Ashurbanipal 010

a-na-ku ^mAN.ŠÁR-DÙ-A LUGAL GAL-u

LUGAL dan-nu LUGAL ŠÚ LUGAL KUR AN.ŠÁR.⸢KI⸣

LUGAL kib-rat LÍMMU-tim

È lìb-bi ^mAN.ŠÁR-PAP-AŠ MAN KUR AN.ŠÁR.KI

GÌR.NÍTA KÁ.DINGIR.RA.KI

LUGAL KUR EME.GI₇ ù URI.KI

ŠÀ.BAL.BAL ^md30-PAP.MEŠ-SU

LUGAL ŠÚ LUGAL KUR AN.ŠÁR.KI

DINGIR.MEŠ GAL.MEŠ ina UKKIN-šú-nu

ši-mat SIG₅-tim i-ši-mu šim-ti

e-li LUGAL.MEŠ a-šib pa-rak-ki

zi-kir MU-ia ú-šar-ri-ḫu

ú-šar-bu-ú be-lu-ú-ti

é-ḫur-sag-gal-kur-kur-ra

É AN.ŠÁR EN-ia ú-šak-lil

É.GAR₈.MEŠ-šú ú-šal-bi-šá KÙ.GI KÙ.BABBAR

GIŠ.tim-me MAḪ.MEŠ me-ser KÙ.BABBAR ú-rak-kis

ina KÁ ḫi-ṣib KUR.KUR az-qu-up

AN.ŠÁR ina é-ḫur-sag-gu-la ú-še-rib-ma

ú-šar-ma-a BÁRA da-ra-a-ti

é-sag-íl É.GAL DINGIR.MEŠ DÙ-uš

ú-šak-li-la GIŠ.ḪUR.MEŠ-šú

^dEN ^dGAŠAN-MU ^dbe-let-KÁ.DINGIR.RA.KI

^dé-a ^dDI.KU₅ ul-⸢tu qé⸣-[reb] é-šár-ra

ú-bil ú-⸢še-rib⸣

qé-reb šu-an-⸢na⸣.KI

BÁRA.MAḪ-ḫu šu-[bat] DINGIR-ti-šú ṣir-ti

50 GUN ⸢za-ḫa-lu⸣-ú eb-bu

⸢a⸣-[na a-gúr-ri] ⸢ap⸣-ti-iq-ma

⸢ú-rab⸣-ba-⸢a⸣ EDIN-uš-šú

⸢ú⸣-še-piš-ma GIŠ.⸢er⸣-me a-nu GIŠ.MES.MÁ.KAN.NA

⸢iṣ⸣-ṣi da-re-e šá šit-nu-nu šá-ma-me-eš

⸢34⸣ GUN 20 MA.NA KÙ.GI ḪUŠ.A

⸢kip-pat⸣-su ú-šal-biš

ú-⸢dan-ni-na⸣ rik-se-e-šú

⸢e⸣-li ^d⸢AMAR⸣.UTU EN GAL-e

⸢ṣu-lul⸣-šú at-ru-uṣ-ma

ú-kin ta-ra-an-šú

[GIŠ.GIGIR] ⸢ṣir⸣-tu ru-kub ^dAMAR.UTU

[e]-⸢tel⸣-li DINGIR.MEŠ EN EN.EN

[ina] ⸢KÙ⸣.GI KÙ.BABBAR NA₄.MEŠ ni-siq-ti

[ag]-mu-ra nab-nit-sa

[a-na] ⸢^dAMAR⸣.UTU LUGAL kiš-šat AN-e u KI-tim

[sa]-⸢pi⸣-in LÚ.KÚR.MEŠ-ia

[a-na] ⸢ši⸣-rik-ti áš-ruk

⸢GIŠ⸣.[NÁ] ⸢GIŠ⸣.MES.MÁ.KAN.NA iṣ-ṣi da-re-e

ša ⸢pa-šal⸣-lu lit-bu-šat

NA₄.MEŠ [ni]-⸢siq⸣-ti za-aʾ-na-at

a-na ma-a-a-al tak-né-e ^dEN ^dGAŠAN-MU

šá-kan ḫa-šá-di e-peš ru-ʾa-a-me

nak-liš e-pu-uš

