Esarhaddon 128

a-na ^dUN.GAL NIBRU.KI ma-al-kát uzu-mú-a.KI ṣir-ti ti-iz-qar-ti šá-ru-uḫ-tu DINGIR.MEŠ ^din-nin-ni

GAŠAN šur-bu-tu šá a-na LUGAL mi-ig-ri-šá ba-an-ti-iš it-ta-na-as-ḫa-ru BALA-šú ú-šal-ba-ru i-šar-ra-ku-uš da-na-nu ù li-i-ti

šar-rat NIBRU.KI a-ši-bat é-bára-dúr-gar-ra É mu-kin šu-bat LUGAL-ú-tu GAŠAN GAL-ti GAŠAN-šú

^mAN.ŠÁR-ŠEŠ-SUM.NA LUGAL GAL-ú LUGAL dan-nu LUGAL ŠÚ LUGAL KUR aš-šur.KI LUGAL kib-rat er-bet-ti GÌR.NÍTA TIN.TIR.KI LUGAL KUR šu-me-ri u URI.KI i-tu-ut kun lìb-bi ^dEN.LÍL

šá ul-tu ṣe-ḫe-ri-šú ana AN.ŠÁR ^dEN.LÍL ^d30 ^dUTU ^dIŠKUR ^dAMAR.UTU ^dAG ^dU.GUR u DINGIR.MEŠ GAL.MEŠ EN.MEŠ-šú it-tak-lu-ú-ma ni-iz-mat-su ú-šak-šid-uš i-mu-ru da-na-an-šú-un

a-na nu-uḫ-ḫu lìb-bi DINGIR-ti-šú-nu u nu-up-pu-uš ka-bat-ti-šú-nu GIŠ.MI-šú-nu da-ru-ú it-ru-ṣu UGU-šú

ina e-muq AN.ŠÁR ^dEN.LÍL ^dEN u DUMU ^dEN DINGIR.MEŠ ti-ik-li-šú kul-lat KUR.KUR i-bé-lu-ma gi-mir ma-li-ku ú-šak-ni-šu še-pu-uš-šu

ba-nu-ú É AN.ŠÁR mu-ud-diš é-kur e-piš é-sag-íl u TIN.TIR.KI mu-šak-lil eš-re-e-ti u ma-ḫa-zu mu-kin sat-tuk-ku

LUGAL šá i-na UD.MEŠ BALA-šú EN GAL-ú ^dAMAR.UTU ana TIN.TIR.KI sa-li-mu ir-šu-ú ina é-sag-íl É.GAL-šú ir-mu-ú šu-[bat]-su

^da-num GAL-ú ana URU-šú BÀD.AN.KI u É-šú é-dim-gal-kalam-ma ú-še-ri-bu-ma ú-še-ši-bu pa-rak da-ra-a-ti

DINGIR.MEŠ KUR.KUR šal-lu-tu šu-kut-ta-šú-nu ud-di-šu ul-tu qé-reb KUR aš-šur.KI a-na áš-ri-šú-nu ú-ter-šú-nu-ti-ma ú-ki-nu is-qu-uš-šú-un

NUN en-qu it-pe-šu ḫa-sis kal šip-ri šá ina ma-ḫa-zu GAL.MEŠ si-ma-a-ti iš-tak-ka-nu uš-te-ši-ru šu-luḫ-ḫu

DUMU ^md30-ŠEŠ.MEŠ-eri-ba LUGAL ŠÚ LUGAL KUR aš-šur.KI DUMU ^mLUGAL-GIN LUGAL KUR aš-šur.KI GÌR.NÍTA TIN.TIR.KI LUGAL KUR šu-me-ri u URI.KI-i

li-ip-li-pi da-ru-ú šá ^mdEN-ba-ni DUMU ^ma-da-si LUGAL KUR aš-šur.KI NUNUZ bal-til.KI šu-qu-ru NUMUN LUGAL-ú-tu ki-sít-ti ṣa-a-ti

i-nu-šu é-bára-dúr-gar-ra É ^dUN.GAL NIBRU.KI GAŠAN GAL-ti GAŠAN-ia šá LUGAL maḫ-ri i-pu-šu la-ba-riš il-lik-ma i-qu-ú-pu É.GAR₈.MEŠ-šú

áš-ra-ti-šú áš-te-eʾ-e ma-qit-ta-šú as-suḫ te-me-en-šú ú-ṣab-bi-ma GIM si-ma-ti-šú la-bi-ra-a-ti ina ši-pir ^dkulla ar-ṣip ú-šak-lil ki-ma KUR-i re-ši-šú ul-li

^dUN.GAL NIBRU.KI GAŠAN šur-bu-tu GAŠAN-ia ši-pir šu-a-tu ḫa-diš lip-pa-lis-ma a-mat SIG₅-tì-ia liš-šá-kin šap-tuš-šá TIN UD.MEŠ SÙ.MEŠ še-bé-e lit-tu-ú-tu DÙG-ub UZU u ḫu-ud lìb-bi li-šim ši-ma-a-ti

ma-ti-ma i-na aḫ-rat UD.MEŠ NUN EGIR-ú šá i-na u₄-me BALA-šú É šu-a-tu in-na-ḫu-ma ma-qit-ti i-raš-šu-ú áš-ra-ti-šú liš-te-eʾ-e ma-qit-ta-šú lik-šìr

MU.SAR-ú ši-ṭir MU-ia Ì.GIŠ lip-šu-uš UDU.SÍSKUR BAL-qí ina áš-ri-šú liš-kun ik-ri-bi-šú DINGIR.MEŠ i-šem-mu-ú ur-rak UD.MEŠ ú-rap-pa-áš kim-ti

šá MU.SAR-ú ši-ṭir MU-ia ina ši-pir ni-kil-ti ib-ba-tu lu-ú a-šar-šú ú-nak-ka-ru

^dUN.GAL NIBRU.KI GAŠAN GAL-ti ag-giš lik-kil-me-šú-ma MU-šú NUMUN-šú ina nap-ḫar KUR.KUR li-ḫal-liq

šá é-bára-dúr-gar-ra