BM 091143 (Nabonidus 16, ex. 01) [Nabonidus][via ribo/sources]

[x x] na-bi-um-na-ʾi-id LUGAL KÁ.DINGIR.RA.KI

[x]-⸢é⸣-a-um ni-bi-it ^dAMAR.UTU

[x]-⸢ni⸣-in é-sag-íl ù é-zi-da

mu-ṭa-aḫ-ḫi-id sa-at-tu-uk-ku

mu-ud-di-[x x]-ḫa-zi DINGIR.MEŠ GAL.MEŠ

i-da-an za-ni-na-a-ti

mu-ṭaḫ-ḫi-id gi-mi-ir É.KUR

za-ni-in eš-re-e-tim mu-šar-ri-iḫ i-gi-se-e

na-áš-pa-⸢ri⸣ la a-ne-ḫi

ka-ši-du ša-di-i e-lu-tim

re-é-a-am mu-uš-ta-lu

mu-uš-[x]-⸢ši⸣-ir ni-ši ma-a-tim

⸢ša⸣ ^dAMAR.UTU ^dEN.LÍL DINGIR.DINGIR a-na za-na-nu ma-ḫa-zi

ù ud-du-šu eš-re-e-ti

⸢šu⸣-um-šu ki-ni-iš iz-ku-ru a-na šar-ru-ti

^dna-bi-um pa-qid kiš-šat AN-e ù KI-tim

[x]-na nap-ḫa-ar a-ši-ib BÁRA

⸢ú⸣-šar-bu-ú be-lu-ut-su

^dNÈ.ERI₁₁.GAL dan-dan-ni

^dEN.LÍL er-ṣe-tim mu-ut-tal-ku

[x]-na qá-ab-lu ù ta-ḫa-zi

il-li-ki i-da-a-šu ^dEN.ZU ù ^dnin-gal

a-ge-e du-úr UD.MEŠ i-pi-ir ra-šu-uš-šú

^dUTU ù ^da-a ṭu-da-at mi-ša-⸢ru⸣

ú-pa-at-tu-šu DINGIR.MEŠ GAL.MEŠ

i-na ku-⸢un⸣ [x x]-šú-nu ra-bi-iš ut-⸢tu⸣-šu

ú-ba-⸢ʾi⸣-[x] šu-um-šu

ú-šar-[...]-⸢lu⸣-ut-su

DUMU ^mdna-[...]-⸢su⸣-iq-bi

ru-ba-a-am ⸢e-em⸣-qá a-na-ku

ì-nu-um ^dUTU be-lu ⸢GAL⸣-ú šá AN-e ù KI-tim

re-ʾu-ú ṣal-mat ⸢SAG.DU⸣ be-lu te-né-še-e-tim

larsa.KI a-lu na-ar-mi-šu é-babbar-ra

⸢šu⸣-ba-at ṭú-ub lìb-bi-šú šá ul-tu UD.MEŠ ul-lu-tim

in-na-mu-ú e-mu-ú kar-mi-iš

ba-aṣ-ṣa ù tu-ru-ba ši-pi-ik e-pe-ru

ra-bu-tim e-li-šu iš-ša-ap-ku-ma

⸢la⸣ uṣ-ṣa-ab-bu-ú ki-su-úr-šu

⸢la⸣ in-⸢na⸣-aṭ-ṭa-la ú-ṣu-ra-ti-ša

⸢i⸣-na BALA-e ^mdMUATI-NÍG.GUB-ÙRU LUGAL maḫ-ri

DUMU ^mdMUATI-ap-lu-ú-ṣur ba-aṣ-ṣa ši-pi-ik e-pe-ri

<ša> e-li URU ù É šu-a-tim

ša-ap-ku in-na-ši-ir-ma te-me-en-na é-babbar-ra

ša ^mbur-na-bur-ia-áš LUGAL pa-na-<a> a-li-ik maḫ-ri

i-mu-ur-ma te-me-en-na LUGAL la-bi-ri šá la-am

^mbur-na-bur-ia-áš ú-ba-ʾi-i-ma la i-mu-ur

e-li te-me-en-na ^mbur-na-bur-ia-áš

ša qé-re-eb-ša ip-pa-al-sa é-babbar-ra i-pu-uš-ma

^dUTU be-lu GAL-ú ú-šar-mi qé-re-eb-šu