ina ⸢ká⸣-[ḫi]-⸢li⸣-sù maš-tak ^dzar-pa-ni-tum

ša ku-uz-bu sa-al-ḫu

ad-di

4 AM.MEŠ KÙ.BABBAR ek-du-u-ti

na-ṣi-ru ki-bi-is LUGAL-u-ti-ia

ina KÁ ṣi-it ^dUTU-ši

ina KÁ ^dLAMMA-RA.BI

ina KÁ é-zi-da šá qé-reb

bár-sipa.KI ul-ziz

é-maš-maš é-gašan-kalam-ma KÙ.BABBAR KÙ.GI

ú-za-ʾi-in lu-le-e ú-mal-li

^dšar-rat-kid-mu-ri šá ina ug-gat lìb-bi-šá

at-man-šá e-zi-bu

ú-ši-bu a-šar la si-ma-a-ti-šá

ina BALA-ia dam-qí šá AN.ŠÁR iš-ru-ka

tar-šá-a sa-li-mu

a-na šuk-lul DINGIR-ti-šá ṣir-ti

šur-ru-ḫu mi-se-e-šá šu-qu-ru-ti

ina MÁŠ.GI₆ ši-pir maḫ-ḫe-e

iš-ta-nap-pa-ra ka-a-a-na

^dUTU ù ^dIŠKUR áš-al-ma

e-pu-lu-in-ni an-nu ke-e-nu

si-mat DINGIR-ti-šá GAL-ti ú-šar-ri-iḫ

ú-še-šib-ši ina BÁRA.MAḪ-ḫi

šu-bat da-ra-a-ti

par-ṣe-e-šá šu-qu-ru-ti ú-kin-ma

ú-šal-li-ma mi-se-e-šá

^dIM.DUGUD.MUŠEN.MEŠ GIŠ.šu-ri-in-ni

a-na TI.LA ZI.MEŠ-ia

ina KÁ é-galam-⸢mes⸣

É ^dU.GUR šá URU.tar-bi-ṣi ⸢az⸣-qu-up

a-di a-di-ni a-bi la im-ma-al-la-du

um-mì a-lit-ti la ba-na-at ina ⸢lìb⸣-[bi] AMA-šá

a-na e-peš é-ḫúl-ḫúl ⸢iz-kur ni⸣-bit MU-ia

^d30 šá ib-na-an-ni a-⸢na⸣ LUGAL-u-ti

um-ma ^mAN.ŠÁR-DÙ-A É.KUR ⸢šú⸣-a-tu

⸢ip⸣-[pu-uš-ma] ⸢qé-reb⸣-šú

ú-šar-man-ni [pa-rak] ⸢da⸣-ra-a-⸢ti⸣

[a-mat ^d]⸢30⸣ šá ul-tu UD.MEŠ SÙ.⸢MEŠ⸣

[iq-bu-u e]-nen-⸢na⸣ [ú]-⸢kal⸣-[lim]

⸢UN⸣.MEŠ EGIR.⸢MEŠ⸣

[É ^d30 šá ^md]⸢sál⸣-ma-nu-MAŠ

[A ^maš-šur-PAP-IBILA] ⸢LUGAL⸣ pa-ni

maḫ-⸢ri-ia⸣ [e]-⸢pu-šu⸣

la-ba-riš ú-šá-lik-ma

ú-šad-gi-la pa-nu-u-a

ina a-mat ^d30 ^d⸢nusku⸣ an-ḫu-us-su

ad-ke e-li ša u₄-me pa-ni

šu-bat-su ú-rap-piš

ul-tu UŠ₈-šú a-di gaba-dib-bé-e-šú

ar-ṣip ú-šak-lil

é-me-lám-an-na É ^dnusku SUKKAL MAḪ

ša LUGAL pa-ni maḫ-ri-ia la e-pu-šú

ab-na-a qé-⸢reb⸣-šú

GIŠ.ÙR.MEŠ GIŠ.EREN MAḪ.MEŠ

ú-šat-ri-ṣa e-⸢li⸣-[šú-un]

