BM 054532 + BM 066728 + BM 083027 + BM 091110 (Nabonidus 28, ex. 02) [Nabonidus][via ribo/sources]

[x]-⸢na⸣-ku ^dna-bi-um-na-ʾi-⸢id⸣ LUGAL ra-bu-ú

⸢LUGAL⸣ dan-nu LUGAL kiš-šá-tum ⸢LUGAL⸣ KÁ.DINGIR.RA.KI

⸢LUGAL⸣ kib-ra-a-ti er-bet-ti ⸢za-ni⸣-in é-sag-íl ù é-zi-da

[x] ⸢^d⸣EN.ZU ù ^dnin-⸢gal⸣ i-na ŠÀ um-mi-šú

⸢a⸣-na ši-ma-at LUGAL-ú-⸢ti⸣ i-ši-mu ši-ma-at-su

⸢DUMU⸣ ^mdAG-TIN-su-iq-bi NUN e-⸢em⸣-qá pa-li-ḫu DINGIR GAL.GAL a-na-ku

⸢é⸣-ḫúl-ḫúl É ^dEN.ZU ⸢ša qé⸣-re-eb URU.ḫar-ra-an

[x] ⸢ul⸣-tu u₄-mu ṣa-a-⸢tu ^d⸣EN.ZU be-lu ra-bu-ú

[x x]-⸢at⸣ ṭu-ub li-⸢ib⸣-bi-šu ra-mu-ú qé-reb-šu

[...] ⸢ù É šá⸣-[x]-⸢šu⸣ lìb-bu-uš i-zu-uz-ma

[...]-⸢šat-ba-am-ma É šu-a-tum ub-bit-ma ú-šá-lik⸣-šú kar-mu-ti

[...]-⸢e⸣-a ki-⸢i-nim⸣ ^dEN.ZU be-lu ra-bu-ú

[...]-⸢ra⸣-am LUGAL-ú-⸢ti⸣-ia a-na URU ù É ša-a-šu

[x]-⸢li⸣-mu ir-⸢šu⸣-ú ta-a-a-ri

i-na ⸢re⸣-eš LUGAL-ú-ti-ia ⸢da⸣-ri-tum ú-šab-ru-ʾi-in-ni šu-ut-ti

^dAMAR.UTU EN ⸢GAL ù⸣ ^dEN.ZU ⸢na⸣-an-na-ri AN-e ù KI-tim

iz-zi-iz-zu^* (text: SU) ki-lal-la-⸢an ^dAMAR⸣.UTU i-ta-ma-a it-ti-ia

^dAG-NÍ.TUKU LUGAL TIN.TIR.KI ⸢i-na ANŠE⸣.KUR.RA ru-ku-bi-ka

i-ši SIG₄.ḪI.A é-ḫúl-[x] ⸢e-pu-uš-ma⸣

^dEN.ZU EN GAL-ú i-⸢na qé⸣-[...]

pa-al-ḫi-⸢iš a-ta⸣-[...]

⸢É šu⸣-[...]

um-⸢ma-an⸣-[...]

^miš-tu-me-gu LUGAL ⸢um-ma⸣-[...]

