BM 113204 (RINAP 4 Esarhaddon 135, ex. 02) [Esarhaddon]

a-na ^dna-na-a pu-su-um-ti i-la-a-te ša ku-uz-bu ù ul-ṣu za-aʾ-na-at lu-le-e ma-la-ti

bu-kúr-ti ^da-nim šit-ra-aḫ-ti ša ina nap-ḫar be-le-e-te šur-ba-at e-nu-us-sa

ḫi-rat ^dmu-zib-sa₄-a ti-iz-qar-ti sek-ra-at na-aʾ-it-ti na-ra-mat ru-bu-ti-⸢šú⸣

ìl-tum re-me-ni-ti a-li-kàt ri-ṣi LUGAL pa-li-ḫi-šá mu-šal-bi-rat pa-le-e-⸢šú⸣

a-ši-bat é-ḫi-li-an-na ša qé-reb é-an-na šar-rat UNUG.KI GAŠAN GAL-ti GAŠAN-šú

^mAN.ŠÁR-ŠEŠ-SUM.NA MAN ŠÚ MAN KUR aš-šur.KI GÌR.NÍTA KÁ.DINGIR.RA.KI MAN KUR šu-me-ri ù URI.KI

LUGAL šáḫ-ṭu muš-te-eʾ-u áš-ra-a-ti DINGIR.MEŠ GAL.MEŠ pa-liḫ EN EN.EN

ba-nu-u É AN.ŠÁR e-piš é-sag-íl ù KÁ.DINGIR.RA.KI za-nin é-zi-da

mu-ud-diš é-an-na mu-šak-lil eš-re-e-te ma-ḫa-zi ša ina qé-reb-ši-na iš-tak-ka-nu si-ma-a-ti

DUMU ^md30-PAP.MEŠ-SU MAN ŠÚ MAN KUR aš-šur.KI DUMU ^mMAN-GIN MAN KUR aš-šur.KI GÌR.NÍTA KÁ.DIŠ.DIŠ.KI MAN KUR šu-me-ri u URI.KI

é-ḫi-li-an-na É pa-pa-ḫi ^dna-na-a GAŠAN-ia ša qé-reb é-an-na

ša MAN maḫ-ri i-pu-šu la-ba-riš il-lik-ma mi-qit-ti ir-ši

áš-ra-ti-šú áš-te-ʾe ina a-gur-ri UDUN KÙ-tim ma-qit-ta-šú ak-še-er

ŠU.II ^dna-na-a GAŠAN GAL-ti aṣ-bat-ma a-na qé-reb-šú ú-še-rib šu-bat da-ra-a-te ú-šar-me

UDU.SISKUR.MEŠ taš-ri-iḫ-ti aq-qí uš-par-zi-iḫ si-ga-ar-šá

^dna-na-a GAŠAN ṣir-ti ina qé-reb É pa-pa-ḫi šu-a-ti ḫa-di-iš ina a-šá-bi-ki

ia-a-ti ^mAN.ŠÁR-ŠEŠ-SUM.NA MAN KUR aš-šur.KI ina ma-ḫar ^dMUATI ḫa-a-a-ri-ki ti-is-qa-ri da-mi-iq-ti

TI.LA UD.MEŠ SÙ.MEŠ še-bé-e lit-tu-tu ṭu-ub UZU ù ḫu-ud lìb-bi ši-i-me ši-ma-⸢ti⸣

SUḪUŠ GIŠ.GU.ZA LUGAL-ti-ia ú-ḫum-meš šur-ši-di it-ti AN-e u KI-tim ⸢kin⸣-x x [x x]

ma-ti-ma ina aḫ-rat u₄-me NUN EGIR-u ša ina BALA-šú É pa-pa-ḫi šu-a-ti in-na-ḫu ⸢an-ḫu-us-su⸣ [...]

šu-mì it-ti šu-mì-šú liš-ṭur MU.SAR-ru-u ši-⸢ṭir MU-ia⸣ Ì.GIŠ lip-šu-uš UDU.SISKUR BAL-qí it-ti MU.SAR-e-šú liš-kun

ik-ri-bi-šú DINGIR.MEŠ i-šem-mu-u ša šu-mì šaṭ-ru ina ši-pir ni-kil-ti i-pa-áš-ši-⸢ṭu⸣

MU.SAR-ru-u-a i-ab-bat lu-u a-šar-šú ú-nak-ka-⸢ru^?⸣

^dna-na-a ag-gi-iš lik-kil-me-šu-ma ši-mat le-mut-tú li-šim-[x]

MU-šú NUMUN-šú ina KUR li-ḫal-liq-ma a-a ir-ši-šú re-e-[x]