BM 121005 (RINAP 4 Esarhaddon 001, ex. 01) [Esarhaddon][via rinap/sources]
| Obverse | |
| Column i | |
| i 1i 1 | É.GAL mdaš-šur-ŠEŠ-SUM.NA LUGAL GAL-ú LUGAL dan-nu |
| i 22 | LUGAL kiš-šá-ti LUGAL KUR aš-šur.KI GÌR.NÍTA KÁ.DINGIR.RA.KI |
| i 33 | LUGAL KUR EME.GI₇ u URI.KI LUGAL kib-rat LÍMMU-ti |
| i 44 | re-ʾu-um ke-e-nu mi-gir DINGIR.MEŠ GAL.MEŠ |
| i 55 | ša ul-tu ṣe-ḫe-ri-šú daš-šur dUTU dEN u dAG |
| i 66 | d15 ša URU.ni-nu-a d15 šá URU.LÍMMU-DINGIR |
| i 77 | a-na LUGAL-ti KUR aš-šur.KI ib-bu-ú zi-kir-šú |
| i 88 | ša ŠEŠ.MEŠ-ia GAL.MEŠ ŠEŠ-šú-nu ṣe-eḫ-ru a-na-ku |
| i 99 | ina qí-bit daš-šur d30 dUTU dEN ù dAG |
| i 1010 | d15 šá URU.ni-nu-a d15 šá URU.LÍMMU-DINGIR AD ba-nu-u-a |
| i 1111 | ina UKKIN ŠEŠ.MEŠ-ia SAG.MEŠ-ia ke-niš ul-li-ma |
| i 1212 | um-ma an-nu-ú ma-a-ru ri-du-ti-ia |
| i 1313 | dUTU u dIŠKUR ina bi-ri i-šal-ma an-nu ke-e-nu |
| i 1414 | i-pu-lu-šu-ma um-ma šu-ú te-nu-u-ka |
| i 1515 | zi-kir-šú-nu kab-tu it-ta-ʾi-id-ma UN.MEŠ KUR aš-šur.KI TUR GAL |
| i 1616 | ŠEŠ.MEŠ-ia NUMUN É AD-ia iš-te-niš ú-pa-ḫir |
| i 1717 | ma-ḫar daš-šur d30 dUTU dAG dAMAR.UTU DINGIR.MEŠ KUR aš-šur.KI |
| i 1818 | DINGIR.MEŠ a-ši-bu-te AN-e u KI-tim áš-šú na-ṣar ri-du-ti-ia |
| i 1919 | zi-kir-šú-un kab-tu ú-šá-az-ki-ir-šu-nu-ti |
| i 2020 | ina ITI šal-me u₄-me še-me-e ki-i qí-bi-ti-šu-nu ṣir-ti |
| i 2121 | ina É ri-du-ú-ti áš-ri šug-lud-di ša ši-kìn LUGAL-ti |
| i 2222 | ina lìb-bi-šú ba-šu-ú ḫa-diš e-ru-um-ma |
| i 2323 | ri-id-du qí-nu UGU ŠEŠ.MEŠ-ia it-ta-bik-ma |
| i 2424 | ša DINGIR.MEŠ ú-maš-šir-u-ma a-na ep-še-ti-šú-nu šur-ru-ḫa-a-ti |
| i 2525 | it-tak-lu-ma i-kap-pu-du le-mut-tu |
| i 2626 | EME ḪUL-tim kar-ṣi taš-gir-ti ki-i la lìb-bi DINGIR.MEŠ |
| i 2727 | UGU-ia ú-šab-šu-ma sur-ra-a-ti la šal-ma-a-ti |
| i 2828 | EGIR-ia id-da-nab-bu-bu ze-ra-a-ti |
| i 2929 | pa-áš-ru lìb-bi AD-ia šá la DINGIR.MEŠ ú-ze-en-nu-u KI-ia |
| i 3030 | šap-la-a-nu lìb-ba-šu re-e-mu ra-ši-šu-ma |
| i 3131 | a-na e-peš LUGAL-ti-ia šit-ku-na IGI.II-šu |
| i 3232 | it-ti lìb-bi-ia a-tam-mu-ma uš-ta-bi-la ka-bat-ti |
| i 3333 | um-ma ep-še-ti-šú-nu šur-ru-ḫa-a-ma a-na ṭè-e-me ra-ma-ni-šu-nu |
| i 3434 | tak-lu-ma šá la DINGIR.MEŠ mi-na-a ip-pu-šu |
| i 3535 | daš-šur LUGAL DINGIR.MEŠ réme-nu-u dAMAR.UTU šá nu-ul-la-a-ti ik-kib-šu-un |
| i 3636 | i-na ik-ri-bi ut-nen-ni ù la-ban ap-pi |
| i 3737 | ú-ṣal-li-šú-nu-ti-ma im-gu-ru qí-bé-e-ti |
| i 3838 | ki-i ṭè-em DINGIR.MEŠ GAL.MEŠ EN.MEŠ-ia la-pa-an ep-šet ḪUL-tim |
| i 3939 | a-šar ni-ṣir-ti ú-še-ši-bu-ni-ma ṣu-lul-šú-nu DÙG.GA |
| i 4040 | UGU-ia it-ru-ṣu-ma iṣ-ṣu-ru-in-ni a-na LUGAL-u-ti |
| i 4141 | ar-ka-a-nu ŠEŠ.MEŠ-ia im-ma-ḫu-ma mim-ma ša UGU DINGIR.MEŠ |
| i 4242 | ù a-me-lu-ti la DÙG.GA e-pu-šu-ma ik-pu-du le-mut-tú |
| i 4343 | is-se-ḫu-ma GIŠ.TUKUL.MEŠ ina qé-reb NINA.KI ba-lu DINGIR.MEŠ |
| i 4444 | a-na e-peš LUGAL-u-ti it-ti a-ḫa-meš it-tak-ki-pu la-la-ʾi-iš |
| i 4545 | daš-šur d30 dUTU dEN dAG d15 šá NINA.KI d15 šá URU.LÍMMU-DINGIR |
| i 4646 | ep-šet LÚ.ḫa-am-ma-ʾe-e šá ki-i la lìb-bi DINGIR.MEŠ in-né-ep-šú |
| i 4747 | lem-niš it-ta-aṭ-lu-ma i-da-šu-un ul i-zi-zu |
| i 4848 | e-mu-qa-šu-un lil-lu-ta ú-šá-lik-ú-ma |
| i 4949 | šap-la-nu-ú-a ú-šak-me-su-šu-nu-ti |
| i 5050 | UN.MEŠ KUR aš-šur.KI šá a-de-e ma-mit DINGIR.MEŠ GAL.MEŠ |
| i 5151 | a-na na-ṣar LUGAL-ti-ia ina A.MEŠ ù Ì.GIŠ it-mu-ú |
| i 5252 | ul il-li-ku re-ṣu-us-su-un |
| i 5353 | a-na-ku mdaš-šur-PAP-AŠ ša ina tu-kul-ti DINGIR.MEŠ GAL.MEŠ EN.MEŠ-šú |
| i 5454 | ina qé-reb ta-ḫa-zi la i-né-eʾ-ú i-rat-su |
| i 5555 | ep-še-ti-šú-nu lem-né-e-ti ur-ru-ḫi-iš áš-me-e-ma |
| i 5656 | u₈-a aq-bi-ma ṣu-bat ru-bu-ti-ia ú-šar-riṭ-ma |
| i 5757 | ú-šá-aṣ-ri-ḫa si-pit-tu lab-biš an-na-dir-ma iṣ-ṣa-ri-iḫ ka-bat-ti |
| i 5858 | áš-šú e-peš LUGAL-u-ti É AD-ia ar-pi-sa rit-ti-ia |
| i 5959 | a-na daš-šur d30 dUTU dEN dAG u dU.GUR d15 šá NINA.KI d15 šá URU.LÍMMU-DINGIR |
| i 6060 | qa-ti áš-ši-ma im-gu-ru qí-bi-ti ina an-ni-šú-nu ke-nim |