a-ma-at ^dEN GAL-i ^dAMAR.UTU ù ^dEN.⸢ZU na-an-na-ri AN-e ù KI-tim⸣

ša qí-bit-su-nu la in-nen-nu-ú a-na qí-É-šu-nu ṣi-ir-ti

ap-la-aḫ ak-ku-ud na-qú-ut-ti ar-še-e-ma

⸢dul⸣-lu-ḫu pa-nu-ú-a la e-gi la a-še-et a-ḫi la ad-du

[x]-⸢šat-ba⸣-am-ma um-ma-ni-ia rap-šá-a-ti ul-tu KUR.ḫa-az-za-tu

[x x] ⸢KUR⸣.mi-ṣir tam-tim e-li-ti a-bar-ti ÍD.BURANUN.KI

[...] ⸢šap⸣-li-ti LUGAL.MEŠ NUN.MEŠ GÌR.NÍTA.MEŠ ù um-ma-ni-ia rap-šá-a-ti

[...] ⸢^d⸣UTU ù ^diš-tar EN.MEŠ-e-a ia-a-tu i-qí-pu-nim

[...] ⸢é⸣-ḫúl-ḫúl É ^dEN.ZU be-li-ia

[...]-⸢di^?⸣-ia ša qé-er-bi URU.ḫar-ra-an

[...] ⸢LUGAL KUR⸣-aš-šur.KI DUMU ^mAN.ŠÁR-ŠEŠ-MU LUGAL KUR-aš-šur.⸢KI⸣

[...] ⸢maḫ⸣-ri-ia i-pu-[x]

[...] ⸢i⸣-na u₄-mu ⸢še-mi-i⸣

[...] ⸢ù⸣ ^dIŠKUR

[...]-⸢kù-gál⸣-ú-tu

[...].A

[...] x x [...]

[...] ⸢GEŠTIN⸣ Ì.GIŠ ⸢LÀL šal-la-ar⸣-x [...]

[x]-⸢li⸣ šá LUGAL.MEŠ AD.MEŠ-e-a e-⸢ep-še⸣-[x x]

[x]-⸢dan⸣-nin-ma ú-nak-ki-⸢il⸣ ši-pí-ir-⸢šu⸣

É.KUR šu-a-tim ul-⸢tu te-me-en-ni-šu⸣ a-di gaba-dib-bi-šú

e-eš-ši-iš ⸢ab⸣-ni-ma ú-šá-⸢ak⸣-[x]-⸢il ši⸣-pí-ir-šu

GIŠ.ÙR.MEŠ GIŠ.⸢EREN ṣi⸣-ru-ti ta-⸢ar⸣-[...]-⸢ma⸣-nu

ú-ša-at-ri-⸢iṣ⸣ ṣe-ru-uš-šu GIŠ.⸢IG.MEŠ GIŠ.EREN šá i-ri-si-na ṭa-a-bi⸣

ú-ra-at-ta-a ⸢i⸣-na KÁ.MEŠ-šú KÙ.BABBAR KÙ.GI É.GAR₈.MEŠ-šú ú-šal-biš-ma

ú-šá-an-bi-iṭ ⸢šá⸣-áš-šá-ni-iš ri-i-mu za-ḫa-le-e eb-bi

mu-na-ak-⸢ki-ip⸣ ga-ri-ia ka-ad-ri-iš uš-zi-iz

i-na ⸢at-ma⸣-ni-šu 2 ^dlàḫ-mu eš-ma-ru-ú sa-pi-in a-a-bi-ia

i-na ⸢KÁ⸣ ṣi-it ^dUTU-ši ZAG ù GÙB ú-šar-ši-id

qá-tì ⸢^dEN⸣.ZU ^dnin-gal ^dnusku ù ^dsa-dàr-nun-na

EN.MEŠ-⸢e⸣-a ul-tu šu-an-na.KI URU ⸢LUGAL-ú-ti-ia⸣

⸢aṣ-bat-ma⸣ i-na ḫi-da-a-ti ù ⸢ri⸣-šá-a-⸢tu⸣

šu-ba-⸢at ṭu-ub li-ib-bi qé⸣-er-ba-šú ú-še-ši-⸢ib⸣

UDU.⸢SÍSKUR⸣ ta-áš-ri-iḫ-ti eb-bi ma-ḫar-šu-nu aq-qí-⸢ma⸣

ú-⸢šam⸣-ḫi-ra ka-⸢ad⸣-ra-a-a é-ḫúl-ḫúl re-eš-tum ú-ma-al-⸢la⸣

⸢URU⸣.ḫar-ra-an a-na pa-aṭ gi-im-ri-⸢šu⸣

ki-⸢ma⸣ ṣe-et ITI ú-nam-mi-ir ša-ru-ru-⸢šu⸣

^dEN.⸢ZU⸣ LUGAL DINGIR.MEŠ ša AN-e ù KI-⸢tim⸣

ša ⸢ul⸣-la-nu-uš-šu URU ù ma-a-ti ⸢la in⸣-[...]

