Ashurbanipal 011
| Obverse | |
| Column i | |
| i 1i 1 | a-na-ku mAN.ŠÁR-DÙ-A bi-nu-tu AN.ŠÁR u dNIN.LÍL |
| i 22 | DUMU LUGAL GAL-ú ša É ri-du-u-ti |
| i 33 | ša AN.ŠÁR u d30 EN AGA ul-tu UD.MEŠ SÙ.MEŠ |
| i 44 | ni-bit MU-šú iz-ku-ru a-na LUGAL-u-ti |
| i 55 | ù ina ŠÀ AMA-šú ib-nu-šú a-na SIPA-ut KUR AN.ŠÁR.KI |
| i 66 | dUTU dIŠKUR u d15 ina EŠ.BAR-šú-nu ke-e-ni |
| i 77 | iq-bu-ú e-peš LUGAL-ti-ia |
| i 88 | mAN.ŠÁR-PAP-SUM.NA MAN KUR AN.ŠÁR.KI AD ba-nu-u-a |
| i 99 | a-mat AN.ŠÁR u dNIN.LÍL DINGIR.MEŠ ti-ik-le-e-šú it-ta-id |
| i 1010 | ša iq-bu-u-šú e-peš LUGAL-ti-⸢ia⸣ |
| i 1111 | ina ITI.GU₄ ITI dé-a EN te-né-še-e-ti |
| i 1212 | UD.12.KAM UD ŠE.GA SUM.NINDA ša dgu-la |
| i 1313 | ina e-peš pi-i mut-tal-li |
| i 1414 | ša AN.ŠÁR dNIN.LÍL d30 dUTU dIŠKUR |
| i 1515 | dEN dAG d15 šá NINA.KI |
| i 1616 | dšar-rat-kid-mu-ri d15 šá LÍMMU-DINGIR.KI |
| i 1717 | dMAŠ dU.GUR dnusku iq-bu-ú |
| i 1818 | ú-paḫ-ḫir UN.MEŠ KUR AN.ŠÁR.KI TUR u GAL |
| i 1919 | ša tam-tim e-li-ti ù šap-liti |
| i 2020 | a-na na-ṣir DUMU LUGAL-ti-ia ù EGIR-nu |
| i 2121 | LUGAL-tu KUR AN.ŠÁR.KI e-pe-še a-de-e MU DINGIR.MEŠ |
| i 2222 | ú-šá-az-kír-šú-nu-ti ú-dan-ni-na rik-sa-a-te |
| i 2323 | ina ḪÚL.MEŠ ri-šá-a-te e-ru-ub ina É UŠ-u-ti |
| i 2424 | áš-ru nak-lu mar-kas LUGAL-u-ti |
| i 2525 | ša md30-PAP.MEŠ-SU AD AD a-li-di-ia |
| i 2626 | DUMU LUGAL-tú ù LUGAL-tú e-pu-šú ina lìb-bi-šú |
| i 2727 | a-šar mAN.ŠÁR-PAP-AŠ AD DÙ-u-a qé-reb-šú iʾ-al-du |
| i 2828 | ir-bu-u e-pu-šú be-lut KUR AN.ŠÁR.KI |
| i 2929 | gi-mir ma-al-ki ir-du-u kim-tú ú-rap-pi-šú |
| i 3030 | ik-ṣu-ru ni-šu-tú u sa-la-tú |
| i 3131 | ù a-na-⸢ku⸣ mAN.ŠÁR-DÙ-A qé-reb-šú a-ḫu-uz né-me-qí dAG |
| i 3232 | kul-lat ṭup-šar-ru-u-ti šá gi-mir um-ma-ni |
| i 3333 | ma-la ba-šu-ú iḫ-ze-šú-nu a-ḫi-iṭ |
| i 3434 | al-ma-ad šá-le-e GIŠ.PAN ru-kub ANŠE.KUR.RA GIŠ.GIGIR ṣa-bat KUŠ.a-šá-a-te |
| i 3535 | ina qí-bit DINGIR.MEŠ GAL.MEŠ šá az-ku-ra ni-bit-sún |
| i 3636 | a-da-bu-ba ta-nit-ta-šú-un iq-bu-u e-peš LUGAL-ti-ia |
| i 3737 | za-nin eš-re-e-ti-šú-un ú-šad-gi-lu pa-nu-u-a |
| i 3838 | ke-mu-u-a e-tap-pa-lu EN ṣal-ti-ia i-na-ru ga-re-ia |
| i 3939 | zi-ka-ru qar-du na-ram AN.ŠÁR u d15 |
| i 4040 | li-ip-li-pi LUGAL-u-ti a-na-ku |
| i 4141 | ul-tu AN.ŠÁR d30 dUTU dIŠKUR dEN dAG |
| i 4242 | d15 šá NINA.KI dšar-rat-kid-mu-ri |
| i 4343 | d15 šá LÍMMU-DINGIR.KI dMAŠ dU.GUR dnusku |
| i 4444 | ṭa-biš ú-še-ši-bu-in-ni ina GIŠ.GU.ZA AD DÙ-ia |
| i 4545 | dIŠKUR ŠÈG.MEŠ-šú ú-maš-še-ra dé-a ú-paṭ-ṭi-ra IDIM.MEŠ-šú |
| i 4646 | 5 1.KÙŠ ŠE.AM iš-qu ina AB.SÍN-ni-šú |
| i 4747 | e-ri-ik šu-bul-tu 5/6 1.KÙŠ |
| i 4848 | SI.SÁ BURU₁₄ na-pa-áš dnisaba |
| i 4949 | ka-a-a-an ú-šaḫ-na-bu gi-pa-ru |
| i 5050 | ṣip-pa-a-ti šu-um-mu-ḫa in-bu MÁŠ.ANŠE šu-te-šur ina ta-lit-ti |
| i 5151 | ina BALA-ia ḪÉ.NUN ṭuḫ-du ina MU.AN.NA.MEŠ-ia ku-um-mu-ru ḪÉ.GÁL-lum |
| i 5252 | ina maḫ-re-e ger-ri-ia a-na KUR.má-kan u KUR.me-luḫ-ḫa lu al-lik |
| i 5353 | mtar-qu-ú MAN KUR.mu-ṣur u KUR.ku-u-si |
| i 5454 | ša mAN.ŠÁR-PAP-AŠ MAN KUR AN.ŠÁR.KI AD DÙ-u-a |
| i 5555 | BAD₅.BAD₅-šú iš-ku-nu i-be-lu KUR-su ù šu-u mtar-qu-u |
| i 5656 | da-na-an AN.ŠÁR d15 u DINGIR.MEŠ GAL.MEŠ EN.MEŠ-ia im-ši-ma |
| i 5757 | it-ta-kil a-na e-muq ra-man-i-šú e-li LUGAL.MEŠ |
| i 5858 | LÚ.qé-pa-a-ni šá qé-reb KUR.mu-ṣur ú-pa-qí-du AD DÙ-u-a |
| i 5959 | a-na da-a-ki ḫa-ba-a-te ù e-kem KUR.mu-ṣur il-li-ka |
| i 6060 | EDIN-uš-šú-un e-ru-um-ma ú-šib qé-reb URU.me-em-pi |
| i 6161 | URU šá AD DÙ-u-a ik-šu-du a-na mi-ṣir KUR AN.ŠÁR.KI ú-ter-ru |
| i 6262 | al-la-ku ḫa-an-ṭu qé-reb NINA.KI il-lik-am-ma |
| i 6363 | ú-šá-an-na-a ia-a-ti UGU ep-še-e-ti an-na-a-ti |
| i 6464 | lìb-bi e-gug-ma iṣ-ṣa-ru-uḫ ka-bit-ti |
| i 6565 | áš-ši ŠU.II-ia ú-ṣal-li AN.ŠÁR u d15 aš-šur-i-tú |
| i 6666 | ad-ke-e-ma e-mu-qí-ia ṣi-ra-a-te šá AN.ŠÁR u d15 |
| i 6767 | ú-mal-lu-u ŠU.II-u-a a-na KUR.mu-ṣur u KUR.ku-u-si |
| i 6868 | uš-te-eš-še-ra ḫar-ra-nu ina me-ti-iq ger-ri-ia |
| i 6969 | 20.ÀM 2 LUGAL.MEŠ šá a-ḫi tam-tim MURUB₄ tam-tim u na-ba-li |
| i 7070 | ARAD.MEŠ da-gíl pa-ni-ia ta-mar-ta-šú-nu ka-bit-tú |
| i 7171 | ina maḫ-ri-ia iš-šu-nim-ma ú-na-áš-ši-qu GÌR.II-ia |
| i 7272 | LUGAL.MEŠ šá-a-tú-nu a-di e-mu-qí-šú-nu GIŠ.MÁ.MEŠ-šú-nu |
| i 7373 | ina tam-tim u na-ba-li it-ti ERIM.ḪI.A-ia |
| i 7474 | ur-ḫu pa-da-nu ú-šá-aṣ-bit-su-nu-ti |
| i 7575 | a-na na-ra-ru-u-ti šá LUGAL.MEŠ LÚ.qé-pa-a-ni |
| i 7676 | šá qé-reb KUR.mu-ṣur ARAD.MEŠ-ni da-gíl pa-ni-ia |
| i 7777 | ur-ru-ḫi-iš ar-de-e-ma al-lik a-di URU.kar-dDÙ-ti |
| i 7878 | mtar-qu-ú MAN KUR.mu-ṣur u KUR.ku-u-si qé-reb URU.me-em-pi |
| i 7979 | a-lak ger-ri-ia iš-me-ma a-na e-peš MURUB₄ GIŠ.TUKUL.MEŠ |
| i 8080 | ù MÈ ina maḫ-ri-ia id-ka-a LÚ.ERIM.MEŠ MÈ-šú |
| i 8181 | ina tukul-ti AN.ŠÁR dEN dAG DINGIR.MEŠ GAL.MEŠ EN.MEŠ-ia |
| i 8282 | a-li-kut Á.II-ia ina MÈ EDIN rap-ši áš-ku-na BAD₅.BAD₅ ERIM.ḪI.A-šú |
| i 8383 | mtar-qu-u ina qé-reb URU.me-em-pi iš-ma-a taḫ-te-e ERIM.ḪI.A-šú |
| i 8484 | nam-ri-ri AN.ŠÁR u d15 is-ḫu-pu-šú-ma il-li-ka maḫ-ḫu-tíš |
| i 8585 | me-lam-me LUGAL-ti-ia ik-tu-mu-šú-ma |
| i 8686 | ša ú-za-ʾi-nu-in-ni DINGIR.MEŠ šu-ut AN KI |
| i 8787 | URU.me-em-pi ú-maš-šir-ma a-na šu-zu-ub ZI-tì-šú |
| i 8888 | in-na-bit a-na qé-reb URU.ni-iʾ |
| i 8989 | URU šú-a-tú aṣ-bat ERIM.ḪI.A-ia ú-še-rib ú-še-šib ina lìb-bi |
| i 9090 | mni-ku-ú LUGAL URU.me-em-pi u URU.sa-a-a |
| i 9191 | mLUGAL-lu-dà-ri LUGAL URU.ṣi-iʾ-nu |
| i 9292 | mpi-šá-an-ḫu-ru LUGAL URU.na-at-ḫu-ú |
| i 9393 | mpa-aq-ru-ru LUGAL URU.pi-šap-tú |
| i 9494 | mbu-uk-ku-na-an-ni-iʾ-pi LUGAL URU.ḫa-at-ḫi-ri-bi |
| i 9595 | mna-aḫ-ke-e LUGAL URU.ḫi-ni-in-ši |
| i 9696 | mpu-ṭu-biš-ti LUGAL URU.ṣa-aʾ-nu |
| i 9797 | mú-na-mu-nu LUGAL URU.na-at-ḫu-ú |
| i 9898 | mḫur-si-ia-e-šú LUGAL URU.ṣab-nu-ti |
| i 9999 | mpu-ú-a-a-ma LUGAL URU.pi-in-ṭi-ṭi |
| i 100100 | msu-si-in-qu LUGAL URU.pu-ši-ru |
| i 101101 | mtap-na-aḫ-ti LUGAL URU.pu-nu-bu |
| i 102102 | mbu-uk-ku-na-an-ni-iʾ-pi LUGAL URU.aḫ-ni |
| i 103103 | mep-ti-mur-ṭe-e-šú LUGAL URU.pi-ḫa-at-ti-ḫu-ru-un-pi-ki |
| i 104104 | mna-aḫ-ti-ḫu-ru-an-si-ni LUGAL URU.pi-šap-di-ʾa-a |
| i 105105 | mbu-kur-ni-ni-ip LUGAL URU.pa-aḫ-nu-ti |
| i 106106 | mṣi-ḫa-a LUGAL URU.ši-ia-a-u-tú |
| i 107107 | mla-mì-in-tú LUGAL URU.ḫi-mu-ni |
| i 108108 | miš-pi-ma-ṭu LUGAL URU.ta-a-a-ni |
| i 109109 | mma-an-ti-me-an-ḫe-e LUGAL URU.ni-iʾ |
| i 110110 | LUGAL.MEŠ an-nu-ti LÚ.NAM.MEŠ LÚ.qé-pa-a-ni šá qé-reb KUR.mu-ṣur |
| i 111111 | ú-pa-qí-du AD ba-nu-u-a šá la-pa-an ti-bu-ut mtar-qu-u |
| i 112112 | pi-qit-ta-šú-un ú-maš-še-ru im-lu-ú EDIN |
| i 113113 | ú-ter-ma a-šar pi-qit-ti-šú-un ina maš-kán-i-šú-un ap-qid-su-nu-ti |
| i 114114 | KUR.mu-ṣur u KUR.ku-u-su šá AD DÙ-u-a ik-šu-du a-na eš-šu-ti aṣ-bat |
| i 115115 | EN.NUN.MEŠ UGU šá u₄-me pa-ni ú-dan-nin-ma ú-rak-ki-sa |
| i 116116 | rik-sa-a-te it-ti ḫu-ub-ti ma-aʾ-di šal-la-ti |
| i 117117 | ka-bit-ti šal-meš a-tu-ra a-na NINA.KI |
| i 118118 | EGIR-nu LUGAL.MEŠ an-nu-ti ma-la ap-qí-du ina a-de-ia iḫ-ṭu-u |
| i 119119 | la iṣ-ṣu-ru ma-mit DINGIR.MEŠ GAL.MEŠ MUN e-pu-us-su-nu-ti im-šú-ma |
| i 120120 | lìb-ba-šú-nu ik-pu-ud ḪUL-tú da-bab sur-ra-a-te id-bu-bu-ma |
| i 121121 | mi-lik la ku-širi₄ im-li-ku ra-man-šú-un um-ma mtar-qu-u |
| i 122122 | ul-tú qé-reb KUR.mu-ṣur i-na-saḫ-u-ma at-tu-ni a-šá-ba-ni mì-i-nu |
| i 123123 | e-li mtar-qu-u MAN KUR.ku-u-si a-na šá-kan a-de-e u sa-li-me |
| i 124124 | ú-ma-ʾe-e-ru LÚ.rak-bé-e-šú-un um-ma su-lum-mu-u |
| i 125125 | ina bi-ri-ni liš-šá-kin-ma ni-in-dag-ga-ra a-ḫa-meš |
| i 126126 | KUR a-ḫe-en-na-a ni-zu-uz-ma a-a ib-ba-ši ina bi-ri-ni šá-nu-um-ma be-lum |
| i 127127 | a-na ERIM.ḪI.A KUR AN.ŠÁR.KI e-muq EN-ti-ia šá a-na kit-ri-šú-nu uš-zi-zu |
| i 128128 | iš-te-né-ʾu-u a-mat ḪUL-tim LÚ.šu-ut SAG.MEŠ-ia a-ma-a-te an-na-a-te |
| i 129129 | iš-mu-u LÚ.rak-bé-e-šú-un a-di šip-ra-a-te-šú-un iṣ-bat-u-nim-ma |
| i 130130 | e-mu-ru ep-šet sur-ra-a-te-šú-un LUGAL.MEŠ an-nu-te iṣ-bat-u-nim-ma |
| i 131131 | ina bi-re-ti AN.BAR iš-qa-ti AN.BAR ú-tam-me-ḫu ŠU.II u GÌR.II |
| i 132132 | ma-mit AN.ŠÁR MAN DINGIR.MEŠ ik-šu-su-nu-ti-ma šá iḫ-ṭu-u ina a-de-e |
| i 133133 | DINGIR.MEŠ GAL.MEŠ MUN ŠU.II-šú-un ú-ba-ʾi-i-ma šá e-pu-us-su-nu-ti |
| i 134134 | du-un-qu UN.MEŠ URU.sa-a-a URU.pi-in-ṭi-ṭi URU.ṣi-iʾ-nu |
| Column ii | |
| ii 1ii 1 | ù si-it-ti URU.MEŠ ma-la it-ti-šú-nu šak-nu ik-pu-du ḪUL-tú |
| ii 22 | TUR u GAL ina GIŠ.TUKUL.MEŠ ú-šam-qí-tu ⸢e-du⸣ a-me-lu la e-zi-bu ina lìb-bi |
| ii 33 | ADDA.MEŠ-šú-nu e-lu-lu ina GIŠ.ga-ši-ši |
| ii 44 | KUŠ.MEŠ-šú-nu iš-ḫu-ṭu ú-ḫal-li-pu BÀD URU |
| ii 55 | 20.⸢ÀM⸣ LUGAL.MEŠ an-nu-ti šá ḪUL-tu iš-te-né-ʾu-u |
| ii 66 | a-na ERIM.ḪI.A KUR AN.ŠÁR.KI bal-ṭu-us-su-nu |
| ii 77 | a-na NINA.KI a-di maḫ-ri-ia ú-bil-u-ni |
| ii 88 | a-na mni-ku-u TA bi-ri-šú-nu re-e-mu ar-ši-ma ú-bal-liṭ nap-šat-su |
| ii 99 | a-de-e UGU šá maḫ-ri ú-šá-tir-ma it-ti-šú áš-kun |
| ii 1010 | lu-bul-tu bir-me ú-lab-bi-su al-lu KÙ.GI |
| ii 1111 | si-mat LUGAL-ti-šú áš-kun-šú ḪAR.MEŠ KÙ.GI ú-rak-ki-sa |
| ii 1212 | rit-te-e-šú GÍR AN.BAR šib-bi šá iḫ-zu-šú KÙ.GI |
