BM 022503 (RINAP 3/1 Sennacherib 04, ex. 01) [Sennacherib][via rinap/sources]
| Obverse | |
| 11 | mdEN.ZU-ŠEŠ.MEŠ-eri-ba LUGAL ⸢GAL⸣-ú LUGAL dan-nu LUGAL kiš-šá-ti LUGAL KUR aš-šur.KI LUGAL la šá-na-an RE.É.UM mut-nen-nu-ú pa-liḫ DINGIR.MEŠ GAL.MEŠ |
| 22 | na-ṣir kit-ti ra-ʾi-im mi-šá-ri e-piš ú-sa-a-ti a-lik tap-pu-ut a-ki-i sa-ḫi-ru dam-⸢qa-a⸣-ti |
| 33 | eṭ-lu gít-ma-lum ⸢zi-ka-ru qar-du a-šá-red⸣ kal ma-al-ki rap-pu la-ʾi-iṭ la ma-gi-ri mu-šab-ri-qu ⸢za⸣-ma-ni |
| 44 | daš-šur KUR-ú GAL-ú LUGAL-ut la šá-na-an ú-šat-li-ma-an-ni-ma UGU gi-mir a-šib pa-rak-ki ú-šar-ba-a ⸢GIŠ⸣.[x].⸢MEŠ⸣-ia |
| 55 | i-na maḫ-re-e ger-ri-ia ša mdAMAR.UTU-IBILA-SUM.NA LUGAL KUR.kár-dun-ia-áš a-di ERIM.ḪI.<A> ELAM.MA.KI re-ṣi-šú i-na ta-mir-ti kiš.KI áš-ta-kan ⸢BAD₅⸣.BAD₅-šu |
| 66 | i-na MURUB₄ tam-ḫa-ri šu-a-tu e-zib KARAŠ-su e-diš ip-par-šid-ma na-piš-tuš e-ṭí-ir GIŠ.GIGIR.MEŠ ANŠE.KUR.RA.MEŠ GIŠ.ṣu-um-bi ANŠE.KUNGA.MEŠ ša ina qit-ru-ub ta-ḫa-zi ú-maš-ši-ru [x]-⸢šu-da ŠU⸣.II-a-a |
| 77 | a-na É.GAL-šu ša qé-reb KÁ.DINGIR.RA.KI ḫa-diš i-ru-um-ma ap-te-e-ma É ni-ṣir-ti-šú KÙ.GI KÙ.BABBAR ú-nu-ut KÙ.GI KÙ.BABBAR NA₄ a-qar-tu mim-ma šum-šú NÍG.ŠU NÍG.GA ni-ṣir-⸢tu ka⸣-bit-tu |
| 88 | DAM-su MUNUS.UN.MEŠ É.GAL.MEŠ-šú LÚ.TIRUM.MEŠ LÚ.man-za-az pa-ni si-ḫir-ti um-ma-a-ni ma-la ba-šu-ú mut-tab-bi-lu-tú É.GAL-uš ú-še-ṣa-am-ma [x]-⸢la⸣-tiš am-nu |
| 99 | i-na e-muq daš-šur EN-ia 89 URU.MEŠ-šú dan-nu-ti É BÀD.MEŠ ša ⸢KUR⸣.kal-di ù 6 ME 20 URU.MEŠ TUR.MEŠ ša li-<me>-ti-šú-nu al-me KUR-ud áš-lu-la [x]-⸢la⸣-su-un |
| 1010 | LÚ.úr-bi LÚ.a-ra-mu LÚ.kal-du ša qé-reb UNUG.KI NIBRU.KI kiš.KI ḫur-sag-kalam-ma.KI GÚ.DU₈.A.KI ZIMBIR.KI EN DUMU.MEŠ URU EN ḫi-ṭi ú-še-ṣa-am-ma ⸢šal⸣-la-tiš am-nu |
| 1111 | mEN-DÙ DUMU LÚ.GAL-DÙ i-na GIŠ.GU.ZA LUGAL-ti-šú ú-še-šib UN.MEŠ KUR URI.KI ú-šad-gil pa-nu-uš-šú UGU gi-mir na-ge-e KUR.kal-di LÚ.šu-ut SAG.MEŠ-ia a-na LÚ.NAM-ti áš-⸢kun⸣-ma ni-ir be-lu-ti-ia e-mid-su-nu-ti |