la (erasure) i-tu-ru ⸢áš-ru-uš-šu⸣

a-na ⸢é⸣-[x]-⸢ḫúl É šu-ba⸣-at la-le-e-⸢ka⸣

[x]-⸢na⸣ [...] ⸢da⸣-mi-iq-ti URU ù É ša-a-⸢šu⸣

[...]-⸢in⸣ šap-tu-uk-⸢ka⸣

[...]-⸢ši⸣-bu-⸢ú⸣-tu AN-e ù KI-⸢tim⸣

[x]-⸢ik⸣-ta-ra-bi ⸢É⸣ ^dEN.ZU a-bi ba-ni-⸢šu⸣-un

[x]-⸢a^?⸣-ti ^dAG-NÍ.⸢TUKU LUGAL⸣ TIN.TIR.KI mu-šak-⸢li-il⸣ É ⸢šu⸣-a-ti

[x x].⸢ZU⸣ LUGAL DINGIR.MEŠ ⸢ša⸣ AN-e ⸢ù⸣ KI-tim

[x]-⸢na⸣ ni-iš i-ni-šu dam-⸢qá⸣-[x]-⸢tu⸣ ḫa-di-⸢iš lip⸣-pal-sa-an-ni-ma

[x]-ḫi-šam-ma i-na ni-ip-ḫu ⸢ù⸣ ri-bi

⸢li⸣-dam-mi-iq [x]-⸢ta⸣-tu-ú-a

⸢u₄⸣-mi-ia li-šá-ri-ik ⸢MU.AN⸣.NA.MEŠ-⸢ia li-šá-an-di⸣-il

lu-ki-in pa-lu-ú-a ⸢LÚ⸣.na-ak-ru-ti-ia ⸢li⸣-[x x]-⸢ud⸣

LÚ.za-ma-ni-ia ⸢li⸣-šá-am-qit li-is-pu-un LÚ.⸢ga⸣-[x x]

⸢^dnin-gal um-mi DINGIR.MEŠ⸣ [x x]

i-na ma-ḫar ^dEN.⸢ZU⸣ [...]

^dUTU ù ^diš-⸢tar⸣ [...]

a-na ^dEN.ZU a-⸢bi⸣ [...]

^dnusku suk-⸢kal⸣-[...]

li-iṣ-⸢ba⸣-[...]

mu-sa-⸢ru⸣-[...]

LUGAL KUR-⸢aš⸣-[...]

la ⸢ú⸣-[...]

it-⸢ti⸣ [...]

a-⸢na⸣ [...]

⸢é⸣-[...]

[...]-⸢ma^?⸣

[...]-⸢ú^? la i⸣-mu-ru

[...]-⸢na^?⸣ 45 MU.AN.NA.MEŠ

ša É šu-a-tu ⸢i-qu-pu⸣ i-ga-ru-⸢šu⸣

ak-ku-ud áš-ḫu-⸢ut⸣ na-qú-ut-ti ar-še-e-⸢ma⸣

dul-lu-ḫu ⸢pa-nu⸣-ú-a a-di ^dUTU ⸢ul⸣-tu qé-er-bi-šu ú-še-ṣu-⸢ú⸣

ú-še-⸢ši⸣-bu i-na É ⸢ša⸣-nim-⸢ma⸣

⸢É šu⸣-a-tim ad-ke-e-ma te-me-en-šu ⸢la⸣-bi-ru ú-ba-ʾi-i-⸢ma⸣

⸢18⸣ KÙŠ qá-qá-ri ú-šá-⸢ap-pi-il-ma⸣

[x]-me-en-<na> ^mna-ra-am-^dEN.ZU [...] x [...]

