[This cuneiform text was computer-generated from a transliteration. See this page for trouble-shooting tips.]
1 | 𒁹𒈗𒄀𒈾 𒃻𒀝𒉡 𒀭𒂗𒆤 𒉡𒀊 𒁀𒀪𒀉 𒀭𒀀𒋩 𒉌𒋃 𒅆𒅀 𒀭𒀀𒉏 𒅇 𒀭𒁕𒃶 |
𒈗 𒃲𒌑 𒈗 𒆗𒉡 𒈗 𒆧 𒈗 𒆳 𒀸𒋩𒆠 𒈗 𒄒𒋥 𒅈𒁀𒀪 𒈪𒄫 𒀭𒎌 𒃲𒎌 | |
𒊑𒂍𒌝 𒆠𒂊𒉡 𒊭 𒀭𒀀𒋩 𒀭𒀫𒌓 𒈗𒌓 𒆷 𒃻𒈾𒀭 𒌑𒆳𒇷𒈬𒋗𒈠 𒍣𒄫 𒈬𒋗 𒌑𒊺𒄑𒍮𒌑 𒀀𒈾 𒊑𒊺𒂊𒋼 | |
𒃻𒆥 𒋗𒁀𒊑𒂊 𒌓𒄒𒉣𒆠 𒂗𒆤𒆠 𒆍𒀭𒊏𒆠 𒄩𒀀𒁷 𒂗𒋗𒋼𒋙𒉡 𒈬𒊩𒇷𒈬 𒄭𒉈𒋾𒋗𒌦 | |
5 | 𒅗𒈲 𒆠𒁷𒉡𒌅 𒁄𒌀𒆠 𒁀𒁲𒅋𒌅 𒈬𒃻𒀾𒅆𒅅 𒁾𒋝𒆠 𒂦𒀭𒆠 𒈬𒉺𒅁𒅆𒄷 𒌦𒎌𒋗𒌦 |
𒇷𒀪 𒆕 𒂷𒆠 𒊭 𒌋𒅗 𒌷𒄯𒊏𒈾 𒀭𒊨𒆷𒋗 𒀉𒊒𒍮𒈠 𒆠𒄿 𒍝𒀊 𒀭𒀀𒉏 𒌋 𒀭𒁕𒃶 𒅖𒂅𒊒 𒍝𒋻𒋢 | |
𒍣𒅗𒊒 𒆗𒉡 𒄩𒈜 𒈾𒄯𒊏𒋾 𒊭 𒀀𒈾 𒋳𒋻 𒈾𒆠𒊑 𒋗𒌓𒁍𒌑 𒄑𒆪𒎌𒋗 | |
𒈗 𒊭 𒌌𒌅 𒌓𒌝 𒁁𒇻𒋾𒋗 𒂷𒆪 𒃮𒊏𒀀𒋗 𒆷 𒅁𒋗𒈠 𒄿𒈾 𒃮𒇷 𒅇 𒋫𒄩𒍣 𒆷 𒂊𒈬𒊒 𒈬𒉌𒄴𒄷 | |
𒆳𒆳 𒆕𒅆𒈾 𒆠𒈠 𒋻𒁁𒋾 𒌑𒁖𒆥𒄣𒈠 𒄩𒄠𒈠𒈪 𒊭 𒅈𒁀𒀪 𒀉𒁺𒌑 𒈲𒊑𒂊𒌅 | |
