[This cuneiform text was computer-generated from a transliteration. See this page for trouble-shooting tips.]
| 1 | 𒁹𒀭𒂗𒍪𒋀𒎌𒌷𒁀 𒈗 𒃲𒌑 𒈗 𒆗𒉡 𒈗 𒆧𒃻𒋾 𒈗 𒆳 𒀸𒋩𒆠 𒈗 𒆷 𒃻𒈾𒀭 𒊑𒂍𒌝 𒄷𒄭𒎏𒉡𒌑 𒉺𒌓 𒀭𒎌 𒃲𒎌 |
𒈾𒈲 𒆤𒋾 𒊏𒀪𒅎 𒈪𒃻𒊑 𒂊𒄫 𒌑𒊓𒀀𒋾 𒀀𒌨 𒋰𒁍𒌓 𒀀𒆠𒄿 𒊓𒄭𒊒 𒁮𒋡𒀀𒋾 | |
𒀉𒇻 𒁍𒈠𒈝 𒍣𒅗𒊒 𒃼𒁺 𒀀𒃻𒈩 𒆗 𒈠𒀠𒆠 𒊐𒁍 𒆷𒀪𒀉 𒆷 𒈠𒄀𒊑 𒈬𒉺𒅁𒊑𒄣 𒍝𒈠𒀀𒉌 | |
𒀭𒀸𒋩 𒆳𒌑 𒃲𒌑 𒈗𒌓 𒆷 𒃻𒈾𒀭 𒌑𒆳𒇷𒈠𒀭𒉌𒈠 𒌋𒅗 𒄀𒂇 𒀀𒈨 𒉺𒊩𒆠 𒌑𒊬𒁀𒀀 𒄑𒆪𒎌𒅀 | |
| 5 | 𒄿𒈾 𒈤𒊑𒂊 𒄫𒊑𒅀 𒊭 𒁹𒀭𒀫𒌓𒌉𒍑𒋧𒈾 𒈗 𒆳𒃸𒂄𒅀𒀾 𒀀𒁲 𒂟𒄭𒀀 𒉏𒈠𒆠 𒊑𒍢𒋙 𒄿𒈾 𒋫𒂇𒋾 𒆧𒆠 𒀾𒋫𒃶 𒅆𒅆𒋗 |
𒄿𒈾 𒌘 𒌓𒄩𒊑 𒋗𒀀𒌅 𒂊𒍦 𒆠𒆘𒋢 𒂊𒁹 𒅁𒌓𒋃𒈠 𒈾𒄫𒆪 𒂊𒎗𒅕 𒄑𒇀𒎌 𒀲𒆳𒊏𒎌 𒄑𒍮𒌝𒁉 𒀲𒋙𒀯𒎌 𒊭 𒀸 𒆤𒊒𒌒 𒋫𒄩𒍣 𒌑𒈦𒅆𒊒 𒅅𒋗𒁕 𒋗𒅀𒀀𒀀 | |
𒀀𒈾 𒂍𒃲𒋗 𒊭 𒆠𒆗 𒆍𒀭𒊏𒆠 𒄩𒁹 𒂊𒊒𒌝𒈠 𒀊𒋼𒂊𒈠 𒂍 𒉌𒈲𒋾𒋙 𒆬𒄀 𒆬𒌓 𒌑𒉡𒌓 𒆬𒄀 𒆬𒌓 𒎎 𒀀𒃼𒌅 𒊩𒈠 𒋳𒋙 𒃻𒋗 𒃻𒂵 𒉌𒈲𒌅 𒅗𒂍𒌅 | |
𒁮𒋢 𒊩𒌦𒎌 𒂍𒃲𒎌𒋙 𒇽𒃲𒋼𒎌 𒇽𒎙𒍝𒊍 𒉺𒉌 𒋛𒆟𒋾 𒌝𒈠𒀀𒉌 𒈠𒆷 𒁀𒋗𒌑 𒄷𒄭𒋰𒁉𒇻𒌓 𒂍𒃲𒍑 𒌑𒊺𒍝𒄠𒈠 𒊩𒆷𒁹 𒄠𒉡 | |
𒄿𒈾 𒂊𒈮 𒀭𒀸𒋩 𒂗𒅀 𒐕 𒌷𒎌𒋙 𒆗𒉡𒋾 𒂍 𒂦𒎌 𒊭 𒆳𒆗𒁲 𒅇 𒐋 𒈨 𒎙 𒌷𒎌 𒌉𒎌 𒊭 𒇷𒈨𒋾𒋙𒉡 𒀠𒈨 𒆳𒌓 𒀾𒇻𒆷 𒊩𒆷𒋢𒌦 | |
| 10 | 𒇽𒌫𒁉 𒇽𒀀𒊏𒈬 𒇽𒆗𒁺 𒊭 𒆠𒆗 𒀕𒆠 𒂗𒆤𒆠 𒆧𒆠 𒄯𒊕𒌧𒈠𒆠 𒄘𒂃𒀀𒆠 𒌓𒄒𒉣𒆠 𒂗 𒌉𒎌 𒌷 𒂗 𒄭𒀉𒁲 𒌑𒊺𒍝𒄠𒈠 𒊩𒆷𒁹 𒄠𒉡 |
𒁹𒂗𒆕 𒌉 𒇽𒃲𒆕 𒄿𒈾 𒄑𒄖𒍝 𒈗𒋾𒋙 𒌑𒊺𒈨 𒌦𒎌 𒆳 𒌵𒆠 𒌑𒆳𒄃 𒉺𒉡𒍑𒋙 𒌋𒅗 𒄀𒂇 𒈾𒄀𒂊 𒆳𒆗𒁲 𒇽𒋗𒌓 𒊕𒎌𒅀 𒀀𒈾 𒇽𒉆𒋾 𒀾𒆲𒈠 𒉌𒅕 𒁁𒇻𒋾𒅀 𒂊𒅂𒋢𒉡𒋾 | |