[x] ⸢3 LIM⸣ 2 ME MU.AN.NA.MEŠ ma-na-⸢ma LUGAL a⸣-lik maḫ-ri-ia la i-mu-ru

[x x] ⸢EN ra⸣-bí-⸢ù é⸣-babbar-ra É-su

[...]-⸢ub⸣ lib-⸢bi-šu ú⸣-kal-lim-an-ni ia-a-šu

[...] ⸢i-na⸣ ITI šá-al-mu i-na u₄-mi ŠE.GA

[...] ⸢bi-ri⸣ ú-ad-du-ú ^dUTU ù ^dIŠKUR

[...].⸢GI⸣ NA₄ ni-siq-ti šu-qu-ru-tu

[...] ⸢GIŠ⸣.TIR ŠIM.ḪI.A GIŠ.EREN i-na ḫi-da-a-ti ù ri-šá-a-ti

e-li ⸢te⸣-me-en-<na> ^mna-ra-am-^dEN.ZU DUMU ^mLUGAL-GI.NA

ŠU.⸢SI⸣ la a-ṣe-e ŠU.SI la e-re-bi

⸢ú⸣-ki-in li-ib-na-at-su

⸢5 LIM⸣ GIŠ.EREN dan-nu₄-tim a-na ṣu-lu-li-šu ú-šat-ri-iṣ

⸢GIŠ.IG.MEŠ⸣ GIŠ.EREN ṣi-ra-a-ti as-kup-pu ù nu-ku-še-e

i-⸢na KÁ.MEŠ-šu⸣ ú-ra-at-ti

é-babbar-⸢ra⸣ [...]-⸢kun₄-an⸣-kù-ga ziq-qur-ra-ti-šu

e-eš-⸢ši⸣-[...]-⸢uš⸣-ma ú-šak-li-il ši-pi-ir-šu

qá-⸢tì⸣ [...]-ia aṣ-bat-ma i-na ḫi-da-a-ti ù ri-šá-a-ti

šu-⸢ba⸣-[x] ṭu-ub lib-bi qé-er-ba-šu ú-še-ši-ib

⸢ši-ṭir šu⸣-um ša ^mna-ra-am-^dEN.ZU DUMU ^mLUGAL-⸢GI.NA⸣ a-mur-⸢ma⸣

⸢la ú⸣-na-ak-ki-ir Ì.GIŠ ap-⸢šu-uš⸣ UDU.SISKUR ⸢aq-qí⸣

⸢it⸣-ti MU.SAR-e-a áš-kun-ma ú-te-er áš-ru-uš-⸢šu⸣

^dUTU EN GAL-ú šá AN-e ù KI-tim ⸢nu⸣-ú-ru DINGIR.MEŠ ab-bé-⸢e⸣-[x]

ṣi-it lib-bi ša ^dEN.ZU ù ^dnin-gal

a-na é-babbar-ra É na-ra-mi-ka i-na e-re-bi-⸢ka⸣

⸢BÁRA⸣-ka da-ru-ú i-na ra-mé-e-⸢ka⸣

ia-a-ti ^dAG-NÍ.TUKU LUGAL TIN.TIR.KI ru-bu-ú ⸢za⸣-[...]

mu-ṭi-ib lib-bi-ka e-pí-iš ku-um-mi-⸢ka⸣ [...]

e-ep-še-tu-ú-a dam-qá-a-ti ḫa-⸢di-iš⸣ [...]

u₄-mi-šá-am-ma i-na ni-ip-ḫu ù ri-bi i-⸢na⸣ [...]

du-um-mi-iq it-ta-⸢tu⸣-[x x]

un-nin-ni-ia le-qé-e-ma mu-gu-ur ⸢ta-aṣ⸣-[x x]

GIŠ.NÍG.GIDRU ù ši-bir-ri ki-i-nim šá tu-šat-mi-ḫu qá-tu-⸢ú⸣-[x]

lu-bé-el a-na du-ur ⸢da⸣-[x x]

a-na ^da-nu-ni-tum be-le-et ta-ḫa-⸢zi na⸣-[...]

mu-šal-li-ma (over erasure) at qí-bit ^dEN.⸢LÍL⸣ [...]

sa-pi-na-at na-ak-ru mu-ḫal-⸢li⸣-[...]

