BM 091032 (RINAP 3/1 Sennacherib 22, ex. 02) [Sennacherib][via rinap/sources]
| Obverse | |
| Column i | |
| i 1i 1 | mdEN.ZU-ŠEŠ.MEŠ-eri-ba LUGAL GAL LUGAL dan-nu |
| i 22 | LUGAL kiš-šá-ti LUGAL KUR aš-šur.KI LUGAL kib-rat LÍMMU-tim |
| i 33 | RE.É.UM it-pe-šú mi-gir DINGIR.MEŠ GAL.MEŠ |
| i 44 | na-ṣir kit-ti ra-ʾi-im mi-šá-ri |
| i 55 | e-piš ú-sa-a-ti a-lik tap-pu-ut a-ki-i |
| i 66 | sa-ḫi-ru dam-qa-a-ti eṭ-lum gít-ma-lum |
| i 77 | zi-ka-ru qar-du a-šá-red kal ma-al-ki |
| i 88 | rap-pu la-ʾi-iṭ la ma-gi-ri |
| i 99 | mu-šab-ri-qu za-ma-a-ni |
| i 1010 | daš-šur KUR-ú GAL-ú LUGAL-ut la šá-na-an |
| i 1111 | ú-šat-li-ma-an-ni-ma |
| i 1212 | UGU gi-mir a-šib pa-rak-ki ú-šar-ba-a GIŠ.TUKUL.MEŠ-ia |
| i 1313 | ul-tu A.AB.BA e-le-ni-ti ša šá-lam dUTU-ši |
| i 1414 | a-di tam-tim šap-li-ti ša ṣi-it dUTU-ši |
| i 1515 | gim-ri ṣal-mat SAG.DU ú-šak-niš še-pu-ú-a |
| i 1616 | ù mal-ki šep-ṣu-ti e-du-ru ta-ḫa-zi |
| i 1717 | da-ád-me-šu-un iz-zi-bu-ma ki-ma su-tin-ni.MUŠEN |
| i 1818 | ni-gi-iṣ-ṣi e-diš ip-par-šú a-šar la ʾa-a-ri |
| i 1919 | i-na maḫ-re-e ger-ri-ia ša mdAMAR.UTU-IBILA-SUM.NA |
| i 2020 | LUGAL KUR.kár-ddun-ía-àš a-di ERIM.ḪI.A ELAM.MA.KI re-ṣi-šú |
| i 2121 | i-na ta-mir-ti kiš.KI áš-ta-kan BAD₅.BAD₅-šú |
| i 2222 | i-na MURUB₄ tam-ḫa-ri šu-a-tu e-zib KARAŠ-su |
| i 2323 | e-diš ip-par-šid-ma na-piš-tuš e-ṭí-ir |
| i 2424 | GIŠ.GIGIR.MEŠ ANŠE.KUR.RA.MEŠ GIŠ.ṣu-um-bi ANŠE.KUNGA.MEŠ |
| i 2525 | ša i-na qit-ru-ub ta-ḫa-zi ú-maš-še-ru ik-šu-da ŠU.II-a-a |
| i 2626 | a-na É.GAL-šú ša qé-reb KÁ.DINGIR.RA.KI ḫa-diš e-ru-um-ma |
| i 2727 | ap-te-e-ma É ni-ṣir-ti-šú KÙ.GI KÙ.BABBAR |
| i 2828 | ⸢ú⸣-[x x] KÙ.GI KÙ.⸢BABBAR NA₄⸣ a-qar-tu mim-ma šum-šú |
| i 2929 | NÍG.ŠU NÍG.GA la ni-bi ka-⸢bit-tu⸣ GUN MUNUS.ŠÀ.É.GAL.MEŠ-šú |
| i 3030 | LÚ.TIRUM.MEŠ LÚ.man-za-az pa-ni LÚ.NAR.MEŠ MUNUS.NAR.MEŠ |
| i 3131 | si-ḫir-ti um-ma-a-ni ma-la ba-šu-ú |
| i 3232 | mut-tab-bi-lu-tú É.GAL-uš ú-še-ṣa-am-ma |
| i 3333 | šal-la-ti-iš am-nu i-na e-muq daš-šur EN-ia |
| i 3434 | 75 URU.MEŠ-šú dan-nu-ti É BÀD.MEŠ-ni ša KUR.kal-di |
| i 3535 | ù 4 ME 20 URU.MEŠ-ni TUR.MEŠ ša li-me-ti-šú-nu |
| i 3636 | al-me ak-šudud áš-lu-la šal-la-su-un |
| i 3737 | LÚ.úr-bi LÚ.a-ra-mu LÚ.kal-du ša qé-reb UNUG.KI |
| i 3838 | NIBRU.KI kiš.KI ḫur-sag-kalam-ma.KI GÚ.DU₈.A.KI ZIMBIR.KI |
| i 3939 | a-di DUMU.MEŠ URU EN ḫi-iṭ-ṭi ú-še-ṣa-am-ma |
| i 4040 | šal-la-tiš am-nu i-na ta-a-a-ar-ti-ia |
| i 4141 | LÚ.tu-uʾ-mu-na LÚ.ri-ḫi-ḫu LÚ.ia-daq-qu |
| i 4242 | LÚ.ú-bu-du LÚ.gib-re-e LÚ.ma-la-ḫu |
| i 4343 | LÚ.gu-ru-mu LÚ.ú-bu-lum LÚ.da-mu-nu |
| i 4444 | LÚ.gam-bu-lum LÚ.ḫi-in-da-ru LÚ.ru-ʾu-ú-a |
| i 4545 | LÚ.pu-qu-du LÚ.ḫa-am-ra-nu LÚ.ḫa-ga-ra-nu |
| i 4646 | LÚ.na-ba-tu LÚ.li-iʾ-ta-ú LÚ.a-ra-mu |
| i 4747 | la kan-šu-ú-ti mit-ḫa-riš ak-šudud |
| i 4848 | 2 ME 8 LIM UN.MEŠ TUR GAL NITA ù MUNUS |
| i 4949 | ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ |
| i 5050 | GU₄.MEŠ ù ṣe-e-ni ša la ni-bi šal-la-tu |
| i 5151 | ka-bit-tu áš-lu-la a-na qé-reb KUR aš-šur.KI |
| i 5252 | ⸢i-na⸣ me-ti-iq ger-ri-ia ša mdMUATI-EN-MU.MEŠ |
| i 5353 | LÚ.qí-pi URU.ḫa-ra-ra-ti KÙ.GI KÙ.BABBAR |
| i 5454 | GIŠ.mu-suk-kan-ni GAL.MEŠ ANŠE.MEŠ ANŠE.GAM.MAL.MEŠ GU₄.MEŠ |
| i 5555 | ù ṣe-e-ni ta-mar-ta-šú ka-bit-tu am-ḫur |
| i 5656 | ba-ḫu-la-te URU.ḫi-rim-me LÚ.KÚR ak-ṣi |
| i 5757 | i-na GIŠ.TUKUL.MEŠ ú-šam-qit-ma e-du ul e-zib |
| i 5858 | pag-ri-šú-un i-na ga-ši-ši a-lul-ma |
| i 5959 | si-ḫir-ti URU ú-šal-me na-gu-ú šu-a-tu |
| i 6060 | ⸢a-na⸣ eš-šu-ti aṣ-bat 1-en GU₄ |
| i 6161 | 10 UDU.NÍTA.MEŠ 10 ⸢ANŠE⸣ GIŠ.GEŠTIN 20 ANŠE ZÚ.LUM.MA re-še-te-šú |
| i 6262 | a-na DINGIR.MEŠ-ni KUR aš-šur.KI EN.MEŠ-ia ú-kin dà-ri-šam |
| i 6363 | i-na 2-e ger-ri-ia daš-šur be-lí ú-tak-kil-an-ni-ma |