𒄿𒈾 𒋫𒀀𒀀𒅈𒋾𒅀 𒇽𒌅𒀪𒈬𒈾 𒇽𒊑𒄭𒄷 𒇽𒅀𒁖𒄣 𒇽𒌑𒁍𒁺 𒇽𒄃𒊑𒂊 𒇽𒈠𒇷𒄷 𒇽𒄖𒊒𒈬 𒇽𒌑𒁍𒈝 𒇽𒁕𒈬𒉡 | |
𒇽𒃵𒁍𒈝 𒇽𒄭𒅔𒁕𒊒 𒇽𒊒𒀪𒌋𒀀 𒇽𒁍𒄣𒁺 𒇽𒄩𒄠𒊏𒉡 𒇽𒄩𒂵𒊏𒉡 𒇽𒈾𒁀𒌅 𒇽𒇷𒀪𒋫𒀀𒌑 𒇽𒀀𒊏𒈬 𒆷 𒃶𒋗 𒁁𒄩𒊕 𒀝𒋤𒌓 | |
𒈫 𒈨 𒐍 𒅆 𒌦𒎌 𒌉 𒃲 𒍑 𒌋 𒊩 𒐌 𒅆 𒈫 𒈨 𒀲𒆳𒊏𒎌 𒀲𒋙𒀯𒎌 𒌋 𒅆 𒐕 𒀲𒎌 𒐊 𒅆 𒈫 𒈨 𒌍 𒀲𒃵𒂷𒎌 𒐕 𒅆 𒁹 𒈨 𒄞𒎌 𒐋 𒈨 𒅆 𒐋 𒈨 𒇇𒇻𒄭𒀀 𒊩𒆷𒌅 𒅗𒂍𒌅 𒀾𒇻𒆷 𒀀𒈾 𒆠𒆗 𒆳 𒀸𒋩𒆠 | |
| 15 | 𒄿𒈾 𒈨𒋾𒅅 𒄫𒊑𒅀 𒊭 𒁹𒀭𒀝𒂗𒈬𒎌 𒇽𒆠𒉿 𒌷𒄩𒊏𒊏𒋼 𒆬𒄀 𒆬𒌓 𒄑𒈬𒆹𒃶𒉌 𒃲𒎌 𒀲𒎌 𒀲𒃵𒂷𒎌 𒄞𒎌 𒅇 𒇇𒇻𒄭𒀀 𒋫𒈥𒋫𒋙 𒅗𒂍𒌓 𒄠𒄯 |
𒁀𒄷𒆷𒋾 𒌷𒄭𒆸𒈨 𒇽𒉽 𒀝𒍢 𒄿𒈾 𒄑𒆪 𒌑𒌑𒆤𒈠 𒂊𒁺 𒌌 𒂊𒍦 𒄷𒊑𒋙𒌦 𒄿𒈾 𒂵𒅆𒅆 𒀀𒈜𒈠 𒋛𒆟𒋾 𒌷 𒌑𒊩𒈨 | |
𒈾𒄖𒌑 𒋗𒀀𒌅 𒀀𒈾 𒌍𒋗𒋾 𒊍𒁁 𒁹𒂗 𒄞 𒌋 𒇻𒀴𒎌 𒌋 𒀲 𒄑𒃾𒎌 𒎙 𒀲 𒅗𒈝𒈠 𒊑𒊺𒋼𒋙 𒀀𒈾 𒀭𒎌𒉌 𒆳 𒀸𒋩𒆠 𒂗𒎌𒅀 𒌑𒆥 𒆕𒊑𒌑 | |
𒄿𒈾 𒈫𒂊 𒄫𒊑𒅀 𒀭𒀸𒋩 𒁁𒉌 𒌑𒋳𒆸𒀭𒉌𒈠 𒀀𒈾 𒆳 𒇽𒁉𒅆𒄿 𒅇 𒆳 𒅀𒋢𒁉𒃲𒆷𒀀𒀀 𒊭 𒌌𒌅 𒌌𒆷 𒀀𒈾 𒈗𒎌𒉌 𒀜𒎌𒅀 𒆷 𒆤𒉡𒋙 𒇻 𒀠𒌨 | |
𒆠𒆗 𒄯𒃻𒀀𒉌 𒍠𒊒𒋾 𒀀𒊮 𒉆𒊏𒍢 𒄿𒈾 𒀲𒆳𒊏 𒅈𒆏𒈠 𒄑𒇀 𒄊𒅀𒅀 𒄿𒈾 𒋾𒅅𒅗𒋾 𒌑𒃻𒀾𒅆 𒀾𒊒 𒊒𒋗𒄣 𒄿𒈾 𒄊𒅀𒅀 𒊑𒈠𒎙 𒀜𒋳𒄑 | |
| 20 | 𒌷𒂍𒁹𒆠𒇴𒍝𒄴 𒌷𒄩𒅈𒁹𒉿 𒌷𒂍𒁹𒆪𒁁𒋾 𒌷𒎌𒉌𒋙𒉡 𒂍 𒂦𒎌 𒆗𒉡𒋾 𒀠𒈨 𒆳𒌓 𒌦𒎌 𒀲𒆳𒊏𒎌 𒀲𒋙𒀯𒎌 𒀲𒎌 𒄞𒎌 𒅇 𒇇𒇻𒄭𒀀 𒌌𒌅 𒄫𒁉𒋙𒌦 𒌑𒊺𒍝𒄠𒈠 𒊩𒆷𒁹 𒄠𒉡 |
𒅇 𒌷𒎌𒋙𒉡 𒌉𒎌 𒊭 𒉌𒁀 𒆷 𒄿𒋗𒌑 𒀊𒇧 𒀝𒄥 𒌑𒊺𒈨 𒋼𒀀𒎌 𒂍 𒂔 𒆰𒋫𒊑 𒈬𒃻𒁉𒋙𒉡 𒄿𒈾 𒀭𒄑𒁇 𒀝𒈬𒈠 𒁲𒊑𒇺 𒌑𒊺𒈪 | |
