚ.ḫa-mar-a-nu LÚ.lu-ḫu-ú-a-tu LÚ.ḫa-tal-lu LÚ.ru-ub-bu

[LÚ.ra-pi]-⸢qu⸣ LÚ.na-ba-tu LÚ.gu-ru-mu LÚ.du-na-nu LÚ.ú-bu-lu LÚ.ru-ʾu-ú-a LÚ.li-iʾ-ta-a-ú LÚ.ma-ru-su URU.BÀD-ku-ri-gal-zu

[URU.a-di-in]-⸢ni⸣ URU.bir-tu ša sa-ra-gi-ti URU.bir-tu ša la-ab-na-at LÚ.a-ru-mu DÙ-šú-nu ša šid-di ÍD.IDIGNA ÍD.A.ŠÌTA

[ù ÍD.su]-rap-pi ÍD.uq-né-e a-di tam-tim šap-li-ti ša KUR ^dšam-ši ak-šud a-na mi-ṣir KUR aš-šur ú-ter-ra

[LÚ.šu-ut SAG]-ia LÚ.EN.NAM UGU-šú-nu áš-kun i-na ZIMBIR.KI NIBRU.KI KÁ.DINGIR.RA.KI bár-sipa.KI GÚ.DU₈.A.KI kiš.KI dil-bat.KI UNUG.KI

[ma-ḫa-zi la šá-na]-⸢an⸣ UDU.SISKUR.MEŠ KÙ.MEŠ a-na ^dEN ^dzar-pa-ni-tum ^dAG ^dtaš-me-tum ^dU.GUR u ^dla-aṣ DINGIR.MEŠ EN.MEŠ-ia aq-qi-ma ú-qa-i-šá qi-šá-a-ti

[KUR.kár-^ddu]-ni-áš DAGAL-tu a-bél-ma e-pu-šá šar-ru-us-sa

[KUR.É-^msi-la]-⸢a⸣-ni KUR.É-^msa-ʾa-al-li a-na paṭ gim-ri-šú-nu as-su-<ḫa>-am-ma ^mdAG-ú-šab-ši ^mza-qi-ru LUGAL.MEŠ-šú-nu qa-ti ik-⸢šud⸣

[URU.sa-ar-rab-a]-⸢nu URU⸣.tar-ba-ṣu URU.ia-bal-lu URU.BÀD-^dKASKAL.KUR-a-a URU.ma-li-la-tu URU LUGAL-ti-šu-nu GAL.MEŠ

[i-na ši-pi-ik SAḪAR.ḪI].A ù GIŠ.šu-pi-i ak-šud 1 ME 50 LIM 5 LIM UN.MEŠ a-di mar-ši-ti-šú-nu

[NÍG.ŠU-šú-nu NÍG.GA]-⸢šú⸣-nu MÁŠ.ANŠE-šú-nu a-na la ma-ni áš-lu-la KUR.KUR.MEŠ šu-a-ti-na a-na mi-ṣir KUR aš-šur ú-ter-⸢ra⸣

[KUR.É-^ma-muk-ka-a-ni] ⸢ú⸣-daq-qi-iq-ma UKKIN UN.MEŠ-šú a-na KUR aš-šur.KI ú-ra-a ^mGIN-NUMUN LUGAL-šú-nu ina URU.sa-pi-ia URU-šú e-⸢sir⸣-[šú]

[URU.ḫi-li-im-mu URU.pi-il-lu-tu ša] ⸢pat⸣-ti KUR.e-lam-ti a-na mi-ṣir KUR aš-šur.KI ú-ter-ra ina ŠU.II LÚ.šu-ut SAG-ia LÚ.GAR.KUR URU.LÍMMU-ḫa am-⸢nu⸣

[ma-da-tu ša LÚ.ra-aʾ-sa-a-ni] ša KUR.kal-di ša ^mba-la-si DUMU ^mda-ku-ri ^mna-di-ni UD.UD.AG.KI-a-[a]

[(ù) ^mdAMAR.UTU-A-SUM.NA DUMU ^mia-ki]-⸢ni⸣ LUGAL KUR tam-tim KÙ.GI e-per KUR-i-šú KÙ.BABBAR ni-siq-ti NA₄.MEŠ GIŠ.ESI GIŠ.e-lu-tu GU₄.MEŠ ṣe-⸢e-ni⸣ [am-ḫur]

[KUR.nam-ri KUR.É-sa-an-gi-bu-ti KUR.É-ḫa]-⸢an⸣-ban KUR.su-mur-⸢zu⸣ KUR.É-bar-ru-a ⸢KUR.É-zu-al-za-áš⸣ [...]