| ii 1313 | ni-bit MU-ia ina muḫ-ḫi áš-ṭur-ma ad-din-šú |
| ii 1414 | GIŠ.GIGIR.MEŠ ANŠE.KUR.RA.MEŠ ANŠE.KUNGA.MEŠ a-na ru-kub EN-ti-šú a-qis-su |
| ii 1515 | LÚ.šu-ut SAG.MEŠ-ia LÚ.NAM.MEŠ a-na kit-ri-šú it-ti-šú áš-pur |
| ii 1616 | a-šar AD DÙ-u-a ina URU.sa-a-a a-na LUGAL-ti ip-qid-du-uš |
| ii 1717 | a-na maš-kán-i-šú ú-ter-šú ù mdMUATI-še-zib-an-ni DUMU-šú |
| ii 1818 | a-na URU.ḫa-at-ḫa-ri-ba ap-qid MUN SIG₅-tu |
| ii 1919 | e-li šá AD DÙ-ia ú-šá-tir-ma e-pu-us-su |
| ii 2020 | mtar-qu-ú a-šar in-nab-tu ra-šub-bat GIŠ.TUKUL AN.ŠÁR EN-ia |
| ii 2121 | is-ḫu-up-šú-ma il-lik nam-mu-ši-šú |
| ii 2222 | EGIR-nu mUR-da-ma-né-e DUMU mšá-ba-ku-u ú-šib ina GIŠ.GU.ZA LUGAL-ti-šú |
| ii 2323 | URU.ni-iʾ URU.ú-nu a-na dan-nu-ti-šú iš-kun ú-paḫ-ḫi-ra el-lat-su |
| ii 2424 | a-na mit-ḫu-ṣi ERIM.ḪI.A DUMU.MEŠ KUR AN.ŠÁR.KI |
| ii 2525 | ša qé-reb URU.me-em-pi id-ka-a qa-bal-šú |
| ii 2626 | UN.MEŠ šá-a-tu-nu e-si-ir-ma iṣ-ba-ta mu-uṣ-ṣa-šú-un |
| ii 2727 | LÚ.A KIN ḫa-an-ṭu a-na NINA.KI il-lik-am-ma iq-ba-a ia-a-ti |
| ii 2828 | ina 2-e ger-ri-ia a-na KUR.mu-ṣur u KUR.ku-u-si uš-te-še-ra ḫar-ra-nu |
| ii 2929 | mUR-da-ma-né-e a-lak ger-ri-ia iš-me-ma |
| ii 3030 | ša ak-bu-su mi-ṣir KUR.mu-ṣur URU.me-em-pi ú-maš-šir-ma |
| ii 3131 | a-na šu-zu-ub ZI-tì-šú in-na-bit a-na qé-reb URU.ni-iʾ |
| ii 3232 | LUGAL.MEŠ LÚ.NAM.MEŠ LÚ.qé-pa-a-ni šá qé-reb KUR.mu-ṣur áš-ku-nu |
| ii 3333 | ina GABA-ia il-li-ku-ú-nim-ma ú-na-áš-ši-qu GÌR.II-ia |
| ii 3434 | EGIR mUR-da-ma-né-e ḫar-ra-nu aṣ-bat |
| ii 3535 | al-lik a-di URU.ni-iʾ URU dan-nu-ti-šú |
| ii 3636 | ti-ib MÈ-ia dan-ni e-mur-ma URU.ni-iʾ ú-maš-šir |
| ii 3737 | in-na-bit a-na URU.ki-ip-ki-pi URU šu-a-tú a-na si-ḫir-ti-šú |
| ii 3838 | ina tukul-ti AN.ŠÁR u d15 ik-šu-da ŠU.II-a-a |
| ii 3939 | KÙ.BABBAR KÙ.GI ni-siq-ti NA₄.MEŠ NÍG.ŠU É.GAL-šú ma-la ba-šú-u |
| ii 4040 | lu-bul-ti bir-me GADA.MEŠ ANŠE.KUR.RA.MEŠ GAL.MEŠ UN.MEŠ zik-ru u sin-niš |
| ii 4141 | 2 tim-me MAḪ.MEŠ pi-tiq za-ḫa-le-e eb-bi |
| ii 4242 | ša 2 LIM 5 ME GUN KI.LÁ-šú-nu man-za-az KÁ É.KUR |
| ii 4343 | ul-tu man-za-al-ti-šú-nu as-suḫ-ma al-qa-a a-na KUR AN.ŠÁR.KI |
| ii 4444 | šal-la-tú ka-bit-tú ina la mì-ni áš-lu-la ul-tú qé-reb URU.ni-iʾ |
| ii 4545 | e-li KUR.mu-ṣur ù KUR.ku-ú-si |
| ii 4646 | GIŠ.TUKUL.MEŠ-ia ú-šam-ri-ir-ma áš-ta-kan li-i-tu |
| ii 4747 | it-ti qa-ti ma-li-ti šal-meš a-tu-ra |
| ii 4848 | a-na NINA.KI URU EN-ti-ia |
| ii 4949 | i-na šal-ši ger-ri-ia UGU mba-ʾa-li MAN KUR.ṣur-ri |
| ii 5050 | a-šib MURUB₄ tam-tim lu-u al-lik |
| ii 5151 | ša a-mat LUGAL-ti-ia la iṣ-ṣu-ru la iš-mu-u zi-kir šap-te-ia |
| ii 5252 | URU.ḪAL.ṢU.MEŠ e-li-šú ú-rak-kis |
| ii 5353 | ina tam-tim ù na-ba-li ger-re-e-ti-šú ú-ṣab-bit |
| ii 5454 | nap-šat-su-nu ú-si-iq ú-kar-ri |
| ii 5555 | a-na GIŠ.ŠUDUN-ia ú-šak-ni-su-nu-ti |
| ii 5656 | DUMU.MUNUS ṣi-it lìb-bi-šu ù DUMU.MUNUS.MEŠ ŠEŠ.MEŠ-šú |
| ii 5757 | a-na e-peš MUNUS.AGRIG-ti ú-bi-la a-di maḫ-ri-ia |
| ii 5858 | mia-ḫi-mil-ki DUMU-šú šá ma-te-ma ti-amtu la e-bi-ra |
| ii 5959 | iš-te-niš ú-še-bi-la a-na e-peš ARAD-ti-ia |
| ii 6060 | DUMU.MUNUS-su ù DUMU.MUNUS.MEŠ ŠEŠ.MEŠ-šú |
| ii 6161 | it-ti ter-ḫa-ti ma-aʾ-as-si am-ḫur-šú |
| ii 6262 | re-e-mu ar-ši-šú-ma DUMU ṣi-it ŠÀ-šú ú-ter-ma a-din-šú |
| ii 6363 | mia-ki-in-lu-u MAN KUR.a-ru-ad-da a-šib MURUB₄ tam-tim |
| ii 6464 | ša a-na LUGAL.MEŠ AD.MEŠ-ia la kan-šú ik-nu-šá a-na GIŠ.ŠUDUN-ia |
| ii 6565 | DUMU.MUNUS-su it-ti nu-dun-né-e ma-aʾ-di |
| ii 6666 | a-na e-peš MUNUS.AGRIG-u-ti a-na NINA.KI |
| ii 6767 | ú-bil-am-ma ú-na-áš-ši-qa GÌR.II-ia |
| ii 6868 | mmu-gal-lu MAN KUR.tab-URU šá it-ti LUGAL.MEŠ AD.MEŠ-ia |
| ii 6969 | id-bu-bu da-ṣa-a-ti |
| ii 7070 | bi-in-tú ṣi-it lìb-bi-šú it-ti ter-ḫa-ti |
| ii 7171 | ma-aʾ-as-si a-na e-peš MUNUS.AGRIG-ti a-na NINA.KI |
| ii 7272 | ú-bil-am-ma ú-na-áš-šiq GÌR.II-ia |
| ii 7373 | UGU mmu-gal-li ANŠE.KUR.RA.MEŠ GAL.MEŠ |
| ii 7474 | man-da-at-tú šat-ti-šam-ma ú-kin EDIN-uš-šú |
| ii 7575 | msa-an-da-šar-me KUR.ḫi-lak-ka-a-a |
| ii 7676 | ša a-na LUGAL.MEŠ AD.MEŠ-ia la ik-nu-šú |
| ii 7777 | la i-šu-ṭu ab-šá-an-šú-un |
| ii 7878 | DUMU.MUNUS ṣi-it lìb-bi-šú it-ti nu-dun-né-e ma-aʾ-di |
| ii 7979 | a-na e-peš MUNUS.AGRIG-u-ti a-na NINA.KI |
| ii 8080 | ú-bil-am-ma ú-na-áš-šiq GÌR.II-ia |
| ii 8181 | ul-tú mia-ki-in-lu-u MAN KUR.a-ru-ad-da e-mì-du KUR-šú |
| ii 8282 | ma-zi-ba-al ma-bi-ba-al ma-du-ni-ba-aʾ-al |
| ii 8383 | msa-pa-ṭi-ba-al mbu-di-ba-al mba-aʾ-al-ia-šu-pu |
| ii 8484 | mba-aʾ-al-ḫa-nu-nu mba-al-ma-lu-ku ma-bi-mil-ki mPAP-mil-ki |
| ii 8585 | DUMU.MEŠ mia-ki-in-lu-u a-šib MURUB₄ tam-tim |
| ii 8686 | ul-tú MURUB₄ tam-tim e-lu-nim-ma it-ti ta-mar-ti-šú-nu ka-bit-ti |
| ii 8787 | il-li-ku-ú-nim-ma ú-na-áš-ši-qu GÌR.II-ia |
| ii 8888 | ma-zi-ba-aʾ-al ḫa-diš ap-pa-lis-ma |
| ii 8989 | a-na LUGAL-ti KUR.a-ru-ad-da áš-kun-šú |
| ii 9090 | ma-bi-ba-al ma-du-ni-ba-al msa-pa-ṭi-ba-al |
| ii 9191 | mbu-di-ba-al mba-aʾ-al-ia-šu-pu mba-al-ḫa-nu-nu |
| ii 9292 | mba-al-ma-lu-ku ma-bi-mil-ki ma-ḫi-mil-ki |
| ii 9393 | lu-bul-ti bir-me ú-lab-biš ḪAR.MEŠ KÙ.GI ú-rak-ki-sa |
| ii 9494 | rit-te-e-šú-un ina maḫ-ri-ia ul-zis-su-nu-ti |
| ii 9595 | mgu-ug-gu MAN KUR.lu-ud-di na-gu-u šá né-ber-ti A.AB.BA |
| ii 9696 | áš-ru ru-u-qu šá LUGAL.MEŠ AD.MEŠ-ia la iš-mu-u zi-kir MU-šú |
| ii 9797 | ni-bit MU-ia ina MÁŠ.GI₆ ú-šab-ri-šú-ma AN.ŠÁR DINGIR ba-nu-u-a |
| ii 9898 | um-ma GÌR.II mAN.ŠÁR-DÙ-A MAN KUR AN.ŠÁR.KI ṣa-bat-ma |
| ii 9999 | ina zi-kir MU-šú ku-šu-ud LÚ.KÚR.MEŠ-ka |
| ii 100100 | u₄-mu MÁŠ.GI₆ an-ni-tú e-mu-ru LÚ.rak-bu-šú iš-pu-ra |
| ii 101101 | a-na šá-ʾa-al šul-mì-ia MÁŠ.GI₆ an-ni-tú šá e-mu-ru |
| ii 102102 | ina ŠU.II LÚ.A KIN-šú iš-pur-am-ma ú-šá-an-na-a ia-a-ti |
| ii 103103 | ul-tú ŠÀ u₄-me šá iṣ-ba-tú GÌR.II LUGAL-ti-ia |
| ii 104104 | LÚ.gi-mir-a-a mu-dal-li-pu UN.MEŠ KUR-šú |
| ii 105105 | šá la ip-tal-la-ḫu AD.MEŠ-ia ù at-tu-u-a la iṣ-ba-tú |
| ii 106106 | GÌR.II LUGAL-ti-ia ik-šu-ud |
| ii 107107 | ina tukul-ti AN.ŠÁR u d15 DINGIR.MEŠ EN.MEŠ-ia TA ŠÀ LÚ.EN.URU.MEŠ |
| ii 108108 | ša LÚ.gi-mir-a-a šá ik-šu-du 2 LÚ.EN.URU.MEŠ |
| ii 109109 | ina GIŠ.ṣi-iṣ-ṣi iš-qa-ti AN.BAR bi-re-ti ú-tam-me-eḫ-ma |
| ii 110110 | it-ti ta-mar-ti ka-bit-te ú-še-bi-la a-di maḫ-ri-ia |
| ii 111111 | LÚ.rak-bu-šú šá a-na šá-ʾa-al šul-mì-ia ka-a-a-an iš-ta-nap-pa-ra |
| ii 112112 | ú-šar-šá-a ba-ṭi-il-tú áš-šú šá a-mat AN.ŠÁR DINGIR DÙ-ia |
| ii 113113 | la iṣ-ṣu-ru a-na e-muq ra-man-i-šú it-ta-kil-ma ig-pu-uš lìb-bu |
| ii 114114 | e-mu-qé-e-šú a-na kit-ri mpi-šá-mì-il-ki MAN KUR.mu-ṣur |
| ii 115115 | ša iṣ-lu-u GIŠ.ŠUDUN EN-ti-ia iš-pur-ma a-na-ku áš-me-e-ma |
| ii 116116 | ú-ṣal-li AN.ŠÁR u d15 um-ma pa-an LÚ.KÚR-šú pa-gar-šú li-na-di-ma |
| ii 117117 | liš-šu-u-ni GÌR.PAD.DU.MEŠ-šú ki-i šá a-na AN.ŠÁR am-ḫu-ru iš-lim-ma |
| ii 118118 | pa-an LÚ.KÚR-šú pa-gar-šú in-na-di-ma iš-šu-u-ni GÌR.PAD.DU.MEŠ-šú |
| ii 119119 | LÚ.gi-mir-a-a šá ina ni-bit MU-ia šá-pal-šú ik-bu-su |
| ii 120120 | it-bu-nim-ma is-pu-nu gi-mir KUR-šú EGIR-šú DUMU-šú ú-šib ina GIŠ.GU.ZA-šú |
| ii 121121 | ep-šet ḪUL-tim šá ina ni-iš ŠU.II-ia DINGIR.MEŠ tik-le-ia |
| ii 122122 | ina pa-an AD DÙ-šú ú-šap-ri-ku ina ŠU.II LÚ.A KIN-šú iš-pur-am-ma |
| ii 123123 | iṣ-ba-ta GÌR.II LUGAL-ti-ia um-ma LUGAL šá DINGIR i-du-u-šú at-ta |
| ii 124124 | AD-u-a ta-ru-ur-ma MUNUS.ḪUL iš-šá-kin ina pa-ni-šú |
| ii 125125 | ia-a-ti ARAD pa-liḫ-ka kur-ban-ni-ma la-šu-ṭa ab-šá-an-ka |
| ii 126126 | ina 4-e ger-ri-ia ad-ke ERIM.ḪI.A-ia UGU maḫ-še-e-ri |
| ii 127127 | MAN KUR.man-na-a-a uš-te-še-ra ḫar-ra-nu ina qí-bit AN.ŠÁR d30 dUTU |
| ii 128128 | dIŠKUR dEN dAG d15 šá NINA.KI dGAŠAN-kid-mu-ri d15 šá URU.LÍMMU-DINGIR |
| ii 129129 | dMAŠ dU.GUR dnusku qé-reb KUR.man-na-a-a e-ru-ub it-ta-lak šal-ṭiš |
| ii 130130 | URU.MEŠ-šú dan-nu-ti a-di TUR.MEŠ šá ni-i-ba la i-šu-u |
| ii 131131 | a-di qé-reb URU.i-zir-ti KUR-ud ap-pul aq-qur ina dGIŠ.BAR aq-mu |
| ii 132132 | UN.MEŠ ANŠE.KUR.RA.MEŠ ANŠE.MEŠ GU₄.MEŠ u ṣe-e-ni TA qé-reb URU.MEŠ šá-a-tú-nu |
| ii 133133 | ú-še-ṣa-am-ma šal-la-tiš am-nu maḫ-še-e-ri a-lak ger-ri-ia |
| ii 134134 | iš-me-ma ú-maš-šir URU.i-zir-tu URU LUGAL-ti-šú |
| Column iii | |
| iii 1iii 1 | a-na URU.iš-ta-at-ti URU tukul-ti-šú in-na-bit-ma e-ḫu-uz |
| iii 22 | mar-qí-tú na-gu-u šu-a-tú ak-šu-ud ma-lak 10 u₄-me 5 u₄-me |
| iii 33 | ú-šaḫ-rib-ma šá-qu-um-ma-tú at-bu-uk |
| iii 44 | maḫ-še-e-ri la pa-liḫ EN-ti-ia ina a-mat d15 |
| iii 55 | a-ši-bat URU.LÍMMU-DINGIR šá TA re-e-ši taq-bu-ú |
| iii 66 | um-ma ana-ku mi-tu-tu maḫ-še-e-ri MAN KUR.man-na-a-a |
| iii 77 | ki-i šá aq-bu-u ep-pu-uš ina ŠU.II ARAD.MEŠ-šú tam-nu-šu-u-ma |
| iii 88 | UN.MEŠ KUR-šú si-ḫu UGU-šú ú-šab-šú-u ina SILA URU-šú LÚ.šá-lam-ta-šú |
| iii 99 | id-du-u in-da-áš-šá-ru pa-gar-šú |
| iii 1010 | ŠEŠ.MEŠ-šú qin-nu-šú NUMUN É AD-šú ú-šam-qí-tú ina GIŠ.TUKUL.MEŠ |
| iii 1111 | EGIR-nu mú-al-li-i DUMU-šú ú-šib ina GIŠ.GU.ZA-šú |
| iii 1212 | da-na-an AN.ŠÁR d30 dUTU dIŠKUR dEN dAG |
| iii 1313 | d15 šá NINA.KI dšar-rat-kid-mu-ri |
| iii 1414 | d15 šá LÍMMU-DINGIR.KI dMAŠ dU.GUR dnusku |
| iii 1515 | DINGIR.MEŠ GAL.MEŠ EN.MEŠ-ia e-mur-ma |
