Neriglissar 03

^dNÈ.ERI₁₁.GAL-LUGAL-ú-ṣu-úr LUGAL KÁ.DINGIR.RA.KI

mu-ud-di-iš é-sag-íl ù é-zi-da

e-pí-iš da-am-qá-a-ti

ša a-na e-pe-e-šu LUGAL-ú-ti-šu da-ri-ti

DINGIR GAL.GAL iš-ku-nu mi-it-lu-uk-ti

^dAMAR.UTU a-ša-re-du DINGIR.DINGIR mu-ši-im ši-ma-a-ti

a-na ki-iš-šu-ti MA.DA.MA.DA e-pé-e-šu

i-ši-mu ši-ma-at-su

a-na re-é-ú-ti ṣa-al-ma-at qá-qá-dam e-pé-e-šu

^dAG IBILA ki-i-nim GIŠ.NÍG.GIDRU i-ša-ar-ti

ú-ša-at-mi-ḫu qa-tu-uš-šu

a-na e-ṭe-ri ni-šim ga-ma-lu ma-a-ti

^dèr-ra ša-ga-pú-ru DINGIR.DINGIR id-di-nu-šu ka-ak-ku-šu

DUMU ^dEN-MU-IN.GAR LUGAL TIN.TIR.KI a-na-ku

ì-nu-um ^dAMAR.UTU EN GAL re-e-ši-ia ú-ul-lu-ú

MA.DA ù ni-šim a-na bé-e-lu id-di-nam

a-na-ku a-na ^dAMAR.UTU EN-ia ka-a-a-na-ak la ba-aṭ-la-ak

é-sag-íl ù é-zi-da a-za-an-na-an

uš-te-te-eš-še-er e-eš-re-e-ti

pa-ar-ṣu re-eš-tu-tu aš-te-né-eʾ-a ka-a-a-nam

MUŠ.ḪUŠ e-ri-i ša i-na ki-sè-e KÁ.KÁ é-sag-íl

it-ti ri-i-mu KÙ.BABBAR ša sì-ip-pe-e na-an-zu-zu ka-a-a-nam

i-na KÁ-^dUTU.È KÁ-^dLAMMA-a-ra-bi KÁ-ḪÉ.GÁL ù KÁ-U₆.DE.BABBAR

la uš-zi-zu LUGAL ma-aḫ-ri

ia-ti áš-ru ša-aḫ-ṭu ša pa-la-ḫa DINGIR.DINGIR mu-du-ú

e-ep-ti-iq-ma 8 MUŠ.ḪUŠ e-ri-i še-zu-zu-ú-ti

ša le-em-nim ù a-a-bi i-za-an-nu i-ma-at mu-ú-ti

ti-i-ri KÙ.BABBAR e-eb-bi ú-ša-al-bi-iš-ma

i-na KÁ-^dUTU.È KÁ-^dLAMMA-a-ra-bi KÁ-ḪÉ.GÁL ù KÁ-U₆.DE.<BABBAR>

i-na ki-se-e KÁ.KÁ ši-na-a-ti ki-ma la-bi-ri-im-ma

it-ti ri-i-mu KÙ.BABBAR ša sì-ip-pe-e

ki-ma sì-ma-a-ti-šu re-eš-ta-a-ti ú-uš-zi-iz i-na ki-gal-lam

BÁRA ši-ma-a-ti ša qé-re-eb é-zi-da

ša i-na za-am-mu-uk-ku re-e-ša ša-at-ti

i-na i-sì-in-ni a-ki-ti ta-be-e ^dEN.LÍL DINGIR.DINGIR ^dAMAR.UTU

^dna-bi-um IBILA ki-nim i-ša-ad-di-ḫu a-na qé-re-eb šu-an-na.KI

UD.5.KÁM UD.11.KÁM i-na a-la-ku ù ta-a-ri ša ba-bi-lam.KI

^dAG ⸢IBILA⸣ [šit]-⸢lu-ṭù⸣ i-ra-am-mu-ú ṣe-ru-uš-šu