| 1212 | i-na ta-a-a-ar-ti-ia LÚ.tu-uʾ-mu-na LÚ.ri-ḫi-ḫu LÚ.ia-daq-qu LÚ.ú-bu-du LÚ.gib-re-e LÚ.ma-li-ḫu LÚ.gu-ru-mu LÚ.ú-bu-lum LÚ.da-mu-na |
| 1313 | LÚ.gam-bu-lum LÚ.ḫi-in-da-ru LÚ.ru-ʾu-u-a LÚ.pu-qu-du LÚ.ḫa-am-ra-nu LÚ.ḫa-ga-ra-nu LÚ.na-ba-tu LÚ.li-iʾ-ta-a-ú LÚ.a-ra-mu la kan-⸢šu⸣ mit-ḫa-riš ak-šudud |
| 1414 | 2 ME 8 LIM UN.⸢MEŠ⸣ TUR GAL NITA u MUNUS 7 LIM 2 ME ANŠE.KUR.RA.MEŠ ANŠE.KUNGA.MEŠ 11 LIM 73 ANŠE.MEŠ 5 LIM 2 ME 30 ANŠE.GAM.MAL.MEŠ 80 LIM 1 ME GU₄.MEŠ 6 ME LIM 6 ME US₅.UDU.ḪI.A ⸢šal-la⸣-tú ⸢ka-bit⸣-tú <<a>> ⸢áš-lu-la⸣ a-na qé-reb KUR aš-šur.KI |
| 1515 | i-na me-ti-⸢iq⸣ ger-ri-ia ša mdAG-EN-MU.MEŠ LÚ.qí-pi URU.ḫa-ra-re-te KÙ.GI KÙ.BABBAR GIŠ.mu-suk-kan-ni GAL.MEŠ ANŠE.MEŠ ANŠE.GAM.MAL.MEŠ GU₄.MEŠ ù US₅.UDU.ḪI.A ta-mar-⸢ta-šú⸣ ka-bit-tú am-ḫur |
| 1616 | ba-ḫu-la-ti URU.ḫi-rim-me LÚ.KÚR ak-ṣi i-na GIŠ.TUKUL ú-šam-qit-ma e-du ul e-zib pag-ri-šú-un i-na ga-ši-ši a-lul-ma si-ḫir-ti URU ú-šal-me |
| 1717 | na-gu-ú šu-a-tu a-na eš-šu-ti aṣ-bat 1-en GU₄ 10 UDU.NÍTA.MEŠ 10 ANŠE GIŠ.GEŠTIN.MEŠ 20 ANŠE ZÚ.LUM.MA re-še-⸢te⸣-šú a-na DINGIR.MEŠ-ni KUR aš-šur.KI EN.MEŠ-ia ú-kin dà-ri-šam |
| 1818 | i-na 2-e ger-ri-ia aš-šur be-lí ú-tak-kil-an-ni-ma a-na KUR kaš-ši-i ù KUR ia-su-bi-gal-la-a-a ša ul-tu ul-la a-na LUGAL.MEŠ-ni AD.MEŠ-ia la kit-nu-⸢šú⸣ lu al-lik |
| 1919 | qé-reb ḫur-šá-a-ni zaq-ru-ti A.ŠÀ nam-ra-ṣi i-na ANŠE.KUR.RA.MEŠ ar-kab-ma GIŠ.GIGIR GÌR.II-ia i-na ti-ik-ka-ti ú-šá-áš-ši áš-ru šup-šu-qu i-na GÌR.II-ia ri-ma-niš ⸢at⸣-tag-giš |
| 2020 | URU.É-mki-lam-za-aḫ URU.ḫa-ar-diš-pi URU.É-mku-bat-ti URU.MEŠ-ni-šú-nu É BÀD.MEŠ dan-nu-ti al-me KUR-ud UN.MEŠ ANŠE.KUR.RA.MEŠ ANŠE.KUNGA.MEŠ <ANŠE.MEŠ> GU₄.MEŠ ù US₅.UDU.ḪI.A ul-tu qer-bi-šú-un ú-še-ṣa-am-ma šal-la-tiš am-nu |
| 2121 | ù URU.MEŠ-šú-nu TUR.MEŠ ša ni-ba la i-šu-ú ap-pul aq-qur ú-še-me kar-meš É EDIN kul-ta-ri mu-šá-bi-šú-nu i-na dGIŠ.BAR aq-mu-ma di-tal-liš ú-še-mi |
| 2222 | ú-ter-ma URU.É-mki-lam-za-aḫ šu-a-tu a-na bir-tu-ti aṣ-bat UGU ša u₄-me pa-ni BÀD.MEŠ-šú ú-dan-nin-ma UN.MEŠ KUR.KUR ki-šit-ti ŠU.II-ia ina lìb-bi ú-še-šib |