| iii 1616 | ik-nu-šá a-na GIŠ.ŠUDUN-ia |
| iii 1717 | áš-šú ba-laṭ ZI-tì-šú up-na-a-šú ip-ta-a ú-ṣal-la-a EN-u-ti |
| iii 1818 | me-ri-si-in-ni DUMU ri-du-ti-šú |
| iii 1919 | a-na NINA.KI iš-pur-am-ma ú-na-áš-ši-qa GÌR.II-ia |
| iii 2020 | re-e-mu ar-ši-šu-u-ma |
| iii 2121 | LÚ.A KIN-ia šá šul-me ú-ma-ʾe-er EDIN-uš-šú |
| iii 2222 | DUMU.MUNUS ṣi-it lìb-bi-šú ú-še-bi-la a-na e-peš MUNUS.AGRIG-u-ti |
| iii 2323 | ma-da-ta-šú maḫ-ri-tú šá ina ter-ṣi LUGAL.MEŠ AD.MEŠ-ia |
| iii 2424 | ú-šab-ṭi-lu iš-šu-u-ni a-di maḫ-ri-ia |
| iii 2525 | 30 ANŠE.KUR.RA.MEŠ e-li ma-da-ti-šú maḫ-ri-ti |
| iii 2626 | ú-rad-di-i-ma e-mì-is-su |
| iii 2727 | ina 5-ši ger-ri-ia a-na KUR.ELAM.MA.KI |
| iii 2828 | uš-te-eš-še-ra ḫar-ra-nu |
| iii 2929 | ina qí-bit AN.ŠÁR d30 dUTU dIŠKUR dEN dAG |
| iii 3030 | d15 šá NINA.KI dšar-rat-kid-mu-ri |
| iii 3131 | d15 šá LÍMMU-DINGIR.KI dMAŠ dU.GUR dnusku |
| iii 3232 | ina ITI.KIN ši-pir dINANNA.MEŠ ITI LUGAL DINGIR.MEŠ AN.ŠÁR |
| iii 3333 | AD DINGIR.MEŠ dnun-nam-nir |
| iii 3434 | ki-ma ti-ib me-ḫe-e ez-zi |
| iii 3535 | ak-tu-um KUR.ELAM.MA.KI a-na si-ḫir-ti-šá |
| iii 3636 | ak-kis SAG.DU mte-um-man LUGAL-šú-nu |
| iii 3737 | mul-tar-ḫu šá ik-pu-da ḪUL-tu |
| iii 3838 | ina la mì-ni a-duk qu-ra-de-e-šú |
| iii 3939 | ina ŠU.II TI.LA.MEŠ ú-ṣab-bit mun-daḫ-ṣe-e-šú |
| iii 4040 | šal-ma-a-ti-šú-nu ki-ma GIŠ.DÌḪ u GIŠ.KIŠI₁₆ |
| iii 4141 | ú-mal-la-a ta-mir-ti URU.šu-šá-an |
| iii 4242 | ÚŠ.MEŠ-šú-nu ÍD.ú-la-a-a ú-šar-di |
| iii 4343 | A.MEŠ-šá aṣ-ru-up ki-ma na-ba-as-si |
| iii 4444 | mum-man-i-gaš DUMU mur-ta-ki MAN KUR.ELAM.MA.KI |
| iii 4545 | ša la-pa-an mte-um-man a-na KUR AN.ŠÁR.KI in-nab-ta iṣ-ba-ta GÌR.II-ia |
| iii 4646 | it-ti-ia ú-bil-šú a-na KUR.ELAM.MA.KI |
| iii 4747 | ú-še-šib-šú ina GIŠ.GU.ZA mte-um-man |
| iii 4848 | mtam-ma-ri-tú ŠEŠ-šú šal-šá-a-a šá it-ti-šú in-nab-ta |
| iii 4949 | ina URU.ḫi-da-lu áš-kun-šú a-na LUGAL-u-ti |
| iii 5050 | ul-tú GIŠ.TUKUL.MEŠ AN.ŠÁR u d15 UGU KUR.ELAM.MA.KI ú-šam-ri-ru |
| iii 5151 | áš-tak-ka-nu da-na-nu u li-i-tu |
| iii 5252 | ina ta-a-a-ar-ti-ia UGU mdu-na-ni KUR.gam-bu-la-a-a |
| iii 5353 | ša a-na KUR.ELAM.MA.KI it-tak-lu áš-ku-na pa-ni-ia |
| iii 5454 | URU.šá-pi-i-dEN URU tukul-ti KUR.gam-bu-li ak-šu-ud |
| iii 5555 | qé-reb URU šu-a-tú e-ru-ub |
| iii 5656 | UN.MEŠ-šú as-liš ú-ṭab-bi-iḫ |
| iii 5757 | mdu-na-nu msa-am-gu-nu |
| iii 5858 | mu-nàr-ri-ṭu e-peš LUGAL-ti-ia |
| iii 5959 | ina GIŠ.ṣi-iṣ-ṣi iš-qa-ti AN.BAR bi-re-ti AN.BAR |
| iii 6060 | ú-tam-me-ḫa ŠU.II u GÌR.II |
| iii 6161 | si-it-ti DUMU.MEŠ mEN-BA-šá qin-nu-šú NUMUN É AD-šú |
| iii 6262 | ma-la ba-šú-u mdMUATI-I mEN-KAR-ir |
| iii 6363 | DUMU.MEŠ mdMUATI-MU-KAM-eš LÚ.GÚ.EN.NA |
| iii 6464 | ù GÌR.PAD.DU.MEŠ AD ba-ni-šú-nu |
| iii 6565 | it-ti LÚ.ur-bi LÚ.te-bé-e UN.MEŠ KUR.gam-bu-li |
| iii 6666 | GU₄.MEŠ ṣe-e-ni ANŠE.MEŠ ANŠE.KUR.RA.MEŠ ANŠE.KUNGA.MEŠ |
| iii 6767 | ul-tú qé-reb KUR.gam-bu-li áš-lu-la a-na KUR AN.ŠÁR.KI |
| iii 6868 | URU.šá-pi-i-dEN URU tukul-ti-šú |
| iii 6969 | ap-pul aq-qur ina A.MEŠ uš-ḫar-miṭ |
| iii 7070 | ina u₄-me-šú mdGIŠ.NU₁₁-MU-GI.NA ŠEŠ la ke-e-nu |
| iii 7171 | šá MUN e-pu-šu-uš |
| iii 7272 | áš-ku-nu-uš a-na LUGAL-ut KÁ.DINGIR.RA.KI |
| iii 7373 | mim-ma par-su si-ma-a-te šá LUGAL-ti e-pu-uš-ma a-din-šú |
| iii 7474 | LÚ.ERIM.MEŠ ANŠE.KUR.RA.MEŠ GIŠ.GIGIR.MEŠ |
| iii 7575 | ak-ṣur-ma ú-mal-la-a qa-tuš-šú |
| iii 7676 | URU.MEŠ A.ŠÀ.MEŠ GIŠ.KIRI₆.MEŠ UN.MEŠ a-šib lìb-bi-šú-un |
| iii 7777 | ú-šá-tir-ma UGU šá AD DÙ-ia iq-bu-u a-din-šú |
| iii 7878 | ù šu-u MUNUS.SIG₅ an-ni-tú e-pu-šu-uš im-ši-ma |
| iii 7979 | iš-te-né-ʾa-a le-mut-tú |
| iii 8080 | e-liš ina šap-te-e-šú i-tam-ma-a ṭu-ub-ba-a-ti |
| iii 8181 | šap-la-nu lìb-ba-šú ka-ṣir né-er-tu |
| iii 8282 | DUMU.MEŠ KÁ.DINGIR.RA.KI šá ina UGU KUR AN.ŠÁR.KI am-ru |
| iii 8383 | ARAD.MEŠ da-gíl pa-ni-ia ip-ru-uṣ-ma |
| iii 8484 | da-bab la kit-te id-bu-ba it-ti-šú-un |
| iii 8585 | ina ši-pir ni-kil-ti a-na šá-ʾa-al šul-mì-ia |
| iii 8686 | a-na NINA.KI a-di maḫ-ri-ia iš-pu-ra-áš-šú-nu-ti |
| iii 8787 | a-na-ku mAN.ŠÁR-DÙ-A MAN KUR AN.ŠÁR.KI |
| iii 8888 | ša DINGIR.MEŠ GAL.MEŠ ši-mat SIG₅-tim i-ši-mu-uš |
| iii 8989 | ib-nu-u-šú ina kit-te u mi-šá-ri |
| iii 9090 | DUMU.MEŠ KÁ.DINGIR.RA.KI šu-nu-ti ina GIŠ.BANŠUR tak-né-e |
| iii 9191 | ul-zis-su-nu-ti lu-bul-ti bir-me |
| iii 9292 | ú-lab-bi-su-nu-ti ḪAR.MEŠ KÙ.GI ú-rak-kis |
| iii 9393 | rit-te-e-šú-un a-di DUMU.MEŠ KÁ.DINGIR.RA.KI šu-nu-ti |
| iii 9494 | qé-reb KUR AN.ŠÁR.KI ú-šu-uz-zu |
| iii 9595 | i-dag-ga-lu pa-an šá-kan ṭè-me-ia |
| iii 9696 | ù šu-u mdGIŠ.NU₁₁-MU-GI.NA ŠEŠ la ke-e-nu |
| iii 9797 | ša la iṣ-ṣu-ru a-de-ia UN.MEŠ KUR URI.KI KUR.kal-du |
| iii 9898 | KUR.a-ra-mu KUR tam-tim ul-tú URU.a-qa-ba |
| iii 9999 | a-di URU.KÁ-sa-li-me-ti ARAD.MEŠ da-gíl pa-ni-ia |
| iii 100100 | uš-bal-kit ina ŠU.II-ia ù mum-man-i-gaš |
| iii 101101 | mun-nab-tu šá iṣ-ba-tú GÌR.II LUGAL-ti-ia |
| iii 102102 | ša qé-reb KUR.ELAM.MA.KI áš-ku-nu-uš a-na LUGAL-u-ti |
| iii 103103 | ù LUGAL.MEŠ KUR.gu-te₉-e.KI KUR MAR.TU-e.KI KUR.me-luḫ-ḫe-e |
| iii 104104 | ša ina qí-bit AN.ŠÁR u dNIN.LÍL iš-tak-ka-na ŠU.II-a-a |
| iii 105105 | nap-ḫar-šú-nu it-ti-ia ú-šam-kír-ma |
| iii 106106 | it-ti-šú iš-ku-nu pi-i-šú-nu |
| iii 107107 | KÁ.GAL.MEŠ ZIMBIR.KI KÁ.DINGIR.RA.KI bár-sipa.KI |
| iii 108108 | ú-dil-ma ip-ru-sa ŠEŠ-u-tu |
| iii 109109 | e-li BÀD URU.MEŠ šá-a-tu-nu |
| iii 110110 | mun-daḫ-ṣe-e-šú ú-še-li-i-ma |
| iii 111111 | it-ti-ia e-te-né-ep-pu-šú MÈ |
| iii 112112 | e-peš UDU.SISKUR.MEŠ-ia la-pa-an dEN DUMU dEN |
| iii 113113 | nu-úr DINGIR.MEŠ dUTU u qu-ra-di dèr-ra |
| iii 114114 | ik-la-ma ú-šab-ṭi-la na-dan zi-bi-ia |
| iii 115115 | a-na e-kem ma-ḫa-zi šu-bat DINGIR.MEŠ GAL.MEŠ |
| iii 116116 | ša eš-re-e-ti-šú-nu ud-di-šú ú-za-ʾi-i-nu KÙ.GI KÙ.BABBAR |
| iii 117117 | qé-reb-šú-nu áš-tak-ka-nu si-ma-a-te ik-pu-ud ḪUL-tú |
| iii 118118 | ina u₄-me-šú 1-en LÚ.GURUŠ |
| iii 119119 | ina šat mu-ši ú-tul-ma |
| iii 120120 | i-na-aṭ-ṭa-al MÁŠ.GI₆ |
| iii 121121 | um-ma ina UGU ki-gal-li šá d30 šá-ṭir-ma |
| iii 122122 | ma-a šá it-ti mAN.ŠÁR-DÙ-A MAN KUR AN.ŠÁR.KI |
| iii 123123 | ik-pu-du MUNUS.ḪUL ip-pu-šú ṣe-lu-ú-tú |
| iii 124124 | mu-u-tu lem-nu a-šar-rak-šu-nu-ti |
| iii 125125 | ina GÍR AN.BAR ḫa-an-ṭi mi-qit dGIŠ.BAR SU.GU₇ |
| iii 126126 | TAG-it dèr-ra ú-qát-ta-a nap-šat-su-un |
| iii 127127 | an-na-a-te áš-me-e-ma at-kil a-na a-mat d30 EN-ia |
| iii 128128 | ina 6-ši ger-ri-ia ad-ke ERIM.ḪI.A-ia |
| iii 129129 | EDIN mdGIŠ.NU₁₁-MU-GI.NA uš-te-eš-še-ra ḫar-ra-nu |
| iii 130130 | qé-reb ZIMBIR.KI KÁ.DINGIR.RA.KI bár-sipa.KI GÚ.DU₈.A.KI |
| iii 131131 | šá-a-šú ga-du mun-daḫ-ṣe-e-šú e-si-ir-ma |
| iii 132132 | ú-ṣab-bi-ta mu-uṣ-ṣa-šú-un |
| iii 133133 | qé-reb URU u EDIN ina la mì-ni áš-tak-ka-na BAD₅.BAD₅-šú |
| iii 134134 | si-it-tu-u-ti ina TAG-it dèr-ra |
| iii 135135 | su-un-qu bu-bu-ti iš-ku-nu na-piš-tu |
| iii 136136 | mum-man-i-gaš MAN KUR.ELAM.MA.KI ši-kin ŠU.II-ia |
| iii 137137 | ša ṭa-ʾa-a-tu im-ḫu-ru-šú-ma |
| iii 138138 | it-ba-a a-na kit-ri-šú |
| Column iv | |
| iv 1iv 1 | mtam-ma-ri-tú EDIN-uš-šú ib-bal-kit-ma |
| iv 22 | šá-a-šú ga-du kim-ti-šú ú-ras-sib ina GIŠ.TUKUL.MEŠ |
| iv 33 | EGIR mtam-ma-ri-tú šá EGIR mum-man-i-gaš |
| iv 44 | ú-ši-bu ina GIŠ.GU.ZA KUR.ELAM.MA.KI |
| iv 55 | la iš-a-lu šu-lum LUGAL-ti-ia |
| iv 66 | a-na re-ṣu-ut mdGIŠ.NU₁₁-MU-GI.NA ŠEŠ nak-ri |
| iv 77 | il-lik-am-ma a-na mit-ḫu-ṣi ERIM.ḪI.A-ia |
| iv 88 | ur-ri-ḫa GIŠ.TUKUL.MEŠ-šú |
| iv 99 | ina su-up-pe-e šá AN.ŠÁR u d15 ú-sap-pu-ú |
| iv 1010 | un-nin-ni-ia il-qu-u iš-mu-ú zi-kir NUNDUM.II-ia |
| iv 1111 | min-da-bi-bi ARAD-su EDIN-uš-šú ib-bal-kit-ma |
| iv 1212 | ina MÈ EDIN iš-ku-na BAD₅.BAD₅-šú mtam-ma-ri-tu |
| iv 1313 | MAN KUR.ELAM.MA.KI šá UGU ni-kis SAG.DU mte-um-man |
| iv 1414 | mé-re-eḫ-tu iq-bu-ú |
| iv 1515 | ša ik-ki-su a-ḫu-ur-ru-u ERIM.ḪI.A-ia |
| iv 1616 | um-ma i-nak-ki-su-u SAG.DU MAN KUR.ELAM.MA.KI |
| iv 1717 | qé-reb KUR-šú ina UKKIN ERIM.ḪI.A-šú |
| iv 1818 | šá-ni-ia-a-nu iq-bi ù mum-man-i-gaš |
| iv 1919 | ke-e ú-na-áš-šiq qaq-qa-ru |
| iv 2020 | ina pa-an LÚ.A KIN šá mAN.ŠÁR-DÙ-A MAN KUR AN.ŠÁR.KI |
| iv 2121 | UGU a-ma-a-ti an-na-a-te šá il-zi-nu |
| iv 2222 | AN.ŠÁR u d15 e-ri-ḫu-šú-ma |
| iv 2323 | mtam-ma-ri-tú ŠEŠ.MEŠ-šú qin-nu-šú NUMUN É AD-šú |
| iv 2424 | it-ti 85 NUN.MEŠ a-li-kut i-di-šú |
| iv 2525 | la-pa-an min-da-bi-bi in-nab-tú-nim-ma |
| iv 2626 | mi-ra-nu-uš-šú-un ina UGU ŠÀ.MEŠ-šú-nu |
| iv 2727 | ip-ši-lu-nim-ma il-lik-u-ni a-di NINA.KI |
| iv 2828 | mtam-ma-ri-tu GÌR.II LUGAL-ti-ia ú-na-áš-šiq-ma |
| iv 2929 | qaq-qa-ru ú-še-šir ina ziq-ni-šú |
| iv 3030 | man-za-az GIŠ.ma-gar-ri-ia iṣ-bat-ma |
| iv 3131 | a-na e-peš ARAD-ti-ia ra-man-šú im-nu-ma |
| iv 3232 | áš-šú e-peš di-ni-šú a-lak re-ṣu-ti-šú |
| iv 3333 | ina qí-bit AN.ŠÁR u d15 ú-ṣal-la-a EN-u-ti |
| iv 3434 | ina maḫ-ri-ia i-zi-zu-u-ma |
| iv 3535 | i-dal-la-lu qur-di DINGIR.MEŠ-ia dan-nu-ti |
| iv 3636 | ša il-li-ku re-ṣu-ú-ti |
| iv 3737 | a-na-ku mAN.ŠÁR-DÙ-A lìb-bu rap-šú |