| i 6161 | UZU ta-kil-ti iš-tap-pa-ru-nim-ma a-lik la ka-la-a-ta |
| i 6262 | i-da-a-ka ni-it-tal-lak-ma ni-na-a-ra ga-re-e-ka |
| i 6363 | 1-en u₄-me 2 u₄-me ul uq-qí pa-an ERIM.ḪI.A-ia ul ad-gul |
| i 6464 | ar-ka-a ul a-mur pi-qit-ti ANŠE.KUR.RA.MEŠ ṣi-mit-ti GIŠ.ŠUDUN |
| i 6565 | ù ú-nu-ut MÈ-ia ul a-šu-ur ṣi-di-it ger-ri-ia ul áš-pu-uk |
| i 6666 | šal-gu ku-uṣ-ṣu ITI.ZÍZ dan-na-at EN.TE.NA ul a-dur |
| i 6767 | ki-ma u₅-rí-in-ni mu-up-pa-ar-ši |
| i 6868 | a-na sa-kap za-ʾi-ri-ia ap-ta-a i-da-a-a |
| i 6969 | ḫar-ra-an NINA.KI pa-áš-qí-iš u ur-ru-ḫiš ar-de-e-ma |
| i 7070 | el-la-mu-u-a ina KI-tim KUR.ḫal-ni-gal-bat gi-mir qu-ra-di-šú-un MAḪ.MEŠ |
| i 7171 | pa-an ger-ri-ia ṣab-tu-ma ú-šá-ʾa-lu GIŠ.TUKUL.MEŠ-šú-un |
| i 7272 | pu-luḫ-ti DINGIR.MEŠ GAL.MEŠ EN.MEŠ-ia is-ḫup-šú-nu-ti-ma |
| i 7373 | ti-ib MÈ-ia dan-ni e-mu-ru-ma e-mu-ú maḫ-ḫu-tíš |
| i 7474 | diš-tar be-let MURUB₄ u MÈ ra-aʾ-i-mat šá-an-gu-ti-ia |
| i 7575 | i-da-a-a ta-zi-iz-ma GIŠ.PAN-su-nu taš-bir |
| i 7676 | ta-ḫa-za-šú-nu ra-ak-su tap-ṭu-ur-ma |
| i 7777 | ina UKKIN-šu-nu iq-bu-ú um-ma an-nu-u LUGAL-a-ni |
| i 7878 | ina qí-bi-ti-šá ṣir-ti i-da-a-a it-ta-na-as-ḫa-ru ti-bu-u EGIR-a-a |
| i 7979 | ka-lu-meš i-dak-ka-ku ú-ṣal-lu-u be-lu-ti |
| i 8080 | UN.MEŠ KUR aš-šur.KI šá a-de-e MU DINGIR.MEŠ GAL.MEŠ ina muḫ-ḫi-ia iz-ku-ru |
| i 8181 | a-di maḫ-ri-ia il-li-ku-nim-ma ú-na-áš-ši-qu GÌR.II-ia |
| i 8282 | ù šu-nu LÚ.ḫa-am-ma-ʾe-e e-piš si-ḫi ù bar-ti |
| i 8383 | ša a-lak ger-ri-ia iš-mu-u-ma LÚ.ERIM.MEŠ tuk-la-te-šú-nu e-zib-u-ma |
| i 8484 | a-na KUR NU ZU-ú in-nab-tú ak-šu-dam-ma ina KAR ÍD.IDIGNA |
| i 8585 | ina qí-bit d30 dUTU DINGIR.MEŠ EN ka-a-ri |
| i 8686 | gi-mir ERIM.ḪI.A-ia ÍD.IDIGNA DAGAL-tum a-tap-piš ú-šá-áš-ḫi-iṭ |
| i 8787 | ina ITI.ŠE ITI mit-ga-ri UD.8.KÁM UD.ÈŠ.ÈŠ šá dAG |
| Column ii | |
| ii 1ii 1 | ina qé-reb NINA.KI URU be-lu-ti-ia ḫa-diš e-ru-um-ma |
| ii 22 | ina GIŠ.GU.ZA AD-ia ṭa-biš ú-ši-ib |
| ii 33 | i-zi-qam-ma IM.U₁₈.LU ma-nit dé-a |
| ii 44 | šá-a-ru ša a-na e-peš LUGAL-ti za-aq-šú ṭa-a-ba |
| ii 55 | uk-ki-pa-nim-ma i-da-at dum-qí ina šá-ma-me u qaq-qa-ri |
| ii 66 | ši-pir maḫ-ḫe-e na-áš-par-ti DINGIR.MEŠ u diš-tar |
| ii 77 | ka-a-an ú-šad-di-ru-u-ni ú-šar-ḫi-ṣu-u-ni lìb-bu |
| ii 88 | LÚ.ERIM.MEŠ EN ḫi-ṭi ša a-na e-peš LUGAL-ti KUR aš-šur.KI |
| ii 99 | a-na ŠEŠ.MEŠ-ia ú-šak-pi-du le-mut-tu |
| ii 1010 | pu-ḫur-šu-nu ki-ma iš-tén a-ḫi-iṭ-ma an-nu kab-tú e-mid-su-nu-ti-ma |
| ii 1111 | ú-ḫal-li-qa NUMUN-šu-un |
| ii 1212 | a-na-ku daš-šur-ŠEŠ-SUM.NA LUGAL kiš-šá-ti LUGAL KUR aš-šur.KI |
| ii 1313 | zi-ka-ru qar-du a-šá-red kal ma-al-ki |
| ii 1414 | DUMU md30-PAP.ME-SU LUGAL KIŠ LUGAL KUR aš-šur.KI |
| ii 1515 | DUMU mLUGAL-GI.NA LUGAL KIŠ LUGAL KUR aš-šur.KI-ma |
| ii 1616 | bi-nu-ut daš-šur dNIN.LÍL na-ram d30 u dUTU |
| ii 1717 | ni-šit dAG dAMAR.UTU mi-gir diš-tar šar-ra-ti |
| ii 1818 | ḫi-šiḫ-ti DINGIR.MEŠ GAL.MEŠ le-ʾu-um it-pe-šú |
| ii 1919 | ḫa-as-su mu-du-ú ša a-na ud-du-uš DINGIR.MEŠ GAL.MEŠ |
| ii 2020 | ù šuk-lul eš-re-e-ti ša kul-lat ma-ḫa-zi |
| ii 2121 | DINGIR.MEŠ GAL.MEŠ iš-šu-u-šu a-na LUGAL-ti ba-nu-u É daš-šur |
| ii 2222 | e-piš é-sag-gíl u KÁ.DINGIR.RA.KI mu-ud-di-iš DINGIR.MEŠ u diš-tar |
| ii 2323 | šá qé-reb-e-šú ša DINGIR.MEŠ KUR.KUR šal-lu-u-ti ul-tu qé-reb URU.aš-šur |
| ii 2424 | a-na áš-ri-šú-nu ú-ter-ru-ú-ma ú-še-ši-bu šub-tu ni-iḫ-tum |
| ii 2525 | a-di É.KUR.RA.MEŠ ú-šak-lil-u-ma DINGIR.MEŠ i-na BÁRA-šu-nu |
| ii 2626 | ú-šar-mu-ú šu-bat da-ra-a-ti ina tu-kul-ti-šú-nu GAL-ti |
| ii 2727 | ul-tu ṣi-it dUTU-ši a-di e-reb dUTU-ši šal-ṭiš at-tal-lak-u-ma |
| ii 2828 | ma-ḫi-ra ul i-ši ma-al-ki ša kib-rat LÍMMU-ti ú-šak-ni-šú še-pu-u-a |
| ii 2929 | KUR a-na daš-šur iḫ-ṭu-ú ú-ma-ʾe-ru-in-ni ia-a-ši |
| ii 3030 | daš-šur AD DINGIR.MEŠ šu-ud-du-ú ù šu-šu-bu |
| ii 3131 | mi-ṣir KUR aš-šur.KI ru-up-pu-šú ú-ma-al-la-a ŠU.II-u-a |
| ii 3232 | d30 EN AGA du-un-ni zik-ru-u-ti ma-le-e ir-ti i-šim ši-ma-ti |
