Ashurbanipal 060

a-na ^dNIN.LÍL be-let KUR.KUR a-ši-bat é-maš-maš

^mAN.ŠÁR-DÙ-A MAN KUR AN.ŠÁR.KI NUN pa-liḫ-šá

GÌR.NÍTA DÙ-ut ŠU.II-šá šá ina qí-bi-ti-šá GAL-ti

ina qit-ru-ub ta-ḫa-zi ik-ki-su

SAG.DU ^mte-um-man LUGAL KUR.ELAM.MA.KI

u ^mum-man-i-gaš ^mtam-ma-ri-tú ^mpa-ʾe-e

^mum-man-al-daš šá EGIR ^mte-um-man DÙ-šú

LUGAL-ut KUR.ELAM.MA.KI ina tukul-ti-šá GAL-ti

ŠU.II KUR-su-nu-ti-ma ina GIŠ.šá šá-da-di

ru-kub LUGAL-ti-ia aṣ-mid-su-nu-ti

u ina zik-ri-šá DUGUD ina kul-lat KUR.KUR DU.MEŠ-ma

GABA.RI NU TUK u ina u₄-me-šú KISAL É ^d15

GAŠAN-ia ina pi-i-li eš-qí ši-kit-ta-šú

ú-rab-bi a-na šat-ti ^dNIN.LÍL

ki-sal-lu šú-a-tú lim-ma-ḫir IGI-uk-ki

ia-a-ti ^maš-šur-DÙ-A pa-liḫ DINGIR-ti-ki GAL-ti

ba-laṭ UD.MEŠ GÍD.MEŠ DÙG.GA ŠÀ qí-šim-ma

DU.DU-ku é-maš-maš lu-lab-bi-ra GÌR.II-a-a