BM 022504 (RINAP 3/1 Sennacherib 04, ex. 04) [Sennacherib]

^mdEN.ZU-ŠEŠ.MEŠ-eri-ba LUGAL GAL LUGAL dan-nu LUGAL kiš-šá-ti LUGAL KUR aš-šur.KI LUGAL la šá-na-an RE.É.UM mut-nen-nu-ú pa-liḫ DINGIR.MEŠ GAL.MEŠ

na-ṣir kit-ti ra-ʾi-im mi-šá-ri e-piš ú-sa-a-ti a-lik tap-pu-ut a-ki-i sa-ḫi-ru dam-qa-a-ti

eṭ-lu gít-ma-lum zi-ka-ru qar-du a-šá-red kal ma-al-ki rap-pu la-ʾi-iṭ la ma-gi-ri mu-šab-ri-qu za-ma-a-ni

^daš-šur KUR-ú GAL-ú LUGAL-ut la šá-na-an ú-šat-li-ma-an-ni-ma UGU gi-mir a-šib pa-rak-ki ú-šar-ba-a GIŠ.TUKUL.MEŠ-ia

i-na maḫ-re-e ger-ri-ia ša ^mdAMAR.UTU-IBILA-SUM.NA LUGAL KUR.kár-dun-ia-áš a-di ERIM.ḪI.A ELAM.MA.KI re-ṣi-šú i-na ta-mir-ti kiš.KI áš-ta-kan BAD₅.BAD₅-šú

i-na MURUB₄ tam-ḫa-ri šu-a-tu e-zib KARAŠ-su e-diš ip-par-šid-ma na-piš-tuš e-ṭí-ir GIŠ.GIGIR.MEŠ ANŠE.KUR.RA.MEŠ GIŠ.ṣu-um-bi ANŠE.KUNGA.MEŠ ša ina qit-ru-ub ta-ḫa-zi ú-maš-ši-ru ik-⸢šu⸣-da ŠU.II-a-a

a-na É.GAL-šú ša qé-reb KÁ.DINGIR.RA.KI ḫa-diš e-ru-um-ma ap-te-e-ma É ni-ṣir-ti-šú KÙ.GI KÙ.BABBAR ú-nu-ut KÙ.GI KÙ.BABBAR NA₄ a-qar-tu mim-ma šum-šú NÍG.ŠU NÍG.GA ⸢ni-ṣir-tu⸣ ka-bit-tu

DAM-su MUNUS.UN.MEŠ É.GAL-šú LÚ.TIRUM.MEŠ LÚ.man-za-az pa-ni si-ḫir-ti um-ma-a-ni ma-la ⸢ba-šu⸣-ú mut-tab-bi-lu-tú É.GAL-uš ú-⸢še⸣-ṣa-am-ma šal-la-tiš am-nu

i-na e-muq ^daš-šur EN-ia 89 URU.MEŠ-šú dan-nu-ti É BÀD.MEŠ-ni ša KUR.kal-di ù 6 ME 20 URU.MEŠ-ni TUR.MEŠ ša li-me-ti-šú-nu al-me KUR-ud áš-lu-la šal-la-su-un

LÚ.úr-bi LÚ.a-ra-mu LÚ.kal-du ša qé-reb UNUG.KI NIBRU.KI kiš.KI URU.ḫur-sag-kalam-ma GÚ.DU₈.A.KI ZIMBIR.KI a-di DUMU.MEŠ URU EN ḫi-iṭ-ṭi ú-⸢še⸣-ṣa-am-ma šal-la-tiš am-nu

^mEN-DÙ DUMU LÚ.GAL-DÙ i-na GIŠ.GU.ZA LUGAL-ti-šú ú-še-šib UN.MEŠ KUR URI.KI ú-šad-gil pa-ni-šú UGU gi-mir na-ge-e KUR.kal-di LÚ.šu-ut SAG.MEŠ-ia a-na LÚ.NAM-ti áš-kun-ma ⸢ni-ir⸣ be-lu-ti-ia e-mid-su-nu-ti

i-na ta-a-a-ar-ti-ia LÚ.tu-uʾ-mu-na LÚ.ri-ḫi-ḫu LÚ.ia-daq-qu LÚ.ú-bu-du LÚ.gib-re-e LÚ.ma-la-ḫu LÚ.gu-ru-mu LÚ.ú-bu-lum LÚ.da-mu-nu

