[This cuneiform text was computer-generated from a transliteration. See this page for trouble-shooting tips.]
| 1 | 𒁹𒀭𒂗𒍪𒋀𒎌𒌷𒁀 𒈗 𒃲 𒈗 𒆗𒉡 𒈗 𒆳 𒀸𒋩𒆠 𒈗 𒆷 𒃻𒈾𒀭 𒊑𒂍𒌝 𒆠𒂊𒉡 𒈪𒄫 𒀭𒎌 𒃲𒎌 |
𒈾𒈲 𒆤𒋾 𒊏𒀪𒅎 𒈪𒃻𒊑 𒂊𒄫 𒌑𒊓𒀀𒋾 𒀀𒌨 𒋰𒁍𒌓 𒀀𒆠𒄿 𒊓𒄭𒊒 𒁮𒋡𒀀𒋾 | |
𒀉𒈝 𒁍𒈠𒈝 𒍣𒅗𒊒 𒃼𒁺 𒀀𒃻𒈩 𒆗 𒈠𒀠𒆠 𒊐𒁍 𒆷𒀪𒀉 𒆷 𒈠𒄀𒊑 𒈬𒉺𒅁𒊑𒄣 𒍝𒈠𒀀𒉌 | |
𒀭𒀸𒋩 𒆳𒌑 𒃲𒌑 𒈗𒌓 𒆷 𒃻𒈾𒀭 𒌑𒆳𒅆𒈠𒀭𒉌𒈠 𒌋𒅗 𒄀𒂇 𒀀𒈨 𒉺𒊩𒆠 𒌑𒊬𒁀𒀀 𒄑𒆪𒎌𒅀 | |
| 5 | 𒄿𒈾 𒊕 𒈗𒋾𒅀 𒊭 𒄿𒈾 𒄑𒄖𒍝 𒁁𒇻𒋾 𒌑𒅆𒁍𒈠 𒌦𒎌 𒆳 𒀸𒋩𒆠 𒀾𒋫𒀮𒉺𒊒 𒄿𒈾 𒌨𒈨𒂊 𒅇 𒊓𒇷𒈨 |
𒁹𒀭𒀫𒌓𒌉𒍑𒋧𒈾 𒈗 𒆳𒃸𒂄𒅀𒀾 𒀀𒀀𒁍 𒅆𒉡 𒁀𒊏𒉡𒌑 𒅗𒆜 𒋩𒊏𒀀𒋾 𒂊𒄫 𒇷𒄷𒄭𒋾 𒊭 𒀭𒉣𒆷𒋗 𒆤𒌅 | |
𒁹𒋗𒄙𒀭𒈾𒄷𒁺 𒇽𒂊𒆷𒈬𒌑 𒀀𒈾 𒅁𒊒𒋾𒋙 𒄑𒄯𒈠 𒆬𒄀 𒆬𒌓 𒉌𒋝𒋾 𒎎𒎌 𒌑𒆳𒅆𒋗𒈠 𒂊𒌁𒊑𒋢 𒆤𒊒 | |
𒁹𒅎𒁀𒀊𒉺 𒇽𒌉𒋫𒉡𒋙 𒀉𒋾 𒄀𒄫 𒌝𒈠𒈾𒋾𒋙 𒁹𒋫𒀭𒈾𒀀𒉡 𒇽𒐈𒄷𒋛 𒌋 𒇽𒃲 𒆠𒈲𒎌 𒀀𒁲 𒁹𒀭𒌋𒄥𒈾𒈲 𒇽𒋢𒌅𒌋 𒀀𒌨 𒈤𒊑𒋙𒌦 | |