𒌑𒌁𒈠 𒌷𒂍𒁹𒆠𒇴𒍝𒄴 𒋗𒀀𒌅 𒀀𒈾 𒄵𒌅𒋾 𒊍𒁁 𒌋𒅗 𒊭 𒌓𒈨 𒉺𒉌 𒂦𒎌𒋙 𒌑𒆗𒎏𒈠 𒌦𒎌 𒆳𒆳 𒆠𒋃𒋾 𒋗𒅀𒅀 𒀸 𒊮𒁉 𒌑𒊺𒈨 | |
𒌦𒎌 𒆳 𒇽𒁉𒅆𒄿 𒅇 𒆳 𒇽𒅀𒋢𒁉𒃲𒆷𒀀𒀀 𒊭 𒆷𒉺𒀭 𒄑𒆪𒎌𒅀 𒅁𒌓𒅆𒁺 𒌌𒌅 𒆠𒆗 𒆳𒄿 𒌑𒊺𒊑𒁮𒈠 𒀸 𒌷𒄯𒁹𒉿 𒌷𒂍𒁹𒆪𒁁𒋾 𒌑𒊬𒈨 | |
𒄿𒈾 𒋗𒅀 𒇽𒋗𒌓 𒊕𒅀 𒇽𒂗𒉆 𒌷𒅈𒊐𒄩 𒄠𒉡𒋙𒉡𒋾 𒎎𒈾𒆕𒀀 𒌑𒊺𒄫𒈠 𒇷𒄿𒌓 𒆠𒋃𒋾 𒋗𒅀 𒊭 𒌋𒅗𒋙𒌦 𒀾𒋳𒅗𒉡 𒍢𒊒𒍑𒋙 𒌑𒃻𒀾𒋛𒀀𒈠 𒄿𒈾 𒆠𒆗 𒌷 𒌌𒁁 | |
| 25 | 𒉺𒀭 𒉌𒊑𒅀 𒌑𒌁𒈠 𒀀𒈾 𒆳𒂖𒇷𒉿 𒊍𒍝𒁁 𒄯𒊏𒉡 𒂖𒆷𒈬𒌋𒀀 𒁹𒄑𒉺𒁀𒀀𒊏 𒈗𒋙𒌦 𒌷𒎌𒋙 𒆗𒉡𒋾 𒂍 𒉌𒈲𒋾𒋙 𒌑𒈦𒋓𒈠 𒀀𒈾 𒊒𒆠𒂊𒋾 𒅔𒈾𒂍 |
𒁶𒊑 𒆳𒋗 𒂼𒋾 𒁶 𒅎𒂂 𒊍𒄷𒌒 𒌷𒈥𒌑𒄫𒋾 𒌷𒀝𒆪𒌓𒁺 𒌷𒎌 𒂍 𒈗𒋾𒋙 𒀀𒁲 𒌍 𒌷𒎌 𒌉𒎌 𒊭 𒇷𒈨𒋾𒋙𒉡 𒀠𒈨 𒆳𒌓 𒀊𒇧 𒀝𒄥 𒀸 𒀭𒄑𒁇 𒀝𒈬 | |
𒌦𒎌 𒌉 𒃲 𒍑 𒌋 𒊩 𒀲𒆳𒊏𒎌 𒀲𒋙𒀯𒎌 𒀲𒎌 𒀲𒃵𒂷𒎌 𒄞𒎌 𒅇 𒇇𒇻𒄭𒀀 𒆷 𒈪𒉆 𒀾𒇻𒇴𒈠 𒀀𒁲 𒆷 𒁀𒅆𒄿 𒌑𒃻𒌨𒋙𒈠 𒌑𒍝𒄴𒄭𒅕 𒈠𒀀𒋢 | |
𒌷𒍢𒍢𒅕𒌓 𒌷𒆪𒌝𒈠𒄴𒈝 𒌷𒎌 𒆗𒉡𒋾 𒀀𒁲 𒌷𒎌 𒌉𒎌 𒊭 𒇷𒈨𒋾𒋙𒉡 𒆳𒂍𒁹𒁀𒅈𒊒𒌋 𒈾𒄖𒌋 𒀀𒈾 𒄀𒂇𒋾𒋙 𒌌𒌅 𒆠𒆗 𒆳𒋙 𒀊𒌇𒈠 𒌋𒅗 𒈪𒈲 𒆳 𒀸𒋩𒆠 𒌑𒋥𒁲 | |
𒌷𒂖𒂗𒍝𒀾 𒀀𒈾 𒌷 𒈗𒋾 𒅇 𒆗𒈾𒀜 𒈾𒄀𒂊 𒋗𒀀𒌅 𒊍𒁁𒈠 𒈬𒋙 𒈤𒊏𒀀 𒌑𒅘𒄫𒈠 𒌷𒋼𒀀𒁹𒀭𒂗𒍪𒋀𒎌𒌷𒁀 𒀜𒋫𒁉 𒉌𒂍𒋢 | |
| 30 | 𒌦𒎌 𒆳𒆳 𒆠𒋃𒋾 𒋗𒅀𒅀 𒄿𒈾 𒊮𒁉 𒌑𒊺𒈨 𒄿𒈾 𒋗𒅀 𒇽𒋗𒌓 𒊕𒅀 𒇽𒂗𒉆 𒌷𒄯𒄯 𒄠𒉡𒈠 𒌑𒊐𒄫 𒈠𒀀𒋾 |
𒄿𒈾 𒋫𒀀𒀀𒅈𒋾𒅀 𒊭 𒆳𒈠𒁕𒀀𒀀 𒊒𒄣𒋾 𒊭 𒄿𒈾 𒈗𒎌𒉌 𒀜𒎌𒅀 𒈠𒄠𒎙 𒆷 𒅖𒈬𒌑 𒍣𒄫 𒆳𒋾𒋙𒌦 𒎙𒁕𒀜𒋫𒋙𒉡 𒅗𒂍𒌅 𒄠𒄯 𒀀𒈾 𒉌𒊑 𒁁𒇻𒋾𒅀 𒌑𒊕𒉌𒋢𒉡𒋾 | |
𒄿𒈾 𒊩𒅆 𒄫𒊑𒅀 𒀀𒈾 𒆳𒄩𒀜𒋾 𒇻 𒀠𒌨 𒁹𒇻𒇷𒄿 𒈗 𒌷𒍢𒁺𒌦𒉌 𒇧𒄭 𒈨𒇴𒈨 𒁁𒇻𒋾𒅀 𒄑𒄷𒁍𒋗𒈠 𒀀𒈾 𒊒𒊌𒆠 𒌘 𒌓𒁴 𒅔𒈾𒂍 | |
