WAM 41.0109 (RINAP 3/2 Sennacherib 230 ex. 01) [Sennacherib]

^daš-šur EN GAL AD DINGIR.MEŠ ^da-num ^dEN.LÍL ù ^dé-a ^d30 ^dUTU ^dIŠKUR ^dAMAR.UTU ^dAG ^dU.GUR ^diš-⸢tar⸣

[x] 7.BI DINGIR.MEŠ GAL.MEŠ ša i-di LUGAL pa-li-ḫi-šú-un i-za-zu-ma UGU kul-lat na-ki-ri ú-šam-ra-ru ⸢GIŠ⸣.TUKUL.MEŠ-⸢šú⸣

^md30-PAP.MEŠ-SU LUGAL GAL LUGAL dan-nu LUGAL ŠÚ LUGAL KUR aš-šur.KI LUGAL kib-rat LÍMMU-tim LUGAL ni-iš IGI.II-ku-un na-ṣir kit-ti

⸢ra⸣-aʾ-im mi-šá-ri e-piš ú-sa-a-ti a-lik tap-pu-ut a-ki-i sa-ḫi-ru dam-qa-a-ti eṭ-lum gít-ma-lum

zi-ka-⸢ru⸣ qar-du a-šá-red ⸢kal⸣ mal-ki rap-pu la-ʾi-iṭ la ma-gi-ri mu-⸢šab⸣-ri-qu za-ma-a-ni ^daš-⸢šur⸣ KUR-ú GAL ⸢LUGAL⸣-[x]

⸢la⸣ šá-na-an ú-šat-li-ma-an-ni-ma UGU gim-ri a-šib pa-rak-ki ú-šar-ba-a GIŠ.TUKUL.MEŠ-ia ul-tu A.AB.⸢BA⸣

⸢e⸣-le-ni-ti ša šá-lam ^dUTU-ši a-di tam-tim šap-li-ti ša ṣi-it ^dUTU-ši gi-mir mal-ki ša kib-ra-⸢a-ti⸣

še-pu-ú-a ú-šak-niš-ma i-šu-ṭu ab-šá-a-ni i-na er-bet ger-ra-ni-ia ša a-na KUR.kal-⸢di⸣ ú-ri-du-ma

⸢a⸣-na ⸢URU⸣.kar-^dMUATI ša GÚ ÍD.mar-ra-ti al-li-ku URU.MEŠ-šú-nu ak-šu-du-ma áš-lu-la šal-la-su-un ap-pu-lu₄

aq-qu-ru i-na ^dGIŠ.BAR aq-mu-ú i-na še-lal-ti ger-ra-ni-ia ša a-na KUR.ELAM.MA.KI al-li-ku-ma ú-šaḫ-ri-⸢bu⸣

da-ád-me-šá i-na 8-e ger-ri-ia a-na KÁ.DINGIR.RA.KI a-la-ku aq-bi DUMU.MEŠ KÁ.DINGIR.RA.KI ša a-lak gir-ri-⸢ia⸣

iš-mu-ma im-qu-⸢ut⸣-[x]-⸢nu⸣-ti gi-lit-tu ù ḫa-⸢at⸣-tu É NÍG.GA ša é-sag-íl ⸢ip⸣-tu-ma KÙ.GI KÙ.BABBAR NA₄.MEŠ

na-as-qu-ti ša ^dEN ù ^dzar-pa-ni-tum a-na mu-ʾu-de-e ú-še-ṣu-ni a-na ^mum-ma-an-me-na-nu

LUGAL KUR.ELAM.MA.KI ú-še-bi-lu iš-pu-ru-⸢šú⸣ ki-a-am a-na re-ṣu-ti-ni a-na KÁ.DINGIR.RA.KI al-ka-am-ma

[x]-da-a-ni i-zi-iz-ma tu-kul-⸢ta⸣-ni ⸢lu⸣ at-ta šu-ú LUGAL KUR.ELAM.MA.KI la ḫa-sis a-ma-te ša la i-šu-ú

⸢ṭè⸣-e-mu ù mil-ku ⸢ki⸣-i il-te-ni-šú i-na tar-ṣi ^mḫal-lu-ši AD-šú a-na na-gi-šú ú-ri-du-ma

URU.na-gi-tu URU.na-gi-tu-di-ʾi-bi-na ⸢KUR⸣.ḫi-il-mu KUR.pil-la-tú ù KUR.ḫu-pa-pa-nu na-gi-a-ni-šú

ša e-ber-tan ÍD.mar-ra-ti ak-šu-du-ma áš-lu-la šal-la-su-un ap-pu-lu₄ aq-qu-ru ina ^dGIŠ.BAR

⸢aq⸣-mu-ú šá-ni-a-nu i-na tar-ṣi ^mku-du-ri ŠEŠ-šú a-na KUR.ELAM.MA.KI al-li-ku-ma URU.É-^mḫa-ʾi-ri

[x].ra-ṣa-a URU.MEŠ-ni ša mi-ṣir KUR aš-šur.KI ša i-na tar-ṣi AD-ia LUGAL KUR.ELAM.MA.KI e-ki-mu

az-qu-up mu-šá-ru-ú ú-še-piš-ma li-i-tu ⸢ù⸣ da-na-nu ša i-[x] tu-kul-ti ^daš-šur EN-ia

UGU na-ki-re-e-a áš-tak-ka-nu ṣe-ru-uš-šú ú-šá-áš-ṭir-⸢ma qé⸣-reb BÀD ú-kin

⸢ma⸣-te-ma i-na LUGAL.MEŠ DUMU.MEŠ-ia ša ^daš-šur a-na RE.É.UM-ut KUR ⸢ù⸣ UN.MEŠ

⸢i⸣-nam-bu-ú zi-kir-šú e-nu-ma BÀD šá-a-tu i-lab-bi-ru-ma en-na-ḫu an-ḫu-us-su

[x]-ud-diš MU.SAR-ru-ú ši-ṭir šu-me-ia li-mur-ma Ì.GIŠ lip-šu-uš UDU.SÍSKUR liq-qí

[x]-ti mu-šá-ri-šú-ma a-na áš-ri-i-šú lu-ter ^daš-šur ik-ri-bi-šú i-šim-me

[x].⸢APIN⸣ UD 25.KAM ⸢lim⸣-mu ^mdAG-DU-PAP ⸢LÚ⸣.EN.NAM URU.sa-me-ri-na MU.AN.NA 14 ^md30-PAP.MEŠ-SU MAN ŠÚ MAN KUR aš-šur.KI