BM 022408 + BM 028378 + BM 028380 + BM 028385 + BM 028386 + BM 054335 + BM 054380 + BM 054393 + BM 054420 + BM 054426 + BM 054439 + BM 054448 + BM 054451 + BM 054455 + BM 054467 + BM 054468 + BM 054518 + BM 141850.04 (Nabonidus 28, ex. 17) [Nabonidus][via ribo/sources]

a-na-ku ^dna-bi-um-na-ʾi-id LUGAL ra-bu-ú LUGAL dan-nu

LUGAL kiš-šá-tum LUGAL KÁ.DINGIR.RA.KI LUGAL kib-ra-a-⸢ti⸣ er-bet-ti

za-ni-in é-sag-íl ù ⸢é-zi⸣-da

⸢ša ^d⸣EN.ZU ù ^dnin-gal i-na ⸢ŠÀ⸣ AMA-šu

a-na ši-⸢ma⸣-at LUGAL-ú-tu i-ši-mu ⸢ši-ma-at-su⸣

DUMU ^mdAG-⸢TIN⸣-su-iq-bi ⸢ru-bu-ú e⸣-em-qu

pa-li-iḫ ⸢DINGIR.DINGIR GAL.GAL a⸣-na-ku

é-ḫúl-ḫúl ⸢É⸣ ^dEN.ZU ⸢ša qé-re⸣-eb ⸢URU.ḫar-ra-nu⸣

ša ul-tu u₄-mu ṣa-a-ti ^dEN.ZU EN ra-bí-ù

šu-ba-⸢at⸣ ṭu-ub lìb-bi-šu ra-mu-ú qé-reb-šu

[x x] ⸢URU ù É ša-a-šu lìb-bu-uš⸣ i-zu-uz-ma

[...]-⸢bit⸣-ma ú-šá-lik-šu kar-mu-tú

[...] ⸢EN⸣ ra-bu-ú

[...] ⸢URU⸣ ù É šá-a-šu

[...]-⸢a⸣-ri

[...]-⸢in-ni šu-ut-ti⸣

[...] ⸢ù⸣ KI-tim

[...] ⸢it⸣-ti-ia

(traces) [...]-⸢ku⸣-bi-ka

i-ši SIG₄.ḪI.A ⸢é⸣-[...]-⸢uš⸣-ma

^dEN.ZU EN GAL i-na ⸢qé-er-bi-šu šu-ur-ma-a šu-bat⸣-su

pa-al-ḫi-iš a-ta-ma-a a-na ^dEN.LÍL DINGIR ^dAMAR.⸢UTU⸣

É šu-a-ti ša ta-aq-bu-ú e-pe-eš₁₅-su

um-man-ma-an-du sa-ḫi-ir-šum-ma pu-ug-gu-lu e-mu-qá-a-šu

^dAMAR.UTU-ma i-ta-ma-a it-ti-ia um-man-ma-an-du šá taq-bu-ú

ša-a-šu ma-ti-šu ù LUGAL.MEŠ a-lik i-di-šu ul i-ba-áš-ši

i-na ša-lu-ul-ti MU.AN.NA i-na ka-šá-du

ú-šat-bu-niš-šum-ma ^mku-ra-áš LUGAL KUR.an-za-an ARAD-su ṣa-aḫ-ru

i-na um-<ma>-ni-šu i-ṣu-tu um-man-ma-an-du rap-<šá>-a-tú ú-sap-pi-iḫ

^miš-tu-me-gi LUGAL um-ma-an-man-du iṣ-ba-at-⸢ma⸣

⸢ka-mu-ut-su⸣ a-⸢na ma-ti-šu il-qé⸣

[...]⸢EN.ZU⸣ na-an-na-ri AN-e ù KI-⸢tim⸣

[...] ⸢in⸣-nen-nu-ú a-na qí-bi-ti-šú-nu^* ṣi-ir-tum

