BM 091028 (RINAP 4 Esarhaddon 002, ex. 02) [Esarhaddon]

[...]-⸢ŠEŠ-SUM.NA⸣

[...] ⸢MAN dan-nu⸣

[...]-⸢šur.KI⸣

[...].GI₇ u URI.KI

[...] ⸢MAN⸣ KUR aš-šur.KI

[...].⸢NA⸣ MAN KUR aš-šur.KI

[...]-⸢ti⸣ aš-šur ^d30 ^dUTU

⸢^dAG⸣ ^d⸢AMAR⸣.UTU ^d15 ša NINA.KI

^d15 ša LÍMMU-DINGIR.KI DINGIR.MEŠ GAL.⸢MEŠ⸣ EN.MEŠ-šú

ul-tú ṣi-it ^dUTU-ši a-⸢di⸣ e-reb ^dUTU-ši

⸢it⸣-tal-lak-ú-ma ma-ḫi-ra la i-šu-u

ka-šid URU.ṣi-du-un-ni šá ina MURUB₄ tam-tim

sa-pi-nu gi-mir da-ád-me-šú

BÀD-šú ù šu-bat-su as-suḫ-ma

qé-reb tam-tim ad-di-i-ma

a-šar maš-kán-i-šú ú-ḫal-liq

^mab-di-mil-ku-ut-ti LUGAL-šu

ša la-pa-an GIŠ.TUKUL.MEŠ-ia

ina MURUB₄ tam-tim in-nab-tu

ki-ma nu-ú-ni ul-tú qé-reb tam-tim

a-bar-šu-ma ak-ki-sa qaq-qa-su

nak-mu NÍG.GA-šú KÙ.GI KÙ.BABBAR NA₄.MEŠ a-qar-tú

KUŠ AM.SI ZÚ AM.SI GIŠ.ESI GIŠ.TÚG

TÚG.lu-bul-ti GÙN u GADA mim-ma šum-šu

ni-ṣir-ti É.GAL-šú

a-na mu-ʾu-de-e áš-lu-la

UN.MEŠ-šú DAGAL.MEŠ šá ni-ba la i-šá-a

GU₄.MEŠ ù ṣe-e-ni ANŠE.MEŠ

a-bu-ka a-na qé-reb KUR aš-šur.KI

⸢ú⸣-pa-ḫir-ma LUGAL.MEŠ KUR.ḫat-ti

⸢ù⸣ a-ḫi tam-tim ka-li-šú-nu

⸢ina áš-ri⸣ šá-nim-ma URU ú-še-piš-ma

⸢URU⸣.[...]-⸢šur⸣-ŠEŠ-SUM.NA at-ta-bi ni-bit-su

UN.MEŠ ⸢ḫu⸣-bu-ut GIŠ.PAN-ia šá ⸢KUR⸣-i

ù tam-tim ṣi-it ^dUTU-⸢ši⸣

ina lìb-bi ú-še-ši-ib

LÚ.šu-ut SAG-ia LÚ.NAM UGU-šú-nu áš-kun

ù ^msa-an-du-ar-ri

LUGAL URU.kun-di URU.si-su-ú

LÚ.KÚR ak-ṣu la pa-lìḫ be-lu-ti-ia

ša DINGIR.MEŠ ú-maš-šìr-ú-ma

a-na KUR-i mar-ṣu-ti it-ta-kil

u ^mab-di-mil-ku-ut-ti LUGAL URU.ṣi-du-⸢ni⸣

a-na re-ṣu-ti-šú iš-⸢kun-ma⸣

MU DINGIR.MEŠ GAL.MEŠ a-na a-ḫa-meš iz-kur-u-ma

a-na e-mu-qi-šu-un it-⸢tak⸣-lu

⸢a⸣-na-ku a-na aš-šur EN-ia at-ta-kil-ma

⸢ki⸣-ma iṣ-ṣu-ri ul-tú qé-reb KUR-i

a-bar-⸢šu⸣-ma ak-⸢ki-sa qaq⸣-qa-⸢su⸣

áš-šú da-na-an ^daš-šur EN-ia

UN.MEŠ kul-lu₄-mi-im-ma

SAG.DU.MEŠ ^msa-an-du-ar-⸢ri⸣

ù ^mab-di-mi-il-ku-ut-⸢ti⸣

⸢ina ki⸣-šá-di LÚ.GAL.MEŠ-šú-un a-lul-⸢ma⸣

⸢it⸣-ti LÚ.⸢NAR⸣.MEŠ u ⸢GIŠ.ZÀ.MÍ⸣

ina re-bet NINA.KI e-te-[x x]-⸢iq⸣

šá-lil URU.ar-⸢za-a⸣

[...]-⸢ṭi na-ḫal KUR.mu⸣-[x]

x [...]