10 | 𒄯𒃻𒀀𒉌 𒁉𒊒𒌑𒋾 𒊭 𒉌𒆗𒋙𒉡 𒀾𒂅 𒆷𒀀 𒈪𒈾 𒅁𒌅𒈠 𒂊𒈬𒊒 𒁺𒊒𒊌𒋗𒌦 |
𒂅𒁕𒀜 𒆷 𒀪𒀀𒊑 𒉺𒀾𒋡𒀀𒋾 𒊭 𒀀𒊬𒅆𒈾 𒉻𒂁𒁺 𒂊𒋫𒀜𒋾𒄣𒈠 𒂊𒋼𒅁𒁉𒊒 𒈾𒃮 𒁁𒊏𒀀𒋾 | |
𒅖𒌅 𒆳𒊏𒀀𒅆 𒈪𒈲 𒆳𒂊𒇴𒋾 𒇽𒁍𒄣𒁺 𒇽𒁕𒈬𒉡 𒌷𒂦𒆪𒊑𒃲𒍣 𒌷𒊏𒉿𒄣 | |
𒆳𒁇 𒆕𒀀𒁉 𒀀𒁲 𒈾𒄬 𒆳𒈬𒊻𒊑 𒆳 𒀀𒄯𒊑𒂊 𒂼𒌈 𒆳𒉺𒋾 𒀀𒈾 𒋛𒆟𒋾𒃻 𒄿𒁁𒇻 | |
𒅖𒌅 𒆳𒄩𒀾𒈥 𒀀𒁲 𒆳𒍢𒁇 𒉻𒋾 𒆳𒈠𒁕𒀀𒀀 𒊒𒄣𒋾 𒊭 𒍢𒀉 𒀭𒌓𒅆 𒆳𒉆𒊑 𒆳𒂖𒇷𒁉 | |
15 | 𒆳𒂍𒄩𒄠𒉼 𒆳𒌓𒋢𒀀 𒆳𒈠𒀭𒈾𒀀𒀀 𒆳𒌨𒅈𒂅 𒆳𒆜𒆪 𒆳𒋫𒁀𒈝 𒀀𒁲 𒆳𒈬𒊻𒆠 𒅅𒋗𒁺 𒃲𒌈 𒋡𒀀𒋢 |
𒇽𒋗𒌓 𒊕𒎌𒋙 𒊕𒉡𒋾 𒌋𒅗𒋙𒉡 𒅖𒋳𒅗𒉡𒈠 𒉈𒌅 𒈠𒁕𒀜𒌅 𒆠𒄿 𒊭 𒀾𒋗𒊑 𒂊𒅂𒋢𒉡𒋾 | |
𒀉𒇻 𒃼𒁺 𒊭 𒄿𒈾 𒊑𒂍 𒂦𒀭𒆠 𒀉𒋾 𒁹𒀭𒈝𒁀𒉌𒂵𒀾 𒈗 𒆳𒂊𒇴𒋾 𒅔𒉆𒊒𒈠 𒅖𒆪𒉡 𒈭𒋫𒀀𒋗 | |
𒈾𒋛𒄴 𒇽𒆳𒋼𒊓𒀀𒀀 𒈬𒁄𒇷𒆪 𒄖𒌦𒉌𒋗 𒃻𒇸 𒆳𒌅𒀪𒈬𒈾 𒊭 𒇽𒈾𒋝𒋙𒉡 𒄿𒉿𒁺𒈠 𒌨𒊒𒌑 𒈠𒄯 𒈗 𒆳𒆗𒁲 | |
𒈬𒊑𒅁 𒆳𒂍𒄷𒌝𒊑𒀀 𒊐𒅆 𒊭 𒄿𒈾 𒌷𒊏𒉿𒄭 𒅆𒅆𒌑 𒆳𒈬𒊻𒊑 𒃻𒉡𒈠 𒁹𒄩𒀀𒉡𒉡 𒈗 𒌷𒄩𒍣𒋼 𒅗𒈬𒊻𒋢 𒌑𒊺𒊑𒁀 𒌷𒀸𒋩 | |
20 | 𒅗𒋃 𒇽𒋫𒈬𒁲 𒇽𒄿𒁀𒁲𒁲 𒇽𒈥𒋛𒄿𒈠𒉌 𒇽𒄩𒅀𒉺𒀀 𒊭 𒋛𒀉𒋫𒋙𒉡 𒅔𒉌𒀉𒋡𒄠𒈠 𒌑𒊬𒈬𒌑 𒆠𒆗 𒆳𒂍𒄷𒌝𒊑𒀀 |
