BM 091109 (Nabonidus 28, ex. 01) [Nabonidus][via ribo/sources]

a-na-ku ^dna-bi-um-na-ʾi-id LUGAL ra-bu-ú LUGAL dan-nu

LUGAL kiš-šá-ti LUGAL TIN.TIR.KI LUGAL kib-ra-a-ti er-bet-ti

za-ni-in é-sag-íl ù é-zi-da

ša ^dEN.ZU ù ^dnin-gal i-na ŠÀ um-⸢mi⸣-[x]

a-na ši-ma-at LUGAL-ú-tu i-ši-mu ši-⸢ma⸣-[x x]

DUMU ^mdAG-TIN-su-iq-bi NUN e-em-qu pa-⸢li-iḫ⸣ [...] a-⸢na⸣-ku

é-ḫúl-ḫúl É ^dEN.ZU ša ⸢qé-reb⸣ URU.ḫar-ra-nu

ša ul-tu u₄-mu ṣa-a-ti ⸢^dEN⸣.ZU EN ra-bu-ú

šu-ba-at ṭu-ub lìb-⸢bi-šu ra-mu⸣-ú qé-re-eb-šú

e-li URU ù É ⸢šá⸣-a-šu lìb-bu-uš i-zu-uz-ma

LÚ.ERIM-man-da ú-⸢šat⸣-ba-am-ma É šu-a-tim ub-bi-it-ma

ú-ša-lik-šu kar-mu-tu i-na pa-le-e-a ki-i-nim

^dEN.<ZU> EN GAL-ú i-⸢na⸣ na-ra-am LUGAL-ú-ti-ia

a-na URU ù É šá-⸢a⸣-šu is-li-mu ir-šu-ú ta-a-a-ri

i-na re-eš LUGAL-ú-ti-⸢ia⸣ da-rí-ti ú-šab-ru-ʾi-in-ni šu-ut-ti

^dAMAR.UTU EN GAL ù ^dEN.ZU na-an-na-ri AN-e ù KI-tim

iz-zi-zu ki-lal-la-an ^dAMAR.UTU i-ta-ma-a it-ti-ia

^dAG-NÍ.TUKU LUGAL TIN.TIR.KI i-na ANŠE.KUR.RA ru-ku-bi-ka

i-ši SIG₄.ḪI.A é-ḫúl-ḫúl e-pu-uš-ma ^dEN.ZU EN GAL-ú

i-na qé-er-bi-šu šu-ur-ma-a šu-ba-at-su

pa-al-ḫi-iš a-ta-ma-a a-na ^dEN.LÍL DINGIR.MEŠ ^dAMAR.UTU

É šu-a-tim ša taq-bu-ú e-pe-šu

LÚ.ERIM-man-da sa-ḫi-ir-šum-ma pu-ug-gu-lu e-mu-qá-a-šu

^dAMAR.UTU-ma i-ta-ma-a it-ti-ia LÚ.ERIM-man-da šá taq-bu-ú

ša-a-šu KUR-šu ù LUGAL.MEŠ a-lik i-di-šu ul i-ba-áš-ši

i-na ša-lu-ul-ti MU.AN.NA i-na ka-šá-du

ú-šat-bu-niš-šum-ma ^mku-ra-áš LUGAL KUR.an-za-an ARAD-su ṣa-aḫ-ri

i-na um-ma-ni-šu i-ṣu-tu LÚ.ERIM-man-da rap-šá-a-ti ú-sap-pi-iḫ