| 2323 | UN.MEŠ KUR LÚ.kaš-ši-i ù KUR LÚ.ia-su-bi-gal-la-a-a ša la-pa-an GIŠ.TUKUL.MEŠ-ia ip-par-ši-du ul-tu qé-reb KUR-i ú-še-ri-dam-ma ina URU.ḫar-diš-pi URU.É-mku-bat-ti ú-šar-me |
| 2424 | i-na ŠU.II LÚ.šu-ut SAG.MEŠ LÚ.EN.NAM URU.ar-rap-ḫa am-nu-šú-nu-ti NA₄.NA.RÚ.A ú-še-piš-ma li-i-tú ki-šit-ti ŠU.II ša UGU-šú-un áš-tak-ka-nu ṣe-ru-uš-šú ú-šá-áš-ṭir-ma i-na qé-reb URU ul-ziz |
| 2525 | pa-an ni-ri-ia ú-ter-ma a-na KUR.el-li-pi aṣ-ṣa-bat ḫar-ra-nu el-la-mu-u-a mis-pa-ba-a-ra LUGAL-šú-un URU.MEŠ-šú dan-nu-ti É ni-ṣir-ti-šú ú-maš-šir-ma a-na ru-qé-e-ti in-na-bit |
| 2626 | gim-ri KUR-šu DAGAL-ti GIM MURU₉ as-ḫu-up URU.mar-ú-biš-ti URU.ak-ku-ud-du URU.MEŠ É LUGAL-ti-šú a-di 34 URU.MEŠ TUR.MEŠ ša li-me-ti-šú-nu al-me KUR-ud ap-pul aq-qur ina GIŠ.BAR aq-mu |
| 2727 | UN.MEŠ TUR GAL NITA u MUNUS ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ GU₄.MEŠ ù US₅.UDU.ḪI.A la mi-nam áš-lu-lam-ma a-di la ba-ši-i ú-šá-lik-šú-ma ú-ṣa-ḫi-ir ma-a-su |
| 2828 | URU.ṣi-ṣi-ir-tú URU.ku-um-aḫ-lum URU.MEŠ dan-nu-ti a-di URU.MEŠ TUR.MEŠ ša li-me-ti-šú-nu KUR.É-mba-ar-ru-u na-gu-u a-na gi-mir-ti-šú ul-tu qé-⸢reb⸣ KUR-šú ab-tuq-ma UGU mi-ṣir KUR aš-šur.KI ⸢ú⸣-rad-di |
| 2929 | URU.el-en-za-áš a-na URU LUGAL-ti ù dan-na-at na-ge-e šu-a-tu aṣ-bat-ma MU-šú maḫ-ra-a ú-nak-kir-ma URU.kar-md⸢EN⸣.ZU-ŠEŠ.MEŠ-eri-ba at-ta-⸢bi ni⸣-bit-su |
| 3030 | UN.MEŠ KUR.KUR ki-šit-ti ŠU.II-ia i-na lìb-bi ú-še-šib i-na ŠU.II LÚ.šu-ut SAG.MEŠ-ia LÚ.EN.NAM URU.ḫar-ḫar am-nu-ma ú-⸢rap-piš⸣ ma-a-ti |
| 3131 | i-na ta-a-a-ar-ti-ia ša KUR.ma-da-a-a ru-qu-ti ša i-na LUGAL.MEŠ-ni AD.MEŠ-ia ma-am-man la iš-mu-ú zi-kir KUR-ti-šú-un man-da-at-ta-šú-nu ka-bit-tu am-ḫur a-na ni-ri be-lu-ti-ia ú-šak-ni-su-nu-ti |
| 3232 | i-na šal-ši ger-ri-ia a-na KUR.ḫa-at-ti lu al-lik mlu-li-i LUGAL URU.ṣi-du-un-ni pul-ḫi me-lam-me be-lu-ti-ia is-ḫu-pu-<<ḪU>>-šu-nu-ti-ma a-na ru-⸢uq⸣-qí MURUB₄ tam-tim (erasure) in-na-bit |
| 3333 | URU.ṣi-du-un-nu GAL-ú URU.ṣi-du-un-nu ṣe-eḫ-ru URU.É-zi-it-tú URU.ṣa-ri-ip-tu URU.ma-ḫal-li-ba URU.ú-šu-ú URU.ak-zi-ba URU.ak-ku-ú |