| i 6464 | a-na KUR LÚ.kaš-ši-i ù KUR LÚ.ia-su-bi-gal-la-a-a |
| i 6565 | ša ul-tu ul-la a-na LUGAL.MEŠ-ni AD.MEŠ-ia |
| i 6666 | la kit-nu-šú lu al-lik qé-reb ḫur-šá-a-ni zaq-ru-ti |
| i 6767 | A.ŠÀ nam-ra-ṣi i-na ANŠE.KUR.RA ar-kab-ma |
| i 6868 | GIŠ.GIGIR GÌR.II-ia i-na ti-ik-ka-a-ti ú-šá-áš-ši |
| i 6969 | áš-ru šup-šu-qu i-na GÌR.II-ia ri-ma-niš at-tag-giš |
| i 7070 | URU.É-mki-lam-za-aḫ URU.ḫar-diš-pi URU.É-mku-bat-ti |
| i 7171 | URU.MEŠ-ni-šú-nu É BÀD.MEŠ-ni dan-nu-te al-me KUR-ud |
| i 7272 | UN.MEŠ ANŠE.KUR.RA.MEŠ ANŠE.KUNGA.MEŠ ANŠE.MEŠ |
| i 7373 | GU₄.MEŠ ù ṣe-e-ni ul-tu qer-bi-šú-un |
| i 7474 | ú-še-ṣa-am-ma šal-la-tiš am-nu ù URU.MEŠ-ni-šú-nu TUR.MEŠ |
| i 7575 | ša ni-ba la i-šu-i ap-pul aq-qur ú-še-me kar-meš |
| i 7676 | É EDIN kul-ta-ri mu-šá-bi-šú-nu i-na dGIŠ.BAR aq-mu-ma |
| i 7777 | di-tal-liš ú-še-me ú-ter-ma URU.É-mki-lam-za-aḫ |
| i 7878 | šu-a-tu a-na URU.bir-tu-ti aṣ-bat UGU ša u₄-um pa-ni |
| i 7979 | BÀD.MEŠ-šú ú-dan-nin-ma UN.MEŠ KUR.KUR |
| i 8080 | ki-šit-ti ŠU.II-ia i-na lìb-bi ú-še-šib |
| i 8181 | UN.MEŠ KUR LÚ.kaš-ši-i ù KUR LÚ.ia-su-bi-gal-la-a-a |
| i 8282 | ša la-pa-an GIŠ.TUKUL.MEŠ-ia ip-par-šid-du |
| Column ii | |
| ii 1ii 1 | ul-tu qé-reb KUR-i ú-še-ri-dam-ma |
| ii 22 | i-na URU.ḫar-diš-pi URU.É-mku-bat-ti ú-šar-me |
| ii 33 | i-na ŠU.II LÚ.šu-ut SAG-ia LÚ.EN.NAM URU.ar-rap-ḫa |
| ii 44 | am-nu-šu-nu-ti NA₄.NA.RÚ.A ú-še-piš-ma |
| ii 55 | li-i-tum ki-šit-ti ŠU.II ša UGU-šú-un |
| ii 66 | áš-tak-ka-nu ṣe-ru-uš-šú ú-šá-áš-ṭir-ma |
| ii 77 | ina qer-bi URU ul-ziz pa-an ni-ri-ia |
| ii 88 | ú-ter-ma a-na KUR.el-li-pi aṣ-ṣa-bat ḫar-ra-nu |
| ii 99 | el-la-mu-ú-a mis-pa-ba-a-ra LUGAL-šú-un URU.MEŠ-šú dan-nu-ti |
| ii 1010 | É ni-ṣir-ti-šú ú-maš-šir-ma a-na ru-qé-e-ti |
| ii 1111 | in-na-bit gim-ri KUR-šú DAGAL-tim ki-ma MURU₉ as-ḫu-up |
| ii 1212 | URU.mar-ú-biš-ti URU.ak-ku-ud-du URU.MEŠ-ni |
| ii 1313 | É LUGAL-ti-šú a-di 34 URU.MEŠ TUR.MEŠ ša li-me-ti-šú-nu |
| ii 1414 | al-me ak-šudud ap-pu-ul aq-qur |
| ii 1515 | i-na dGIŠ.BAR aq-mu UN.MEŠ TUR GAL NITA u MUNUS |
| ii 1616 | ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ |
| ii 1717 | GU₄.MEŠ ù ṣe-e-ni a-na la mi-nam áš-lu-lam-ma |
| ii 1818 | a-di la ba-ši-i ú-šá-lik-šu-ma ú-ṣa-ḫir KUR-su |
| ii 1919 | URU.ṣi-ṣi-ir-tu URU.ku-um-ma-aḫ-lum URU.MEŠ-ni |
| ii 2020 | dan-nu-ti a-di URU.MEŠ TUR.MEŠ ša li-me-ti-šú-nu |
| ii 2121 | KUR.É-mba-ar-ru-ú na-gu-ú a-na gi-mir-ti-šú |
| ii 2222 | ul-tu qé-reb KUR-šú ab-tuq-ma UGU mi-ṣir |
| ii 2323 | KUR aš-šur.KI ú-rad-di URU.el-en-za-áš |
| ii 2424 | a-na URU LUGAL-ti ù dan-na-at na-ge-e šu-a-tu |
| ii 2525 | aṣ-bat-ma MU-šú maḫ-ra-a ú-nak-kir-ma |
| ii 2626 | URU.kar-dEN.<ZU>-ŠEŠ.MEŠ-SU at-ta-bi ni-bit-su |
| ii 2727 | UN.MEŠ KUR.KUR ki-šit-ti ŠU.II-ia i-na lìb-bi ú-še-šib |
| ii 2828 | i-na ŠU.II LÚ.šu-ut SAG-ia LÚ.EN.NAM URU.ḫar-ḫar |
| ii 2929 | am-nu-ma ú-rap-piš ma-a-ti i-na ta-a-a-ar-ti-ia |
| ii 3030 | ša KUR.ma-da-a-a ru-qu-ti ša i-na LUGAL.MEŠ-ni |
| ii 3131 | AD.MEŠ-ia ma-am-man la iš-mu-ú zi-kir KUR-šú-un |
| ii 3232 | man-da-ta-šú-nu ka-bit-tu am-ḫur |
| ii 3333 | a-na ni-ri be-lu-ti-ia ú-šak-ni-su-nu-ti |
| ii 3434 | i-na šal-ši ger-ri-ia a-na KUR.ḫa-at-ti lu al-lik |
| ii 3535 | mlu-li-i LUGAL URU.ṣi-du-un-ni pul-ḫi me-lam-me |
| ii 3636 | be-lu-ti-ia is-ḫu-pu-šu-ma a-na ru-uq-qí |
| ii 3737 | MURUB₄ tam-tim ⸢in-na⸣-bit-ma KUR-šú e-mid |
| ii 3838 | URU.ṣi-du-un-nu GAL-ú URU.ṣi-du-un-nu TUR |
| ii 3939 | URU.É-zi-it-te URU.ṣa-ri-ip-tú URU.ma-ḫal-li-ba |
| ii 4040 | URU.ú-šu-ú URU.ak-zi-bi URU.ak-ku-ú |
| ii 4141 | URU.MEŠ-šú dan-nu-ti É BÀD.MEŠ-ni a-šar ri-i-ti |
| ii 4242 | ù maš-qí-ti É tuk-la-ti-šú ra-šub-bat GIŠ.TUKUL |
| ii 4343 | daš-šur EN-ia is-ḫu-pu-šu-nu-ti-ma ik-nu-šu |
| ii 4444 | še-pu-ú-a mtu-ba-aʾ-lu i-na GIŠ.GU.ZA LUGAL-ti |