𒇷𒀪 𒌓𒄩𒊑 𒊭 𒄿𒈾 X 𒌓𒁴 𒆳𒅀𒄠𒈾𒀀𒀀 𒊓𒀭𒁕𒎙 𒆠𒈠 𒉡𒌑𒉌 𒄿𒁀𒊒𒈠 𒌑𒉺𒅁𒅆𒄷 𒆳𒄣𒂊 𒅇 𒌷𒀫𒊑 | |
𒈗 𒁕𒉿𒉡 𒈬𒌓𒊑𒀪 𒅈𒈠𒄭 𒌷𒅆𒉡𒄴𒋾 𒈬𒉆𒈪 𒁕𒄉𒈪𒃻 𒊭 𒁹𒆠𒀝𒆠 𒈗𒋙𒉡 𒌑𒆷𒄿𒂅 𒄀𒅖𒄀𒉌𒅖 | |
𒈬𒉌𒄑𒋛 𒆳𒂍𒁍𒊒𒋫𒀾 𒊭 𒁹𒄠𒁀𒊑𒄑 𒈠𒌨𒋙𒉡 𒁕𒈪𒅅𒋾 𒁹𒈗𒄀𒈾 𒅎𒋗𒈠 𒌋𒅗 𒈗 𒆳𒌨𒅈𒁲 𒌋 𒆳𒈬𒊻𒆠 𒀉𒋳𒇻 | |
𒄿𒁕𒀭 𒄷𒆷𒀀𒋼 𒁕𒈩 𒁹𒈪𒋫𒀀 𒈗 𒆳𒈬𒊻𒆠 𒈬𒌁 𒄬𒍢 𒆳𒄣𒂊 𒅅𒈬𒋼 𒈬𒊐𒉿𒋗 𒁍𒇻𒌦𒄀𒋗𒌦 | |
25 | 𒆤𒊒𒁺 𒆷 𒀀𒋛𒀀 𒌇𒈠𒋼 𒈾𒋛𒄴 𒋩𒍑 𒆳𒀀𒈠𒀜𒋼 𒊭 𒈠𒊕 𒁹𒄿𒇻𒁉𒀪𒁲 𒄩𒄠𒈠𒀪𒄿 𒄑𒊒𒁍 𒈾𒁀𒋛𒅖 |
𒈾𒁉𒀪 𒆳𒃻𒂵𒈩 𒆳𒄩𒀜𒋼𒂊 𒅆𒉌 𒊭 𒁹𒉿𒋛𒄿𒊑 𒁕𒆸 𒉺𒉌𒋙𒉡 𒁕𒁉𒅁 𒍝𒈜𒋼 𒅅𒋗𒁺 𒃲𒌈 𒋡𒀀𒋢 | |
𒈬𒋚𒆗 𒆳𒌨𒅈𒁲 𒃻𒇸 𒆳𒈬𒍝𒍢𒊑 𒊭 𒁹𒌨𒊓𒀀 𒈗 𒆳𒌨𒅈𒁲 𒀸 𒁍𒈛𒋾𒋗 𒃲𒋾 𒀸 𒄑𒆪 𒊏𒈠𒉌𒋙 𒌑𒋡𒋫𒀀 𒈾𒄫𒆪 | |
𒈬𒅘𒄫 𒋗𒁁 𒌷𒉺𒀀𒉺 𒌷𒆷𒇻𒊌𒉌 𒌷𒆹𒆠𒀀 𒌷𒁀𒀀𒆷 𒌷𒀀𒁉𒋾𒅅𒈾 𒊭 𒀀𒈾 𒆳𒅗𒀝𒈨𒂊 𒀉𒁍𒁍 𒈾𒁀𒁲𒅖 | |
𒊓𒉿𒅔 𒆳𒀭𒁲𒀀 𒆳𒍣𒄫𒋼 𒊭 𒄀𒂇 𒁀𒄷𒆷𒋼𒋙𒉡 𒊍𒇷𒅖 𒌑𒁕𒁉𒄷𒈠 𒆰𒆳 𒈾𒆠𒊑 𒄑𒇻𒄷 𒄿𒆳 𒈬𒌑𒋾 | |
30 | 𒈠𒀀𒀪 𒂵𒂇 𒂄𒉌 𒅇 𒀀𒁀𒊑 𒈬𒋠𒎙 𒆳𒈠𒁕𒀀𒀀 𒆷 𒃶𒋗𒋼 𒃻𒀀𒄑 𒌦𒎌 𒆳𒄯𒄯𒆠 𒈬𒊬𒁍𒌑 𒈪𒈲 𒆳 𒀸𒋩𒆠 |