LÚ.gam-bu-lum LÚ.ḫi-in-da-ru LÚ.ru-ʾu-u-a LÚ.pu-qu-du LÚ.ḫa-am-ra-a-nu LÚ.ḫa-ga-ra-nu LÚ.na-ba-tu LÚ.li-iʾ-ta-a-ú LÚ.a-ra-mu la kan-šu-ti mit-ḫa-riš ak-šud^ud

2 ME 8 LIM UN.MEŠ TUR GAL NITA u MUNUS 7 LIM 2 ME ANŠE.KUR.RA.MEŠ ANŠE.KUNGA.MEŠ 11 LIM 73 ANŠE.MEŠ 5 LIM 2 ME 30 ANŠE.GAM.MAL.MEŠ 80 LIM 1 ME GU₄.MEŠ 8 ME LIM 6 ME US₅.UDU.ḪI.A šal-la-tu ka-bit-tu áš-lu-la a-na qé-reb KUR aš-šur.KI

i-na me-ti-iq ger-ri-ia ša ^mdAG-EN-MU.MEŠ LÚ.qí-pi URU.ḫa-ra-ra-te KÙ.GI KÙ.BABBAR GIŠ.mu-suk-kan-ni GAL.MEŠ ANŠE.MEŠ ANŠE.GAM.MAL.MEŠ GU₄.MEŠ ù US₅.UDU.ḪI.A ta-mar-ta-šú ka-bit-tu am-ḫur

ba-ḫu-la-te URU.ḫi-rim-me LÚ.KÚR ak-ṣi i-na GIŠ.TUKUL.MEŠ ú-šam-qit-ma e-du ul e-zib pag-ri-šú-un i-na ga-ši-ši a-lul-ma si-ḫi-ir-ti URU ú-šal-me

na-gu-ú šu-a-tu a-na eš-šu-ti aṣ-bat 1-en GU₄ 10 UDU.NÍTA.MEŠ 10 ANŠE GEŠTIN 20 ANŠE ZÚ.LUM.MA re-še-te-šú a-na DINGIR.MEŠ-ni KUR aš-šur.KI EN.MEŠ-ia ú-kin dà-ri-šam

i-na 2-e ger-ri-ia ^daš-šur be-lí ú-tak-kil-an-ni-ma a-na KUR LÚ.kaš-ši-i ù KUR LÚ.ia-su-bi-gal-la-a-a ša ul-tu ul-la a-na LUGAL.MEŠ AD.MEŠ-ia la kit-nu-šú lu al-lik

qé-reb ḫur-šá-a-ni zaq-ru-ti A.ŠÀ nam-ra-ṣi i-na ANŠE.KUR.RA ar-kab-ma GIŠ.GIGIR GÌR.II-ia i-na ti-ik-ka-a-te ú-šá-áš-ši áš-ru šup-šu-qu ina GÌR.II-ia ri-ma-niš at-tag-giš

URU.É-^mki-lam-za-aḫ URU.ḫa-ar-diš-pi URU.É-^mku-bat-ti URU.MEŠ-šú-nu É BÀD.MEŠ dan-nu-ti al-me KUR-ud UN.MEŠ ANŠE.KUR.RA.MEŠ ANŠE.KUNGA.MEŠ ANŠE.MEŠ GU₄.MEŠ ù US₅.UDU.ḪI.A ul-tu qer-bi-šú-un ú-še-ṣa-am-ma šal-la-tiš am-nu

ù URU.MEŠ-šú-nu TUR.MEŠ ša ni-ba la i-šu-ú ap-pul aq-qur ú-še-me kar-meš É EDIN kul-ta-ri mu-šá-bi-šú-nu i-na ^dGIŠ.BAR aq-mu-ma di-tal-liš ú-še-mi