| iv 3838 | la ka-ṣir ik-ki mu-pa-si-su ḫi-ṭa-a-te |
| iv 3939 | a-na mtam-ma-ri-tú re-e-mu ar-ši-šú-ma |
| iv 4040 | šá-a-šú ga-du NUMUN É AD-šú ina qé-reb É.GAL-ia |
| iv 4141 | ul-zis-su-nu-ti ina u₄-me-šú UN.MEŠ KUR URI.KI |
| iv 4242 | ša it-ti mdGIŠ.NU₁₁-MU-GI.NA iš-šak-nu |
| iv 4343 | ik-pu-du ḪUL-tú né-eb-re-e-tú iṣ-bat-su-nu-ti |
| iv 4444 | a-na bu-ri-šú-nu UZU DUMU.MEŠ-šú-nu DUMU.MUNUS.MEŠ-šú-nu |
| iv 4545 | e-ku-lu ik-su-su ku-ru-us-su |
| iv 4646 | AN.ŠÁR d30 dUTU dIŠKUR dEN dAG |
| iv 4747 | d15 šá NINA.KI dšar-rat-kid-mu-ri |
| iv 4848 | d15 šá URU.LÍMMU-DINGIR dMAŠ dU.GUR dnusku |
| iv 4949 | ša ina maḫ-ri-ia il-li-ku i-na-ru ga-re-ia |
| iv 5050 | mdGIŠ.NU₁₁-MU-GI.NA ŠEŠ nak-ri šá i-gi-ra-an-ni |
| iv 5151 | ina mi-qit dGIŠ.BAR a-ri-ri id-du-šú-ma |
| iv 5252 | ú-ḫal-li-qu nap-šat-su |
| iv 5353 | ù UN.MEŠ šá a-na mdGIŠ.NU₁₁-MU-GI.NA |
| iv 5454 | ŠEŠ nak-ri ú-šak-pi-du |
| iv 5555 | ep-še-e-tú an-ni-tú ḪUL-tú e-pu-šú |
| iv 5656 | ša mi-tu-tu ip-la-ḫu nap-šat-su-nu pa-nu-uš-šú-un |
| iv 5757 | te-qir-u-ma it-ti mdGIŠ.NU₁₁-MU-GI.NA |
| iv 5858 | EN-šú-nu la im-qu-tú ina dGIŠ.BAR |
| iv 5959 | ša la-pa-an ni-kis GÍR AN.BAR su-un-qí bu-bu-ti |
| iv 6060 | dGIŠ.BAR a-ri-ri i-še-tu-u-ni e-ḫu-zu mar-qí-i-tú |
| iv 6161 | sa-par DINGIR.MEŠ GAL.MEŠ EN.MEŠ-ia šá la na-par-šu-di |
| iv 6262 | is-ḫu-up-šú-nu-ti e-du ul ip-par-šid |
| iv 6363 | mul-taḫ-ṭu ul ú-ṣi ina ŠU.II-ia im-nu-u ŠU.II-u-a |
| iv 6464 | GIŠ.GIGIR.MEŠ GIŠ.šá šá-da-di GIŠ.šá ṣil-li MUNUS.sek-re-e-ti-šú |
| iv 6565 | NÍG.GA É.GAL-šú ú-bil-u-ni a-di maḫ-ri-ia |
| iv 6666 | LÚ.ERIM.MEŠ šá-a-tú-nu šil-la-tú pi-i-šú-nu |
| iv 6767 | šá ina UGU AN.ŠÁR DINGIR-ia šil-la-tú iq-bu-u |
| iv 6868 | ù ia-a-ti NUN pa-liḫ-šú ik-pu-du-u-ni ḪUL-tú |
| iv 6969 | pi-i-šú-nu áš-lu-uq BAD₅.BAD₅-šú-nu áš-kun |
| iv 7070 | si-it-ti UN.MEŠ bal-ṭu-sún ina dALAD.dLAMMA |
| iv 7171 | ša md30-PAP.MEŠ-SU AD AD DÙ-ia ina lìb-bi is-pu-nu |
| iv 7272 | e-nen-na a-na-ku ina ki-is-pi-šú |
| iv 7373 | UN.MEŠ šá-a-tu-nu ina lìb-bi as-pu-un |
| iv 7474 | UZU.MEŠ-šú-nu nu-uk-ku-su-u-ti |
| iv 7575 | ú-šá-kil UR.GI₇.MEŠ ŠAḪ.MEŠ zi-i-bi |
| iv 7676 | TI₈.MUŠEN.MEŠ MUŠEN.MEŠ AN-e KU₆.MEŠ ap-se-e |
| iv 7777 | ul-tú ep-še-e-ti an-na-a-ti e-te-ep-pu-šú |
| iv 7878 | ú-ni-iḫ-ḫu lìb-bi DINGIR.MEŠ GAL.MEŠ EN.MEŠ-ia |
| iv 7979 | ADDA.MEŠ UN.MEŠ šá dèr-ra ú-šam-qí-tú |
| iv 8080 | ù šá ina su-un-qí bu-bu-ti iš-ku-nu na-piš-tú |
| iv 8181 | ri-ḫe-et ú-kul-ti UR.GI₇.MEŠ ŠAḪ.MEŠ |
| iv 8282 | ša SILA.MEŠ pur-ru-ku ma-lu-u re-ba-a-te |
| iv 8383 | GÌR.PAD.DU.MEŠ-šú-nu ul-tú qé-reb KÁ.DINGIR.RA.KI |
| iv 8484 | GÚ.DU₈.A.KI ZIMBIR.KI ú-še-ṣi-ma |
| iv 8585 | at-ta-ad-di a-na ka-ma-a-ti |
| iv 8686 | ina ši-pir i-šip-pu-ti BÁRA.MEŠ-šú-nu ub-bi-ib |
| iv 8787 | ul-li-la su-le-e-šú-nu lu-ʾu-u-ti |
| iv 8888 | DINGIR.MEŠ-šú-nu ze-nu-u-ti d15.MEŠ-šú-nu šab-sa-a-te |
| iv 8989 | ú-ni-iḫ ina taq-rib-ti u ÉR.ŠÀ.ḪUN.GÁ |
| iv 9090 | sat-tuk-ki-šú-un šá i-me-ṣu ki-ma šá u₄-me ul-lu-ti |
| iv 9191 | ina šal-me ú-ter-ma ú-kin |
| iv 9292 | si-it-ti DUMU.MEŠ KÁ.DINGIR.RA.KI GÚ.DU₈.A.KI ZIMBIR.KI |
| iv 9393 | ša ina šib-ṭi šag-gaš-ti ù né-eb-re-e-ti |
| iv 9494 | i-še-tu-u-ni re-e-mu ar-ši-šú-nu-ti |
| iv 9595 | ba-laṭ na-piš-ti-šú-nu aq-bi |
| iv 9696 | qé-reb KÁ.DINGIR.RA.KI ú-še-šib-šú-nu-ti |
| iv 9797 | UN.MEŠ KUR URI.KI ga-du KUR.kal-du KUR.a-ra-mu KUR tam-tim |
| iv 9898 | ša mdGIŠ.NU₁₁-MU-GI.NA ik-ter-u-ma |
| iv 9999 | a-na 1-en pi-i ú-ter-ru |
| iv 100100 | a-na pa-ra-as ra-ma-ni-šú-nu ik-ki-ru it-ti-ia |
| iv 101101 | ina qí-bit AN.ŠÁR u dNIN.LÍL DINGIR.MEŠ tik-le-ia |
| iv 102102 | a-na paṭ gim-ri-šú-nu ak-bu-us |
| iv 103103 | GIŠ.ŠUDUN AN.ŠÁR šá iṣ-lu-u e-mid-su-nu-ti |
| iv 104104 | LÚ.GAR.KUR.MEŠ LÚ.TIL.GÍD.MEŠ ši-kin ŠU.II-ia |
| iv 105105 | áš-tak-ka-na e-li-šú-un |
| iv 106106 | SÁ.DUG₄.MEŠ gi-né-e SAG.MEŠ AN.ŠÁR dNIN.LÍL |
| iv 107107 | ù DINGIR.MEŠ KUR AN.ŠÁR.KI ú-kin EDIN-uš-šú-un |
| iv 108108 | bil-tu man-da-at-tú EN-ti-ia |
| iv 109109 | šat-ti-šam-ma la na-par-ka-a e-mid-su-nu-ti |
| iv 110110 | ina 7-e ger-ri-ia ina ITI.SIG₄ ITI d30 EN EŠ.BAR |
| iv 111111 | DUMU reš-tu-u a-šá-re-du šá dEN.LÍL |
| iv 112112 | ad-ke ERIM.ḪI.A-ia EDIN mum-man-al-da-si |
| iv 113113 | MAN KUR.ELAM.MA.KI uš-te-eš-še-ra ḫar-ra-nu |
| iv 114114 | ú-bil it-ti-ia mtam-ma-ri-tú MAN KUR.ELAM.MA.KI |
| iv 115115 | ša la-pa-an min-da-bi-bi ARAD-šú in-nab-tam-ma iṣ-ba-ta GÌR.II-ia |
| iv 116116 | UN.MEŠ URU.ḫi-il-mu URU.pil-la-ti URU.du-mu-qu |
| iv 117117 | URU.su-la-a-a URU.la-ḫi-ra di-bi-ri-i-na |
| iv 118118 | ti-ib MÈ-ia dan-ni iš-mu-u šá al-la-ku a-na KUR.ELAM.MA.KI |
| iv 119119 | nam-ri-ri AN.ŠÁR u d15 EN.MEŠ-ia |
| iv 120120 | pu-luḫ-ti LUGAL-ti-ia is-ḫu-up-šú-nu-ti |
| iv 121121 | šu-nu UN.MEŠ-šú-nu GU₄.MEŠ-šú-nu ṣe-e-ni-šú-nu |
| iv 122122 | a-na e-peš ARAD-ti-ia a-na KUR AN.ŠÁR.KI im-qut-nim-ma |
| iv 123123 | iṣ-ba-tú GÌR.II LUGAL-ti-ia URU.É-mim-bi-i maḫ-ru-u |
| iv 124124 | URU LUGAL-u-ti É tuk-la-a-te šá KUR.ELAM.MA.KI |
| iv 125125 | ša ki-ma BÀD GAL-e pa-an KUR.ELAM.MA.KI par-ku |
| iv 126126 | ša md30-PAP.MEŠ-SU MAN KUR AN.ŠÁR.KI AD AD DÙ-ia |
| iv 127127 | il-la-mu-u-a ik-šu-du ù šu-u e-la-mu-ú |
| iv 128128 | URU mé-eḫ-ret URU.É-mim-bi-i maḫ-re-e |
| iv 129129 | šá-nam-ma e-pu-šú-ma BÀD-šú ú-dan-nin-u-ma |
| iv 130130 | ú-zaq-qí-ru šal-ḫu-u-šu |
| iv 131131 | URU.É-mim-bi-i iz-ku-ru ni-bit-su |
| iv 132132 | ina me-ti-iq ger-ri-ia ak-šu-ud |
| iv 133133 | UN.MEŠ a-šib lìb-bi-šú šá la ú-ṣu-ú-nim-ma |
| iv 134134 | la iš-a-lu šu-lum LUGAL-ti-ia a-nir |
| iv 135135 | SAG.DU.MEŠ-šú-nu ak-kis NUNDUM.MEŠ-šú-nu ap-ru-uʾ |
| iv 136136 | a-na ta-mar-ti UN.MEŠ KUR-ia |
| iv 137137 | al-qa-a a-na KUR AN.ŠÁR.KI |
| Column v | |
| v 1v 1 | mim-ba-ap-pi LÚ.qe-e-pu URU.É-mim-bi-i |
| v 22 | LÚ.ḫa-tan mum-man-al-da-si MAN KUR.ELAM.MA.KI |
| v 33 | bal-ṭu-us-su ul-tú qé-reb URU šu-a-tú |
| v 44 | ú-še-ṣa-am-ma ŠU.II u GÌR.II bi-re-tú AN.BAR |
| v 55 | ad-di-šú-u-ma ú-ra-a-šú a-na KUR AN.ŠÁR.KI |
| v 66 | MUNUS.É.GAL ù DUMU.MEŠ-šú šá mte-um-man |
| v 77 | MAN KUR.ELAM.MA.KI šá ina na-áš-par-ti AN.ŠÁR |
| v 88 | ina ger-ri-ia maḫ-re-e ak-ki-su SAG.DU-su |
| v 99 | it-ti si-it-ti UN.MEŠ a-ši-bu-ti URU.É-mim-bi-i |
| v 1010 | ú-še-ṣa-am-ma šal-la-tiš am-nu |
| v 1111 | mum-man-al-da-si MAN KUR.ELAM.MA.KI |
| v 1212 | e-reb ERIM.ḪI.A-ia šá qé-reb KUR.ELAM.MA.KI e-ru-bu iš-me-ma |
| v 1313 | URU.ma-dak-tú URU LUGAL-ti-šú ú-maš-šir-ma |
| v 1414 | in-na-bit-ma KUR-šú e-li |
| v 1515 | mum-ba-LAGAB-u-a šá ul-tú KUR.ELAM.MA.KI |
| v 1616 | ta-se-ḫu-u a-na URU.bu-bi-lu in-nab-tu-u-ma |
| v 1717 | mé-eḫ-ret mum-man-al-da-si ú-ši-bu ina GIŠ.GU.ZA KUR.ELAM.MA.KI |
| v 1818 | ki-ma šá-a-šú-ma iš-me-ma URU.bu-bi-lu |
| v 1919 | URU mu-šab EN-ti-šú ú-maš-šir-ma |
| v 2020 | ki-ma KU₆.MEŠ iṣ-bat šu-pul A.MEŠ ru-qu-u-ti |
| v 2121 | mtam-ma-ri-tú šá in-nab-ta iṣ-ba-ta GÌR.II-ia |
| v 2222 | qé-reb URU.šu-šá-an ú-še-rib áš-kun-šú a-na LUGAL-ti |
| v 2323 | SIG₅-tu e-pu-šu-uš šá áš-pu-ru Á.TAḪ-su im-ši-ma |
| v 2424 | iš-te-né-⸢ʾa⸣-a ḪUL-tu a-na ka-šad ERIM.ḪI.A-ia |
| v 2525 | ki-a-am iq-bi it-ti lìb-bi-šú |
| v 2626 | um-ma UN.MEŠ KUR.ELAM.MA.KI a-na MUNUS.MEŠ-e i-tu-ru |
| v 2727 | ina IGI KUR AN.ŠÁR.KI šu-nu šu-nu-ma ir-ru-bu-nim-ma |
| v 2828 | iḫ-ta-nab-ba-tú ḫu-bu-ut KUR.ELAM.MA.KI |
| v 2929 | AN.ŠÁR u d15 šá Á.II-a-a il-li-ku |
| v 3030 | ú-šá-zi-zu-in-ni EDIN ga-re-ia |
| v 3131 | lìb-bi mtam-ma-ri-tú ek-ṣu ba-ra-nu-u ib-ru-u-ma |
| v 3232 | ú-ba-ʾu-ú qa-tuš-šú |
| v 3333 | ul-tu GIŠ.GU.ZA LUGAL-ti-šú id-ku-niš-šum-ma |
| v 3434 | ú-ter-ru-niš-šú šá-ni-⸢ia⸣-a-nu |
| v 3535 | ú-šak-ni-šu-uš a-na GÌR.II-ia |
| v 3636 | šu-ut a-ma-a-ti an-na-a-ti |
| v 3737 | ina ṣi-ri-iḫ-ti lìb-bi-ia |
| v 3838 | ša mtam-ma-ri-tú la ke-e-nu iḫ-ṭa-a |
| v 3939 | ina li-i-ti u da-na-ni šá DINGIR.MEŠ GAL.MEŠ EN.MEŠ-ia |
| v 4040 | qé-reb KUR.ELAM.MA.KI a-na si-ḫir-ti-šá at-ta-lak šal-ṭiš |
| v 4141 | ina ta-a-a-ar-ti-ia šá šul-me-e ŠU.II ma-li-ti |
| v 4242 | pa-an GIŠ.ŠUDUN-ia ú-ter-ra a-na KUR AN.ŠÁR.KI |
| v 4343 | URU.ga-tu-du URU.ga-tu-du-ma |
| v 4444 | URU.da-e-ba URU.na-ṭi-iʾ |
| v 4545 | URU.BÀD-mam-na-ni URU.BÀD-mam-na-ni-ma |
| v 4646 | URU.ḫa-ma-nu URU.ta-ra-qu |
| v 4747 | URU.ḫa-a-a-ú-si URU.É-NA₄.KIŠIB-É-su |
| v 4848 | URU.É-mar-ra-bi URU.É-mim-bi-i |
| v 4949 | URU.ma-dak-tu URU.šu-šá-an |
| v 5050 | URU.bu-bé-e URU.ŠE-mdŠÚ-MAN-a-ni |
| v 5151 | URU.ur-da-li-ka URU.al-ga-ri-ga |
| v 5252 | URU.tu-ú-bu URU.DU₆-tu-ú-bu |
| v 5353 | URU.du-un-LUGAL URU.BÀD-mun-da-si |
| v 5454 | URU.BÀD-mun-da-si-ma URU.bu-bi-lu |
| v 5555 | URU.sa-am-ú-nu URU.É-mbu-na-ku |
| v 5656 | URU.qa-ab-ri-na URU.qa-ab-ri-na-ma URU.ḫa-ra-aʾ |
| v 5757 | URU.MEŠ šu-nu-ti ak-šu-ud |
| v 5858 | ap-pul aq-qur ina dGIŠ.BAR aq-mu |
| v 5959 | DINGIR.MEŠ-šú-nu UN.MEŠ-šú-nu GU₄.MEŠ-šú-nu ṣe-e-ni-šú-nu |
| v 6060 | NÍG.ŠU-šú-nu NÍG.GA-šú-nu |
| v 6161 | GIŠ.ṣu-um-bi ANŠE.KUR.RA.MEŠ ANŠE.KUNGA.MEŠ |
| v 6262 | GIŠ.til-li ú-nu-ut MÈ áš-lu-la a-na KUR AN.ŠÁR.KI |
| v 6363 | i-na 8-e ger-ri-ia ina qí-bit AN.ŠÁR u d15 |
| v 6464 | ad-ke ERIM.ḪI.A-ia EDIN mum-man-al-da-si |
