Harran Stele ex. 01 (Nabonidus 47, ex. 01) [Nabonidus][via ribo/sources]

i-piš-ti ^d30 GAL-ti šá DINGIR.MEŠ ù ^dIŠ.TAR

ma-am-ma-an NU ZU-šú šá ul-tu u₄-mu ru-qu-tu

a-na KUR la tu-ri-du u UN.MEŠ KUR <la> ip-pal-su-ma

i-na ṭup-pi la iš-ṭu-ru-ma la iš-tak-ka-nu

a-na u₄-mu ṣa-a-ti ^d30 EN DINGIR.MEŠ u ^dINANNA a-ši-bu-tú

šá AN-e šá ina pa-ni ^mdMUATI-NÍ.TUKU LUGAL TIN.TIR.KI

ul-tu AN-e tal-li-ku a-na-ku ^mdMUATI-I

DUMU e-du šá mam-ma-an la i-šu-ú šá LUGAL-u-tú

ina lìb-bi-ia la tab-šu-ú DINGIR.MEŠ u ^dINANNA a-na UGU--

⸢ia⸣ ú-ṣal-lu-ú ù ^d30 a-na LUGAL-ú-ti

⸢im⸣-ba-an-ni ina šá-at mu-ši MÁŠ.GI₆ ú-šab-ra-an-<ni>

um-ma é-ḫúl-ḫúl É ^d30 šá URU.KASKAL ḫa-an-ṭiš

e-pu-uš KUR.KUR.MEŠ ka-la-ši-na a-na ŠU.II-ka

lu-mál-la UN.MEŠ DUMU.MEŠ TIN.TIR.KI bár-sipa.KI

NIBRU.KI úri.KI UNUG.KI larsa.KI LÚ.SANGA.MEŠ

UN.MEŠ ma-ḫa-zi KUR URI.KI a-na DINGIR-ú-ti-šu

GAL-ti iḫ-ṭu-ʾi-i-ma i-še-ti u ú-gal-li-lu

la i-du-u e-ze-es-su <GAL-tú> šá LUGAL DINGIR.MEŠ ^dŠEŠ.KI-ri

par-ṣi-šú-nu im-šu-ʾi-i-ma i-dab-bu-bu sur-ra-a-tú

u la ki-na-a-tú ki-ma UR.GI₇ it-ta-nak-ka-lu

a-ḫa-míš di-ʾu u SU.GU₇-ú ina lìb-bi-šú-nu

ú-šab-šu-ú ú-ṣa-aḫ-ḫi-ir UN.MEŠ KUR u ana-ku

ul-tu URU-ia TIN.TIR.KI ú-še-ri-qa-an-ni-ma

ú-ru-uḫ URU.te-ma-a URU.da-da-<nu> URU.pa-dak-ku

URU.ḫi-ib-ra-a URU.ía-di-ḫu u a-di URU.ía-at-ri-bu

10 MU.AN.NA.MEŠ ⸢at-tal-la-ku⸣ qé-reb-šú-un a-na

URU-ia ⸢TIN.TIR.KI la⸣ e-ru-ub ina a-mat ^d30

LUGAL DINGIR.MEŠ EN EN.⸢EN⸣ šá DINGIR.MEŠ u ^dINANNA a-ši-bu-ti

šá AN-e ú-šal-lim-u qí-bit ^d30 ^dŠEŠ.KI-ri

^dUTU ^dINANNA ^dIŠKUR u ^dU.GUR EN.NUN-tì šu-lum u TIN

⸢ip⸣-qí-du it-ti-ia ina MU šá-a-šú ina ITI.BÁRA

u ITI.DU₆ UN.MEŠ KUR URI.KI u KUR.ḫat-ti ḫi-ṣib KUR-i

u tam-tim i-leq-qu-nim-ma ina dan-na-tú um-ma-a-tú

ITI.SIG₄ ITI.ŠU ITI.NE ITI.KIN ITI.DU₆ ina ITI.MEŠ an-nu-tú

ina kal MU.AN.NA.MEŠ an-na-a-ti la ba-ṭa-a-lu

ina qí-bit ^d30 ^dIŠKUR GÚ.GAL AN-e u KI-tim A.MEŠ

ŠÈG i-šá-aq-qí-šu-nu-ti NÍG.MEŠ^?-šú-nu u bu-šá-šú-nu

⸢ina šu-lum⸣ ir-ru-bu-nu a-na maḫ-ri-ía ina a-mat

⸢^d30⸣ u ^dINANNA be-let MÈ šá nu-kúr-ti u su-lum-mu-ú

ina ba-li-šu ina KUR la ib-ba-áš-šu-u ù kak-ku

la in-né-ep-pu-šu ŠU.II-su ⸢àna muḫ⸣-ḫi-šú-nu

ta-⸢ap-ri-ik-ma⸣ LUGAL KUR.mi-ṣir ⸢KUR⸣.[x]-⸢da⸣-a-a

KUR.a-⸢ra⸣-[x x] ⸢nap-ḫar⸣ LUGAL.MEŠ ⸢na-ki-ru-tú a⸣-[x]