ú-ter-ma URU.É-^mki-lam-za-aḫ šu-a-tu a-na URU.bir-tu-ti aṣ-bat UGU ša u₄-me pa-ni BÀD.MEŠ-šú ú-dan-nin-ma UN.MEŠ KUR.KUR ki-šit-ti ŠU.II-ia ina lìb-bi ú-še-šib

UN.MEŠ KUR LÚ.kaš-ši-i ù KUR LÚ.ia-su-bi-gal-la-a-a ša la-pa-an GIŠ.TUKUL.MEŠ-ia ip-par-ši-du ul-tu qé-reb KUR-i ú-še-ri-dam-ma i-na URU.ḫar-diš-pi URU.É-^mku-bat-ti ú-šar-me

i-na ŠU.II LÚ.šu-ut SAG-ia LÚ.EN.NAM URU.ar-rap-ḫa am-nu-šú-nu-ti NA₄.NA.RÚ.A ú-še-piš-ma li-i-tu ki-šit-ti ŠU.II ša UGU-šú-un áš-tak-ka-nu ṣe-ru-uš-šú ú-šá-áš-ṭir-ma i-na qé-reb URU ul-ziz

pa-an ni-ri-ia ú-ter-ma a-na KUR.el-li-pi aṣ-ṣa-bat ḫar-ra-nu el-la-mu-u-a ^mis-pa-ba-a-ra LUGAL-šú-un URU.MEŠ-šú dan-nu-ti É ni-ṣir-ti-šú ú-maš-šir-ma a-na ru-qé-e-ti in-na-bit

gim-ri KUR-šu DAGAL-ti GIM MURU₉ as-ḫu-up URU.mar-ú-biš-ti URU.ak-ku-ud-du URU.MEŠ É LUGAL-ti-šú a-di 34 URU.MEŠ TUR.MEŠ ša li-me-ti-šú-nu al-me KUR-ud ap-pul aq-qur ina ^dGIŠ.BAR aq-mu

UN.MEŠ TUR GAL NITA u MUNUS ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ GU₄.MEŠ ù US₅.UDU.ḪI.A la mi-nam áš-lu-lam-ma a-di la ba-ši-i ú-šá-lik-šu-ma ú-ṣa-aḫ-ḫi-ir ma-a-su

URU.ṣi-ṣi-ir-tu URU.ku-um-ma-aḫ-lum URU.MEŠ-ni dan-nu-ti a-di URU.MEŠ-ni TUR.MEŠ ša li-me-ti-šú-nu KUR.É-^mba-ar-ru-u na-gu-u a-na gi-mir-ti-šú ul-tu qé-reb KUR-šú ab-tuq-ma UGU mi-ṣir KUR aš-šur.KI ú-rad-di

URU.el-en-za-áš a-na URU LUGAL-ti ù dan-na-at na-ge-e šu-a-tu aṣ-bat-ma MU-šú maḫ-ra-a ú-nak-kir-ma URU.kar-^mdEN.ZU-ŠEŠ.MEŠ-eri-ba at-ta-bi ni-bit-su

UN.MEŠ KUR.MEŠ ki-šit-ti ŠU.II-ia i-na lìb-bi ú-še-šib i-na ŠU.II LÚ.šu-ut SAG-ia LÚ.EN.NAM URU.ḫar-ḫar am-nu-ma ú-rap-piš ma-a-ti

i-na ta-a-a-ar-ti-ia ša KUR.ma-da-a-a ru-qu-ti ša i-na LUGAL.MEŠ-ni AD.MEŠ-ia ma-am-man la iš-mu-u zi-kir KUR-šú-un man-da-ta-šú-nu ka-bit-tu am-ḫur a-na ni-ri be-lu-ti-ia ú-šak-ni-su-nu-ti

i-na šal-ši ger-ri-ia a-na KUR.ḫat-ti lu al-lik ^mlu-li-i LUGAL URU.ṣi-du-un-ni pul-ḫi me-lam-me be-lu-ti-ia is-ḫu-pu-šu-ma a-na ru-uq-qí MURUB₄ tam-tim in-na-bit

