BM 042269 (Nabonidus 25, ex. 01) [Nabonidus][via ribo/sources]

^dAG-na-ʾi-id LUGAL TIN.TIR.KI za-[nin é-sag]-⸢íl⸣ ù é-zi-da

NUN na-a-du mu-uš-te-eʾ-ú ⸢aš⸣-[ra]-⸢a⸣-ti DINGIR GAL.GAL

i-dan za-ni-na-tú šá u₄-mi-šá-am ⸢a-na⸣ pa-làḫ DINGIR.MEŠ ba-šá-a GEŠTU.II-šú

lib-ba pa-al-ḫu ša a-na a-⸢mat⸣ DINGIR ù EŠ₁₈.TÁR ra-bi-iš pu-tuq-qú

áš-ru ka-an-šu ⸢ša⸣ ra-šu-ú pu-lu-úḫ-tim

a-na DINGIR.MEŠ ù ^dEŠ₁₈.⸢TÁR⸣ gi-na-a ú-sa-ap-pu-ú

a-na la ra-še-⸢e⸣ ḫi-ṭi-tì

ṣa-ab-tu si-is-si-⸢ik-ti⸣ DINGIR.MEŠ iš-te-né-eʾ-ú ba-la-ṭi

lib-bu-uš pa-al-ḫu-⸢ma⸣ a-mat DINGIR.MEŠ na-aṣ-ru

aš-šum i-na pa-ra-aṣ DINGIR.MEŠ ⸢la⸣ šá-la-ṭi ú-sal-lu-ú DINGIR GAL.GAL

mim-mu-ú ip-pu-šu iš-te-né-⸢eʾ-ú⸣ ar-ka-at-su ḫi-i-ṭa

a-na su-pe-e ù te-mi-qí ar-⸢ki DINGIR⸣.MEŠ re-du-ú

in lìb-bi-šu ga-am-ru ú-sal-lu-ú ^dEN ù DUMU ^dEN

a-na šá-a-ṭi se-er-de-e-šu-nu ku-un-nu-šu ki-šad-su

a-na šu-mi-šu-nu šu-qu-ru pa-al-ḫu DINGIR.DINGIR GAL.GAL

DUMU ^mdAG-TIN-su-iq-bi NUN em-qa a-na-ku

e-nu-ma ^dAMAR.UTU EN GAL be-lu-ut KUR-šú i-qí-pa-an-ni

za-na-nu-ut ma-ḫa-za ud-du-šu eš-re-e-ti ú-mál-lu-ú qa-tu-ú-a

a-na zi-in-na-a-ti é-sag^*-íl ù é-zi-da

ul ap-pa-ra-ak-ka-a ka-a-a-na

re-eš mim-ma-a-a dam-qá ú-še-er-reb qé-reb-šu-un

i-gi-se-e šu-qu-ru-ti at-ta-nab-bal-šú-nu-ši

mim-ma šum-šu ṭù-uḫ-ḫu-du ú-da-aš-ši i-na qé-er-bi-šu-un

it-ti zi-in-na-a-ti é-sag-íl é-zi-da

ù eš-re-e-ti DINGIR GAL.GAL é-babbar-ra É ^dUTU šá qé-reb ZIMBIR.KI

ša LUGAL maḫ-ri i-⸢pú⸣-šu-ma la in-nen-du i-ga-ru-šu

É šu-a-ti i-qu-up-ma it-ru-ra re-e-šá-a-šu

aš-šum É šu-a-ti e-pe-šu EN GAL ^dAMAR.UTU ú-qá-a-an-ni

i-ga-ru-šu qá-a-a-pú-tim ad-ke

e-pe-ri qer-bi-šu as-su-uḫ-ma 18 KÙŠ qaq-qar ú-šá-ap-pil

te-em-mé-en-na la-bi-ru ša na-ra-am-^d30

LUGAL ma-aḫ-ri ap-pa-li-is-ma