𒌷𒍢𒁺𒌦𒉡 𒃲𒌑 𒌷𒍢𒁺𒌦𒉡 𒍢𒄴𒊒 𒌷𒂍𒍣𒀉𒋼 𒌷𒍝𒊑𒅁𒌅 𒌷𒈠𒄬𒇷𒁀 𒌷𒌑𒋗𒌑 𒌷𒀝𒍣𒁀 𒌷𒀝𒆪𒌑 | |
𒌷𒎌𒋙 𒆗𒉡𒋾 𒂍 𒂦𒎌𒉌 𒀀𒊬 𒊑𒄿𒋾 𒅇 𒈦𒆠𒋾 𒂍 𒌇𒆷𒋾𒋙 𒊏𒊒𒁁 𒄑𒆪 𒀭𒀸𒋩 𒂗𒅀 𒄑𒄷𒁍𒋙𒉡𒋾𒈠 𒅅𒉡𒋙 𒊺𒁍𒌋𒀀 | |
| 35 | 𒁹𒌅𒁀𒀪𒇻 𒄿𒈾 𒄑𒄖𒍝 𒈗𒋾𒋙 𒌋𒅗𒋙𒌦 𒌑𒊺𒈨𒈠 𒄘𒌦 𒎙𒁕𒀜𒌓 𒁁𒇻𒋾𒅀 𒆳𒋾𒌑 𒆷 𒁀𒀜𒇻 𒌑𒆥 𒍢𒊒𒍑𒋙 |
𒊭 𒁹𒈪𒉡𒄭𒅎𒈬 𒌷𒌑𒋛𒈬𒊒𒈾𒀀𒀀 𒁹𒌅𒁀𒀪𒇻 𒌷𒍢𒁺𒌦𒈾𒀀𒀀 𒁹𒀊𒁲𒇷𒀪𒋾 𒌷𒀀𒊒𒁕𒀀𒀀 𒁹𒌑𒊒𒅖𒆠 𒌷𒄖𒌒𒆷𒀀𒀀 | |
𒁹𒈪𒋾𒅔𒋾 𒌷𒊍𒁺𒁕𒀀𒀀 𒁹𒁍𒁺𒀭 𒆳𒂍𒄠𒈠𒈾𒀀𒀀 𒁹𒄰𒈬𒋢𒈾𒀜𒁉 𒆳𒈠𒀪𒁀𒀀𒀀 𒁹𒀭𒀀𒀀𒉘𒈬 𒆳𒌑𒁺𒌝𒈠𒀀𒀀 | |
𒈗𒎌𒉌 𒆳 𒈥𒌅𒆠 𒅗𒇷𒋙𒉡 𒅆𒁲𒂊 𒆳𒇻𒋾 𒋫𒈥𒋫𒋙𒉡 𒅗𒂍𒌅 𒀀𒁲 𒐉𒋙 𒀀𒈾 𒈤𒊑𒅀 𒅖𒋗𒉏𒈠 𒅖𒅆𒄣 𒄊𒅀𒅀 | |
𒅇 𒁹𒍢𒀉𒋡𒀀 𒈗 𒌷𒄑𒋡𒇻𒈾 𒊭 𒆷 𒅅𒉡𒋙 𒀀𒈾 𒉌𒊑𒅀 𒀭𒎌 𒂍 𒀜𒋙 𒃻𒀀𒋙 𒁮𒋢 𒌉𒎌𒋙 𒌉𒊩𒎌𒋙 𒋀𒎌𒋙 𒆰 𒂍 𒀜𒋙 𒊍𒋢𒄩𒄠𒈠 𒀀𒈾 𒆳 𒀸𒋩𒆠 𒌑𒊏𒀾𒋙 | |
| 40 | 𒁹𒈗𒇻𒆕𒊑 𒌉 𒁹𒊒𒄒𒋾 𒈗𒋙𒉡 𒈤𒊒𒌑 𒌋𒅗 𒌦𒎌 𒌷𒄑𒋡𒇻𒈾 𒀾𒆲𒈠 𒈾𒆗 𒄘𒌦 𒆑𒊑𒂊 𒁁𒇻𒋾𒅀 𒂊𒈨𒋢𒈠 𒄿𒃻𒁕 𒀊𒃻𒀀𒉌 |
𒄿𒈾 𒈨𒋾𒅅 𒄫𒊑𒅀 𒌷𒂍𒁕𒃶𒈾 𒌷𒅀𒁍𒌋 𒌷𒁀𒈾𒀀𒀀𒁇𒋡 𒌷𒀀𒍪𒊒 𒌷𒎌 𒊭 𒁹𒍢𒀉𒋡𒀀 𒊭 𒀀𒈾 𒄊𒅀𒅀 𒌒𒌓 𒆷 𒅅𒉡𒋙 𒀠𒈨 𒆳𒌓 𒀾𒇻𒆷 𒊩𒆷𒋢𒌦 | |
𒇽𒄊𒀴𒎌 𒇽𒉣𒎌 𒅇 𒌦𒎌 𒌷𒄠𒃼𒊒𒈾 𒊭 𒁹𒉺𒁲𒄿 𒈗𒋙𒉡 𒂗 𒀀𒁲𒄿 𒅇 𒈠𒁁 𒃻 𒆳 𒀸𒋩𒆠 𒁉𒊑𒌓 𒀭𒁇 𒀉𒁺𒈠 𒀀𒈾 𒁹𒄩𒍝𒆥𒀀𒌑 𒆳𒅀𒌑𒁕𒀀𒀀 𒀉𒁲𒉡𒋙 𒅘𒊕 | |
𒀀𒈾 𒀭𒉣𒇷 𒂊𒁍𒋗 𒅁𒈛 𒊮𒁀𒋙𒌦 𒈗𒎌 𒆳𒈬𒍮𒊑 𒇽𒂟𒎌 𒄑𒉼 𒄑𒇀𒎌 𒀲𒆳𒊏𒎌 𒊭 𒈗 𒆳𒈨𒈛𒄩 𒂊𒈬𒆠 𒆷 𒉌𒁉 𒅅𒋼𒊒𒉏𒈠 𒅋𒇷𒆪 𒊑𒍮𒋢𒌦 | |
𒄿𒈾 𒋫𒂇𒋾 𒌷𒀠𒋫𒄣𒌋 𒂖𒆷𒈬𒌋𒀀 𒋛𒀉𒊒 𒋃𒆪𒉡 𒌑𒃻𒀪𒇻 𒄑𒆪𒎌𒋙𒌦 𒄿𒈾 𒆪𒋾 𒀸𒋩 𒂗𒅀 𒀉𒋾𒋙𒌦 𒄠𒁕𒄭𒄑𒈠 𒀾𒋫𒃶 𒅆𒅆𒋙𒌦 | |