^miš-tu-me-gu LUGAL LÚ.ERIM-man-da iṣ-bat-ma ka-mu-ut-su a-na KUR-šu il-qé

a-mat ^dEN GAL-ú ^dAMAR.UTU ù ^dEN.ZU na-an-na-ri AN-e ù KI-tim

šá qí-bi-it-su-nu la in-nen-nu-ú a-na qí-bi-ti-šú-nu ṣir-ti

ap-la-aḫ ak-ku-ud na-qut-ti ar-še-e-ma dul-lu-ḫu pa-nu-ú-a

la e-gi la a-še-et a-ḫi la^* (text: AD) ad-da ú-šat-ba-am-ma

um-ma-ni-ia rap-šá-a-ti ul-tu KUR.ḫa-az-za-ti pa-aṭ KUR.mi-ṣir

tam-tim e-li-ti a-bar-ti ÍD.BURANUN.KI a-di tam-tim šap-li-ti

LUGAL.MEŠ NUN.MEŠ GÌR.NÍTA.MEŠ ù um-ma-ni-ia rap-šá-a-ti

ša ^dEN.ZU ^dUTU ù ^diš-tar EN.MEŠ-e-a ia-ti i-qí-pu-nu

a-na e-pe-šu é-ḫúl-ḫúl É ^dEN.ZU EN-ia a-lik i-di-ia

ša qé-reb URU.ḫar-ra-nu šá ^mAN.ŠÁR-ba-an-IBILA LUGAL KUR-aš-šur.KI

DUMU ^mAN.ŠÁR-ŠEŠ-MU LUGAL KUR-aš-šur.KI NUN a-lik maḫ-ri-ia i-pú-šu

i-na ITI šá-al-mu i-na u₄-<mi še>-mi-i šá i-na bi-ri ú-ad-du-ni ^dUTU ù ^dIŠKUR

i-na né-me-qu ^dé-a ù ^dasal-lú-ḫi i-na ka-kù-gál-ú-tu

i-na ši-ip-ri ^dkulla EN uš-šu ù SIG₄.ḪI.A

i-⸢na⸣ KÙ.BABBAR KÙ.GI NA₄ ni-siq-⸢ti⸣ šu-qu-⸢ru-tu ḫi⸣-biš-ti GIŠ.⸢TIR⸣

⸢ŠIM⸣.ḪI.A GIŠ.EREN i-⸢na⸣ ḫi-da-a-ti ù ri-šá-a-⸢ti⸣

[x x] ⸢te-me-en⸣-na ša ^mAN.ŠÁR-ba-an-IBILA LUGAL KUR-aš-šur.⸢KI⸣

[x] ⸢te⸣-me-en-na ^mšul-man-SAG.KAL DUMU ^mAN.ŠÁR-na-ṣir-IBILA i-mu-⸢ru⸣

⸢uš⸣-šu-šu ad-di-ma ú-kin lib-na-at-su i-na KAŠ GEŠTIN Ì.GIŠ ⸢LÀL⸣

⸢šal⸣-la-ar-šú am-ḫa-aṣ-ma ab-lu-ul ta-ra-aḫ-ḫu-⸢uš⸣

e-li šá LUGAL.MEŠ ab-bé-e-a ép-še-ti-⸢šu ú-dan-nin⸣-[x]

ú-nak-ki-lu ši-pí-ir-šú ⸢É.KUR⸣ [...]

a-di gaba-dib-bi-šú ⸢eš⸣-[...]

GIŠ.ÙR ⸢GIŠ.EREN⸣ [...]

⸢ú-ša^?⸣-[...]