GIŠ.IG.MEŠ GIŠ.li-ia-a-⸢ri⸣

me-ser KÙ.BABBAR ⸢ú⸣-rak-[kis]

ú-rat-ta-a KÁ.⸢MEŠ-šú-un⸣

2 AM.MEŠ KÙ.BABBAR mu-nak-⸢ki⸣-[pu]

ga-re-⸢ia⸣ ina at-man ^d30

EN-ia ⸢ul⸣-ziz 2 ^dlàḫ-⸢me⸣

eš-ma-⸢re⸣-e šá ti-iṣ-⸢bu⸣-[tú]

GIŠ.šu-ri-in-ni

mu-šal-li-mu kib-si ⸢LUGAL-ti⸣-ia

mu-še-ri-bu ḫi-ṣib KUR-i u tam-tim

ina KÁ é-ḫúl-ḫúl ul-ziz

ŠU.II ^d30 ^d⸢nusku⸣ aṣ-bat

ú-še-rib ú-še-šib ina ⸢BÁRA⸣ da-ra-a-ti

é-dim-gal-kalam-ma É AN.GAL

⸢šá⸣ qé-reb BÀD.AN.KI

a-na si-ḫi-ir-⸢ti⸣-šú ⸢ar⸣-ṣip ú-šak-lil

É ^d30 ^dnin-⸢gal ^dUTU ^d⸣a-a

⸢ša⸣ qé-reb NINA.KI ša ^mAN.ŠÁR-PAP-AŠ

MAN KUR AN.ŠÁR.KI AD DÙ-ia e-pu-šú

il-li-ku la-⸢ba⸣-riš É.KUR šú-a-tú

e-na-aḫ-ma i-qu-pa É.GAR₈.⸢MEŠ⸣-šú

É.KUR šu-a-tú a-na si-ḫir-ti-šú

ar-ṣip ú-šak-lil ul-la-a re-ši-šú

GIŠ.ÙR.MEŠ GIŠ.ŠUR.MÌN MAḪ.MEŠ

ú-šat-ri-ṣa ta-ra-an-šú

GIŠ.IG.MEŠ GIŠ.li-ia-a-ri

⸢ša⸣ e-re-si-na DÙG.GA

ú-rat-ta-a KÁ.MEŠ-šú

ul-tu É.KUR šú-a-tú ú-šak-li-lu

⸢ú⸣-qat-tu-u ag-mu-ra ši-pir-šú

[^d]30 ^dnin-gal ^dnusku ⸢^d⸣UTU u ^da-a

[DINGIR].⸢MEŠ⸣ tik-le-ia ina qer-bi-šú

⸢ú⸣-še-rib-ma ú-⸢šar⸣-me

⸢BÁRA⸣ da-ra-a-ti ⸢eš⸣-re-e-ti

KUR AN.ŠÁR.⸢KI⸣ KUR URI.KI ana ⸢si-ḫir⸣-te-ši-na

ar-ṣip ú-šak-lil

mim-ma si-mat É.KUR ma-la GÁL-u

ša KÙ.BABBAR KÙ.GI e-pu-uš

e-⸢li⸣ ša LUGAL.MEŠ AD.MEŠ-ia

⸢ú-rad⸣-di DINGIR.MEŠ GAL.MEŠ

⸢tik-le⸣-ia ina at-ma-na-a-te-šú-nu

ṣi-ra-a-te ú-še-šib-šú-⸢nu⸣-ti

UDU.SISKUR.MEŠ taš-ri-iḫ-⸢ti⸣

ma-ḫar-šu-un aq-qí

ú-šam-ḫi-ra kàd-⸢ra⸣-[a]-a

sat-tuk-ku gi-nu-ú e-li ša [u₄]-⸢me⸣

ul-lu-ti ú-šá-⸢tir-ma⸣

ar-ku-us ALAM LUGAL-[ti]-⸢ia⸣

ša KÙ.BABBAR KÙ.GI URUDU ⸢nam-ri⸣

ina ši-pir ^dnin-á-gal ⸢^d⸣[kù-si₂₂-bàn-da]