URU.ṣi-du-un-nu GAL-ú URU.ṣi-du-un-nu ṣe-eḫ-ru URU.É-zi-it-te URU.ṣa-ri-ip-tu URU.ma-ḫal-li-ba URU.ú-šu-ú URU.ak-zi-bi URU.ak-ku-ú

URU.MEŠ-šú dan-nu-ti É BÀD.MEŠ-ni a-šar ri-i-ti ù maš-qí-ti É tuk-la-te-šú ra-šub-bat GIŠ.TUKUL ^daš-šur EN-ia is-ḫu-pu-šu-nu-ti-ma ik-nu-šú še-pu-u-a

^mtu-ba-aʾ-lu i-na GIŠ.GU.ZA LUGAL-ti UGU-šú-un ú-še-šib-ma GUN man-da-at-tú be-lu-ti-ia šat-ti-šam la ba-aṭ-lu ú-kin ṣe-ru-uš-šú

ša ^mmi-ni-ḫi-im-mu URU.sam-si-mu-ru-na-a-a ^mtu-ba-aʾ-lum URU.ṣi-du-un-na-a-a ^mab-di-li-iʾ-ti URU.a-ru-da-a-a ^mú-ru-mil-ki URU.gu-ub-la-a-a

^mmi-ti-in-ti URU.as-du-da-a-a ^mbu-du-DINGIR KUR.É-am-ma-na-a-a ^mkam-mu-su-na-ad-bi KUR.ma-ʾa-ba-a-a ^mda-a-ram-mu KUR.ú-du-um-ma-a-a

LUGAL.MEŠ-ni KUR MAR.TU.KI ka-li-šú-un IGI.SÁ-e šad-lu-ti ta-mar-ta-šú-nu ka-bit-tu a-di 4-šú a-na maḫ-ri-ia iš-šu-nim-ma iš-ši-qu GÌR.II-ia

ù ^mṣi-id-qa-a LUGAL URU.is-qa-al-lu-na šá la ik-nu-šú a-na ni-ri-ia DINGIR.MEŠ É AD-šú šá-a-šu DAM-su DUMU.MEŠ-šú DUMU.MUNUS.MEŠ-šú ŠEŠ.MEŠ-šú NUMUN É AD-šú as-su-ḫa-am-ma a-na KUR aš-šur ú-raš-šú

^mLUGAL-lu-dà-ri DUMU ^mru-kib-ti LUGAL-šú-nu maḫ-ru-ú UGU UN.MEŠ URU.is-qa-al-lu-na áš-kun-ma na-dan GUN kàd-re-e be-lu-ti-ia e-mì-su-ma i-šá-aṭ ab-šá-a-ni

i-na me-ti-iq ger-ri-ia URU.É-da-gan-na URU.ia-ap-pu-u URU.ba-na-a-a-bar-qa URU.a-zu-ru URU.MEŠ ša ^mṣi-id-qa-a ša a-na GÌR.II-ia ár-ḫiš la ik-nu-šú al-me KUR-ud áš-lu-la šal-la-su-un

LÚ.GÌR.NÍTA.MEŠ LÚ.NUN.MEŠ ù UN.MEŠ URU.am-qar-ru-na ša ^mpa-di-i LUGAL-šú-nu EN a-de-e ù ma-mit ša KUR aš-šur.KI bi-re-tú AN.BAR id-du-ma a-na ^mḫa-za-qi-a-ú KUR.ia-ú-da-a-a id-di-nu-šú nak-riš

a-na an-zil-li e-pu-šu ip-làḫ ŠÀ-šú-un LUGAL.MEŠ KUR.mu-ṣu-ri LÚ.ERIM.MEŠ GIŠ.PAN GIŠ.GIGIR.MEŠ ANŠE.KUR.RA.MEŠ ša LUGAL KUR.me-luḫ-ḫa e-mu-qí la ni-bi ik-te-ru-nim-ma il-li-ku re-ṣu-su-un

i-na ta-mir-ti URU.al-ta-qu-ú el-la-mu-u-a si-id-ru šit-ku-nu ú-šá-ʾa-lu GIŠ.TUKUL.MEŠ-šú-un i-na tukul-ti aš-šur EN-ia it-ti-šú-un am-da-ḫi-iṣ-ma áš-ta-kan BAD₅.BAD₅-šú-un