𒐕 𒅆 𒇽𒂟𒎌 𒄑𒉼 𒄑𒊍𒈠𒊑𒂊 𒐍 𒈨 𒐐 𒄑𒍮𒌝𒁉 𒌋 𒅆 𒈫 𒈨 𒀲𒆳𒊏𒎌 𒀉𒋾 𒋗𒉡𒋾𒈠 𒀀𒈾 𒆳 𒅴𒂠 𒅇 𒌵𒆠 𒅖𒁍𒊏 𒊑𒍮𒊻𒋢 | |
| 10 | 𒅇 𒋗𒌑 𒇽𒆗𒁺 𒅆𒉡 𒂊𒄫 𒅆𒌨𒁴 𒆰 𒉌𒅕𒋾 𒀕𒆠 𒌓𒀕𒆠 𒋀𒀕𒆠 𒉣𒆠 𒆰𒀕𒆠 𒆠𒄑𒋝𒆠 𒌷𒉌𒁁𒀭𒆷𒄖𒁕 |
𒆳𒂍𒁹𒅀𒆠𒉌 𒆳𒂍𒁹𒀀𒈮𒅗𒀀𒉌 𒆳𒂍𒁹𒀀𒋻𒀀𒉌 𒆳𒂍𒁹𒊓𒀪𒀠 𒆳𒂍𒁹𒁖𒆪𒊑 𒋛𒆟𒋾 𒇽𒆗𒁲 𒈠𒆷 𒁀𒋗𒌑 | |
𒊭 𒄘 𒀀𒇉 𒇽𒌅𒀪𒈬𒈾 𒇽𒊑𒄭𒄷 𒇽𒅀𒁖𒄣 𒇽𒄃𒊑𒂊 𒇽𒈠𒇷𒄷 | |
𒊭 𒄘 𒀀𒇉𒋢𒊐𒉿 𒇽𒄖𒊒𒈬 𒇽𒌑𒁍𒈝 𒇽𒁕𒈬𒉡 𒇽𒃵𒁍𒇻 𒇽𒄭𒅔𒁕𒊒 𒇽𒊒𒀪𒌋𒀀 𒇽𒁍𒄣𒁺 | |
𒊭 𒄘 𒀀𒇉𒌓𒄒𒉣𒆠 𒇽𒄩𒄠𒊏𒀀𒉡 𒇽𒄩𒂵𒊏𒀀𒉡 𒇽𒈾𒁀𒌅 𒇽𒇷𒀪𒋫𒀀𒀀 𒇽𒀀𒊏𒈬 𒃻 𒆷 𒄿𒁺𒌑 𒈪𒌅𒌈 | |
| 15 | 𒂗𒆤𒆠 𒀸𒁁𒆠 𒀫𒁕𒆠 𒆧𒆠 𒌷𒄯𒊕𒌧𒈠 𒆍𒀭𒊏𒆠 𒁈𒉺𒇻𒆠 𒄘𒂃𒀀𒆠 𒄀𒂇 𒆳𒃸𒂄𒅀𒀾 𒅖𒋼𒎙 𒌑𒉺𒆟𒈠 𒌑𒊕𒈲 𒋫𒄩𒍪 |
𒅀𒀀𒋾 𒁹𒀭𒂗𒍪𒋀𒎌𒌷𒁀 𒍣𒋼𒀀 𒂔 𒈾𒀪𒁺 𒅁𒊺𒋾𒋙 𒅆𒉌𒂊𒋾 𒌑𒃻𒀭𒉡𒉏𒈠 𒆷𒀊𒄫 𒀭𒈾𒋛𒀀𒈠 𒆠𒆗 𒆍𒀭𒊏𒆠 𒀀𒈾 𒈤𒊑𒋗 𒀝𒋫𒁉 𒀀𒆷𒆪 | |
𒋗𒌑 𒄭𒊑𒄑 𒃲𒇷𒂊 𒅆𒉌 𒀀𒋃 𒄫𒊑𒅀 𒅖𒈨𒈠 𒀲𒆳𒊏𒎌 𒂟𒎌 𒄑𒉼 𒇽𒂊𒆷𒈬𒌑 𒇽𒀀𒊏𒈬 𒇽𒆗𒁺 𒀉𒋾 𒁹𒀭𒌋𒄥𒈾𒈲 𒅇 𒌋 𒇽𒃲 𒆠𒈲𒎌 𒈗 𒆳𒉏𒈠𒆠 𒊭 𒆷 𒄿𒁺𒌑 𒈪𒌅𒌓 | |
𒂊𒈬𒆠 𒆷 𒉌𒁉 𒀉𒋾 𒋙𒉡𒋾𒈠 𒌑𒆗𒉌𒅔 𒆠𒄑𒊑𒋗𒌦 𒆠𒆗 𒄘𒂃𒀀𒆠 𒁁𒄩𒊕 𒌑𒊺𒆗𒈠 𒀀𒈾 𒈪𒋼𒅅 𒄫𒊑𒅀 𒌑𒃻𒀭𒈲 𒅗𒀀𒁲 | |