^dnin-kur-ra nak-liš ú-⸢še⸣-[piš-ma]

a-na mu-ter-ri-ši TI.LA-⸢ia⸣

ma-ḫar DINGIR.MEŠ ti-ik-le-⸢ia⸣

ú-kin na-an-za-⸢sún⸣

ul-tu ṣe-ḫe-ri-ia a-di ra-bé-ia

áš-te-ʾa-a áš-rat DINGIR.MEŠ ⸢GAL.MEŠ⸣

LÚ.šá-an-gu-ti iḫ-šu-⸢ḫu⸣

i-ram-mu na-dan zi-bi-⸢ia⸣

^dIŠKUR ŠÈG.MEŠ-šú ú-maš-ši-ra

^dé-a ú-paṭ-ṭi-ra IDIM.MEŠ-⸢šú⸣

šat-ti-šam-ma ina ṭuḫ-di mi-šá-⸢ri⸣

ar-te-ʾa-a ba-ʾu-lat ^dEN.⸢LÍL⸣

DINGIR.MEŠ GAL.MEŠ šá ap-tal-la-ḫu DINGIR-us-⸢su⸣-[un]

dun-nu zik-ru-ú-[tu]

e-mu-qí ṣi-ra-a-⸢ti⸣

ú-šat-<li>-mu-in-ni

KUR.KUR la ma-gi-re-⸢ia⸣

ina ŠU.II-ia im-nu-⸢ú⸣

ú-šam-ṣu-in-ni ma-la lìb-bi-[ia]

ul-tu tam-tim e-⸢liti⸣

a-di tam-tim šap-⸢liti⸣

ša LUGAL.MEŠ AD.MEŠ-⸢ia⸣

ir-te-ed-du-ú a-na-ku lu-u ⸢ar⸣-de

⸢ma⸣-lak ITI UD.20.⸢KÁM⸣

ina MURUB₄ tam-tim u na-ba-[li]

mi-iṣ-ru e-li ša LUGAL.MEŠ ⸢AD⸣.[MEŠ-ia]

ú-rad-di-ma a-[bel]