[...] na-qú-ut-ti ar-še-e-ma dul-lu-ḫu pa-nu-ú-a

[...] a-še-et a-ḫa la ad-di

[...]-⸢ma⸣ um-ma-ni-ia rap-šá-a-ti ul-tu ḫa-az-za-⸢tum⸣

[...] ⸢mi⸣-ṣir tam-tim e-li-⸢ti⸣

[x x]-⸢ti⸣ ÍD.BURANUN.KI a-di tam-tim šap-⸢li⸣-tum

⸢LUGAL.MEŠ⸣ NUN.MEŠ GÌR.NÍTA.MEŠ ù um-ma-ni-ia rap-šá-⸢a⸣-ti

ša ^dEN.ZU ^dUTU ù ^diš-tar EN.MEŠ-e-a ia-a-ti i-⸢qí⸣-pu-nu

a-na e-pe-šu é-ḫúl-ḫúl É ^dEN.ZU ⸢EN⸣-ia

a-li-ka i-di-ia ša qé-er-bi URU.ḫar-⸢ra⸣-nu

⸢ša⸣ <^m>AN.ŠÁR-ba-an-IBILA LUGAL KUR-aš-šur.KI

⸢DUMU⸣ ^mAN.ŠÁR-ŠEŠ-MU LUGAL KUR-aš-šur.KI NUN a-lik maḫ-<ri>-⸢ia⸣ i-pu-šu

[x]-na ITI šá-al-mu i-na UD ⸢ŠE⸣.GA

⸢ša i⸣-na bi-ri ú-ad-du-ni ^dUTU ù ^d⸢IŠKUR⸣

i-na né-me-qí ^dé-a ù ^dasal-lú-ḫi i-na ka-kù-gál-ú-tu

i-na ši-ip-ri ^dkulla EN uš-šu ù SIG₄.ḪI.A

i-na KÙ.BABBAR KÙ.GI NA₄ ni-siq-ti šu-qu-ru-tu

ḫi-bi-iš-ti GIŠ.TIR ŠIM.ḪI.A GIŠ.EREN i-na ḫi-da-a-ti ù ri-šá-a-ti

e-li te-me-en-na ša ^mAN.ŠÁR-ba-an-IBILA LUGAL KUR-aš-šur.KI

ša te-me-en-<na> ^mšul-ma-an-SAG.KAL DUMU ^mAN.ŠÁR-na-ṣir-IBILA i-mu-ru

uš-⸢šu⸣-šu ad-di-ma ú-ki-in lib-na-at-⸢su⸣

i-na KAŠ GEŠTIN Ì.GIŠ LÀL šal-la-ar-šu am-ḫa-aṣ-⸢ma⸣

ab-lu-ul ta-ra-aḫ-ḫu-⸢uš⸣

⸢e-li ša LUGAL.MEŠ ab-bé-e-a ep-še-ti-šu ú-dan-nin⸣-ma

ú-na-ak-ki-il ši-pi-ir-⸢šu⸣

É.KUR šu-a-⸢ti⸣ ul-tu te-⸢me-en-ni⸣-šú a-di gaba-⸢dib-bí⸣-šu

e-eš-šiš ⸢ab⸣-ni-⸢ma⸣ [x x]-lil ši-⸢pi-ir-šu⸣

GIŠ.ÙR GIŠ.⸢EREN ṣi-ru⸣-tu tar-bit KUR.ḫa-ma-ni

ú-⸢ša-at-ri⸣-iṣ ⸢ṣe⸣-ru-uš-šu

⸢GIŠ⸣.IG.MEŠ GIŠ.EREN ⸢šá⸣ i-ri-is-si-na ṭa-a-bi

ú-ra-at-ta-a ⸢i⸣-na KÁ.KÁ-šu

⸢KÙ⸣.BABBAR KÙ.GI É.GAR₈.MEŠ-šú ⸢ú⸣-šá-al-bi-iš-⸢ma⸣

ú-šá-an-bi-iṭ šá-áš-šá-ni-iš

⸢AM.MEŠ⸣ za-⸢ḫa-le⸣-e ⸢eb⸣-bi mu-nak-kip ga-ri-ia

ka-⸢ad-ri-iš uš-zi⸣-iz i-na at-⸢ma-ni-šu⸣

2 ^dlàḫ-mu eš-ma-⸢ru-ú sa-pi-in⸣ [...]

i-na KÁ ṣi-it ⸢^d⸣UTU-ši ⸢ZAG ù GUB ú-šar-ši⸣-[x]