| v 6565 | MAN KUR.ELAM.MA.KI uš-te-eš-še-ra ḫar-ra-nu |
| v 6666 | URU.É-mim-bi-i šá ina ger-ri-ia maḫ-re-e |
| v 6767 | ak-šu-du e-nen-na KUR.ra-a-ši |
| v 6868 | URU.ḫa-ma-nu a-di na-ge-šú ak-šu-ud |
| v 6969 | ù šu-u mum-man-al-da-si MAN KUR.ELAM.MA.KI |
| v 7070 | ka-šad KUR.ra-a-ši URU.ḫa-ma-nu iš-me-ma |
| v 7171 | pu-luḫ-ti AN.ŠÁR u d15 a-li-kut Á.II-ia |
| v 7272 | is-ḫu-up-šú-ma URU.ma-dak-tú URU LUGAL-ti-šú |
| v 7373 | ú-maš-šir-ma in-na-bit a-na URU.BÀD-mun-da-si |
| v 7474 | ÍD.id-id-e e-bir-ma ÍD šu-a-tú |
| v 7575 | a-na dan-nu-ti-šú iš-kun |
| v 7676 | uk-ta-ta-ṣar a-na ṣal-ti-ia |
| v 7777 | URU.na-ṭi-tú URU LUGAL-ti a-di na-ge-šú KUR-ud |
| v 7878 | URU.É-mbu-na-ku URU LUGAL-ti a-di na-ge-šú KUR-ud |
| v 7979 | URU.ḫar-tap-a-nu URU LUGAL-ti a-di na-ge-šú KUR-ud |
| v 8080 | URU.tu-ú-bu a-di na-ge-šú KUR-ud |
| v 8181 | bi-rit ÍD ka-la-mu URU.ma-dak-tú |
| v 8282 | URU LUGAL-ti a-di na-ge-šú KUR-ud |
| v 8383 | URU.ḫal-te-ma-áš URU LUGAL-ti-šú ak-šu-ud |
| v 8484 | URU.šu-šá-an URU LUGAL-ti-šú ak-šu-ud |
| v 8585 | URU.di-in-LUGAL URU.su-mu-un-tu-na-áš |
| v 8686 | URU LUGAL-ti-šú ak-šu-ud |
| v 8787 | URU.pi-di-il-ma URU LUGAL-ti-šú ak-šu-ud |
| v 8888 | URU.bu-bi-lu URU LUGAL-ti-šú ak-šu-ud |
| v 8989 | URU.ka-bi-in-ak URU LUGAL-ti-šú ak-šu-ud |
| v 9090 | ina tukul-ti AN.ŠÁR u d15 ar-de-e-ma al-lik |
| v 9191 | EDIN mum-man-al-da-si MAN KUR.ELAM.MA.KI |
| v 9292 | ša la ik-nu-šá a-na GIŠ.ŠUDUN-ia |
| v 9393 | ina me-ti-iq ger-ri-ia |
| v 9494 | URU.BÀD-mun-da-si URU LUGAL-ti-šú KUR-ud |
| v 9595 | ERIM.ḪI.A-ia ÍD.id-id-e a-gu-u šam-ru |
| v 9696 | e-mu-ru ip-la-ḫu a-na né-ba-ar-te |
| v 9797 | d15 a-ši-bat URU.LÍMMU-DINGIR ina šat mu-ši |
| v 9898 | a-na ERIM.ḪI.A-ia MÁŠ.GI₆ ú-šab-ri-ma |
| v 9999 | ki-a-am iq-bi-šu-nu-ti |
| v 100100 | um-ma a-na-ku al-lak ina ma-ḫar mAN.ŠÁR-DÙ-A |
| v 101101 | LUGAL šá ib-na-a ŠU.II-a-a |
| v 102102 | e-li MÁŠ.GI₆ an-ni-ti ERIM.ḪI.A-ia ir-ḫu-ṣu |
| v 103103 | ÍD.id-id-e e-bi-ru šal-meš |
| v 104104 | 14 URU.MEŠ mu-šab LUGAL-ti-šú |
| v 105105 | a-di URU.MEŠ TUR.MEŠ šá ni-i-ba la i-šu-u |
| v 106106 | ù 12 na-ge-e šá qé-reb KUR.ELAM.MA.KI ka-li-šá |
| v 107107 | ak-šu-ud ap-pul aq-qur ina dGIŠ.BAR aq-mu |
| v 108108 | a-na DU₆ u kar-me ú-ter |
| v 109109 | ina la mì-ni a-duk qu-ra-de-e-šú |
| v 110110 | ina GIŠ.TUKUL.MEŠ ú-ras-sib mun-daḫ-ṣe-e-šú MAḪ.MEŠ |
| v 111111 | mum-man-al-da-si MAN KUR.ELAM.MA.KI |
| v 112112 | mi-ra-nu-uš-šú in-na-bit-ma iṣ-ba-ta KUR-ú |
| v 113113 | URU.ba-nu-nu a-di na-ge-e šá URU.ta-sa-ar-ra |
| v 114114 | ka-la-mu ak-šu-ud |
| v 115115 | 20.ÀM URU.MEŠ ina na-ge-e šá URU.ḫu-un-nir |
| v 116116 | ina UGU mì-iṣ-ri šá URU.ḫi-da-lu ak-šu-ud |
| v 117117 | URU.ba-ši-mu ù URU.MEŠ šá li-me-ti-šú ap-pul aq-qur |
| v 118118 | ša UN.MEŠ a-šib lìb-bi-šú-un ka-mar-šú-nu áš-kun |
| v 119119 | ú-šab-bir DINGIR.MEŠ-šú-un |
| v 120120 | ú-šap-ši-iḫ ka-bat-ti EN EN.EN |
| v 121121 | DINGIR.MEŠ-šú d15.MEŠ-šú NÍG.ŠU-šú NÍG.GA-šú |
| v 122122 | UN.MEŠ TUR u GAL áš-lu-la a-na KUR AN.ŠÁR.KI |
| v 123123 | 60 KASKAL.GÍD qaq-qa-ru ina a-mat AN.ŠÁR u d15 |
| v 124124 | ša ú-ma-ʾe-e-ru-in-ni |
| v 125125 | qé-reb KUR.ELAM.MA.KI e-ru-ub at-ta-lak šal-ṭiš |
| v 126126 | ina ta-a-a-ar-ti-ia šá AN.ŠÁR u d15 |
| v 127127 | ú-šá-zi-zu-in-ni EDIN ga-re-ia |
| v 128128 | URU.šu-šá-an ma-ḫa-zu GAL-ú mu-šab DINGIR.MEŠ-šú-un |
| v 129129 | a-šar pi-riš-ti-šú-un ak-šu-ud |
| v 130130 | ina a-mat AN.ŠÁR u d15 qé-reb É.GAL.MEŠ-šú |
| v 131131 | e-ru-ub ú-šib ina ḪÚL.MEŠ |
| v 132132 | ap-te-e-ma É nak-kam-a-ti-šú-nu |
| v 133133 | ša KÙ.BABBAR.MEŠ KÙ.GI.MEŠ NÍG.ŠU.MEŠ NÍG.GA.MEŠ |
| v 134134 | nu-uk-ku-mu qé-reb-šú-un |
| Column vi | |
| vi 1vi 1 | ša LUGAL.MEŠ KUR.ELAM.MA.KI maḫ-ru-u-ti |
| vi 22 | a-di LUGAL.MEŠ šá a-di ŠÀ u₄-me an-né-e |
| vi 33 | ú-paḫ-ḫi-ru iš-ku-nu |
| vi 44 | ša LÚ.KÚR šá-nam-ma e-li ia-a-ši |
| vi 55 | ŠU.II-su la ú-bi-lu ina lìb-bi |
| vi 66 | ú-še-ṣa-am-ma šal-la-tiš am-nu |
| vi 77 | KÙ.BABBAR KÙ.GI NÍG.ŠU.MEŠ NÍG.GA.MEŠ šá KUR EME.GI₇ |
| vi 88 | u URI.KI KUR.kár-ddun-ía-àš ka-la-mu |
| vi 99 | ša LUGAL.MEŠ KUR.ELAM.MA.KI maḫ-ru-u-ti |
| vi 1010 | a-di 7-šú iš-lu-lu ú-bi-lu qé-reb KUR.ELAM.MA.KI |
| vi 1111 | ṣa-ri-ru ḫuš-šu-u eš-ma-ru-u eb-bu |
| vi 1212 | ni-siq-ti NA₄.MEŠ šu-kut-tú a-qar-tú si-mat LUGAL-ti |
| vi 1313 | ša LUGAL.MEŠ KUR URI.KI maḫ-ru-u-ti |
| vi 1414 | ù mdGIŠ.NU₁₁-MU-GI.NA a-na kit-ri-šú-nu |
| vi 1515 | ip-šu-ru a-na KUR.ELAM.MA.KI |
| vi 1616 | lu-bul-tu šu-kut-tú si-mat LUGAL-u-ti |
| vi 1717 | GIŠ.til-li qa-ra-bi si-ma-nu-ú |
| vi 1818 | mim-ma e-peš MÈ si-mat ŠU.II-šú |
| vi 1919 | ú-nu-ut mut-tab-bil-ti É.GAL.MEŠ-šú ka-la-mu |
| vi 2020 | šá ina muḫ-ḫi ú-ši-bu it-ti-lu |
| vi 2121 | ina lìb-bi e-ku-lu iš-tu-u ir-mu-ku ip-pa-áš-šú |
| vi 2222 | GIŠ.GIGIR.MEŠ GIŠ.ša šá-da-di GIŠ.ṣu-um-bi |
| vi 2323 | ša iḫ-zu-ši-na ṣa-ri-ru za-ḫa-lu-u |
| vi 2424 | ANŠE.KUR.RA.MEŠ ANŠE.KUNGA.MEŠ GAL.MEŠ |
| vi 2525 | ša tal-lul-ta-šú-nu KÙ.GI KÙ.BABBAR |
| vi 2626 | áš-lu-la a-na KUR AN.ŠÁR.KI |
| vi 2727 | ziq-qur-rat URU.šu-šá-an |
| vi 2828 | ša ina a-gúr-ri NA₄.ZA.GÌN šu-pu-šat ub-bit |
| vi 2929 | ú-kap-pi-ra SI.MEŠ-šá ša pi-tiq URUDU nam-ri |
| vi 3030 | dMÙŠ.ŠÉŠ DINGIR pi-riš-ti-šú-un |
| vi 3131 | ša áš-bu ina pu-uz-ra-a-ti |
| vi 3232 | ša mam-ma-an la im-ma-ru ep-šet DINGIR-ti-šú |
| vi 3333 | dšu-mu-du dla-ga-ma-ru |
| vi 3434 | dpa-ar-ti-ki-ra dam-man-ka-si-MAŠ |
| vi 3535 | dú-du-ra-an dsa-pa-ag |
| vi 3636 | ša LUGAL.MEŠ KUR.ELAM.MA.KI |
| vi 3737 | ip-tal-la-ḫu DINGIR-us-su-un |
| vi 3838 | dra-gi-ba dsu-un-GAM-sa-ra-a |
| vi 3939 | dka-ar-sa dki-ir-sa-ma-as |
| vi 4040 | dšu-da-nu da-a-pa-ag-si-na |
| vi 4141 | dbi-la-la dpa-ni-in-tim-ri |
| vi 4242 | dsi-la-ga-ra-a dna-ab-sa-a |
| vi 4343 | dna-bir-tu dki-in-da-kar-bu |
| vi 4444 | DINGIR.MEŠ d15.MEŠ šá-a-tu-nu |
| vi 4545 | it-ti šu-kut-ti-šú-nu NÍG.GA-šú-nu ú-nu-ti-šú-nu |
| vi 4646 | a-di LÚ.šá-an-ge-e LÚ.bu-uḫ-la-le-e |
| vi 4747 | áš-lu-la a-na KUR AN.ŠÁR.KI |
| vi 4848 | 32 ALAM.MEŠ LUGAL.MEŠ |
| vi 4949 | pi-tiq KÙ.BABBAR KÙ.GI URUDU NA₄.GIŠ.NU.GAL |
| vi 5050 | ul-tu qé-reb URU.šu-šá-an |
| vi 5151 | URU.ma-dak-tu URU.ḫu-ra-di |
| vi 5252 | a-di ALAM mum-man-i-gaš DUMU mum-ba-da-ra-a |
| vi 5353 | ALAM miš-tar-na-an-ḫu-un-di |
| vi 5454 | ALAM mḫal-lu-si |
| vi 5555 | ALAM mtam-ma-ri-tu EGIR-ú |
| vi 5656 | ša ina qí-bit AN.ŠÁR u d15 e-pu-šú ARAD-u-ti |
| vi 5757 | al-qa-a a-na KUR AN.ŠÁR.KI |
| vi 5858 | ad-ka-a dALAD.MEŠ dLAMMA.MEŠ |
| vi 5959 | EN.NUN.MEŠ šu-ut É.KUR ma-la ba-šú-ú |
| vi 6060 | ú-na-as-si-ḫa AM.MEŠ na-ad-ru-u-ti |
| vi 6161 | si-mat KÁ.MEŠ-ni |
| vi 6262 | eš-re-e-ti KUR.ELAM.MA.KI |
| vi 6363 | a-di la ba-še-e ú-šal-pit |
| vi 6464 | DINGIR.MEŠ-šú d15.MEŠ-šú am-na-a a-na za-qí-qí |
| vi 6565 | GIŠ.TIR.MEŠ-šú-nu pa-az-ra-a-ti |
| vi 6666 | ša mám-ma a-ḫu-u la ú-šar-ru ina lìb-bi |
| vi 6767 | la i-kab-ba-su i-ta-ši-in |
| vi 6868 | LÚ.ERIM.MEŠ MÈ-ia qé-reb-šin e-ru-bu |
| vi 6969 | e-mu-ru pu-uz-ra-šin iq-mu-u ina dGIŠ.BAR |
| vi 7070 | ki-maḫ-ḫi LUGAL.MEŠ-šú-nu maḫ-ru-u-ti EGIR.MEŠ |
| vi 7171 | la pa-li-ḫu-u-ti AN.ŠÁR u d15 EN.MEŠ-ia |
| vi 7272 | mu-nar-ri-ṭu LUGAL.MEŠ AD.MEŠ-ia |
| vi 7373 | ap-pul aq-qur ú-kal-lim dUTU-ši |
| vi 7474 | GÌR.PAD.DU.MEŠ-šú-nu al-qa-a a-na KUR AN.ŠÁR.KI |
| vi 7575 | e-ṭém-me-šú-nu la ṣa-la-lu e-mì-id |
| vi 7676 | ki-is-pi na-aq A.MEŠ ú-za-am-me-šú-nu-ti |
| vi 7777 | ma-lak ITI 25 UD.MEŠ |
| vi 7878 | na-ge-e KUR.ELAM.MA.KI ú-šaḫ-rib |
| vi 7979 | MUN Ú.ZAG.ḪI.LI.SAR |
| vi 8080 | ú-sap-pi-ḫa EDIN-uš-šú-un |
| vi 8181 | DUMU.MUNUS.MEŠ LUGAL.MEŠ NIN₉.MEŠ LUGAL.MEŠ |
| vi 8282 | a-di qi-in-ni maḫ-ri-ti u EGIR-ti |
| vi 8383 | ša LUGAL.MEŠ KUR.ELAM.MA.KI |
| vi 8484 | LÚ.qé-pa-a-ni LÚ.ḫa-za-na-a-ti |
| vi 8585 | ša URU.MEŠ šá-a-tu-nu ma-la ak-šu-du |
| vi 8686 | LÚ.GAL GIŠ.PAN.MEŠ LÚ.GAR-nu.MEŠ |
| vi 8787 | LÚ.mu-kil KUŠ.PA.MEŠ LÚ.3.U₅.MEŠ |
| vi 8888 | LÚ.šá pét-ḫal-li.MEŠ LÚ.ERIM.MEŠ GIŠ.PAN |
| vi 8989 | LÚ.SAG.MEŠ LÚ.kit-kit-tu-ú |
| vi 9090 | gi-mir um-ma-ni ma-la ba-šu-ú |
| vi 9191 | UN.MEŠ NITA u MUNUS TUR u GAL |
| vi 9292 | ANŠE.KUR.RA.MEŠ ANŠE.KUNGA.MEŠ |
| vi 9393 | ANŠE.MEŠ GU₄.MEŠ u US₅.UDU.ḪI.A |
| vi 9494 | ša e-li BURU₅.ḪI.A ma-aʾ-du |
| vi 9595 | áš-lu-la a-na KUR AN.ŠÁR.KI |
| vi 9696 | SAḪAR.ḪI.A URU.šu-šá-an URU.ma-dak-tú URU.ḫal-te-ma-áš |
| vi 9797 | ù si-it-ti ma-ḫa-zi-šú-nu |
| vi 9898 | e-si-pa al-qa-a a-na KUR AN.ŠÁR.KI |
| vi 9999 | ina ITI UD.MEŠ KUR.ELAM.MA.KI |
| vi 100100 | a-na paṭ gim-re-e-šá as-pu-un |
| vi 101101 | ri-gim a-me-lu-ti ki-bi-is GU₄.MEŠ u ṣe-e-ni |
| vi 102102 | ši-si-it a-la-la DÙG.GA |
| vi 103103 | ú-za-am-ma-a A.GÀR.MEŠ-šú |
| vi 104104 | ANŠE.EDIN.NA.MEŠ MAŠ.DÀ.MEŠ |
| vi 105105 | ú-ma-am EDIN ma-la ba-šu-u |
| vi 106106 | par-ga-niš ú-šar-bi-ṣa qé-reb-šú |
| vi 107107 | dna-na-a ša 1 LIM 6 ME 30.ÀM 5 MU.AN.NA.MEŠ |
| vi 108108 | ta-as-bu-šú tal-li-ku tu-ši-bu |
| vi 109109 | qé-reb KUR.ELAM.MA.KI a-šar la si-ma-te-e-šá |
| vi 110110 | ù ina u₄-me-šú-ma ši-i ù DINGIR.MEŠ AD.MEŠ-šá |
| vi 111111 | tab-bu-u šu-mì a-na be-lut KUR.KUR |