𒍢𒅔𒁲𒅀 𒍑𒋼𒊺𒊏 𒌓 𒎙𒆚 𒊭 𒌗𒍩 𒋫 𒁄𒌀𒆠 𒁶 𒄞𒄠 𒃮𒅆 𒈤𒈩 𒂟𒄭𒀀𒅀 𒊍𒁁𒈠 𒉺𒀭 𒄀𒅁𒅆𒅀 𒌌 𒌑𒆳𒄃 𒅈𒅗𒀀 𒌌 𒌑𒆠 | |
| 20 | 𒇽𒃲 𒊕 𒇽𒂗𒉆𒎌𒅀 𒀀𒈾 𒆧𒆠 𒌑𒈠𒀪𒅕 𒈤𒊒𒌋𒀀 𒉈𒅎 𒁹𒀭𒀫𒌓𒌉𒍑𒋧𒈾 𒇷𒅔𒁕𒈠 𒂊 𒋼𒂵𒀀 𒂄𒉌𒈾 𒈠𒇡𒆪 |
𒋗𒌑 𒇽𒂗𒉆𒎌𒅀 𒂊𒄯𒈠 𒀀𒁲 𒄀𒂇 𒌝𒈠𒈾𒋾𒋙 𒆍𒃲 𒀭𒍝𒂷𒂷 𒊻𒍝𒄠𒈠 𒄿𒈾 𒋫𒂇𒋾 𒆧𒆠 𒀉𒋾 𒇽𒃲𒎌𒅀 𒂊𒁍𒍑 𒋫𒄩𒍪 | |
𒇽𒃲𒎌𒅀 𒆤𒊒𒁍 𒋫𒄩𒍣 𒇽𒉽 𒌋𒅗𒋙𒌦 𒀉𒎏𒈠 𒅁𒆷𒄷 𒋡𒁄 X𒋗 𒇽𒀀 𒈨𒊑𒋙𒌦 𒊭 𒄩𒆳 𒄿𒈾 𒆠𒆗 𒋫𒂇𒋾 𒄘𒂃𒀀𒆠 𒍢𒊒𒌋𒀀 𒅖𒁍𒊒𒌋𒉌 | |
𒄿𒈾 𒊌𒃰 𒊮𒁉𒅀 𒌋𒅗 𒄘𒂃𒀀𒆠 𒋾𒁍 𒌑𒊒 𒀾𒆲𒈠 𒇽𒁵𒈭𒍢 𒊓𒄭𒅕 𒂦𒋙 𒊍𒇷𒅖 𒌑𒁕𒀊𒁉𒄴𒈠 𒊍𒍝𒁁 𒌷 | |
𒀲𒆳𒊏𒎌 𒂟𒎌 𒄑𒉼 𒇽𒂊𒆷𒈨𒂊 𒇽𒀀𒊏𒈬 𒇽𒆗𒁺 𒇽𒃲 𒆠𒈲𒎌 𒇽𒆳𒉏𒈠𒆠 𒅇 𒁹𒀭𒌋𒄥𒈾𒈲 𒀀𒁲 𒌉𒎌 𒌷 𒂗 𒄭𒀉𒁲 𒌑𒊺𒍝𒄠𒈠 𒊩𒆷𒋾𒅖 𒄠𒉡 | |
| 25 | 𒆷𒀊𒄫 𒀭𒈾𒋛𒀀𒈠 𒀠𒆷𒁉𒅁 𒀀𒁍𒄫 𒀉𒋾 𒇽𒄣𒊏𒁲𒅀 𒆷 𒂵𒈨𒇻𒋾 𒌋𒅗 𒁹𒀭𒀫𒌓𒌉𒍑𒋧𒈾 𒀀𒈾 𒆧𒆠 𒀾𒋫𒃶 𒉺𒉌𒅀 |
𒅇 𒋗𒌑 𒂊𒄫 𒅆𒉌𒂊𒋾 𒄭𒅋𒇻 𒀀𒈾 𒊒𒆠𒂊𒋾 𒂊𒄯𒈠 𒁍𒈛𒁺 𒅎𒄣𒋢 𒄀𒂇 𒌝𒈠𒈾𒋾𒋙 𒌑𒈦𒋓𒈠 𒀀𒈾 𒆳𒄖𒍪𒌝𒈠𒉌 𒅔𒈾𒂍 | |