LÚ.EN GIŠ.GIGIR.MEŠ ù DUMU.MEŠ LUGAL.MEŠ KUR.mu-ṣu-ra-a-a a-di LÚ.EN GIŠ.GIGIR.MEŠ ša LUGAL KUR.me-luḫ-ḫa bal-ṭu-su-un i-na MURUB₄ tam-ḫa-ri ik-šu-da ŠU.II-a-a

URU.al-ta-qu-ú URU.ta-am-na-a al-me KUR-ud áš-lu-la šal-la-su-un a-na URU.am-qar-ru-na aq-rib-ma LÚ.GÌR.NÍTA.MEŠ LÚ.NUN.MEŠ ša ḫi-iṭ-ṭu ú-šab-šu-u a-duk-ma ina di-ma-a-ti si-ḫir-ti URU a-lul pag-ri-šú-un

DUMU.MEŠ URU e-piš an-ni ù gíl-la-ti a-na šal-la-ti am-nu si-it-tu-te-šú-nu la ba-bil ḫi-ṭi-ti ù gul-lul-ti ša a-ra-an-šú-nu la ib-šu-ú uš-šur-šú-un aq-bi

^mpa-di-i LUGAL-šú-nu ul-tu qé-reb URU.ur-sa-li-im-ma ú-še-ṣa-am-ma i-na GIŠ.GU.ZA be-lu-ti UGU-šú-un ú-še-šib-ma man-da-at-tú be-lu-ti-ia ú-kin ṣe-ru-uš-šú

ša ^mḫa-za-qi-a-ú KUR.ia-ú-da-a-a 46 URU.MEŠ-ni-šú É BÀD.MEŠ dan-nu-ti ù URU.MEŠ-ni TUR.MEŠ ša li-me-ti-šú-nu ša ni-ba la i-šu-ú

i-na šuk-bu-us a-ram-me ù qit-ru-ub šu-pi-i mit-ḫu-uṣ zu-uk GÌR.II pil-ši nik-si ù kal-ban-na-te al-me ak-šud^ud

2 ME LIM 1 ME 50 UN.MEŠ TUR GAL NITA u MUNUS ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ GU₄.MEŠ ù US₅.UDU.ḪI.A ša la ni-bi ul-tu qer-bi-šú-un ú-še-ṣa-am-ma šal-la-tiš am-nu

šá-a-šú GIM MUŠEN qu-up-pi qé-reb URU.ur-sa-li-im-ma URU LUGAL-ti-šú e-sír-šu URU.ḪAL.ṢU.MEŠ UGU-šú ú-rak-kis-ma a-ṣe-e KÁ.GAL URU-šú ú-ter-ra ik-ki-bu-uš

URU.MEŠ-šú ša áš-lu-la ul-tu qé-reb KUR-šú ab-tuq-ma a-na ^mmi-ti-in-ti LUGAL URU.as-du-di ù ^mpa-di-i LUGAL URU.am-qar-ru-na ^mGISSU-EN LUGAL KUR.ḫa-zi-te ad-din-ma ú-ṣa-aḫ-ḫi-ir KUR-su

⸢e-li GUN maḫ-ri-ti na-dan šat-ti-šú-un⸣ man-da-at-tú kàd-re-e be-lu-ti-ia ú-rad-di-ma ú-kin ṣe-ru-uš-šú-un

šu-ú ^mḫa-za-qi-a-ú ⸢pul-ḫi me-lam-me⸣ be-lu-ti-ia is-ḫu-pu-šu-ma LÚ.úr-bi ù LÚ.ERIM.MEŠ-šú SIG₅.MEŠ ša a-na dun-⸢nun URU⸣.ur-sa-li-im-mu URU LUGAL-ti-šú ú-še-ri-bu-ma ir-šu-u til-la-a-te