| ii 4545 | UGU-šú-un ú-še-šib-ma GUN man-da-at-tu be-lu-ti-ia |
| ii 4646 | šat-ti-šam la ba-aṭ-lu ú-kin ṣe-ru-uš-šú |
| ii 4747 | ša mmi-in-ḫi-im-mu URU.sam-si-mu-ru-na-a-a |
| ii 4848 | mtu-ba-aʾ-lu URU.ṣi-du-un-na-a-a |
| ii 4949 | mab-di-li-iʾ-ti URU.a-ru-da-a-a |
| ii 5050 | mú-ru-mil-ki URU.gu-ub-la-a-a |
| ii 5151 | mmi-ti-in-ti URU.as-du-da-a-a |
| ii 5252 | mbu-du-DINGIR KUR.É-mam-ma-na-a-a |
| ii 5353 | mkam-mu-su-na-ad-bi KUR.<ma>-ʾa-ba-a-a |
| ii 5454 | mda-a-ram-mu KUR.ú-du-um-ma-a-a |
| ii 5555 | LUGAL.MEŠ-ni KUR MAR.TU.KI ka-li-šú-un IGI.SÁ-e |
| ii 5656 | šad-lu-ti ta-mar-ta-šú-nu ka-bit-tu a-di 4-šú |
| ii 5757 | a-na maḫ-ri-ia iš-šu-nim-ma iš-ši-qu GÌR.II-ia |
| ii 5858 | ù mṣi-id-qa-a LUGAL URU.is-qa-al-lu-na |
| ii 5959 | ša la ik-nu-šú a-na ni-ri-ia DINGIR.MEŠ É AD-šú šá-a-šú |
| ii 6060 | DAM-su DUMU.MEŠ-šú DUMU.MUNUS.MEŠ-šú ŠEŠ.MEŠ-šú NUMUN É AD-šú |
| ii 6161 | as-su-ḫa-am-ma a-na KUR aš-šur.KI ú-ra-áš-šú |
| ii 6262 | mLUGAL-lu-dà-ri DUMU mru-kib-ti LUGAL-šú-nu maḫ-ru-ú |
| ii 6363 | UGU UN.MEŠ URU.is-qa-al-lu-na áš-kun-ma na-dan GUN |
| ii 6464 | kàd-re-e be-lu-ti-ia e-mid-su-ma i-šá-aṭ ab-šá-a-ni |
| ii 6565 | i-na me-ti-iq ger-ri-ia URU.É-da-gan-na |
| ii 6666 | URU.ia-ap-pu-ú URU.ba-na-a-a-bar-qa URU.a-zu-ru |
| ii 6767 | URU.MEŠ-ni ša mṣi-id-qa-a ša a-na GÌR.II-ia |
| ii 6868 | ár-ḫiš la ik-nu-šú al-me KUR-ud áš-lu-la šal-la-sún |
| ii 6969 | LÚ.GÌR.NÍTA.MEŠ LÚ.NUN.MEŠ ù UN.MEŠ URU.am-qar-ru-na |
| ii 7070 | ša mpa-di-i LUGAL-šú-nu EN a-de-e ù ma-mit |
| ii 7171 | ša KUR aš-šur.KI bi-re-tu AN.BAR id-du-ma a-na mḫa-za-qi-ia-ú |
| ii 7272 | KUR.ia-ú-da-a-a id-di-nu-šú nak-riš a-na an-zil-li e-pu-šú |
| ii 7373 | ip-làḫ lib-ba-šú-un LUGAL.MEŠ-ni KUR.mu-ṣu-ri |
| ii 7474 | LÚ.ERIM.MEŠ GIŠ.PAN GIŠ.GIGIR.MEŠ ANŠE.KUR.RA.MEŠ ša LUGAL KUR.me-luḫ-ḫi |
| ii 7575 | e-mu-qí la ni-bi ik-te-ru-nim-ma il-li-ku |
| ii 7676 | re-ṣu-us-su-un i-na ta-mir-ti URU.al-ta-qu-ú |
| ii 7777 | el-la-mu-ú-a si-id-ru šit-ku-nu ú-šá-ʾa-lu |
| ii 7878 | GIŠ.TUKUL.MEŠ-šú-un i-na tukul-ti daš-šur EN-ia it-ti-šú-un |
| ii 7979 | am-da-ḫi-iṣ-ma áš-ta-kan BAD₅.BAD₅-šú-un |
| ii 8080 | LÚ.EN GIŠ.GIGIR.MEŠ ù DUMU.MEŠ LUGAL KUR.mu-ṣu-ra-a-a |
| ii 8181 | a-di LÚ.EN GIŠ.GIGIR.MEŠ ša LUGAL KUR.me-luḫ-ḫi bal-ṭu-su-un |
| ii 8282 | i-na MURUB₄ tam-ḫa-ri ik-šu-da ŠU.II-a-a URU.al-ta-qu-u |
| ii 8383 | URU.ta-am-na-a al-me KUR-ud áš-lu-la šal-la-sún |
| Column iii | |
| iii 1iii 1 | a-na URU.am-qar-ru-na aq-rib-ma |
| iii 22 | LÚ.GÌR.NÍTA.MEŠ LÚ.NUN.MEŠ ša ḫi-iṭ-ṭu ú-šab-šu-ú a-duk-ma |
| iii 33 | i-na ⸢di-ma-a-te si-ḫir-ti⸣ URU a-lul pag-ri-šú-un |
| iii 44 | ⸢DUMU.MEŠ⸣ URU e-piš an-ni ù gíl-la-ti |
| iii 55 | a-na šal-la-ti am-nu si-it-tu-te-šú-nu |
| iii 66 | la ba-bil ḫi-ṭi-ti ù gul-lul-ti ša a-ra-an-šú-nu |
| iii 77 | la ib-šu-ú uš-šur-šú-un aq-bi mpa-di-i |
| iii 88 | LUGAL-šú-nu ul-tu qé-reb URU.ur-sa-li-im-mu |
| iii 99 | ú-še-ṣa-am-ma i-na GIŠ.GU.ZA be-lu-ti UGU-šú-un |
| iii 1010 | ú-še-šib-ma man-da-at-tu be-lu-ti-ia |
| iii 1111 | ú-kin ṣe-ru-uš-šú ù mḫa-za-qi-a-ú |
| iii 1212 | KUR.ia-ú-da-a-a ša la ik-nu-šú a-na ni-ri-ia |
| iii 1313 | 46 URU.MEŠ-šú dan-nu-ti É BÀD.MEŠ ù URU.MEŠ TUR.MEŠ |
| iii 1414 | ša li-me-ti-šú-nu ša ni-ba la i-šu-ú |
| iii 1515 | i-na šuk-bu-us a-ram-me ù qit-ru-ub šu-pi-i |
| iii 1616 | mit-ḫu-ṣu zu-uk GÌR.II pil-ši nik-si u kal-ban-na-te |
| iii 1717 | al-me KUR-ud 2 ME LIM 1 ME 50 UN.MEŠ TUR GAL NITA ù MUNUS |
| iii 1818 | ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ GU₄.MEŠ |
| iii 1919 | ù ṣe-e-ni ša la ni-bi ul-tu qer-bi-šú-un ú-še-ṣa-am-ma |
| iii 2020 | šal-la-tiš am-nu šá-a-šú GIM MUŠEN qu-up-pi qé-reb URU.ur-sa-li-im-mu |
| iii 2121 | URU LUGAL-ti-šú e-sír-šú URU.ḪAL.ṢU.MEŠ UGU-šú |