| 3434 | URU.MEŠ-šú dan-nu-ti É BÀD.MEŠ-ni a-šar ri-i-ti ù maš-qí-ti É tuk-la-ti-šú ra-šub-bat GIŠ.TUKUL daš-šur EN-ia is-ḫu-pu-šú-nu-ti-ma ⸢ik⸣-nu-šú še-pu-u-a |
| 3535 | mtu-ba-aʾ-lu i-na GIŠ.GU.ZA LUGAL-ti-šú UGU-šú-un ú-še-šib-ma GUN man-da-at-tú be-lu-ti-ia šat-ti-šam (erasure) la ba-aṭ-lu ú-kin ṣe-ru-uš-šú |
| 3636 | ša mmi-nu-uḫ-im-mu URU.sam-si-mu-ru-na-a-a mtu-ba-aʾ-lu URU.ṣi-du-un-na-a-a mab-di-li-iʾ-ti URU.ú-ru-da-a-a mú-ru-mil-ki URU.gu-ub-la-a-a |
| 3737 | mmi-ti-in-ti URU.as-du-da-a-a mbu-du-DINGIR URU.É-am-ma-na-a-a mkam-mu-su-na-ad-bi KUR.ma-ʾa-ba-a-a mda-a-ram-mu URU.ú-du-ma-a-a |
| 3838 | LUGAL.MEŠ-ni KUR MAR.TU.KI ka-li-šú-nu IGI.SÁ-e šad-lu-ti ta-mar-ta-šú-nu ka-bit-tu a-di 4-šú (erasure) a-na maḫ-ri-ia iš-šu-nim-ma iš-ši-qu GÌR.II-ia |
| 3939 | ù mṣi-id-qa-a LUGAL URU.is-qa-lu-na ša la ik-nu-šú a-na ni-ri-ia DINGIR.MEŠ É AD-šú šá-a-šú DAM-su DUMU.MEŠ-šú DUMU.MUNUS.MEŠ-šú ŠEŠ.MEŠ-šú NUMUN É AD-šú as-su-ḫa-am-ma a-na KUR aš-šur.KI ú-ra-áš-šú |
| 4040 | mLUGAL-lu-dà-ri DUMU mru-kib-ti LUGAL-šú-nu maḫ-ru-ú UGU UN.MEŠ URU.is-qa-lu-na áš-kun-ma na-dan GUN kàd-re-e be-lu-ti-ia e-mì-su-ma i-šá-ṭa ab-šá-a-ni |
| 4141 | i-na me-ti-iq ger-ri-ia URU.É-da-gan-na URU.ia-pu-u URU.ba-na-a-a-bar-qa URU.a-zu-ru URU.MEŠ ša mṣi-id-qa-a ša a-na GÌR.II-ia ár-ḫiš la ik-nu-šú al-me KUR-ud áš-lu-la šal-la-⸢su⸣-un |
| 4242 | LÚ.GÌR.NÍTA.MEŠ LÚ.NUN.MEŠ ù UN.MEŠ URU.am-qar-ru-na ša mpa-di-i LUGAL-šú-nu EN a-di-i ù ma-mit šá KUR aš-šur.KI bi-re-tú AN.BAR id-du-ma a-na mḫa-za-qi-ia-ú KUR.ia-ú-da-a-a id-di-nu-šú (erasure?) ⸢nak⸣-riš |
| 4343 | a-na an-zil-li e-pu-šu ip-làḫ lìb-ba-šú-un LUGAL KUR.mu-ṣu-ri LÚ.ERIM.MEŠ GIŠ.PAN GIŠ.GIGIR.MEŠ ANŠE.KUR.RA.MEŠ ša LUGAL KUR.me-luḫ-ḫa e-mu-qí la ni-bi ik-te-ru-nim-ma il-li-ku re-ṣu-šú-un |
| 4444 | i-na ta-mir-ti URU.al-ta-qu-u el-la-mu-u-a si-id-ru šit-ku-nu ú-šá-ʾa-lu GIŠ.TUKUL.MEŠ-šú-un i-na tukul-ti aš-šur EN-ia it-ti-šú-un am-da-ḫi-iṣ-ma áš-ta-kan BAD₅.BAD₅-šú-un |