UN.MEŠ a-ši-bu-ti KUR.KUR šá-a-ti-na

ú-šak-ni-šá a-na GIŠ.ŠUDUN-ia

GUN man-da-at-tú šat-ti-šam-ma

ú-⸢kin⸣ EDIN-uš-šú-un

ina qí-bit AN.ŠÁR ^dNIN.LÍL

LUGAL.MEŠ a-šib pa-rak-ki

ú-na-áš-šá-qu GÌR.II-ia

ma-al-ki GAL.MEŠ šá ṣi-taš u ši-la-an

a-na kit-ri-šú-nu ú-pa-qu-u-ni

ina tukul-ti DINGIR.⸢MEŠ⸣ [GAL].MEŠ EN.MEŠ-ia

qé-reb KUR.ELAM.⸢MA.KI⸣ e-ru-ub

BAD₅.BAD₅-šú-nu ina la mì-ni

áš-kun at-tal-lak šal-ṭiš

^mum-man-al-da-si ti-ib

MÈ-ia dan-ni e-dur-ma

me-ra-nu-uš-šú in-na-bit-ma

iṣ-ba-ta šá-da-a

14 URU.MEŠ dan-nu-ti mu-šab LUGAL-ti-šú

ù URU.MEŠ TUR.MEŠ šá ni-i-ba la i-šu-ú

a-di 20.ÀM URU.MEŠ

ina na-ge-e šá URU.ḫu-un-⸢nir⸣

ina UGU mì-iṣ-ri šá URU.ḫi-da-lu

ak-šu-ud URU.ba-ši-mu

ù URU.MEŠ šá li-me-ti-šú

ap-pul aq-qur šá UN.MEŠ a-šib

lìb-bi-šú-un ka-mar-šú-nu áš-⸢kun⸣

ú-šab-bir DINGIR.MEŠ-šú-un

ú-šap-ši-iḫ ka-bat-ti EN EN.EN

DINGIR.MEŠ-šú ^d15.MEŠ-šú NÍG.ŠU-šú NÍG.GA-šú

UN.MEŠ TUR u GAL áš-lu-la ana KUR AN.ŠÁR.KI

60 KASKAL.GÍD qaq-qa-ru

qé-reb KUR.ELAM.MA.KI ú-šaḫ-rib

MUN Ú.ZAG.ḪI.LI.SAR

ú-sap-pi-ḫa ⸢EDIN-uš⸣-šú-un

^dna-na-<a> ša ⸢1⸣ LIM 6 ME ⸢30.ÀM⸣ 5

MU.AN.⸢NA.MEŠ⸣ ta-as-bu-su-ma

tal-⸢li⸣-[ku] tu-ši-bu

[qé-reb KUR].⸢ELAM⸣.MA.KI a-šar

[la si]-⸢ma⸣-a-te₉-e-šá

ù ina u₄-me-šú-ma ši-i

ù DINGIR.MEŠ AD.MEŠ-šá

ib-bu-u šu-mì ana be-⸢lut⸣ KUR.KUR

ta-a-a-rat EN-u-ti-šá

tu-šad-gi-la pa-⸢nu⸣-u-a

um-ma ^mAN.ŠÁR-DÙ-A

ul-tú qé-reb KUR.ELAM.MA.KI

ú-še-ṣa-an-ni-ma

ú-še-rab-an-ni

⸢qé⸣-reb é-an-na

⸢a⸣-mat qí-bit DINGIR-ti-šú-un

ša ul-tú UD.MEŠ SÙ.MEŠ iq-bu-u

⸢e-nen⸣-na ú-⸢kal⸣-li-mu UN.MEŠ EGIR.MEŠ

ŠU.II DINGIR-ti-šá GAL-ti at-mu-uḫ

ḫar-ra-nu i-šir-tu šá ul-lu-uṣ

lìb-bi ta-aṣ-ba-ta a-na é-an-na

ina qé-reb UNUG.KI ú-še-rib-ši-ma

ina é-ḫi-li-an-na šá ta-ram-mu

ú-šar-me-ši pa-rak da-⸢ra⸣-a-ti

ina u₄-me-šú É á-ki-it ^d15 GAŠAN-ia

ša qé-reb NINA.KI

ša ki-ma AMA a-lit-ti tu-⸢rab⸣-ba-an-ni

LÚ.KÚR.MEŠ-ia i-⸢na-ru⸣

gi-mir ma-al-ki ú-šak-⸢ni⸣-šá

a-na ⸢GÌR⸣.II-ia ša ^mLUGAL-GI.⸢NA⸣

AD AD AD DÙ-ia