⸢a-di⸣ x x (x) [...]

⸢a-na KUR aš⸣-šur.KI [...]

ina ṭe-ḫi ⸢KÁ.GAL MURUB₄ URU šá NINA.KI⸣

it-ti a-si UR.⸢GI₇⸣ u ⸢ŠAḪ⸣

ú-še-šib-šú-⸢nu-ti⸣ ka-mì-iš

ù ^mte-uš-pa-⸢a KUR⸣.gi-mir-ra-a-a

ERIM-man-da šá a-⸢šar-šú⸣ ru-ú-qu

ina KI-tim KUR.ḫu-bu-uš-na

a-di gi-mir ERIM.ḪI.A-⸢šú ú⸣-ra-si-ba ina GIŠ.TUKUL

ka-bi-is ki-⸢šá-di UN⸣.MEŠ KUR.ḫi-lak-⸢ki⸣

šad-du-u₈-a a-ši-bu-ut ḫur-⸢šá⸣-ni

šá ṭe-ḫi KUR.ta-bal

šá UGU KUR.MEŠ-šú-nu it-tak-lu-ma

ul-tú u₄-me pa-ni la ik-nu-šú a-na ni-i-ri-ía

21 URU.MEŠ-šú-nu dan-nu-ti

a-di URU.MEŠ TUR.MEŠ šá li-me-ti-šú-nu

al-me ak-šud áš-lu-la šal-lat-sún

ap-pul aq-qur ina ⸢^d⸣GIŠ.BAR aq-mu

si-it-te-šú-nu ⸢ša⸣ ḫi-iṭ-ṭu

ù gul-lul-tú ⸢la⸣ i-šu-ú

kab-tu ni-ir be-lu-ti-ia e-mid-su-nu-ti

da-iš KUR.par-na-ki nak-ru ak-ṣu

a-ši-bu-te KUR.DU₆-a-šur-ri

ša i-na pi-i UN.MEŠ

URU.me-eḫ-ra-nu URU.pi-ta-nu

i-nam-bu-ú zi-kir-šú-un

mu-sap-pi-iḫ UN.MEŠ KUR.man-na-a-a

qu-tu-ú la sa-an-qu

šá um-ma-na-a-ti ^miš-pa-ka-a-a

KUR.áš-gu-za-a-a kit-ru la mu-še-zi-bi-šú

i-na-ru ina GIŠ.TUKUL

ṭa-rid ^mdMUATI-NUMUN-ZI-SI.SÁ A ^mdŠÚ-A-AŠ

šá a-na MAN KUR.e-lam-ti it-tak-lu-ma

la ú-še-zi-bu nap-šat-su

^mna-ʾi-id-^dmar-duk ŠEŠ-šú

áš-šú e-peš ARAD-ú-ti-ia

ul-tú qé-reb KUR.e-lam-ti in-nab-⸢tam-ma⸣

a-na NINA.KI URU be-lu-ti-ia

il-lik-am-ma ú-na-áš-ši-iq GÌR.II-⸢ia⸣

KUR tam-tim a-na si-ḫi-ir-ti-šá

ri-du-ut ŠEŠ-šú ú-šad-gíl pa-⸢nu-uš-šú⸣

na-bi-iʾ KUR.É-^mdak-kur-⸢ri⸣

⸢šá qé⸣-reb KUR.kal-di a-a-ab KÁ.DINGIR.KI

⸢ka-mu⸣-u ⸢^md⸣UTU-ib-⸢ni LUGAL-šu⸣

⸢is-ḫap-pu ḫab-bi-lu la pa-li-ḫu zik-ri EN EN.EN⸣

šá A.ŠÀ.⸢MEŠ DUMU.MEŠ KÁ.DINGIR.RA.KI⸣

u bár-sipa.KI ina ⸢pa⸣-ri-ik-te ⸢it-ba-lu-ma⸣

áš-šú a-na-ku ⸢pu-luḫ-ti EN⸣ u ^dMUATI i-du-u

A.ŠÀ.MEŠ ši-⸢na⸣-a-ti ú-⸢ter⸣-ma

pa-an DUMU.MEŠ KÁ.DINGIR.⸢KI⸣ u ⸢bár-sipa.KI⸣

ú-šad-gíl

^mdMUATI-šal-lim A ^mba-la-⸢su⸣

ina GIŠ.GU.ZA-šú ú-še-⸢šib-ma⸣

i-ša-ṭa ab-⸢šá-a⸣-ni

URU.a-du-mu-⸢tu⸣ URU dan-nu-tú ⸢KUR⸣.a-ri-bi

⸢šá ^md30-PAP.MEŠ-SU⸣ MAN KUR ⸢aš-šur⸣.KI

⸢AD ba-nu-u-a⸣ ik-šu-⸢du⸣-ma

(traces) GA-šú DINGIR.MEŠ-šú

[...]