𒁹𒋫𒀭𒈾𒀀𒉡 𒀀𒁲 𒂟𒄭𒀀 𒉏𒈠𒆠 𒇽𒆗𒁺 𒅇 𒇽𒀀𒊏𒈬 𒊭 𒄿𒁕𒋙 𒄑𒍣𒍪𒈠 𒅋𒇷𒆪 𒊑𒍮𒊻𒋢 𒅆𒅆𒋙𒌦 𒀾𒆲𒈠 𒌑𒌓𒊑𒅕 𒂖𒆳𒋢 | |
𒁹𒀀𒁲𒉡 𒌉 𒎏 𒁹𒀭𒀫𒌓𒌉𒍑𒋧𒈾 𒀀𒁲 𒁹𒁀𒊍𒋡𒀀𒉡 𒋀 𒊩𒅀𒋾𒀪𒂊 𒊬𒋥 𒆳𒀀𒊑𒁉 𒀉𒋾 𒌝𒈠𒈾𒋾𒋙𒉡 𒁄𒂅𒋢𒌦 𒀸 𒋡𒋾 𒊍𒁁 | |
𒄑𒇀𒎌 𒄑𒍮𒌝𒁉 𒀲𒆳𒊏𒎌 𒀲𒋙𒀯𒎌 𒀲𒎌 𒀲𒃵𒂷𒎌 𒀲𒌓𒊑 𒊭 𒆠𒆗 𒌓𒄩𒊑 𒈲𒋗𒊒 𒅅𒋗𒁕 𒋗𒅀𒀀𒀀 | |
| 30 | 𒄿𒈾 𒄷𒌓 𒊮𒁉 𒅇 𒉡𒌝𒄯 𒉺𒉌 𒀀𒈾 𒆍𒀭𒊏𒆠 𒀀𒄭𒅖𒈠 𒀀𒈾 𒂍𒃲 𒁹𒀭𒀫𒌓𒌉𒍑𒋧𒈾 𒀾𒋗 𒃻𒇲 𒃻𒋗 𒅇 𒃻𒂵 𒂊𒋼𒊒𒌒 𒆠𒆗𒃻 |
𒀊𒋼𒂊𒈠 𒂍 𒉌𒈲𒋼𒋙 𒆬𒄀 𒆬𒌓 𒌑𒉡𒌓 𒆬𒄀 𒆬𒌓 𒎎𒎌 𒀀𒃼𒌅 𒄑𒈿𒎌 𒄑𒄖𒍝𒎌 𒉌𒈨𒁲𒂊 𒄑𒃻 𒃻𒁕𒁲 𒄑𒂵𒅆𒊒𒌓 𒈗𒋾𒋙 𒊭 𒄴𒍪𒋙𒉡 𒆬𒄀 𒆬𒌓 | |
𒊩𒈠 𒋳𒋗 𒃻𒋗 𒃻𒂵 𒉌𒈲𒌈 𒅗𒂍𒌈 𒁮𒋢 𒊩𒂟𒎌 𒂍𒃲𒋙 𒊩𒅆𒁾𒎌 𒇽𒋗𒌓 𒊕𒎌 𒇽𒃲𒋼𒎌 𒇽𒎙𒍝𒊍 𒉺𒉌 𒇽𒈜𒎌 𒊩𒈜𒎌 | |
𒇽𒀴 𒂍𒃲 𒈬𒉆𒈪𒊒 𒉈𒈬 𒊒𒁍𒋾𒋙 𒋛𒄭𒅕𒋾 𒇽𒌝𒈠𒀀𒉌 𒈠𒆷 𒁀𒋗𒌑 𒄷𒄭𒋰𒁉𒇻𒌓 𒂍𒃲𒋙 𒌑𒊺𒍝𒄠𒈠 𒊩𒆷𒋾𒅖 𒄠𒉡 | |
𒊍𒁁𒈠 𒅈𒆠𒋙 𒀀𒈾 𒆳𒄖𒍪𒌝𒈠𒉌 𒇽𒁵𒈭𒍢 𒀀𒈾 𒆠𒆗 𒀀𒇉𒀀𒃵𒈨 𒅇 𒀊𒉺𒊏𒀀𒋼 𒀾𒁓𒈠 𒐊 𒌓𒈨 𒌑𒁀𒀪𒌑𒋗𒈠 𒌌 𒅔𒈾𒂇 𒀀𒊬𒋗 | |
| 35 | 𒋛𒋼𒀉 𒀲𒆳𒊏𒎌 𒅇 𒂟𒄭𒀀𒋙 𒊭 𒅀𒀪𒋗 𒈠𒈾𒄴𒌈 𒈾𒀀𒇺 𒅁𒌓𒅆𒁺𒋗𒈠 𒆷 𒅋𒇷𒆪 𒄿𒁕𒀀𒋗 𒅖𒌅 𒆠𒆗 𒂔 𒅇 𒁀𒈠𒀀𒋾 𒁁𒄩𒊕 𒌑𒈜𒆟 |