É šu-a-tim a-na mu-ša-ab ^dUTU EN GAL-ú

ù ^da-a kal-la-tim na-ra-am-ti-šu

⸢ta⸣-al-la-ak-tu-šu i-ṣa-at-ma

[x]-uḫ-ḫu-ru ši-pi-ir-šu

[x]-na-an-na i-na MU.10.KAM i-na u₄-mu BALA-e-a

⸢da⸣-am-qa i-na šar-ru-ti-ia da-rí-tim

ša ^dUTU i-ra-am-mu-šu₁₄

^dUTU be-lu GAL-ú iḫ-su-su šu-bat-⸢sa⸣ reš^* (text: EN) ti-tim

ša zi-qu-ra-tim ⸢ge-gu⸣-[x]-⸢a⸣-šu

re-e-ši-ša e-⸢li ša⸣ pa-nim ul-li-ma

li-ib-ba-⸢šu ḫa-di-iš⸣ ub-lam-ma

a-na ia-tim ^dMUATI-NÍ.TUKU LUGAL za-ni-ni-šu

é-babbar-ra a-na aš-ri-šu ⸢tu⸣-úr-ru

ki-ma šá UD.MEŠ ul-lu-tim šu-ba-at ṭu-ub lìb-bi-šú

e-pe-šu ú-qa-a-⸢wa₆⸣-an-ni

i-na qí-bi-it ^dAMAR.UTU be-lu GAL-⸢ú it⸣-bu-nim-ma

ša-a-ri er-bet-ti-šu-nu me-ḫe-[...]-⸢tim⸣

ba-aṣ-ṣa ša e-⸢li⸣ URU ù ⸢É⸣ [x]-a-⸢šu⸣

ka-at-ma in-na-si-iḫ-ma é-babbar-ra

ki-iṣ-ṣi ra-áš-ba ú-ra-⸢ša⸣ [x]-⸢ma⸣-ri

mu-ša-ab ^dUTU ù ^d[x]-a

ù zi-qú-ra-ti ge-gu-na-a-šu ṣi-[x]-⸢ri⸣

ku-um-mu da-⸢ru⸣-ú maš-ta-[x] ⸢la-le⸣-[x x]

te-mé-en-šu-un in-na-mi-ir-ma

in-na-aṭ-ṭa-la ú-ṣu-ra-ti-⸢šu⸣-un

ši-ṭi-ir šu-um ša ^mḫa-am-mu-ra-pí

LUGAL la-bí-ri ša 7 ME MU.AN.NA.MEŠ

la-am ^mbur-na-bur-ia-áš

é-babbar-ra ù zi-qu-ra-ti

e-li te-me-en-na la-bi-ri

a-na ^dUTU ib-nu-ù

qé-er-ba-⸢šu⸣ ap-pa-li-is-ma ap-la-[x]

ak-ku-ud-ma ar-ša-a ni-iq-⸢it-ti⸣

ki-a-am aq-bi a-na li-⸢ib⸣-[x x]

um-ma ⸢LUGAL a-li⸣-ku ma-⸢aḫ-ri-ia⸣

É i-pu-uš-ma ^dUTU be-⸢lu ra-bu-ú⸣

ú-ša-ar-mi ⸢qé-re-eb-šu⸣

ia-ti É šu-a-tim [...]

i-na a-šar šu-⸢us^?⸣-[...]

áš-ši qá-ti ú-ṣal-[...]

^dEN.LÍL^* (text: SAG) DINGIR.DINGIR ru-bu-um ^dAMAR.UTU

ba-lu-uk-ka ul in-na-an-da šu-ub-ti

ul ib-ba-áš-ši-mu ki-su-ur-šu

ša la ka-a-šú ma-an-ni mi-na-a ip-pu-uš

be-lu i-na qí-bi-ti-ka ṣi-ir-ti

ša e-li-ka ṭa-a-bi lu-⸢še-ep-pe⸣-eš

áš-ra-a-ti ^dUTU ^dIŠKUR ù ^dU.⸢GUR⸣

a-na e-pé-šu É šu-a-tim aš-te-ʾe-[x]-⸢ma⸣

UZU dum-qí ša a-ra-ku ⸢u₄-mi-ia⸣

ù e-pe-eš É iš-ṭu-ru i-na ⸢lìb⸣-[x]-⸢šu⸣

áš-ni-ma al-pu-ut pu-[x x]

an-na ki-i-ni ša šá-⸢la⸣-mu ⸢ši⸣-[...]