[x]-⸢lu-lam-ma a-na KUR aš-šur.KI⸣

[x]-⸢qa-a⸣

[x x]-⸢za-DINGIR LUGAL KUR.a-ri-bi⸣

⸢it-ti⸣ ta-⸢mar-ti-šú ka-bit-ti⸣

a-⸢na NINA⸣.KI URU be-lu-⸢ti-ia⸣

il-lik-am-ma ú-na-áš-⸢ši-iq GÌR.II-ia⸣

áš-šú na-dan DINGIR.MEŠ-šú ú-ṣal-la-⸢a-ni-ma⸣

re-e-mu ar-ši-šu-⸢ma⸣

DINGIR.MEŠ šá-⸢tu⸣-nu an-ḫu-su-nu ud-diš-⸢ma⸣

da-na-an ^daš-šur EN-⸢ia⸣

u ši-ṭir MU-ia UGU-šú-nu ú-šá-áš-ṭir-⸢ma⸣

ú-ter-ma ad-din-šú

^fta-bu-u-a tar-bit É.GAL-ia

a-na LUGAL-ú-ti UGU-šú-nu áš-kun-⸢ma⸣

it-ti DINGIR.MEŠ-šá a-na KUR-šá ú-ter-⸢ši⸣

65 ANŠE.GAM.MAL.MEŠ UGU ma-da-at-te

AD-ia maḫ-ri-ti ú-rad-di-ma

ú-kin ṣe-ru-uš-šu

ar-ka ^mḫa-za-DINGIR šim-tú ú-bil-šú-ma

^mia-aʾ-lu-ú DUMU-šu

ina GIŠ.GU.ZA-šú ú-še-šib-ma

10 MA.NA KÙ.GI 1 LIM NA₄.MEŠ bé-ru-ti

50 ANŠE.GAM.MAL.MEŠ 1 LIM kun-zi ŠIM.ḪI.A

UGU ma-da-te AD-šú ú-rad-di-ma e-mid-⸢su⸣

KUR.ba-a-zu na-gu-u šá a-šar-šú ⸢ru⸣-u-⸢qu⸣

mi-šit na-ba-li qaq-qar MUN a-šar ṣu-ma-me

1 ME 40 KASKAL.GÍD qaq-qar ba-a-ṣi

pu-qut-tú u NA₄.ZÚ ṣa-bi-⸢ti⸣

20 KASKAL.GÍD qaq-qar MUŠ u GÍR.TAB

šá ki-ma kul-ba-bi ma-lu-u ú-ga-ru

20 KASKAL.GÍD KUR.ḫa-zu-ú šad-di NA₄.SAG.⸢GIL.MUD⸣

a-na EGIR-ia ú-maš-šir-ma e-ti-iq

šá ul-tu u₄-me ul-lu-⸢ti⸣

la il-li-ku LUGAL pa-ni maḫ-⸢ri⸣-ia

ina qí-bit ^daš-šur EN-ia

ina qer-bi-šú šal-ṭa-niš at-tal-⸢lak⸣

8 ⸢LUGAL⸣.MEŠ šá qé-reb na-ge-e šú-⸢a⸣-tú

a-duk DINGIR.MEŠ-šú-nu NÍG.ŠU-šú-nu NÍG.GA-šú-nu

u UN.MEŠ-šú-nu áš-lu-⸢la⸣ a-na ⸢qé-reb KUR aš-šur.KI⸣

^mla-a-a-le-⸢e LUGAL⸣ URU.ia-di-iʾ

⸢šá⸣ ul-tú la-pa-an GIŠ.TUKUL.MEŠ-⸢ia⸣ ip-par-ši-du

⸢šal⸣-la-at DINGIR.MEŠ-šú iš-⸢me-e-ma⸣

a-na NINA.⸢KI⸣ URU be-lu-ti-ia

a-⸢di maḫ⸣-ri-ia il-lik-⸢am-ma⸣

ú-na-áš-ši-iq GÌR.II-ia

re-e-mu ar-ši-šu-ma aq-ta-bi-šú a-ḫu-⸢lap⸣

DINGIR.MEŠ-šú šá áš-lu-la ⸢da⸣-na-⸢an⸣ aš-šur EN-ia

UGU-šú-nu áš-ṭur-ma ú-⸢ter-ma ad-din-šú⸣

na-ge-e KUR.ba-a-zi šu-a-tú

ú-šad-gíl pa-nu-uš-šu

⸢GUN⸣ man-⸢da-at⸣-tú be-lu-ti-⸢ia⸣

ú-kin ṣe-ru-uš-šu

^mEN-BA-šá A ^mbu-na-ni LÚ.gam-bu-⸢la⸣-a-a

šá ina 12 ⸢KASKAL⸣.GÍD qaq-qar ina A.MEŠ u ⸢GI⸣.AMBAR.MEŠ

ki-ma nu-ú-ni šit-ku-nu šub-tú

ina qí-bit aš-šur EN-ia ḫat-⸢tu⸣ im-qut-⸢su-ma⸣

ki-i ṭè-⸢em ra-ma-ni-šú⸣

bil-tú u man-⸢da⸣-at-⸢tú⸣

GU₄.MAḪ-ḫi ⸢šuk-lul⸣-ú-⸢tu⸣

(traces)

[...]