e-li te-me-en-na la-bi-ru ad-da-a SIG₄-su

ša iš-tu UD.MEŠ ṣa-a-ti LUGAL i-na LUGAL la ib-nu-ú

ma-na-ma i-na LUGAL ma-aḫ-ri É ša ki-a-am

bu-un-nu-ú a-na ^dUTU la i-pú-šu

é-babbar-ra a-na ^dUTU be-lí-ia ra-bi-iš e-pú-uš

mim-ma ḫi-ši-iḫ-ti é-babbar-ra la ak-la-am-ma ú-še-rib qé-reb-šu

GIŠ.EREN.MEŠ da-nu₄-tim GIŠ.Ù.SUḪ₅.MEŠ pa-ag-lu-ti

GIŠ.MES.MÁ.KAN.NA GAL.MEŠ qer-ba-šu ú-še-ri-ib

ì-nu-šu ša ^dUTU EN GAL DI.KU₅ ṣi-rim ša AN-e ù KI-tim

a-ši-ib é-babbar-ra ša qé-reb ZIMBIR.KI EN-ia

AGA KÙ.GI si-mat i-lu-ti-šu ša ap-ru ra-šu-uš-šu

ti-iq-nu tu-uq-qù-nu bu-un-nu-ú za-ri-nu

šat-ti-ša-am-ma šu-úr-šu-du la i-ba-aš-šu-ú te-na-a-šu

ma-na-ma LUGAL a-lik maḫ-ri-ia te-né-e AGA šu-a-ti ⸢la i-pú-šú⸣

a-na e-peš AGA KÙ.GI ŠÀ pa-li-iḫ ra-ša-ku ⸢pu⸣-[lu-úḫ]-⸢ti⸣

ú-pa-aḫ-ḫi-ir-ma DUMU.MEŠ TIN.TIR.KI ù ⸢bár⸣-[sipa].KI

en-qu-ti ra-áš ṭè-mi ki-ma la-bi-ri-im-ma li-in-né-pu-uš iq-bu-ni

aš-ra-a-ti ^dUTU ù ^dIŠKUR EN.MEŠ bi-ri aš-te-eʾ-e-ma

ša e-peš AGA ša la za-ri-ni ^dUTU ù ^dIŠKUR

i-na te-er-ti-šu-nu ul-li i-tap-pa-lu-in-ni

ap-qid-ma ul-li ú-šal-liš-ma UZU lum-nu iš-šak-na in ter-ti-ia

áš-ni-ma aš-šum e-peš AGA ša la za-ri-ni aš-ra-a-ti ^dUTU

ù ^dIŠKUR aš-te-eʾ-e-ma šum-ma ša e-li i-lu-ti-šu-nu ṭa-a-bu

ù e-li ^dAMAR.UTU a-šib é-sag-íl EN-ia

^dUTU ù ^dIŠKUR an-na ki-nu ú-šá-aš-ki-nu in ter-ti-ia

BE NA GÍD.DA UD.MEŠ NUN GÍD.MEŠ BE GÍR KI.TUŠ.MEŠ-šú ka-šid

ki-bi-is GÌR LÚ KI DINGIR šu-⸢šur⸣ DINGIR ana LÚ NINDA SUM ú-lu me-e uṣ-ṣab

BE SILIM GAR SILIM ZI-tim BE ZÍ SUḪUŠ.MEŠ-šú 15 GI 2.30 ZI

<<BE>> SUḪUŠ ERIM-ia₅ GI SUḪUŠ ERIM KÚR ZI

BE 2.30 ZÍ šá-ti-iq KÚR ILLAT^*-su i-šal-liṭ-su ERIM NUN ḪA.LA GU₇

BE ŠU.SI <šá-lim> EN SÍSKUR i-šal-lim UD.MEŠ-šú GÍD.MEŠ BE MÁŠ DAGAL DÙG-ub ŠÀ

BE AN.TA DU GÌR uš-šur-ti šum-ma LÚ in di-ni UGU ga-ri-šú GUB-az