𒈬𒉺𒆟 𒆳𒈠𒀭𒈾𒀀𒀀 𒊓𒀊𒄭 𒈬𒋫𒆠𒅔 𒆳𒂖𒇷𒁉 𒊑𒄭 𒊭 𒈗𒌓 𒆳𒆳 𒆠𒇲𒆷𒀭 𒌑𒆥𒉡𒈠 𒌑𒊬𒊑𒄷 𒍣𒄫𒋗 | |
𒁕𒀀𒅖 𒆳𒆸𒄭 𒊭 𒋛𒅖𒆳 𒆳𒂊 𒇽𒉽 𒅅𒍢 𒊭 𒁹𒀉𒋾𒄿 𒆳𒀠𒆗𒊏𒀀𒀀 𒁀𒊏𒀀𒉡𒌑 𒌑𒊺𒄑𒍮𒌑 𒌷𒍑𒋗 | |
𒈬𒀊𒂍 𒆳𒋼𒀀𒀠𒆷 𒊭 𒉺𒀀𒊑 𒁹𒀭𒀀𒋩𒇷𒀪 𒇽𒂗𒌷𒋙𒉡 𒅋𒇻𒊑𒅖 𒌑𒋛𒈬𒈠 𒁹𒀀𒁕𒀀 𒆳𒋩𒁕𒀀𒀀 𒂊𒈨𒁺 𒉌𒊑 𒀸𒋩 | |
𒈗 𒀉𒉿𒂊𒋗 𒈲𒋫𒉈 𒀀𒆳 𒅆𒂟𒁴 𒀀𒈾 𒋗𒋗𒌒 𒈾𒈨𒂊 𒈾𒁺𒋼 𒅇 𒉿𒋼𒂊 𒆠𒊒𒁉𒂊 𒍝𒆏 𒍦𒉺𒀀𒋼 𒅖𒆪𒉡 𒌑𒍪𒌦𒋗 | |
35 | 𒌑𒄷𒌝𒈪 𒍠𒊒𒋾 𒊭 𒌌𒌅 𒌌𒆷𒀀 𒄿𒈾 𒄫𒁉𒋗𒌦 𒌨𒆥𒌅 𒆷 𒋗𒍝𒀜 𒉈𒌅 𒋗𒍑𒊺𒂊 𒀫𒊒𒍑 𒍑𒋫𒉈𒈠 |
𒆠𒃲𒈝 𒋗𒄴𒊒𒌒𒌅 𒊭 𒄿𒈾 𒈗𒎌𒉌 𒈤𒊒𒋼 𒄑𒀳 𒆷 𒄿𒁺𒌑 𒂡𒀪 𒋗𒍪𒍣𒅎𒈠 𒂄𒋛𒂊 𒀀𒆷𒆷 𒊮𒁀𒋙 𒌒𒇴𒈠 | |
𒅔𒉌 𒋫𒂇𒋾 𒆷 𒆪𒌒𒉿 𒅗𒊏𒀜𒌅 𒉿𒋼𒂊𒈠 𒆠𒄿 𒄀𒄫 𒂊𒁲𒄿 𒀀𒎌 𒉡𒄴𒅆 𒋗𒍑𒆠𒄿 𒂊𒇺 𒅇 𒉺𒅁𒇺 | |
𒈗 𒉿𒀉 𒄩𒋛𒋛 𒇷𒀪 𒄿𒉌 𒅗𒆷𒈠 𒊿𒈾𒀜 𒉣𒈨 𒊭 𒄿𒈾 𒅖𒆠 𒅇 𒉌𒈨𒆥 𒅕𒁍𒈠 𒄿𒈾 𒋫𒋆𒋾 𒄿𒊺𒂊𒄷 | |
𒈠𒀜 𒀸𒋩𒆠 𒊏𒉺𒀾𒌈 𒋾𒀪𒌑𒌅 𒎙𒁉𒂊 𒅇 𒁍𒂁 𒊮𒁉 𒋾𒅋𒇷𒉡𒌑 𒋛𒆳 𒈗𒋾 𒋢𒌦𒉡𒉡 𒊏𒁲𒋗𒌦 | |