| 4545 | LÚ.EN GIŠ.GIGIR.MEŠ DUMU.MEŠ LUGAL.MEŠ KUR.mu-ṣu-ra-a-a a-di LÚ.EN GIŠ.GIGIR.MEŠ ša LUGAL me-luḫ-ḫa bal-ṭu-su-un i-na MURUB₄ tam-ḫa-ri ik-šu-da ŠU.II-a-a |
| 4646 | URU.al-ta-qu-ú URU.ta-am-na-a al-me KUR-ud áš-lu-la šal-la-su-un a-na URU.am-qar-ru-na aq-rib-ma LÚ.GÌR.NÍTA.MEŠ LÚ.NUN.MEŠ ša ḫi-iṭ-ṭu ú-šab-šu-ú a-duk-ma ina di-ma-a-ti si-ḫir-ti URU a-⸢lul pag⸣-ri-šú-un |
| 4747 | DUMU.MEŠ URU e-piš an-ni ù gíl-la-ti a-na šal-la-ti am-nu si-it-te-šú-nu la ba-bil ḫi-ṭi-ti ù gul-lul-ti ša a-ra-an-šú-nu la ib-šu-ú uš-šur-šu-un aq-bi |
| 4848 | mpa-di-i LUGAL-šú-nu ul-tu qé-reb URU.ur-sa-<li>-im-mu ú-še-ṣa-am-ma i-na GIŠ.GU.ZA be-lu-ti UGU-šú-un ú-še-šib-ma man-da-at-tú be-lu-ti-ia ú-kin ṣe-ru-uš-šú |
| 4949 | ša mḫa-za-qi-a-ú URU.ia-ú-da-a-a 36 URU.MEŠ-šú É BÀD.MEŠ dan-nu-ti ù URU.MEŠ TUR.MEŠ ša li-me-ti-šú-nu ⸢šá ni⸣-ba la i-šu-ú |
| 5050 | i-na šuk-bu-us a-ram-me ù qur-ru-ub šu-pe-e mit-ḫu-uṣ zu-uk GÌR.II pil-ši nik-si ù kal-ba-na-ti al-me ak-šudud |
| 5151 | 2 ME LIM 1 ME 50 UN.MEŠ TUR GAL NITA u MUNUS ANŠE.KUR.RA.MEŠ ANŠE.KUNGA.MEŠ ANŠE.MEŠ ANŠE.GAM.MAL.MEŠ GU₄.MEŠ u US₅.UDU.ḪI.A šá la ni-bi ul-tu qer-bi-šú ú-še-ṣa-am-ma šal-la-tiš am-nu |
| 5252 | šá-a-šú GIM MUŠEN qu-pi qé-reb URU.ur-sa-li-im-ma URU LUGAL-ti-šú e-sír-šu URU.ḪAL.ṢU.MEŠ UGU-šú ú-rak-kis-ma a-ṣe-e KÁ.GAL-šú ú-ter-ra ik-ki-bu-uš |
| 5353 | URU.MEŠ-šú ša áš-lu-la ul-tu qé-⸢reb⸣ KUR-šú ab-tuq-ma a-na mmi-ti-in-ti LUGAL URU.as-du-di ù mpa-di-i LUGAL URU.am-qar-ru-na mGISSU-EN LUGAL KUR.ḫa-zi-ti ad-din ú-ṣa-ḫi-ir KUR-su |
| 5454 | e-li GUN maḫ-ri-ti na-da-an šat-<ti>-šú-un man-da-at-ti kàd-re-e be-lu-ti-<<šu>>-ia ú-rad-di-ma ú-kin ṣe-ru-uš-šú |
| 5555 | šu-ú mḫa-za-qi-a-ú pu-ul-ḫi me-lam-me be-lu-ti-ia is-ḫu-pu-šú-ma LÚ.úr-bi LÚ.ERIM.MEŠ-šú SIG₅.MEŠ ša a-na dun-nu-un URU.ur-sa-li-im-mu (erasure) URU LUGAL-ti-šú ú-še-ri-bu ir-šu-u til-la-a-te |