qá-tì ^d30 ^d⸢nin⸣-gal ^dnusku ù ^dsa-dàr-nun-⸢na⸣

EN.MEŠ-⸢e⸣-[x] ul-tu TIN.TIR.KI URU šar-ru-ti-ia aṣ-bat-⸢ma⸣

i-na ⸢ḫi-da⸣-a-ti ù ri-ša-a-⸢ti⸣

šu-ba-⸢at⸣ ṭu-ub lib-bi qer-ba-šu ú-še-⸢ši-ib⸣

UDU.⸢SÍSKUR⸣ taš-ri-iḫ-ti eb-ba ma-ḫar-šu-nu aq-⸢qí-ma⸣

ú-⸢ša⸣-am-ḫi-ir ka-ad-ra-⸢a-a⸣

⸢é⸣-ḫúl-ḫúl re-eš-ti ú-ma-al-⸢li-ma⸣

⸢URU⸣.ḫar-ra-nu a-na pa-aṭ gi-⸢im⸣-ri-šu

⸢ki⸣-ma ṣe-et ITI ú-nam-mi-ir ⸢šá⸣-ru-ru-šu

⸢^d⸣EN.ZU LUGAL DINGIR.DINGIR šá AN-e ⸢ù⸣ KI-tim

⸢ša⸣ ul-la-<<ku>>-nu-uš-šu URU ù KUR la ⸢in-nam⸣-du-ú

la i-tu-ur-ru áš-⸢ru-uš⸣-šu

a-⸢na é-ḫúl⸣-ḫúl É šu-⸢bat la-le⸣-e-ka i-na e-re-bi-ka

da-mi-iq-⸢ti URU⸣ ù É ša-a-šu

li-iš-ša-ki-in ⸢ša⸣-ap-tu-uk-⸢ka⸣

DINGIR.MEŠ a-ši-bu-tu ⸢AN-e ù⸣ KI-tim

li-ik-ta-ra-bu É ^d30 a-ba ⸢ba-ni-šu-un⸣

⸢ia⸣-a-ti ^dAG-NÍ.TUKU LUGAL TIN.⸢TIR.KI⸣

⸢mu⸣-ša-ak-li-il É šu-⸢a-ti⸣

⸢^d⸣EN.ZU LUGAL DINGIR.MEŠ ša AN-e ù ⸢KI⸣-tim

⸢i-na⸣ ni-iš i-ni-šu SIG₅.MEŠ ḫa-di-iš lip-⸢pal-sa⸣-an-ni-ma

⸢ar-ḫi⸣-ša-am i-na ni-ip-ḫi ⸢ù ri⸣-bi

⸢li-dam⸣-mi-iq it-ta-⸢tu⸣-ú-a

[...] ⸢li⸣-šá-ri-ik MU.⸢AN.NA.MEŠ-ia⸣ li-⸢šá⸣-an-di-il

[x x]-⸢in pa-lu⸣-ú-a

[...]-⸢ni⸣-ia li-ša-am-qit

[...] ⸢ga⸣-ri-ia

[...] ⸢ma⸣-ḫar ^dEN.ZU

[...] ba-ni-ti

[...] ⸢15 ṣi-it⸣ [x x]-⸢šu⸣ na-am-ra

[...]-⸢ba⸣ ba-ni^* (text: BI) ⸢šu-un li⸣-iq-bu-ú SIG₅-tì

[...]-⸢i⸣-ri su-pe-e-a liš-me-⸢e-ma li-iṣ-bat a-bu-tú⸣

⸢MU⸣.[...] ⸢ši⸣-ṭir šu-um šá <^m>AN.ŠÁR-DÙ-IBILA ⸢LUGAL⸣ [x x].⸢KI⸣

a-mur-⸢ma⸣ [x x]-nak-ki-ir Ì.GIŠ ap-šu-uš UDU.⸢SÍSKUR aq-qí⸣

it-ti ⸢MU.SAR⸣-e-a áš-kun-ma ú-te-er áš-ru-uš-šu

a-na ^dUTU ⸢da⸣-a-a-nu ša AN-e ù KI-tim

é-babbar-ra É-⸢su⸣ ša qé-reb ZIMBIR.KI

ša ^dAG-NÍG.GUB-⸢ÙRU LUGAL⸣ ma-aḫ-ri i-pú-šu-ma

te-me-en-šu la-⸢bi-ri ú⸣-ba-ʾu-ú-ma la i-mu-ru