| iii 2222 | ú-rak-kis-ma a-ṣe-e KÁ.GAL URU-šú ú-ter-ra |
| iii 2323 | ik-ki-bu-uš URU.MEŠ-šú ša áš-lu-la ul-tu qé-reb KUR-šú |
| iii 2424 | ab-tuq-ma a-na mmi-ti-in-ti LUGAL URU.as-du-di |
| iii 2525 | mpa-di-i LUGAL URU.am-qar-ru-na ù mGISSU-EN |
| iii 2626 | LUGAL URU.ḫa-zi-ti ad-din-ma ú-ṣa-aḫ-ḫir KUR-su |
| iii 2727 | e-li GUN maḫ-ri-ti na-dan šat-ti-šú-un |
| iii 2828 | man-da-at-tu kàd-re-e be-lu-ti-ia ú-rad-di-ma |
| iii 2929 | ú-kin ṣe-ru-uš-šú-un šu-ú mḫa-za-qi-a-ú |
| iii 3030 | pul-ḫi me-lam-me be-lu-ti-ia is-ḫu-pu-šu-ma |
| iii 3131 | LÚ.úr-bi ù LÚ.ERIM.MEŠ-šú SIG₅.MEŠ |
| iii 3232 | ša a-na dun-nu-un URU.ur-sa-li-im-mu URU LUGAL-ti-šú |
| iii 3333 | ú-še-ri-bu-ma ir-šu-ú til-la-a-ti |
| iii 3434 | it-ti 30 GUN KÙ.GI 8 ME GUN KÙ.BABBAR ni-siq-ti |
| iii 3535 | gu-uḫ-li ták-kàs-si NA₄.AN.ZA.GUL.ME GAL.MEŠ |
| iii 3636 | GIŠ.NÁ.MEŠ ZÚ GIŠ.GU.ZA.MEŠ né-me-di ZÚ KUŠ AM.SI |
| iii 3737 | ZÚ AM.SI GIŠ.ESI GIŠ.TÚG mim-ma šum-šú ni-ṣir-tú ka-bit-tú |
| iii 3838 | ⸢ù DUMU⸣.MUNUS.MEŠ-šú MUNUS.UN.MEŠ É.GAL-šú LÚ.NAR.MEŠ |
| iii 3939 | MUNUS.NAR.MEŠ a-na qé-reb NINA.KI URU be-lu-ti-ia |
| iii 4040 | EGIR-ia ú-še-bi-lam-ma a-na na-dan man-da-at-ti |
| iii 4141 | ù e-peš ARAD-ú-ti iš-pu-ra rak-bu-šú |
| iii 4242 | i-na 4-e ger-ri-ia daš-šur be-lí ú-tak-kil-an-ni-ma |
| iii 4343 | um-ma-na-te-ia gap-šá-a-te ad-ke-ma a-na KUR.É-mia-kin₇ |
| iii 4444 | a-la-ku aq-bi i-na me-ti-iq ger-ri-ia |
| iii 4545 | ša mšu-zu-bi LÚ.kal-dà-a-a a-šib qé-reb ÍD.a-gam-me |
| iii 4646 | i-na URU.bi-it-tu-ú-tu áš-ta-kan BAD₅.BAD₅-šú |
| iii 4747 | šu-ú ḫur-ba-šú ta-ḫa-zi-ia UGU-šú im-qut-ma |
| iii 4848 | it-ru-ku lib-bu-šú ki-ma az-za-ri e-diš ip-par-šid-ma |
| iii 4949 | ul in-na-mir a-šar-šú pa-an ni-ri-ia ú-ter-ma |
| iii 5050 | a-na KUR.É-mia-kin₇ aṣ-ṣa-bat ḫar-ra-nu |
| iii 5151 | šu-ú mdAMAR.UTU-IBILA-SUM.NA ša ina a-lak |
| iii 5252 | ger-ri-ia maḫ-re-e BAD₅.BAD₅-šú áš-ku-nu-ma |
| iii 5353 | ú-par-ri-ru el-lat-su ri-gim GIŠ.TUKUL.MEŠ-ia dan-nu-ti |
| iii 5454 | ù ti-ib MÈ-ia ez-zi e-dur-ma |
| iii 5555 | DINGIR.MEŠ ma-rak KUR-šú i-na KI.TUŠ-šú-nu id-ke-ma qé-reb GIŠ.MÁ.MEŠ |
| iii 5656 | ú-šar-kib-ma a-na URU.na-gi-te-ra-aq-qí |
| iii 5757 | ša qa-bal tam-tim iṣ-ṣu-riš ip-pa-riš ŠEŠ.MEŠ-šú NUMUN É AD-šú |
| iii 5858 | ša ú-maš-še-ru a-ḫi tam-tim a-di si-it-ti UN.MEŠ KUR-šú |
| iii 5959 | ul-tu KUR.É-mia-kin₇ qé-reb ÍD.a-gam-me u ap-pa-ra-te |
| iii 6060 | ú-še-ṣa-am-ma šal-la-tiš am-nu ú-ter-ma URU.MEŠ-šú ap-pul |
| iii 6161 | aq-qur ú-še-me kar-meš UGU EN sa-li-me-šú |
| iii 6262 | LUGAL KUR.ELAM.MA.KI na-mur-ra-tum at-bu-uk |
| iii 6363 | i-na ta-a-a-ar-ti-ia mdaš-šur-na-din-MU DUMU reš-tu-ú |
| iii 6464 | tar-bit bir-ki-ia i-na GIŠ.GU.ZA be-lu-ti-šú ú-še-šib-ma |
| iii 6565 | DAGAL-tum KUR EME.GI₇ u URI.KI ú-šad-gil pa-nu-uš-šú |
| iii 6666 | i-na 5 ger-ri-ia ba-ḫu-la-te URU.tu-mur-ri |
| iii 6767 | URU.šá-ru-um URU.e-za-ma URU.kip-šú URU.ḫal-bu-da |
| iii 6868 | URU.qu-ú-a URU.qa-na ša GIM qin-ni TI₈.MUŠEN |
| iii 6969 | a-šá-red MUŠEN.ḪI.A ṣe-er zuq-ti KUR.ni-pur KUR-i mar-ṣi |
| iii 7070 | šu-bat-sún šit-ku-na-at-ma la kit-nu-šú a-na ni-i-ri |
| iii 7171 | i-na GÌR.II KUR.ni-pur ka-ra-ši ú-šá-áš-kin-ma |
| iii 7272 | it-ti LÚ.qur-bu-ti GÌR.II-ia na-as-qu-ti |
| iii 7373 | ù LÚ.ERIM.MEŠ ta-ḫa-zi-ia la ga-me-lu-ti |
| iii 7474 | a-na-ku GIM AM ek-di pa-nu-uš-šú-un aṣ-bat |
| iii 7575 | ḫur-ri na-ḫal-li na-at-bak KUR-i me-le-e mar-ṣu-ti |
| iii 7676 | i-na GIŠ.GU.ZA áš-tam-di-iḫ a-šar a-na GIŠ.GU.ZA šup-šu-qu |
| iii 7777 | i-na GÌR.II-ia áš-taḫ-ḫi-iṭ GIM ar-me a-na zuq-ti šá-qu-te |
| iii 7878 | ṣe-ru-uš-šú-un e-li a-šar bir-ka-a-a |
| iii 7979 | ma-na-aḫ-tu i-šá-a ṣe-er NA₄ KUR-i ú-šib-ma |
| iii 8080 | A.MEŠ KUŠ.na-a-di ka-ṣu-ti a-na ṣu-um-me-ia lu áš-ti |
