IM 063999 (Nabonidus 32, ex. 06) [Nabonidus][via ribo/sources]

^mdAG-NÍ.TUKU LUGAL TIN.TIR.KI

za-nin é-sag-íl

ù é-zi-da

pa-liḫ DINGIR.MEŠ GAL.MEŠ a-na-ku

é-lugal-galga-si-sá

ziq-qur-rat é-giš-nu₁₁-gal

šá qé-reb úri.KI

šá ^mur-^dnamma LUGAL šu-ut maḫ-ri

i-pu-šu-ma la ú-šak-li-lu-uš

^mšul-gi DUMU-šú ši-pir-šú ú-šak-lil

i-na mu-sa-re-e šá ^mur-^dnamma

ù ^mšul-gi DUMU-šú a-mur-ma

šá ziq-qur-rat šu-a-ti ^mur-^dnamma

i-pu-šu-ma la ú-šak-li-lu-uš

^mšul-gi DUMU-šú ši-pir-šú ú-šak-lil

i-na-an-ni ziq-qur-rat šu-a-ti

la-ba-ri-iš il-lik-ma

e-li te-me-en-na la-bi-ri

šá ^mur-^dnamma ù ^mšul-gi DUMU-šú

i-pu-šu ziq-qur-rat šu-a-ti

ki-ma la-bi-ri-im-ma

i-na ku-up-ri ù a-gur-ri

ba-ta-aq-šu aṣ-bat-ma

a-na ^d30 EN DINGIR.MEŠ

šá AN-e ù KI-tim

LUGAL DINGIR.MEŠ DINGIR.MEŠ šá DINGIR.MEŠ

a-ši-ib AN-e GAL.MEŠ EN é-giš-nu₁₁-gal

šá qé-reb úri.KI EN-ia

uš-ši-iš-ma e-pu-uš

^d30 EN DINGIR.MEŠ LUGAL DINGIR.MEŠ

šá AN-e ù KI-tim DINGIR.MEŠ šá DINGIR.MEŠ

a-šib AN-e GAL.MEŠ a-na É šu-a-ti

ḫa-di-iš i-na ⸢e⸣-re-bi-ka

SIG₅.MEŠ é-⸢sag-íl⸣ é-zi-da

é-giš-nu₁₁-gal É.⸢MEŠ DINGIR⸣-ú-ti-ka

GAL-ti liš-šá-ki-⸢in šap⸣-tu-uk-ka

ù pu-luḫ-ti DINGIR-ú-ti-ka

GAL-ti lìb-bi UN.MEŠ-šú

šu-uš-kin-ma la i-ḫaṭ-ṭu-ú

a-na DINGIR-ú-ti-ka GAL-ti

ki-ma AN-e iš-da-šu-nu li-ku-nu

ia-ti ^mdAG-I LUGAL TIN.TIR.KI

i-na ḫi-ṭu DINGIR-ú-ti-ka

ra-bi-ti šu-zib-an-ni-ma

ba-la-ṭu u₄-mu ru-qu^* (text: BI) ti

a-na ši-rik-ti šur-kam

ù šá ^mdEN-LUGAL-ÙRU DUMU reš-tu-ú

ṣi-it lìb-bi-ia pu-luḫ-tú DINGIR-ú-ti-ka

GAL-ti lìb-bu-uš šu-uš-kin-ma

a-a ir-šá-a ḫi-ṭi-ti la-le-e TIN liš-bi