40 | 𒀜𒈬𒌑 𒊑𒊺𒂊𒋼 𒊭 𒄿𒈾 𒋢𒌦𒆥 𒄷𒋚𒄭 𒂊𒁲𒊑𒅎𒈠 𒄿𒈾 𒍝𒁄 𒄑𒃾 𒀀𒆪𒌑 𒆷 𒈾𒄯𒋙𒊺 𒌋 𒁉𒉈 𒊮𒁉 𒈥𒍢 𒁀𒀸𒋫 𒆷 𒊏𒊺𒂊 |
𒀾𒋗 𒉌𒎌 𒁄𒋾 𒀀𒈨𒇻𒋾 𒈬𒉺𒅆𒄴 𒁍𒀀𒉌 𒄿𒈾 𒆳𒅀 𒆷 𒀀𒋡𒊑𒅎𒈠 𒊺𒄑𒉌 𒆠𒄿 𒀭𒊺𒉀 𒄿𒈾 𒆠𒇴 𒃻𒀀𒈪 | |
𒋗𒌨𒊒𒄴 𒀮𒋫𒉌 𒋛𒆳 𒄑𒍎 𒀭 𒅇 𒈗 𒄩𒀀𒋼𒂊 𒌦𒈾𒋼 𒄀𒂇 𒉚 𒂵𒉌 𒄿𒋫𒋼𒂊𒋗 𒋗𒍪𒍣 | |
𒌨𒊒 𒅇 𒈬𒋗 𒀀𒈾 𒂊𒄫 𒌷 𒃻𒀀𒋗 𒀝𒁍𒌓 𒋛𒈠𒀝 𒀭𒌓 𒁲𒋻𒃲 𒀭𒎌 𒃲𒎌 𒈬𒊕𒋃 𒅕𒍑𒋾𒅀 𒄫𒁍𒍑𒋗 𒋗𒌒𒉡𒌋 𒀝𒁉𒈠 | |
𒌷𒈠𒀝𒂵𒉡𒌒𒁀 𒊭 𒄿𒈾 𒄊𒅀 𒆳𒈬𒊻𒊑 𒆳𒂊 𒄿𒈾 𒌋𒅗 𒉆𒁀𒀪 𒅇 𒊑𒂍 𒌷𒉌𒈾𒀀 𒆠𒈠 𒁲𒅎𒋾 𒈾𒁺𒌑 | |
45 | 𒊭 𒐈 𒈨 𒐐𒀀𒀭 𒂷𒆠 𒆷𒁉𒊒𒋼 𒊭 𒂖𒆷𒈬𒌋𒀀 𒁁𒇻𒌓 𒆳 𒀸𒋩𒆠 𒂊𒁍𒋗𒈠 𒅋𒋫𒀮𒉺𒊒 𒁀𒀪𒆳 𒀭𒂗𒆤 |
𒀀𒀀𒌝𒈠 𒄿𒈾 𒊮𒁉𒋙𒉡 𒀀𒊬𒋗 𒌌 𒌑𒈦𒅆𒄿𒈠 𒋗𒋗𒌒𒋗 𒌌 𒄿𒁲𒈠 𒄭𒊑𒂊 𒀀𒇉𒋗 𒌌 𒄑𒆪𒌨 | |
𒄿𒈾 𒈪𒊑𒅆𒅀 𒁄𒆠 𒊭 𒄿𒈾 𒆠𒂍 𒀭𒈗 𒍪𒀊 𒂗 𒉌𒈨𒆥 𒋫𒋆𒋫 𒋢𒌦𒉡𒉡𒈠 𒈠𒇻𒌑 𒊩𒌨𒆷𒀀𒋾 | |
𒅇 𒄭𒄑𒊓𒀜 𒊻𒉌𒅀 𒁄𒅗𒀀𒋼 𒊭 𒌋𒅗 𒈗𒎌𒉌 𒀜𒎌𒅀 𒀭𒎏𒃞𒀭𒈾 𒁀𒍑 𒀭𒎌 𒌑𒃻𒋼𒊒 𒄩𒋛𒋛 | |
𒀀𒈾 𒋗𒋗𒌒 𒌷 𒃻𒀀𒋙 𒆹𒆪𒌨 𒁈𒈤𒄭 𒀜𒈠𒀭 𒀭𒎌 𒃲𒎌 𒅇 𒂍𒃲𒎌 𒋗𒁁 𒁁𒇻𒋾𒅀 𒌨𒊏 𒌋 𒈬𒃻 𒀝𒁍𒌓 𒊍𒆸𒈠 𒂊𒉿𒋢 𒀝𒁉 | |