⸢ú-bi-lam-ma ú-na-áš-ši-iq GÌR.II-ia⸣

⸢re-e-mu ar⸣-ši-šu-ma ú-šar-ḫi-is-⸢su⸣ lìb-⸢bu⸣

⸢URU.šá-pi-i⸣-^d⸢EN⸣ URU dan-nu-ti-šú

⸢dan-na-as⸣-su ú-dan-nin-ma

šá-a-šú ⸢a-di LÚ⸣.ERIM.MEŠ GIŠ.PAN-šú ina ⸢lìb⸣-bi

ú-še-li-šu-ma

GIM GIŠ.IG ina IGI KUR.e-lam-ti e-di-il-šú

KUR.pa-tu-uš-ar-ra na-gu-u šá i-te-e É.⸢MUN⸣

šá qé-reb KUR.ma-da-a-a ru-qu-ti

šá pa-a-ṭi KUR.bi-ik-ni šad-di NA₄.ZA.GÌN

šá ina LUGAL.MEŠ AD.MEŠ-ia mám-ma la ik-bu-su

KI-tim KUR-šú-un

^mši-dir-pa-ar-na ^me-pa-ar-na

LÚ.EN.URU.MEŠ dan-nu-ti

ša la kit-nu-šu a-na ni-i-ri

šá-a-šú-nu a-di UN.MEŠ-šú-nu ANŠE.KUR.RA.MEŠ ru-ku-bi-šú-nu

GU₄.MEŠ ṣe-e-ni ANŠE.MEŠ ANŠE.ú-⸢du-ri⸣

šal-lat-sún ka-bit-tú áš-lu-la a-na KUR aš-⸢šur.KI⸣

^mup-pi-is LÚ.EN.URU ša URU.pa-ar-tak-ka

^mza-na-sa-na LÚ.EN.URU ša URU.pa-ar-tuk-ka

^mra-ma-te-ia LÚ.EN.URU ša URU.u-ra-ka-za-bar-na

KUR.ma-da-a-a šá a-šar-šú-nu ru-ú-qu

šá ina tar-ṣi LUGAL.MEŠ AD.MEŠ-ia KI-tim KUR aš-⸢šur.KI⸣

la ib-bal-ki-tu-nim-ma la ik-bu-su qaq-qar-⸢šá⸣

pu-luḫ-tú ra-šub-bat aš-šur EN-ia is-ḫup-šu-nu-ti-ma

ANŠE.mur-ni-is-qi GAL.MEŠ NA₄.ZA.GÌN ḫi-ip KUR-šú

a-na NINA.KI URU be-lu-ti-ia

iš-šu-nim-ma ú-na-áš-ši-qu GÌR.II-ia

áš-šú LÚ.EN.URU.MEŠ šá qa-a-tú id-ku-šu-nu-ti

be-lu-ú-ti ú-ṣal-lu-ma

e-ri-šu-in-ni kit-ru

LÚ.šu-ut SAG.MEŠ-ia LÚ.NAM.MEŠ

ša pa-a-ṭi KUR-šú-un

it-ti-šú-nu ú-ma-ʾe-er-ma

UN.MEŠ a-ši-bu-ut URU.MEŠ šá-tu-nu

⸢ik-bu-su⸣-ma ú-šak-niš-šú GÌR.II-uš-šú-un

