Ashurbanipal 263

⸢a⸣-na ⸢^dINANNA⸣ UNUG.KI e-tel-lat AN-e u KI-tim ga-šir-ti DINGIR.MEŠ ṣi-ir-ti

⸢šá⸣ ina ṣi-tan u ši-la-an ur-tu ta-nam-di-nu ta-šak-kan ši-⸢ki-in-šá⸣

i-lat tam-ḫa-ri ez-zi-ti šá ina qé-reb te-še-e a-šam-šá-niš i-su-ur-ru

a-li-kát i-di LUGAL mi-gir-i-šá mu-ra-si-⸢bat⸣ ga-re-e-šú

be-let KUR.KUR ḫa-mi-mat par-ṣi muš-te-ši-rat gi-mir šu-luḫ-ḫu

a-ši-bat é-nir-gál-^da-nim šá qé-reb é-an-na be-el-ti GAL-ti GAŠAN-šú

^mAN.ŠÁR-DÙ-A LUGAL GAL LUGAL dan-nu LUGAL ŠÚ LUGAL KUR aš-šur LUGAL kib-rat LÍMMU-ti LUGAL LUGAL.MEŠ NUN la šá-na-an

šá ul-tu tam-tim e-liti a-di tam-tim šap-liti i-bé-lu-ma gi-mir ma-liki ú-šak-niš še-pu-uš-šú

šá e-li URU.ṣur-ru šá qa-bal tam-tim e-lit u NI.TUK.KI šá qa-bal tam-tim šap-lit

ni-ri be-lu-ti-šú ú-kin-nu-ú-ma i-šu-ṭu ab-šá-an-šú šá ep-še-tu-ú-šú e-li kal DINGIR.MEŠ ṭa-a-ba

e-li ṣal-mat SAG.DU du-uš-šu-pa-tu SIPA-ú-su šá ina BALA-šú ^dIŠKUR ŠÈG.MEŠ-šú ^dé-a nag-bi-šú

a-na ma-ti-šú uš-tab-ru-ú ina ṭuḫ-du u meš-re-e iš-te-ni-ʾu-ú UN.MEŠ-šú

gi-mir um-ma-ni-šú ṭuḫ-ḫu-du i-ru-uš-šú da-ád-me-šú DUMU ^mAN.ŠÁR-ŠEŠ-SUM.NA LUGAL GAL LUGAL dan-nu

LUGAL ŠÚ LUGAL KUR aš-šur GÌR.NÍTA TIN.TIR.KI LUGAL KUR EME.GI₇ u URI.KI mu-še-šib TIN.TIR.KI e-piš é-sag-íl

mu-ud-diš eš-re-e-te kul-lat ma-ḫa-zi šá ina qer-bi-ši-na iš-tak-ka-nu si-ma-a-ti

DUMU DUMU ^md30-ŠEŠ.MEŠ-SU LUGAL GAL LUGAL dan-nu LUGAL ŠÚ LUGAL KUR aš-šur-ma ina BALA-e-a EN GAL ^dAMAR.UTU

ina ri-šá-a-ti a-na TIN.TIR.KI ⸢i-ru⸣-[um-ma] sat-tuk-ku é-sag-íl u DINGIR.MEŠ TIN.TIR.KI ú-⸢kin⸣

ki-din-nu-tu TIN.TIR.KI ak-ṣur áš-šú dan-nu a-na SIG la ḫa-ba-lu ^mdGIŠ.NU₁₁-MU-GI.NA

ŠEŠ ta-li-mì a-na LUGAL-ú-⸢tu⸣ KÁ.DINGIR.RA.KI ap-qid u ši-pir é-sag-íl la qa-ta-[a]

ú-šak-lil ina KÙ.BABBAR KÙ.GI u ni-siq-ti NA₄.MEŠ é-sag-íl az-nun-ma ki-ma ⸢ši⸣-[ṭir bu-ru-mu]

ú-nam-mir é-umuš-a ù šá eš-re-e-te ka-li-ši-na ḫi-bil-ta-ši-na ú-šal-lim

e-li kul-lat ⸢ma-ḫa-zi⸣ ú-šat-ri-ṣi an-dul-lum ina u₄-me-šú-ma É.GAR₈ é-⸢an^?-na^?⸣ si-ḫir-ti [...]

šá la-ba-riš il-lik-u-ma i-qu-pu ik-kám-ru áš-ra-ti-šú-nu áš-te-ʾa-[ma eš-šiš ú-še-piš-ma]

[ú]-⸢šak⸣-lil-ma ki-ma šá-di-i ul-la-a re-ši-šu-un a-na šat-ti ⸢^dINANNA⸣ UNUG.KI GAŠAN GAL-[ti]

⸢ši⸣-pir šá-a-šú ḫa-diš lip-pa-lis-ma ia-a-ti ^mAN.ŠÁR-DÙ-A LUGAL KUR aš-šur NUN pa-liḫ-šú a-mat da-⸢mi⸣-[iq-ti-ia]

liš-šá-kin šap-tu-uš-šá TI UD.MEŠ SÙ.MEŠ še-bé-e lit-tu-tu ṭu-ub UZU ḫu-⸢ud⸣ [lìb-bi li-šim ši-ma-ti]

ù šá ^mdGIŠ.NU₁₁-MU-GI.NA LUGAL KÁ.DINGIR.RA.KI ŠEŠ ta-lim-ia UD.MEŠ-šú li-ri-ku liš-[bi bu-ʾa-a-ri]

⸢a⸣-a-um-ma NUN EGIR-ú šá ina u₄-me BALA-e-šú ši-pir šu-a-ti in-na-ḫu an-ḫu-us-⸢su⸣ [lu-diš]

⸢šu-mì⸣ it-ti MU-šú liš-ṭur MU.SAR-u-a li-mur-ma Ì.GIŠ lip-šu-uš ⸢UDU.SISKUR⸣ BAL-qí

⸢it⸣-ti MU.SAR-e-šú liš-kun ik-ri-bi-šú ^dINANNA UNUG.KI i-šem-me šá šu-mì it-ti MU-šú la i-šaṭ-ṭa-ru

MU.SAR-u-a i-a-ab-ba-tu lu-u a-šar-šú ú-nak-ka-ru-ma it-ti MU.SAR-e-šú la i-šak-ka-nu

^dINANNA UNUG.KI GAŠAN GAL-ti ag-giš lik-kil-me-šú-ma MU-šú NUMUN-šú ina KUR.KUR li-ḫal-liq-ma a-a ir-ši-šú re-e-mu