ša LUGAL ma-aḫ-ri i-na KÙ.BABBAR ip-ti-qu pi-ti-iq-šu

KÙ.GI ⸢nam⸣-ru ti-iq-nim mé-lam-mu ú-ša-al-bi-iš-šu

ÍD.BURANUN.KI ÍD ḪÉ.GÁL-lam ša iš-tu bi-na-a-ti-šu

i-te-e é-sag-íl šu-te-šu-ru mu-ú-šu ga-ap-šu-ti

i-na pa-le-e LUGAL ma-aḫ-ri mu-ú-šu a-na i-te-e é-sag-íl

is-su-ú i-re-e-qu a-na sa-a-bu

ia-ti a-ša-ar-šu la-bí-ri aš-te-eʾ-e-ma

ma-la-ak mé-e-šu ki-ma la-bi-ri-im-ma

a-na i-te-e é-sag-íl uš-te-te-ši-ir

PA₅ ^dUTU.È ša LUGAL ma-aḫ-ri ú-ša-aḫ-ru-ma

la ib-na-a su-uk-ki-šu

PA₅ ú-ša-aḫ-ri-ma i-na ku-up-ri ù a-gur-ri

ab-na-a su-uk-ki-šu

mé-e nu-uḫ-šu la na-pa-ar-ku-ti

ú-ki-in a-na MA.DA

a-na é-sag-íl ù é-zi-da la ba-aṭ-la-ak sa-at-ta-kam

ka-al ma-ḫa-zi DINGIR.DINGIR a-na zi-in-na-a-ti

aš-te-né-eʾ-a ka-a-a-nam

ì-nu-mi-šu É.GAL mu-ša-bu šar-ru-ti-ia

ša er-ṣe-tì ká-dingir-ra.KI ša qé-re-eb ba-bi-lam.KI

iš-tu a-a-i-bu-úr-ša-bu-um su-le-e KÁ.DINGIR.RA.KI

a-di ki-ša-du ÍD.BURANUN.KI

ša LUGAL ma-aḫ-ri i-pú-šu-ma ú-ra-ak-ki-su sì-ip-pu-šu

i-na li-ib-bi a-na ki-da₄-a-nim É.GAL

a-na mu-úḫ ki-ša-du ÍD.BURANUN.KI

i-qu-up-ma up-ta-aṭ-ṭi-ri ṣi-in-du-šu

i-ga-ru-ša qu-up-pu-tu ad-ke-e-ma

šu-pú-ul mé-e ak-šu-ud

mé-ḫe-ra-at mé-e i-na ku-up-ri ù a-gur-ri

i-ši-id-sa ú-ša-ar-ši-id-ma

e-pú-uš ú-ša-ak-li-il-ma

ú-ul-la-a re-e-ša-a-ša

GIŠ.EREN da-nu₄-tum a-na ši-i-pí-ša

GIŠ.GAN.DU₇-ša ù ṣu-lu-li-ša ú-ša-at-ri-iṣ

^dAMAR.UTU EN GAL ^dEN.LÍL DINGIR.DINGIR šu-pu-ú

nu-úr DINGIR.DINGIR ab-bé-e-šu

i-na qí-bi-ti-ka ṣi-ir-ti ša la na-ak-ri

É e-pú-šu la-la-a-šu lu-uš-bu

i-na qé-er-bi-ša ši-bu-tu lu-uk-šu-ud

lu-uš-ba-a li-it-tu-ú-ti

iš-tu AN.ÚR a-di AN.PA e-ma ^dUTU a-ṣu-ú

ša LUGAL.LUGAL ki-ib-ra-a-ti ša ka-al te-né-še-e-ti

bi-la-at-su-nu ka-bi-it-ti

lu-um-ḫu-úr qé-er-bu-uš-ša

li-i-pu-ú-a i-na qé-er-bi-ša a-na da-rí-a-ti

ṣa-al-ma-at qá-qá-dam li-be-e-lu