| 5656 | 30 GUN KÙ.GI 8 ME GUN KÙ.BABBAR ni-siq-ti gu-uḫ-li ták-kàs-si NA₄.AN.ZA.GUL.ME GAL.MEŠ GIŠ.NÁ.MEŠ ZÚ GIŠ.GU.ZA.MEŠ né-me-di ZÚ KUŠ AM.SI ZÚ AM.SI GIŠ.ESI GIŠ.TÚG lu-bul-ti bir-me TÚG.GADA SÍG.ta-kil-tú SÍG.ar-ga-man-nu |
| 5757 | ú-nu-ut ZABAR AN.BAR URUDU AN.NA AN.BAR GIŠ.GIGIR.MEŠ ga-ba-bi az-(erasure)-ma-re-e si-ri-ia-am GÍR.MEŠ AN.BAR šib-bi til-pa-ni u uṣ-ṣi til-li ú-nu-ut ta-ḫa-zi šá ni-ba la i-šu-ú |
| 5858 | it-ti MUNUS.DUMU-šú MUNUS.UN.MEŠ É.GAL-šú LÚ.NAR.MEŠ MUNUS.NAR.MEŠ a-na qé-reb ⸢URU⸣.NINA URU be-lu-ti-ia EGIR-ia ú-še-bi-lam-ma a-na na-dan man-da-at-ti ù e-peš ARAD-ú-ti iš-pu-ra rak-bu-šú |
| 5959 | i-na šal-la-at KUR.MEŠ šá-ti-na ša áš-lu-la 10 LIM GIŠ.PAN 10 LIM GIŠ.a-ri-tú ina ŠÀ-šú-nu ak-ṣur-ma UGU ki-ṣir LUGAL-ti-ia ú-rad-di |
| 6060 | si-it-ti šal-la-ti na-ki-ri ka-bit-tu a-na gi-mir KARAŠ-ia ù LÚ.EN.NAM-ia UN.MEŠ ma-ḫa-za-ni-ia GAL.MEŠ ki-ma ṣe-e-ni lu ú-za-ʾi-iz |
| 6161 | i-na u₄-me-šu-ma NINA.KI ma-ḫa-zi ṣi-i-ru URU na-ram diš-tar ša nap-ḫar ki-du-de-e DINGIR.MEŠ u dIŠ.TAR.MEŠ ba-šu-u qé-reb-šu |
| 6262 | tem-me-en-nu da-ru-ú du-ru-uš ṣa-a-ti ša ul-tu ul-la it-<ti> ši-ṭir bu-ru-ú-me eṣ-rat-su eṣ-ret-ma šu-pu-ú ṣi-in-du-šu |
| 6363 | áš-ru nak-lu šu-bat pi-riš-ti ša mim-ma šum-šu ši-pir ni-kil-ti gi-mir pel-lu-de-e ni-ṣir-te làl-gar šu-ta-bu-la qé-reb-šu |
| 6464 | ša ul-tu ul-la LUGAL.MEŠ-ni a-li-kut maḫ-ri AD.<MEŠ>-ia ul-la-nu-u-a be-lu-ti KUR aš-šur.KI e-pu-šu-ma ú-ma-ʾe-er ba-ʾu-lat dEN.LÍL |
| 6565 | ù šat-tú-šam la na-par-ka-a e-reb nar-ba-a-ti GUN mal-ki kib-rat ar-ba-ʾi im-da-na-ḫa-ru qé-reb-šu |
| 6666 | a-a-um-ma ina lìb-bi-šú-nu a-na É.GAL qer-bi-šu kúm-mu ri-mit be-lu-ti ša ṣu-uḫ-ḫu-ru šu-bat-su le-e-su ul id-da-a lib-bu-uš ul iḫ-su-us |
| 6767 | a-na šu-te-šur SILA URU ù šum-dul₆ re-ba-a-ti ḫa-re-e ÍD za-qa-ap ṣip-pa-a-ti ú-zu-un-šú ul ib-ši-ma ul uš-ta-bil ka-ras-su |
| 6868 | ia-a-ti mdEN.ZU-ŠEŠ.MEŠ-eri-ba LUGAL KUR aš-šur.KI e-peš šip-ri šu-a-tu ki-i ṭè-em DINGIR.MEŠ a-na uz-ni-ia ib-ši-ma ka-bat-ti ub-lam-ma |