| ii 3333 | dUTU ZÁLAG DINGIR.MEŠ ni-bit MU-ia kab-ti a-na re-še-e-ti ú-še-ṣi |
| ii 3434 | dAMAR.UTU MAN DINGIR.MEŠ pu-luḫ-ti LUGAL-ti-ia ki-ma im-ba-ri kab-ti |
| ii 3535 | ú-šá-as-ḫi-pu KUR.MEŠ-e kib-ra-a-ti |
| ii 3636 | dU.GUR dan-dan-ni DINGIR.DINGIR uz-zu na-mur-ra-tum |
| ii 3737 | ù šá-lum-ma-tum iš-ru-ka ši-rik-ti |
| ii 3838 | diš-tar be-let MURUB₄ u MÈ GIŠ.PAN dan-na-tum |
| ii 3939 | GIŠ.šil-ta-ḫu šam-ru i-qi-šá-an-ni a-na qiš-ti |
| ii 4040 | ina u₄-me-šu-ma mdAG-NUMUN-ZI-SI.SÁ DUMU mdAMAR.UTU-A-AŠ LÚ.GAR KUR tam-tim |
| ii 4141 | la na-ṣir a-de-e la ḫa-si-is MUN ša KUR aš-šur.KI |
| ii 4242 | ṭa-ab-tú AD-ia in-ši-ma ina da-li-iḫ-ti KUR aš-šur.KI |
| ii 4343 | ERIM.ḪI.A-šú ù KARAŠ-su id-ke-e-ma a-na mdnin-gal-SUM.NA |
| ii 4444 | LÚ.GAR.KUR ŠEŠ.UNUG.KI ARAD da-gíl pa-ni-ia ni-i-tu il-me-šu-ma |
| ii 4545 | iṣ-ba-tu mu-ṣa-a-šú iš-tu daš-šur dUTU dEN u dAG d15 šá NINA.KI |
| ii 4646 | d15 šá URU.LÍMMU-DINGIR ia-a-ti mdaš-šur-PAP-AŠ i-na GIŠ.GU.ZA AD-ia |
| ii 4747 | ṭa-biš ú-še-ši-bu-ni-ma be-lut KUR.KUR ú-šad-gi-lu pa-ni-ia |
| ii 4848 | šu-ú ul ip-làḫ na-de-e a-ḫi ul ir-ši-ma ar-di ul ú-maš-šir |
| ii 4949 | ù LÚ.rak-bu-šú a-di maḫ-ri-ia ul iš-pu-ram-ma |
| ii 5050 | šul-mu LUGAL-ti-ia ul iš-al ep-še-te₉-e-šú lem-né-e-ti |
| ii 5151 | ina qé-reb NINA.KI áš-me-e-ma lìb-bi i-gug-ma iṣ-ṣa-ri-iḫ ka-bat-ti |
| ii 5252 | LÚ.šu-ut SAG.MEŠ-ia LÚ.NAM.MEŠ šá pa-a-ṭi KUR-šu |
| ii 5353 | ú-ma-ʾe-er ṣe-ru-uš-šú ù šu-ú mdAG-NUMUN-ZI-SI.SÁ |
| ii 5454 | ba-ra-nu-ú na-bal-kàt-ta-nu a-lak ERIM.ḪI.A-ia iš-me-e-ma |
| ii 5555 | a-na KUR.ELAM.MA.KI še-la-biš in-na-bit áš-šú ma-mit DINGIR.MEŠ GAL.MEŠ |
| ii 5656 | ša e-ti-qu daš-šur d30 dUTU dEN ù dAG |
| ii 5757 | an-nu kab-tu e-mì-du-šu-ma qé-reb KUR.ELAM.MA.KI i-na-ru-uš ina GIŠ.TUKUL |
| ii 5858 | mna-ʾi-id-mar-duk ŠEŠ-šú ep-šet KUR.ELAM.MA.KI šá ana ŠEŠ-šú e-tep-pu-šú |
| ii 5959 | e-mur-ma ul-tu KUR.ELAM.MA.KI in-nab-tam-ma |
| ii 6060 | a-na e-peš ARAD-ti-ia a-na KUR aš-šur.KI il-lik-am-ma |
| ii 6161 | ú-ṣal-la-a be-lu-ú-ti |
| ii 6262 | KUR tam-tim a-na si-ḫi-ir-ti-šá ri-du-ut ŠEŠ-šú ú-šad-gíl pa-nu-uš-šú |
| ii 6363 | šat-ti-šam-ma la na-par-ka-a it-ti ta-mar-ti-šú ka-bit-tu |
| ii 6464 | a-na NINA.KI il-lak-am-ma ú-na-áš-šá-qa GÌR.II-ia |
| ii 6565 | mab-di-mil-ku-ut-ti LUGAL URU.ṣi-dun-ni |
| ii 6666 | la pa-lìḫ be-lu-ti-ia la še-mu-u zi-kir šap-ti-ia |
| ii 6767 | ša UGU tam-tim gal-la-tim it-tak-lu-ma is-lu-u GIŠ.ŠUDUN daš-šur |
| ii 6868 | URU.ṣi-du-un-nu URU tuk-la-a-ti-šú ša qé-reb tam-tim na-du-ú |
| ii 6969 | a-bu-biš as-pu-un BÀD-šú u šu-bat-su as-suḫ-ma |
| ii 7070 | qé-reb tam-tim ad-di-ma a-šar maš-kán-šú ú-ḫal-liq |
| ii 7171 | mab-di-mil-ku-ut-ti LUGAL-šú la-pa-an GIŠ.TUKUL.MEŠ-ia |
| ii 7272 | ina MURUB₄ tam-tim in-na-bit ina qí-bit daš-šur EN-ia |
| ii 7373 | ki-ma nu-u-ni ul-tu qé-reb tam-tim a-bar-šu-ma |
| ii 7474 | ak-ki-sa SAG.DU-su DAM-su DUMU.MEŠ-šú DUMU.MUNUS.MEŠ-šú |
| ii 7575 | UN.MEŠ É.GAL-šú KÙ.GI KÙ.BABBAR NÍG.ŠU NÍG.GA NA₄.MEŠ a-qar-tu |
| ii 7676 | lu-bul-ti GÙN ù GADA KUŠ AM.SI ZÚ AM.SI GIŠ.ESI GIŠ.TÚG |
| ii 7777 | mim-ma šum-šú ni-ṣir-ti É.GAL-šú a-na mu-ʾu-de-e áš-lu-la |
| ii 7878 | UN.MEŠ-šú DAGAL.MEŠ-te ša ni-ba la i-šá-a |
| ii 7979 | GU₄.MEŠ ṣe-e-ni ù ANŠE.NÍTA.MEŠ a-na mu-ʾu-de-e |
| ii 8080 | a-bu-ka a-na qé-reb KUR aš-šur.KI ú-pa-ḫir-ma LUGAL.MEŠ KUR.ḫat-ti |
| ii 8181 | ù a-ḫi tam-tim ka-li-šú-nu ina áš-ri šá-nim-ma URU ú-še-piš-ma |
| ii 8282 | URU.KAR-mdaš-šur-ŠEŠ-SUM.NA at-ta-bi ni-bit-su |
| Column iii | |
| iii 1iii 1 | URU.É-mṣu-pu-ri URU.[sik-ku-ú URU.gi]-iʾ |
| iii 22 | URU.in-im-me URU.[ḫi-il-du]-u-a |
| iii 33 | URU.qar-ti-im-me URU.bi-[iʾ-ru-u URU.ki]-il-me-e |
| iii 44 | URU.bi-ti-ru-me URU.sa-gu-u [URU.am]-pa |
| iii 55 | URU.É-gi-si-me-ia URU.bi-ir-gi-iʾ |
| iii 66 | URU.ga-am-bu-lu URU.da-la-im-me URU.i-si-ḫi-im-me |
| iii 77 | URU.MEŠ-ni ša li-me-et URU.ṣi-du-un-ni |
| iii 88 | a-šar ri-i-ti u maš-qí-ti É tuk-la-a-ti-šú |
| iii 99 | ša ina tu-kul-ti daš-šur EN-ia ik-šu-da ŠU.II-a-a |