| iii 8181 | i-na ŠU.SI.MEŠ ḫur-šá-a-ni ar-de-šú-nu-ti-ma |
| iii 8282 | áš-ta-kan taḫ-ta-šú-un URU.MEŠ-šú-nu KUR-ma |
| Column iv | |
| iv 1iv 1 | áš-⸢lu-la šal⸣-la-sún ap-pul aq-qur ina dGIŠ.BAR aq-mu |
| iv 22 | pa-an ni-ri-ia ú-ter-ma ṣe-er mma-ni-ia-e |
| iv 33 | LUGAL URU.uk-ki šad-da-a-a-e la kan-še aṣ-ṣa-bat ḫar-ra-nu |
| iv 44 | ur-ḫi la pe-tu-ti ṭu-di pa-áš-qu-ti ša la-pa-an |
| iv 55 | KUR.MEŠ mar-ṣu-ti ul-la-nu-ú-a qé-reb-šú-un |
| iv 66 | ma-am-man la il-li-ku LUGAL.MEŠ-ni pa-ni maḫ-ru-ti |
| iv 77 | i-na GÌR.II KUR.a-na-ra ù KUR.up-pa KUR.MEŠ dan-nu-ti |
| iv 88 | ka-ra-ši ú-šá-áš-kin-ma ana-ku i-na GIŠ.GU.ZA né-me-di |
| iv 99 | it-ti LÚ.ERIM.MEŠ ta-ḫa-zi-ia gít-ma-lu-ti |
| iv 1010 | i-na ne-re-bi-šú-un pi-qu-ti šu-nu-ḫi-iš e-ru-um-ma |
| iv 1111 | mar-ṣi-iš e-te-el-la-a ŠU.SI.MEŠ KUR.MEŠ pa-áš-qa-a-ti |
| iv 1212 | šu-ú mma-ni-ia-e tur-bu-uʾ GÌR.II ERIM.ḪI.A-ia |
| iv 1313 | e-mur-ma URU.uk-ku URU LUGAL-ti-šú e-zib-ma |
| iv 1414 | a-na ru-qé-e-ti in-na-bit URU.uk-ku al-me KUR-ud |
| iv 1515 | áš-lu-la šal-la-su mim-ma šum-šu NÍG.ŠU NÍG.GA |
| iv 1616 | ni-ṣir-ti É.GAL-šú ul-tu qer-bé-šú |
| iv 1717 | ú-še-ṣa-am-ma šal-la-tiš am-nu ù 33 URU.MEŠ |
| iv 1818 | ša pa-a-ṭi na-gi-šú KUR-ud-ma UN.MEŠ ANŠE.MEŠ |
| iv 1919 | GU₄.MEŠ ù ṣe-e-ni ul-tu qer-bi-šú-un |
| iv 2020 | áš-lu-la ap-pu-ul aq-qur i-na dGIŠ.BAR aq-mu |
| iv 2121 | i-na 6 ger-ri-ia si-it-ti UN.MEŠ KUR.É-mia-kin₇ |
| iv 2222 | ša la-pa-an GIŠ.TUKUL.MEŠ-ia dan-nu-ti GIM sér-re-me |
| iv 2323 | ig-ru-ru DINGIR.MEŠ ma-rak KUR-šú-un i-na KI.TUŠ-šú-nu |
| iv 2424 | id-ku-ma tam-tum GAL-tum ša ṣi-it dUTU-ši |
| iv 2525 | e-bi-ru-ma i-na URU.na-gi-te ša KUR.ELAM.MA.KI id-du-ú |
| iv 2626 | šu-bat-sún i-na GIŠ.MÁ.MEŠ KUR.ḫat-ti tam-tum lu e-bir |
| iv 2727 | URU.na-gi-tu URU.na-gi-tu-di-iʾ-bi-na a-di KUR.ḫi-il-mu |
| iv 2828 | URU.pil-la-tu ù KUR.ḫu-pa-pa-nu na-ge-e |
| iv 2929 | ša KUR.ELAM.MA.<KI> KUR-ud UN.MEŠ KUR.É-mia-kin₇ a-di DINGIR.MEŠ-šú-nu |
| iv 3030 | ù UN.MEŠ ša LUGAL KUR.ELAM.MA.KI áš-lu-lam-ma la e-zi-ba mul-taḫ-ṭu |
| iv 3131 | qé-reb GIŠ.MÁ.MEŠ ú-šar-kib-ma a-na a-ḫa-an-na-a |
| iv 3232 | ú-še-bi-ra-ma ú-šá-aṣ-bi-ta ḫar-ra-an KUR aš-šur.KI |
| iv 3333 | URU.MEŠ ša qé-reb na-ge-e šá-tu-nu ap-pul aq-qur |
| iv 3434 | i-na dGIŠ.BAR aq-mu a-na DU₆ ù kar-me ú-ter |
| iv 3535 | i-na ta-a-a-ar-ti-ia mšu-zu-bu DUMU KÁ.DINGIR.RA.KI |
| iv 3636 | ša i-na e-ši-ti KUR be-lut KUR EME.GI₇ ù URI.KI |
| iv 3737 | ra-ma-nu-uš ú-ter-ru i-na ta-ḫa-az EDIN |
| iv 3838 | BAD₅.BAD₅-šú áš-kun bal-ṭu-su i-na ŠU.II aṣ-bat-su |
| iv 3939 | šum-man-nu ù bi-re-tu AN.BAR ad-di-šu-ma a-na KUR aš-šur.KI |
| iv 4040 | ú-ra-áš-šú LUGAL KUR.ELAM.MA.KI ša Á.II-šú is-ḫu-ru-ma |
| iv 4141 | il-li-ku re-ṣu-us-su BAD₅.BAD₅-šú áš-kun |
| iv 4242 | ILLAT.MEŠ-šú ú-sap-pi-iḫ-ma ú-par-ri-ir pu-ḫur-šú |
| iv 4343 | i-na ⸢7⸣-e ger-ri-ia daš-šur be-lí ú-tak-kil-an-ni-ma |
| iv 4444 | a-na KUR.ELAM.MA.KI lu al-lik URU.É-mḫa-ʾi-i-ri |
| iv 4545 | URU.ra-ṣa-a URU.MEŠ-ni ša mi-ṣir KUR aš-šur.KI |
| iv 4646 | ša i-na tar-ṣi AD-ia LÚ.e-la-mu-ú e-ki-mu da-na-niš |
| iv 4747 | i-na me-ti-iq ger-ri-ia KUR-ma áš-lu-la šal-la-sún |
| iv 4848 | LÚ.ERIM.MEŠ šu-lu-ti-ia ú-še-rib qé-reb-šú-un |
| iv 4949 | a-na mi-ṣir KUR aš-šur.KI ú-ter-ram-ma |
| iv 5050 | ŠU.II LÚ.GAL URU.ḪAL.ṢU BÀD.AN.KI am-nu |
| iv 5151 | URU.bu-bé-e URU.dun-ni-dUTU URU.É-mri-si-ia |
| iv 5252 | URU.É-aḫ-la-me-e URU.du-ru URU.dan-nat-msu-la-a-a |
| iv 5353 | URU.ši-li-ib-tu URU.É-ma-ṣu-si URU.kar-mMU-BA-šá |
| iv 5454 | URU.É-gi-iṣ-ṣi URU.É-mkàt-pa-la-ni URU.É-mim-bi-ia |
| iv 5555 | URU.ḫa-ma-nu URU.É-mar-ra-bi URU.bu-ru-tu |
| iv 5656 | URU.di-in-tu-ša-msu-la-a-a URU.di-in-tu-- |
| iv 5757 | ša-mdDUMU-É-KAR-ir URU.ḫar-ri-áš-la-ke-e URU.ra-ba-a-a |
