VA 02708 (RINAP 4 Esarhaddon 098) [Esarhaddon]

AN.ŠÁR AD DINGIR.MEŠ ra-aʾ-im SANGA-ti-ia

^da-nu geš-ru reš-tu-u na-bu-u šu-mì-ia

^dBAD EN šá-qu-u mu-ki-in BALA.MEŠ-ia

^dDIŠ er-šú mu-du-u mu-šim NAM.MEŠ-ia

^d30 ^dŠEŠ.KI nam-ru mu-dam-mì-iq GISKIM.MEŠ-ia

^dUTU DI.KU₅ AN-e u KI-tim pa-ri-su EŠ.BAR-ia

^dIŠKUR EN ra-áš-bu mu-⸢na⸣-ḫi-iš ERIM.ḪI.A.MEŠ-ia

^dMES e-tel ^dí-gì-gì u ^dGÉŠ.U-ki mu-⸢šar⸣-bu-u LUGAL-ti-ia

^dINANNA be-let MURUB₄ u MÈ a-⸢li⸣-kàt i-di-ia

^d7.BI DINGIR.MEŠ qar-du-u-ti sa-pi-nu na-ki-ri-⸢ia⸣

DINGIR.MEŠ GAL.MEŠ DÙ-šú-nu mu-šim-mu šim-ti

ša ana LUGAL mi-gir-šú-un i-šar-ra-ku da-⸢na⸣-an li-i-tú

^maš-šur-PAP-AŠ LUGAL GAL MAN dan-nu MAN ŠÚ MAN KUR aš-šur.KI

GÌR.NÍTA KÁ.DINGIR.RA.KI LUGAL KUR šu-me-ri

ù URI.KI MAN KUR.kár-^ddun-ía-àš DÙ-šú-un

LUGAL LUGAL.MEŠ KUR.mu-ṣur KUR.pa-tu-ri-su u KUR.ku-u-si

pa-[liḫ DINGIR.MEŠ] GAL-ti

ú-šum-[gal]-lu ⸢ṣi⸣-i-⸢rum⸣ [na-ram] AN.ŠÁR ^d⸢UTU⸣

^dAG u [^d]⸢AMAR.UTU⸣ LUGAL LUGAL.⸢MEŠ⸣

la pa-du-u mu-la-ʾi-⸢iṭ⸣

ek-ṣu-ti la-biš na-mur-[ra-ti]

la a-di-ru šá-áš-me qar-ra-du gít-⸢ma⸣-[lu]

la pa-du-u tu-qu-un-tu ru-bu-u dan-dan-nu

mu-kil ṣer-ret ma-li-ki lab-bu na-ad-ru

mu-ter gi-mil a-bi a-li-di-šú

LUGAL šá ina tukul-ti AN.ŠÁR ^dUTU ^dAG u ^dAMAR.UTU

DINGIR.MEŠ ti-ik-le-e-šú

i-šá-riš

it-tal-lak-u-ma

ik-šu-da

ni-iz-mat-su

kul-lat la ma-<gi>-re-e-šú mal-ki la kan-šú-ti-šú ⸢GIM⸣ GI a-pi

ú-ḫa-ṣi-iṣ-ma ú-šak-bi-sa še-pu-⸢uš⸣-šú

za-nin NIDBA a-na DINGIR.MEŠ GAL.MEŠ

šá pa-laḫ DINGIR.MEŠ ù ^diš-ta-ri i-[du-ú]

