Neriglissar 01

^dNÈ.ERI₁₁.GAL-LUGAL-ú-ṣu-ur LUGAL TIN.TIR.KI

ru-ba-a-am na-a-da mi-gi-ir ^dAMAR.UTU

áš-ru ka-an-šu pa-li-iḫ EN EN.EN

e-em-qá-am mu-ut-né-en-nu-ú

mu-uš-te-eʾ-ú aš-ra-a-tì ^dAG EN-šu

ÉNSI za-ni-nu-um

ba-bi-il i-gi-se-e ra-bu-ù-tim

a-na é-sag-íl ù é-zi-da

mu-ṭa-aḫ-ḫi-id sa-at-tu-uk-ku

mu-uš-te-ši-ru šu-lu-úḫ-ḫi-šu-un

DUMU ^mdEN-šu-um-iš-ku-un NUN e-em-qá

eṭ-lum gi-it-ma-lum na-ṣi-ir

ma-aṣ-ṣa-ar-tì é-sag-íl ù TIN.TIR.KI

ša ki-ma BÀD dan-nu pa-ni ma-a-tim i-di-lu a-na-ku

ì-nu-um ^dAMAR.UTU ^dEN.LÍL DINGIR.DINGIR

ru-bu-ú (erasure) mu-uš-ta-li

ABGAL ša li-ib-bi ^di-gi₄-gi₄ ka-la-mu mu-du-ú

i-na ni-ši-ša ra-ap-ša-a-tim iš-ta-an-ni-ma

iš-tu mé-eṣ-ḫe-ru-ti-ia i-ša-ri-iš ṣab-ta-an-ni

šu-um ṭa-a-bi lu-ú im-ba-an-ni

áš-ri šu-ul-mi ù ba-la-ṭa lu-ú ir-te-ed-dan-ni

a-na i-ša-ru-ti-ia ša qá-qá-da-a a-pá-lu-šu

a-na ka-an-šu-ti-ia ša ka-a-a-nim

pu-lu-úḫ-tì i-lu-ti-šu aš-te-eʾ-ú

ša e-li-šu ṭa-a-bi e-pé-šu u₄-mi-ša-am a-ta-mu-ú

ip-pa-al-sa-an-ni-ma i-na ma-a-tim

šu-um da-am-qá a-na šar-ru-tim iz-ku-úr

a-na re-é-ú-tì ni-ši-ša a-na da-rí e-pé-šu

GIŠ.NÍG.GIDRU i-ša-ár-ti mu-ra-ap-pí-ša-at ma-a-tú

a-na šar-ru-ti-ia lu-ú iš-ru-kam

ši-bi-ir-ri ki-i-nu mu-ša-al-li-im ni-ši

a-na be-lu-tú lu-ú i-qí-pí-im

uš-pa-ri mu-ka-an-ni-iš za-ʾi-i-ru

lu-ú ú-ša-at-mi-ḫa qá-tu-ú-a

a-ga-a ki-i-nu ú-ša-aš-ša-an-ni-ma

a-na šar-ru-ti-ia ša-ni-nu ù mu-gal-li-tú ul ú-ša-ab-ši

a-na-ar a-a-bi aš-gi-iš za-ma-nu

la ma-gi-ri ka-li-šu-nu a-lu-ut

mi-ša-ri i-na ma-a-tim aš-ta-ak-ka-an

ni-ši-ia ra-ap-ša-a-tim i-na šu-ul-mi

(erasure) ar-ta-né-eʾ-e

i-na u₄-mi-šu a-na ^dAMAR.UTU DINGIR ba-an né-me-qí

ša i-na ^di-gi₄-gi₄ šu-úr-ba-tim a-ma-at-su

i-na ^da-nun-na-ki šu-tu-qá-at be-lu-ut-su

pa-al-ḫi-iš at-ta-ʾi-id-ma

É.GAR₈ si-ḫi-ir-tì é-sag-íl mé-eḫ-ra-at IM.SI.SÁ

ša ra-am-ku-tim ki-ni-iš-ti é-sag-íl

ra-mu-ù qé-re-eb-ša

ša šar ma-aḫ-ri uš-ši-ša id-⸢du-ma⸣

la ul-lu-ú re-e-ši-⸢ša⸣

i-na ta-am-le-e iš-ta-ap-pí-lu-⸢ma⸣

i-ni-šu i-ga-ru-ša

ri-ik-sa-ti-ša la du-un-nu-nim

si-ip-pu-šu la ku-un-nu-⸢um⸣

BUR.SAG.GÁ a-na ul-lu-lu šu-lu-uḫ-ḫu a-na ⸢na⸣-[de-e]

ta-ak-li-mu be-lí ra-bu-ú ^d⸢AMAR⸣.[UTU]

a-na ub-bu-bi-im-ma šu-ul-lu-mu sa-at-⸢tuk⸣-[ku]

še-eṭ-ṭim ù ḫi-ṭi-tim a-na la šu-ub-ši-[i]

te-em-me-en-ša la-bí-ri a-ḫi-iṭ ab-re-e-⸢ma⸣

e-li te-em-me-en-ni-šu la-bí-ri ú-ki-in uš-ši-šu

ú-za-aq-qí-ir mé-la-a-šu ul-la-a ḫu-úr-sa-ni-iš

si-ip-pu-šu ú-ki-in-ma i-na KÁ-šu

e-er-ta-a GIŠ.IG.MEŠ

⸢ki-sa⸣-a ⸢dan-nim⸣ i-na ESIR.UD.A

ù SIG₄.AL.ÙR.RA ú-ša-às-ḫi-ir

^dAMAR.UTU EN šu-úr-bi-i e-te-el-lu ṣi-i-ri

ka-ab-ti ši-it-ra-ḫu nu-úr ì-lí ab-bé-e-šu

li-pí-it qá-ti-ia šu-qú-ru-um

ḫa-di-iš na-ap-li-is-ma

ba-la-ṭa₄ UD.MEŠ ar-ku-tim še-bé-e li-it-tu-tú

ku-un-nu GIŠ.GU.ZA ù la-ba-ri pa-le-e

a-na še-ri-ik-tim šu-úr-kam

i-na qí-bi-ti-ka ki-it-tim ša la na-ka-ri

^dNÈ.ERI₁₁.GAL-LUGAL-ú-ṣur lu-ú LUGAL za-ni-nu

mu-uš-te-eʾ-ú aš-ra-ti-ka

a-na du-úr da-ra a-na-ku