| vi 112112 | ta-a-a-rat DINGIR-ti-šá tu-šad-gi-la pa-nu-u-a |
| vi 113113 | um-ma mAN.ŠÁR-DÙ-A ul-tú qé-reb KUR.ELAM.MA.KI |
| vi 114114 | lem-né-ti ú-še-ṣa-an-ni-ma |
| vi 115115 | ú-še-rab-an-ni qé-reb é-an-na |
| vi 116116 | a-mat qí-bit DINGIR-ti-šú-un |
| vi 117117 | ša ul-tú UD.MEŠ SÙ.MEŠ iq-bu-u |
| vi 118118 | e-nen-na ú-kal-li-mu UN.MEŠ EGIR.MEŠ |
| vi 119119 | ŠU.II DINGIR-ti-šá GAL-ti at-mu-uḫ |
| vi 120120 | ḫar-ra-nu i-šir-tú šá ul-lu-uṣ lìb-bi |
| vi 121121 | ta-aṣ-ba-ta a-na é-an-na |
| vi 122122 | ina ITI.GAN UD.1.KÁM ina qé-reb UNUG.KI ú-še-rib-ši-ma |
| vi 123123 | ina é-ḫi-li-an-na šá ta-ram-mu |
| vi 124124 | ú-šar-me-ši BÁRA da-ra-a-ti |
| vi 125125 | UN.MEŠ ù šal-lat KUR.ELAM.MA.KI |
| vi 126126 | ša ina qí-bit AN.ŠÁR d30 dUTU dIŠKUR |
| vi 127127 | dEN dAG d15 šá NINA.KI dGAŠAN-kid-mu-ri |
| vi 128128 | d15 šá URU.LÍMMU-DINGIR dMAŠ dU.GUR dnusku aḫ-bu-ta |
| Column vii | |
| vii 1vii 1 | re-še-e-ti a-na DINGIR.MEŠ-ia áš-ruk |
| vii 22 | LÚ.ERIM.MEŠ GIŠ.PAN GIŠ.a-ri-ti |
| vii 33 | LÚ.um-ma-ni LÚ.kit-kit-tu-u |
| vii 44 | ša áš-lu-la ul-tú qé-reb KUR.ELAM.MA.KI |
| vii 55 | e-li ki-ṣir LUGAL-ti-ia ú-rad-di |
| vii 66 | si-it-tu-ti a-na ma-ḫa-zi šu-bat DINGIR.MEŠ GAL.MEŠ |
| vii 77 | LÚ.NAM.MEŠ-ia GAL.MEŠ-ia gi-mir KARAŠ-ia |
| vii 88 | ki-ma ṣe-e-ni ú-za-ʾi-iz |
| vii 99 | mum-man-al-daš MAN KUR.ELAM.MA.KI |
| vii 1010 | ša šu-uš-mur GIŠ.TUKUL.MEŠ AN.ŠÁR u d15 |
| vii 1111 | dan-nu-ú-ti e-mu-ru |
| vii 1212 | ul-tú KUR-e a-šar mar-qí-ti-šú i-tu-ram-ma |
| vii 1313 | qé-reb URU.ma-dak-tú URU šá ina qí-bit AN.ŠÁR u d15 |
| vii 1414 | ap-pu-lu aq-qu-ru áš-lu-lu šal-lat-su |
| vii 1515 | e-ru-ub ú-šib ina si-pit-ti a-šar ki-ḫul-le-e |
| vii 1616 | šu-ut mdAG-EN-MU.MEŠ |
| vii 1717 | DUMU DUMU mdAMAR.UTU-A-SUM.NA |
| vii 1818 | ša ina a-de-ia iḫ-ṭu-ú |
| vii 1919 | iṣ-lu-ú GIŠ.ŠUDUN EN-ti-ia |
| vii 2020 | ša LUGAL.MEŠ KUR.ELAM.MA.KI |
| vii 2121 | a-na dan-nu-ti-šú iš-ku-nu |
| vii 2222 | it-tak-lu a-na mum-man-i-gaš mtam-ma-ri-tú |
| vii 2323 | min-da-bi-bi mum-man-al-daš |
| vii 2424 | LUGAL.MEŠ šá e-pu-šú be-lut KUR.ELAM.MA.KI |
| vii 2525 | LÚ.A KIN-ia šu-ut še-bul mdMUATI-EN-MU.MEŠ |
| vii 2626 | ina ma-le-e lib-ba-a-ti |
| vii 2727 | ú-ma-ʾe-er EDIN mum-man-al-daš |
| vii 2828 | mdMUATI-EN-MU.MEŠ DUMU DUMU mdAMAR.UTU-A-AŠ |
| vii 2929 | a-lak LÚ.A KIN-ia šá qé-reb KUR.ELAM.MA.KI |
| vii 3030 | e-ru-bu iš-me-e-ma |
| vii 3131 | ik-ku-ud lìb-ba-šú ir-šá-a na-kut-tu |
| vii 3232 | na-piš-ta-šú pa-nu-uš-šú ul e-qir-ma |
| vii 3333 | iḫ-šu-ḫa mi-tu-tu |
| vii 3434 | a-na LÚ.ki-ze-e ra-ma-ni-šú iq-bi-ma |
| vii 3535 | um-ma ra-si-ban-ni ina GIŠ.TUKUL |
| vii 3636 | šu-u LÚ.ki-zu-šú ina GÍR AN.BAR šib-bi-šú-nu |
| vii 3737 | up-ta-at-te-ḫu a-ḫa-meš |
| vii 3838 | mum-man-al-daš ip-làḫ-ma |
| vii 3939 | ADDA mdMUATI-EN-MU.MEŠ šu-a-tú |
| vii 4040 | ina MUN uš-ni-il-ma |
| vii 4141 | a-di SAG.DU LÚ.KI.ZU-šú |
| vii 4242 | ša ú-ra-si-bu-šú ina GIŠ.TUKUL |
| vii 4343 | a-na LÚ.A KIN-ia id-din-ma |
| vii 4444 | ú-še-bi-la-áš-šú a-di maḫ-ri-ia |
| vii 4545 | ADDA-šú a-a-din a-na qé-bé-ri |
| vii 4646 | UGU šá maḫ-ri mi-tu-us-su ut-tir-ma |
| vii 4747 | SAG.DU-su ak-kis ina GÚ mdMUATI-ŠU.II-ṣa-bat |
| vii 4848 | LÚ.d30-ma-gir mdGIŠ.NU₁₁-MU-GI.NA |
| vii 4949 | ŠEŠ nak-ri šá it-ti-šú |
| vii 5050 | a-na šum-ku-ri KUR.ELAM.MA.KI il-li-ku a-lul |
| vii 5151 | mpa-ʾe-e šá mé-eḫ-ret mum-man-al-daš |
| vii 5252 | e-pu-šu be-lut KUR.ELAM.MA.KI |
| vii 5353 | na-mur-rat GIŠ.TUKUL.MEŠ AN.ŠÁR u d15 ez-zu-ti |
| vii 5454 | ša 1-šú 2-šú 3-šú it-bu-ku UGU KUR.ELAM.MA.KI |
| vii 5555 | iḫ-su-us-ma ir-šá-a ḫi-ip lìb-bi |
| vii 5656 | ul-tú qé-reb KUR.ELAM.MA.KI in-nab-tam-ma |
| vii 5757 | iṣ-ba-ta GÌR.II LUGAL-ti-ia |
| vii 5858 | UN.MEŠ mul-taḫ-ṭe ša URU.É-mim-bi-i |
| vii 5959 | URU.ku-ṣur-te-e-in URU.BÀD-LUGAL |
| vii 6060 | URU.ma-su-tu URU.bu-bé-e |
| vii 6161 | URU.É-mun-za-a-a URU.É-mar-ra-bi |
| vii 6262 | URU.ib-rat URU.AN.ZA.GÀR-ša-mta-pa-pa |
| vii 6363 | URU.ak-bar-i-na URU.gur-ú-ki-ir-ra |
| vii 6464 | URU.du-un-nu-dšá-maš URU.ḫa-ma-nu |
| vii 6565 | URU.ka-ni-ṣu URU.ar-an-zi-a-še |
| vii 6666 | URU-na-qí-da-a-te URU.dim-tú-šá-msi-ma-me |
| vii 6767 | URU.É-mqa-ta-at-ti URU-ša-mqí-sa-a-a |
| vii 6868 | URU.su-ba-ḫe-e URU.DU₆-ḫu-um-ba |
| vii 6969 | ša ina ger-ri-ia maḫ-re-e |
| vii 7070 | ša la-pa-an GIŠ.TUKUL.MEŠ AN.ŠÁR u d15 |
| vii 7171 | dan-nu-ú-ti in-nab-tu |
| vii 7272 | iṣ-ba-tu URU.sa-al-at-ri KUR-ú mar-ṣu |
| vii 7373 | UN.MEŠ šá-a-tú-nu šá URU.sa-al-at-ri KUR-ú |
| vii 7474 | iš-ku-nu a-na dan-nu-ti-šú-un |
| vii 7575 | nam-ri-ri AN.ŠÁR u d15 EN.MEŠ-ia |
| vii 7676 | is-ḫu-up-šu-nu-ti |
| vii 7777 | ul-tu KUR-e a-šar mar-qí-ti-šú-un |
| vii 7878 | in-nab-tu-nim-ma iṣ-ba-tú GÌR.II-ia |
| vii 7979 | a-na GIŠ.PAN ak-ṣur-šú-nu-ti |
| vii 8080 | UGU ki-ṣir LUGAL-ti-ia |
| vii 8181 | ša ú-mal-lu-u ŠU.II-u-a ú-rad-di |
| vii 8282 | ina 9-e ger-ri-ia ad-ke ERIM.ḪI.A-ia |
| vii 8383 | EDIN mú-a-a-te-eʾ MAN KUR.a-ri-bi |
| vii 8484 | uš-te-eš-še-ra ḫar-ra-nu |
| vii 8585 | ša ina a-de-ia iḫ-ṭu-ú |
| vii 8686 | MUN e-pu-šu-uš la iṣ-ṣur-ú-ma |
| vii 8787 | iṣ-la-a GIŠ.ŠUDUN EN-ti-ia |
| vii 8888 | ša AN.ŠÁR e-mì-du-uš i-šu-ṭu ab-šá-a-ni |
| vii 8989 | a-na šá-al šul-mì-ia GÌR.II-šú ip-ru-us-ma |
| vii 9090 | ik-la-a ta-mar-ti man-da-ta-šú ka-bit-tú |
| vii 9191 | ki-i KUR.ELAM.MA.KI-ma da-bab sur-ra-a-te |
| vii 9292 | KUR URI.KI iš-me-e-ma |
| vii 9393 | la iṣ-ṣu-ra a-de-ia |
| vii 9494 | ia-a-ti mAN.ŠÁR-DÙ-A SANGA KÙ |
| vii 9595 | re-e-šú mut-nen-nu-ú |
| vii 9696 | bi-nu-ut ŠU.II AN.ŠÁR ú-maš-šir-an-ni-ma |
| vii 9797 | a-na ma-bi-ia-te-eʾ ma-a-mu DUMU mte-e-ri |
| vii 9898 | e-mu-qí id-din-šu-nu-ti |
| vii 9999 | a-na re-ṣu-tu mdGIŠ.NU₁₁-MU-GI.NA |
| vii 100100 | ŠEŠ nak-ri iš-pur-am-ma |
| vii 101101 | iš-ta-kan pi-i-šú |
| vii 102102 | UN.MEŠ KUR.a-ri-bi it-ti-šú ú-šam-kír-ma |
| vii 103103 | iḫ-ta-nab-ba-ta ḫu-bu-ut UN.MEŠ |
| vii 104104 | ša AN.ŠÁR d15 u DINGIR.MEŠ GAL.MEŠ |
| vii 105105 | id-din-u-ni SIPA-si-na e-pe-ši |
| vii 106106 | ù ú-mal-lu-ú ŠU.II-u-a |
| vii 107107 | ina qí-bit AN.ŠÁR u d15 ERIM.ḪI.A-ia |
| vii 108108 | ina gi-ra-a URU.a-za-ar-DINGIR |
| vii 109109 | URU.ḫi-ra-ta-a-qa-ṣa-a-a ina URU.ú-du-me |
| vii 110110 | ina né-reb URU.ia-ab-ru-du ina URU.É-mam-ma-ni |
| vii 111111 | ina na-ge-e šá URU.ḫa-ú-ri-i-na |
| vii 112112 | ina URU.mu-ʾa-a-ba ina URU.sa-ʾa-ar-ri |
| vii 113113 | ina URU.ḫa-ar-ge-e ina na-ge-e |
| vii 114114 | ša URU.ṣu-bi-ti di-ik-ta-šú |
| vii 115115 | ma-ʾa-at-tu a-duk |
| vii 116116 | ina la mì-ni áš-kun BAD₅.BAD₅-šú |
| vii 117117 | UN.MEŠ KUR.a-ri-bi ma-la it-ti-šú it-bu-u-ni |
| vii 118118 | ú-ra-as-sib ina GIŠ.TUKUL.MEŠ |
| vii 119119 | ù šu-ú la-pa-an GIŠ.TUKUL.MEŠ AN.ŠÁR dan-nu-ti |
| vii 120120 | ip-par-šid-ma in-na-bit a-na ru-qé-e-ti |
| vii 121121 | É EDIN kul-ta-ra-a-te mu-šá-bi-šú-nu |
| vii 122122 | IZI ú-šá-ḫi-zu iq-mu-u ina dGIŠ.BAR |
| vii 123123 | mú-a-a-te-eʾ ma-ru-uš-tú im-ḫur-šú-u-ma |
| vii 124124 | e-diš-ši-šú in-na-bit a-na KUR.na-ba-a-a-te |
| Column viii | |
| viii 1viii 1 | mú-a-a-te-eʾ DUMU mḫa-za-DINGIR |
| viii 22 | DUMU ŠEŠ AD šá mú-a-a-te-eʾ DUMU mbir-dIŠKUR |
| viii 33 | ša ra-man-šú iš-ku-nu |
| viii 44 | a-na LUGAL-u-ti KUR.a-ri-bi |
| viii 55 | AN.ŠÁR LUGAL DINGIR.MEŠ KUR-ú GAL-ú |
| viii 66 | ṭè-en-šú ú-šá-an-ni-ma |
| viii 77 | il-li-ka a-di maḫ-ri-ia |
| viii 88 | a-na kul-lum ta-nit-ti AN.ŠÁR |
| viii 99 | ù DINGIR.MEŠ GAL.MEŠ EN.MEŠ-ia |
| viii 1010 | an-nu kab-tu e-mid-su-ma |
| viii 1111 | GIŠ.ši-ga-ru áš-kun-šu-ma |
| viii 1212 | it-ti a-si UR.GI₇ ar-ku-us-šú-ma |
| viii 1313 | ú-šá-an-ṣir-šú KÁ.GAL MURUB₄ URU.NINA.KI |
| viii 1414 | né-reb mas-naq-ti ad-na-a-ti |
| viii 1515 | ù šu-u mam-mu-la-di MAN KUR.qé-ed-ri |
| viii 1616 | it-ba-am-ma a-na mit-ḫu-ṣi LUGAL.MEŠ KUR MAR.TU.KI |
| viii 1717 | ša AN.ŠÁR d15 u DINGIR.MEŠ GAL.MEŠ |
| viii 1818 | ú-šad-gi-lu pa-nu-u-a |
| viii 1919 | ina tukul-ti AN.ŠÁR d30 dUTU dIŠKUR |
| viii 2020 | dEN dAG d15 šá NINA.KI |
| viii 2121 | dGAŠAN-kid-mu-ri d15 šá URU.LÍMMU-DINGIR |
| viii 2222 | dMAŠ dU.GUR dnusku |
| viii 2323 | BAD₅.BAD₅-šú áš-kun |
| viii 2424 | šá-a-šú bal-ṭu-us-su it-ti fa-di-ia-a |
| viii 2525 | DAM mú-a-a-te-eʾ MAN KUR.a-ri-bi |
| viii 2626 | iṣ-ba-tu-nim-ma ú-bil-u-ni a-di ⸢maḫ⸣-ri-ia |
| viii 2727 | ina qí-bit DINGIR.MEŠ GAL.MEŠ EN.MEŠ-ia |
| viii 2828 | ul-li UR.GI₇ áš-kun-šú-ma |
| viii 2929 | ú-šá-an-ṣir-šú GIŠ.ši-ga-ru |
| viii 3030 | ina ⸢qí⸣-bit AN.ŠÁR d15 u DINGIR.MEŠ GAL.MEŠ EN.MEŠ-ia |
| viii 3131 | ša ma-bi-ia-te-eʾ ma-a-mu DUMU mte-eʾ-ri |
| viii 3232 | ša a-na re-ṣu-tu mdGIŠ.NU₁₁-MU-GI.NA |
| viii 3333 | a-na e-reb KÁ.DINGIR.RA.KI il-li-ku |
| viii 3434 | re-ṣe-e-šú a-duk BAD₅.BAD₅-šú áš-kun |
| viii 3535 | si-it-tu-ti šá qé-reb KÁ.DINGIR.RA.KI e-ru-bu |
| viii 3636 | ina su-un-qí ḫu-šaḫ-ḫi |
| viii 3737 | e-ku-lu UZU a-ḫa-meš |
| viii 3838 | a-na šu-zu-ub ZI-tì-šú-nu |
| viii 3939 | ul-tú qé-reb KÁ.DINGIR.RA.KI ú-ṣu-nim-ma |
| viii 4040 | e-mu-qí-ia šá ina UGU mdGIŠ.NU₁₁-MU-GI.NA šak-nu |