| iv 5858 | URU.ra-a-su URU.ak-ka-ba-ri-na URU.DU₆-mú-ḫu-ri |
| iv 5959 | URU.ḫa-am-ra-nu URU.na-ṭi-tu a-di URU.MEŠ ša né-re-bi |
| iv 6060 | ša URU.É-mbu-na-ki URU.DU₆-dḫu-um-bi URU.di-in-tu-- |
| iv 6161 | ša-mdu-me-DINGIR URU.É-mú-bi-ia URU.ba-al-ti-li-šir |
| iv 6262 | URU.ta-qab-li-šir URU-ša-na-qi-da-a-ti |
| iv 6363 | URU.ma-su-tú-šap-li-tu URU.sa-ar-ḫu-de-e-ri URU.a-lum-ša-GAŠAN-É |
| iv 6464 | URU.É-mPAP.MEŠ-SUM.NA URU.il-te-ú-ba 34 URU.MEŠ dan-nu-ti |
| iv 6565 | a-di URU.MEŠ-ni TUR.MEŠ ša li-me-ti-šú-nu |
| iv 6666 | ša ni-ba la i-šu-ú al-me KUR-ud áš-lu-la šal-la-sún |
| iv 6767 | ap-pul aq-qur i-na dGIŠ.BAR aq-mu |
| iv 6868 | qu-tur na-aq-mu-ti-šú-nu GIM MURU₉ kab-ti |
| iv 6969 | pa-an AN-e rap-šu-ti ú-šak-tim iš-me-ma ki-šit-ti |
| iv 7070 | URU.MEŠ-šú mNÍG.DU-dna-ḫu-un-du LÚ.e-la-mu-ú im-qut-su |
| iv 7171 | ḫa-at-tum si-it-ti URU.MEŠ-šú a-na dan-na-ti ú-še-rib |
| iv 7272 | šu-ú URU.ma-dak-te URU LUGAL-ti-šú e-zib-ma |
| iv 7373 | a-na URU.ḫa-i-da-la ša qé-reb šad-di-i SÙ.MEŠ |
| iv 7474 | iṣ-ṣa-bat ḫar-ra-nu a-na URU.ma-dak-te URU LUGAL-ti-šú |
| iv 7575 | a-la-ku aq-bi ITI.tam-ḫi-ri EN.TE.NA dan-nu |
| iv 7676 | e-ru-ba-am-ma šá-mu-tum ma-at-tum ú-šá-az-ni-na |
| iv 7777 | ŠÈG.MEŠ-šá ŠÈG.MEŠ ù šal-gu na-aḫ-li na-at-bak |
| iv 7878 | šad-di-i a-du-ra pa-an ni-ri-ia ú-ter-ma |
| iv 7979 | a-na NINA.KI aṣ-ṣa-bat ḫar-ra-nu i-na u₄-me-šu-ma |
| iv 8080 | i-na qí-bit daš-šur EN-ia mNÍG.DU-dna-ḫu-un-di |
| Column v | |
| v 1v 1 | LUGAL KUR.ELAM.MA.KI 3 ITI ul ú-mal-li-ma |
| v 22 | i-na u₄-um la ši-im-ti-šú ur-ru-ḫiš im-tu-ut |
| v 33 | EGIR-šú mum-ma-an-me-na-nu la ra-áš ṭè-e-me ù mil-ki |
| v 44 | ŠEŠ-šú dup-pu-us-su-ú i-na GIŠ.GU.ZA-šú ú-šib-ma |
| v 55 | i-na 8-e ger-ri-ia EGIR mšu-zu-bi is-se-ḫu-ma |
| v 66 | DUMU.MEŠ KÁ.DINGIR.RA.KI GAL₅.LÁ.MEŠ lem-nu-ti KÁ.GAL.MEŠ URU |
| v 77 | ú-di-lu ik-pu-ud lib-ba-šú-nu a-na e-peš GIŠ.LÁ |
| v 88 | mšu-zu-bu LÚ.kal-dà-a-a eṭ-lum dun-na-mu-ú |
| v 99 | šá la i-šu-ú bir-ki ARAD da-gíl pa-an LÚ.EN.NAM |
| v 1010 | URU.la-ḫi-ri LÚ.a-ra-[x x]-qu mun-nab-tu |
| v 1111 | a-mir da-me ḫab-bi-lu ⸢ṣe-ru⸣-uš-šú ip-ḫu-ru-ma |
| v 1212 | qé-reb ÍD.a-gam-me ú-ri-⸢du-ma⸣ ú-šab-šu-u si-ḫu |
| v 1313 | a-na-ku ni-tum al-me-šu-ma ⸢nap⸣-šá-tuš ú-si-qa |
| v 1414 | la-pa-an ḫat-ti ù né-eb-re-ti a-na KUR.ELAM.MA.KI in-na-bit |
| v 1515 | ki-i ri-kil-ti ù gíl-la-ti ṣe-ru-uš-šú ba-ši-i |
| v 1616 | ul-tu KUR.ELAM.MA.KI i-ḫi-šam-ma qé-reb šu-an-na.KI e-ru-ub |
| v 1717 | LÚ.KÁ.DINGIR.RA.KI.MEŠ a-na la si-ma-te-šú i-na GIŠ.GU.ZA |
| v 1818 | ú-še-ši-bu-šú be-lu-ut KUR EME.GI₇ u ⸢URI.KI⸣ ú-šad-gi-lu pa-ni-šú |
| v 1919 | É NÍG.GA ša é-sag-íl ip-[x]-ma KÙ.GI KÙ.BABBAR |
| v 2020 | ša dEN dNUMUN-DÙ-tum NÍG.[x] É DINGIR.MEŠ-šú-nu ú-še-ṣu-ni |
| v 2121 | a-na mum-ma-an-me-na-nu LUGAL KUR.ELAM.MA.KI ša la i-šu-ú |
| v 2222 | ṭè-e-mu ù mil-ki ú-še-bi-lu-uš ṭa-aʾ-tú |
| v 2323 | pu-uḫ-ḫir um-man-ka di-ka-a KARAŠ-ka |
| v 2424 | a-na KÁ.DINGIR.RA.KI ḫi-šam-ma i-da-a-ni i-zi-iz-ma |
| v 2525 | tu-kul-ta-ni lu at-ta šu-ú LÚ.e-la-mu-ú |
| v 2626 | ša i-na a-lak ger-ri-ia maḫ-ri-ti ša KUR.ELAM.MA.KI |
| v 2727 | URU.MEŠ-šú ak-šud-du-ma ú-ter-ru a-na kar-me |
| v 2828 | lib-bu-uš ul iḫ-su-us ṭa-aʾ-tu im-ḫur-šú-nu-ti-ma |
| v 2929 | ERIM.ḪI.A-šú KARAŠ-su ú-pa-ḫir-ma GIŠ.GIGIR.MEŠ GIŠ.ṣu-um-bi |
| v 3030 | e-šu-ra ANŠE.KUR.RA.MEŠ ANŠE.KUNGA.MEŠ is-ni-qa ṣi-in-di-šú |
| v 3131 | KUR.par-su-áš KUR.an-za-an KUR.pa-ši-ru KUR.el-li-pi |
| v 3232 | LÚ.ia-as-ìl LÚ.la-kab-eri LÚ.ḫa-ar-zu-nu |
| v 3333 | URU.du-um-mu-qu URU.su-la-a-a URU.sa-am-ú-na |
| v 3434 | DUMU mdAMAR.UTU-IBILA-SUM.NA KUR.É-ma-di-ni KUR.É-ma-muk-ka-na |
| v 3535 | KUR.É-mšil-la-na KUR.É-msa-a-la UD.UD.AG.KI URU.la-ḫi-ru |
| v 3636 | LÚ.pu-qu-du LÚ.gam-bu-lum LÚ.ḫa-la-tu LÚ.ru-ʾu-u-a |