ŠÀ.BAL.BAL ^m⸢EN⸣-ba-ni DUMU ^ma-da-si

ša du-ru-⸢ug⸣-šú bal-til.KI

e-pu-šú ⸢la-ba⸣-riš il-lik

mi-qit-[ta]-šá ad-ke

ina ITI ⸢šal-me⸣ u₄-me še-me-e

at-ta-ad-⸢di⸣ tem-me-en-šá

ina a-gúr-ri NA₄.ZÚ NA₄.ZA.GÌN

É á-ki-it šú-a-tu

a-na si-ḫir-ti-šá ar-ṣip

ú-šak-lil lu-le-e ú-mal-⸢li⸣

AN.ŠÁR u ^d⸢NIN⸣.LÍL DINGIR.MEŠ tik-le-ia

mu-šam-ṣu-ú ma-la lìb-bi-ia

qé-reb-šá ú-še-rib-ma

ú-še-pi-⸢šá⸣ i-sin-ni É á-ki-it

UDU.SISKUR.MEŠ taš-ri-iḫ-ti

ma-ḫar-šu-un aq-qí

ú-šam-ḫi-ra kàd-ra-a-a

AN.ŠÁR ù ^dNIN.LÍL

ša ul-tu ṣe-ḫe-ri-ia

ú-rab-bu-in-ni

iṣ-ṣu-ru LUGAL-u-ti

qé-reb É á-ki-it šú-a-tú ir-ru-bu-ma

ip-pu-šú i-sin-ni ḪÚL.MEŠ

ina bu-un-ni-šú-nu nam-ru-ti

ina ni-iš IGI.II.MEŠ-šú-nu SIG₅.MEŠ

šá i-bar-ra-a ⸢kib⸣-ra-a-ti

^mAN.ŠÁR-[DÙ-A] ⸢LUGAL⸣ mi-gir lìb-bi-šú-nu

e-⸢piš⸣ [É á-ki-it] šu-a-tu

ḫa-⸢diš⸣ [lit]-tap-la-su

UD.[MEŠ-ia li]-šá-ri-ku

⸢lu⸣-[uš-bi] ⸢bu⸣-ʾa-a-ru

SUḪUŠ GIŠ.[GU.ZA LUGAL-ti]-⸢ia⸣ lu-kin-nu

lu-šal-⸢bi⸣-[ru] BALA.MEŠ-ia

LÚ.KÚR.MEŠ-[ia li]-né-e-ru

li-šam-qí-⸢tu⸣ ga-re-ia

ina tukul-ti-šú-nu ra-bi-ti

e-ma a-qab-bu-u la-be-el

a-šar ú-ṣar-ra-mu

lik-šu-da ŠU.II-a-a

a-na ⸢EGIR⸣ u₄-me DUMU.MEŠ DUMU DUMU.MEŠ

DUMU.MEŠ ù DUMU.MEŠ

ina LUGAL.MEŠ DUMU.MEŠ-ia

šá AN.ŠÁR u ^dNIN.LÍL ut-tu-šu-ma

a-na be-lut KUR u ⸢UN⸣.MEŠ

i-nam-bu-ú ⸢zi-kir⸣-šú

e-nu-ma É á-ki-⸢it šu⸣-a-tú

i-lab-bi-ru-ma ⸢in⸣-na-ḫu

an-ḫu-us-su lu-ud-diš

MU.SAR-ú ši-ṭir MU-ia

li-mur-ma Ì.GIŠ lip-šu-⸢uš⸣

UDU.SISKUR BAL-[qí]

a-na áš-ri-šú lu-⸢ter⸣

DINGIR.MEŠ GAL.MEŠ ma-la ina MU.SAR-e an-⸢né⸣-[e šá-aṭ-ru]

LUGAL-ut-ka lik-tar-⸢ra-bu⸣

⸢li⸣-iṣ-ṣu-⸢ru BALA⸣.[MEŠ-ka]

⸢ša MU^?.SAR^?⸣-[u ši]-⸢ṭir⸣ [MU-ia ib-ba-tú]

ina mim-ma ⸢ši⸣-[pir] ⸢ni⸣-kil-⸢ti⸣ ú-ḫal-⸢la⸣-[qu]

it-ti MU.SAR-[e]

ši-ṭir MU-šú la i-šak-⸢ka-nu⸣

DINGIR.MEŠ GAL.MEŠ

ša AN-e ù KI-tim

LUGAL-us-su lis-ki-pu

MU-šú NUMUN-šú ina KUR lu-ḫal-li-qu

ITI.KIN UD.24.[KÁM]

lim-me ^mdMUATI-MAN-PAP.MEŠ-šú LÚ.[NAM]

KUR.sa-mir-i-[na]

ITI.NE.NE.NÍG UD.6.KÁM

lim-me ^mdMUATI-MAN-PAP.MEŠ-⸢šú LÚ⸣.NAM

KUR.⸢sa-mir-i-na⸣