𒄿𒈾 𒈨𒋾𒅅 𒄫𒊑𒅀 𒌷𒀀𒈠𒀜𒌅 𒌷𒄩𒌑𒀀𒂊 𒌷𒋢𒉺𒁍 𒌷𒂍𒁹𒊓𒀭𒈾𒁉 𒌷𒄣𒁕𒀀𒀀𒅔 𒌷𒆤𒊑𒈾 𒌷𒂦𒁹𒆷𒁲𒉌 𒌷𒁉𒋫𒀀𒋼 | |
𒌷𒁀𒉌𒌅 𒌷𒄖𒍪𒌝𒈠𒉡 𒌷𒂦𒁹𒅀𒀭𒍮𒊑 𒌷𒂦𒁹𒀀𒁉𒅀𒋫𒀪 𒌷𒂦𒁹𒊒𒁺𒌝𒈨 𒌷𒂍𒁹𒊏𒄭𒂊 𒌷𒄩𒉿𒃻 𒌷𒊓𒁲𒀭 𒌷𒄷𒊒𒁺 𒌷𒍝𒄴𒊑𒈾 | |
𒌷𒅋𒌅𒊌 𒌷𒀠𒆷𒀠𒇻 𒌷𒊓𒀊𒄩𒉡 𒌷𒋼𒀀𒀭𒅆𒁺 𒌷𒀀𒉺𒀝 𒌷𒂍𒁹𒆗𒈾𒀀𒀀 𒌷𒂍𒀊𒁕𒀀𒀀 𒌷𒁀𒄭𒄿𒅕 𒌷𒈠𒊑𒊏𒀀 𒀫𒁕𒆠 𒌷𒅀𒆥𒈬𒈾 𒌷𒆪𒌒𒊒𒈾 𒌷𒂍𒁹𒆪𒂉𒊑 𒌷𒋻𒋡𒁹𒈠𒊒𒋛 | |
𒀮𒄯 𒌍 𒌷𒎌 𒆗𒉡𒋾 𒂍 𒂦𒎌𒉌 𒊭 𒆳𒂍𒁹𒁖𒆪𒊑 𒀀𒁲 𒈫 𒈨 𒐐 𒌷𒎌 𒌉𒎌 𒊭 𒇷𒈨𒋾𒋙𒉡 | |
| 40 | 𒌷𒂦𒁹𒀊𒉿𒂊 𒌷𒂦𒁹𒋫𒉌𒂊 𒌷𒂦𒁹𒊓𒈠𒀪 𒌷𒊓𒅈𒊏𒁀𒌅 𒌷𒍝𒆷𒄩𒌅 𒌷𒂦𒁹𒀊𒁕𒀀𒀀 𒌷𒊓𒀊𒉿𒄭𒈠𒊑 𒌷𒍦𒌓𒊭𒁹𒈠𒀝𒅗𒈨𒂊 |
𒀮𒄯 𒐍 𒌷𒎌 𒆗𒉡𒋾 𒂍 𒂦𒎌𒉌 𒊭 𒆳 𒂍𒁹𒊓𒀪𒀠𒇷 𒀀𒁲 𒁹 𒈨 𒎙 𒌷𒎌 𒌉𒎌 𒊭 𒇷𒈨𒋾𒋙𒉡 | |
𒌷𒊓𒉿𒀀 𒌷𒊓𒅈𒊏𒁀𒉡 𒌓𒌓𒀝𒆠 𒁈𒈥𒊑𒆠 𒌷𒂍𒁹𒀭𒁀𒉌 𒌷𒀀𒄷𒁺 𒌷𒊭𒄑𒀫𒀭𒅎 𒌷𒃻𒄯𒊏𒌓 𒌷𒈠𒈾𒄴𒄷 𒌷𒊭𒀀𒈨𒇷𒂊 𒌷𒂦𒁹𒀝𒆠𒅀 | |
𒌷𒈾𒄀𒌅 𒌷𒉡𒌨𒀀𒁉𒉡 𒌷𒄩𒅈𒍮𒅈𒊏 𒌷𒂦𒁹𒊒𒊌𒁉 𒌷𒁕𒀭𒁕𒅆𒌨𒆷 𒌷𒂦𒁹𒄵𒁕𒁕 𒌷𒂍𒊑𒀪𒂊 𒌷𒂦𒁹𒌑𒄥𒊑 𒌷𒄀𒅔𒁕𒄿𒈾 | |
𒌷𒂦𒁹𒌑𒀀𒀀𒀉 𒌷𒂍𒁹𒋫𒌑𒊏𒀀 𒌷𒊓𒀊𒄷𒈾 𒌷𒁍𒄩𒅈𒊒 𒌷𒄯𒁁𒁹𒋧𒈾 𒌷𒄯𒁁𒁹𒆗𒁉 𒌷𒃻𒌓𒊑𒂊 𒌷𒂍𒁹𒁀𒉌𒀭𒌑𒀀 𒌷𒋢𒆷𒀀𒁺 | |