| 45 | 𒇽𒂗 𒄑𒇀𒎌 𒅇 𒌉𒎌 𒈗𒎌 𒆳𒈬𒍮𒊏𒀀𒀀 𒀀𒁲 𒇽𒂗 𒄑𒇀𒎌 𒊭 𒈗 𒆳𒈨𒈛𒄩 𒁄𒂅𒋢𒌦 𒄿𒈾 𒌘 𒌓𒄩𒊑 𒅅𒋗𒁕 𒋗𒅀𒀀𒀀 |
𒌷𒀠𒋫𒄣𒌑 𒌷𒋫𒄠𒈾𒀀 𒀠𒈨 𒆳𒌓 𒀾𒇻𒆷 𒊩𒆷𒋢𒌦 𒀀𒈾 𒌷𒄠𒃼𒊒𒈾 𒀝𒆗𒈠 𒇽𒄊𒀴𒎌 𒇽𒉣𒎌 𒊭 𒄭𒀉𒂅 𒌑𒉺𒅁𒋗𒌑 𒀀𒂁𒈠 𒀸 𒁲𒈠𒀀𒋾 𒋛𒆟𒋾 𒌷 𒀀𒈜 𒄷𒊑𒋙𒌦 | |
𒌉𒎌 𒌷 𒂊𒄫 𒀭𒉌 𒅇 𒆸𒆷𒋾 𒀀𒈾 𒊩𒆷𒋾 𒄠𒉡 𒋛𒀉𒌅𒋼𒋙𒉡 𒆷 𒁀𒉈 𒄭𒁲𒋾 𒅇 𒄢𒈜𒋾 𒊭 𒀀𒊏𒀭𒋙𒉡 𒆷 𒅁𒋗𒌑 𒍑𒋩𒋗𒌦 𒀝𒁉 | |
𒁹𒉺𒁲𒄿 𒈗𒋙𒉡 𒌌𒌅 𒆠𒆗 𒌷𒌨𒊓𒇷𒅎𒈬 𒌑𒊺𒍝𒄠𒈠 𒄿𒈾 𒄑𒄖𒍝 𒁁𒇻𒋾 𒌋𒅗𒋙𒌦 𒌑𒊺𒈨𒈠 𒎙𒁕𒀜𒌓 𒁁𒇻𒋾𒅀 𒌑𒆥 𒍢𒊒𒍑𒋙 | |
𒊭 𒁹𒄩𒍝𒆥𒀀𒌑 𒆳𒅀𒌑𒁕𒀀𒀀 𒐏 𒌷𒎌𒋙 𒂍 𒂦𒎌 𒆗𒉡𒋾 𒅇 𒌷𒎌 𒌉𒎌 𒊭 𒇷𒈨𒋾𒋙𒉡 𒊭 𒉌𒁀 𒆷 𒄿𒋗𒌑 | |
| 50 | 𒄿𒈾 𒉻𒁍𒊻 𒀀𒉘𒈨 𒅇 𒄥𒊒𒌒 𒋗𒉿𒂊 𒁁𒄷𒊻 𒍪𒊌 𒄊𒅀 𒉈𒅆 𒊩𒌨𒋛 𒅇 𒆗𒁀𒈾𒋾 𒀠𒈨 𒀝𒋤𒌓 |
𒈫 𒈨 𒅆 𒁹 𒈨 𒐐 𒌦𒎌 𒌉 𒃲 𒍑 𒌋 𒊩 𒀲𒆳𒊏𒎌 𒀲𒋙𒀯𒎌 𒀲𒎌 𒀲𒃵𒂷𒎌 𒄞𒎌 𒅇 𒇇𒇻𒄭𒀀 𒃻 𒆷 𒉌𒁉 𒌌𒌅 𒄫𒁉𒋙𒌦 𒌑𒊺𒍝𒄠𒈠 𒊩𒆷𒁹 𒄠𒉡 | |
𒃻𒀀𒋙 𒁶 𒄷 𒄣𒌒𒉿 𒆠𒆗 𒌷𒌨𒊓𒇷𒅎𒈠 𒌷 𒈗𒋾𒋙 𒂊𒁍𒋗 𒌷𒄬𒍮𒎌 𒌋𒅗𒋙 𒌑𒊩𒆧𒈠 𒀀𒍢𒂊 𒆍𒃲 𒌷𒋙 𒌑𒌁𒊏 𒅅𒆠𒁍𒍑 | |
𒌷𒎌𒋙 𒊭 𒀾𒇻𒆷 𒌌𒌅 𒆠𒆗 𒆳𒋙 𒀊𒌇𒈠 𒀀𒈾 𒁹𒈪𒋾𒅔𒋾 𒈗 𒌷𒊍𒁺𒁲 𒅇 𒁹𒉺𒁲𒄿 𒈗 𒌷𒄠𒃼𒊒𒈾 𒁹𒄑𒈪𒂗 𒈗 𒆳𒄩𒍣𒋾 𒀜𒁷 𒌑𒍝𒄴𒄭𒅕 𒆳𒋢 | |
𒂊𒇷 𒄘𒌦 𒈤𒊑𒋾 𒈾𒁕𒀭 𒆳𒋾𒋙𒌦 𒎙𒁕𒀜𒋾 𒆑𒊑𒂊 𒁁𒇻𒋾𒅀 𒌑𒋥𒁲𒈠 𒌑𒆥 𒍢𒊒𒍑𒋙𒌦 | |
| 55 | 𒋗𒌑 𒁹𒄩𒍝𒆥𒀀𒌑 𒁍𒌌𒄭 𒈨𒇴𒈨 𒁁𒇻𒋾𒅀 𒄑𒄷𒁍𒋙𒈠 𒇽𒌫𒁉 𒇽𒂟𒎌𒋙 𒅆𒂟𒎌 𒊭 𒀀𒈾 𒂄𒉡𒌦 𒌷𒌨𒊓𒇷𒅎𒈬 𒌷 𒈗𒋾𒋙 𒌑𒊺𒊑𒁍𒈠 𒅕𒋗𒌋 𒌀𒆷𒀀𒋼 |
𒌍 𒄘𒌦 𒆬𒄀 𒐍 𒈨 𒄘𒌦 𒆬𒌓 𒉌𒋝𒋾 𒄖𒄴𒇷 𒁖𒄤𒋛 𒎎𒀭𒍝𒄢𒈨 𒃲𒎌 𒄑𒈿𒎌 𒅗 𒄑𒄖𒍝𒎌 𒉌𒈨𒁲 𒅗 𒋢 𒄠𒋛 𒅗 𒄠𒋛 𒄑𒆗 𒄑𒌆 𒇻𒇧𒋾 𒄵𒈨 𒌆𒃰 𒋠𒋫𒆸𒌓 𒋠𒅈𒂵𒎙𒉡 | |