[...] ⸢ú-ra-at⸣-ta-a i-na KÁ.MEŠ-šú

[...].⸢GI É⸣.GAR₈.MEŠ-šu ú-šal-biš-ma ú-šá-an-bi-iṭ šá-áš-šá-ni-iš

⸢ri-i⸣-[x x]-ḫa-le-e eb-bi mu-nak-kip ga-ri-ia

ka-ad-⸢ri⸣-iš uš-zi-iz i-na at-ma-ni-⸢šu⸣

2 ^dlàḫ-mu eš-⸢ma⸣-ru-ú sa-pi-in a-a-bi-⸢ia⸣

i-na KÁ ṣi-it ⸢^dUTU⸣-ši ZAG ù GÙB ú-⸢šar⸣-ši-id

qá-tì ^d30 ^dnin-gal ⸢^d⸣nusku ù ⸢^d⸣sa-dàr-nun-na

EN.MEŠ-e-a ul-tu šu-an-⸢na.KI⸣ URU LUGAL-ú-ti-ia

aṣ-ba-at-ma i-na ḫi-da-a-ti ù ri-šá-a-ti

šu-ba-at ṭu-ub lìb-bi qé-er-ba-šu ⸢ú⸣-še-ši-ib

UDU.SÍSKUR taš-ri-iḫ-ti eb-bi ma-ḫar-šú-nu ⸢aq-qí⸣-ma

ú-šam-ḫi-ir kád-ra-a-a é-ḫúl-ḫúl re-eš-tum ú-mál-⸢li⸣-ma

URU.ḫar-ra-an a-na pa-aṭ gi-im-ri-⸢šu⸣

ki-ma ṣe-et ITI ú-nam-mi-ir ša-ru-ru-šu

⸢^dEN⸣.ZU LUGAL DINGIR.MEŠ šá AN-e ù ⸢KI⸣-tim šá ul-la-nu-uš-šu

⸢URU ù⸣ KUR la in-nam-du-⸢ú la⸣ i-tur-ru áš-ru-uš-šu

a-[x] ⸢é-ḫúl⸣-ḫúl ⸢É⸣ šu-bat la-le-e-ka i-na e-re-bi-ka

SIG₅-tì URU ⸢ù⸣ É šá-a-šu liš-šá-ki-in šap-tu-uk-ka

DINGIR.MEŠ a-ši-⸢bu⸣-tu ša AN-e ù KI-tim

li-ik-ta-ra-bu ⸢É⸣ ^dEN.ZU a-bi ba-ni-šu-un

ia-ti ^dAG-NÍ.TUKU LUGAL ⸢TIN⸣.TIR.KI mu-šak-lil É šu-a-tim

^d⸢EN⸣.ZU LUGAL DINGIR.MEŠ šá AN-e ù ⸢KI⸣-tim i-na ni-iš i-ni-šú SIG₅.MEŠ

ḫa-⸢di⸣-iš lip-pal-sa-an-ni-ma ár-ḫi-⸢šam-ma⸣ i-na ni-ip-ḫi ù ri-ba

⸢li⸣-dam-mi-iq it-ta-tu-ú-a UD.⸢MEŠ-ia⸣ li-šá-ri-ik

MU.AN.NA.MEŠ-ia li-šá-an-di-il lu-ki-in pa-⸢lu⸣-ú-a

LÚ.na-ak-ru-ti-ia lik-šu-ud LÚ.za-ma-ni-ia li-⸢šá-am-qit⸣

li-is-pu-un ga-ri-ia ^dnin-gal AMA DINGIR GAL.⸢GAL⸣

i-na ⸢ma⸣-ḫar ^dEN.ZU na-ra-mi-šú li-iq-ba-a ba-ni-ti

^dUTU ⸢ù⸣ ^diš-tar ṣi-it ŠÀ-šú na-am-ra

a-na ^dEN.ZU a-bi ba-ni-šu-nu li-iq-bu-ú SIG₅-tì

^dnusku SUKKAL ⸢ṣi⸣-i-ri su-pe-e-a li-iš-me-e-ma

li-iṣ-ba-at a-⸢bu⸣-tu mu-sa-ru-ú ši-ṭi-ir šu-um

šá ^mAN.ŠÁR-ba-an-⸢IBILA⸣ LUGAL KUR-aš-šur.KI a-mu-ur-ma

la ú-nak-ki-ir Ì.GIŠ ap-šu-uš UDU.SÍSKUR aq-qí

it-ti mu-sa-re-e-a áš-⸢kun⸣-ma ú-te-er áš-ru-uš-šu