| viii 4141 | šá-ni-ia-a-nu BAD₅.BAD₅-šú iš-ku-nu-ma |
| viii 4242 | šu-ú e-diš ip-par-šid-ma |
| viii 4343 | a-na šu-zu-ub ZI-tì-šú iṣ-ba-tú GÌR.II-ia |
| viii 4444 | re-e-mu ar-ši-šu-u-ma |
| viii 4545 | a-de-e ni-iš DINGIR.MEŠ GAL.MEŠ ú-šá-az-kír-šú-ma |
| viii 4646 | ku-um mú-a-a-te-eʾ DUMU mḫa-za-DINGIR |
| viii 4747 | a-na LUGAL-u-ti KUR.a-ri-bi áš-kun-šú |
| viii 4848 | ù šu-u it-ti KUR.na-ba-a-a-ta-a-a |
| viii 4949 | pi-i-šú iš-kun-ma |
| viii 5050 | ni-iš DINGIR.MEŠ GAL.MEŠ la ip-làḫ-ma |
| viii 5151 | iḫ-tab-ba-ta ḫu-bu-ut mi-ṣir KUR-ia |
| viii 5252 | ina tukul-ti AN.ŠÁR d30 dUTU dIŠKUR |
| viii 5353 | dEN dAG d15 šá NINA.KI |
| viii 5454 | dšar-rat-kid-mu-ri d15 šá URU.LÍMMU-DINGIR |
| viii 5555 | dMAŠ dU.GUR dnusku |
| viii 5656 | mna-at-nu MAN KUR.na-ba-a-a-ti |
| viii 5757 | ša a-šar-šú ru-ú-qu |
| viii 5858 | ša mú-a-a-te-eʾ ina maḫ-ri-šú in-nab-tu |
| viii 5959 | iš-me-ma da-na-an AN.ŠÁR šá ú-tak-kil-an-ni |
| viii 6060 | ša ma-te-e-ma a-na LUGAL.MEŠ AD.MEŠ-ia |
| viii 6161 | LÚ.A KIN-šú la iš-pu-ra |
| viii 6262 | la iš-a-lu šu-lum LUGAL-ti-šú-un |
| viii 6363 | ina pu-luḫ-ti GIŠ.TUKUL.MEŠ AN.ŠÁR ka-ši-du-u-ti |
| viii 6464 | is-sa-an-qa-am-ma iš-a-la šu-lum LUGAL-ti-ia |
| viii 6565 | ù ma-bi-ia-te-eʾ DUMU mte-eʾ-ri |
| viii 6666 | la ḫa-sis ṭa-ab-ti |
| viii 6767 | la na-ṣir ma-mit DINGIR.MEŠ GAL.MEŠ |
| viii 6868 | da-bab sur-ra-a-te it-ti-ia id-bu-ub-ma |
| viii 6969 | pi-i-šú it-ti mna-at-ni |
| viii 7070 | LUGAL KUR.na-ba-a-a-ti iš-kun-ma |
| viii 7171 | e-mu-qí-šú-nu id-ku-u-ni |
| viii 7272 | a-na ti-ib ḪUL-tim a-na mi-ṣir-ia |
| viii 7373 | ina qí-bit AN.ŠÁR d30 dUTU dIŠKUR |
| viii 7474 | dEN dAG d15 šá NINA.KI |
| viii 7575 | dšar-rat-kid-mu-ri d15 šá LÍMMU-DINGIR.KI |
| viii 7676 | dMAŠ dU.GUR dnusku |
| viii 7777 | ERIM.ḪI.A-ia ad-ke EDIN ma-bi-ia-te-eʾ |
| viii 7878 | uš-te-eš-še-ra ḫar-ra-nu |
| viii 7979 | ÍD.IDIGNA u ÍD.BURANUN.KI |
| viii 8080 | ina ILLU-ši-na gap-ši šal-meš lu-u e-bi-ru |
| viii 8181 | ir-du-ú ur-ḫi ru-qu-u-ti |
| viii 8282 | e-tel-lu-ú ḫur-šá-a-ni šá-qu-u-ti |
| viii 8383 | iḫ-tal-lu-pu GIŠ.TIR.MEŠ šá ṣu-lul-ši-na rap-šú |
| viii 8484 | bi-rit GIŠ.MEŠ GAL.MEŠ gi-iṣ-ṣi |
| viii 8585 | GIŠ.GEŠTIN.GÍR.MEŠ ḫar-ra-an GIŠ.ed-de-ti |
| viii 8686 | e-te-et-ti-qu šal-mì-iš |
| viii 8787 | mad-bar a-šar ṣu-um-me lap-lap-ti |
| viii 8888 | ša MUŠEN AN-e la i-šá-ʾu-u qé-reb-šú |
| viii 8989 | ANŠE.EDIN.NA.MEŠ MAŠ.DÀ.MEŠ |
| viii 9090 | la ir-te-ʾu-ú ina lìb-bi |
| viii 9191 | 1 ME KASKAL.GÍD qaq-qa-ru TA NINA.KI |
| viii 9292 | URU na-ram diš-tar ḫi-rat dEN.LÍL |
| viii 9393 | EGIR mú-a-a-te-eʾ MAN KUR.a-ri-bi |
| viii 9494 | ù ma-bi-ia-te-eʾ šá it-ti e-mu-qí |
| viii 9595 | KUR.na-ba-a-a-ti-a-a il-li-ka |
| viii 9696 | ir-du-u il-li-ku ina ITI.SIG₄ ITI d30 |
| viii 9797 | DUMU reš-tu-u a-šá-re-du šá dEN.LÍL |
| viii 9898 | UD.25.KAM šá-da-ḫu šá dbe-let-KÁ.DINGIR.RA.KI |
| viii 9999 | ka-bit-ti DINGIR.MEŠ GAL.MEŠ |
| viii 100100 | ul-tú URU.ḫa-da-at-ta-a at-tu-muš |
| viii 101101 | ina URU.la-ri-ib-da É BÀD šá NA₄.MEŠ |
| viii 102102 | ina UGU gu-ub-ba-a-ni šá A.MEŠ |
| viii 103103 | at-ta-ad-di uš-man-ni |
| viii 104104 | ERIM.ḪI.A-ia A.MEŠ a-na maš-ti-ti-šú-nu iḫ-bu-ma |
| viii 105105 | ir-du-ú il-li-ku |
| viii 106106 | qaq-qar ṣu-um-me a-šar lap-lap-ti |
| viii 107107 | a-di URU.ḫu-ra-ri-na bi-rit URU.ia-ar-ki |
| viii 108108 | ù URU.a-za-al-la ina mad-bar áš-ru ru-u-qu |
| viii 109109 | a-šar ú-ma-am EDIN la ib-ba-šu-u |
| viii 110110 | ù MUŠEN AN-e la i-šak-ka-nu qin-nu |
| viii 111111 | BAD₅.BAD₅ LÚ.i-sa-am-me-eʾ |
| viii 112112 | LÚ.GIŠ.DA šá da-tar-sa-ma-a-a-in |
| viii 113113 | ù KUR.na-ba-a-a-ta-a-a áš-kun |
| viii 114114 | UN.MEŠ ANŠE.MEŠ ANŠE.A.AB.BA.MEŠ u US₅.UDU.ḪI.A |
| viii 115115 | ḫu-bu-us-su-nu ina la mì-ni aḫ-bu-ta |
| viii 116116 | 8 KASKAL.GÍD qaq-qa-ru |
| viii 117117 | ERIM.ḪI.A-ia lu it-tal-la-ku šal-ṭiš |
| viii 118118 | šal-mì-iš lu i-tu-ru-nim-ma |
| viii 119119 | ina URU.a-za-al-li lu iš-tu-u A.MEŠ neš-bé-e |
| viii 120120 | TA lìb-bi URU.a-za-al-la |
| viii 121121 | a-di URU.qu-ra-ṣi-ti |
| viii 122122 | 6 KASKAL.GÍD qaq-qa-ru a-šar ṣu-um-me |
| viii 123123 | lap-lap-ti ir-du-u il-li-ku |
| viii 124124 | LÚ.aʾ-lu šá da-tar-sa-ma-a-a-in |
| Column ix | |
| ix 1ix 1 | ù LÚ.qid-ra-a-a šá mú-a-a-te-eʾ |
| ix 22 | DUMU mbir-dIŠKUR MAN KUR.a-ri-bi al-me |
| ix 33 | DINGIR.MEŠ-šú AMA-šú NIN₉.MEŠ-šú DAM-su |
| ix 44 | qin-nu-šú UN.MEŠ KUR.qé-ed-ri ka-la-mu |
| ix 55 | ANŠE.MEŠ ANŠE.A.AB.BA.MEŠ u ṣe-e-ni |
| ix 66 | ma-la ina tukul-ti AN.ŠÁR u d15 |
| ix 77 | EN.MEŠ-ia ik-šu-da ŠU.II-a-a |
| ix 88 | ḫar-ra-an KUR.di-maš-qa ú-šá-áš-ki-na še-pu-uš-šú-un |
| ix 99 | ina ITI.NE ITI MUL.PAN |
| ix 1010 | ma-rat d30 qa-rit-tu |
| ix 1111 | UD.3.KAM nu-bat-tú šá LUGAL DINGIR.MEŠ dAMAR.UTU |
| ix 1212 | ul-tú URU.di-maš-qa at-tu-muš |
| ix 1313 | 6 KASKAL.GÍD qaq-qa-ru mu-ši-tu ka-la-šá |
| ix 1414 | ar-de-e-ma al-lik a-di URU.ḫul-ḫu-li-ti |
| ix 1515 | ina KUR.ḫu-uk-ri-na KUR-ú mar-ṣu |
| ix 1616 | LÚ.aʾ-lu šá ma-bi-ia-te-eʾ DUMU mte-⸢eʾ⸣-ri |
| ix 1717 | KUR.qid-ra-a-a ak-šu-ud |
| ix 1818 | BAD₅.BAD₅-šú áš-kun áš-lu-la šal-lat-su |
| ix 1919 | ma-bi-ia-te-eʾ ma-a-am-mu |
| ix 2020 | ina qí-bit AN.ŠÁR u d15 EN.MEŠ-ia |
| ix 2121 | ina MURUB₄ tam-ḫa-ri bal-ṭu-us-su-un ú-ṣab-bit ina ŠU.II |
| ix 2222 | ŠU.II u GÌR.II bi-re-tú AN.BAR ad-di-šú-nu-ti |
| ix 2323 | it-ti šal-lat KUR-šú-un |
| ix 2424 | al-qa-áš-šú-nu-ti a-na KUR AN.ŠÁR.KI |
| ix 2525 | mun-nab-ti šá la-pa-an GIŠ.TUKUL.MEŠ-ia in-nab-tu |
| ix 2626 | ip-la-ḫu iṣ-ba-tú KUR.ḫu-uk-ku-ru-na KUR-ú mar-ṣu |
| ix 2727 | ina URU.ma-an-ḫa-ab-bi URU.ap-pa-ru |
| ix 2828 | URU.te-nu-qu-ri URU.ṣa-a-a-ú-ra-an |
| ix 2929 | ⸢URU⸣.mar-qa-na-a URU.sa-ra-te-in |
| ix 3030 | URU.en-zi-kar-⸢me URU⸣.ta-aʾ-na-a URU.sa-ra-a-qa |
| ix 3131 | a-šar kup-pi nam-ba-ʾi šá A.MEŠ ma-la ba-šú-u |
| ix 3232 | EN.NUN.MEŠ ina muḫ-ḫi ú-šá-an-ṣir-ma |
| ix 3333 | A.MEŠ TI.LA ZI-tì-šú-nu ak-la |
| ix 3434 | maš-ti-tu ú-šá-qir a-na pi-i-šú-un |
| ix 3535 | ina ṣu-um-me lap-lap-ti iš-ku-nu na-piš-tú |
| ix 3636 | si-it-tu-u-ti ANŠE.GAM.MAL.MEŠ ru-ku-pi-šú-nu ú-šal-li-qu |
| ix 3737 | a-na ṣu-um-me-šú-nu iš-ta-at-tu-u ÚŠ.MEŠ u A.MEŠ par-šú |
| ix 3838 | ša qé-reb KUR-e e-lu-ú |
| ix 3939 | e-ru-bu e-ḫu-zu mar-qí-tu |
| ix 4040 | e-du ul ip-par-šid mul-taḫ-ṭu ul ú-ṣi ina ŠU.II-ia |
| ix 4141 | a-šar mar-qí-ti-šú-nu ŠU.II ik-šu-us-su-nu-ti |
| ix 4242 | UN.MEŠ NITA u MUNUS ANŠE.MEŠ ANŠE.A.AB.BA.MEŠ GU₄.MEŠ u ⸢ṣe⸣-e-ni |
| ix 4343 | ina la mì-ni áš-lu-la a-na KUR AN.ŠÁR.⸢KI⸣ |
| ix 4444 | nap-ḫar KUR-ia šá AN.ŠÁR id-di-na ka-la-mu |
| ix 4545 | a-na si-ḫir-ti-šá um-dal-lu-u a-na paṭ gim-ri-šá |
| ix 4646 | ANŠE.A.AB.BA.MEŠ ki-ma ṣe-e-ni ú-par-⸢ri⸣-is |
| ix 4747 | ú-za-ʾi-iz a-na UN.MEŠ KUR AN.ŠÁR.KI |
| ix 4848 | ina qa-bal-ti KUR-ia ANŠE.A.AB.BA.MEŠ ina 1 GÍN ⸢1/2⸣ [GÍN] kas-⸢pi⸣ |
| ix 4949 | i-šam-mu ina KÁ ma-ḫi-ri |
| ix 5050 | MUNUS.áš-tam-mu ina ni-id-ni LÚ.LÚNGA ina ḫa-pe-e |
| ix 5151 | LÚ.NU.GIŠ.KIRI₆ ina ki-ši-šú šá Ú.SAR |
| ix 5252 | im-da-na-ḫa-ru ANŠE.A.AB.BA.MEŠ u a-me-lu-tu |
| ix 5353 | mú-a-a-te-eʾ a-di ERIM.ḪI.A-šú |
| ix 5454 | ša a-de-ia la iṣ-ṣu-ru |
| ix 5555 | ša la-pa-an GIŠ.TUKUL.MEŠ AN.ŠÁR EN-ia |
| ix 5656 | ip-par-ši-du in-nab-tu ma-ḫar mna-at-na |
| ix 5757 | ú-šam-qit-su-nu-ti dèr-ra qar-du |
| ix 5858 | su-un-qu ina bi-ri-šú-nu iš-šá-kin-ma |
| ix 5959 | a-na bu-ri-šú-nu e-⸢ku⸣-lu UZU DUMU.MEŠ-šú-nu |
| ix 6060 | ar-ra-a-ti ma-la ina a-de-e-šú-nu šaṭ-ra |
| ix 6161 | ina pit-ti i-ši-mu-šú-nu-ti AN.ŠÁR d30 dUTU |
| ix 6262 | dIŠKUR dEN dAG d15 šá NINA.KI |
| ix 6363 | ⸢dšar⸣-rat-kid-mu-ri d15 šá LÍMMU-DINGIR.KI |
| ix 6464 | dMAŠ dU.GUR dnusku |
| ix 6565 | ba-ak-ru su-ḫi-ru GU₄.AMAR UDU.NIM |
| ix 6666 | ina UGU 7.TA.ÀM mu-še-ni-qa-a-⸢te⸣ e-ni-qu-u-ma |
| ix 6767 | ši-iz-bu la ú-šab-bu-u ka-ra-sún |
| ix 6868 | UN.MEŠ KUR.a-ri-bi 1-en a-na 1-en |
| ix 6969 | iš-ta-ʾa-a-lu₄ a-ḫa-meš |
| ix 7070 | ina UGU mi-né-e ki-i ep-še-e-tú an-ni-tú ḪUL-tú |
| ix 7171 | im-ḫu-ru KUR.a-ru-bu |
| ix 7272 | um-ma áš-šú a-de-e GAL.MEŠ šá AN.ŠÁR la ni-iṣ-ṣu-ru |
| ix 7373 | ni-iḫ-ṭu-ú ina MUN mAN.ŠÁR-DÙ-A |
| ix 7474 | LUGAL na-ram lìb-bi dEN.LÍL |
| ix 7575 | dNIN.LÍL ri-im-tú dEN.LÍL.LÁ-i-tu |
| ix 7676 | ka-dir-ti i-la-a-ti |
| ix 7777 | ša it-ti da-num dEN.LÍL šit-lu-ṭa-at man-za-zu |
| ix 7878 | ú-na-kip LÚ.KÚR.MEŠ-ia ina SI.MEŠ-šá gaš-ra-a-te |
| ix 7979 | d15 a-ši-bat URU.LÍMMU-DINGIR |
| ix 8080 | dGIŠ.BAR lit-bu-šat me-lam-me na-šá-a-ta |
| ix 8181 | UGU KUR.a-ri-bi i-za-an-nun nab-li |
| ix 8282 | dèr-ra qar-du a-nun-tu ku-uṣ-ṣur-ma |
| ix 8383 | ú-ra-as-si-pa ga-re-ia |
| ix 8484 | dMAŠ šil-ta-ḫu qar-ra-du GAL-u DUMU dEN.LÍL ga-áš-ru |
| ix 8585 | ina uṣ-ṣi-šú zaq-ti ú-par-ri-iʾ ZI-tim LÚ.KÚR.MEŠ-ia |
| ix 8686 | dnusku SUKKAL na-aʾ-du mu-šá-pu-u EN-u-ti |
| ix 8787 | ša ina qí-bit AN.ŠÁR dNIN.LÍL qa-rit-tú d⸢be-let-URU⸣.LÍMMU-DINGIR |
| ix 8888 | Á.II-a-a il-lik-ma ⸢iṣ⸣-ṣu-ra LUGAL-u-ti |
| ix 8989 | mé-eḫ-ret ERIM.ḪI.A-ia iz-ziz-ma ú-šam-qí-ta ga-re-ia |
| ix 9090 | ti-bu-ut GIŠ.TUKUL.MEŠ AN.ŠÁR u d15 |