50 | 𒆠𒈠 𒍣𒄫 𒋗𒈪𒅀 𒊭 𒀀𒈾 𒈾𒇡 𒆤𒋾 𒅇 𒈪𒃻𒊑 𒋗𒋼𒋩 𒆷 𒇷𒀪𒄿 𒆷 𒄩𒁄 𒂗𒅆 𒅎𒁍𒅔𒉌 𒀭𒎌 𒃲𒎌 |
𒅗𒉺𒅁 𒀀𒊮𒎌 𒌷 𒃻𒀀𒋙 𒆠𒄿 𒉿𒄿 𒁾𒉺𒀀𒋼 𒊭𒀀𒀀𒈠𒉡𒋼 𒆬𒌓 𒅇 𒌓𒅗𒁇𒎌 𒀀𒈾 𒂗𒎌𒋙𒉡 𒌑𒌁𒈠 | |
𒀾𒋗 𒊑𒂵𒀀𒋼 𒆷 𒊒𒅆𒄿 𒊭 𒅗𒉺𒅁 𒀀𒊮 𒆷 𒍢𒁍𒌑 𒀀𒊮 𒈪𒆟 𒀀𒊮 𒀀𒊬 𒉺𒉡𒋙𒉡 𒊕𒉡 𒀜𒁷𒋙𒉡𒋾 | |
𒀠𒋗 𒁀𒉌𒄿𒋗 𒈪𒄴𒈩 𒊌 𒋗𒌌 𒀀𒈾 𒀭𒅆𒂟𒂵 𒅇 𒀭𒈗𒀭𒊏 𒁕𒄿𒉡𒋼 𒋼𒉌𒊺𒋼 𒋫𒇷𒈠𒉌 𒀸 𒋼𒈨𒆥 𒌑𒊕𒆠𒈠 | |
𒄴𒊏𒌨 𒌓𒈨 𒄿𒈾 𒂅𒌒 𒊮𒁉 𒅇 𒁍𒀪𒀀𒊑 𒄫𒁍𒍑𒋗 𒂊𒊑𒁉 𒄿𒈾 𒆹 𒁴𒃲 𒌧𒈠 𒀀𒈾 𒀭𒊭𒍑𒅗 𒊏𒅆𒁁 𒀏𒆠 𒀜𒋫𒅆 𒋡𒋾 | |
55 | 𒋝𒊑 𒉿𒅀 𒆠𒂊𒉡𒌝 𒆠𒄿 𒌑𒇻 𒉌 𒌋𒅗 𒈾𒁉 𒈤𒎌 𒂗𒎌𒅀 𒈠𒀪𒁹 𒄿𒎗𒅁𒈠 𒂊𒄫 𒌷 𒄭𒊑𒂊 𒀀𒇉 𒅅𒁍𒌋𒉌 |
𒈾𒀭𒉡𒍑𒋗𒌦 𒆷 𒈲𒉿𒂊𒇻 𒀜𒋫𒆠𒅋𒈠 𒁀𒄷𒆷𒋼𒅀 𒃮𒃻𒀀𒋼 𒀜𒆠𒈠 𒀠𒇻 𒁾𒋝𒆪 𒌑𒃻𒀾𒅆 | |
𒄿𒈾 𒌗𒍢𒄿𒌨 𒌗 𒁉𒅔 𒀭𒁰𒃲 𒋻𒄑 𒌍𒁇𒂊 𒈬𒊕𒅆 𒍝𒀜𒁲 𒀭𒋀𒆠 𒀭𒂊 𒆠𒁴 𒃼𒋥 𒀭𒎌 𒀭𒂗𒍪 | |
𒊭 𒄿𒈾 𒅆𒆳 𒀭𒀀𒉏 𒀭𒂗𒆤 𒅇 𒀭𒂍𒀀 𒀭𒎏𒅆𒆬 𒀀𒈾 𒆷𒁀𒀭 𒋞𒎌 𒂊𒄫 𒌷 𒅇 𒂍 𒌗 𒀭𒋞 𒈾𒁍𒌑 𒈬𒋗 | |
