Ashurbanipal 186

a-na-ku ^mAN.ŠÁR-DÙ-A ⸢LUGAL GAL LUGAL⸣ dan-nu LUGAL ŠÚ LUGAL KUR AN.ŠÁR.KI LUGAL kib-rat LÍMMU-tim

È lìb-bi ^mAN.ŠÁR-PAP-AŠ LUGAL KUR ⸢AN.ŠÁR⸣.KI GÌR.NÍTA KÁ.DINGIR.RA.KI LUGAL KUR EME.GI₇ u URI.KI

ŠÀ.BAL.BAL ^md30-PAP.MEŠ-SU ⸢LUGAL⸣ GAL LUGAL dan-nu LUGAL ŠÚ LUGAL KUR AN.ŠÁR.KI-ma

AN.ŠÁR ^dEN.LÍL.LÁ DINGIR.MEŠ iš-di GIŠ.⸢GU.ZA-e⸣ ú-kin iḫ-šu-ḫa LÚ.šá-an-gu-ti

^dNIN.LÍL AMA DINGIR.MEŠ GAL.MEŠ ki-ma ⸢AMA a-lit-ti⸣ ú-rab-ban-ni ina ki-rim-mì-šá DÙG.GA

^d30 ^dUTU ina an-ni-šú-nu ke-e-ni ITI-šam iš-⸢ta⸣-nap-pa-ru-u-ni i-da-at dum-qí

^dAMAR.UTU ABGAL DINGIR.MEŠ šá qí-bit-su la ut-tak-ka-ru ši-⸢mat⸣ la-ba-ri i-šim šim-ti

^dAG DUB.SAR gim-ri iḫ-ze né-me-qí-šú šá i-ram-mu ú-šak-mì-sa kar-šu-u-a

^diš-tar a-ši-bat URU.LÍMMU-DINGIR ka-bit-ti DINGIR.MEŠ GAL.MEŠ ṣil-la-šá da-ru-u it-ru-ṣa UGU-ia

^dU.GUR dan-dan-ni DINGIR.MEŠ dun-nu zik-ru-tu e-mu-qí la šá-na-an ⸢iš⸣-ru-ka ši-rik-ti

ul-tu ṣe-ḫe-ri-ia DINGIR.MEŠ GAL.MEŠ a-šib AN-e u KI-tim ši-ma-ti i-ši-mu a-na LUGAL-u-ti

ki-ma AD ba-né-e ú-rab-bu-in-ni al-ka-kàt-e-šú-nu ṣi-ra-a-ti ú-mal-lu-u qa-a-tu-u-a

ú-lam-mì-du-in-ni e-peš MURUB₄ u MÈ di-ku-ut a-na-an-ti se-de-ru u mit-ḫu-ṣu-ti

ú-šar-bu-u GIŠ.TUKUL.MEŠ-ia UGU LÚ.KÚR.MEŠ-ia šá ul-tu ṣe-ḫe-ri-ia a-di ra-bé-ia ig-ru-in-ni a-na ṣa^*(over erasure)-al-ti

i-di-nu de-e-ni it-ti ^mur-ta-ki MAN KUR.ELAM.MA.KI šá la ag-ru-u-šú ig-ra-an-ni a-na qab-li

ke-e-mu-u-a BAD₅.BAD₅-šú iš-ku-nu im-ḫa-ṣu pa-na-as-su iṭ-ru-du-šú a-di mi-ṣir KUR-šú

⸢ina⸣ MU.AN.NA šú-a-tu ina ÚŠ lem-ni ú-ḫal-li-qu nap-šat-su ip-qí-du-šú a-na KUR.NU.GI₄.A a-šar la ⸢ta⸣-a-ri