É šu-a-ti i-⸢pú⸣-uš-ma ⸢i-na 45⸣ MU.AN.NA.MEŠ

ša É šu-a-⸢ti⸣ i-qu-⸢pu⸣ [x]-⸢ga⸣-ru-šu

ak-ku-ud áš-ḫu-ut na-⸢qut⸣-ti ar-še-e-⸢ma⸣ [x x]-⸢ḫu⸣ pa-nu-ú-a

a-di ^dUTU ⸢ul⸣-tu qé-er-bi-⸢šu⸣ [x]-⸢še-ṣu⸣-ú

ú-še-ši-bu i-na É ⸢ša-ni^?-im^?-ma⸣

É šu-a-ta ⸢ad⸣-ke-e-ma te-me-en-šú la-bi-ri ú-ba-ʾi-[x]-⸢ma⸣

18 KÙŠ qá-⸢qá⸣-ri ú-ša-ap-pi-⸢il-ma⸣

te-me-en-⸢na⸣ ^mna-ra-am-^d30 DUMU ^m⸢LUGAL-GI.NA⸣

ša 3 ⸢LIM⸣ 2 ME MU.AN.NA.MEŠ ma-⸢na⸣-ma

⸢LUGAL⸣ [x]-⸢li-ik⸣ maḫ-⸢ri-ia la i⸣-mu-ru

^d⸢UTU⸣ be-lum ⸢ra-bí⸣-ù é-babbar-⸢ra⸣ É-su

šu-⸢ba⸣-at ṭu-ub lìb-⸢bi⸣-šu ú-kal-lim-⸢an⸣-ni ia-a-šu

⸢i⸣-na ITI.DU₆ i-na ITI ⸢šá-al⸣-mu i-na UD ŠE.GA

⸢ša⸣ i-na bi-ri ú-ad-du-ni ⸢^d⸣UTU ù ^dIŠKUR

i-na KÙ.BABBAR KÙ.GI NA₄ ni-siq-⸢ti šu-qu⸣-ru-tu

ḫi-bi-iš-ti GIŠ.TIR ŠIM.ḪI.A ⸢GIŠ⸣.EREN

i-na ḫi-da-a-ti ù ri-⸢ša-a⸣-ta

e-li te-me-en-na ša ^mna-ra-am-^d30 DUMU ^mLUGAL-⸢GI.NA⸣

ŠU.SI la a-ṣe-<e> ŠU.SI la e-⸢re-bi⸣

ú-ki-in lib-na-at-⸢su⸣

5 LIM GIŠ.EREN dan-nu-tum a-na ṣu-lu-li-ša ú-⸢šat⸣-ri-iṣ

⸢GIŠ.IG.MEŠ GIŠ.EREN ṣi-ra⸣-a-ti as-kup-pu ⸢ù⸣ nu-ku-še-e

i-na ⸢KÁ⸣.KÁ-šu ⸢ú-ra⸣-at-ti

⸢é-babbar-ra a-di⸣ [x]-⸢kun₄-an-kù-ga ziq⸣-qur-⸢ra⸣-ti-šu

e-⸢eš⸣-[...] ⸢ši-pí⸣-ir-šu

qá-⸢tì⸣ [...]-⸢at⸣-ma

i-na ⸢ḫi⸣-[...]-⸢ta⸣

šu-ba-⸢at⸣ [...]

ši-⸢ṭir^?⸣ [...]

⸢la⸣ [...]

[...]

⸢^dUTU EN⸣ [...]-⸢e⸣ [...]

nu-ú-ru [x x] ab-⸢bé⸣-[x x]

ṣi-it lib-⸢bi⸣ [x x] ⸢EN⸣.ZU ù ^d[x x]

a-na é-babbar-ra É ⸢na-ra⸣-mi-ka i-na ⸢e-re⸣-[x x]

BÁRA-ka da-ru-⸢ú⸣ i-na ra-mé-⸢e⸣-[x]

ia-a-ti ^d⸢AG-NÍ⸣.TUKU LUGAL TIN.TIR.KI NUN ⸢za⸣-[...]

mu-ṭi-⸢ib lib⸣-bi-⸢ka⸣ e-pí-iš ku-um-mi-⸢ka⸣ [...]

⸢e-ep-še⸣-tu-ú-a ⸢SIG₅⸣.MEŠ ḫa-di-iš na-⸢ap⸣-[...]

u₄-mi-šam-ma i-na ⸢ni⸣-ip-ḫi ⸢ù⸣ [x x]

i-na šá-ma-mi ù qá-qá-⸢ri du⸣-[x x]-⸢iq it-ta⸣-[...]