𒄿𒈾 𒌓𒀊𒀊 𒊭 𒌉 𒀭𒂗 𒅆𒅅𒇷 𒁄𒆠𒂊 𒀭𒀝 𒁾𒊬 𒁶𒊑 𒈬𒈠𒀪𒅕 𒆰𒆳 𒀭𒎌 𒌑𒊩𒁉𒈾 𒈜𒈾𒊍𒋢 | |
60 | 𒀀𒈾 𒀭𒋞 𒂗 𒍑𒊺 𒇷𒂍𒋼 𒅇 𒀭𒁶 𒁶𒃲𒈝 𒊭 𒀭𒂗𒆤 𒇻𒀬 𒀝𒆠 𒁍𒄣 𒊍𒊒𒄣𒈠 𒀜𒋫𒅆 𒋗𒅍𒆚 |
𒄿𒈾 𒌗𒉈𒉈𒃻 𒌗 𒀀𒋥 𒀭𒉈𒄀 𒈬𒍑𒉈 𒄠𒁀𒋼 𒊏𒂅𒌒𒋼 𒈬𒆥 𒋼𒈨𒂗 𒌷 𒅇 𒂍 𒍑𒊺𒂊𒋙 𒀜𒁲𒈠 𒌑𒆥 𒈜𒈾𒋢 | |
𒉺𒊩𒆠 𒊏𒀾𒁺𒋾 𒊭 𒆠𒈠 𒆠𒈲 𒄀𒂗𒉌 𒋩𒋗𒁺 𒀀𒈾 𒀭𒂍𒀀 𒀭𒌍 𒅇 𒀭𒎏𒃲 𒀭𒅎 𒀭𒌓 𒀭𒈦 𒂊𒁍𒃻 𒄫𒁍𒍑𒋙 | |
𒂍𒃲 𒅗 𒄠𒋛 𒄑𒆗 𒄑𒌆 𒄑𒈬𒆹𒃶𒉌 𒄑𒂞 𒄑𒋩𒎙 𒄑𒋰𒊏𒉌 𒅇 𒄑𒁍𒌓𒉌 𒀸 𒆠𒁉𒋾𒋙𒉡 𒈲𒋼 𒀀𒈾 𒈬𒉺𒅁 𒈗𒋾𒅀 𒀊𒉌𒈠 | |
𒂍 𒄭𒆷𒀭𒉌 𒋫𒀭𒅆𒅋 𒂍𒃲 𒆳𒉺𒋾 𒈪𒄴𒈩 𒆍𒎌𒊿 𒀊𒄘𒈠 𒄑𒃡𒎌 𒄑𒂞 𒄑𒋩𒎙 𒌑𒆥 𒍢𒊒𒍑𒊿 | |
65 | 𒊹 𒊹 𒊹 𒊹 𒐕𒌋 𒐕𒌋 𒐕𒌋 𒁹 𒍑 𒐈 𒋡𒉌 𒈫 𒌑 𒉌𒂍 𒈬𒅀 𒈪𒅆𒄴𒋾 𒂦𒋗 𒀾𒆲𒈠 𒌋𒅗 𒎎 𒆳𒂊 𒍠𒊑 𒌑𒊬𒅆𒁕 𒋼𒈨𒂗𒋗 |
𒄿𒈾 𒊑𒂊𒊺 𒅇 𒅈𒅗𒀀𒋼 𒄿𒈾 𒍢𒇷 𒆠𒇲𒆷𒀭 𒈪𒄴𒈩 𒐍 𒅎𒎌 𒐍 𒆍𒃲𒎌 𒀊𒋼𒂊𒈠 | |
𒀭𒌓 𒈬𒊕𒋃 𒅕𒍑𒋾𒅀 𒀭𒅎 𒈬𒆸 𒃶𒅅𒇷𒋗 𒈬𒎌 𒆍𒃲 𒀭𒌓 𒅇 𒆍𒃲 𒀭𒅎 𒃻 𒅆𒀉 𒅎𒆳𒊏 𒊍𒆪𒌨 | |