a-na ^dUTU da-a-a-nu ša AN-e ⸢ù⸣ KI-tim

é-babbar-ra É-su šá qé-reb ZIMBIR.⸢KI⸣

šá ^mdAG-NÍG.GUB-ÙRU LUGAL maḫ-ri i-pu-šu-ma

te-me-en-šu la-bi-ri ú-ba-ʾu-ú la i-mu-ru

É šu-a-tim i-pu-uš-ma i-na 45 MU.AN.NA.MEŠ

ša É šu-a-tim i-qu-pu i-ga-ru-šu ak-ku-ud áš-ḫu-ut

na-qut-ti ar-še-e-ma dul-lu-ḫu pa-nu-ú-a

a-di ^dUTU ul-tu qé-er-bi-šu ú-še-ṣu-ú

ú-še-ši-bu i-na É šá-nim-ma É šu-a-tim ad-ke-e-ma

te-me-en-šu la-bi-ri ú-ba-ʾi-ma 18 KÙŠ qá-qá-ri

ú-šap-pi-il-ma te-me-en-na ^mna-ram-^d30 DUMU ^mLUGAL-GI.⸢NA⸣

ša 3 LIM 2 ME MU.AN.NA.MEŠ ma-na-ma LUGAL a-lik maḫ-ri-ia la i-mu-⸢ru⸣

^dUTU EN GAL-ú é-babbar-ra É šu-bat ṭu-ub ŠÀ-⸢šú⸣

ú-kal-lim-an-ni ia-a-ši i-na ITI.DU₆ i-na ITI šal-mu i-na ⸢UD ŠE⸣.GA

ša i-na bi-ri ú-ad-du-ni ^dUTU ù ^d⸢IŠKUR⸣

i-na KÙ.BABBAR KÙ.GI NA₄ ni-siq-ti šu-qu-ru-tu ḫi-biš-ti GIŠ.⸢TIR⸣

ŠIM.ḪI.A GIŠ.EREN i-na ḫi-da-a-ti ù ri-šá-a-ti

e-li te-me-en-⸢na⸣ ^mna-ra-am-^dEN.ZU DUMU ^mLUGAL-⸢GI.NA⸣

ŠU.SI la a-ṣe-⸢e⸣ ŠU.SI la e-re-bi ú-kin lib-⸢na⸣-at-su

[x x] GIŠ.EREN dan-nu-tu a-na ṣu-lu-li-⸢šú⸣ ú-šat-ri-iṣ

[x x].MEŠ GIŠ.EREN ṣi-ra-a-ti as-kup-⸢pu ù⸣ nu-ku-še-e

[x x] ⸢KÁ⸣.MEŠ-šu ú-⸢ra⸣-at-ti

[x x]-⸢ra⸣ a-⸢di é⸣-kun₄-an-kù-⸢ga⸣ ziq-qur-ra-ti-šú

[x x]-⸢iš⸣ e-pu-⸢uš-ma ú-šak⸣-lil ši-pí-ir-šu

[...] ⸢UTU EN⸣-ia aṣ-bat-⸢ma i⸣-na ḫi-da-a-ti ù ri-šá-a-ti

[...] ⸢ṭu⸣-ub lìb-bi ⸢qé⸣-er-⸢ba⸣-šu ú-še-ši-ib

[...]-⸢um⸣ šá ^mna-⸢ra⸣-am-^d30 DUMU ^mLUGAL-GI.NA a-mu-ur-ma

[...] ⸢Ì.GIŠ⸣ ap-šu-uš ⸢UDU⸣.SÍSKUR aq-qí

⸢it-ti⸣ [x]-⸢sa-re⸣-e-a áš-ku-un-ma ú-te-er áš-ru-uš-šu

^d⸢UTU EN GAL-ú šá AN-e⸣ ù KI-tim nu-úr DINGIR.MEŠ ab-bé-e-šu

ṣi-it lìb-bi ša ^dEN.⸢ZU⸣ ù ^dnin-gal

a-na é-babbar-ra É na-ra-mi-ka i-⸢na e⸣-re-bi-ka

BÁRA-ka da-ru-ú i-na ra-mé-⸢e⸣-ka

ia-ti ^dAG-NÍ.TUKU LUGAL TIN.TIR.KI NUN za-ni-in-⸢ka⸣

mu-ṭi-ib lìb-bi-ka e-pí-iš ku-um-mi-ka ṣi-i-ri

ép-še-tu-ú-a SIG₅.MEŠ ḫa-di-iš na-ap-li-is-ma

