Ashurbanipal 262

^mAN.ŠÁR-DÙ-A LUGAL GAL LUGAL dan-nu LUGAL ŠÁR LUGAL KUR aš-šur LUGAL kib-rat LÍMMU-ti

LUGAL LUGAL.MEŠ NUN la šá-na-an šá ina a-mat DINGIR.MEŠ ti-ik-li-šú ul-tu tam-tim e-liti

a-di tam-tim šap-liti i-be-lu-ma gi-mir ma-liki ú-šak-niš še-pu-uš-šú

DUMU ^mAN.ŠÁR-ŠEŠ-SUM.NA LUGAL GAL LUGAL dan-nu LUGAL ŠÁR LUGAL KUR aš-šur GÌR.NÍTA TIN.TIR.KI

LUGAL KUR EME.GI₇ u URI.KI mu-še-šib TIN.TIR.KI e-piš é-sag-íl

mu-ud-diš eš-re-e-ti kul-lat ma-ḫa-zi šá ina qé-reb-ši-na iš-tak-kan si-ma-ti

ù sat-tuk-ki-ši-na baṭ-lu-tu ú-ki-nu DUMU DUMU ^md30-ŠEŠ.MEŠ-SU LUGAL GAL

LUGAL dan-nu LUGAL ŠÁR LUGAL KUR aš-šur a-na-ku-ma ina BALA-e-a EN GAL ^dAMAR.UTU ina ri-šá-a-⸢ti⸣

a-na TIN.⸢TIR⸣.KI i-ru-um-ma ina é-sag-íl šá da-ra-ti šu-bat-su ir-me

sat-⸢tuk⸣-ki é-sag-íl u DINGIR.MEŠ TIN.TIR.KI ú-kin ki-din-nu-tu TIN.TIR.KI

ak-ṣur áš-šú dan-nu a-na SIG la ḫa-ba-li ^mdGIŠ.NU₁₁-MU-GI.NA ŠEŠ ta-li-me

a-na LUGAL-ú-ut TIN.TIR.KI ap-qid ù ši-pir é-sag-íl la qa-ta-a

ú-šak-lil ina KÙ.BABBAR KÙ.GI ni-siq-ti NA₄.MEŠ é-sag-íl az-nun-ma

ki-ma ši-ṭir bu-ru-mu ú-nam-mir é-umuš-a ù šá eš-re-e-ti ka-li-ši-na

ḫi-bil-ta-ši-na ú-šal-lim e-li kul-lat ma-ḫa-zi ú-šat-ri-ṣi an-dul-lum

ina u₄-me-šú-ma é-babbar-ra šá qé-reb ZIMBIR.KI É ^dUTU EN GAL EN-ía šá la-ba-riš

il-lik-u-ma i-qu-pu in-nab-tu áš-ra-ti-šú áš-te-ʾi ina ši-pir ^dkulla

eš-šiš ú-še-piš-ma ki-ma KUR-i re-e-ši-i-šú ul-li a-na šat-ti ^dUTU

DI.KUD.GAL DINGIR.MEŠ EN GAL EN-ía ep-še-ti-ia dam-qa-a-ti ḫa-diš lip-⸢pa⸣-[lis]-ma

a-na ia-a-ši ^mAN.ŠÁR-DÙ-A LUGAL KUR aš-šur NUN pa-liḫ-šú TIN u₄-me SÙ.MEŠ še-bé-e ⸢lit⸣-[tu-tu]

ṭu-ub UZU u ḫu-ud lìb-bi li-šim ši-ma-ti u šá ^mdGIŠ.NU₁₁-MU-GI.NA

LUGAL TIN.TIR.KI ŠEŠ ta-lim-ia u₄-me-šú li-ri-ku liš-bi bu-ʾa-a-ri ma-ti-ma

ina aḫ-rat u₄-me NUN ar-ku-ú šá ina u₄-me BALA-šú ši-pir šu-a-ti in-na-ḫu

an-ḫu-us-su lu-ud-diš šu-mì it-ti MU-šú liš-ṭur MU.SAR-u-a li-mur-ma

Ì.GIŠ lip-šu-uš UDU.SISKUR BAL-qí it-ti MU.SAR-e-šú liš-kun ik-ri-bi-šú

^dUTU i-šem-me šá šu-mì šaṭ-ru ù MU ta-lim-ia ina ši-pir ni-kil-ti

i-pa-áš-ši-ṭu šu-mì it-ti MU-šú la i-šaṭ-ṭa-ru MU.SAR-ú-a

i-ab-ba-tu-ma it-ti MU.SAR-e-šú la i-šak-ka-nu ^dUTU EN e-la-ti u šap-la-ti

ag-gi-iš lik-kil-me-šú-ma MU-šú NUMUN-šú ina KUR.KUR li-ḫal-liq