NBC 02510 (RINAP 4 Esarhaddon 133, ex. 03) [Esarhaddon]
| Obverse | |
| 11 | a-na diš-tar GAŠAN šur-bu-⸢tu⸣ e-tel-⸢let AN⸣-e u KI-tim qa-⸢rit-ti⸣ DINGIR.MEŠ šá-ru-uḫ-tu |
| 22 | dINANNA UNUG.KI ru-ba-a-ti ṣir-ti le-qa-a-ti pa-ra-aṣ da-nù-ú-tu |
| 33 | šá ri-kis te-re-e-ti ḫa-am-mat |
| 44 | ru-um-tu ti-iz-qar-ti šá a-na LUGAL mi-ig-ri-šá ke-niš ip-pal-la-su |
| 55 | BALA-šú ú-šal-ba-ru i-šar-ra-ku-uš da-na-nu ù li-i-ti |
| 66 | šá-nun-ka-at ád-na-a-ti šá-qu-ti DINGIR.MEŠ a-ši-bat é-nir-gál-an-na |
| 77 | šá qé-reb é-an-na be-let UNUG.KI GAŠAN GAL-ti GAŠAN-šú |
| 88 | mAN.ŠÁR-ŠEŠ-SUM.NA LUGAL GAL-ú LUGAL dan-nu LUGAL kiš-šat LUGAL KUR aš-šur.KI LUGAL ⸢kib⸣-ra-a-ti er-bit-ti |
| 99 | GÌR.NÍTA TIN.TIR.⸢KI⸣ LUGAL KUR šu-me-ri u ak-ka-di-i ti-ri-iṣ ŠU.II AN.ŠÁR |
| 1010 | i-tu-ut kun lìb-bi dEN.LÍL ni-bit dAMAR.UTU mi-gir dir-ni-ni |
| 1111 | šá ul-tu ṣe-ḫe-ri-šú a-na AN.ŠÁR da-nim dEN.LÍL dé-a d30 dUTU dIŠKUR dAMAR.UTU |
| 1212 | dAG <<u>> dU.GUR u diš-tar DINGIR.MEŠ GAL.MEŠ EN.ME-šú it-tak-lu-ma ni-iz-mat-su ⸢ú⸣-šak-ši-du-uš i-mu-ru da-na-an-šú-un |
| 1313 | a-na nu-uḫ-ḫi lìb-bi DINGIR-ú-ti-šú-nu u nu-up-pu-šú ka-bat-ti-šú-nu |
| 1414 | GIŠ.MI-šú-nu da-ru-ú it-ru-ṣu e-li-šú |
| 1515 | ina e-muq AN.ŠÁR dEN DUMU dEN u d15 DINGIR.MEŠ ti-ik-li-šú kul-lat KUR.KUR i-be-lu-ma |
| 1616 | gi-mir ma-li-ku ú-šak-ni-šú še-pu-uš-šú |
| 1717 | ba-a-nu-ú É AN.ŠÁR e-piš é-sag-íl u TIN.TIR.KI mu-ud-diš é-an-na |
| 1818 | mu-šak-lil eš-re-e-ti u ma-ḫa-zu mu-kin sat-tuk-ka |
| 1919 | LUGAL šá ina ⸢u₄⸣-mu BALA-šú EN GAL-ú dAMAR.UTU ana TIN.TIR.KI ir-⸢šu⸣-ú sa-li-mu |
| 2020 | ina é-sag-íl ⸢É⸣.GAL-šú ir-⸢mu-ú⸣ šu-bat-su |
| 2121 | da-num GAL-ú (x) a-na URU-šú ⸢BÀD.AN.KI⸣ u É-šú é-dim-gal-⸢kalam⸣-ma |
| 2222 | ú-še-ri-bu-ma ú-še-ši-bu pa-rak-ka da-ra-a-ti |
| 2323 | DINGIR.MEŠ KUR.KUR šá a-na KUR aš-šur.KI i-ḫi-šu-ni šu-kut-ta-šú-nu ud-diš-ma ul-tu qé-reb KUR aš-šur.KI |
| 2424 | a-na áš-ri-šú-nu ú-⸢ter⸣-šú-nu-ti-ma ú-kin-nu is-qu-uš-šú-un |
| 2525 | NUN en-qu it-pe-šú ḫa-a-sis ⸢kal⸣ ši-pir šá ina ma-ḫa-zu GAL.MEŠ si-ma-a-ti iš-tak-ka-nu |
| 2626 | uš-te-ši-ru šu-luḫ-ḫa |
| 2727 | DUMU md30-ŠEŠ.MEŠ-eri-ba LUGAL ŠÚ LUGAL KUR aš-šur.KI DUMU mLUGAL-GIN LUGAL KUR aš-šur |
| 2828 | GÌR.NÍTA TIN.TIR.KI LUGAL KUR šu-me-ri ù URI.KI |
| 2929 | li-ip-li-pi da-ru-ú šá mdEN-ba-ni DUMU ma-da-si LUGAL KUR aš-šur.KI |
| 3030 | NUNUZ bal-til.KI šu-qu-ru NUMUN LUGAL-ú-tu ki-sít-ti ṣa-a-ti |
| 3131 | i-nu-šú ⸢é⸣-an-na É da-nu-ú-tu na-ram d15 GAŠAN-ia šá LUGAL ma-ḫar i-pu-⸢šu⸣ |
| 3232 | la-ba-riš il-lik-ma i-qu-pu É.GAR₈.MEŠ-šú |
| 3333 | áš-ra-ti-šú áš-te-eʾ-e ma-qit-ta-šú ⸢as-suḫ⸣ te-me-en-šú ú-ṣab-bi-ma |
| 3434 | ⸢ki⸣-ma si-ma-ti-šú la-bi-ra-a-ti ina ši-pir dkulla ar-ṣip ú-šak-lil |
| 3535 | ki-ma KUR-i re-e-ši-šú ⸢ul⸣-li |
| 3636 | d15 GAŠAN šur-bu-ti ši-pir šu-a-ti ḫa-diš lip-pa-lis-ma a-mat MUNUS.SIG₅-ia liš-šá-kin šap-tuš-šá |
| 3737 | UGU kul-lat na-ki-ri li-šam-ri-ir GIŠ.TUKUL.MEŠ-ia |
| 3838 | ma-ti-ma ina ⸢aḫ⸣-rat u₄-mu NUN EGIR-ú šá ina u₄-me BALA-šú ši-pir šu-a-ti |
| 3939 | in-na-ḫu-ma ma-qit-ti i-raš-⸢šu-ú áš⸣-ra-ti-šú liš-te-⸢eʾ⸣-e ma-⸢qit-ta⸣-šú lik-šìr |
| 4040 | MU.⸢SAR-ú⸣ ši-ṭir MU-⸢ia⸣ Ì.GIŠ ⸢lip-šu-uš UDU.SÍSKUR⸣ BAL-qí ina ⸢áš-ri⸣-šú liš-⸢kun⸣ |
| 4141 | ik-ri-bi-šú DINGIR.MEŠ i-⸢šem⸣-mu-ú ur-ra-ak UD.MEŠ ú-rap-pa-áš kim-ti |
| 4242 | šá MU.SAR-ú ši-ṭir MU-⸢ia⸣ ina ši-pir ni-kil-ti ib-ba-tu ⸢lu⸣-ú a-šar-šú ú-nak-ka-ru |
| 4343 | d⸢iš⸣-tar GAŠAN GAL-ti ag-giš lik-kil-me-šú-ma MU-šú NUMUN-šú ina nap-⸢ḫar⸣ KUR.KUR li-ḫal-liq |