30 GUN KÙ.GI 8 ME GUN KÙ.BABBAR ni-siq-ti gu-uḫ-li ták-kàs-si NA₄.AN.ZA.GUL.ME GAL.MEŠ GIŠ.NÁ.MEŠ ZÚ GIŠ.GU.ZA.MEŠ né-me-di ZÚ KUŠ AM.SI ZÚ AM.SI GIŠ.ESI GIŠ.TÚG lu-bul-ti bir-me TÚG.GADA SÍG.ta-kil-tú SÍG.ar-ga-man-nu

ú-nu-ut ZABAR AN.BAR URUDU AN.NA AN.BAR GIŠ.GIGIR.MEŠ ga-ba-bi az-ma-re-e si-ri-ia-am GÍR AN.BAR šib-bi til-pa-ni u uṣ-ṣi til-li ú-nu-ut ta-ḫa-zi ša ni-ba la i-šu-ú

it-ti ⸢DUMU⸣.MUNUS.MEŠ-šú MUNUS.UN.MEŠ É.GAL-šú LÚ.NAR.MEŠ MUNUS.NAR.MEŠ a-na qé-reb NINA.KI URU be-lu-ti-ia EGIR-ia ú-še-bi-lam-ma a-na na-dan man-da-at-ti ù e-peš ARAD-ú-ti iš-pu-ra rak-bu-šu

i-na šal-la-at KUR.MEŠ šá-ti-na ša áš-lu-la 10 LIM GIŠ.PAN 10 LIM GIŠ.a-ri-tú ina lìb-bi-šú-nu ak-ṣur-ma UGU ki-ṣir LUGAL-ti-ia ú-rad-di

si-it-ti šal-la-at na-ki-ri ka-bit-tu a-na gi-mir KARAŠ-ia ù LÚ.EN.NAM-ia UN.MEŠ ma-ḫa-za-ni-ia GAL.MEŠ ki-ma ṣe-e-ni lu ú-za-ʾi-iz

i-na u₄-me-šu-ma NINA.KI ma-ḫa-zu ṣi-i-ru URU na-ram ^diš-tar ša nap-ḫar ki-du-de-e DINGIR.MEŠ ù ^dIŠ.TAR.MEŠ ba-šu-u qé-reb-šu

tem-me-en-nu da-ru-ú du-ru-uš ṣa-a-ti ša ul-tu ul-la it-te ši-ṭir bu-ru-ú-me eṣ-rat-su eṣ-ret-ma šu-pu-ú ṣi-in-du-šu

áš-ru nak-lu šu-bat pi-riš-ti ša mim-ma šum-šú ši-pir ni-kil-ti gi-mir pel-lu-de-e ni-ṣir-ti làl-gar šu-ta-bu-lu qé-reb-šu

ša ul-tu ul-la LUGAL.MEŠ-ni a-li-kut maḫ-ri AD.MEŠ-ia ul-la-nu-u-a be-lu-ti KUR aš-šur.KI e-pu-šu-ma ú-ma-ʾe-ru ba-ʾu-lat ^dEN.LÍL

ù šat-ti-šam la na-par-ka-a e-reb la nar-ba-a-ti GUN mal-ki kib-rat ar-ba-ʾi im-da-na-aḫ-ḫa-ru qé-reb-šu

a-a-um-ma i-na lìb-bi-šú-nu a-na É.GAL qer-bi-šu kúm-mu ri-mit be-lu-ti ša ṣu-uḫ-ḫu-ru šu-bat-su le-e-su ul id-da-a lib-bu-uš ul iḫ-su-us

a-na šu-te-šur SILA URU ù šum-dul re-ba-a-ti ḫa-re-e ÍD za-qa-ap ṣip-pa-a-ti ú-zu-un-šu ul ib-ši-ma ul uš-ta-bil ka-ras-su

ia-a-ti ^mdEN.ZU-ŠEŠ.MEŠ-eri-ba LUGAL KUR aš-šur.KI e-peš šip-ri šu-a-tu ki-i ṭè-em DINGIR.MEŠ i-na uz-ni-ia ib-ši-ma ka-bat-ti ub-lam-ma