𒌑𒉡𒌓 𒌓𒅗𒁇 𒀭𒁇 𒍏 𒀭𒈾 𒀭𒁇 𒄑𒇀𒎌 𒂵𒁀𒁉 𒊍𒈠𒊑𒂊 𒋛𒊑𒅀𒄠 𒄈𒎌 𒀭𒁇 𒈨𒁉 𒌀𒉺𒉌 𒌋 𒊻𒍢 𒌀𒇷 𒌑𒉡𒌓 𒋫𒄩𒍣 𒃻 𒉌𒁀 𒆷 𒄿𒋗𒌑 | |
𒀉𒋾 𒌉𒊩𒎌𒋙 𒊩𒌦𒎌 𒂍𒃲𒋙 𒇽𒈜𒎌 𒊩𒈜𒎌 𒀀𒈾 𒆠𒆗 𒀏𒆠 𒌷 𒁁𒇻𒋾𒅀 𒂕𒅀 𒌑𒊺𒁉𒇴𒈠 𒀀𒈾 𒈾𒆗 𒎙𒁕𒀜𒋾 𒅇 𒂊𒄫 𒀴𒌑𒋾 𒅖𒁍𒊏 𒊩𒁍𒋙 | |
𒄿𒈾 𒊩𒆷𒀜 𒆳𒎌 𒃻𒋾𒈾 𒊭 𒀾𒇻𒆷 𒌋 𒅆 𒄑𒉼 𒌋 𒅆 𒄑𒀀𒊑𒌓 𒀸 𒊮𒁉𒋙𒉡 𒀝𒀫𒈠 𒌋𒅗 𒆠𒈲 𒈗𒋾𒅀 𒌑𒋥𒁲 | |
| 60 | 𒋛𒀉𒋾 𒊩𒆷𒋾 𒈾𒆠𒊑 𒅗𒂍𒌅 𒀀𒈾 𒄀𒂇 𒆠𒆘𒅀 𒅇 𒇽𒂗𒉆𒎌𒅀 𒌦𒎌 𒈠𒄩𒍝𒉌𒅀 𒃲𒎌 𒆠𒈠 𒍢𒂊𒉌 𒇻 𒌑𒍝𒀪𒄑 |
𒄿𒈾 𒌓𒈨𒋗𒈠 𒀏𒆠 𒈠𒄩𒍪 𒍢𒄿𒊒 𒌷 𒈾𒉘 𒀭𒅖𒋻 𒊭 𒀮𒄯 𒆠𒁺𒁲𒂊 𒀭𒎌 𒅇 𒀭𒅖𒋻𒎌 𒁀𒋗𒌋 𒆠𒆗𒋗 | |
𒁴𒈨𒂗𒉡 𒁕𒊒𒌑 𒁺𒊒𒍑 𒍝𒀀𒋾 𒊭 𒌌𒌅 𒌌𒆷 𒀉𒋾 𒅆𒋛𒀀 𒁍𒊒𒌑𒈨 𒄑𒋥𒋢 𒄑𒈩𒈠 𒋗𒁍𒌑 𒍢𒅔𒁺𒋗 | |
𒀾𒊒 𒅘𒇻 𒋗𒁁 𒉿𒊕𒋾 𒊭 𒊩𒈠 𒋳𒋗 𒅆𒌓 𒉌𒆸𒋾 𒄀𒂇 𒉈𒇻𒁲𒂊 𒉌𒈲𒋾 𒋭𒃻 𒋗𒋫𒁍𒆷 𒆠𒆗𒋗 | |
𒊭 𒌌𒌅 𒌌𒆷 𒈗𒎌𒉌 𒀀𒇷𒋻 𒈤𒊑 𒀜𒎌𒅀 𒌌𒆷𒉡𒌋𒀀 𒁁𒇻𒋾 𒆳 𒀸𒋩𒆠 𒂊𒁍𒋗𒈠 𒌑𒈠𒀪𒅕 𒁀𒀪𒆳 𒀭𒂗𒆤 | |
| 65 | 𒅇 𒆳𒋾𒌑 𒆷 𒈾𒌓𒅗𒀀 𒂊𒆗 𒈜𒁀𒀀𒋾 𒄘𒌦 𒂷𒆠 𒄒𒋥 𒅈𒁀𒀪 𒅎𒁕𒈾𒄩𒊒 𒆠𒆗𒋗 |
𒀀𒀀𒌝𒈠 𒀸 𒊮𒁉𒋙𒉡 𒀀𒈾 𒂍𒃲 𒄫𒁉𒋗 𒉈𒈬 𒊑𒁁 𒁁𒇻𒋾 𒊭 𒍮𒄴𒄷𒊒 𒋗𒁁𒋢 𒇷𒂊𒋢 𒌌 𒀉𒁕𒀀 𒈜𒁍𒍑 𒌌 𒄴𒋢𒊻 | |
𒀀𒈾 𒋗𒋼𒋩 𒋻 𒌷 𒅇 𒋳𒇯 𒊑𒁀𒀀𒋾 𒄩𒊑𒂊 𒀀𒇉 𒍝𒋡𒀊 𒍦𒉺𒀀𒋾 𒌑𒍪𒌦𒋙 𒌌 𒅁𒅆𒈠 𒌌 𒍑𒋫𒉈 𒅗𒆜𒋢 | |
𒅀𒀀𒋾 𒁹𒀭𒂗𒍪𒋀𒎌𒌷𒁀 𒈗 𒆳 𒀸𒋩𒆠 𒂊𒄫 𒈨𒊑 𒋗𒀀𒌅 𒆠𒄿 𒉈𒅎 𒀭𒎌 𒄿𒈾 𒊻𒉌𒅀 𒅁𒅆𒈠 𒅗𒁁𒋾 𒌒𒇴𒈠 | |
𒋼𒉈𒋃 𒆳𒆗𒁲 𒇽𒀀𒊏𒈨 𒆳𒎙𒈾𒀀𒀀 𒆳𒄣𒂊 𒆳𒄭𒋃𒆪 𒆳𒉿𒇺𒌅 𒅇 𒆳𒀫𒊑 𒊭 𒀀𒈾 𒉌𒊑𒅀 𒆷 𒅅𒉡𒋙 𒊍𒋢𒄩𒄠𒈠 𒁾𒋝𒆪 𒌑𒃻𒀾𒅆𒋙𒉡𒋾𒈠 𒅋𒁉𒉡 𒋞 | |