| ix 9191 | DINGIR.MEŠ GAL.MEŠ EN.MEŠ-ia |
| ix 9292 | ša ina e-peš MÈ il-li-ku re-ṣu-ti |
| ix 9393 | ERIM.ḪI.A.MEŠ ša mú-a-a-te-eʾ |
| ix 9494 | iš-mu-u-ma UGU-šú ib-bal-ki-tu |
| ix 9595 | šu-ú ip-làḫ-ma |
| ix 9696 | ul-tu É in-nab-tu ú-ṣa-am-ma |
| ix 9797 | ina tukul-ti AN.ŠÁR d30 dUTU dIŠKUR |
| ix 9898 | dEN dAG d15 šá NINA.KI |
| ix 9999 | dšar-rat-kid-mu-ri d15 šá URU.LÍMMU-DINGIR |
| ix 100100 | dMAŠ dU.GUR dnusku |
| ix 101101 | ŠU.II ik-šu-us-su-ma |
| ix 102102 | ú-ra-áš-šú a-na KUR AN.ŠÁR.KI |
| ix 103103 | ina ni-iš ŠU.II-ia šá a-na ka-šad LÚ.KÚR.MEŠ-ia |
| ix 104104 | am-da-ḫa-ru AN.ŠÁR u dNIN.LÍL |
| ix 105105 | ina GIŠ.ḫu-ut-né-e ma-še-ri ṣi-bit ŠU.II-ia |
| ix 106106 | UZU.ME.ZÉ-šú ap-lu-uš |
| ix 107107 | ina la-aḫ-ši-šú at-ta-di ṣer-re-tú |
| ix 108108 | ul-li UR.GI₇ ad-di-šú-ma |
| ix 109109 | ina KÁ.GAL ṣi-it dUTU-ši šá MURUB₄ URU.NINA.KI |
| ix 110110 | ša né-reb mas-naq-ti ad-na-a-te na-bu-u zi-kir-šá |
| ix 111111 | ú-šá-an-ṣir-šú GIŠ.ši-ga-ru |
| ix 112112 | a-na da-lál ta-nit-ti AN.ŠÁR d15 |
| ix 113113 | ù DINGIR.MEŠ GAL.MEŠ EN.MEŠ-ia |
| ix 114114 | re-e-mu ar-ši-šú-ma ú-bal-liṭ nap-šat-su |
| ix 115115 | ina ta-a-a-ar-ti-ia URU.ú-šu-u |
| ix 116116 | ša ina a-ḫi tam-tim na-da-ta šu-bat-su ak-šu-ud |
| ix 117117 | UN.MEŠ URU.ú-šu-u šá a-na LÚ.NAM.MEŠ-šú-nu la sa-an-qu |
| ix 118118 | la i-nam-di-nu man-da-at-tú |
| ix 119119 | na-dan šat-ti-šú-un a-duk |
| ix 120120 | ina ŠÀ UN.MEŠ la kan-šu-u-ti šip-ṭu áš-kun |
| ix 121121 | DINGIR.MEŠ-šú-nu UN.MEŠ-šú-nu áš-lu-la a-na KUR AN.ŠÁR.KI |
| ix 122122 | UN.MEŠ URU.ak-ku-u la kan-šu-ti a-nir |
| ix 123123 | ADDA.MEŠ-šú-nu ina GIŠ.ga-ši-ši a-lul |
| ix 124124 | si-ḫir-ti URU ú-šal-mi |
| ix 125125 | si-it-tu-ti-šú-nu al-qa-a a-na KUR AN.ŠÁR.KI |
| ix 126126 | a-na ki-ṣir ak-ṣur-ma |
| ix 127127 | UGU ERIM.ḪI.A-ia ma-aʾ-da-a-ti |
| ix 128128 | ša AN.ŠÁR i-qí-šá ú-rad-di |
| Column x | |
| x 1x 1 | ma-a-mu DUMU mte-e-ri |
| x 22 | it-ti ma-bi-ia-te-eʾ ŠEŠ-šú |
| x 33 | i-zi-zu-ma it-ti ERIM.ḪI.A-ia e-pu-šú MÈ |
| x 44 | ina MURUB₄ tam-ḫa-ri bal-ṭu-us-su ina ŠU.II aṣ-bat |
| x 55 | ina NINA.KI URU EN-ti-ia KUŠ-šú áš-ḫu-uṭ |
| x 66 | mum-man-al-daš MAN KUR.ELAM.MA.KI |
| x 77 | ša ul-tú ul-la AN.ŠÁR u d15 EN.MEŠ-ia |
| x 88 | iq-bu-ú a-na e-peš ARAD-ti-ia |
| x 99 | ina qí-bit DINGIR-ti-šú-nu ṣir-tu šá la in-nen-nu-u |
| x 1010 | EGIR-nu KUR-su UGU-šú ib-bal-kit-ma |
| x 1111 | la-pa-an saḫ-maš-ti ARAD.MEŠ-šú šá ú-šab-šú-u UGU-šú |
| x 1212 | e-diš-ši-šú ip-par-šid-ma iṣ-ba-ta KUR-ú |
| x 1313 | ul-tu KUR-e É mar-qí-ti-šú |
| x 1414 | a-šar it-ta-nap-raš-ši-du |
| x 1515 | ki-ma SÚR.DÙ.MUŠEN a-bar-šu-ma |
| x 1616 | bal-ṭu-us-su al-qa-áš-šú a-na KUR AN.ŠÁR.KI |
| x 1717 | mtam-ma-ri-tú mpa-ʾe-e mum-man-al-daš |
| x 1818 | ša EGIR a-ḫa-meš e-pu-šu be-lut KUR.ELAM.MA.KI |
| x 1919 | ša ina e-mu-qí AN.ŠÁR u d15 EN.MEŠ-ia |
| x 2020 | ú-šak-ni-šá a-na GIŠ.ŠUDUN-ia |
| x 2121 | mú-a-a-te-eʾ MAN KUR.a-ri-bi |
| x 2222 | ša ina qí-bit AN.ŠÁR u d15 BAD₅.BAD₅-šú áš-ku-nu |
| x 2323 | [ul-tu] ⸢KUR⸣-šú al-qa-⸢áš⸣-šú a-na KUR AN.ŠÁR.KI |
| x 2424 | ul-tu a-na na-saḫ UDU.SISKUR.MEŠ e-lu-u |
| x 2525 | ina é-maš-maš šu-bat EN-ti-šú-un |
| x 2626 | ma-ḫar dNIN.LÍL AMA DINGIR.MEŠ GAL.MEŠ |
| x 2727 | ḫi-ir-tu na-ram-ti AN.ŠÁR |
| x 2828 | e-pu-šu GARZA.MEŠ É á-ki-it |
| x 2929 | GIŠ.ŠUDUN GIŠ.šá šá-da-di ú-šá-aṣ-bit-su-nu-ti |
| x 3030 | a-di KÁ É.KUR iš-du-du ina KI.TA-ia |
| x 3131 | al-bi-in ap-pi at-ta-ʾi-id DINGIR-us-su-un |
| x 3232 | ú-šá-pa-a dan-nu-us-su-un ina UKKIN ⸢ERIM⸣.ḪI.A-ia |
| x 3333 | ša AN.ŠÁR d30 dUTU dIŠKUR |
| x 3434 | dEN dAG d15 šá NINA.KI |
| x 3535 | dšar-rat-kid-mu-ri d15 šá LÍMMU-DINGIR.KI |
| x 3636 | dMAŠ dU.GUR dnusku šá la kan-šu-ti-ia |
| x 3737 | ú-šak-ni-šú a-na GIŠ.ŠUDUN-ia |
| x 3838 | ina li-i-ti ù da-na-a-ni |
| x 3939 | ú-šá-zi-zu-in-ni EDIN LÚ.KÚR.MEŠ-ia |
| x 4040 | m15-BÀD LUGAL KUR.ur-ar-ṭi |
| x 4141 | ša LUGAL.MEŠ AD.MEŠ-šú a-na AD.MEŠ-ia |
| x 4242 | iš-ta-nap-par-u-ni ŠEŠ-ú-tú |
| x 4343 | e-nen-na m15-BÀD da-na-nu ep-še-e-tú |
| x 4444 | ša DINGIR.MEŠ GAL.MEŠ i-ši-mu-in-ni iš-me-e-ma |
| x 4545 | ki-ma šá DUMU a-na AD-šú iš-ta-nap-pa-ra EN-u-tú |
| x 4646 | ù šu-u ki-i pi-i an-nim-ma |
| x 4747 | iš-ta-nap-pa-ra um-ma lu-u šul-mu |
| x 4848 | a-na LUGAL EN-ia |
| x 4949 | pal-ḫi-iš kan-šiš ta-mar-ta-šú ka-bit-tú |
| x 5050 | uš-ta-né-eb-ba-la a-di maḫ-ri-ia |
| x 5151 | ina u₄-me-šú É UŠ-u-ti te-né-e É.GAL šá qé-reb NINA.KI |
| x 5252 | [URU] ṣi-i-ru na-ram dNIN.LÍL |
| x 5353 | [ša md]30-PAP.MEŠ-SU MAN KUR AN.ŠÁR.KI AD AD DÙ-ia |
| x 5454 | ⸢ud⸣-di-šu a-na mu-šab LUGAL-ti-šú |
| x 5555 | É ⸢UŠ⸣-u-ti šu-a-tú ina ḪÚL.MEŠ ri-šá-a-ti |
| x 5656 | ⸢la-ba⸣-riš il-lik e-na-ḫa É.GAR₈.MEŠ-šú |
| x 5757 | a-na-ku mAN.ŠÁR-DÙ-A LUGAL GAL LUGAL dan-nu |
| x 5858 | LUGAL kiš-šá-ti LUGAL KUR AN.ŠÁR.KI LUGAL kib-rat LÍMMU-tim |
| x 5959 | áš-šú qé-reb É UŠ-u-ti šu-a-tú ar-ba-a |
| x 6060 | AN.ŠÁR d30 dUTU dIŠKUR dEN dAG |
| x 6161 | d15 šá NINA.KI dšar-rat-kid-mu-ri |
| x 6262 | d15 šá LÍMMU-DINGIR.KI dGAŠAN-GARZA.MEŠ dMAŠ dU.GUR dnusku |
| x 6363 | DUMU LUGAL-ú-ti iṣ-ṣu-ru |
| x 6464 | ṣu-lul-šú-nu DÙG.GA AN.DÙL-la-šú-nu ša šá-la-me |
| x 6565 | it-ru-ṣu UGU-ia |
| x 6666 | ⸢ul⸣-tu ina GIŠ.GU.ZA AD DÙ-ia ú-ši-bu |
| x 6767 | e-te-né-ep-pu-šú be-lut KUR.KUR ù UN.MEŠ DAGAL.MEŠ |
| x 6868 | ka-a-a-an pu-us-su-rat ḫa-de-e |
| x 6969 | ša ka-šad LÚ.KÚR.MEŠ-ia ú-pa-sa-ru-in-ni qé-reb-šú |
| x 7070 | ina ma-a-a-al mu-ši du-um-mu-qa MÁŠ.GI₆.MEŠ-u-a |
| x 7171 | ina ša še-e-ri ba-nu-ú e-ger-ru-u-a |
| x 7272 | maš-ta-ku šu-a-tú mu-šal-li-mu EN.MEŠ-šú šu-ú-ma |
| x 7373 | DINGIR.MEŠ GAL.MEŠ ši-mat-su i-ši-mu a-na MUNUS.SIG₅ |
| x 7474 | an-ḫu-us-su ad-ke |
| x 7575 | áš-šú ru-up-pu-uš tal-lak-ti-šú a-na si-ḫir-ti-šú aq-qur |
| x 7676 | 50.ÀM ti-ib-ki maš-kán ši-kit-ti-šú |
| x 7777 | pi-tiq-tu ap-tiq tam-la-a uš-mal-li |
| x 7878 | la-pa-an eš-re-e-ti DINGIR.MEŠ GAL.MEŠ |
| x 7979 | EN.MEŠ-ia ap-làḫ-ma tam-la-a šu-a-tú |
| x 8080 | ši-kit-ta-šú ul ú-šaq-qí ma-aʾ-diš |
| x 8181 | ina ITI DÙG.GA UD ŠE.GA EDIN tam-le-e šu-a-tú |
| x 8282 | UŠ₈-šú ad-di ú-kin SIG₄-su |
| x 8383 | ina KAŠ.SAG u GEŠTIN ka-lak-ka-šú ab-lulul |
| x 8484 | am-ḫa-ṣa šal-la-ar-šú |
| x 8585 | ina GIŠ.ṣu-um-bi.MEŠ KUR.ELAM.MA.KI šá ina qí-bit DINGIR.MEŠ GAL.MEŠ |
| x 8686 | EN.MEŠ-ia áš-lu-la |
| x 8787 | a-na e-peš É ri-du-u-ti šu-a-tú |
| x 8888 | UN.MEŠ KUR-ia ina lìb-bi i-zab-bi-lu SIG₄.ḪI.A |
| x 8989 | LUGAL.MEŠ KUR.a-ri-bi ša ina a-de-ia iḫ-ṭu-u |
| x 9090 | ša ina MURUB₄ tam-ḫa-ri bal-ṭu-us-su-nu ú-ṣab-bi-tú ina ŠU.II |
| x 9191 | a-na e-peš É ri-du-u-ti šu-a-tú |
| x 9292 | GIŠ.al-lu tup-šik-ku ú-šá-áš-ši-šú-nu-ti |
| x 9393 | ú-šá-az-bi-la ku-dúr-ri |
| x 9494 | la-bi-in SIG₄.ḪI.A-šú za-bi-lu tup-šik-ki-šú |
| x 9595 | ina e-le-li nin-gu-u-ti ub-ba-lu u₄-um-šú-un |
| x 9696 | ina ḪÚL.MEŠ ri-šá-a-te ul-tú UŠ₈-šú a-di gaba-dib-bi-šú ar-ṣip |
| x 9797 | UGU šá maḫ-ri šu-bat-su ú-rap-piš ú-šar-ri-ḫa ep-še-te-e-šú |
| x 9898 | GIŠ.ÙR.MEŠ GIŠ.EREN MAḪ.MEŠ tar-bit KUR.si-ra-ra KUR.lab-na-na |
| x 9999 | ú-šat-ri-ṣa UGU-šú GIŠ.IG.MEŠ li-ia-a-ri šá e-re-si-na DÙG.GA |
| x 100100 | me-ser ZABAR ú-rak-kis ú-rat-ta-a KÁ.MEŠ-šú |
| x 101101 | GIŠ.tim-me MAḪ.MEŠ URUDU nam-ru ú-ḫal-lip-ma |
| x 102102 | ḫi-it-ti KÁ É ḫi-la-ni-šú e-mid |
| x 103103 | É UŠ-u-ti šu-a-tú mu-šab LUGAL-ti-ia a-na si-ḫir-ti-šú |
| x 104104 | ú-šak-lil lu-le-e ú-mal-li GIŠ.KIRI₆.MAḪ šá gi-mir GIŠ.MEŠ |
| x 105105 | GURUN NÍG.SA.SA.ḪI.A ka-la-mu az-qu-pa i-ta-te-e-šú |
| x 106106 | ši-pir ep-še-e-te-šú ag-mur-ma UDU.SISKUR.MEŠ taš-ri-iḫ-ti |
| x 107107 | aq-qa-a a-na DINGIR.MEŠ EN.MEŠ-ia ina ḪÚL.MEŠ ri-šá-a-te ú-šar-ri-šú |
| x 108108 | e-ru-ub qé-reb-šú ina za-mar tak-né-e a-na EGIR UD.MEŠ ina LUGAL.MEŠ |
| x 109109 | DUMU.MEŠ-ia šá AN.ŠÁR u d15 a-na be-lut KUR u UN.MEŠ i-nam-bu-u zi-kir-šú |
| x 110110 | e-nu-ma É UŠ-u-ti šu-a-tú i-lab-bi-ru-u-ma in-na-ḫu |
| x 111111 | an-ḫu-us-su lu-ud-diš MU.SAR-ú ši-ṭir MU-ia AD-ia |
| x 112112 | AD AD-ia NUMUN da-ru-u šá LUGAL-u-ti li-mur-ma Ì.GIŠ lip-šu-uš |
| x 113113 | UDU.SISKUR BAL-qí it-ti MU.SAR-e ši-ṭir MU-šú liš-kun |
| x 114114 | DINGIR.MEŠ GAL.MEŠ ma-la ina MU.SAR-e an-né-e šaṭ-ru |
| x 115115 | ki-ma ia-a-ti-ma liš-ru-ku-uš da-na-nu u li-i-tú |
| x 116116 | ša MU.SAR-ú ši-ṭir MU-ia AD-ia AD AD-ia ib-ba-tú |
| x 117117 | it-ti MU.SAR-i-šú la i-šak-ka-nu |
| x 118118 | AN.ŠÁR d30 dUTU dIŠKUR dEN dAG d15 šá NINA.KI |
| x 119119 | dšar-rat-kid-mu-ri d15 šá URU.LÍMMU-DINGIR dMAŠ dU.GUR dnusku |
| x 120120 | de-e-ni it-ti ni-bit MU-ia li-di-nu-uš |
| x 121A121A | ITI.GU₄.SI.SÁ UD.15.KÁM |
| x 122A122A | lim-mu mdUTU-KALAG-in-an-ni LÚ.GAR.KUR KUR URI.KI |
| x 121B121B | ITI.BÁRA.ZAG.GAR UD.1.KAM |
| x 122B122B | lim-mu mdUTU-KALAG-in-an-ni LÚ.GAR.KUR KUR URI.KI |
| x 121C121C | ITI.KIN-dINANNA UD.28.⸢KÁM⸣ |
| x 122C122C | lim-me mdUTU-KALAG-in-an-ni |
| x 123C123C | LÚ.NAM KÁ.DINGIR.RA.KI |
| x 121D121D | ITI.GU₄.⸢SI⸣.[SÁ UD.x.KÁM] |
| x 122D122D | li-⸢i⸣-[mu ...] |
| x 123D123D | ⸢LÚ⸣.[...] |
| x 121E121E | [...] |
| x 122E122E | [...] (traces) |