⸢GUN⸣ man-da-⸢tú be⸣-lu-ti-ia šat-ti-šam-ma ú-kin ṣe-ru-šú-un

ul-tú ^daš-šur ^dUTU ^dEN u ^dAG

⸢^d15⸣ ša NINA.KI ^d15 ša LÍMMU-DINGIR.KI

UGU na-ki-⸢ri⸣-ia ina ⸢li⸣-i-ti

ú-šá-zi-⸢zu⸣-ni-ma am-ṣu-u ma-la lìb-bi-ia

ina ki-šit-ti na-ki-ri šad-lu-ú-ti

šá ina tu-kul-ti DINGIR.MEŠ GAL.MEŠ EN.MEŠ-ia

ik-šu-da qa-ta-a-a

eš-ret ma-ḫa-zi šá KUR aš-šur.KI

u KUR URI.KI ú-še-piš-ma

⸢KÙ⸣.BABBAR KÙ.GI ú-za-in-ma

ú-nam-me-ra ki-ma UTU-ši

ina ⸢u₄⸣-me-šu-ma É.GAL ma-šar-te

⸢ša qé⸣-reb URU.ni-na-a

⸢šá LUGAL⸣.MEŠ a-lik maḫ-ri AD.MEŠ-ia

⸢ú-še-pi⸣-šú a-na ⸢šu-te-šur KARAŠ⸣

⸢pa-qa-di⸣ ANŠE.mur-ni-is-qi ANŠE.KUNGA.MEŠ

[x] ⸢GIGIR⸣.MEŠ til-li ú-nu-ut MÈ

⸢u⸣ [x]-⸢la-at⸣ na-ki-ri gi-mir mim-ma ⸢šum-šú⸣

⸢ša^{? d}⸣aš-šur LUGAL DINGIR.MEŠ

⸢a-na eš-qí⸣ LUGAL-ti-ia iš-ru-ka

[...]-⸢mur⸣ ANŠE.KUR.RA.MEŠ

[...]-⸢uḫ GIŠ.GIGIR.MEŠ⸣

[...] x

⸢UN.MEŠ⸣ KUR.KUR ⸢ḫu-bu-ut GIŠ.PAN-ia⸣

⸢GIŠ⸣.al-lu tup-šik-ku ú-šá-áš-ši-šu-⸢nu-ti-ma⸣

il-bi-nu SIG₄.ḪI.⸢A⸣

É.GAL.TUR.RA ⸢šu⸣-a-⸢tú⸣

a-na si-ḫi-ir-⸢ti-šá⸣ aq-qur-⸢ma⸣

qaq-qa-ru ma-aʾ-du GIM a-tar-tim-⸢ma⸣

ul-tú lìb-bi A.ŠÀ.MEŠ ab-tuq-ma

e-li-šá ú-rad-di

ina NA₄.pi-i-li NA₄ KUR-i dan-ni

tam-la-a uš-ma-al-li

ad-ke-e-ma 22 LUGAL.MEŠ KUR.ḫat-ti

šá a-ḫi tam-tim u MURUB₄ tam-tim ka-li-šú-nu

ú-ma-ʾe-er-šu-nu-ti-ma

GIŠ.ÙR.MEŠ GAL.MEŠ GIŠ.tim-me MAḪ.MEŠ

GIŠ.a-dáp-pi GIŠ.EREN GIŠ.ŠUR.MÌN

ul-tu qé-reb KUR.si-ra-ra KUR.lab-na-na