te-ne-šet KUR.kal-di LÚ.a-ra-me KUR.man-na-a-a KUR.qu-e KUR.ḫi-lak-ku KUR.pi-liš-te ù KUR.ṣur-ri ša a-na ni-ir-ia la ik-nu-šú as-su-ḫa-am-ma tup-šik-ku ú-šá-áš-ši-šú-nu-ti-ma il-bi-nu SIG₄

a-pe ku-pe-e ša qé-reb KUR.kal-di ak-šiṭ-ma ap-pa-ri-šú-un šam-ḫu-ti i-na ba-ḫu-la-te na-ki-ri ki-šit-ti ŠU.II-ia ú-šal-di-da a-na e-peš šip-ri-šá

É.GAL maḫ-ri-tu ša 3 ME 60 ina 1.KÙŠ UŠ i-na tar-ṣi za-me-e É ziq-qur-rat 80 ina 1.KÙŠ DAGAL i-na tar-ṣi É.na-ma-ri É ^diš-tar 1 ME 34 ina 1.KÙŠ DAGAL i-na tar-ṣi É.na-ma-ri É-kid₉-mu-ri 95 ina 1.KÙŠ DAGAL

ša LUGAL.MEŠ-ni a-li-kut maḫ-ri AD.MEŠ-ia a-na ri-mit be-lu-ti-šú-un ú-še-pi-šu-ma la ú-nak-ki-lu ši-pir-šá

ÍD.te-bil-ti a-gu-ú šit-mu-ru ša i-na na-ši-šá ge-gu-né-e qa-bal-ti URU ú-ab-bi-tu-ma ki-maḫ-ḫi-šú-un pa-az-ru-ti ú-kal-li-mu ^dUTU-šú

ù ul-tu u₄-me SÙ.MEŠ ṭe-eḫ É.GAL i-ba-ʾu-ú-ma i-na ILLU-šá gap-ši i-na uš-ši-šá ab-bu ú-šab-šu-ú ú-ri-ib-bu tem-me-en-šá

É.GAL.TUR.RA šá-a-tu a-na si-ḫir-ti-šá aq-qur-ma ša ÍD.te-bil-ti ma-lak-šá uš-te-eš-na-a ab-bu uš-ṭib-ma ú-še-šir mu-ṣu-u-šá

qé-reb ka-tim-ti a-sur-rak-ku-šá šap-la-nu GI.MEŠ e-la-niš NA₄ KUR-i dan-ni it-ti ESIR.UD.A ak-si-ma A.ŠÀ ul-tu ma-a-me ú-še-lam-ma na-ba-liš ú-ter

7 ME ina 1.KÙŠ AS₄.LUM GAL-ti UŠ 1 ME 76 ina AS₄.LUM GAL-ti SAG.KI AN.TA IM.SI.SÁ 2 ME 68 ina AS₄.LUM GAL-ti SAG.KI MURUB₄-tim mé-eḫ-ret za-me-e at-man-ni ku-tal ^diš-tar

3 ME 83 ina AS₄.LUM GAL-ti SAG.KI qab-li-tum šá-ni-tum mu-uḫ-ḫur-ti šá-a-ri a-mur-ri ku-tal É ziq-qur-rat É ^diš-tar

3 ME 86 ina AS₄.LUM GAL-ti SAG.KI KI.TA IM.U₁₈.LU ÚS.SA.DU ÍD.IDIGNA tam-la-a ú-mal-li-ma am-šu-uḫ me-ši-iḫ-ta

la-ba-riš u₄-me i-na ILLU kiš-šá-ti tem-me-en-šú la e-né-še as-kup-pat NA₄.pi-i-li rab-ba-a-ti ki-su-ú-šu ú-šá-as-ḫi-ra ú-dan-ni-na šu-pu-uk-šu