[(x)] x-x-⸢i gab-bi⸣ [ba-nu]-⸢ú⸣

⸢É⸣ AN.ŠÁR mu-šak-⸢lil si⸣-ma-te-e-šú

e-⸢piš é⸣-sag-gíl ù KÁ.DINGIR.⸢RA⸣.KI mu-šal-li-mu

par-ṣe-e ⸢šá DINGIR.MEŠ KUR.KUR šal-lu-u-ti TA qé-reb URU.aš-šur⸣

a-na áš-ri-šú-nu ú-ter-ru ⸢LUGAL⸣ ša na-dan zi-bé-e-šú

DINGIR.MEŠ GAL.MEŠ i-⸢ram⸣-mu-ma SANGA-su [ina É].KUR.MEŠ ⸢da⸣-riš

ú-⸢kin⸣-nu GIŠ.TUKUL.MEŠ-šú-nu la pa-du-u-ti a-na ši-rik-ti

EN-ti-šú iš-ru-ku ⸢LUGAL⸣ [ša] EN EN.MEŠ ^dAMAR.UTU

UGU LUGAL.MEŠ-ni ša kib-rat LÍMMU-ti ú-šá-te-ru ú-šar-bu-u

EN-u-su KUR.KUR DÙ-ši-na a-na ⸢GÌR⸣.MEŠ-šú ú-šak-ni-šú

bil-tu ù man-da-at-tu UGU-ši-na ú-⸢kin⸣-nu ka-šid a-a-bé-e-šú

mu-ḫal-li-qu ga-re-e-šú LUGAL šá tal-lak-ta-šú a-bu-bu-um-ma ep-še-ta-šú

⸢lab⸣-bu na-ad-ru pa-nu-uš-šú URU-um-ma ar-ke-e-šú ti-⸢lu⸣ qit-ru-⸢ub⸣

ta-ḫa-zi-šú dan-nu nab-lu muš-taḫ-mì-ṭu ^dGIŠ.BAR la a-ni-ḫu

DUMU ^md30-PAP.MEŠ-SU MAN ŠÚ MAN KUR aš-šur.KI ⸢DUMU⸣ ^mLUGAL-GI.NA MAN ŠÚ MAN KUR AŠ

GÌR.NÍTA KÁ.DINGIR.RA.KI LUGAL KUR EME.GI₇ ù URI.KI NUMUN LUGAL-u-ti da-ru-u

ša ^mdEN-⸢ba⸣-ni DUMU ^ma-da-si mu-kin LUGAL-u-ti KUR aš-šur.KI šá du-ru-⸢ug⸣-[šú]

bal-til.KI ina pi-⸢i⸣ AN.ŠÁR ^dUTU ^dAG u ^d⸢AMAR⸣.[UTU DINGIR.MEŠ] GAL.⸢MEŠ⸣ EN-[u-ti]

im-qut-am-ma dan-na-ku dan-dan-na-[ku] e-tel-la-ku šit-ra-ḫa-ku geš-ra-ku

kab-ta-ku šur-ru-ḫa-ku ina gi-⸢mir⸣ LUGAL.MEŠ-ni šá-ni-na ul i-⸢šá⸣-[ku]