| 6969 | te-ne-šet KUR.kal-di LÚ.a-ra-me KUR.man-na-a-a KUR.qu-e KUR.ḫi-lak-ku KUR.pi-liš-tu ù KUR.ṣur-ri ša a-na ni-ir-ia la ik-nu-šú as-su*-ḫa-am-ma tup-šik-ku ú-šá-áš-ši-šú-nu-ti-ma il-bi-nu SIG₄ |
| 7070 | a-pe ku-pe-e ša qé-reb URU.kal-di ak-šiṭ-ma ap-pa-ri-šú-un šam-ḫu-ti i-na ba-ḫu-la-ti na-ki-ri ki-šit-ti ŠU.II-ia ú-šal-di-da a-na e-peš šip-ri-šá |
| 7171 | É.GAL maḫ-ri-tu ša 3 ME 60 ina 1.KÙŠ UŠ tar-ṣi za-me-e É ziq-qur-rat 80 ina 1.KÙŠ DAGAL i-na tar-ṣi É.na-ma-ri É diš-tar 1 ME 34 ina 1.KÙŠ DAGAL i-na <tar-ṣi> É.na-ma-ri É-kid₉-mu-ri 95 ina 1.KÙŠ DAGAL |
| 7272 | ša LUGAL.MEŠ-ni a-li-kut maḫ-ri AD.MEŠ-ia a-na ri-mit be-lu-ti-šú-un ú-še-pi-šu-ma la ú-nak-ki-lu ši-pir-šá |
| 7373 | ÍD.te-bil-ti a-gu-ú šit-mu-ru ša i-na na-ši-šá ge-gu-né-e qa-bal-ti URU ú-ab-bi-tu-ma ki-maḫ-ḫi-šú-un pa-az-ru-ti ú-kal-li-mu dUTU-šú |
| 7474 | ù ul-tu u₄-me SÙ.MEŠ ṭe-eḫ É.GAL i-ba-ʾu-ú-ma i-na ILLU-šá gap-ši i-na uš-ši-šá ab-bu ú-šab-šu-ú ú-ri-bu tem-me-en-šá |
| 7575 | É.GAL.TUR.RA šá-a-tu a-na si-ḫir-ti-šá a-qur-ma ša ÍD.te-bil-ti ma-lak-šá uš-te-eš-na-a ab-bu uš-ṭib-ma ú-še-šir mu-ṣu-u-šá |
| 7676 | qé-reb ka-tim-ti a-sur-rak-ku šap-la-a-nu GI.MEŠ e-la-niš NA₄ KUR-i dan-ni it-ti ESIR.UD.A ak-si-ma A.ŠÀ ul-tu ma-a-me ú-še-lam-ma na-ba-liš ú-ter |
| 7777 | 7 ME ina 1.KÙŠ AS₄.LUM GAL-ti UŠ 1 ME 76 ina AS₄.LUM GAL-⸢ti SAG.KI⸣ AN.TA IM.SI.SÁ 2 ME 68 ina AS₄.LUM GAL-ti SAG.KI MURUB₄-ti mé-eḫ-ret za-me-e at-man-ni ku-tal diš-tar |
| 7878 | 3 ME 83 ina AS₄.LUM GAL-ti SAG.KI qab-li-tum šá-ni-tú mu-uḫ-ḫur-ti šá-a-ri a-mur-ri ku-tal É ziq-rat É diš-tar |
| 7979 | 3 ME 86 ina AS₄.LUM GAL-ti SAG.KI KI.TA IM.U₁₈.LU ÚS.SA.DU ÍD.IDIGNA tam-la-a ú-mal-li-ma am-šu-uḫ me-ši-iḫ-ta |
| 8080 | la-ba-riš u₄-me ina ILLU kiš-šá-ti tem-me-en-šú la e-né-še as-kup-pat NA₄.pi-i-li rab-ba-a-ti ki-is-su-ú-šu ú-šá-as-ḫi-ra ú-dan-ni-na šu-pu-uk-šá |
| 8181 | MU.SAR-e ši-ṭir šu-mi-ia 1 ME 60 ti-ib-ki tam-li-i qé-reb-šu al-ṭu-ur-ma šap-la-nu ina uš-ši-šu e-⸢zib⸣ aḫ-ra-⸢taš⸣ |
| 8282 | ar-ka-nu šu-uš-qu-ú tam-li-i ka-bat-ti ub-lam-ma 20 ti-ib-ki ṣe-er maḫ-re-e uṣ-ṣip-ma 1 ME 80 ti-ib-ki ú-šaq-qí ⸢e⸣-la-niš |