MU.SAR-e ši-ṭir šu-mi-ia 1 ME 60 ti-ib-ki tam-li-i qé-reb-šú al-ṭu-ur-ma šap-la-nu ina uš-ši-šu e-zib aḫ-ra-taš

ar-ka-a-nu šu-uš-qu-ú tam-li-i ka-bat-ti ub-lam-ma 20 ti-ib-ki ṣe-er maḫ-ri-i uṣ-ṣip-ma 1 ME 80 ti-ib-ki ú-šaq-qí e-la-niš

tar-pa-šu-ú UGU ša u₄-mu pa-ni ú-šar-bi ṣe-er me-ši-iḫ-ti É.GAL maḫ-ri-ti ú-rad-di-ma ú-šá-an-di-la ši-kit-taš

É.GAL NA₄.GIŠ.NU₁₁.GAL ZÚ AM.SI GIŠ.ESI GIŠ.TÚG GIŠ.mu-suk-kan-ni GIŠ.EREN GIŠ.ŠUR.MÌN GIŠ.dáp-ra-ni ŠIM.LI ù GIŠ.bu-uṭ-ni é-gal-zag-di-nu-tuku-a a-na mu-šab LUGAL-ti-ia ú-še-pi-šá qé-reb-šú

GIŠ.KIRI₆.MAḪ-ḫu tam-šil KUR.ḫa-ma-nim ša gi-mir ŠIM.ḪI.A GURUN ṣip-pa-a-ti GIŠ.MEŠ tuk-lat KUR-i ù KUR.kal-di qé-reb-šú ḫur-ru-šu i-ta-a-šá az-qu-up

áš-šú za-qa-ap ṣip-pa-a-ti A.ŠÀ ta-mir-ti e-le-en URU 2(BARIG).TA.ÀM a-na DUMU.MEŠ NINA.KI pil-ku ú-pal-lik-ma ú-šad-gi-la pa-nu-uš-šú-un

a-na miṭ-ra-a-ti šum-mu-ḫi ul-tu pa-a-ṭi URU.ki-si-ri a-di ta-mir-ti NINA.KI KUR-a ù bi-ru-tú ina ak-kul-la-a-ti ú-šat-tir-ma ú-še-šir ÍD.ḫar-ru

1 1/2 KASKAL.GÍD qaq-qa-ru ul-tu qé-reb ÍD.ḫu-su-ur ma-a-me da-ru-ú-ti a-šar-šá ú-šar-da-a qé-reb ṣip-pa-ti šá-ti-na ú-šaḫ-bi-ba pat-ti-iš

ša NINA.KI URU be-lu-ti-ia šu-bat-su uš-rab-bi re-ba-ti-šú ú-šá-an-dil-ma bi-re-e-ti ù su-qa-a-ni uš-par-di-ma ú-nam-mir GIM u₄-me

i-na mé-eḫ-ret KÁ.GAL MURUB₄ URU i-na a-gúr-ri NA₄.pi-i-li pe-ṣe-e a-na me-ti-iq be-lu-ti-ia ú-šak-bi-is ti-tur-ru

MU.SAR-a ú-še-piš-ma li-i-tum ù da-na-nu ša i-na tukul-ti ^daš-šur EN GAL EN-ia UGU kul-lat na-ki-ri áš-tak-ka-nu

ù mim-ma ep-šet e-tep-pu-šu qé-reb-šú ú-šá-áš-ṭir-ma i-na tem-me-en-ni É.GAL be-lu-ti-ia i-zib aḫ-ra-taš

a-na ar-kàt u₄-me i-na LUGAL.MEŠ-ni DUMU.MEŠ-ia ša ^daš-šur a-na RE.É.UM-ut KUR ù UN.MEŠ i-nam-bu-ú zi-kir-šu e-nu-ma É.GAL šá-a-tu i-lab-bi-ru-ma en-na-ḫu

an-ḫu-sa lu-ud-diš MU.SAR-e ši-ṭir šu-me-ia li-mur-ma Ì.GIŠ lip-šu-uš UDU.SISKUR liq-qí a-na áš-ri-šú li-ter ^daš-šur ik-ri-bi-šu i-šem-me

1 UŠ 34.TA.ÀM MU.DIDLI MU.SAR-e ITI.GU₄.SI.SÁ li-mu ^mmi-tu-nu LÚ.GAR.KUR URU.i-sa-na