u₄-mi-šam-ma i-na ni-ip-ḫi ù ri-ba i-na šá-ma-mi ù qá-qá-ri

du-um-mi-iq it-ta-tu-ú-a un-nin-ni-ia le-qé-e-ma

mu-⸢gu⸣-ur ta-aṣ-li-ti GIŠ.NÍG.GIDRU ù ši-bir-ri ki-i-nim

šá tu-šat-mi-⸢ḫu qa⸣-tu-ú-a lu-bé-el a-na du-ú-ri da-a-ri

a-na ^da-nu-ni-tum GAŠAN ⸢MÈ na⸣-šá-ta GIŠ.PAN ù iš-pa-ti

mu-šal-li-ma-at qí-bi-⸢it⸣ ^dEN.LÍL a-bi-šu

sa-pi-na-at LÚ.na-ak-ru mu-ḫal-li-⸢qa-at⸣ ra-ag-gu

a-li-ka-at maḫ-ri ša ⸢DINGIR⸣.DINGIR

ša i-na ^dUTU.È ù ^dUTU.ŠÚ.A ú-dam-ma-qu ⸢it⸣-[x]-⸢tu⸣-ú-a

é-ul-maš É-su šá i-na ZIMBIR.KI-^da-nu-ni-tum šá ⸢8⸣ [...]

ul-tu pa-ni ^mšà-ga-rak-ti-šur^* (text: BUR) ia-àš^* (text: ÍA) LUGAL TIN.⸢TIR.KI⸣

DUMU ^mNÍG.GUB-^dEN.LÍL LUGAL ma-na-ma la ⸢i-pu⸣-šu

⸢te-me-en⸣-šu la-bi-ri aḫ-ṭu-uṭ-ma a-ḫi-⸢iṭ⸣ ab-re-e-ma

e-li te-⸢me-en⸣-na ^mšà-ga-rak-ti-šur^* (text: BUR) ⸢ia⸣-áš DUMU ^mNÍG.GUB-^dEN.LÍL

uš-šu-šu ad-di-⸢ma ú⸣-ki-⸢in lib⸣-na-at-su

É šá-a-šu eš-šiš e-⸢pu⸣-uš-<ma> ú-šak-lil ši-pí-ir-šú

^da-nu-ni-tum GAŠAN ⸢MÈ⸣ mu-<šal>-li-mat qí-bit ^dEN.LÍL a-bi-šu

sa-pi-na-at ⸢LÚ⸣.na-ak-ru mu-ḫal-li-qa-at rag-gu

a-li-ka-⸢at⸣ maḫ-ri šá DINGIR.MEŠ ú-šar-ma-a šu-ba-at-su

sat-tuk-ku ⸢ù⸣ nin-da-bé-e e-li šá maḫ-ri ú-šá-te-er-ma

ú-⸢kin⸣ ma-ḫar-šú at-ta ^da-nu-ni-tum GAŠAN GAL-ti

a-⸢na⸣ É šu-a-tim ḫa-di-iš i-na e-re-bi-ka

⸢ép⸣-še-tu-ú-a SIG₅.MEŠ ḫa-di-iš na-ap-li-si-ma

ár-ḫi-šam-ma i-na ^dUTU.È ù ^dUTU.ŠÚ.A

a-na ^dEN.ZU a-bi a-li-di-ka šu-uq-ri-ba SIG₅-tì

man-nu at-ta šá ^d30 ù ^dUTU a-na LUGAL-ú-tu i-nam-bu-šu-ma

i-na pa-le-e-šú É šu-a-tim in-na-ḫu-ma eš-šiš ip-pu-šu

mu-sa-ru-ú ši-ṭir šu-mi-ia li-mur-ma la ú-nak-ka-ar

Ì.GIŠ lip-šu-uš UDU.SÍSKUR li-iq-qí

it-ti mu-sa-ru-ú ši-ṭir šu-mi-šú liš-kun-ma lu-ter áš-ru-uš-šu

^dUTU ù ^da-nu-ni-tum su-pu-ú-šu li-iš-mu-ú

li-im-gu-ra qí-bit-su i-da-a-šú lil-li-ku

li-šá-am-qí-ta ga-ri-šú u₄-mi-šam-ma a-na ^dEN.ZU

a-bi ba-ni-šu-un da-mi-iq-ta-šú li-iq-bu-ú