| v 3737 | LÚ.ú-bu-lum LÚ.ma-la-ḫu LÚ.ra-pi-qu |
| v 3838 | LÚ.ḫi-in-da-ru LÚ.da-mu-nu kit-ru GAL-ú |
| v 3939 | ik-te-ra it-ti-šú gi-ip-šu-su-un ú-ru-uḫ |
| v 4040 | KUR URI.KI iṣ-ba-tu-nim-ma a-na KÁ.DINGIR.RA.KI te-bu-ni |
| v 4141 | a-di mšu-zu-bi LÚ.kal-dà-a-a LUGAL KÁ.DINGIR.RA.KI |
| v 4242 | a-na a-ḫa-meš iq-ru-bu-ma pu-ḫur-šú-nu in-nen-du |
| v 4343 | ki-ma ti-bu-ut a-ri-bi ma-aʾ-di ša pa-an šat-ti |
| v 4444 | mit-ḫa-riš a-na e-peš tuq-ma-ti te-bu-ú-ni |
| v 4545 | ṣe-ru-ú-a SAḪAR.ḪI.A GÌR.II-šú-nu GIM MURU₉ kab-te |
| v 4646 | ša dun-ni e-ri-ia-a-ti pa-an AN-e rap-šu-ti |
| v 4747 | ka-ti-im el-la-mu-ú-a i-na URU.ḫa-lu-le-e |
| v 4848 | ša ki-šad ÍD.IDIGNA šit-ku-nu si-dir-ta |
| v 4949 | pa-an maš-qí-ia ṣab-tu-ma ú-šá-ʾa-lu GIŠ.TUKUL.MEŠ-šú-un |
| v 5050 | a-na-ku a-na daš-šur d30 dUTU dEN dMUATI dU.GUR |
| v 5151 | dINANNA ša NINA.KI dINANNA ša URU.LÍMMU-DINGIR DINGIR.MEŠ ti-ik-li-ia |
| v 5252 | a-na ka-šá-di LÚ.KÚR dan-ni am-ḫur-šú-nu-ti-ma |
| v 5353 | su-pe-e-a ur-ru-ḫiš iš-mu-ú il-li-ku |
| v 5454 | re-ṣu-ti la-ab-biš an-na-dir-ma at-tal-bi-šá |
| v 5555 | si-ri-ia-am ḫu-li-ia-am si-mat ṣi-il-te |
| v 5656 | a-pi-ra ra-šu-ú-a i-na GIŠ.GIGIR MÈ-ia ṣir-ti |
| v 5757 | sa-pi-na-at za-ʾi-i-ri i-na ug-gat lib-bi-ia |
| v 5858 | ar-ta-kab ḫa-an-ṭiš GIŠ.PAN dan-na-tum |
| v 5959 | ša daš-šur ú-šat-li-ma i-na ŠU.II-ia aṣ-bat |
| v 6060 | GIŠ.šil-ta-ḫu pa-ri-iʾ nap-šá-te at-muḫ rit-tu-u-a |
| v 6161 | ṣe-er gi-mir um-ma-na-a-ti na-ki-ri lem-nu-ti |
| v 6262 | ṣar-piš u₄-mì-iš al-sa-a GIM dIŠKUR áš-gu-um |
| v 6363 | i-na qí-bit daš-šur EN GAL EN-ia a-na šid-di ù pu-te |
| v 6464 | GIM ti-ib me-ḫe-e šam-ri a-na LÚ.KÚR a-zi-iq |
| v 6565 | i-na GIŠ.TUKUL.MEŠ daš-šur EN-ia ù ti-ib MÈ-ia |
| v 6666 | ez-zi i-rat-su-un a-né-eʾ-ma suḫ-ḫur-ta-šú-nu |
| v 6767 | áš-kun ERIM.ḪI.A na-ki-ri i-na uṣ-ṣi mul-mul-li |
| v 6868 | ú-šá-qir-ma gim-ri ADDA.MEŠ-šú-nu ú-pal-li-šá |
| v 6969 | UD-zi-zi-iš mdḫu-um-ba-an-un-da-šá LÚ.na-gi-ru |
| v 7070 | ša LUGAL KUR.ELAM.MA.KI eṭ-lum pit-qu-du mu-ma-ʾe-er ERIM.ḪI.A-šú |
| v 7171 | tu-kul-ta-šú GAL-ú a-di LÚ.GAL.MEŠ-šú |
| v 7272 | ša GÍR šib-bi KÙ.GI šit-ku-nu ù i-na ḪAR.MEŠ |
| v 7373 | as-pi KÙ.GI ru-uš-ši-i ruk-ku-sa rit-ti-šú-un |
| v 7474 | ki-ma šu-ú-ri ma-ru-ti ša na-du-ú šum-man-nu |
| v 7575 | ur-ru-ḫiš ú-pal-<liq>-šú-nu-ti-ma áš-ku-na taḫ-ta-šú-un |
| v 7676 | ki-ša-da-te-šú-nu ú-nak-kis as-li-iš |
| v 7777 | aq-ra-te nap-šá-te-šú-nu ú-par-ri-iʾ qù-ùʾ-iš |
| v 7878 | GIM ILLU gap-ši ša šá-mu-tum si-ma-ni ù-mun-ni-šú-nu |
| v 7979 | ú-šar-da-a ṣe-er er-ṣe-ti šá-di-il-te |
| v 8080 | la-as-mu-ti mur-ni-is-qí ṣi-mit-ti ru-ku-bi-ia |
| v 8181 | i-na da-me-šu-nu gap-šu-ti i-šal-lu-ú dÍD-iš |
| v 8282 | ša GIŠ.GIGIR MÈ-ia sa-pi-na-at rag-gi ù ṣe-ni |
| v 8383 | da-mu ù par-šú ri-it-mu-ku ma-gar-ru-uš |
| v 8484 | pag-ri qu-ra-di-šú-nu ki-ma ur-qí-ti |
| v 8585 | ú-mal-la-a EDIN sa-ap-sa-pa-te ú-na-kis-ma |
| Column vi | |
| vi 1vi 1 | bal-ta-šú-un a-bu-ut ki-ma bi-ni qiš-še-e |
| vi 22 | si-ma-ni ú-na-ak-kis qa-ti-šú-un |
| vi 33 | ḪAR.MEŠ as-pi KÙ.GI KI.SAG eb-bi šá rit-ti-šú-nu am-ḫur |
| vi 44 | i-na nam-ṣa-ri zaq-tu-ti ḫu-ṣa-an-ni-šú-nu ú-par-ri-iʾ |
| vi 55 | GÍR.MEŠ šib-bi KÙ.GI KÙ.BABBAR ša MURUB₄.MEŠ-šú-nu e-kim |
| vi 66 | si-it-ti LÚ.GAL.MEŠ-šú a-di mdMUATI-MU-iš-kun |
| vi 77 | DUMU mdAMAR.UTU-IBILA-SUM.NA ša la-pa-an ta-ḫa-zi-ia |
| vi 88 | ip-la-ḫu id-ku-ú i-da-šú-un bal-ṭu-su-un |
| vi 99 | i-na MURUB₄ tam-ḫa-ri it-mu-ḫa ŠU.II-a-a GIŠ.GIGIR.MEŠ |
| vi 1010 | a-di ANŠE.KUR.RA.MEŠ-ši-na ša ina qit-ru-ub ta-ḫa-zi dan-ni |
| vi 1111 | ra-ki-bu-ši-in de-ku-ma ù ši-na muš-šu-ra-ma |
| vi 1212 | ra-ma-nu-uš-šin it-ta-na-al-la-ka mit-ḫa-riš |
| vi 1313 | ú-ter-ra a-di 2 KASKAL.GÍD GE₆ il-li-ku |
| vi 1414 | da-ak-šu-nu ap-ru-us šu-ú mum-ma-an-me-na-nu |