| iii 1010 | UN.MEŠ ḫu-bu-ut GIŠ.PAN-ia ša KUR-i ù tam-tim |
| iii 1111 | ṣi-it dUTU-ši ina lìb-bi ú-še-šib-ma |
| iii 1212 | a-na mi-ṣir KUR aš-šur ú-ter na-gu-ú šu-a-tú |
| iii 1313 | a-na eš-šu-te aṣ-bat LÚ.šu-ut SAG-ia a-na LÚ.NAM-ti |
| iii 1414 | UGU-šú-nu áš-kun-ma GUN ù man-da-at-tú |
| iii 1515 | UGU šá maḫ-ri ut-tir-ma e-mid-su TA ŠÀ URU.MEŠ-šu |
| iii 1616 | šá-tu-nu URU.ma-aʾ-ru-ub-bu URU.ṣa-ri-ip-tu |
| iii 1717 | ina ŠU.II mba-ʾa-li LUGAL URU.ṣur-ri am-nu |
| iii 1818 | UGU GUN maḫ-ri-ti na-dan MU.AN.NA-šú |
| iii 1919 | man-da-at-tú be-lu-ti-ia ú-rad-di-ma ú-kin ṣe-ru-uš-šú |
| iii 2020 | ù msa-an-du-ar-ri LUGAL URU.kun-di |
| iii 2121 | ù URU.si-is-su-ú LÚ.KÚR ak-ṣu |
| iii 2222 | la pa-lìḫ be-lu-ti-ia ša DINGIR.MEŠ ú-maš-šir-u-ma |
| iii 2323 | a-na KUR-i mar-ṣu-ti it-ta-kil |
| iii 2424 | šu-ú mab-di-mil-ku-ut-ti LUGAL URU.ṣi-du-un-ni |
| iii 2525 | a-na re-ṣu-ti a-ḫa-meš iš-šak-nu-u-ma |
| iii 2626 | MU DINGIR.MEŠ-šú-nu it-ti a-ḫa-meš iz-kur-u-ma |
| iii 2727 | a-na e-mu-qi ra-ma-ni-šú-nu it-tak-lu |
| iii 2828 | a-na-ku a-na daš-šur d30 dUTU dEN u dAG |
| iii 2929 | DINGIR.MEŠ GAL.MEŠ EN.MEŠ-ia at-ta-kil-ma |
| iii 3030 | ni-i-tu al-me-šu-ma ki-ma iṣ-ṣu-ri ul-tu qé-reb KUR-i |
| iii 3131 | a-bar-šu-ma ak-ki-sa SAG.DU-su |
| iii 3232 | ina ITI.DU₆ SAG.DU mab-di-mil-ku-ut-ti |
| iii 3333 | ina ITI.ŠE SAG.DU msa-an-du-ar-ri |
| iii 3434 | ina 1-et MU.AN.NA ú-nak-ki-is-ma |
| iii 3535 | maḫ-ru-ú la ú-ḫi-ir-ma ú-šaḫ-mì-ṭa EGIR-ú |
| iii 3636 | áš-šú da-na-an daš-šur EN-ia UN.MEŠ kul-lu-mì-im-ma |
| iii 3737 | ina ki-šá-di LÚ.GAL.MEŠ-šu-un a-lul-ma it-ti LÚ.NAR |
| iii 3838 | ù GIŠ.ZÀ.MÍ ina re-bet NINA.KI e-te-et-ti-iq |
| iii 3939 | URU.ar-za-a šá pa-a-ṭi na-ḫal KUR.mu-ṣur-ri |
| iii 4040 | áš-lu-lam-ma ma-su-ḫi-li LUGAL-šu bi-re-tú ad-di-ma |
| iii 4141 | a-na KUR aš-šur.KI ú-ra-a ina ṭe-ḫi KÁ.GAL MURUB₄ URU šá URU.ni-na-a |
| iii 4242 | it-ti a-si UR.GI₇ u ŠAḪ ú-še-šib-šu-nu-ti ka-mì-iš |
| iii 4343 | ù mte-uš-pa-a LÚ.gi-mir-ra-a-a |
| iii 4444 | ERIM.ḪI.A-man-da šá a-šar-šú ru-ú-qu |
| iii 4545 | ina er-ṣe-et KUR.ḫu-bu-uš-na a-di gi-mir ERIM.ḪI.A-šú |
| iii 4646 | ú-ra-as-si-ib ina GIŠ.TUKUL |
| iii 4747 | ak-bu-us ki-šá-di UN.MEŠ KUR.ḫi-lak-ki |
| iii 4848 | šad-du-u-a a-ši-bu-te ḫur-šá-a-ni pa-áš-qu-u-ti |
| iii 4949 | šá ṭe-ḫi KUR.ta-ba-la LÚ.ḫat-te-e lem-nu-ú-ti |
| iii 5050 | ša UGU KUR.MEŠ-ni-šú-nu dan-nu-u-ti tak-lu-ú-ma |
| iii 5151 | ul-tu u₄-me pa-ni la kit-nu-šú a-na ni-i-ri |
| iii 5252 | 21 URU.MEŠ-šú-nu dan-nu-ti ù URU.MEŠ TUR.MEŠ šá li-me-ti-šú-nu |
| iii 5353 | al-me KUR-ud áš-lu-la šal-lat-sún ap-pul aq-qur ina dGIŠ.BAR aq-mu |
| iii 5454 | si-it-tu-te-šú-nu šá ḫi-iṭ-ṭu ù gul-lul-tú la i-šú-ú |
| iii 5555 | kab-tu ni-ir be-lu-ti-ia e-mid-su-nu-u-ti |
| iii 5656 | ad-iš KUR.par-na-ka-a-a lem-nu-u-ti |
| iii 5757 | a-ši-bu-te KUR.DU₆-a-šur-ri ša ina pi-i UN.MEŠ |
| iii 5858 | KUR.mi-iḫ-ra-a-nu KUR.pi-ta-a-nu i-nam-bu-u zi-kir-šú-un |
| iii 5959 | ú-sap-pi-iḫ UN.MEŠ KUR.man-na-a-a qu-tu-u la sa-an-qu |
| iii 6060 | ù ERIM.ḪI.A-šú miš-pa-ka-a-a URU.as-gu-za-a-a |
| iii 6161 | kit-ru la mu-še-zi-bi-šú a-na-ar ina GIŠ.TUKUL |
| iii 6262 | áš-lul KUR.É-mdak-ku-ri šá qé-reb KUR.kal-di a-a-ab KÁ.DINGIR.RA.KI |
| iii 6363 | ak-mu mdšá-maš-ib-ni LUGAL-šu is-ḫap-pu ḫa-bi-lum |
| iii 6464 | la pa-li-ḫu zik-ri EN EN.EN šá A.ŠÀ.MEŠ DUMU.MEŠ KÁ.DINGIR.ME |
| iii 6565 | ù bár-sipa.KI ina pa-rik-te it-ba-lu-u-ma |
| iii 6666 | ú-ter-ru ra-ma-nu-uš áš-šú ana-ku pu-luḫ-ti dEN u dAG |
| iii 6767 | i-du-ú A.ŠÀ.MEŠ šá-ti-na ú-ter-ma |
| iii 6868 | pa-an DUMU.MEŠ KÁ.DINGIR.RA.KI u bár-sipa.KI ú-šad-gíl |
| iii 6969 | mdMUATI-šal-lim DUMU mba-la-si |
| iii 7070 | ina GIŠ.GU.ZA-šú ú-še-šib-ma i-šá-ṭa ab-šá-a-ni |
| iii 7171 | mEN-BA-šá DUMU mbu-na-ni LÚ.gam-bu-la-a-a |
| iii 7272 | ša ina 12 KASKAL.GÍD qaq-qa-ru ina A.MEŠ |
| iii 7373 | ù GI.AMBAR.MEŠ šit-ku-nu šu-ub-tu |
| iii 7474 | ina qí-bit daš-šur EN-ia ḫat-tu ra-ma-ni-šú im-qut-su-ma |
