Ashurbanipal 241

a-na ^dAMAR.UTU LUGAL ŠÁR ^dí-gì-gì u ^da-nun-na-ki ba-ni AN-e u KI-tim mu-kin giš-ḫur-ru

a-ši-ib é-sag-íl EN KÁ.DINGIR.RA.KI EN GAL-i be-li-ia

a-na-ku ^mAN.ŠÁR-DÙ-A LUGAL GAL LUGAL dan-nu LUGAL ŠÁR LUGAL KUR aš-šur LUGAL kib-rat LÍMMU-ti

DUMU ^mAN.ŠÁR-ŠEŠ-SUM.NA LUGAL GAL LUGAL dan-nu LUGAL ŠÁR LUGAL KUR aš-šur GÌR.NÍTA TIN.TIR.KI

LUGAL KUR EME.GI₇ u URI.KI mu-še-šib KÁ.DINGIR.RA.KI e-piš é-sag-íl

mu-ud-diš eš-re-e-ti kul-lat ma-ḫa-zi šá i-na qer-bi-ši-na

iš-tak-ka-nu si-ma-a-ti ù sat-tuk-ki-ši-na baṭ-lu-tu ú-ki-nu

par-ṣi ki-du-de-e ki-ma la-bi-ri-im-ma ú-te-ru áš-ru-uš-šu-un

DUMU DUMU ^md30-ŠEŠ.MEŠ-SU LUGAL GAL LUGAL dan-nu LUGAL ŠÁR LUGAL KUR aš-šur a-na-ku-ma

ina BALA-e-a EN GAL ^dAMAR.UTU ina ri-šá-a-ti a-na TIN.TIR.KI i-ru-um-ma

ina é-sag-íl šá da-ra-a-ti šu-bat-su ir-me sat-tuk-ki é-sag-íl

ù DINGIR.MEŠ TIN.TIR.KI ú-ki-in ki-din-nu-ú-tu TIN.TIR.KI ak-ṣur

áš-šú dan-nu a-na SIG la ḫa-ba-li ^mdGIŠ.NU₁₁-MU-GI.NA ŠEŠ ta-li-me

a-na LUGAL-ú-tu KÁ.DINGIR.RA.KI ap-qid ù i-na KÙ.BABBAR KÙ.GI

ni-siq-ti NA₄.MEŠ é-sag-íl az-nu-un-ma

ki-ma ši-ṭir bu-ru-mu ú-nam-mir é-umuš-a ina u₄-me-šú-ma

im-gur-^dEN.LÍL BÀD KÁ.DINGIR.RA.KI né-met-^dEN.LÍL šal-ḫu-ú-šú

ša la-ba-riš il-lik-ú-ma i-qu-pu in-na-ab-tu

áš-šú ma-aṣ-ṣar-ti é-sag-íl ù eš-re-e-ti KÁ.DINGIR.RA.KI

du-un-nu-nu ina e-muq um-ma-na-a-ti-ia sur-riš né-met-^dEN.LÍL

šal-ḫu-ú-šú ina ši-pir ^dkulla eš-šiš ú-še-piš-ma KÁ.GAL.MEŠ-šú ú-rak-kis

GIŠ.IG.MEŠ ú-še-piš-ma ú-rat-ta-a ina KÁ.MEŠ-šú

NUN ar-ku-ú šá ina BALA-e-šú ši-pir šu-a-ti in-na-ḫu um-ma-ni en-qu-tu

ši-ta-ʾa-al im-gur-^dEN.LÍL BÀD né-met-^dEN.LÍL šal-ḫu-ú

ki-ma si-ma-ti-šú-nu la-bi-ra-a-ti e-pu-uš MU.SAR-u-a a-mur-ma

Ì.GIŠ pu-šu-uš UDU.SISKUR BAL-qí it-ti MU.SAR-e-ka šu-kun

ik-ri-bi-ka ^dAMAR.UTU i-šem-me šá šu-mì šaṭ-ru u MU ta-lim-ia

ina ši-pir ni-kil-ti i-ab-bat MU.SAR-u-a it-ti MU.SAR-e-šú la i-šak-ka-nu

^dAMAR.UTU LUGAL gi-im-ri ag-giš lik-kil-me-šú-ma

MU-šú NUMUN-šú i-na KUR.KUR li-ḫal-liq