𒀭𒂗𒆤 𒈬𒆥 𒅖𒁲 𒌷𒅀 𒀭𒎏𒆤 𒈬𒁹𒃻𒀜 𒄭𒄑𒁉 𒋝𒊑 𒆍𒃲 𒀭𒂗𒆤 𒅇 𒀭𒎏𒆤 𒃻 𒅆𒀉 𒅎𒋛𒁲 𒄠𒁉 | |
𒀭𒀀𒉡 𒈬𒊩𒅆 𒅁𒋃 𒋡𒋾𒅀 𒀭𒅖𒋻 𒈬𒌑𒈨𒉺 𒌦𒎌𒋙 𒉌𒂍 𒆍𒃲 𒀭𒀀𒉏 𒅇 𒀭𒅖𒋻 𒃻 𒅆𒀉 𒅎𒈥𒌅 𒀾𒆲 | |
70 | 𒀭𒂍𒀀 𒈬𒍑𒋼𒋓 𒅘𒁉𒋗 𒀭𒁁𒀖𒀭𒎌 𒈬𒊐𒉿𒆳 𒋫𒀖𒋾𒋙 𒈬𒎌 𒆍𒃲 𒀭𒂍𒀀 𒅇 𒆍𒃲 𒀭𒁁𒀖𒀭𒎌 𒃻 𒅆𒀉 𒅎𒌷𒇻 𒀝𒁉𒈠 |
𒀭𒀀𒋩 𒈬𒆗𒄵 𒁄𒎌 𒈗 𒂊𒉿𒅆𒋗 𒈾𒈲 𒉭𒋙 𒂦𒋗 𒀭𒎏𒅁 𒈬𒆥 𒋼𒈨𒂗 𒀀𒁺𒍑𒅆 𒀀𒈾 𒆷𒁇 𒌓𒎌 𒋤𒎌 𒊩𒄷𒌑𒋗 | |
𒁀𒀪𒆳 𒅈𒁀𒀪 𒅴 𒀀𒄭𒌅 𒀜𒈪𒂊 𒆷 𒁁𒄯𒋾 𒀀𒅆𒁍𒋼 𒆳𒂊 𒅇 𒆳 𒂷 𒅕𒋼𒀪𒌑 𒂟 𒀭𒎌 𒂗 𒁶𒊑 | |
𒊭 𒄿𒈾 𒍣𒄫 𒀭𒀀𒋩 𒂗𒅀 𒄿𒈾 𒈪𒌀 𒅆𒄵𒊑𒅀 𒀾𒇻𒆷 𒉺𒀀 𒁹𒂗 𒌑𒃻𒀾𒆥𒈠 𒌑𒊬𒈠𒀀 𒆠𒆗𒋗 | |
𒌉𒎌 𒆳 𒀸𒋩𒆠 𒈬𒁺𒋼 𒄿𒉌 𒅗𒆷𒈠 𒀀𒈾 𒋗𒄷𒊻 𒍢𒂍𒋼 𒉺𒌓 𒀭 𒅇 𒈗 𒇽𒀝𒇷 𒇽𒃻𒉿𒊑 𒌑𒈠𒀪𒅕𒋙𒉡𒋾 | |
75 | 𒀭𒎌 𒀀𒅆𒁍𒋼 𒀭𒂊 𒆠𒁴 𒅇 𒌷 𒃻𒀀𒋗 𒆠𒁉𒋾 𒅎𒄥𒌑𒈠 𒂊𒄫 𒌷 𒅇 𒂄𒁓 𒄫𒁉𒋙 𒅖𒊒𒆪𒅔𒉌 𒀀𒈾 𒁕𒊕 |
𒊭 𒅁𒋃 𒋡𒋾𒅀 𒌑𒅘𒋼𒀀𒌑𒈠 𒁍𒌦𒈾𒉌𒅀 𒌑𒆤𒄷𒌑 𒌑𒍮𒋥 𒄑𒍢𒊒 𒌑𒌑𒊓𒆪 𒋛𒈠𒋼𒅀 𒌑𒉺𒃻𒂅 | |
𒀭𒀀𒋩 𒀭𒌓 𒀭𒅎 𒅇 𒀭𒎌 𒀀𒈨 𒊮𒁉𒋙 𒈬𒋗 𒆰𒋗 𒄿𒈾 𒆳 𒇸𒄣𒌅𒈠 𒄿𒈾 𒆠𒋫 𒇽𒉽𒋗 𒇷𒊺𒅆𒁍𒋗 𒅗𒎌 |