| iii 7575 | ki-i ṭè-me-šú-ma bil-tu u man-da-at-tu |
| iii 7676 | GU₄.MAḪ-ḫi šuk-lu-lu-ti ṣa-ma-da-ni ANŠE.KUNGA.MEŠ BABBAR.MEŠ |
| iii 7777 | ul-tu KUR.e-lam-ti il-qa-am-ma a-na NINA.KI |
| iii 7878 | a-di maḫ-ri-ia il-lik-am-ma ú-na-áš-šiq GÌR.II-ia |
| iii 7979 | re-e-mu ar-ši-šú-ma ú-šar-ḫi-is-su lìb-bu |
| iii 8080 | URU.šá-pi-i-dEN URU dan-nu-ti-šú |
| iii 8181 | dan-na-as-su ú-dan-nin-ma |
| iii 8282 | šá-a-šú a-di LÚ.ERIM.MEŠ GIŠ.PAN-šú ina lìb-bi ú-še-li-šú-ma |
| iii 8383 | GIM GIŠ.IG ina IGI KUR.e-lam-ti e-dil-šu |
| Column iv | |
| iv 1iv 1 | URU.a-du-ma-tu URU dan-nu-tu LÚ.a-ri-bi |
| iv 22 | ša md30-PAP.MEŠ-SU LUGAL KUR aš-šur.KI AD ba-nu-u-a |
| iv 33 | ik-šu-du-ma NÍG.ŠU-šú NÍG.GA-šú DINGIR.MEŠ-šú |
| iv 44 | a-di ⸢fap⸣-kal-la-tú šar-rat LÚ.a-ri-bi |
| iv 55 | iš-lu-[lam]-ma a-na KUR aš-šur.KI il-qa-a |
| iv 66 | mḫa-za-[DINGIR] ⸢LUGAL⸣ LÚ.a-ri-bi it-ti ta-mar-ti-šú ka-bit-tú |
| iv 77 | a-na ⸢NINA⸣.KI URU be-lu-ti-ia |
| iv 88 | il-lik-am-ma ú-na-áš-ši-iq GÌR.II-ia |
| iv 99 | áš-šú na-dan DINGIR.MEŠ-šú ú-ṣal-la-an-ni-ma re-e-mu ar-ší-šú-ma |
| iv 1010 | da-tar-sa-ma-a-a-in dda-a-a dnu-ḫa-a-a |
| iv 1111 | dru-ul-da-a-a-ú da-bi-ri-il-lu |
| iv 1212 | da-tar-qu-ru-ma-a DINGIR.MEŠ šá LÚ.a-ri-bi |
| iv 1313 | an-ḫu-su-nu ud-diš-ma da-na-an daš-šur EN-ia |
| iv 1414 | ù ši-ṭir MU-ia UGU-šú-nu áš-ṭur-ma ut-ter-ma ad-din-šú |
| iv 1515 | fta-bu-u-a tar-bit É.GAL AD-ia a-na LUGAL-u-ti |
| iv 1616 | UGU-šú-nu áš-kun-ma it-ti DINGIR.MEŠ-šá a-na KUR-šá ú-ter-ši |
| iv 1717 | 65 ANŠE.GAM.MAL.MEŠ 10 ANŠE.NÍTA.MEŠ UGU ma-da-ti |
| iv 1818 | maḫ-ri-ti ú-rad-di-ma ú-kin ṣe-ru-uš-šú |
| iv 1919 | mḫa-za-DINGIR šim-tu ú-bil-šú-ma mia-ta-aʾ DUMU-šú |
| iv 2020 | ina GIŠ.GU.ZA-šú ú-še-šib-ma 10 MA.NA KÙ.GI 1 LIM NA₄.MEŠ bé-ru-ti |
| iv 2121 | 50 ANŠE.GAM.MAL.MEŠ 1 ME kun-zi ŠIM.ḪI.A |
| iv 2222 | UGU man-da-at-ti AD-šú ú-rad-di-ma e-mid-su |
| iv 2323 | ar-ka mú-a-bu a-na e-peš LUGAL-ti |
| iv 2424 | LÚ.a-ru-bu ka-li-šú UGU mia-ta-aʾ uš-bal-kit-ma |
| iv 2525 | a-na-ku maš-šur-PAP-AŠ LUGAL KUR aš-šur.KI LUGAL kib-rat LÍMMU-ti |
| iv 2626 | šá kit-tu i-ram-mu-ma ṣa-lip-tú ik-kib-šú |
| iv 2727 | LÚ.ERIM.MEŠ MÈ-ia a-na na-ra-ru-tu mia-ta-aʾ |
| iv 2828 | áš-pur-ma LÚ.a-ru-bu ka-li-šú ik-bu-su-ma |
| iv 2929 | mú-a-bu a-di LÚ.ERIM.MEŠ šá is-si-šú bi-re-tu id-du-u-ma |
| iv 3030 | ú-bi-lu-nim-ma GIŠ.ši-ga-ru áš-kun-šú-nu-ti-ma |
| iv 3131 | ina le-et KÁ.GAL-ia ar-ku-us-šú-nu-ti |
| iv 3232 | mup-pi-is LÚ.EN.URU šá URU.pa-ar-ták-ka |
| iv 3333 | mza-na-sa-na LÚ.EN.URU šá URU.pa-ar-tuk-ka |
| iv 3434 | mra-ma-te-ia LÚ.EN.URU šá URU.ú-ra-a-ka-za-bar-na |
| iv 3535 | KUR.ma-da-a-a šá a-šar-šú-nu ru-u-qu ša ina LUGAL.MEŠ AD.MEŠ-ia |
| iv 3636 | mi-ṣir KUR aš-šur.KI la ib-bal-ki-tú-nim-ma la ik-bu-su qaq-qar-šá |
| iv 3737 | pu-ul-ḫi me-lam-me ša daš-šur EN-ia is-ḫup-šu-nu-ti |
| iv 3838 | ANŠE.mur-ni-is-qí GAL.MEŠ tak-kas NA₄.ZA.GÌN ḫi-ip šad-di-šú |
| iv 3939 | a-na NINA.KI URU be-lu-ti-ia iš-šu-nim-ma iš-ši-qu GÌR.II-ía |
| iv 4040 | áš-šú LÚ.EN.URU.MEŠ-ni ša qa-tú id-ku-šú-nu-ti |
| iv 4141 | be-lu-ti ú-ṣal-lu-ma e-ri-šu-in-ni kit-ru |
| iv 4242 | LÚ.šu-ut SAG.MEŠ-ia LÚ.NAM.MEŠ šá pa-a-ṭi KUR-šu-un |
| iv 4343 | it-ti-šú-nu ú-ma-ʾe-er-ma UN.MEŠ a-ši-bu-te URU.MEŠ |
| iv 4444 | šá-tu-nu ik-bu-su-ma ú-šak-ni-šú GÌR.II-uš-šú-un |
| iv 4545 | GUN man-da-at-tú be-lu-ti-ia ú-kin ṣe-ru-uš-šú-un |
| iv 4646 | KUR.pa-tu-uš-ar-ri na-gu-u ša i-te-e É.MUN |
| iv 4747 | šá qé-reb KUR.ma-da-a-a ru-qu-u-te šá pa-a-ṭi KUR.bi-ik-ni KUR NA₄.ZA.GÌN |
| iv 4848 | ša ina LUGAL.MEŠ AD.MEŠ-ia mám-ma la ik-bu-su KI-tim KUR-šú-un |
| iv 4949 | mši-dir-pa-ar-na me-pa-ar-na LÚ.EN.URU.MEŠ dan-nu-ti |
| iv 5050 | šá la kit-nu-šú a-na ni-i-ri šá-a-šú-nu a-di UN.MEŠ-šú-nu |
| iv 5151 | ANŠE.KUR.RA.MEŠ ru-ku-bi-šú-nu GU₄.MEŠ ṣe-e-ni ANŠE.ú-du-ri |
| iv 5252 | šal-lat-sún ka-bit-tu áš-lu-la ana qé-reb KUR aš-šur.KI |
| iv 5353 | KUR.ba-a-zu na-gu-ú šá a-šar-šú ru-u-qu |