| vi 1515 | LUGAL KUR.ELAM.MA.KI a-di LUGAL KÁ.DINGIR.RA.KI LÚ.na-sik-ka-ni |
| vi 1616 | ša KUR.kal-di a-li-kut Á.II-šú ḫur-ba-šú MÈ-ia GIM-le-e |
| vi 1717 | zu-mur-šu-un is-ḫu-up GIŠ.za-ra-te-šú-un ú-maš-še-ru-ma |
| vi 1818 | a-na šu-zu-ub ZI.MEŠ-šú-nu pag-ri um-ma-na-te-šú-nu ú-da-i-šú |
| vi 1919 | i-ti-qu ki-i ša at-mi TU.MUŠEN kuš-šu-di i-tar-ra-ku lib-bu-šú-un |
| vi 2020 | ši-na-te-šú-un ú-ṣa-ra-pu qé-reb GIŠ.GIGIR.MEŠ-šú-nu |
| vi 2121 | ú-maš-še-ru-ni zu-šú-un a-na ra-da-di-šú-nu |
| vi 2222 | GIŠ.GIGIR.MEŠ ANŠE.KUR.RA.MEŠ-ia ú-ma-ʾe-er ar-ki-šú-un |
| vi 2323 | mun-na-rib-šú-nu šá a-na nap-šá-a-ti ú-ṣu-ú |
| vi 2424 | a-šar i-kaš-šá-du ú-ra-sa-bu i-na GIŠ.TUKUL |
| vi 2525 | i-na u₄-me-šu-ma ul-⸢tu⸣ É.GAL MURUB₄ URU ša NINA.KI |
| vi 2626 | a-na ri-mit LUGAL-ti-ia ú-šak-li-lu |
| vi 2727 | a-na tab-ra-ti kiš-šat UN.MEŠ lu-le-e ú-mal-lu-ši |
| vi 2828 | É.GAL ku-tal-li ša a-na šu-te-šur ka-ra-ši |
| vi 2929 | pa-qa-a-di ANŠE.KUR.RA.MEŠ sa-na-qí mim-ma šum-šú |
| vi 3030 | ú-še-pi-šú LUGAL.MEŠ-ni a-li-kut maḫ-ri AD.MEŠ-ia |
| vi 3131 | tam-lu-šá ul ib-ši šu-bat-sa ṣu-uḫ-ḫu-rat-ma |
| vi 3232 | la nu-ku-lat e-piš-taš la-ba-riš u₄-me tem-me-en-šá |
| vi 3333 | e-niš-ma iš-da-šá ir-ma-a i-qu-pa re-šá-a-šá |
| vi 3434 | É.GAL ša-a-tu a-na si-ḫir-ti-šá aq-qur |
| vi 3535 | ki-šub-bu-ú ma-aʾ-du ul-tu qé-reb ú-šal-li |
| vi 3636 | ù ta-mir-ti URU ki-ma a-tar-tim-ma lu aṣ-ba-ta ina muḫ-ḫi |
| vi 3737 | lu uš-rad-di maš-kán É.GAL maḫ-ri-ti e-zib-ma |
| vi 3838 | i-na qaq-qar ú-šal-li ša ul-tu mal-di ÍD |
| vi 3939 | aṣ-ba-ta tam-la-a uš-mal-li 2 ME ti-ib-ki |
| vi 4040 | a-na e-la-ni ú-šaq-qí re-e-su i-na ITI še-me-e |
| vi 4141 | u₄-mu mit-ga-ri ṣe-er tam-le-e šá-a-tu ina nik-lat lib-bi-ia |
| vi 4242 | É.GAL NA₄.pi-i-li ù GIŠ.ere-ni né-peš-ti |
| vi 4343 | KUR.ḫa-at-ti ù É.GAL ṣi-ir-tu ep-šet KUR aš-šur.KI |
| vi 4444 | ša UGU maḫ-ri-ti ma-aʾ-diš šu-tu-rat ra-ba-ta |
| vi 4545 | ù nak-lat i-na ši-pir LÚ.ŠITIM.GAL-le-e |
| vi 4646 | en-qu-ti a-na mu-šab be-lu-ti-ia ú-še-piš |
| vi 4747 | GIŠ.ÙR.MEŠ GIŠ.ere-ni ṣi-ru-ti tar-bit KUR.ḫa-ma-nim |
| vi 4848 | KUR-i el-li ú-šat-ri-ṣa e-li-šin |
| vi 4949 | GIŠ.IG.MEŠ GIŠ.li-ia-ri me-ser URUDU nam-ri |
| vi 5050 | ú-rak-kis-ma ú-rat-ta-a KÁ.MEŠ-ši-in |
| vi 5151 | i-na NA₄.pi-i-li pe-ṣi-i ša i-na er-ṣe-et |
| vi 5252 | URU.ba-la-ṭa-a-a in-nam-ru dALAD.dLAMMA.MEŠ ṣi-ru-te |
| vi 5353 | ú-še-piš-ma im-na u šu-me-la ú-šá-aṣ-bi-ta |
| vi 5454 | SI.GAR-šin a-na šu-te-šur ṣal-mat SAG.DU pa-qa-di |
| vi 5555 | mur-ni-is-qí ANŠE.KUNGA.MEŠ a-ga-li-i til-li |
| vi 5656 | GIŠ.GIGIR.MEŠ GIŠ.at-ta-ra-te e-req-qí iš-pa-a-te |
| vi 5757 | til-pa-na-te ù uṣ-ṣi mim-ma šum-šú ú-nu-tu ta-ḫa-zi |
| vi 5858 | na-aṣ-ma-di ANŠE.KUR.RA.MEŠ ANŠE.KUNGA.MEŠ |
| vi 5959 | ša e-mu-qí ra-ba-a-te i-šu-ú šuk-nu-še a-na ni-ri |
| vi 6060 | ki-sal-la-šá KÁ-nu-ú ma-gal uš-rab-bi |
| vi 6161 | É.GAL šá-a-tu ul-tu uš-še-šá a-di na-bur-ri-šá |
| vi 6262 | ar-ṣip ú-šak-lil MU.SAR-e ši-ṭir šu-me-ia |
| vi 6363 | i-na qer-bi-šá áš-kun a-na ár-kàt UD.MEŠ |
| vi 6464 | i-na LUGAL.MEŠ-ni DUMU.MEŠ-ia ša daš-šur ù diš-tar |
| vi 6565 | a-na RE.É.UM-ut KUR ù UN.MEŠ i-nam-bu-ú |
| vi 6666 | zi-kir-šú e-nu-ma É.GAL šá-a-tú i-lab-bi-ru-ma |
| vi 6767 | en-na-ḫu NUN ar-ku-ú an-ḫu-sa lu-ud-diš |
| vi 6868 | MU.SAR-e ši-ṭir šu-me-ia li-mur-ma |
| vi 6969 | Ì.GIŠ lip-šu-uš UDU.SISKUR liq-qí a-na áš-ri-šú lu-ter |
| vi 7070 | daš-šur ù diš-tar ik-ri-bi-šú i-šem-mu-ú |
| vi 7171 | mu-nak-kir šiṭ-ri-ia ù šu-me-ia |
| vi 7272 | daš-šur EN GAL AD DINGIR.MEŠ nak-riš li-zi-is-su |
| vi 7373 | GIŠ.GIDRU ù GIŠ.GU.ZA li-kim-šu-ma lis-ki-pa BALA-šú |
| vi 7474 | ITI.ŠE.KIN.TAR UD.20.KAM li-mu mEN-IGI-a-ni |
| vi 7575 | LÚ.EN.NAM URU.gar-ga-⸢miš⸣ |