| 70 | 𒀀𒉿 𒆪𒉿𒂊 𒊭 𒆠𒆗 𒆳𒆗𒁲 𒀝𒋃𒈠 𒀊𒉺𒊑𒋙𒌦 𒌑𒄷𒋾 𒄿𒈾 𒁀𒄷𒆷𒋾 𒈾𒆠𒊑 𒆠𒋃𒋾 𒋗𒅀𒅀 𒌑𒊩𒁲𒁕 𒀀𒈾 𒂊𒄫 𒈨𒊑𒃻 |
𒂍𒃲 𒈤𒊑𒌅 𒊭 𒐈 𒈨 𒐕 𒀸 𒁹𒌑 𒍑 𒋻𒍢 𒍝𒈨𒂊 𒂍 𒍨𒄥𒋥 𒐕 𒀸 𒁹𒌑 𒂼 𒄿𒈾 𒋻𒍢 𒂍𒈾𒈠𒊑 𒂍 𒀭𒅖𒋻 𒁹 𒈨 𒌍 𒀸 𒁹𒌑 𒂼 𒄿𒈾 𒋻𒍢 𒂍𒈾𒈠𒊑 𒂍𒃰𒈬𒊑 𒐕 𒀸 𒁹𒌑 𒂼 | |
𒊭 𒈗𒎌𒉌 𒀀𒇷𒋻 𒈤𒊑 𒀜𒎌𒅀 𒀀𒈾 𒊑𒁁 𒁁𒇻𒋾𒋙𒌦 𒌑𒊺𒉿𒋗𒈠 𒆷 𒌑𒅘𒆠𒇻 𒅆𒌓𒃻 | |
𒀀𒇉𒋼𒉈𒋾 𒀀𒄖𒌑 𒋃𒈬𒊒 𒊭 𒄿𒈾 𒈾𒅆𒃻 𒄀𒄖𒉌𒂊 𒋡𒁄𒋾 𒌷 𒌑𒀊𒁉𒌅𒈠 𒆠𒈤𒄭𒋙𒌦 𒉺𒊍𒊒𒋾 𒌑𒆗𒇷𒈬 𒀭𒌓𒋙 | |
𒅇 𒌌𒌅 𒌓𒈨 𒋤𒎌 𒁲𒄴 𒂍𒃲 𒄿𒁀𒀪𒌑𒈠 𒄿𒈾 𒀀𒆗𒃻 𒃮𒅆 𒄿𒈾 𒍑𒅆𒃻 𒀊𒁍 𒌑𒉺𒅁𒋗𒌑 𒌑𒊑𒁍 𒁴𒈨𒂗𒃻 | |
| 75 | 𒂍𒃲𒌉𒊏 𒃻𒀀𒌅 𒀀𒈾 𒋛𒆟𒋾𒃻 𒀝𒄥𒈠 𒊭 𒀀𒇉𒋼𒉈𒋾 𒈠𒋃𒃻 𒍑𒋼𒌍𒈾𒀀 𒀊𒁍 𒍑𒁳𒈠 𒌑𒊺𒋓 𒈬𒍮𒌋𒃻 |
𒆠𒆗 𒅗𒁴𒋾 𒀀𒋩𒊩𒆪 𒉺𒅁𒆷𒀀𒉡 𒄀𒎌 𒂊𒆷𒎙 𒎎 𒆳𒄿 𒆗𒉌 𒀉𒋾 𒀀𒇒𒌓𒀀 𒀝𒋛𒈠 𒀀𒊮 𒌌𒌅 𒈠𒀀𒈨 𒌑𒊺𒇴𒈠 𒈾𒁀𒇺 𒌑𒌁 | |
𒐌 𒈨 𒀸 𒁹𒌑 𒆹𒈝 𒃲𒋾 𒍑 𒁹 𒈨 𒐕 𒀸 𒆹𒈝 𒃲𒋾 𒊕𒆠 𒀭𒋫 𒅎𒋛𒁲 𒈫 𒈨 𒐕 𒀸 𒆹𒈝 𒃲𒋾 𒊕𒆠 𒌘𒋾 𒈪𒄴𒈩 𒍝𒈨𒂊 𒀜𒎙𒉌 𒆪𒊑 𒀭𒅖𒋻 | |
𒐈 𒈨 𒐕 𒀸 𒆹𒈝 𒃲𒋾 𒊕𒆠 𒃮𒇷𒌈 𒃻𒉌𒌓 𒈬𒄴𒄯𒋾 𒃻𒀀𒊑 𒀀𒄯𒊑 𒆪𒊑 𒂍 𒍨𒄥𒋥 𒂍 𒀭𒅖𒋻 | |
𒐈 𒈨 𒐕 𒀸 𒆹𒈝 𒃲𒋾 𒊕𒆠 𒆠𒋫 𒅎𒍇𒇻 𒍑𒊓𒁺 𒀀𒇉 𒌓𒆷𒀀 𒌑𒂷𒇷𒈠 𒄠𒋗𒄴 𒈨𒅆𒄴𒋫 | |
| 80 | 𒆷𒁀𒊕 𒌓𒈨 𒀸 𒀀𒆗 𒆧𒃻𒋾 𒁴𒈨𒂗𒋙 𒆷 𒂊𒉌𒊺 𒊍𒁺𒉻 𒎎𒉿𒄿𒇷 𒊐𒁀𒀀𒋾 𒆠𒄑𒋢𒌑𒋗 𒌑𒃻𒊍𒄭𒊏 𒌑𒆗𒉌𒈾 𒋗𒁍𒊌𒋗 |
𒈬𒊬𒂊 𒅆𒋛𒀀 𒋗𒈪𒅀 𒁹 𒈨 𒐕 𒋾𒅁𒆠 𒌓𒇷𒄿 𒆠𒆗𒋗 𒀠𒂅𒌨𒈠 𒉺𒅁𒆷𒉡 𒀸 𒍑𒅆𒋗 𒂊𒍦 𒄴𒊏𒌨 | |