| iv 5454 | mi-šit na-ba-li qaq-qar MUN a-šar ṣu-ma-a-me |
| iv 5555 | 1 ME 20 KASKAL.GÍD qaq-qar ba-a-ṣi pu-qut-ti u NA₄.ZÚ.MAŠ.DÀ |
| iv 5656 | a-šar MUŠ u GÍR.TAB ki-ma kul-ba-bi ma-lu-u A.GÀR |
| iv 5757 | 20 KASKAL.GÍD KUR.ḫa-zu-ú šad-di NA₄.SAG.GIL.MUD |
| iv 5858 | a-na EGIR-ia ú-maš-šir-ma e-ti₇-iq |
| iv 5959 | na-gu-ú šu-a-tú ša ul-tu u₄-me ul-lu-ti |
| iv 6060 | la il-li-ku LUGAL pa-ni maḫ-ri-ia |
| iv 6161 | ina qí-bit daš-šur EN-ia ina qé-reb-e-šú šal-ṭa-niš at-tal-lak |
| iv 6262 | mki-i-su LUGAL URU.ḫal-di-su mak-ba-ru LUGAL URU.il-pi-a-tú |
| iv 6363 | mma-an-sa-ku LUGAL URU.ma-gal-a-ni |
| iv 6464 | fia-pa-aʾ šar-rat URU.di-iḫ-ra-a-ni |
| iv 6565 | mḫa-bi-su LUGAL URU.qa-da-ba-aʾ |
| iv 6666 | mni-ḫa-ru LUGAL URU.ga-aʾ-u-a-ni |
| iv 6767 | fba-as-lu šar-rat URU.i-ḫi-lum |
| iv 6868 | mḫa-ba-zi-ru LUGAL URU.pu-da-aʾ |
| iv 6969 | 8 LUGAL.MEŠ-ni ša qé-reb na-ge-e šu-a-tú a-duk |
| iv 7070 | ki-ma MUNU₄ áš-ta-ṭi pa-gar LU.qu-ra-di-šú-un |
| iv 7171 | DINGIR.MEŠ-šú-nu NÍG.ŠU-šú-nu NÍG.GA-šú-nu ù UN.MEŠ-šú-nu |
| iv 7272 | áš-lu-la a-na qé-reb KUR aš-šur.KI mla-a-a-le-e |
| iv 7373 | LUGAL URU.ia-di-iʾ šá la-pa-an GIŠ.TUKUL.MEŠ-ia in-nab-tú |
| iv 7474 | ḫa-at-tu ra-ma-ni-šú im-qut-su-ma a-na URU.ni-na-a |
| iv 7575 | a-di maḫ-ri-ia il-lik-am-ma ú-na-áš-šiq GÌR.II-ia |
| iv 7676 | re-e-mu ar-ši-šú-ma na-ge-e URU.ba-zi šu-a-tum |
| iv 7777 | ú-šad-gíl pa-nu-uš-šú |
| iv 7878 | ina e-muq daš-šur d30 dUTU dAG dAMAR.UTU d15 šá NINA.KI |
| iv 7979 | d15 šá URU.LÍMMU-DINGIR ak-šu-ud kul-lat na-ki-ri mul-tar-ḫi |
| iv 8080 | ina zik-ri DINGIR-u-ti-šú-nu ma-al-ki na-ki-ri-ia |
| iv 8181 | ki-ma qa-né-e me-ḫe-e i-šu-ub-bu |
| iv 8282 | LUGAL.MEŠ-ni a-ši-bu-te tam-tim ša BÀD.MEŠ-šú-nu tam-tim-ma |
| iv 8383 | e-du-u šal-ḫu-šú-un ša ki-ma GIŠ.GIGIR GIŠ.MÁ rak-bu |
| iv 8484 | ku-um ANŠE.KUR.RA.MEŠ-e ṣa-an-du par-ri-sa-ni |
| iv 8585 | pal-ḫiš ul-ta-nap-šá-qu lìb-ba-šú-nu i-tar-rak-ma |
| Column v | |
| v 1v 1 | i-ma-ʾu mar-tú ul ib-ši šá-ni-ni ul im-maḫ-ḫa-ru GIŠ.TUKUL-u-a |
| v 22 | ù ina ma-al-ki a-lik maḫ-ri-ia la im-šu-la a-a-ú-ma |
| v 33 | ša a-na LUGAL.MEŠ AD.MEŠ-ia i-šu-ṭu-ma e-tap-pa-lu ze-ra-ti |
| v 44 | ina qí-bit daš-šur EN-ia ina ŠU.II-ia im-ma-nu-ú |
| v 55 | pa-áš-qu-ti BÀD NA₄.MEŠ-šú-nu GIM kar-pat pa-ḫa-ri ú-par-ri-ir |
| v 66 | pa-gar qu-ra-di-šú-un ina la qe-bé-ri ú-šá-kil zi-i-bu |
| v 77 | nak-mu NÍG.GA-šú-nu áš-lu-la a-na qé-reb KUR aš-šur.KI |
| v 88 | DINGIR.MEŠ ti-ik-li-šú-nu šal-la-tiš am-nu |
| v 99 | ki-ma ṣe-e-ni a-bu-ka UN.MEŠ-šú-un šam-ḫa-a-ti |
| v 1010 | ša a-na šu-zu-ub na-piš-ti-šú qé-reb tam-tim in-nab-tú |
| v 1111 | ina giš-par-ri-ia ul ip-par-šid-ma ul ú-še-ṣi nap-šat-su |
| v 1212 | pe-tan bir-ki ša iṣ-ba-tu si-me-lat KUR-i ru-qu-u-ti |
| v 1313 | ki-ma iṣ-ṣu-ri ul-tú qé-reb KUR-i a-bar-šú-ma ak-sa-a Á.MEŠ-šú |
| v 1414 | ÚŠ.MEŠ-šú-nu ki-ma bu-tuq-ti na-at-bak KUR-i ú-šar-di |
| v 1515 | su-te-e a-ši-bu-te kul-ta-ri šá a-šar-šú-nu ru-u-qu |
| v 1616 | ki-ma ez-zi ti-ib me-ḫe-e as-su-ḫa šu-ru-us-su-un |
| v 1717 | ša tam-tum a-na dan-nu-ti-šú KUR-ú a-na e-mu-qi-šú iš-ku-nu |
| v 1818 | ina sa-par-ri-ia a-a-um-ma ul ú-ṣi |
| v 1919 | na-par-šu-du-um-ma ul ip-par-šid |
| v 2020 | šá tam-ti a-na KUR-i ša KUR-i a-na tam-tim a-šab-šú-nu aq-bi |
| v 2121 | ina qí-bit daš-šur EN-ia man-nu šá it-ti-ia iš-šá-an-na-nu |
| v 2222 | a-na LUGAL-u-ti ù ina LUGAL.MEŠ-ni AD.MEŠ-ia |
| v 2323 | ša ki-ma ia-a-ti-ma šur-ba-ta be-lu-su |
| v 2424 | ul-tu qé-reb tam-tim LÚ.KÚR.MEŠ-ia ki-a-am iq-bu-ni |
| v 2525 | um-ma KA₅.A la-pa-an dUTU e-ki-a-am il-lak |
| v 2626 | KUR.e-la-mu-ú KUR.qu-tu-u ma-al-ki šip-ṣu-u-ti |
| v 2727 | ša a-na LUGAL.MEŠ AD.MEŠ-ia e-tap-pa-lu ze-ra-a-ti |
| v 2828 | da-na-an daš-šur EN-ia šá ina kul-lat na-ki-ri e-tep-pu-šú |
| v 2929 | iš-mu-u-ma ḫat-tum u pu-luḫ-tum UGU-šú-nu it-ta-bik-ma |
| v 3030 | áš-šú a-na mi-ṣir KUR.MEŠ-šú-nu la ḫa-ṭe-e |
| v 3131 | LÚ.KIN.GI₄.A.MEŠ-šú-nu šá ṭu-bi u su-lum-me-e |