| 45 | 𒌷𒂍𒁹𒅋𒋫𒈠𒊓𒈠𒀪 𒌷𒂍𒁹𒁲𒉌𒀭 𒌷𒁕𒋡𒇻 𒌷𒄩𒈨𒍝 𒌷𒁁𒆷𒀀 𒌷𒋫𒄿𒊒 𒌷𒄒𒊏𒀀𒉡 𒌷𒅋𒋫𒊏𒌅 𒌷𒀝𒃼𒃻𒆠𒈾 𒌷𒊓𒂵𒁀𒌅𒊭𒁹𒈥𒂁𒅀 |
𒀮𒄯 𒌍 𒌷𒎌 𒆗𒈾𒋾 𒂍 𒂦𒎌𒉌 𒊭 𒆳 𒂍𒁹𒀀𒈮𒅗𒀀𒉌 𒀀𒁲 𒐈 𒈨 𒐐 𒌷𒎌 𒌉𒎌 𒊭 𒇷𒈨𒋾𒋙𒉡 | |
𒌷𒂍𒁹𒍝𒁉𒁲𒅀 𒌓𒀕𒆠 𒆰𒀕𒆠 𒉣𒆠 𒆠𒄑𒋝𒆠 𒌷𒉌𒁁𒀭𒆷𒄖𒁕 𒌷𒂦𒁹𒅀𒆠𒉌 𒀀𒁲 𒌷𒋼𒀀𒀭𒀝 𒊭 𒆠𒆳 𒀀𒇉𒈥𒊏𒋾 | |
𒀮𒄯 𒐍 𒌷𒎌 𒆗𒉡𒋾 𒂍 𒂦𒎌𒉌 𒊭 𒆳𒂍𒁹𒅀𒆠𒉌 𒀀𒁲 𒁹 𒈨 𒌷𒎌 𒌉𒎌 𒊭 𒇷𒈨𒋾𒋙𒉡 | |
𒀮𒄯 𒐕 𒌷𒈨𒉌 𒆗𒉡𒋾 𒂍 𒂦𒎌𒉌 𒊭 𒆳𒆗𒁲 𒀀𒁲 𒐍 𒈨 𒎙 𒌷𒎌 𒌉𒎌 𒊭 𒇷𒈨𒋾𒋙𒉡 𒀠𒈨 𒀝𒋗𒌓 𒀾𒇻𒆷 𒊩𒆷𒋢𒌦 | |
| 50 | 𒊺𒅎 𒅗𒈝𒈠 𒊭 𒆠𒆗 𒆠𒊏𒋼𒋙𒉡 𒂙𒋙𒉡 𒊭 𒂔 𒂟𒄭𒀀 𒌑𒃻𒆸 𒀊𒇧 𒀝𒄥 𒄿𒈾 𒀭𒄑𒁇 𒀝𒈬 𒀀𒈾 𒇯𒎌 𒈠𒋗𒌑𒋾 𒌑𒌁 |
𒇽𒌫𒁉 𒇽𒀀𒊏𒈬 𒇽𒆗𒁺 𒊭 𒆠𒆗 𒀕𒆠 𒂗𒆤𒆠 𒆧𒆠 𒄯𒊕𒌧𒈠𒆠 𒀀𒁲 𒌉𒎌 𒌷 𒂗 𒄭𒀉𒁲 𒌑𒊺𒍝𒄠𒈠 𒊩𒆷𒋾𒅖 𒄠𒉡 | |
𒊺𒅎 𒅗𒈝𒈠 𒊭 𒆠𒆗 𒆠𒊏𒋼𒋙𒉡 𒈨𒊕 𒈠𒈾𒄭𒋙𒉡 𒂙 𒂔 𒁀𒆳 𒈾𒄫𒋾𒋙𒉡 𒂟𒄭𒀀𒉌 𒌑𒃻𒆸 | |
𒁹𒂗𒆕 𒌉 𒇽𒃲𒆕 𒉿𒊑𒀪 𒋗𒀭𒈾𒆠 𒃻 𒆠𒈠 𒈪𒊏𒉌 𒍝𒄴𒊑 𒆠𒆗 𒂍𒃲𒅀 𒅕𒁍𒌑 𒀀𒈾 𒈗𒋾 𒆳 𒅴𒂠 𒅇 𒌵𒆠 𒀠𒋫𒃶 𒌋𒅗𒋙𒌦 | |