un-nin-ni-ia le-qé-e-⸢ma mu⸣-[x]-⸢ra⸣ ta-aṣ-li-⸢ti⸣

GIŠ.NÍG.GIDRU ù ši-bir-ri ki-i-nim šá ⸢tu-šat⸣-mi-ḫi qa-tu-ú-a

lu-bi-il a-na du-ur da-a-ri

a-na ^da-nu-ni-tum be-le-⸢et⸣ ta-ḫa-zi

na-šá^* (text: ZA) a-ta GIŠ.PAN ù iš-pa-ti

mu-šal-li-ma-at qí-bi-⸢it⸣ ^dEN.LÍL a-bi-šu

sa-pi-na-at na-ak-ri ⸢mu⸣-ḫal-li-qa-at rag-gu

a-li-ka-at maḫ-ri ša DINGIR.DINGIR

ša i-na ^dUTU.⸢È⸣ ù ^dUTU.ŠÚ.A

ú-da-am-ma-qu ⸢it⸣-ta-tu-ú-a

é-ul-maš É-su ša ⸢i⸣-na ZIMBIR.KI-^da-nu-ni-tum

ša 8 ME MU.AN.NA.⸢MEŠ ul⸣-tu pa-ni ^mšag-ga^* (text: BI) <rak>-ti-šur^* (text: BUR) ia-áš

LUGAL TIN.TIR.KI ⸢DUMU⸣ ^mku-dúr-ri-^dEN.LÍL

LUGAL ma-na-ma la i-pu-šu

te-me-en-šu la-⸢bi⸣-ri aḫ-ṭu-<uṭ>-ma a-ḫi-iṭ ab-re-e-ma

e-li te-me-⸢en⸣-na ^mšag-ga^* (text: BI) <rak>-ti-šur^* (text: BUR) ia-áš DUMU ^mNÍG.GUB-^dEN.LÍL

uš-šu-šu ⸢ad⸣-di-ma ú-ki-in lib-na-at-⸢su⸣

É šu-a-⸢ti⸣ [(x)]-eš-ši-iš e-pu-uš-ma

ú-ša-[x]-⸢li⸣-il ši-pí-ir-šu

⸢^da-nu-ni⸣-[x] be-le-et ta-ḫa-zi

mu-šal-li-ma-⸢at qí-bi-it ^dEN⸣.LÍL a-bi-šu

sa-pi-na-at LÚ.KÚR mu-ḫa-⸢al-li⸣-qa-at rag-⸢gu⸣

a-li-ka-at ma-aḫ-ru ⸢ša DINGIR⸣.[x]

ú-ša-ar-ma-a šu-ba-[x x]

sat-tuk-ku ù ni-in-⸢da⸣-[x x]

e-li ša ma-ḫa-ar ú-⸢ša⸣-[...]

ú-ki-in ma-ḫa-⸢ar⸣-[x]

at-ta ^da-nu-ni-⸢tum be-el-tum ra-bi⸣-[x]

a-na É šu-⸢a⸣-tim ḫa-di-iš ⸢i-na e-re⸣-bi-[x]

⸢e-ep⸣-[x]-⸢tu⸣-ú-a da-am-qá-a-[x]

[x x]-⸢iš na-ap-li-si-ma⸣

⸢ar-ḫi-šam⸣-ma ⸢i-na ^dUTU.È ù⸣ ^dUTU.ŠÚ.A

a-⸢na⸣ ^dEN.⸢ZU a-bi a-li-di-ka⸣

šu-⸢uq⸣-ri-bi ⸢da⸣-mi-⸢iq⸣-tì

⸢man-nu⸣ at-ta ša ^d⸢EN.ZU ù⸣ ^dUTU

⸢a⸣-na šar-ru-ú-⸢tu i⸣-nam-bu-šu-ma

i-na pa-le-e-šu É šu-a-⸢ti in⸣-na-ḫu-ma eš-šiš ip-pu-šu

MU.SAR-ru-ú ši-ṭi-ir ⸢šu⸣-mi-ia li-mu-ur-⸢ma⸣

la ú-nak-ka-ar ⸢Ì⸣.GIŠ lip-šu-uš UDU.⸢SÍSKUR⸣ li-iq-⸢qí⸣

it-ti mu-sa-re-⸢e ši-ṭi-ir⸣ šu-mi-šu ⸢li-iš⸣-ku-un-⸢ma⸣

lu-te-er ⸢áš⸣-ru-uš-šu

⸢^dUTU ù⸣ ^d⸢a⸣-nu-ni-tum su-pu-ú-šu liš-mu-ú

li-im-gu-⸢ra qí⸣-bit-su i-da-a-šu lil-⸢li⸣-ka

li-šá-am-qí-ta ga-⸢ri⸣-šu

u₄-mì-šam-ma a-na ^d⸢30⸣ a-bi ba-ni-šu-un da-mi-iq-ta-šu liq-bu-ú