ú-šá-áš-ki-ni i-na ⸢ter-ti-ia⸣

a-na a-mat ^dAMAR.UTU be-lu šu-úr-bi-ia ù a-na a-mat

^dUTU ù ^dIŠKUR EN.MEŠ bi-ri at-ka-al-ma

i-li-iṣ lìb-bi ka-ba-⸢at⸣-ta ip-pa-ar-da

iḫ-di ra-ma-ni im-mi-ru zi-⸢mu⸣-ú-a

ad-ka-am-ma um-ma-na-a-ti ^dUTU ù ^dAMAR.UTU

ṣa-bi-it al-lu na-áš GIŠ.⸢MAR⸣ za-bi-il ⸢GIŠ.DUSU⸣

a-na e-pé-eš é-babbar-ra ki-iṣ-⸢ṣi⸣ [...]-⸢ra⸣-tim

BÁRA-ša ṣi-i-ri ra-bi-iš ú-[...]-⸢ma⸣

um-man-nu mu-du-ú a-šar-ša uš-ta-[x]-⸢ḫir⸣

te-me-en-na i-ḫi-ṭu-ma ú-ṣa-ab-bu-ú si-ma-a-tim

i-na ITI ša-al-ma i-na UD ŠE.GA ša é-babbar-ra

É na-ra-am ^dUTU ù ^da-a pa-pa-ḫi šu-ba-at

i-lu-ti-šu-un maš-ta-ku la-le-šu-un

ki-ma ⸢si-ma⸣-ti-⸢šu⸣-[...]-⸢ta⸣-a-tim

e-⸢li⸣ [...] ^mḫa-am-[x]-ra-pí ⸢LUGAL la-bi⸣-[x]

li-ib-na-⸢at⸣-su-un ⸢ad-di-ma⸣

uš-te-ši-ir te-mé-en-šu-un

É šu-a-tim ki-ma la-bi-ri-im-ma

e-eš-ši-iš e-pú-uš-ma

us-si-mi ši-ki-in-šu é-dur-an-na

É na-ra-mi-šu ki-ma šá UD.MEŠ ul-lu-tim

ul-la-a re-e-ši-šu

é-babbar-ra a-na ^dUTU ù ^da-a

e-pu-uš ú-ša-ak-li-il-ma

ú-ba-an-na-a ta-al-la-ak-⸢tu⸣-uš

pa-pa-ḫi šu-ba-at i-lu-ti-šu-un ṣir-tim

ša i-te-e zi-qu-ra-tim re-tu-ú te-me-en-šú

a-na si-ma-at i-lu-ti-šu-num

ra-bi-tim šu-lu-ku

a-na ^dUTU ù ^da-a EN.MEŠ-e-a

u₄-mi-iš ú-na-am-mi-ir-ma

ú-za-aq-qí-ir ḫur-sa-ni-iš

ša a-na LUGAL ma-na-ma la im-gu-ru

^dUTU be-lu GAL-ú ia-tim LUGAL pa-⸢li⸣-iḫ-šú

im-gu-ur-an-ni-ma ⸢i-ir⸣-a-am qá-tu-ú-a

é-babbar-ra a-na ^dUTU ù ^da-a

EN.MEŠ-e-a ki-ma la-bi-ri-im-ma

da-am-qí-iš e-pú-uš-ma

a-na áš-ri-ša ú-te-er

⸢ṭup⸣-pi NA₄.GIŠ.NU₁₁.GAL ši-ṭi-ir šu-mi

⸢ša⸣ ^mḫa-am-mu-ra-pí LUGAL la-bi-ri

ša qé-re-eb-šu ap-pa-al-sa

⸢it⸣-ti ši-ṭi-ir šu-mi-ia áš-ku-un-ma

ú-ki-in [x] du-úr u₄-mi

a-na ⸢ša⸣-at-⸢ti⸣ ^d[...] ⸢šu⸣-úr-bu-ú

ša-⸢qu-ú⸣ [x x] ⸢gim⸣-ri

LUGAL ⸢AN⸣-[...]-tim

nu-úr [...]-⸢iš⸣ nap-lis-ma

⸢ba-la-ṭa₄⸣ [...]-ti

še-bé-e ⸢lit⸣-[...]-nu GIŠ.GU.ZA

ù la-ba-ra pa-le-e a-na ši-rik-ti šur-kam

i-na qí-bi-ti-ka ṣi-ir-ti

^dUTU be-lu ra-bu-ú É šu-a-tim

ma-ḫa-ar-ka lu-la-ab-bi-ir

a-na da-rí-a-ti

ni-ši ṣa-al-ma-at qaq-qa-du

ma-la i-ba-ar-ra-a nu-úr-ka nam-ri

šu-uk-ši-da qá-tu-ú-a

šu-uk-ni-šu še-e-pu-ú-a

^da-a kal-la-ti ra-bi-tim

i-na ku-um-mi-ka ṣi-i-ri

ka-a-a-na li-ta-mi-ka

da-am-qa-a-ti

^dbu-ne-ne su-uk-kal-lum

mi-it-⸢lu⸣-uk-ti-ka u₄-mi-ša-am-ma

li-ka-al-li-mu

i-da-a-ti du-um-qí-ia