⸢a⸣-li-ka-at ma-aḫ-ru ⸢ša⸣ [x].⸢DINGIR⸣

⸢ša⸣ i-na ^dUTU.È.A ù ⸢^dUTU.ŠÚ⸣.A

[x]-⸢da⸣-am-ma-qu it-ta-tu-ú-a

[x]-⸢ul⸣-maš É-su ša i-na ZIMBIR.KI-^da-nu-ni-tum

⸢ša⸣ 8 ME MU.MEŠ ul-tu pa-ni ^mšag-ga^* (text: BI) <rak>-ti-šur^* (text: BUR) ia-áš LUGAL TIN.TIR.KI

⸢DUMU⸣ ^mNÍG.GUB-^dEN.LÍL LUGAL ma-na-ma la i-pu-šu

⸢te⸣-me-en-šú la-bi-ru aḫ-ṭu-uṭ-ma a-ḫi-iṭ ab-re-e-ma

⸢e⸣-li te-me-en-<na> šá ^mšag-ga^* (text: BI) <rak>-ti-šur^* (text: BUR) ia-áš DUMU ^mku-dúr-ri-^dEN.LÍL

⸢uš⸣-šu-šu ad-di-ma ú-ki-in lib-na-at-su

⸢É⸣ šu-a-tum e-eš-ši-iš e-pu-uš-ma ú-šak-lil ši-pi-ir-šu

[x x]-nu-ni-tum be-let ta-ḫa-zi mu-šal-li-mat qí-bit ^dEN.LÍL a-bi-šu

⸢sa⸣-pi-na-at na-ak-ru mu-ḫal-li-qa-at rag-gu

⸢a⸣-li-⸢ka-at⸣ maḫ-ri šá DINGIR.MEŠ ú-šar-ma-a šu-bat-su

⸢sat-tuk⸣-ku ù nin-da-⸢bé⸣-e e-li ša ma-⸢ḫar⸣

[x]-⸢šá⸣-te-er-ma ú-⸢ki⸣-in ma-ḫar-⸢šu⸣

⸢at⸣-ta ^da-nu-ni-tum GAŠAN GAL-⸢ti⸣ a-⸢na É šu-a-tu⸣ ḫa-di-iš i-na e-re-bi-ka

e-ep-še-tu-ú-a SIG₅.MEŠ [...]-⸢si-ma⸣

ar-ḫi-šam-ma i-na ^d⸢UTU⸣.[...]

a-na ^dEN.ZU a-bi a-li-⸢di⸣-[...]

man-nu at-ta ša ^dEN.ZU ⸢ù⸣ [...]

i-na pa-le-e-šu É šu-a-⸢tim^? in^?⸣-[...] ⸢ip-pu-šu⸣

⸢mu-sa-ru-ú ši-ṭi-ir šu-mi⸣-ia ⸢li-mu-ur⸣-ma la ú-nak-⸢ka-ar⸣

Ì.GIŠ li-ip-⸢šu-uš UDU⸣.SÍSKUR BAL-qí

it-ti mu-sa-re-⸢e⸣ [x]-⸢ṭi⸣-ir šu-mi-šú li-iš-kun-⸢ma⸣

lu-te-er áš-ru-⸢uš-šu⸣ ^dUTU ù ^da-nu-ni-tum su-pu-šu liš-⸢mu⸣-ú

li-im-gu-ra qí-⸢bit-su⸣ i-da-a-šu lil-li-ku

li-ša-am-⸢qí⸣-it ga-ri-šu

u₄-mi-šá-am-ma a-⸢na⸣ ^dEN.ZU a-bi ba-ni-ši-na (over erasure?) da-mi-iq-ta-šu liq-ba-a