ni-šit AN.ŠÁR ^dAG u ^dAMAR.UTU ⸢ni⸣-bit ^d30 mi-gir ^da-nim na-ra-am šar-ra-ti

^diš-tar i-lat kal gim-ri GIŠ.TUKUL la pa-du-u mu-⸢rib⸣ KUR nu-kúr-ti a-na-ku-ma

LUGAL le-ʾe-é-um MURUB₄ ù MÈ ša-giš da-ád-me na-ki-re-e-šú

né-er a-a-bé-e-šú muš-ḫar-mì-ṭu ga-re-e-šú mu-šak-niš la kan-šú-te-e-šú

ša nap-ḫar kiš-šat UN.MEŠ i-pe-lu AN.ŠÁR ^dUTU ^dAG ù ^dAMAR.UTU

EN.MEŠ-ia MAḪ.MEŠ ša la ⸢in⸣-nen-nu-u qí-bit-su-un LUGAL-u-ut la šá-na-an

a-na šim-ti-ia i-ši-mu ^diš-tar be-el-tum ra-aʾ-i-mat SANGA-ti-ía

GIŠ.PAN dan-na-tu GIŠ.šil-ta-ḫu geš-ru mu-šam-qit la ma-gi-ri tu-šat-me-ḫa

rit-tu-u-a bi-ib-lat lìb-bi-ia tu-šak-ši-da-an-ni-ma nap-ḫar mal-ki

la kan-šú-ti tu-šak-ni-šá še-pu-u-a e-nu AN.ŠÁR EN GAL-u áš-šú taš-ri-iḫ-ti

da-na-an ep-še-te-ia UN.MEŠ ⸢kul⸣-lu-mi-am-ma UGU LUGAL.MEŠ šá kib-rat LÍMMU-ti

LUGAL-u-ti ú-šar-ri-iḫ-ma ⸢ú⸣-šar-ba-a zik-ri MU-ia ši-bir-ru ez-zu

a-na ra-sa-ab na-ki-ri ú-šá-áš-šá-a i-da-a-a ma-a-tú a-na AN.ŠÁR

iḫ-ṭu-u ú-gal-li-lu i-ši-ṭu a-na ḫa-ba-ti šá-la-li mi-ṣir KUR aš-šur.KI

⸢ru-up-pu-ši⸣ <<Ú>> ú-mal-lu qa-⸢tú⸣-u-a TA AN.ŠÁR u DINGIR.ME GAL.MEŠ EN.MEŠ-ía

iq-bu-u-ni a-la-ku KASKAL.II.MEŠ SÙ.MEŠ šad-de-e GIG.MEŠ ši-pik ba-ṣi KAL.MEŠ

a-šar ṣu-ma-a-me ina mi-gir lìb-bi-⸢ia⸣ šal-meš lu at-tal-lak ša ^mtar-qu-ú

MAN KUR.mu-ṣur ù KUR.ku-u-si ni-⸢zir⸣-ti DINGIR-ti-šú-nu GAL-ti TA URU.iš-ḫup-⸢ri⸣

a-di URU.me-em-pi URU MAN-ti ma-lak 15 u₄-me qaq-qa-ri u₄-me-šam la na-par-ka-a

di-ik-tú-šú ma-aʾ-diš a-duk ù šá-a-šú 5-šú ina uṣ-ṣi GIŠ.šil-ta-ḫi

mi-ḫi-iṣ la nab-la-ṭi am-ḫa-su-ma URU.me-em-pi URU MAN-ti-šú ina mì-šil u₄-me

ina pil-ši nik-si na-bal-kàt-ti al-me KUR-ud ap-pul aq-qur ina ^dGIŠ.BAR

aq-mu MUNUS.É.GAL-šú MUNUS.ERIM.É.GAL.MEŠ-šú ^mú-šá-na-ḫu-ru DUMU UŠ-ti-šú

ù re-eḫ-ti DUMU.MEŠ-šú DUMU.MUNUS.MEŠ-šú NÍG.ŠU-šú NÍG.GA-šú ANŠE.KUR.RA.MEŠ-šú GU₄.MEŠ-šú

ṣe-e-ni-šú ina la ma-a-ni áš-lu-la a-na KUR aš-šur.KI šur-uš KUR.ku-u-si

TA KUR.mu-ṣur as-suḫ-ma e-du ina lìb-bi ana da-li-li ul e-zib

ina UGU KUR.mu-ṣur DÙ-šú LUGAL.MEŠ ⸢LÚ⸣.NAM.MEŠ LÚ.GAR-nu.MEŠ LÚ.GAL.KAR.MEŠ LÚ.qi-pa-a-ni

LÚ.šá-pi-ri ana eš-šú-ti ap-qid sat-tuk-ki gi-nu-u a-na AN.ŠÁR u DINGIR.ME GAL.ME EN.MEŠ-ía

ú-kin dà-re-e GUN ù man-da-at-tu EN-ti-ía šat-ti-šam la na-par-ka-a

e-mid-su-nu-ti NA₄.NA.RÚ.A ši-ṭir MU-ia ú-še-piš-ma ta-nit-ti qar-ra-du-ti

AN.ŠÁR EN-ía da-na-an ep-še-te-⸢ia⸣ šá ina tukul-ti AN.ŠÁR EN-ía at-tal-lak-u-ma

ù li-i-tú ki-šit-ti ŠU.II-ia ⸢EDIN⸣-uš-šú ú-šá-áš-ṭir-ma ana tab-rat kiš-šat na-ki-ri

ana ṣa-at u₄-me ul-ziz šá NA₄.NA.RÚ.A šú-a-tú TA KI-šú ⸢ú-nak-kar⸣-u-ma šu-mì šaṭ-ru

i-pa-ši-ṭu-ma MU-šú i-šaṭ-ṭa-ru lu-u ina e-pe-ri i-kàt-ta-mu lu-u ina A.MEŠ

i-nam-du-u lu-u ina IZI GÍBIL-u lu-u ina áš-ri la a-ma-ri i-šak-ka-[nu] ^dINANNA be-let MURUB₄ u MÈ

zik-ru-su sin-niš-a-niš lu-šá-lik-⸢ma⸣ ina KI.TA LÚ.KÚR-šú lu-še-šib-šú ka-meš NUN-u EGIR-u NA₄.NA.RÚ.A

ši-ṭir MU-ía li-<mur>-ma ma-ḫar-šú lil-ta-⸢su⸣-ma Ì.GIŠ lip-šú-uš UDU.SISKUR liq-qí zik-ri AN.ŠÁR EN-ía lu-ta-ʾi-id