su-lum-[...]

a-na maḫ-⸢ri⸣-[x] ⸢UN⸣.[...] ⸢šá GIŠ.TUKUL⸣

iš gal [...] ⸢šá KUR-ak-ka-di-i.KI⸣

[...] x x a-na

[...] šá bu-še-e iz-zi-⸢zu-ma⸣

i-na a-mat ^d30 ^dU.GUR kak-ki-šu-nu

ú-šab-bir-ma nap-ḫar-šú-nu ik-nu-šú a-na GÌR.II-a^?

^dUTU EN ur-ti šá ina ba-li-šú pu-ú

la ip-pát-tu-ú u pu-u la uk-ta-at-ta-mu

mu-šal-lim qí-bit ^dŠEŠ.KI-ri AD ⸢ba-ni-šú⸣

UN.MEŠ KUR-URI.KI u KUR.ḫat-ti šá ú-mál-lu-u

ŠU.II-ú-a pu-ú u lìb-bi ki-nim ⸢it-ti-ia⸣

iš-kun-šú-nu-ti-ma i-na-aṣ-ṣa-ru EN.[x x]

ú-šal-la-mu qí-bi-ti ina pi-rik KUR-[x x]

né-su-ti ur-ḫu pa-rik-tú šá at-tal-la-ku

10 MU.AN.NA.MEŠ ik-šu-dam-ma a-dan-nu

im-lu-u u₄-mu šá iq-bu-u LUGAL DINGIR ^dŠEŠ.KI-[x]