𒄿𒈾 𒋫𒀀𒀀𒅈𒋾𒅀 𒇽𒌅𒀪𒈬𒈾 𒇽𒊑𒄭𒄷 𒇽𒌑𒁍𒁺 𒇽𒄃𒊑𒂊 𒇽𒈠𒇷𒄷 𒇽𒄖𒊒𒈬 𒇽𒌑𒁍𒈝 𒇽𒁕𒈬𒉡 𒇽𒃵𒁍𒇻 𒇽𒄭𒅔𒁕𒊒 | |
| 55 | 𒇽𒊒𒀪𒌋𒀀 𒇽𒁍𒄣𒁺 𒇽𒄩𒄠𒊏𒀀𒉡 𒇽𒄩𒂵𒊏𒀀𒉡 𒇽𒈾𒁀𒌅 𒇽𒇷𒀪𒋫𒀀𒀀 𒇽𒀀𒊏𒈬 𒆷 𒃶𒋙 𒁁𒄩𒊕 𒀝𒋤𒌓𒈠 𒀾𒇻𒆷 𒊩𒆷𒋢𒌦 |
𒄿𒈾 𒈨𒋾𒅅 𒄫𒊑𒅀 𒊭 𒁹𒀭𒀝𒂗𒈬𒎌 𒇽𒆠𒉿 𒌷𒄩𒊏𒊏𒋾 𒆬𒄀 𒆬𒌓 𒄑𒈬𒆹𒃶𒉌 𒃲𒎌 𒀲𒎌 𒀲𒃵𒂷𒎌 𒄞𒎌 𒅇 𒇇𒇻𒄭𒀀 𒎙𒁕𒋫𒋙 𒅗𒂍𒌈 𒄠𒄯 | |
𒁀𒄷𒆷𒋾 𒌷𒄭𒆸𒈨 𒇽𒉽 𒀝𒍮 𒊭 𒌌𒌅 𒌌𒆷 𒀀𒈾 𒈗𒎌𒉌 𒀜𒎌𒅀 𒆷 𒅅𒉡𒋗 𒄿𒈾 𒄑𒆪 𒌑𒌑𒆤𒈠 𒈾𒄫𒌅 𒌌 𒂊𒍦 | |
𒈾𒄖𒌑 𒋗𒀀𒌅 𒀀𒈾 𒌍𒋗𒋾 𒊍𒁁 𒁹𒂗 𒄞𒀴 𒌋 𒇻𒎌 𒌋 𒀲 𒃾𒎌 𒎙 𒀲 𒅗𒈝𒈠 𒊑𒊺𒋼𒋙 𒀀𒈾 𒄀𒉌𒂊 𒀭𒎌 𒆳 𒀸𒋩𒆠 𒂗𒎌𒅀 𒌑𒆥 𒆕𒊑𒌑 | |
𒈫 𒈨 𒐍 𒅆 𒌦𒎌 𒍨𒊒 𒅇 𒌍𒎙 𒐌 𒅆 𒈫 𒈨 𒀲𒆳𒊏𒎌 𒀲𒋙𒀯𒎌 𒌋 𒅆 𒐕 𒀲𒎌 𒐊 𒅆 𒈫 𒈨 𒌍 𒀲𒃵𒂷𒎌 𒐕 𒅆 𒁹 𒈨 𒄞𒎌 𒐍 𒈨 𒅆 𒁹 𒈨 𒇇𒇻𒄭𒀀 𒊩𒆷𒌓 𒅗𒂍𒌓 𒀾𒇻𒆷 𒀀𒈾 𒆠𒆗 𒆳 𒀸𒋩𒆠 | |
| 60 | 𒂊𒍦 𒌦𒎌 𒀲𒎌 𒀲𒃵𒂷𒎌 𒄞𒎌 𒅇 𒍢𒂊𒉌 𒊭 𒄀𒂇 𒌝𒈠𒉌𒅀 𒂊𒁍𒆪𒉏𒈠 𒀀𒈾 𒊏𒈠𒉌𒋙𒉡 𒄑𒆠𒇻 𒋛𒆸𒌅 |
𒅇 𒁀𒄷𒆷𒀀𒋼 𒈾𒆠𒊑 𒈨𒍮 𒁁𒊒 𒊭 𒌨𒊒𒌓 𒀀𒈾 𒉌𒊑𒅀 𒆷 𒅅𒉡𒋗 𒄿𒈾 𒄑𒆪 𒌑𒊏𒋛𒅁𒈠 𒀀𒈜 𒄑𒂵𒅆𒋀 | |