MUNUS.^dLAMMA.MEŠ MUNUS.ÁB.ZA.ZA-a-te

NA₄.KUN₄.MEŠ a-gúr-⸢ri⸣

ša NA₄.GIŠ.NU₁₁.GAL NA₄.^dŠE.⸢TIR⸣

NA₄.DÚR.MI.NA NA₄.DÚR.MI.NA.BÀN.⸢DA⸣

NA₄.EN.GI.SA₆ NA₄.a-lal-⸢lum⸣

NA₄.GI.RIM.ḪI.LI.BA ul-tú qé-reb ḫur-šá-⸢ni⸣

a-šar nab-ni-ti-šú-nu

a-na ḫi-šiḫ-ti É.GAL-⸢ia⸣

mar-ṣi-iš pa-áš-qi-⸢iš⸣

a-na NINA.KI ú-šal-di-du-u-⸢ni⸣

ina ITI ŠE.GA u₄-mu mit-ga-ri

e-li tam-le-e šu-a-tú

É.GAL.MEŠ rab-ba-a-ti

a-⸢na⸣ mu-šab be-lu-ti-ia

ab-ta-ni ṣe-ru-uš-šu

É dan-ni šá 95 ina 1.KÙŠ GAL-tim GÍD.DA

31 ina 1.KÙŠ GAL-tim DAGAL

šá ina ⸢LUGAL⸣.MEŠ a-lik ⸢maḫ⸣-ri AD.MEŠ-ia

⸢mám-ma⸣ la e-pu-šú a-na-ku e-pu-uš

⸢GIŠ.ÙR⸣.MEŠ GIŠ.EREN ṣi-ru-ti

ú-šat-ri-ṣa e-⸢li-šá⸣

GIŠ.IG.MEŠ GIŠ.ŠUR.MÌN ša e-⸢re-si-na DÙG.GA⸣

me-ser KÙ.BABBAR u ⸢ZABAR ú-rak-kis⸣-ma

ú-rat-ta-a ⸢KÁ.MEŠ-šá⸣

^dALAD.MEŠ u ^dLAMMA.MEŠ šá ⸢NA₄.MEŠ⸣

ša ki-i pi-i šik-ni-šú-⸢nu⸣

ir-⸢ti lem-ni⸣ ú-tar-⸢ru⸣

⸢na⸣-ṣi-ru ⸢kib-si⸣ mu-⸢šal⸣-li-⸢mu⸣

⸢tal⸣-lak-ti ⸢LUGAL ba⸣-ni-šú-⸢nu⸣

⸢ZAG⸣ u ⸢GÙB ú-šá-aṣ-bi-ta⸣

SI.⸢GAR-ši-in⸣

⸢É.GAL NA₄⸣.pi-i-⸢li⸣ u ⸢GIŠ.EREN⸣

⸢šu-te⸣-mu-du-⸢ti⸣

⸢a-na mul⸣-ta-u-⸢ti be-lu-ti-ia⸣

⸢nak-liš ú-še-piš⸣

⸢MUNUS.^d⸣LAMMA.MEŠ ⸢URUDU maš-šá-a-te⸣

šá ⸢a-ḫe-en-na-a pa-na ù⸣ [...]

x x (x) [...]

x x [...]

⸢GIŠ.tim-me GIŠ.EREN⸣ [...]

a-dáp-pi ku-⸢lul KÁ.MEŠ-ši-in⸣ [x x]

si-ḫir-ti É.GAL šá-⸢a⸣-[x]

né-bé-ḫu pa-áš-⸢qu⸣ šá ⸢NA₄.ZÚ NA₄⸣.[x x]

ú-še-piš-ma ⸢ú-šal-ma-a ki⸣-[x x]

se-el-lu mat-gi-⸢qu GIM ^d⸣[...]