ina ITI.DU₆ UD.17.KAM u₄-mu ^d30 im-ma-⸢ag-gàr⸣

pi-šìr-šú ^d30 EN šá DINGIR.MEŠ šá ina UD.1.KAM

TUKUL ^da-nim zi-kir-šu AN-e ta-lap^?-pa^?-tú

u KI-tim ta-ḫe-ep-pu-ú ḫa-mi-im GARZA

^da-nù-ú-tú mu-gam-mi-ir GARZA ⸢^dEN.LÍL⸣-ú-tú

le-qu-ú pa-ra-aṣ ^dé-a-ú-ti

šá nap-ḫar gi-mi-ir pa-ra-aṣ AN-e ina ŠU.II-šú

tam-ḫu ^dEN.LÍL DINGIR.MEŠ LUGAL LUGAL.LUGAL EN EN.EN

⸢šá a-na qí-bi-ti-šu la i-tur-ru⸣

⸢ù a-mat-su la ta-qab-bu-ú 2-šú⸣

šá pu-luḫ-ti ⸢DINGIR-ti-šú GAL-ti AN-e⸣

u KI-tim ma-lu-ú ⸢ki-ma zi-mi-šú AN-e⸣

u KI-tim saḫ-pu šá la ⸢ka-a⸣-šu ⸢man-nu⸣

mi-na-a ip-pu-uš KUR šá lìb-[...]-šú

ub-lu pu-luḫ-tú DINGIR-ti-ka GAL-ti ⸢ina lìb-bi-šú⸣

ta-šak-kan-ma a-na u₄-mu ru-qu-ti

SUḪUŠ.MEŠ-šú i-ku-un-nu KUR šá lìb-ba-ka

ḫa-pu-šú ub-lu pu-luḫ-ta-ka ul-tu

lìb-bi-šú ta-né-es-se-e-mu ta-na-an-di-iš

a-na u₄-mu SÙ.MEŠ šá nap-ḫar DINGIR.MEŠ u ^d15

⸢a-ši-bu-ti⸣ šá AN-e i-na-aṣ-ṣa-ru

⸢ṣi-it pi-i-šú ú-šal-la⸣-mu qí-bi-ti

⸢^dŠEŠ.KI-ri AD ba-ni-šú⸣-un mu-ga-mi-ir

GARZA ⸢AN-e u⸣ KI-tim šá [x]-⸢bal⸣ qí-bi-ti-šú

[...]-⸢mi⸣-šam-ma ina šá-ma-mi

i-[x]-bu-⸢u KUR⸣ la ta-an-na-du-u

u [x x] ina KUR la ib-ba-áš-šu-ú

⸢DINGIR.MEŠ GIM⸣ GI i-šub-bu i-na-ar-ru-ṭu

⸢^d⸣a-[...] šá la-pa-ni qí-bit DINGIR-ti-šú

⸢GAL-ti⸣ [...]-nen-nu-⸢u⸣ x x ⸢KUR-i⸣

[x] ENSI a-lak-tú ul par-sat ⸢at-til⸣-[x]

[x x] mu-ši MÁŠ.GI₆ pár-da-at a-di a-mat [...]

⸢im⸣-li MU ik-šu-du a-dan-nu šá [...]-⸢ri⸣

ul-tu URU.te-ma-a ú-[...]

TIN.TIR.KI URU be-lu-[...]

⸢i-mu-ru-ma⸣ x x x

[...] ⸢àna šul-ma⸣-[...]

[...] ⸢maḫ-ri-ía LUGAL.MEŠ qer-bu-tú⸣

[...] ⸢u-na-áš-šá-qu GÌR.II-a⸣

[...] ⸢iš-mu-u ip-la-ḫu⸣ DINGIR-ut-su GAL-

[...] ⸢IŠ.TAR šá ip-par-du-ma i-re-qa⸣

[...] ⸢i-qab-bu-ú⸣ ba-ni-ti

[...] ⸢iš-šá-kin UZU dum-qí-ía⸣ ina nu-uḫ-šú

⸢ṭuḫ-du u ḪÉ.GÁL⸣-la UN.MEŠ-⸢ía⸣ [...] né-su-ti

ar-te-ed-dam-ma ina šá-⸢lim-ti aṣ-bat⸣ ú-ru-uḫ

ma-ti-ia a-mat DINGIR-ti-šú GAL-⸢tú at⸣-taṣ-ṣa-ar-ma

la e-⸢gi⸣ la a-šit a-ḫi ⸢la ad-du ú⸣-šad-kam-ma

UN.MEŠ KUR-URI.KI u KUR.ḫat-ti [...]-aṭ KUR.mi-ṣir

tam-tim e-lit a-di tam-⸢tim šap-lit šá⸣ ^d30 LUGAL DINGIR

ú-mál-lu-u ŠU.II-ú-a é-⸢ḫúl-ḫúl⸣ É ^d30 eš-⸢šiš⸣

e-pu-uš ú-šak-lil ⸢ši⸣-pir-šú ⸢ŠU.II ^d30⸣

[x] nin-gal ^dnusku u ^dsa-dàr-⸢nun-na ul-tu⸣

⸢šu-an-na URU LUGAL⸣-ú-[...] ḫi-da-[x x]

[x] ⸢ri⸣-šá-⸢a-tú ú-še-rib ú-še-šib BÁRA da-ri⸣-a-[x]

ni-qu-u taš-[...]-šú-nu ⸢aq-qí⸣-[x]

ú-šar-⸢ri⸣-[...]-ḫúl reš-[x]

ú-mál-⸢li⸣-[...] ⸢UN.MEŠ-šú⸣

⸢ú-šal⸣-[...] ⸢EN EN.EN⸣

⸢a-šib⸣ [...] ⸢DINGIR.MEŠ ina AN⸣-[x x]-kir-šú ⸢šu-tuq⸣

⸢^dUTU šá ni-bu-šú⸣ [...] ⸢^dIŠKUR ^dU.GUR⸣

⸢šá ú⸣-[...] ⸢^dŠEŠ.KI-ri⸣

šu-tuq-[...]-⸢na-di-iq-ma⸣

a-na ⸢e-peš ta-ḫa-zi⸣ [x]-⸢ia⸣ áš-⸢kun-ma⸣

a-na šul-lu-mu ⸢qí-bit⸣ [...] man-nu at-ta

šá ⸢^d30 a-na LUGAL-u-ti^?⸣ [...]-ka-ma

DUMU-⸢ú-ia-a⸣-ma i-[...] ^d30

⸢a-šib šá-ma-me šá qí⸣-[...]-⸢nen⸣-nu-ú

⸢u a-mat⸣-su la ta-[x x]-⸢u 2⸣-šú