BE ŠU.SI MUR MURUB₄ SUḪUŠ-su uš-šur ERIM-ni ḪA.LA GU₇

BE ŠÀ.NIGIN 14 ina SILIM-tim ki-šit-ti ŠU.II-ia₅ ŠÀ.SÈ.SÈ.KE ERIM-ia₅ KUR.MEŠ

ERIM-ni ina KASKAL DU-ku ḪA.LA GU₇

du-um-qu te-er-ti an-ni-ti u₄-mi maḫ-ra-a a-mur-ma

aš-šum ša e-li ^dAMAR.UTU EN-ia ṭa-bu áš-né-e ter-ti ap-qid

UZU SIG₅ šá e-peš AGA šu-a-ti ki-ma la-bi-ri-im-ma

iš-šak-na in te-er-ti-ia BE NA GÍD.DA UD.MEŠ NUN GÍD.MEŠ

BE GÍR 2-ma ina 15 GAR.MEŠ DINGIR.MEŠ ina Á DU.MEŠ

BE SILIM uš-te-eš-ni SUḪUŠ GI.MEŠ KI.TUŠ né-eḫ-tim

BE GÍR 15 ZÍ pa-šiṭ ZÍ GAR ERIM-ka SAG A.ŠÀ-šú KUR-ad SILIM-su GUR-ra

BE ZÍ GÍD.DA UD.MEŠ NUN GÍD.MEŠ

BE 2.30 ZÍ ṣa-mi-id GÌR ka-sa-at KÚR

BE ina MURUB₄ EDIN ŠU.SI MURUB₄-i GIŠ.TUKUL GAR-ma KI.TA IGI GIŠ.TUKUL ^d15 Á.TAḪ-ia₅ ZI KÚR suḫ-ḫur šá-niš GIŠ.TUKUL de-e-pi MU-šú

BE AN.TA EDIN MUR 15 i-bir ù ka-as-ka-su ina MURUB₄-šú pa-liš mu-sar-ri-ir ERIM KÚR ina DUGUD-šú ŠUB-ut

BE <SAGŠU> UGU ki-di-tum ir-kab GIŠ.MI DINGIR UGU LÚ GÁL DINGIR ze-nu-ú KI LÚ SILIM-im

ter-ti šu-a-ti ap-pa-lis-ma a-na a-mat ^dUTU

ù ^dIŠKUR EN.MEŠ bi-ri at-kal-ma

AGA KÙ.GI ki-ma la-bi-ri-im-ma šá za-ri-ni in NA₄.GIŠ.NU₁₁.GAL

ù NA₄.UGU.AŠ.GÌ.GÌ šu-šu-bu in NA₄.MEŠ ni-siq-tim šuk-lu-lu

in ši-pir ^dkù-si₂₂-bàn-da u ^dnin-za-dím eš-ši-iš ab-ni

u₄-mi-iš ú-na-am-mi-ir-ma

ma-ḫa-ar ^dUTU be-lí-ia ú-ki-in

^dUTU EN GAL mim-mu-ú e-te-ep-pu-šu

ḫa-di-iš na-ap-li-is-ma

a-na ia-ti ^dAG-na-ʾi-id LUGAL za-ni-ni-ka

ba-la-ṭa₄ UD.MEŠ GÍD.DA.MEŠ še-bé-e lit-tu-tu

a-na še-ri-ik-tim šu-úr-kam

i-pa-at ki-ib-ra-at er-bé-et-tim

nu-ḫu-uš ta-ma-a-ti ḫi-ṣi-ib ša-di-i

ù ma-ti-ta-an ša-ti-ša-am-ma

a-na é-sag-íl É.GAL AN-e ù KI-tim lu-še-⸢rib⸣

a-na-ku lu LUGAL za-ni-nu mu-ud-di-iš [(x)]

eš-re-e-ti DINGIR.DINGIR GAL.GAL a-na da-rí-a-ti