| v 3232 | a-na NINA.KI a-di maḫ-ri-ia iš-pu-ru-nim-ma |
| v 3333 | MU DINGIR.MEŠ GAL.MEŠ iz-ku-ru ul-tu daš-šur dUTU dEN dAG |
| v 3434 | d15 šá NINA.KI ù d15 šá URU.LÍMMU-DINGIR UGU na-ki-ri-ia |
| v 3535 | ina li-i-ti ú-šá-zi-zu-ni-ma am-ṣu-u ma-la lìb-bi-ía |
| v 3636 | ina ki-šit-ti na-ki-ri šad-lu-ú-ti |
| v 3737 | ša ina tu-kul-ti DINGIR.MEŠ GAL.MEŠ EN.MEŠ-ia ik-šu-da ŠU.II-a-a |
| v 3838 | eš-ret ma-ḫa-zi ša KUR aš-šur.KI u KUR URI.KI ú-še-piš-ma |
| v 3939 | KÙ.BABBAR KÙ.GI uḫ-ḫi-zu-ma ú-nam-me-ra ki-ma u₄-me |
| v 4040 | ina u₄-me-šu-ma É.GAL ma-šar-ti ša NINA.KI |
| v 4141 | ša LUGAL.MEŠ-ni a-lik maḫ-ri AD.MEŠ-ia ú-še-pi-šú |
| v 4242 | a-na šu-te-šur KARAŠ pa-qa-a-di ANŠE.mur-ni-is-qí |
| v 4343 | ANŠE.KUNGA.MEŠ GIŠ.GIGIR.MEŠ til-li ú-nu-ut MÈ |
| v 4444 | ù šal-la-at na-ki-ri gi-mir mim-ma šum-šú |
| v 4545 | ša daš-šur LUGAL DINGIR.MEŠ a-na eš-qí LUGAL-ti-ia iš-ru-ka |
| v 4646 | a-na šit-mur ANŠE.KUR.RA.MEŠ ši-tam-du-uḫ GIŠ.GIGIR.MEŠ |
| v 4747 | áš-ru šu-a-tú i-mi-ṣa-an-ni-ma UN.MEŠ KUR.KUR |
| v 4848 | ḫu-bu-ut GIŠ.PAN-ia al-lu tup-šik-ku ú-šá-áš-ši-šú-nu-ti-ma |
| v 4949 | il-bi-nu SIG₄ É.GAL.TUR.RA šu-a-tú |
| v 5050 | a-na si-ḫir-ti-šá aq-qur-ma qaq-qa-ru ma-aʾ-du |
| v 5151 | ki-ma a-tar-tim-ma ul-tu lìb-bi A.ŠÀ.MEŠ ab-tuq-ma |
| v 5252 | UGU-šú uš-rad-di ina NA₄.pi-i-li NA₄ KUR-i dan-ni |
| v 5353 | uš-ši-šú ad-di-ma tam-la-a ú-mal-li |
| v 5454 | ad-ke-e-ma LUGAL.MEŠ KUR.ḫat-ti u e-ber ÍD |
| v 5555 | mba-ʾa-lu LUGAL URU.ṣur-ri mme-na-si-i LUGAL URU.ia-ú-di |
| v 5656 | mqa-uš-gab-ri LUGAL URU.ú-du-me mmu-ṣur-i LUGAL URU.ma-ʾa-ab |
| v 5757 | mṣil-EN LUGAL URU.ḫa-zi-ti mme-ti-in-ti MAN URU.is-qa-lu-na |
| v 5858 | mi-ka-ú-su LUGAL URU.am-qar-ru-na |
| v 5959 | mmil-ki-a-šá-pa LUGAL URU.gu-ub-li |
| v 6060 | mma-ta-an-ba-ʾa-al LUGAL URU.a-ru-ad-da |
| v 6161 | ma-bi-ba-ʾa-li LUGAL URU.sam-si-mur-ru-na |
| v 6262 | mbu-du-DINGIR LUGAL URU.É-am-ma-na mPAP-mil-ki MAN URU.as-du-di |
| v 6363 | 12 LUGAL.MEŠ šá ki-šá-di tam-tim me-ki-iš-tu-ra |
| v 6464 | LUGAL URU.e-di-ʾi-il mpi-la-a-gu-ra-a MAN URU.ki-it-ru-si |
| v 6565 | mki-i-su LUGAL URU.si-il-lu-u₈-u-a |
| v 6666 | mi-tu-u-an-da-ar LUGAL URU.pa-ap-pa |
| v 6767 | me-re-su LUGAL URU.si-il-li mda-ma-su MAN URU.ku-ri-i |
| v 6868 | mád-me-e-su LUGAL URU.ta-me-si |
| v 6969 | mda-mu-ú-si LUGAL URU.qar-ti-ḫa-da-as-ti |
| v 7070 | mú-na-sa-gu-su LUGAL URU.li-di-ir |
| v 7171 | mbu-ṣu-su LUGAL URU.ZÁLAG-ia 10 LUGAL.MEŠ ša KUR.ia-ad-na-na |
| v 7272 | MURUB₄ tam-tim ŠU.NIGIN 22 LUGAL.MEŠ KUR.ḫat-ti a-ḫi tam-tim |
| v 7373 | ù MURUB₄ tam-tim ka-li-šú-nu ú-ma-ʾe-er-šú-nu-ti-ma |
| v 7474 | GIŠ.ÙR.MEŠ GAL.MEŠ tim-me MAḪ.MEŠ GIŠ.a-dáp-pi šu-ḫu-u-ti |
| v 7575 | ša GIŠ.EREN GIŠ.ŠUR.MÌN tar-bit KUR.si-ra-ra u KUR.lab-na-na |
| v 7676 | ša ul-tu u₄-me pa-ni ma-gal ik-bi-ru-ma i-ši-ḫu la-a-nu |
| v 7777 | dALAD.dLAMMA.MEŠ ša NA₄.dŠE.TIR |
| v 7878 | MUNUS.dLAMMA.MEŠ MUNUS.ÁB.ZA.ZA-a-ti NA₄.KUN₄.MEŠ a-gúr-ri |
| v 7979 | ša NA₄.GIŠ.NU₁₁.GAL NA₄.dŠE.TIR NA₄.DÚR.MI.NA |
| v 8080 | NA₄.DÚR.MI.NA.BÀN.DA NA₄.a-lal-lum NA₄.GI.RIM.ḪI.LI.BA |
| v 8181 | ul-tu qé-reb ḫur-šá-a-ni a-šar nab-ni-te-šú-nu |
| v 8282 | a-na ḫi-šiḫ-ti É.GAL-ia GIG-iš pa-áš-qí-iš |
| Column vi | |
| vi 1vi 1 | a-na NINA.KI URU be-lu-ti-ia ú-šal-di-du-u-ni |
| vi 22 | ina ITI ŠE.GA u₄-me mit-ga-ri UGU tam-le-e šu-a-tum |
| vi 33 | É.GAL.MEŠ rab-ba-a-ti a-na mu-šab be-lu-ti-ia |
| vi 44 | ab-ta-ni ṣe-ru-uš-šu |
| vi 55 | É LUGAL ša 95 ina 1.KÙŠ GAL-tim GÍD ša 31 ina 1.KÙŠ GAL-tim DAGAL |
| vi 66 | ša ina LUGAL.MEŠ-ni AD.MEŠ-ia mám-ma la e-pu-šú ana-ku e-pu-uš |
| vi 77 | NA₄.KUN₄.MEŠ NA₄.GIŠ.NU₁₁.GAL a-sur-ru-šú ú-šá-as-ḫir-ma |
| vi 88 | GIŠ.ÙR.MEŠ GIŠ.EREN MAḪ.MEŠ ú-šat-ri-ṣa UGU-šú |
| vi 99 | É.GAL NA₄.pi-i-li pe-ṣi-i ù É.GAL.MEŠ ZÚ AM.SI |
| vi 1010 | GIŠ.ESI GIŠ.TÚG GIŠ.mu-suk-kan-ni GIŠ.EREN GIŠ.ŠUR.MÌN |
| vi 1111 | a-na mu-šab LUGAL-ti-ia u mul-ta-u-ti be-lu-ti-ia |
| vi 1212 | nak-liš ú-še-piš-ma GIŠ.ÙR.MEŠ GIŠ.EREN MAḪ.MEŠ ú-šat-ri-ṣa UGU-šú |