| 8383 | tar-pa-šu-ú UGU ša u₄-mu pa-ni ú-šar-bi ṣe-er me-ši-iḫ-ti É.GAL maḫ-ri-ti ú-rad-di-ma ú-šá-an-di-la ⸢ši⸣-kit-taš |
| 8484 | É.GAL ⸢NA₄.GIŠ.NU₁₁.GAL ZÚ AM.SI⸣ GIŠ.ESI GIŠ.TÚG GIŠ.mu-suk-kan-ni GIŠ.EREN GIŠ.ŠUR.MÌN GIŠ.⸢dáp-ra-nu ŠIM.LI⸣ ù GIŠ.bu-uṭ-ni é-gal-zag-nu-di-tuku-a a-na mu-šab LUGAL-ti-ia ú-še-pi-šá qé-reb-⸢šá⸣ |
| 8585 | GIŠ.KIRI₆.MAḪ-ḫu tam-šil <<x>> KUR.ḫa-ma-nim ša gi-mir ŠIM.ḪI.A GURUN ṣip-pa-a-ti GIŠ.MEŠ tuk-lat KUR-i ù KUR.kal-di qé-reb-šu ḫur-ru-šu i-ta-a-šá az-qu-[x] |
| 8686 | áš-šú za-qa-ap ṣip-pa-a-ti A.ŠÀ ta-mir-ti e-le-en URU 2(BARIG).TA.ÀM a-na DUMU.MEŠ ⸢URU⸣.NINA.KI pil-ku ú-pal-lik-ma ú-šad-gi-la pa-nu-uš-šú-[x] |
| 8787 | a-na miṭ-ra-a-ti šum-mu-ḫi ul-tu pa-⸢a-ṭi⸣ <<a-di>> URU.ki-si-ri a-di ta-mir-ti URU.NINA.KI KUR-a ù bi-ru-tú ina ak-kul-la-a-ti ú-šat-tir-ma ú-še-šir ÍD.ḫar-[x] |
| 8888 | 1 1/2 KASKAL.GÍD qaq-qa-ru ul-tu qé-reb ÍD.ḫu-su-ur ma-a-me da-ru-ú-ti a-šar-šá ú-šar-<<ši>>-da-a qé-reb ṣip-pa-ti šá-ti-na ú-šaḫ-bi-ba (erasure) pat-ti-⸢iš⸣ |
| 8989 | ša URU.NINA URU be-lu-ti-ia šu-bat-su uš-rab-bi re-ba-ti-šú ú-šá-na-dil-ma bi-re-e-ti ù su-qa-a-ni uš-par-di-ma ú-nam-mir GIM u₄-me |
| 9090 | i-na mé-eḫ-ret KÁ.GAL MURUB₄ URU i-na a-gúr-ri NA₄.pi-i-li pe-ṣe-e a-na me-ti-iq be-lu-ti-ia ú-šak-bi-is ti-tur-ru |
| 9191 | MU.SAR-a ú-še-piš-ma li-i-tú ù da-na-nu ša i-na tukul-ti aš-šur EN GAL EN-ia UGU kul-lat na-ki-ri áš-tak-ka-⸢nu⸣ |
| 9292 | ù mim-ma ep-šet e-tep-pu-šu qé-reb-šu ú-šaṭ-ṭir-ma i-na tem-me-en-ni É.GAL be-lu-ti-ia e-zib ⸢aḫ⸣-ra-taš |
| 9393 | a-na ar-kàt u₄-me a-na LUGAL.MEŠ-ni DUMU.MEŠ-ia ša daš-šur a-na RE.É.UM-ut KUR ù UN.MEŠ i-nam-bu-u zi-kir-šu e-nu-ma É.GAL šá-a-tu i-lab-bi-ru-ma ⸢en⸣-na-ḫu |
| 9494 | an-ḫu-sa lu-ud-diš MU.SAR-a ši-ṭir šu-mi-ia li-mur-ma Ì.GIŠ lip-šu-uš UDU.SISKUR liq-qí a-na áš-ri-šú li-ter daš-šur ik-ri-bi-šu ⸢i⸣-šem-me |
| 9595 | 1 UŠ 34.TA.ÀM MU.DIDLI MU.SAR-e ITI.GU₄.SI.SÁ li-mu mmi-tu-nu LÚ.GAR.KUR URU.i-sa-na |