ú-šá-as-ḫi-ra ⸢gi⸣-mir ⸢KÁ⸣.[x]

sik-kàt KÙ.BABBAR eb-bi u ⸢ZABAR⸣ nam-⸢ri⸣

ú-rat-ta-a ⸢qé⸣-reb-⸢šá⸣

da-na-an ^daš-⸢šur⸣ EN-ia

šá ina KUR.KUR nak-⸢ra⸣-a-te

⸢i⸣-tep-pu-šú

⸢ina ši⸣-pir LÚ.ur₅-ra-ku-te e-si-qa qé-reb-⸢šá⸣

⸢GIŠ.KIRI₆⸣.MAḪ tam-šil KUR.⸢ḫa⸣-ma-nim

ša ka-la ⸢ŠIM⸣.ḪI.A u GIŠ.ḪI.A

ḫur-ru-šú i-⸢ta⸣-a-šá e-mid

ki-sal-la-šá ma-⸢gal⸣ ú-rab-bi-ma

tal-lak-ta-šá ma-⸢aʾ⸣-diš ú-rap-piš

a-na maš-qit ANŠE.KUR.RA.MEŠ qé-reb-šá

pat-tu ú-še-še-ram-ma

ú-šaḫ-bi-ba a-tap-⸢piš⸣

É.GAL šu-a-tú ul-tú UŠ₈-šá

a-di gaba-dib-bi-šá

ar-ṣip ú-šak-lil-ma lu-le-e u-ma-al-⸢li⸣

èš-gal-šid-dù-dù-a

É.GAL pa-qi-da-at ka-la-mu az-ku-ra ni-bit-sa

^daš-šur ^d15 ša NINA.KI DINGIR.MEŠ KUR aš-šur.KI

DÙ-šú-nu ina qer-bi-šá aq-re-ma

UDU.SISKUR.MEŠ taš-ri-iḫ-te eb-bu-ti

ma-ḫar-šu-un aq-qí-ma

ú-šam-ḫi-ra kàd-ra-a-a

DINGIR.MEŠ šá-⸢tu-nu⸣ ina ku-un ⸢lìb⸣-bi-šú-nu

ik-tar-ra-bu LUGAL-u-ti

LÚ.GAL.MEŠ u UN.MEŠ KUR-ia ka-li-šú-nu

ina ta-kul-te u qé-re-e-ti

ina GIŠ.BANŠUR ta-ši-la-a-ti

qé-reb-šá ú-še-šib-ma

ú-šá-li-ṣa nu-pa-ar-šú-un

GEŠTIN.MEŠ ku-⸢ru-un-nu am-ki-ra⸣ ṣur-⸢ra-šú-un⸣

Ì.SAG ⸢ì-gu⸣-la-a muḫ-ḫa-šú-nu ú-⸢šá-áš-qí⸣

ina qí-bit aš-⸢šur⸣ MAN ⸢DINGIR⸣.MEŠ u ⸢DINGIR.MEŠ⸣ KUR aš-šur

ka-li-šú-nu ina ⸢ṭu-ub UZU.MEŠ⸣ ḫu-ud lìb-⸢bi⸣

nu-um-mur ka-bat-ti še-bé-e ⸢lit-tu⸣-te

qé-reb-šá ⸢da-riš⸣ lu-⸢ur⸣-mì-ma

lu-⸢uš⸣-ba-a la-la-a-šá

ina zag-muk-ki <ITI> reš-⸢ti⸣-i kul-lat mur-ni-is-⸢qi⸣

ANŠE.KUNGA.MEŠ ⸢ANŠE⸣.MEŠ ANŠE.GAM.MAL.⸢MEŠ⸣

til-li ú-nu-ut ta-ḫa-⸢zi⸣

gi-⸢mir⸣ ERIM.ḪI.A šal-lat na-ki-⸢ri⸣

šat-ti-šam-⸢ma⸣ la na-par-ka-a

⸢lu-up-qi-da⸣ qé-reb-šá

ina qé-reb ⸢É⸣.GAL šá-a-⸢tu⸣

^dALAD SIG₅ la-mas-si ⸢SIG₅⸣

⸢na⸣-ṣir kib-si ⸢LUGAL-ti-ia⸣

⸢mu-ḫa-du⸣-u ⸢ka⸣-bat-ti-⸢ia⸣

[...]-⸢par^?-ku^?⸣-u ⸢i⸣-[...]

[...]

[(...)]