| vi 1313 | GIŠ.IG.MEŠ GIŠ.ŠUR.MÌN šá e-re-si-na DÙG.GA me-ser KÙ.BABBAR |
| vi 1414 | ù URUDU ú-rak-kis-ma ú-rat-ta-a KÁ.MEŠ-šin |
| vi 1515 | dALAD.dLAMMA.MEŠ MUNUS.ÁB.ZA.ZA-a-ti ša NA₄.dŠE.TIR |
| vi 1616 | ša ki-i šik-ni-šú-nu ir-ti lem-ni ú-tar-ru |
| vi 1717 | NA₄.dALAD.dLAMMA.MEŠ GAL.MEŠ ur-maḫ-ḫi šu-ta-tu-u-ti |
| vi 1818 | MUNUS.ÁB.ZA.ZA-a-ti šu-ta-ḫa-a-ti MUNUS.dLAMMA.MEŠ maš-šá-a-ti |
| vi 1919 | ša URUDU nam-ri ap-ti-iq-ma |
| vi 2020 | ù dALAD.dLAMMA.MEŠ ša pi-i-li pe-ṣe-e |
| vi 2121 | ZAG u GÙB ú-šá-aṣ-bi-ta SI.GAR-ši-in |
| vi 2222 | tim-me URUDU GAL.MEŠ tim-me GIŠ.EREN MAḪ.MEŠ |
| vi 2323 | a-dáp-pi ku-lul KÁ.MEŠ-šin e-mid si-ḫi-ir-ti É.GAL šá-a-tu |
| vi 2424 | né-bé-ḫu pa-áš-qu ša NA₄.ZÚ NA₄.ZA.GÌN ú-še-piš-ma |
| vi 2525 | ú-šal-ma-a ki-li-liš si-il-lu ù mat-gi-qu |
| vi 2626 | ki-ma dTIR.AN.NA ú-šá-as-ḫi-ra gi-mir KÁ.MEŠ-ni |
| vi 2727 | sik-kàt KÙ.BABBAR KÙ.GI ù URUDU nam-ri ú-rat-ta-a qé-reb-šin |
| vi 2828 | da-na-an aš-šur EN-ia ep-šet ina KUR.KUR nak-ra-a-ti e-tep-pu-šú |
| vi 2929 | ina ši-pir LÚ.ur₅-ra-ku-ti e-si-qa qé-reb-šá |
| vi 3030 | GIŠ.KIRI₆.MAḪ tam-šil KUR.ḫa-ma-nim šá ka-la ŠIM.ḪI.A |
| vi 3131 | ù GURUN ḫur-ru-šú i-ta-a-ti-šá az-qu-up |
| vi 3232 | ki-sal-la-šá ma-gal ú-rab-bi-ma tal-lak-ta-šá ma-aʾ-diš |
| vi 3333 | ú-rap-piš a-na maš-qit ANŠE.KUR.RA.MEŠ ina qé-reb-e-šá |
| vi 3434 | pat-tu ú-še-še-ram-ma ú-šaḫ-bi-ba a-tap-piš |
| vi 3535 | ul-tu É.GAL šu-a-tú ul-tu UŠ₈-šá a-di gaba-dib-e-šá |
| vi 3636 | ar-ṣi-pu ú-šak-li-lu lu-le-e ú-mal-lu-u |
| vi 3737 | šal-la-ru-šá ina KAŠ.SAG maḫ-ṣu ba-al-lu₄ ka-lak-ku-šá ina GEŠTIN |
| vi 3838 | na-ši GIŠ.MAR al-li tup-šik-ki e-piš dul-li |
| vi 3939 | za-bil ku-du-ur-ri ina e-le-li ul-ṣi ḫu-ud lìb-bi |
| vi 4040 | nu-um-mur pa-ni ub-ba-lu₄ u₄-um-šú-un |
| vi 4141 | ši-pir-šá ina ḫi-da-a-ti ri-šá-a-ti za-ma-ri tak-ni-i |
| vi 4242 | ag-mur-ma èš-gal-šid-dù-dù-a |
| vi 4343 | É.GAL pa-qi-da-at ka-la-mu az-ku-ra ni-bit-sa |
| vi 4444 | daš-šur dEN dAG d15 šá NINA.KI d15 šá URU.LÍMMU-DINGIR |
| vi 4545 | DINGIR.MEŠ KUR aš-šur.KI ka-li-šú-nu ina qer-bi-šá aq-re-ma |
| vi 4646 | UDU.SISKUR.MEŠ taš-ri-iḫ-ti eb-bu-u-ti ma-ḫar-šú-un aq-qí-ma |
| vi 4747 | ú-šam-ḫi-ra kàd-ra-a-a DINGIR.MEŠ šá-tu-nu |
| vi 4848 | ina ku-un-ni lìb-bi-šú-nu ik-tar-ra-bu LUGAL-u-ti |
| vi 4949 | LÚ.GAL.MEŠ ù UN.MEŠ KUR-ia ka-li-šú-nu |
| vi 5050 | ina GIŠ.BANŠUR ta-ši-la-a-ti ta-kul-ti u qé-re-e-ti |
| vi 5151 | ina qer-bi-šá ú-še-šib-šú-nu-ti-ma ú-šá-li-ṣa nu-pa-ar-šú-un |
| vi 5252 | GEŠTIN.MEŠ u ku-ru-un-nu am-ki-ra ṣur-ra-šú-un |
| vi 5353 | Ì.SAG ì-gu-la-a muḫ-ḫa-šú-nu ú-šá-áš-qí |
| vi 5454 | ina qí-bit daš-šur LUGAL DINGIR.MEŠ ù DINGIR.MEŠ KUR aš-šur.KI DÙ-šú-nu |
| vi 5555 | ina ṭu-ub UZU.MEŠ ḫu-ud lìb-bi nu-um-mur ka-bat-ti |
| vi 5656 | še-bé-e lit-tu-ti qé-reb-šá da-riš |
| vi 5757 | lu-ur-mì-ma lu-uš-ba-a la-la-a-šá |
| vi 5858 | ina zag-muk-ki ITI reš-ti-i kul-lat ANŠE.mur-ni-is-qí |
| vi 5959 | ANŠE.KUNGA.MEŠ ANŠE.GAM.MAL.MEŠ til-li ú-nu-ut MÈ |
| vi 6060 | gi-mir ERIM.ḪI.A šal-la-at na-ki-ri šat-ti-šam-ma |
| vi 6161 | la na-par-ka-a lu-up-qí-da qé-reb-šá |
| vi 6262 | qé-reb É.GAL šá-a-tu dALAD SIG₅ dLAMMA SIG₅ |
| vi 6363 | na-ṣir kib-si LUGAL-ti-ia mu-ḫa-du-u ka-bat-ti-ia |
| vi 6464 | da-riš liš-tab-ru-u a-a ip-par-ku-u i-da-a-šá |
| vi 6565 | a-na EGIR u₄-me ina LUGAL.MEŠ-ni DUMU.MEŠ-ia |
| vi 6666 | ša daš-šur u diš-tar a-na be-lut KUR u UN.MEŠ |
| vi 6767 | i-nam-bu-u zi-kir-šú e-nu-ma É.GAL šá-a-tu |
| vi 6868 | i-lab-bi-ru-ma in-na-ḫu an-ḫu-us-sa lu-diš |
| vi 6969 | ki-i šá a-na-ku MU.SAR-ú ši-ṭir šu-me LUGAL AD ba-ni-ía |
| vi 7070 | it-ti MU.SAR-e ši-ṭir MU-ia áš-ku-nu-u-ma |
| vi 7171 | at-ta ki-i ia-a-ti-ma MU.SAR-ú ši-ṭir MU-ia |
| vi 7272 | a-mur-ma Ì.GIŠ pu-šu-uš UDU.SISKUR BAL-qí |
| vi 7373 | it-ti MU.SAR-e ši-ṭir MU-ka šu-kun |
| vi 7474 | daš-šur u diš-tar ik-ri-bi-ka i-šem-mu-ú |
| vi 7575 | ITI.ŠE.KIN.KUD lim-mu ma-tar-DINGIR LÚ.EN.NAM KUR.la-ḫi-ra |