𒄿𒈾 𒌓𒈪𒋗𒈠 𒂍𒃲𒇴𒈩 𒂍 𒀭𒊊𒀕𒃲 𒊭 𒆠𒆗 𒌷𒋻𒁉𒍢 𒊭 𒁹𒀭𒁲𒈠𒉡𒈦 𒉣 𒀀𒌨 𒈤𒊑𒅀 𒌉 𒁹𒀸𒋩𒉽𒅕𒀀 𒌉 𒁹𒆪𒋾𒀭𒈦 𒂊𒁍𒋗 𒂊𒈾𒄴𒈠 | |
𒂍 𒋗𒀀𒌈 𒀀𒈾 𒋛𒄭𒅕𒋾𒋙 𒀝𒄥 𒆗𒈾𒋢 𒀝𒋤𒌓 𒈫 𒈨 𒀸 𒁹𒌑 𒋃𒁺 𒁹 𒈨 𒀸 𒁹𒌑 𒊕𒆠 𒆕𒋡𒊒 𒌓𒆷𒀀 𒌑𒂷𒇷𒈠 𒌋𒅗 𒋻𒉺𒀾 𒂍 𒈤𒊑𒂊 𒌑𒋥𒁲 | |
𒂍𒃲𒇴𒈩 𒂊𒇷 𒊭 𒌓𒈬 𒉺𒉌 𒌑𒊐𒁉𒈠 𒄿𒈾 𒂊𒄫𒋾 𒇽𒁶𒃲𒇷𒂊 𒂗𒄣𒋾 𒅖𒌅 𒀳𒋗 𒀀𒁲 𒈾𒁓𒊑𒋙 𒅈𒍦 𒌑𒊕𒇸 | |
| 65 | 𒅆𒅁𒊒 𒈾𒊍𒄣 𒊭 𒌋𒅗 𒈤𒊑𒂊 𒋗𒌅𒊒 𒅇 𒀀𒈾 𒋫𒈾𒁕𒀀𒋾 𒋗𒇻𒆪 𒀀𒈾 𒀭𒊊𒀕𒃲 𒊭 𒆠𒆗 𒌷𒋻𒁉𒍢 𒂗𒅀 𒂊𒁍𒍑 |
𒀭𒊊𒀕𒃲 𒂗 𒂊𒈬𒃶 𒍢𒊏𒀀𒋾 𒆗𒆗𒉡 𒁍𒈠𒈝 𒀀𒃻𒈩 𒆷 𒈤𒊑 𒄿𒈾 𒄫𒁉𒋙 𒌑𒊺𒆗𒈠 𒁕𒄫 𒌑𒊬𒈠𒀀 𒋗𒁁𒋢 𒈲𒌈 | |
𒇷𒂊 𒆏𒊒𒋾 𒋗𒀪𒂊 𒈠𒊒𒋾 𒇻𒀬𒎌 𒌨𒊑𒄴𒋾 𒅁𒁍𒋾 𒈠𒄯𒋗 𒀝𒆠𒈠 𒆠𒆗 𒂍 𒋗𒀀𒌈 𒀾𒋫𒃶 𒋫𒋻𒌅 | |
𒇷𒂊𒌅 𒆠𒋃𒋾 𒋡𒋾 𒊭 𒄿𒈾 𒌅𒆰𒋾𒋙 𒃲𒋾 𒌋𒅗 𒆰𒆳 𒈾𒆠𒊑 𒀾𒋫𒅗𒉡 𒄿𒈾 𒈬𒊬𒂊 𒌑𒃻𒀾𒋛𒀀𒈠 𒀀𒈾 𒈗𒎌𒉌 𒌉𒎌𒅀 𒂊𒍦 𒍝𒋾𒅖 | |
𒀀𒈾 𒂕 𒌓𒈨 𒉣 𒅈𒆪𒌑 𒂊𒉡𒈠 𒂍 𒋗𒀀𒌈 𒄿𒆗𒁉𒊒𒈠 𒂗𒈾𒄷 𒈬𒊬𒀀𒀀 𒇷𒄯𒈠 𒉌𒄑 𒈜𒋗𒍑 𒇻𒀬 𒌨𒆠 𒀉𒋾 𒈬𒊬𒂊 𒅆𒋛𒀀 𒋗𒈨𒋙 𒇷𒆥 𒀭𒊊𒀕𒃲 𒅅𒊑𒁉𒋙 𒄿𒋆𒈨 | |
| 70 | 𒁹 𒍑 𒐎𒋫𒀀𒀭 𒈬𒁉 𒋃 𒈬𒊬𒂊 |