Ashurbanipal 244

^mAN.ŠÁR-DÙ-IBILA LUGAL GAL LUGAL dan-nu LUGAL ŠÁR LUGAL KUR aš-šur

LUGAL kib-rat LÍMMU-ti LUGAL LUGAL.MEŠ NUN la šá-na-an

ša ul-tu tam-tim e-lit a-di tam-tim šap-lit i-be-lu-ma

gi-mir ma-li-ki ú-šak-niš še-pu-uš-šú

DUMU ^mAN.ŠÁR-ŠEŠ-SUM.NA LUGAL GAL LUGAL dan-nu LUGAL ŠÁR LUGAL KUR aš-šur

GÌR.NÍTA KÁ.DINGIR.RA.KI LUGAL KUR EME.GI₇ ù URI.KI

DUMU DUMU ^md30-PAP.MEŠ-SU LUGAL dan-nu LUGAL ŠÁR LUGAL KUR aš-šur a-na-ku-ma

ši-pir é-sag-íl šá AD ba-nu-u-a la ú-qa-at-tu-u

a-na-ku ú-šak-lil sat-tuk-ki é-sag-íl u DINGIR.MEŠ TIN.TIR.KI

ú-ki-in ki-din-nu-tu KÁ.DINGIR.RA.KI ak-ṣur

áš-šú dan-nu a-na SIG la ḫa-ba-li ^mdGIŠ.NU₁₁-<MU>-GI.NA

ŠEŠ ta-li-me a-na LUGAL-u-ti KÁ.DINGIR.RA.KI ap-qid

ina u₄-me-šú-ma é-tùr-kalam-ma É ^dINANNA TIN.TIR.KI

eš-šiš ú-še-piš ^dINANNA TIN.TIR.KI ^dGAŠAN ṣir-tu

ep-še-te-ia MUNUS.SIG₅.MEŠ ḫa-diš lip-pal-lis-ma

u₄-me-šam-ma ma-ḫar ^dEN ^dGAŠAN-ía lit-tas-qar da-mì-iq-ti

TI u₄-me SÙ.MEŠ li-šim ši-ma-ti

[it]-ti AN-e ù KI-tim lu-ki-in BALA-ú-a

[ù šá ^md]⸢GIŠ.NU₁₁⸣-<MU>-GI.NA LUGAL KÁ.DINGIR.RA.KI

[ŠEŠ ta-lim-ia u₄-me-šu] li-ri-ku liš-bi lit-tu-tu

[ša šu-mì šaṭ-ru u MU ta]-lim-ia ina ši-pir ni-kil-ti i-pa-áš-ši-ṭu

MU.⸢SAR⸣-u-a i-ab-ba-tu lu-u a-šar-šú ú-nak-ka-ru

^dINANNA TIN.TIR.KI ina ma-⸢ḫar⸣ ^dEN ^dGAŠAN-ía MUNUS.ḪUL-šú

lit-tas-qar MU-šú NUMUN-šú ina KUR.KUR li-ḫal-liq