𒅈𒅗𒀀𒉡 𒋗𒍑𒄣𒌑 𒌓𒇷𒄿 𒅗𒁁𒋾 𒌒𒇴𒈠 𒎙 𒋾𒅁𒆠 𒍢𒅕 𒈤𒊑𒄿 𒊻𒍦𒈠 𒁹 𒈨 𒐕 𒋾𒅁𒆠 𒌑𒊕𒆠 𒂊𒆷𒎙 | |
𒋻𒉺𒋗𒌑 𒌋𒅗 𒊭 𒌓𒈨 𒉺𒉌 𒌑𒊬𒁉 𒍢𒅕 𒈨𒅆𒄴𒋾 𒂍𒃲 𒈤𒊑𒋾 𒌑𒋥𒁲𒈠 𒌑𒃻𒀭𒁲𒆷 𒅆𒆤𒌨 | |
𒂍𒃲 𒎎𒄑𒉢𒃲 𒅗 𒄠𒋛 𒄑𒆗 𒄑𒌆 𒄑𒈬𒆹𒃶𒉌 𒄑𒂞 𒄑𒋩𒎙 𒄑𒋰𒊏𒉌 𒋆𒇷 𒅇 𒄑𒁍𒌓𒉌 𒂍𒃲𒍠𒁲𒉡𒌇𒀀 𒀀𒈾 𒈬𒉺𒅁 𒈗𒋾𒅀 𒌑𒊺𒉿𒃻 𒆠𒆗𒃻 | |
| 85 | 𒄑𒊬𒈤𒄷 𒌓𒋻 𒆳𒄩𒈠𒉏 𒊭 𒄀𒂇 𒋆𒄭𒀀 𒄧 𒍦𒉺𒀀𒋾 𒄑𒎌 𒌇𒆳 𒆳𒄿 𒅇 𒆳𒆗𒁲 𒆠𒆗𒋗 𒄯𒊒𒋗 𒄿𒋫𒀀𒃻 𒊍𒄣𒌒 |
𒀾𒋙 𒍝𒋡𒀊 𒍦𒉺𒀀𒋾 𒀀𒊮 𒋫𒂇𒋾 𒂊𒇷𒂗 𒌷 𒑖𒋫𒀀𒀭 𒀀𒈾 𒌉𒎌 𒀏𒆠 𒉈𒆪 𒌑𒁄𒌨𒈠 𒌑𒆳𒄀𒆷 𒉺𒉡𒍑𒋙𒌦 | |
𒀀𒈾 𒁁𒊏𒀀𒋾 𒋳𒈬𒄭 𒌌𒌅 𒉺𒀀𒁲 𒌷𒆠𒋛𒊑 𒀀𒁲 𒋫𒂇𒋾 𒀏𒆠 𒆳𒀀 𒅇 𒁉𒊒𒌓 𒀸 𒀝𒆰𒆷𒀀𒋾 𒌑𒆳𒌁𒈠 𒌑𒊺𒋓 𒀀𒇉𒄯𒊒 | |
𒁹 𒁹 𒆜𒁍 𒆕𒋡𒊒 𒌌𒌅 𒆠𒆗 𒀀𒇉𒄷𒋢𒌨 𒈠𒀀𒈨 𒁕𒊒𒌑𒋾 𒀀𒊬𒃻 𒌑𒊬𒁕𒀀 𒆠𒆗 𒍦𒉺𒀀𒋾 𒃻𒋾𒈾 𒌑𒋚𒁉𒁀 𒉻𒋾𒅖 | |
𒊭 𒀏𒆠 𒌷 𒁁𒇻𒋾𒅀 𒋗𒁁𒋢 𒍑𒊐𒁉 𒊑𒁀𒋾𒋙 𒌑𒃻𒀭𒀸𒈠 𒁉𒊑𒂊𒋾 𒅇 𒋢𒋡𒀀𒉌 𒍑𒌓𒁲𒈠 𒌑𒉆𒂇 𒁶 𒌓𒈨 | |
| 90 | 𒄿𒈾 𒈪𒄴𒈩 𒆍𒃲 𒌘 𒌷 𒄿𒈾 𒀀𒃵𒊑 𒎎𒉿𒄿𒇷 𒉿𒍢𒂊 𒀀𒈾 𒈨𒋾𒅅 𒁁𒇻𒋾𒅀 𒌑𒊕𒁉𒄑 𒋾𒌉𒊒 |
𒈬𒊬𒀀 𒌑𒊺𒄫𒈠 𒇷𒄿𒌓 𒅇 𒁕𒈾𒉡 𒊭 𒄿𒈾 𒆪𒋾 𒀸𒋩 𒂗 𒃲 𒂗𒅀 𒌋𒅗 𒆰𒆳 𒈾𒆠𒊑 𒀾𒋳𒅗𒉡 | |
𒅇 𒊩𒈠 𒅁𒋃 𒂊𒁳𒁍𒋗 𒆠𒆗𒋗 𒌑𒆳𒋛𒀀𒈠 𒄿𒈾 𒁴𒈨𒂗𒉌 𒂍𒃲 𒁁𒇻𒋾𒅀 𒂊𒍦 𒄴𒊏𒌨 | |
𒀀𒈾 𒅈𒆑 𒌓𒈨 𒄿𒈾 𒈗𒎌𒉌 𒌉𒎌𒅀 𒊭 𒀭𒀸𒋩 𒀀𒈾 𒊑𒂍𒌝𒌓 𒆳 𒅇 𒌦𒎌 𒄿𒉆𒁍𒌋 𒍣𒄫𒋗 𒂊𒉡𒈠 𒂍𒃲 𒃻𒀀𒌅 𒄿𒆗𒁉𒊒𒈠 𒂗𒈾𒄷 | |
𒀭𒄷𒊓 𒇻𒌓𒁹 𒈬𒊬𒀀 𒅆𒋛𒀀 𒋗𒈪𒅀 𒇷𒄯𒈠 𒉌𒄑 𒈜𒋗𒍑 𒇻𒀬 𒌨𒆠 𒀀𒈾 𒀾𒊑𒋙 𒇷𒌁 𒀭𒀸𒋩 𒅅𒊑𒁉𒋗 𒄿𒋆𒈨 | |
| 95 | 𒁹 𒍑 𒌍𒋫𒀀𒀭 𒈬𒀸𒀸 𒈬𒊬𒂊 𒌗𒄞𒋛𒁲 𒇷𒈬 𒁹𒈪𒌅𒉡 𒇽𒃻𒆳 𒌷𒄿𒊓𒈾 |